តំណាងរាស្ត្រ និងសមាជិកក្រុមប្រឹក្សាឃុំសង្កាត់នៃគណបក្សនយោបាយចំនួនបួន ដែលបានចូលរួមប្រកួតប្រជែងក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ បានបោះឆ្នោតតាមកាលកំណត់ចាប់ពីម៉ោង ៧ព្រឹក រហូតដល់ម៉ោង ៣រសៀលថ្ងៃអាទិត្យ ទី២៥ ខែកុម្ភៈ ឆ្នាំ២០២៤ ។
គណបក្សទាំងបួនគឺ គណបក្សប្រជាជនកម្ពុជា គណបក្ស ហ៊្វុនស៊ិនប៉ិច គណបក្ស ឆន្ទៈខ្មែរ និងគណបក្ស កម្លាំងជាតិ ។ ការបោះឆ្នោតត្រូវបានរៀបចំក្នុងការិយាល័យបោះឆ្នោតចំនួន ៣៣ នៅទូទាំងប្រទេស តាមមណ្ឌលដោយចែកចេញជា ៨ភូមិភាគ ។
អ្នកបោះឆ្នោតម្នាក់ៗសុទ្ធតែអះអាងថា គណបក្សរបស់ខ្លួននឹងទទួលបានជ័យជម្នះ ហើយអ្នកបោះឆ្នោតមកពីគណបក្សក្រៅរដ្ឋាភិបាលរំពឹងថា គណបក្សរបស់ខ្លួននឹងទទួលបានតំណែងក្នុងព្រឹទ្ធសភា ដើម្បីបានជាឱកាសចូលរួមចំណែកក្នុងការគិតគូរដោះស្រាយបញ្ហារបស់ជាតិ ។
មន្ត្រីគណបក្សប្រជាជនកម្ពុជា អះអាងថា គណបក្សប្រជាជនកម្ពុជាទទួលបានជ័យជម្នះដ៏ត្រចះត្រចង់លើសពីការរំពឹងទុក ។
ចំណែកមន្ត្រីគណបក្សក្រៅរដ្ឋាភិបាលថ្លែងថា ផ្អែកតាមលទ្ធផលបឋម ដែលទទួលបានពីភ្នាក់ងារសង្កេតការណ៍របស់គណបក្ស គណបក្សរបស់ខ្លួនទទួលបានលទ្ធផលអាសនៈតិចខុសពីការរំពឹងទុកឆ្ងាយពេក ។
