សមាគមសម្ព័ន្ធអ្នកសារព័ត៌មានកម្ពុជា

សកម្មជនបរិស្ថាននៅតែទាមទារឱ្យស្វែងរកអ្នកពាក់ព័ន្ធ បន្ទាប់ពី១១ឆ្នាំនៃឃាតកម្មលើលោក ឈុត វុទ្ធី

យុវជនបរិស្ថាន បានយកញត្តិទៅដាក់នៅក្រសួងយុត្តិធម៌ ដើម្បីស្នើឱ្យបន្តស្វែងរកយុត្តិធម៌ជូនលោក ឈុត វុទ្ធី ដែលជាសកម្មជនការពារធនធានធម្មជាតិ។ រូបថតនៅថ្ងៃទី២៦ ខែមេសា ឆ្នាំ២០២៣។ ខេមបូចា/ ព្រីង សំរាំង
យុវជនបរិស្ថាន បានយកញត្តិទៅដាក់នៅក្រសួងយុត្តិធម៌ ដើម្បីស្នើឱ្យបន្តស្វែងរកយុត្តិធម៌ជូនលោក ឈុត វុទ្ធី ដែលជាសកម្មជនការពារធនធានធម្មជាតិ។ រូបថតនៅថ្ងៃទី២៦ ខែមេសា ឆ្នាំ២០២៣។ ខេមបូចា/ ព្រីង សំរាំង

សកម្មជនបរិស្ថានវ័យក្មេងប្រមាណ៣០នាក់បានដាក់ញត្តិទៅក្រសួងយុត្តិធម៌ឱ្យជំរុញ​ទៅ​ស្ថាប័ន​អយ្យការស៊ើបអង្កេតដោយឯករាជ្យ ដើម្បីស្វែងរកអ្នកផ្ដើមគំនិត និងអ្នកពាក់ព័ន្ធ​លើ​ឃាតកម្មលោក ឈុត វុទ្ធី មកផ្ទន្ទាទោសតាមច្បាប់ បន្ទាប់ពីគាត់ត្រូវបាន​គេធ្វើឃាត​អស់​រយៈ​ពេល​១១ឆ្នាំមកហើយ ត្បិតក្រុម​សកម្មជនជឿថាមិនទាន់រកឃើញឃាតកពិត។

អស់រយៈពេល១១ឆ្នាំមកហើយ ដែលសកម្មជនព្រៃឈើដ៏សកម្ម គឺលោក ឈុត​ វុទ្ធី ត្រូវបាន​ខ្មាន់កាំភ្លើងបាញ់សម្លាប់នៅពេលដែលលោកចុះទៅស៊ើបអង្កេតបទល្មើសព្រៃឈើនៅខេត្តកោះកុង ប៉ុន្តែរឿងក្ដីនេះ នៅតែមានសកម្មជនបរិស្ថាន និងសង្គមស៊ីវិល ទទូចឱ្យ​ស្ថាប័ន​ពាក់ព័ន្ធ​បន្តស៊ើបអង្កេត ដើម្បីកំណត់នូវអត្តសញ្ញាណអ្នកពាក់ព័ន្ធពិតប្រាកដមកទទួលខុស​ត្រូវចំពោះមុខច្បាប់។

នៅថ្ងៃពុធ ទី២៦ ខែមេសា នេះ ​គឺជាថ្ងៃគម្រប់ខួប១១ឆ្នាំនៃការស្លាប់របស់លោកឈុត វុទ្ធី។ ក្រុម​សកម្មជនបរិស្ថានបាន ដាក់ញត្តិមួយច្បាប់ទៅក្រសួងយុត្តិធម៌ ដើម្បីស្នើសុំ​ក្រសួង​យុត្តិធម៌បន្តជំរុញឱ្យស្ថាប័នអយ្យការធ្វើការស៊ើបអង្កេតដោយឯករាជ្យក្នុងករណីឃាតកម្មក្នុងឆ្នាំ២០១២ ។

ក្នុងញត្តិនោះ ក្រុមយុវជនបានបញ្ជាក់ថា​​ ចាប់ពីថ្ងៃទី២៦ ខែមេសា ឆ្នាំ២០១២ រហូតមក​ដល់​ថ្ងៃ​ទី២៦ ខែមេសា ឆ្នាំ២០២៣ នេះ គឺមានរយៈពេល ១១ឆ្នាំហើយ ដែលលោក ឈុត វុទ្ធី ​ប្រធាន​អង្គការការពារធនធានធម្មជាតិ និងជាសកម្មជនព្រៃឈើដ៏ឆ្នើមមួយរូប ដែលធ្វើការងារ​បណ្តុះ​បណ្តាល អប់រំ និងពង្រឹងសមត្ថភាពសហគមន៍មូលដ្ឋានឱ្យយល់ដឹង ព្រមទាំងអនុវត្តសិទ្ធិ និង​ករណីកិច្ចក្នុងការចូលរួមការពារធនធានធម្មជាតិ ត្រូវបានខ្មាន់កាំភ្លើងបាញ់សម្លាប់ក្នុង​ភូមិ​សាស្ត្រ​ខេត្តកោះកុង ។

ប្រភពដដែល បន្តទៀតថា លោក ឈុត វុទ្ធី ត្រូវបានខ្មាន់កាំភ្លើងបាញ់សម្លាប់​ខណៈពេល​ដែល​រូបលោក និងអ្នកសារព័ត៌មានពីរនាក់ទៀត កំពុងបំពេញ បេសកកម្មចុះទៅ​យកព័ត៌មាន​នៅ​ជិត​តំបន់ព្រៃការពារក្នុងខេត្តកោះកុង ជាកន្លែងដែលលោកបានជីកកកាយអំពីសំណុំរឿង​កាប់​បំផ្លាញព្រៃឈើខុសច្បាប់ ដែលមានទាក់ទងយ៉ាងជិតស្និតនឹងមន្ត្រីយោធាពាក់ព័ន្ធ​នឹង​ការ​សាង​សង់ ទំនប់វារីអគ្គិសនី ព្រមទាំងជាតំបន់ដែលសង្ស័យថាមានការចម្រាញ់​វល្លិរមៀត​ខុសច្បាប់ ។

យុវជនបរិស្ថាន បានយកញត្តិទៅដាក់នៅក្រសួងយុត្តិធម៌ ដើម្បីស្នើឱ្យបន្តស្វែងរកយុត្តិធម៌​ជូនលោក ឈុត វុទ្ធី ដែលជាសកម្មជនការពារធនធានធម្មជាតិ។ រូបថតនៅថ្ងៃទី២៦ ខែមេសា ឆ្នាំ២០២៣។ ខេមបូចា/ ព្រីង សំរាំង

ជុំវិញករណីនេះ លោក កើត សារ៉ាយ ប្រធាន​សមាគម​និស្សិត​បញ្ញាវន្ត​ខ្មែរ​ ដែលបាន​ចូលរួម​ដាក់ញត្តិ បានលើកឡើងថា ការស្លាប់របស់លោក ឈុត វុទ្ធី នៅតែជាអាថ៍កំបាំង​ ត្រង់ថា​ចំណាញ់​​ច្បាប់មិនអាចស្វែងរកឃាតកពិតប្រាកដ ដើម្បីមកទទួលខុសត្រូវតាមច្បាប់។

លោក សារ៉ាយ លើកឡើងថា៖ «មកដល់ពេលនេះ យើងសកម្មជនបរិស្ថាន សង្គមស៊ីវិល នៅតែ​មិនទាន់ជឿថាជនល្មើសដែលចាប់បាននោះ ជាជនល្មើសពិតប្រាកដ ឬក៏តែ​ឯង​នោះទេ»

លោក សារ៉ាយ បន្ថែមទៀតថា យុត្តិធម៌នឹងមានពិតប្រាកដនៅពេលដែលប្រព័ន្ធយុត្តិធម៌នៅ​កម្ពុជា ស្វែងរកឃើញអ្នកពាក់ព័ន្ធ និងអ្នកផ្ដើមគំនិត ក្នុងករណីឃាតកម្មសម្លាប់លោក ឈុត វុទ្ធី។

លោក សារ៉ាយ បន្ថែមថា៖«ការវែកមុខជនល្មើសពិតប្រាកដ ផ្ដល់យុត្តិធម៌សម្រាប់គាត់ និងក្រុមគ្រួសារគាត់ ក៏ដូចជាពួកយើងដែលជាអ្នកគោរពស្រលាញ់ទាំងអស់គ្នា»។

ជាសកម្មជនបរិស្ថានវ័យក្មេងម្នាក់ កញ្ញា ធួន ស្រីពៅ អាយុ២១ឆ្នាំ ប្រាប់ឱ្យដឹងថា ការយកញត្តិ​មកដាក់នៅក្រសួងយុត្តិធម៌នៅថ្ងៃគម្រប់ខួប១១ឆ្នាំនៃការស្លាប់របស់លោកឈុត វុទ្ធី គឺដើម្បី​រក​យុត្តិធម៌ពិតជូនលោក ឈុត វុទ្ធី។

កញ្ញា ស្រីពៅ ឱ្យដឹងថា៖ «ពួកយើងជាយុវជនជំនាន់ក្រោយមើលឃើញថា ហាក់បីដូចជាមិន​មានយុត្តិធម៌​សម្រាប់គាត់ [ឈុត វុទ្ធី] រហូតដល់១១ឆ្នាំហើយអត់មានព័ត៌មានអីទាក់ទង​នឹង​អ្នកផ្ដួចផ្ដើមធ្វើឃាតលោកទេ»។

ចំណែក កញ្ញា ឡុង គន្ធា សកម្មជនបរិស្ថានម្នាក់ទៀត ថ្លែងថា មានតែស្ថាប័នអយ្យការទេ ដែលអាចដាក់ពាក្យបណ្ដឹងអាជ្ញា បើកការស៊ើបអង្កេតដោយឯករាជ្យ​ជុំវិញឃាតកម្ម​សម្លាប់​លោក ឈុត វុទ្ធី ត្បិតរយៈពេល១១ឆ្នាំមកហើយ កញ្ញាជឿថាឃាតកពិត​នៅមិនទាន់​រកឃើញ​នៅឡើយ។

កញ្ញា គន្ធា និយាយថា៖‍ «ខ្ញុំជឿថារដ្ឋាភិបាលអាចស្វែងរកយុត្តិធម៌ជូនលោក ឈុត វុទ្ធីបាន តែ១១ឆ្នាំហើយដែលករណីលោក ឈុត វុទ្ធី អូសបន្លាយមិនទាន់បានឃើញពន្លឺ​នៃភាព​យុត្តិធម៌»។

​​ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌បានច្រានចោលនូវការលើកឡើង​របស់​ក្រុមយុវជន និងអះអាងថាការដាក់ញត្តិរបស់ក្រុមសកម្មជនបរិស្ថាន​មិនមានមូលដ្ឋាន​ច្បាស់​លាស់ និងបង្កប់របៀបវារៈនយោបាយបាំងមុខ។

លោក ម៉ាលីន មានប្រសាសន៍ថា៖ «ខ្ញុំមិនដឹងថាក្រុមយុវជននេះធ្វើឡើងដោយមានចេតនាអ្វី​ឱ្យ​ពិតប្រាកដ​នោះទេ ឬជារបៀបវារៈនយោបាយ ដោយសាតែវាជិតដល់ការបោះឆ្នោត​ចូល​មកដល់ ហើយរឿងក្តីនេះក៏បានបិទបញ្ចប់ហើយដែរ»។ 

លោក ម៉ាលីន បន្តថា ប្រសិនបើក្រុមយុវជននោះ មិនពេញចិត្តនឹងការកាត់ក្ដីរបស់តុលាការ គប្បីបង្ហាញសក្ខីកម្មរឹងមាំដែលអាចបញ្ជាក់ថាការសម្រេចរបស់តុលាការមិនត្រឹមត្រូវ មិនមែន​ធ្វើការចោទប្រកាន់ដោយគ្មានមូលដ្ឋានច្បាស់លាស់នោះទេ។

លោក ម៉ាលីន បន្ថែមថា៖ «ជាគោលការណ៍ច្បាប់ និងនីតិវិធីច្បាប់របស់កម្ពុជា​ប្រសិនបើ​មិន​ពេញចិត្ត ឬមានភស្តុតាងផ្ទុយ ឬក៏សក្ខីកម្មថ្មីដែលរឹងមាំ ហើយអាចបញ្ចាក់បានថា​ការសម្រេច​ថាមិនត្រឹមត្រូវនោះអាចធ្វើការដាក់បណ្តឹងសើរើបាន»។

យុវជនបរិស្ថាន បានយកញត្តិទៅដាក់នៅក្រសួងយុត្តិធម៌ ដើម្បីស្នើឱ្យបន្តស្វែងរកយុត្តិធម៌​ជូនលោក ឈុត វុទ្ធី ដែលជាសកម្មជនការពារធនធានធម្មជាតិ។ រូបថតនៅថ្ងៃទី២៦ ខែមេសា ឆ្នាំ២០២៣។ ខេមបូចា/ ព្រីង សំរាំង

លោក ឆឺយ ឧត្តមរស្មី ដែលជាកូន​ប្រុស​លោក វុទ្ធី ថ្លែងប្រាប់មកអ្នកសារព័ត៌មាន​តាមរយៈ​ប្រព័ន្ធ​អ៊ិនធឺណេតពីសហរដ្ឋអាមេរិកថា ការស្លាប់របស់ឪពុករបស់លោក នៅតែមិនទាន់ទទួល​បានយុត្តិធម៌នៅឡើយរយៈពេល១១ឆ្នាំមកនេះ។

លោក ឧត្តមរស្មី បន្តថា៖ «រយៈពេល១១ឆ្នាំមកនេះ ខ្ញុំ គ្រួសារខ្ញុំ និងប្រជាជនខ្មែរមិនទាន់​ទទួល​​បានយុត្តិធម៌ពិតប្រាកដជុំវិញឃាតកម្មមួយនេះទេ»។

លោក ឧត្តមរស្មី សម្ដែងការខកចិត្តដែលរដ្ឋាភិបាលកម្ពុជាមិនបានអើពើក្នុងការស្វែងរកមុខ ឃាតកពិត និងអ្នកបញ្ជានៅពីក្រោយនៃការបញ្ជាឱ្យបាញ់សម្លាប់លោក ឈុត វុទ្ធី ហើយ​លោក​ជឿថា អ្នកនៅពីក្រោយនៃឃាតកម្មនេះ គឺជាមន្រ្តីមានអំណាច។

លោក ឧត្តមរស្មី បន្ថែមថា៖ «រយៈពេល១១ឆ្នាំដែលយើងតស៊ូមតិទាំងផ្នែកច្បាប់ និងតាម​បណ្ដាញសង្គមនានា ក៏មិនទាន់ឃើញរដ្ឋាភិបាលសើរើជនដៃដល់​ដែលបញ្ជាសម្លាប់​លោក ឈុត វុទ្ធី»

យោងតាមរបាយការណ៍របស់អង្គការ Global Forest Watch បានឱ្យដឹងថា ចន្លោះពីថ្ងៃទី១៤ ខែមេសា ឆ្នាំ២០២៣ ដល់ថ្ងៃទី២១ ខែមេសា ឆ្នាំ២០២៣ មានការកាប់បំផ្លាញព្រៃឈើចំនួន ៩៥ ៤៧៨ករណី ដែលគ្របដណ្ដប់លើផ្ទៃដីសរុបចំនួន១១៥ហិកតា រកឃើញដោយ​ប្រព័ន្ធ​ជូន​ដំណឹង ដែលក្នុងនោះមាន០.៣៨ភាគរយ គឺជាការជូនដំណឹងគួរឱ្យជឿជាក់បាន៕

212 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម