អធិការនគរបាលស្រុកមួយរូបនៅខេត្តកំពង់ធំត្រូវបានដកចេញពីមុខតំណែង បន្ទាប់ពីនាយប៉ុស្តិ៍នគរបាលឃុំមួយរូបក្នុងស្រុករបស់លោកត្រូវបានដកមុខតំណែងឲ្យមកជាមន្ត្រីវិញ ដោយសារមានប្រវត្តិជាប់ពន្ធនាគារពីបទលួច។ មន្ត្រីនគរបាលម្នាក់បានប្រាប់ ខេមបូចា ថា នាយនគរបាលទាំងពីរនាក់គឺជាសាច់ញាតិនឹងគ្នា។
លោក យ៉ង សំ អតីតស្នងការនគរបាលស្រុកស្ទោង នៅពេលនេះ នឹងចូលទៅបម្រើការងារនៅការិយាល័យបុគ្គលិកនៃស្នងការដ្ឋាននគរបាលខេត្តកំពង់ធំ នេះតាមការលើកឡើងរបស់មន្ត្រីនគរបាលរូបនេះ។
លោក ហុង សារ៉ុម នាយប៉ុស្តិ៍នគរបាលរដ្ឋបាលឃុំសំព្រោជត្រូវបានតែងតាំងកាលពីដើមខែនេះ ប៉ុន្តែត្រូវបានដកហូតមុខតំណែងវិញកាលពីថ្ងៃចន្ទដោយសារមូលហេតុ «ល្មើសវិន័យរបស់កងកម្លាំងនគរបាលជាតិ» បន្ទាប់ពីនគរបាលជាតិបានសន្និដ្ឋានថា លោកមានប្រវត្តិប្រព្រឹត្តបទល្មើស។ លោក សារ៉ុម នឹងនៅជាមន្ត្រីនគរបាលធម្មតា។
លោក ជឹម រីណា អធិការនគរបាលស្តីទីស្រុកស្ទោង បានបញ្ជាក់ប្រាប់ ខេមបូចា ថា លោក យ៉ង សំ ត្រូវបានដកចេញពីតួនាទី ដោយសារតែគេរកឃើញថា លោកគឺជាសាច់ញាតិរបស់លោក សារ៉ុម។ លោក រីណា បានមានប្រសាសន៍ថា លោកមិនដឹងអំពីព័ត៌មានលម្អិតនៃករណីនេះទេ ហើយនឹងមិនផ្តល់ព័ត៌មានបន្ថែមទេ។
លោកមានប្រសាសន៍ថា៖ «ខ្ញុំគ្រាន់តែដឹងថាគាត់មកពីចម្ងាយហើយគាត់មកធ្វើការតាមរយៈមេ សំ ហ្នឹងឯង។ គាត់ចូលមកក្នុងឆ្នាំ២០០៩»។
លោក ពាញ ពូល មេឃុំសំព្រោជបានប្រាប់ ខេមបូចា កាលពីថ្ងៃចន្ទថា លោក សារ៉ុម កំពុងបម្រើការជាមន្ត្រីនគរបាល នៅពេលដែលគាត់ត្រូវបានចាប់ខ្លួននៅឆ្នាំ២០១៥ ប៉ុន្តែបានក្លាយជាមន្រ្តីប៉ូលីសម្តងទៀត «ក្នុងរយៈពេលពីរបីឆ្នាំចុងក្រោយនេះ» បន្ទាប់ពីអនុវត្តទោសក្នុងពន្ធនាគាររួច។
លោក ម៉ែន លី ស្នងការនគរបាលខេត្តកំពង់ធំមិនអាចទាក់ទងសុំការបំភ្លឺបានទេ។
លោកនាយករដ្ឋមន្ត្រី ហ៊ុន ម៉ាណែត បានអំពាវនាវជាសាធារណៈឱ្យមានការស៊ើបអង្កេតលើការតែងតាំងលោក សារ៉ុម កាលពីថ្ងៃអាទិត្យ បន្ទាប់ពីទទួលបានព័ត៌មានអំពីប្រវត្តិប្រព្រឹត្តបទល្មើសរបស់លោក សារ៉ុម ពី «ប្រភពផ្សេងៗ រួមទាំងបណ្តាញទំនាក់ទំនងសង្គមផងដែរ»។
លោកបានសរសេរនៅលើទំព័រហ្វេសប៊ុកថា៖ «ខ្ញុំសូមឱ្យមានការត្រួតពិនិត្យ និងវាយតម្លៃឱ្យបានច្បាស់លាស់ នូវបុគ្គលិកលក្ខណៈរបស់បុគ្គលនីមួយៗ ឲ្យបានហ្មត់ចត់មុននឹងតែងតាំង នៅតាមបណ្តាស្ថាប័នរដ្ឋ ទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិនិងក្រោមជាតិ»។
ខណៈដែលមន្ត្រីនគរបាលទាំងពីរត្រូវបានដកពីមុខតំណែងជាអធិការ និងនាយប៉ុស្តិ៍ ត្រឹមតែប៉ុន្មានថ្ងៃបន្ទាប់ពីការថ្លែងរបស់លោកនាយករដ្ឋមន្ត្រី ប៉ុន្តែអ្នកទាំងពីរនឹងបន្តនៅធ្វើជាមន្ត្រីនគរបាលដដែល។
នៅពេលសួរអំពីអំពើពុករលួយដែលអាចមានពាក់ព័ន្ធនឹងទំនាក់ទំនងគ្រួសារក្នុងករណីនេះ លោក អំ សំអាត នាយកចាត់ការទូទៅនៃអង្គការ លីកាដូ មានប្រសាសន៍ថា៖ «ចំពោះករណីនេះ យើងសូមឲ្យមានការស៊ើបអង្កេតឲ្យបានច្បាស់លាស់ ដើម្បីកុំឲ្យក្លាយជាគំរូអាក្រក់ទៅថ្ងៃអនាគត»។
លោកបានបន្ថែមថា៖ «វាចាំបាច់ក្នុងការពិនិត្យមើលសកម្មភាពពីមុន [របស់អ្នកដែលត្រូវបានតែងតាំង] ឲ្យបានច្បាស់។ បើមិនដូច្នេះទេ វានឹងបង្កបញ្ហាដល់កេរ្តិ៍ឈ្មោះនគរបាលជាតិ ឬការតែងតាំង ហើយនឹងប៉ះពាល់ដល់មន្ត្រីល្អៗជាច្រើនដែលខិតខំបម្រើប្រជាពលរដ្ឋ»៕
ប្រែសម្រួលពីអត្ថបទភាសាអង់គ្លេស៖ District Police Chief Demoted After Removal of Commune Police Chief With Criminal Record
