មន្ត្រីសង្គមស៊ីវិលដែលតាមដានការអភិវឌ្ឍសង្គម និងមន្ត្រីជំនាញផ្នែកកសិកម្មថ្លែងថា ការដែលប្រជាកសិករខ្មែរនៅតែបន្តទម្លាប់ដុតជញ្ជ្រាំងស្រូវចោលនៅក្នុងស្រែរបស់ខ្លួន បណ្ដាលឱ្យប៉ះពាល់ច្រើនណាស់ទាំងចំពោះគុណភាពដី និងបរិស្ថាន ។
មន្ត្រីសង្គមស៊ីវិលនិងអ្នកជំនាញស្នើឱ្យប្រជាកសិកររក្សាទុកជញ្ជ្រាំងនៅក្នុងស្រែដោយធ្វើការភ្ជួរលុប ព្រោះជញ្ជ្រាំងអាចជួយចិញ្ចឹមពពួកបាក់តេរីដែលជាមីក្រូសារពាង្គកាយនៅក្នុងដី បង្កើតបានជាមមោក ធ្វើឱ្យដីធូរ បង្កើនការស្រូបទឹកនិងជីបានល្អ ។
ក្រុមមន្ត្រីទទូចឱ្យប្រជាកសិករបោះបង់ចោលនូវទម្លាប់ក្នុងការដុតជញ្ជ្រាំងស្រូវចោលនៅក្នុងស្រែតទៅទៀត និងអំពាវនាវសូមស្ថាប័នពាក់ព័ន្ធធ្វើការអប់រំណែនាំបន្ថែម ដោយពួកគាត់ប្រៀបធៀបការដុតជញ្ជ្រាំងទៅនឹងការដុតលុយចោលយ៉ាងដូច្នោះដែរ ។
