សមាគមសម្ព័ន្ធអ្នកសារព័ត៌មានកម្ពុជា

ទោះបីមានការគំរាមកំហែង មេដឹកនាំគណបក្សភ្លើងទៀននិយាយថា គណបក្សនេះផ្តោតលើគោលនយោបាយនិងសកម្មភាពមូលដ្ឋាន

ថ្នាក់ដឹកនាំនិងសមាជិកគណបក្សភ្លើងទៀនជួបជុំគ្នានៅខេត្តស្ទឹងត្រែង កាលពីថ្ងៃទី១៥ ខែមករា ឆ្នាំ២០២៣។ (ទំព័រហ្វេសប៊ុកគណបក្សភ្លើងទៀន)
ថ្នាក់ដឹកនាំនិងសមាជិកគណបក្សភ្លើងទៀនជួបជុំគ្នានៅខេត្តស្ទឹងត្រែង កាលពីថ្ងៃទី១៥ ខែមករា ឆ្នាំ២០២៣។ (ទំព័រហ្វេសប៊ុកគណបក្សភ្លើងទៀន)

ខណៈដែលថ្នាក់ដឹកនាំកំពូលរបស់គណបក្សភ្លើងទៀន ប្រឈមមុខនឹងការប្តឹងផ្តល់ និងការចាប់ខ្លួន ក្រុមមេដឹកនាំគណបក្សនេះនិយាយថា ខ្លួន​កំពុងផ្តោតលើសកម្មភាពតាមមូលដ្ឋាន និងរៀបចំបង្កើត​គោល​នយោបាយ​គណបក្សនៅមុន​ការ​បោះឆ្នោតជាតិនាខែកក្កដា។

ប៉ុន្តែ​សម្ពាធ​កាន់តែខ្លាំង​ពី​គណបក្ស​ប្រជាជន​កម្ពុជា​ដែលជា​គណបក្ស​កាន់អំណាច​​បាន​ធ្វើ​ឲ្យ​មេដឹកនាំ​គណបក្សនេះ​ និង​សកម្មជន​ប្រកាន់​ជំហរ​សាធារណៈ​កាន់តែ​ប្រយ័ត្នប្រយែងជាង​មុន​ ខណៈ​គណបក្ស​នេះ​ព្យាយាម​គេច​ពី​ការខឹងសម្បារ​របស់​លោកនាយក​រដ្ឋមន្ត្រី ហ៊ុន សែន។

គណបក្សភ្លើងទៀនបានអះអាង​កាលពីថ្ងៃទី១៨ ខែមករាថា ខ្លួន​«ប្រឆាំងដាច់ខាត​ចំពោះការគាបសង្កត់ផ្នែកនយោបាយ ការបំភិតបំភ័យ និងការធ្វើទុក្ខបុកម្នេញគ្រប់​ទម្រង់​ពីសំណាក់គណបក្សកាន់អំណាច»។ ប៉ុន្តែ​មិន​យូរប៉ុន្មាន​ សេចក្តីថ្លែងការណ៍នេះត្រូវបានដកចេញពីទំព័រហ្វេសប៊ុករបស់គណបក្សវិញ​ ហើយបានបង្ហោះ​នូវ​សេចក្តី​ថ្លែង​ការណ៍​មួយ​ទៀត​ដែល​«សាទរ…ភាពស្អាតស្អំ ភាពត្រឹមត្រូវ និងសេចក្តីថ្លៃថ្នូររបស់គណបក្សប្រជាជនកម្ពុជា»។

កាលពីថ្ងៃចន្ទ ថ្នាក់​ដឹកនាំ​គណបក្សភ្លើងទៀនតាម​ខេត្ត​បានចូល​រួម​កិច្ចប្រជុំបិទទ្វារ​មួយ ដើម្បីពិភាក្សាអំពី​ការ​ពង្រឹង​គោល​ជំហរ​មិនច្បាស់លាស់របស់គណបក្សនេះ បន្ទាប់ពីការចាប់ខ្លួនលោក ថាច់ សេដ្ឋា អនុប្រធានបក្ស និងការគំរាមកំហែង ពីលោក ហ៊ុន សែន។

លោក កឹម មុន្នី​កុសល ប្រធាន​គណបក្ស​ភ្លើង​ទៀន​ប្រចាំ​ខេត្តប៉ៃលិនដែលបាន​ចូល​រួមក្នុងកិច្ចប្រជុំនោះមានប្រសាសន៍ថា ថ្នាក់​ដឹកនាំគណបក្សត្រូវបានណែនាំឲ្យប្រយ័ត្នការ​រិះគន់គណបក្សប្រជាជនកម្ពុជា​ ប៉ុន្តែនៅតែសកម្មក្នុង​ការគាំទ្រសកម្ម​ជននៅ​តាម​មូលដ្ឋាន។

លោក មាស នី អ្នកវិភាគនយោបាយមានប្រសាសន៍ថា ឥទ្ធិពលរបស់គណបក្សភ្លើងទៀន បើធៀបនឹងគណបក្សប្រឆាំងផ្សេងទៀត មានន័យថា គណបក្ស​នេះ​នឹងបន្តរង​ការវាយប្រហារបន្ថែមទៀត ហើយថ្នាក់​ដឹកនាំរបស់គណបក្ស​នេះ​កាន់​តែមានភាពផុយស្រួយ។

លោក មាស នី មានប្រសាសន៍ថា៖ «នៅក្នុងនយោបាយប្រទេសរបស់​យើង យើងមើល​ឃើញថា គណបក្សមួយអាចហែលទឹកបានដោយសេរី ហើយភាគីម្ខាងទៀត​ត្រូវប្រកួតដោយដៃត្រូវ​គេ​ចងទៅក្រោយ។ នេះ​គឺជា​យុទ្ធសាស្ត្រ​នយោបាយ​ដែល​យើង​បាន​ឃើញ​ក្នុង​រយៈពេល​ប៉ុន្មាន​ឆ្នាំ​កន្លង​មកនេះ​ ហើយ​នឹង​បន្ត​កើត​មាន​​នៅ​ក្នុង​ការ​បោះឆ្នោត​ឆ្នាំ២០២៣» ។

ថ្នាក់ដឹកនាំគណបក្សមក​ពី​ខេត្តកណ្តាល សៀមរាប និងកំពង់ចាមបដិសេធមិនធ្វើ​អត្ថាធិប្បាយទេ ប៉ុន្តែតំណាងមក​ពី​ខេត្តផ្សេងទៀតបង្ហាញសុទិដ្ឋិនិយម បើទោះបីជាមានការធ្វើ​ទុក្ខបុកម្នេញ​លើ​ថ្នាក់ដឹកនាំថ្នាក់​ជាតិ​របស់គណបក្សក៏ដោយ​។

លោក អេង ស្រួយ ប្រធាន​គណបក្សភ្លើងទៀនប្រចាំខេត្តត្បូងឃ្មុំមានប្រសាសន៍ថា៖ «យើងនៅតែតស៊ូទៅមុខ ហើយ​យើងបាននិង​កំពុង​ពង្រឹង [ថ្នាក់​មូលដ្ឋាន​]​។ យើង​មិន​បោះបង់​គោល​ជំហរ​របស់​យើង​ដែល​យើង​ចង់​បាន​ការ​ផ្លាស់​ប្តូរ​ជា​វិជ្ជមាន ​ដើម្បី​ស្តារ​លទ្ធិប្រជាធិបតេយ្យ​ឡើង​វិញ​នោះ​ទេ»​ ។

លោកមាន​ប្រសាសន៍​ថា គណបក្សភ្លើងទៀនបានរៀប​ចំ​ជំនួប​ និងវេទិកាសាធារណៈជាមួយសមាជិកគណបក្សនៅទូទាំងស្រុក និងឃុំ ដើម្បីបង្កើតបណ្តាញខេត្តសម្រាប់គណបក្ស។ ថ្នាក់​ដឹក​នាំ​គណបក្ស​ខេត្ត​ក៏​បាន​ណែនាំ​​ដល់​សកម្មជន​គណបក្សភ្លើងទៀន​ឲ្យសម្របសម្រួលផង​ដែរ​អំពីប្រតិកម្ម​​ពី​អាជ្ញាធរ​មូលដ្ឋាន។

លោក ទី​ ប៊ុនថេង ប្រធាន​គណបក្ស​ភ្លើងទៀន​ខេត្តកំពង់ស្ពឺមានប្រសាសន៍ថា លោកនៅតែមានសុទិដ្ឋិនិយមថា គណបក្សនេះ​នៅតែអាចទទួល​បានសំឡេង​ ៥០% នៃអ្នកបោះឆ្នោតក្នុងខេត្តរបស់លោក ខណៈប្រជាពលរដ្ឋ​ជាច្រើនចង់ « ផ្លាស់ប្តូរ [មេដឹកនាំ] ព្រោះពួកគេមិនចង់បានអ្នកដ៏ដែលបែបនេះ» ។

លោក​បាន​មាន​ប្រសាសន៍​ថា៖ «ខ្ញុំ​សង្ឃឹម​ថា [គណបក្សភ្លើងទៀនទទួល​បាន] ៥០ ភាគរយ [នៃ​សំឡេង​ឆ្នោត​នៅ​ខេត្ត​កំពង់ស្ពឺ] ព្រោះ​យើង​មិន​មាន​ពេល​ច្រើន​ក្នុង​ការ​​រៀបចំ ហើយ​ពលរដ្ឋ​មួយ​ចំនួន​នៅ​តែ​សង្ស័យ​ថា អតីត​គណបក្ស​សង្គ្រោះ​ជាតិ​​នឹង​រស់​ឡើង​វិញ» ។

លោក ប៊ុនថេង មាន​ប្រសាសន៍ថា សមាជិកគណបក្សភ្លើងទៀន​នៅ​ខេត្ត​កំពង់ស្ពឺ មិន​ទាន់​ប្រឈម​មុខ​នឹង​ការ​គំរាម​កំហែងដ៏គួរ​ឲ្យ​កត់​សម្គាល់​​ពី​អាជ្ញាធរ​នៅ​ឡើយ​ទេ​។ ប៉ុន្តែលោកទទួលស្គាល់ថា អ្នកបោះឆ្នោតដែលមានសក្ដានុពលអាចនឹងភ័យខ្លាច ឬព្រួយបារម្ភអំពីសមត្ថភាពរបស់គណបក្សក្នុងការប្រជែង​នឹងគណបក្សកាន់អំណាច ដូចដែលគណបក្សសង្គ្រោះជាតិធ្លាប់​ធ្វើ​បាន​នៅក្នុងការបោះឆ្នោតឆ្នាំ២០១៣ ដែលមានការប្រកួតប្រជែងយ៉ាងប្រកិត​ប្រកៀក​នោះ​។

គណបក្សភ្លើងទៀនបានប្រកាសសមាសភាព​ថ្នាក់ដឹកនាំខេត្តរបស់ខ្លួននៅក្នុងខែវិច្ឆិកានិងខែធ្នូ ហើយគ្រោងនឹងចេញផ្សាយ​គោលនយោបាយ​ដែលបានធ្វើបច្ចុប្បន្នភាពនៅក្នុងខែកុម្ភៈ​ មុនការបោះឆ្នោត។

ថ្នាក់ដឹកនាំគណបក្សភ្លើងទៀននិងសមាជិកមកពី២៥ខេត្ត-ក្រុងជួបជុំគ្នានៅទីស្នាក់ការគណបក្សក្នុងរាជធានីភ្នំពេញកាល​ពី​ថ្ងៃទី២៣ ខែមករា ឆ្នាំ២០២៣។ (ទំព័រហ្វេសប៊ុករបស់គណបក្សភ្លើងទៀន)

គោលនយោបាយ​របស់គណបក្សសម្រាប់ការបោះឆ្នោតឃុំសង្កាត់កាលពីឆ្នាំមុនបានផ្តោតលើចំណុចសំខាន់ៗចំនួនប្រាំពីរ ដែល​ផ្តោត​ចម្បងលើអភិបាលកិច្ចប្រកបដោយតម្លាភាព និងងាយ​ស្រួល​ ការពង្រឹងសន្តិសុខដីធ្លី និងការកាត់បន្ថយការចំណាយលើការថែទាំសុខភាពនិងការអប់រំ។ ការសង្កត់ធ្ងន់នេះបានឆ្លុះបញ្ចាំងពីគោលនយោបាយទាំងប្រាំពីរចំណុច​របស់គណបក្សសង្គ្រោះជាតិ ដែលផ្តោតលើការកែលម្អសុខុមាលភាពសង្គម និងអត្ថប្រយោជន៍ដែលមានសម្រាប់ប្រ​ជាពលរដ្ឋងាយរងគ្រោះ និងកម្មករកម្ពុជា។

មេដឹកនាំគណបក្សភ្លើងទៀនបានអះអាងថា ពួកគេមិនទាន់អាចនិយាយ​បាន​ថា គោលនយោបាយ​នេះត្រូវ​បាន​កែសម្រួល​បែបណានោះទេ ចាប់តាំងពីការបោះឆ្នោត​ឃុំសង្កាត់។

លោក អេង ស្រូយ ជា​ប្រធាន​គណបក្ស​ភ្លើង​ទៀន​ខេត្តត្បូងឃ្មុំមានប្រសាសន៍ថា៖ «ជាធម្មតា គោលនយោបាយ​គណបក្ស [គណបក្សប្រឆាំង] នឹងផ្តោតលើការដំឡើង​ប្រាក់បៀវត្សរ៍ ការដោះស្រាយជម្លោះ និងបញ្ហាអយុត្តិធម៌សង្គម និងការលើកកម្ពស់សិទ្ធិមនុស្ស និងលទ្ធិប្រជាធិបតេយ្យ» ។

លោក មាស នី អ្នកវិភាគនយោបាយបានមាន​ប្រសាសន៍ថា សាធារណជនចង់ឃើញគោលនយោបាយ​ជាក់លាក់ណា​មួយដែល​ដោះស្រាយ និងបម្រើផលប្រយោជន៍ប្រជាពលរដ្ឋ។

លោកបានមានប្រសាសន៍ថា៖ «រដ្ឋាភិបាលបច្ចុប្បន្នបានធ្វើរឿងល្អមួយចំនួន ហើយយើងចង់ឃើញសារពីគណបក្សនយោបាយ [គណបក្សភ្លើងទៀន] ដើម្បីបង្ហាញពីបញ្ហាជាក់លាក់មួយដែល​គណបក្សនេះ ត្រូវផ្តោតការយក​ចិត្ត​ទុក​ដាក់​ប្រសិនបើខ្លួនកាន់អំណាច» ។

លោក សុខ ឥសាន អ្នកនាំពាក្យគណបក្សប្រជាជនកម្ពុជាមានប្រសាសន៍ថា គណបក្សរបស់លោកមិនព្រួយបារម្ភចំពោះការខិតខំប្រឹងប្រែងរបស់គណបក្សភ្លើងទៀនទេ ព្រោះលទ្ធផលបោះឆ្នោតឃុំសង្កាត់បង្ហាញថា គណបក្សប្រឆាំងទទួលបានសំឡេងគាំទ្រតែ១៨ភាគរយប៉ុណ្ណោះនៅក្នុង​ចំណោម​សំឡេងទូទាំង​ប្រទេស​។

លោកបានមានប្រសាសន៍ថា៖ «ខ្ញុំគិតថា នៅក្នុងការបោះឆ្នោត ពួកគេ [គណបក្សភ្លើងទៀន] អាចឈ្នះអាសនៈមួយចំនួនក្នុងរដ្ឋសភា ប៉ុន្តែវាគ្រាន់តែជាសំឡេង​ភាគ​តិច​ ដែលមិនអាចនិយាយអ្វីបាន ហើយនឹងត្រូវបានគ្របដណ្ដប់ដោយគណបក្សប្រជាជនកម្ពុជា» ។

លោក​បាន​បន្ថែម​ថា​៖ «យើង​ធានា​ថា​ មិន​មាន​ហានិភ័យ​សម្រាប់​គណបក្ស​ប្រជាជន​កម្ពុជា​ទេ» ។

ប៉ុន្តែ​លោក ហ៊ុន សែន បាន​ផ្តោត​ខ្លាំង​លើ​​​គណបក្សភ្លើងទៀន​កាលពី​ពេល​ថ្មីៗ នេះ ដោយ​បាន​រិះគន់​លោក គង់ គាំ ទីប្រឹក្សា​ជាន់ខ្ពស់​របស់​គណបក្ស និង​ជំរុញ​ឱ្យ​លោក​ប្រគល់​ដី​និង​ផ្ទះ បើមិន​ដូច្នេះទេនឹង​​ប្រឈម​​ផលវិបាក​ផ្លូវច្បាប់​ចំពោះ​ការ​បញ្ចេញមតិ​ប្រឆាំង​គណបក្ស​ប្រជាជន​ក្នុង​ខែ​នេះ​។ លោក​បាន​គំរាម​អ្នក​​​វាយ​ប្រហារ​លើ​គណបក្ស​ប្រជាជន​​ផ្សេងទៀតផង​ដែរ។

លោក ហ៊ុន សែន បាន​មាន​ប្រសាសន៍​កាលពី​ថ្ងៃ​ទី​១៩ ខែ​មករា​ថា៖​ «មាន​ជម្រើសតែ​ពីរ៖ ទីមួយ​គឺ ត្រូវប្រើវិធានការផ្លូវច្បាប់។ ទីពីរគឺ ប្រើ​ដំបង។ មាន​ន័យ​ថា ខ្ញុំ​នឹង​ប្រមូល​អ្នក​គាំទ្រ​គណបក្ស​ប្រជាជន​ទាំង​អស់​ធ្វើ​បាតុកម្ម ហើយ​វាយ​អ្នក​ឯង។ តើលោក​ឯងចង់​បាន​មួយណា ?» ។

លោកបានបន្ថែមថា៖ «ចាប់ពីពេលនេះតទៅ គ្មានការអត់ឱន គ្មានការលើកលែងពីថ្នាក់ក្រោមដល់កំពូល [សមាជិកគណបក្សប្រឆាំង]។ ប្រសិនបើយើងចាំបាច់​ត្រូវ​វាយ​ខ្នោះ [យើង] នឹងធ្វើភ្លាម» ។

ភាពតានតឹងផ្នែកនយោបាយបានកើនឡើងនៅ​ដើមខែនេះ នៅពេលដែលលោក ថាច់ សេដ្ឋា អនុប្រធានគណបក្សភ្លើងទៀនបានវិលត្រឡប់ពីដំណើរទស្សនកិច្ចនៅក្រៅប្រទេសដោយ​ជួប​ជាមួយថ្នាក់​ដឹកនាំនៅប្រទេសជប៉ុននិងកូរ៉េខាងត្បូង។

លោក សេដ្ឋា បាន​ប្រាប់ខេមបូចាកាល​ពី​​ថ្ងៃ​ទី​៣ ខែ​មករា​ថា៖​ «យើង​បាន​ត្រៀម​ខ្លួន​រួច​ជា​ស្រេច [ ​ដើម្បី​ចូលរួម​ការ​បោះ​ឆ្នោត ] ​ហើយ​យើង​បាន​កសាង​រចនាសម្ព័ន្ធ​របស់​យើង​បាន១០០ភាគរយ​ទូទាំង​ប្រទេស​។ យើងសង្ឃឹមថា ប្រជាពលរដ្ឋ​ចង់បានលទ្ធិប្រជាធិបតេយ្យពិតប្រាកដមួយ ពីព្រោះពួកគាត់​ [ប្រជាពលរដ្ឋ] បានយល់យ៉ាងច្បាស់អំពីជីវិតនៅក្នុងរបបដឹកនាំពាក់កណ្តាលប្រជាធិបតេយ្យ និងពាក់កណ្តាលកុម្មុយនិស្ត» ។

លោក​បាន​មាន​ប្រសាសន៍​ថា លោក​សង្ឃឹម​ថា ​នឹង​មាន​បរិយាកាស​បើក​ទូលាយ​មួយ​​មុន​ការ​បោះ​ឆ្នោត ដោយ​មិន​មាន​ការ​គំរាម​កំហែងបន្ថែមទៀត​​លើ​សមាជិក​បក្ស​​របស់​លោក​។

ពីរសប្តាហ៍ក្រោយមក លោក សេដ្ឋា ត្រូវ​បាន​គេឃុំ​ខ្លួន​នៅក្នុងពន្ធនាគារ៕

ប្រែសម្រួលពីអត្ថបទភាសាអង់គ្លេស៖ Despite Threats, Candlelight Leaders Say They’re Focused on Platform, Grassroots Activism

 
345 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម