សមាគមសម្ព័ន្ធអ្នកសារព័ត៌មានកម្ពុជា

តម្រូវ​ការ​សាលាសម្រាប់​ក្មេងមានអូទីហ្សឹម​កើន​ឡើង ស្របពេល​​ចំនួន​គ្រូបណ្ដុះបណ្ដាលនៅ​មាន​តិច

កូនសិស្សតូចៗកំពុងរៀនក្នុងកម្មវិធីអប់រំពិសេសនៅក្នុងថ្នាក់រៀនមួយកន្លែងកាលពីថ្ងៃទី២៥ ខែមករា ឆ្នាំ២០២៤។ (រូបភាព៖ ទំព័រហ្វេសប៊ុកសាលាអប់រំពិសេសក្រុងតាខ្មៅ)
កូនសិស្សតូចៗកំពុងរៀនក្នុងកម្មវិធីអប់រំពិសេសនៅក្នុងថ្នាក់រៀនមួយកន្លែងកាលពីថ្ងៃទី២៥ ខែមករា ឆ្នាំ២០២៤។ (រូបភាព៖ ទំព័រហ្វេសប៊ុកសាលាអប់រំពិសេសក្រុងតាខ្មៅ)

នាយក​សាលា​អប់រំ​ពិសេស​ក្រុង​តាខ្មៅ លោក ចាន់ សារិន បាន​ឲ្យ​ដឹង​ថា​ចំនួន​កុមារ​មាន​អូទីហ្សឹម​កើន​ឡើង​ដល់​ជាង​២០ ០០០​នាក់​ហើយ​នៅ​កម្ពុជា​។ លោក​ថា​នេះ​ជា​តួលេខ​ដែល​បានពី​ការ​សិក្សា​ស្រាវ​ជ្រាវ​មួយ​ចេញ​ផ្សាយ​​កាល​ពី​ថ្ងៃ២ ខែមេសា ឆ្នាំ២០១៩​។ លោក​ថា​ចំនួន​ដ៏​ខ្ពស់​នេះ​បាន​បង្ហាញ​ថាឪពុកម្ដាយ ឬ​អាណព្យាបាល​មាន​ការ​យល់​ដឹង​ខ្ពស់​ទាក់​ទង​នឹង​បញ្ហា​អូទីហ្សឹម​។​

សាលា​របស់​លោក ​សារិន​ ត្រូវ​បាន​ទទួល​ស្គាល់​ដោយ​រាជរដ្ឋាភិបាល​។ សាលានេះ​បាន​បណ្ដុះ​បណ្ដាល​កុមារ​ដែលមានអូទីហ្សឹម​ចាប់​ពី​ថ្នាក់​មតេយ្យ​ដល់​ថ្នាក់​ទី​១២។​

លោក​បា​ន​ប្រាប់​ខេមបូចា​ថា កុមារ​ដែល​រក​ឃើញ​ថា​មាន​បញ្ហា​អូទីហ្សឹម​មាន​ចំនួន​កើន​ឡើង​គួរ​ឲ្យ​កត់​សម្គាល់​គិត​តាំង​ពី​ឆ្នាំ​២០២០ ដែល​នេះ​បង្ហាញ​ពី​ការ​កើន​ឡើង​អត្តសៃញ្ញាណ​ក្មេង​មាន​អូទីហ្សឹម​ក្នុង​ចំណោម​ក្មេង​ដទៃ​ទៀត​នៅ​កម្ពុជា​។​

លោក​មាន​ប្រសាសន៍ថា៖ «​កង្វល់​របស់​ខ្ញុំ​គឺ​ថា​កុមារ [មានអូទីហ្សឹម] ​នៅ​ខេត្ត​ខ្លះ​មិន​មាន​សាលា​[អប់រំពិសេស]។ ឪពុកម្ដាយ​នៅ​ខេត្ត​ខ្លះ​មាន​ការ​ព្រួយបារម្ភ និង​បាន​ទាក់ទង​មកខ្ញុំថា​ត្រូវ​ធ្វើ​ម៉េច​ដើម្បី​បញ្ចូន​កូន​មក​សាលា​បាន​»។

សាលា​របស់​លោក​បាន​ប្រឈម​ទៅ​នឹង​ចំនួន​កុមារ​ដែល​មាន​អូទីហ្សឹមដែល​​ត្រូវ​ការ​ការគាំទ្រ​តាំង​ពី​ឆ្នាំ​២០១៩​ មក​ម្លេះ ដែល​កាល​នោះ​មាន​កុមារ​ប្រហែល​៦០០​នាក់​ត្រូវ​ការ​ជំនួយ តែ​ទីធ្លាសាលា​អាច​ដាក់​បាន​ត្រឹម​សិស្ស​៣០០​នាក់​ប៉ុណ្ណោះ​។ តាម​រយៈ​ចំនួ​ន​នេះ សាលា​មាន​គម្រោង​កសាង​អគារសិក្សាបន្ថែម​ដើម្បី​ទទួល​សិស្ស​បាន​២០០​នាក់​បន្ថែម​ទៀត ​អាចចូលរៀននៅ​ត្រឹម​ឆ្នាំ​២០២៥ ឬ​២០២៦​។​

​លោក​ក៏​មាន​កង្វល់​ជា​ខ្លាំង​ដែរ​ ខណៈ​ពេល​ដែល​ចំនួន​សិស្ស​កាន់​តែ​កើន​ឡើង តែ​ធនធាន​ដែលបាន​បណ្ដុះ​បណ្ដាល​ទាក់​ទង​នឹង​ជំនាញ​បង្ហាត់​បង្រៀន​កុមារ​មាន​អូទីហ្សឹម​គឺ​នៅ​មាន​កម្រិត​។​

លោក​ឲ្យ​ដឹងថា​៖ «​គោលនយោបាយ​ក្រ​សួង​[អប់​រំ យុវជន និងកីឡា]​មានការចាប់អារម្មណ៍​ [ក្មេង​មាន​អូទីហ្សឹម​] ក៏ប៉ុន្តែ​កុមារមានការកើនឡើងហើយតម្រូវការមានការច្រើនឡើងក៏ប៉ុន្តែក្រសួងមិនអាចឆ្លើយតបបាននោះទេ»។

អ្នកស្រី សុផល សុម៉ាលីស វ័យ​៤៤​ឆ្នាំ ដែលមានកូមមាន​អូទីហ្សឹម។ អ្នកស្រី​ប្រាប់​ខេមបូ​ចា​ថា បច្ចុប្បន្ន​មាន​មនុស្ស​​បាន​បើក​ចិត្ត​ទូលាយយល់ដឹងច្រើន​ជាង​មុន​ចំពោះ​ក្មេង​មាន​អូទីហ្សឹម បើ​ធៀប​ទៅ​នឹង​ប្រាំ​ឆ្នាំ​មុន។ ម្ចាស់​ហាង​បបរស​ចែម៉ាលីស ក្នុង​បុរីប៉េង​ហួត​បឹង​ស្នោរ​រូប​នេះ​បន្ត​ថា​យ៉ាងណា​ក៏​នៅ​មាន​មនុស្ស​ជា​ច្រើន​ទៀត​នៅ​មិន​ទាន់​យល់​ដឹង​ច្បាស់​ពី​បញ្ហា​អូទីហ្សឹម​។​

​ទន្ទឹម​នឹង​មាន​មជ្ឈមណ្ឌល​រដ្ឋ និង​ឯក​ជន​បាន​ផ្ដល់​សេវា​ប្រឹក្សា​សម្រាប់​ក្មេង​មាន​អូទីហ្សឹម​ដែល​បាន​ផ្ដល់​ឱកាស​ឲ្យ​ម្ដាយ​ឪពុក​ងាយ​ស្វែង​រក​ការ​ប្រឹក្សា​យោបល់។ ក៏ប៉ុន្តែ​នៅ​មាន​គ្លិនិក​មិនមាន​ជំនាញ​មួយ​ចំនួន​នៅ​បន្ត​ប្រតិបត្តិការ ដែល​នេះ​អាច​នាំ​ឲ្យ​​មាន​ការ​ធ្វើ​រោគវិនិច្ឆ័យ​ខុសពីស្ថានភាពរបស់កុមារ​ដែលមានអូទីហ្សឹម​។​

អ្នកស្រី​បន្ត​ថា៖ «​នាពេលអនាគតក្នុង​នាមខ្ញុំ​ជា​ម្ដាយ​មាន​កូន​កើត​អូទីហ្សឹម ខ្ញុំ​ចង់​ឃើញ​ប្រជា​ជន​កម្ពុជាយើង​យល់​​ដឹង​កាន់​តែ​ច្បាស់​ពី​កុមារ​​​អូទីហ្សឹម​ និង​មិន​រើស​អើង​លើ​ពួក​គាត់ ព្រោះពួកគាត់ក៏ជាធនធានម្នាក់ដែលត្រូវមានសិទ្ធិគ្រប់គ្រាន់ផងដែល​»។​

អ្នកស្រី​ ម៉ាលីស ថាក្នុងនាមជាអាណាព្យាបាល​ដែល​មាន​កូន​កើត​អូទីហ្សឹម ចង់ជំរុញ​ឲ្យ​រដ្ឋាភិបាល និង​ក្រ​សួង​ពាក់​ព័ន្ធ​ជំរុញ​ការ​យល់​ដឹង​ពី​បញ្ហា​អូទីហ្សឹម និង​ពង្រឹង​ការគាំពារ​កុមារ​មាន​អូទីហ្សឹម កាត់​បន្ថយ​ការរើស​អើង​លើ​ក្មេងៗ​ទាំង​នោះ​។​

អ្នកស្រីបន្តថា​ក៏​ចង់​ស្នើ​ឲ្យ​មាន​សាលា​សម្រាប់​ការ​អប់​រំពិសេស​សម្រាប់​ក្មេង​ៗ​ទាំង​នោះ មាន​ទាំង​សាលា​រដ្ឋ និង​សាលា​អង្គការ​ក្រៅ​រដ្ឋាភិបាល ដើម្បី​ជួយ​សម្រួល​បន្ទុក​របស់​ឪពុក​ម្ដាយ ដែល​មិន​អាច​មាន​លទ្ធភាព​បញ្ជូន​កូន​​ទៅ​សាលា​ឯកជន​បាន​។​

លោក ហឿ សេធុល ប្រធានសមាគមអ្នកប្រឹក្សាយោបល់ និងអ្នកចិត្តសាស្រ្តនៅកម្ពុជា​ មាន​ប្រសាសន៍ថាសមាគមចិត្តសាស្រ្តអាមេរិក(APA) បាន​ចេញ​ផ្សាយ​រោគវិនិច្ឆ័យនិងស្ថិតិនៃជំងឺផ្លូវចិត្ត (DSM) ដែល​បាន​បញ្ជាក់ថា​បញ្ហា​អូទីហ្សឹម គឺ​ជា​បញ្ហា​ដែលកើតចេញពី​កំណើត​។ លោក​ថា​ឪពុក​ម្ដាយ​ដែល​មាន​កូន​កើត​អូទីហ្សឹម​អាច​សម្គាល់​អប្បកិរិយា​របស់​កូន​បាន​រវាង​អាយុ​​មួយ​​ឆ្នាំ​ទៅ​មួយ​ឆ្នាំ​កន្លះ​។​

លោក​បន្ត​ថា​កុមារ​ដែល​កើត​មក​មាន​អូទីហ្សឹម​មាន​ការ​ពិបាក​ក្នុង​ការ​ធ្វើ​ទំនាក់ទំនង​ក្នុង​សង្គម និង​មាន​ប្រតិកម្ម​ទៅ​នឹង​រឿង​មួយ​ចំនួន​ដូច​ជា​រសជាតិ ការ​ប៉ះ ការ​ស្ដាប់​ ការ​មើល និង​ក្លិន​ ជា​ដើម​។ បើ​តាម​ឯកសារ​របស់​ DSM និង​ ADS គេ​បែង​ចែក​អូទីហ្សឹម​ជា​បួន​កម្រិត គឺ​កម្រិត​ស្រាល កម្រិត​មធ្យម​ ធ្ងន់​ធ្ងរ និង​ធ្ងន់ធ្ងរ​បន្តិច​។​

បើ​តាម​លោក ហឿ សេធុល ដែល​ជា​អ្នក​ជំនាញ​ប្រឹក្សា​ផ្នែក​ចិត្តសាស្រ្តាសម្រាប់​កុមារ​ដែលមាន​អូទីហ្សឹមលើកឡើងថា ​ឪពុក​ម្ដាយមួយចំនួន​មិន​ទាន់​យល់​ច្បាស់​ពី​បញ្ហា​អូទីហ្សឹម​នៅឡើយ​ទេ​។ លោក​ថា​មាន​ប្រហែល​ជា​៣០​ភាគរយ​ប៉ុណ្ណោះយល់ដឹងពី​រឿង​នេះ បើ​ធៀប​ទៅ​នឹង​ឪពុក​ម្ដាយ​ក្នុង​ប្រទេស​អភិវឌ្ឍន៍​។​

​ការ​អប់​រំ និង​ការ​ប្រឹក្សា​ជាមួយ​គ្រូពេទ្យ​ជំនាញ​​អាច​ជួយ​ព្យាបាល​កុមារ​ដែលមាន​អូទីហ្សឹម និង​ធ្វើ​ឲ្យ​ស្ថាន​ភាព​ពួក​គេ​កាន់​តែប្រសើរ​ឡើង បើ​ទោះបី​ជា​ពួក​គេ​មាន​អូទីហ្សឹម​ពី​កំណើត​ក៏​ដោយ​។​

លោក​បន្តថា៖ «​ម្ដាយ​ឪពុក​ខ្លះ​យល់​ថា​អូទីហ្សឹម​អាច​ព្យាបាល​ជាសះស្បើយ ប៉ុន្តែ​វា​មិន​មាន​ការព្យាបាល​ជា​ទេ។ ក្មេង​មាន​អូទីហ្សឹម​ត្រូវ​ការ​ការ​ជួយ​ជ្រោម​ជ្រែង​យូរអង្វែង[ពេញមួយជីវិតរបស់ពួកគេ]»។ លោក​បន្ថែម​ថាកម្ពុជា​នៅ​ខ្វះ​អ្នកជំនាញ និង​សេវា​ដែល​ផ្ដោត​លើការ​ប្រឹក្សា​ជា​មួយ​ឪពុកម្ដាយ​ដែល​មាន​កូន​កើត​អូទីហ្សឹម​​។​

ប្រធាន​​នាយកដ្ឋានសុខុមាលភាពជនមានពិការភាព​នៃ​ក្រ​សួង​សង្គម​កិច្ច លោក សាន់ រតនា មាន​ប្រសាសន៍​ថា មិន​ទាន់​អាច​ដឹង​បាន​ទេ​ថា​កម្ពុជា​មាន​កុមារ​កើត​អូទីហ្សឹម​ចំនួន​ប៉ុន្មាន​ឲ្យ​ប្រាកដ ពីព្រោះ​​ជំរឿន​ពី​រឿង​នេះ​មិនទាន់ចប់នៅឡើយ។ លោក​ថា​ជំរឿន​ ត្រូវការរយៈពេល១០​ឆ្នាំ​ក្នុងការធ្វើរឿងនេះ។​ ការធ្វើជំនឿននេះបានចាប់ផ្តើមនៅឆ្នាំ ២០២០។

​ទៅ​ថ្ងៃ​ខាង​មុខ គោល​ដៅ​របស់​សង្គម​ស៊ីវិល គឺចង់មានការ​ប្រមូល​ទិន្ន័យ​ក្មេង​មាន​អូទីហ្សឹម​ម្ដង​ក្នុង​មួយ​ឆ្នាំ ដើម្បីដឹងចំនួន​ក្មេង​ដែលអាច​មាន​បញ្ហា​អូទីហ្សឹម និង​សិក្សា​បន្ថែម​លើ​បញ្ហា​នេះ​ដែរ ថា​តើ​តួលេខ​បាន​ឡើង ឬ​ក៏ថយ​ចុះ ដើម្បី​ងាយ​ស្រួល​ក្នុង​ការ​គ្រប់​គ្រង​បញ្ហា​។​

លោក​បន្ថែម​ថាកិច្ចគាំពារសង្គម​កុមារ​មាន​អូទីហ្សឹម​នៅ​មិ​ន​ទាន់​មាន​គ្រប់គ្រាន់នៅ​ឡើយ ខណៈ​ដែល​សាលា​សម្រាប់​ក្មេង​មាន​អូទីហ្សឹម​មិន​ទាន់​មាន​គ្របដណ្តប់​នៅ​ទូ​ទាំង​ប្រទេស​នៅ​ឡើយ​។​ ក្រ​សួង​អប់រំ​កំពុង​ធ្វើ​ការ​លើ​រឿង​នេះ និង​មាន​ផែន​ការពង្រីក​ការ​អប់រំ​លើ​វិស័យ​​នេះ​ផង​ដែរ​។​

លោក​បន្ត​ថា៖ «​យើង​ត្រូវ​តែ​ប្រមូល​ទិន្ន័យ​​អំពី​ក្មេង​ដែល​មាន​អូទីហ្សឹម​ក្នុង​ប្រទេសកម្ពុជា និង​ដាក់​ពួក​គេ​ទៅ​ក្នុង​មូលដ្ឋាន​ទិន្ន័យ​ថ្នាក់​ជាតិ​ ដូច​នេះ​យើង​អាច​ដឹង​ថា​ក្មេង​មា​នអូទីហ្សឹម​មាន​ចំនួន​ប៉ុន្មាន​នៅ​តំបន់​មួយ​ៗ [ដើម្បី​ផ្ដល់]សេវា [អប់​រំ​ពិសេស​]»។ ផ្អែក​តាម​ទិន្ន័យ រដ្ឋាភិបាល​នឹង​អាច​រៀប​ចំ​កម្មវិធី​អប់រំពិសេស​ឲ្យ​ចំគោលដៅ និង​តម្រូវ​ការ​នៅ​តាម​តំបន់​។​

លោក រតនា មាន​ប្រសាសន៍ទៀតថា​ការ​ធ្វើ​ជំរឿន​ក៏​មានការ​ប្រឈម​ដែរ ពីព្រោះ​ថាចំនួន​អ្នក​ស្ម័គ្រ​ចិត្ត​មាន​តិច​ក្នុង​ការ​ប្រមូល​ទិន្ន័យ និង​ប្រជាពលរដ្ឋមួយចំនួន​មិន​បើក​ចំហ​ក្នុង​ការ​ផ្ដល់​ព័ត៌មាន​​។​

លោកគ្រូ អ្នកគ្រូ​កំពុង​មើល​សកម្មភាព​សិស្ស​នៅ​ក្នុង​ថ្នាក់ ដែល​ជា​ផ្នែក​មួយ​នៃ​កម្មវិធី​អប់​រំពិសេស​កាលពី​ថ្ងៃទី​២៥​ ខែមករា ឆ្នាំ​២០២៤​។​ (រូបភាព៖ ហ្វេស​ប៊ុក​របស់​សាលាអប់រំពិសេស​ក្រុង​តាខ្មៅ)

​ជា​មួយ​គ្នា​នេះ​ដែរ ស្រ្តី​ជា​ម្ដាយ​ម្នាក់​​ដែល​មាន​កូន​កើត​អូទីហ្សឹម បាន​សរសេរ​អត្ថបទ​មួយ​បង្ហោះ​លើ​ហ្វេស​ប៊ុក​របស់​ខ្លួន​កាល​ពី​ថ្ងៃទី​២៩ ខែធ្នូ ឆ្នាំ​២០២៣ ដោយ​បាន​គូស​បញ្ជាក់​ពី​ការ​រើស​អើង​លើ​កូន​របស់​ខ្លួន​នៅ​កន្លែង​ក្មេង​លេង​មួយ​កន្លែង។​

សំណេរ​នោះ​បាន​លើក​ឡើង​ថា​ក្មេង​មាន​អូទីហ្សឹម​ប្រឈម​ការ​រើស​អើង​ពេញ​មួយ​ជីវិត និង​ត្រូវ​បាន​សង្គម​ផាត់​ចោល ដែល​​ធ្វើ​ឲ្យ​មាន​ផល​ប៉ះពាល់​ធ្ងន់​ធ្ងរ​ដល់​ពួក​គេ​ ព្រោះ​វា​ប៉ះពាល់​ដល់​សិទ្ធិ​ក្នុង​ការ​រស់​នៅ​ក្នុង​សង្គម​។​

​ស្រ្តី​ជា​ម្ដាយ​រូប​នោះ​បាន​និយាយ​ថា​ក្មេង​មាន​សិទ្ធិ​ដូច​គ្នា មិន​ថា​សិទ្ធិ​រស់​រានមានជីវិត សិទ្ធិទទួល​បាន​អាហារហូបចុក សិទ្ធិទទួល​បានការអប់រំ និង​សេរីភាព​។​

ម្ដាយ​ដដែល​និយាយ​ថា៖ «​ថ្វីបើ​មាន​ក្មេង​ខ្លះ​មិនសូវដឹងអី​ ឲ្យពួក​គេ​លេងទៅ ព្រោះ​ថា​ក្មេង​គ្នា​មិន​ដឹង​អ្វី​ទេ»។ ស្រ្តី​ដដែល​បន្ថែម​ថា ពួក​គេ​គួរ​តែ​បាន​ការ​យោគយល់ ពីព្រោះ​ពួក​គេ​ខុស​ពី​មនុស្ស​ធំ​ដែល​បាន​ធ្វើ​កំហុស​ឆ្គង​។​

គួរ​តែ​មាន​ការ​អប់​រំ​អំពី​អូទីហ្សឹម ដែល​អាច​បង្រៀន​នៅ​តាម​មជ្ឈ​មណ្ឌល​អប់​រំ បើ​ទោះបី​ជា​ពួក​គេ​នៅ​មិន​ទាន់​បាន​យល់​ដឹង​គ្រប់​គ្រាន់​ក៏​ដោយ​។​

សំណេរ​ដដែល​លើក​ឡើង​​ទៀត​ថា៖ «​ហេតុ​អ្វី​មានការ​រើស​អើង​? វា​ដូច​ជា​ទម្លាក់​តម្លៃសង្គម​ទាំង​មូល។ ក្មេង​មាន​សិទ្ធិ​រស់​នៅ ហើយ​វា​មាន​សារសំខាន់ណាស់​សម្រាប់​សង្គម»។​

​អ្នក​នាំពាក្យ​ក្រ​សួង​អប់​រំ អ្នកស្រី ឃួន វិច្ឆិកា មាន​ប្រសាសន៍​ថាក្រ​សួង​មាន​ដៃគូ​ជាមួយ​អង្គការ​មិនមែន​រដ្ឋាភិបាល ដែល​ធ្វើ​ការ​លើ​ក្មេង​មាន​អូទីហ្សឹម ដើម្បី​ដាក់​បញ្ចូល​កម្មវិធី​សិក្សាអំពី​អូទីហ្សឹម​ទៅ​ក្នុង​សាលា​រៀន​។  ក្រ​សួង​ក៏​បាន​ដំណើរ​ការ​សាលា​រដ្ឋ​នៅ​ក្រុង​តាខ្មៅ និង​រៀបចំ​គោលនយោបាយ​ពិសេស​ដោយ​រួម​បញ្ចូល​ការអប់រំជំនាញ​​អូទីហ្សឹម​ជាមូយ​អង្គការ​ដៃ​គូ​ដល់​គ្រូ​ៗ​ផង​ដែរ។​

​បន្ថែម​ពី​នេះ គោល​នយោបាយ​ដែល​បាន​ដាក់​ចេញ​ចំពោះ​វិទ្យាស្ថាន​អប់​រំពិសេស ឲ្យ​បណ្ដុះបណ្ដាល​គ្រូៗ​ដើម្បី​បង្រៀន​កុមារ​មាន​ពិការភាព ដែល​រួម​ទាំង​កុមារដែលមានពិការ​ភ្នែក និង​កុមារ​មាន​អូទីហ្សឹម​។​

អ្នកស្រី​បន្ត​ថា៖ «​កម្មវិធី​ផ្សេង​ទៀត ក្រសួង​កំពុង​​រៀប​ចំ​ជា​សៀវភៅពុម្ព។ យើង​មាន​សៀវភៅ​ពុម្ព​សម្រាប់​កុមារ​ទូទៅ ប៉ុន្តែ​យើង​ក៏​យក​ចិត្ត​ទុក​ដាក់​លើ​តម្រូវ​ការ​ចាំ​បាច់​របស់​ក្មេង​មាន​អូទីហ្សឹម និង​ក្មេង​ដែល​ខ្សោយ​បញ្ញា​ដែរ»។​

អ្នកស្រីថា​ក្រសួង​មាន​សាលា​ដែល​ជាថ្នាក់សមាហរណកម្មឲ្យ​ក្មេង​មាន​អូទីហ្សឹម​ចូល​រៀន មាន​ចំនួន​៨៦ថ្នាក់ ដែល​គាំទ្រ​ដល់​សិស្ស​ដែល​ខ្សោយ​បញ្ញា និង​អូទីហ្សឹម ​នៅតាម១២រាជធានីគោល​ដៅ នៅ​ក្នុង​នោះមាន២៦​ក្រុងស្រុកខណ្ឌ ​។ ទី​តាំង​ទាំង​នោះ​មាន​សាលា​ចំនួន​៤៩ និង​មាន​សិស្ស​សរុប​៩៤២​នាក់ ក្នុង​នោះ​សិស្ស​ស្រី​ចំនួន​៣០១​នាក់។ ព្រម​ជាមួយ​គ្នា​នោះ​គ្រូបង្រៀន​សរុប​មាន​​១៧៨​រូប សម្រាប់​កម្មវិធីសិក្សា​នេះ។​

ថ្នាក់​សមាហរណកម្មសំដៅលើ​ថ្នាក់​រៀន​សម្រាប់​សិស្ស​មានអូទីហ្សឹម ដោយ​មិន​មែនសាលា​បែង​ចែក​ដាច់សម្រាប់​សិស្ស​អូទីហ្សឹម​នោះទេ​។​

​ អ្នកនាំពាក្យ​រូប​នេះ​ឲ្យ​ដឹង​ទៀត​ថា គ្រូបង្គោល​​ចំនួន​៩២រូប​ ​​​បាន​បណ្ដុះ​បណ្ដាល​​គ្រូ​អំពី​ការ​អប់​រំពិសេស​លើ​បញ្ហា​អូទីហ្សឹម និង​ព័ត៌មាន​ក្នុង​ថ្នាក់ និង​គ្រូ​ទទួល​ការ​បណ្ដុះ​បណ្ដាល​១ ៦០៩​នាក់​ផ្សេង​ទៀត​សម្រាប់​បង្ហាត់​បង្រៀន​កូន​សិស្ស​ពិការ​ភ្នែក និង​ថ្លង់​។ កម្មវិធី​ក៏​បាន​បណ្ដុះ​បណ្ដាល​គ្រូ​ដែ​ល​គ្រប់​គ្រង​លើ​សិស្ស​មាន​ពិការភាព និង​អូទីហ្សឹម​សម្រាប់​ថ្នាក់​ទី​មួយ​ដល់​ទី១២​ និង​ជួយ​ពួក​គេ​​ចូល​ប្រឡង​យក​សញ្ញាបត្រ​បាក់​ឌុប​ផង​ដែរ។​

​យ៉ាងណា អ្នកស្រី​បដិសេធ​ធ្វើ​អត្ថាធិប្បាយ​ថា​តើ​មា​ន​ក្មេង​កើត​អូទីហ្សឹម​ចំនួន​ប៉ុន្មាន​អាច​បន្ត​ការ​សិក្សា​នៅ​ថ្នាក់​សាកលវិទ្យាល័យ​​។​

អ្នកនាំពាក្យ​ក្រសួងការងារ លោក កត្តា អ៊ន បដិសេធ​ឆ្លើយ​សំណួរ​ទាក់​ទង​នឹង​ឱកាស​ការងារ​របស់​យុវជន​ដែល​មាន​អូទីហ្សឹម​។​

បើ​តាម​អង្គការ​សុខភាព​ពិភព​លោក កាលពី​ខែ​វិច្ឆិកា ឆ្នាំ​មុន បាន​លើក​ឡើង​ថា​ក្មេង​ម្នាក់​ក្នុង​ចំណោម​១០០​នាក់​នៅ​លើ​ពិភព​លោក​មាន​អូទីហ្សឹម​។ ការ​ប៉ាន់​ប្រមាណ​នេះ គិត​តួ​លេខ​ជា​មធ្យម​។​

​ការ​សិក្សា​មួយ​ចំនួន​បាន​លើក​ឡើង​ថា​ចំនួន​ក្មេ​ង​មាន​អូទីហ្សឹម​អាច​ខ្ពស់​ជាង​នេះ។ ក្នុងចំនួន​ប្រេវ៉ាឡង់ក្មេង​មាន​អូទីហ្សឹម​ក្នុង​ប្រទេស​មាន​ចំណូល​ទាប និង​មធ្យម មិនមានតួលេខ​ជាក់​លាក់​ទេ​ ៕

ប្រែសម្រួលពីអត្ថបទភាសាអង់គ្លេស៖  Demand for Schools for Autistic Children Rises Amid Acute Shortage of Trained Teachers, Resources

445 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម