កាលពីថ្ងៃអង្គារ សហភាពអឺរ៉ុប និងរដ្ឋាភិបាលកម្ពុជាបានចាប់ផ្តើមកម្មវិធីថ្មីចំនួនបួន ដែលត្រូវបានរៀបចំឡើង ដើម្បីលើកកម្ពស់និរន្តរភាព និងប្រសិទ្ធភាពថាមពលនៅក្នុងប្រទេស រួមទាំងគំនិតផ្តួចផ្តើមដែលមានទំហំទឹកប្រាក់៥៣,១លានដុល្លារ ដើម្បីកែលម្អការអប់រំបច្ចេកទេស។ គំនិតផ្តួចផ្តើមកម្មវិធីអប់រំនេះ ដែលជាផ្នែកនៃយុទ្ធសាស្ត្រច្រកទ្វារសកលរបស់សហភាពអឺរ៉ុប ផ្តោតលើការផ្តល់ឱ្យយុវជនកម្ពុជានូវជំនាញបច្ចេកទេសចាំបាច់សម្រាប់អាជីពក្នុងវិស័យបៃតង និងឌីជីថល។
លោកស្រី Jutta Urpilainen ស្នងការសហភាពអឺរ៉ុបទទួលបន្ទុកកិច្ចការភាពជាដៃគូអន្តរជាតិបានមានប្រសាសន៍នៅក្នុងសន្និសីទសារព័ត៌មាននៅវិទ្យាល័យចំណេះទូទៅនិងបច្ចេកទេសជម្ពូវ័នក្នុងរាជធានីភ្នំពេញថា៖ «ការអប់រំគឺជាគន្លឹះ។ គោលបំណងនៃកម្មវិធីនេះ គឺដើម្បីធានាថា យុវជនកម្ពុជានៅតែចង់ដឹង បើកចិត្តទូលាយ អត់ធ្មត់ និងមានចំណាប់អារម្មណ៍លើការរកឃើញថ្មីៗ»។
លោកស្រីបានបន្ថែមថា៖ «ខ្ញុំជឿជាក់ថា នេះជាមធ្យោបាយតែមួយគត់ ដើម្បីធានាបាននូវការអភិវឌ្ឍប្រកបដោយចីរភាពរបស់ប្រទេសកម្ពុជា»។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាមានប្រសាសន៍ថា ភាពជាដៃគូជាមួយសហភាពអឺរ៉ុបនឹងជួយកាត់បន្ថយភាពក្រីក្រ និងបង្កើតការងារនៅក្នុងប្រទេសកម្ពុជា។
លោកបានបន្ថែមថា៖ «ខ្ញុំជឿជាក់ថា ការវិនិយោគទាំងអស់នេះលើវិស័យអប់រំ ជំនាញ និងការស្រាវជ្រាវ ក៏អាចទាក់ទាញក្រុមហ៊ុនអឺរ៉ុបបន្ថែមទៀត ដើម្បីផ្តល់ការងារដែលមានគុណភាពខ្ពស់ដល់ប្រជាពលរដ្ឋកម្ពុជា សម្រាប់ការអភិវឌ្ឍបៃតងនិងឌីជីថល របស់ប្រទេសកម្ពុជា»។
ភាពជាដៃគូអប់រំនឹងរួមបញ្ចូលការអភិវឌ្ឍហេដ្ឋារចនាសម្ព័ន្ធអប់រំ រួមទាំងការផ្តល់មូលនិធិសាងសង់អគារសិក្សាសម្រាប់សាលាបច្ចេកទេស និងវិជ្ជាជីវៈ សម្ភារៈ និងមន្ទីរពិសោធន៍ជាក់ស្តែង។ គោលបំណងសំខាន់នៃកម្មវិធីនេះគឺដើម្បីបង្កើនសមភាពយេនឌ័រនៅក្នុងវិស័យឌីជីថលនិងក្នុងវិស័យដែលផ្តោតលើអាកាសធាតុ។ គំនិតផ្តួចផ្តើមនេះមានបំណងកសាងសមត្ថភាពសម្រាប់ការអប់រំថ្នាក់មធ្យមសិក្សា និងឧត្តមសិក្សាលើផ្នែកមេកានិច វិទ្យាសាស្ត្រកុំព្យូទ័រ អេឡិចត្រូនិក និងការកែច្ឆៃចំណីអាហារ។
កម្មវិធីផ្លាស់ប្តូរការសិក្សាក៏នឹងត្រូវទទួលបានមូលនិធិផងដែរ ដោយមានអ្នកជំនាញអឺរ៉ុបមកទស្សនកិច្ចនៅកម្ពុជា ក៏ដូចអ្នកជំនាញកម្ពុជាធ្វើដំណើរទៅបង្រៀន និងសិក្សានៅអឺរ៉ុបផងដែរ។ គម្រោងនេះនឹងផ្តល់អាហារូបករណ៍ដល់និស្សិតបច្ចេកទេស និងនិស្សិតសិក្សាជំនាញស្ទែម (STEM) និងជួយសម្រួលដល់ការចូលរួមរបស់និស្សិតជាមួយនឹងអាជីវកម្មនៅក្នុងឧស្សាហកម្មកែច្នៃចំណីអាហារ និងឧស្សាហកម្មកាត់ដេរ។
នេះមិនមែនជាលើកទីមួយទេ ដែលសហភាពអឺរ៉ុបបានផ្តល់មូលនិធិជួយប្រព័ន្ធអប់រំរបស់កម្ពុជា។ ចាប់តាំងពីឆ្នាំ២០០០មក សហភាពអឺរ៉ុបបានផ្តល់ទឹកប្រាក់ជាង៣០០លានដុល្លារសម្រាប់កំណែទម្រង់វិស័យអប់រំ នេះបើយោងតាមក្រសួងអប់រំ។ ក្រៅពីជួយដល់គម្រោងអប់រំ លោកស្រី Urpilainen បានសម្រេចកម្មវិធីចំនួនបីផ្សេងទៀតជាមួយក្រសួងសេដ្ឋកិច្ច និងហិរញ្ញវត្ថុកាលពីថ្ងៃអង្គារ ដែលផ្តល់មូលនិធិដោយសហភាពអឺរ៉ុប និងអាល្លឺម៉ង់ ជាមួយទឹកប្រាក់១៨,៤លានដុល្លារសម្រាប់ការលើកកម្ពស់ប្រព័ន្ធកសិកម្ម និងចំណីអាហារ ទឹកប្រាក់៦,៥លានដុល្លារសម្រាប់ការអភិវឌ្ឍថាមពលប្រកបដោយនិរន្តរភាព និងទឹកប្រាក់៧,៦លានដុល្លារសម្រាប់កម្មវិធីផ្តោតលើវិស័យពាណិជ្ជកម្ម និងវិស័យឯកជន។
លោកស្រី ឃួន វិច្ឆិកា អ្នកនាំពាក្យក្រសួងអប់រំមានប្រសាសន៍ថា បច្ចុប្បន្នមានវិទ្យាល័យចំនួន២១ ដែលផ្តល់ការបណ្តុះបណ្តាលជំនាញបច្ចេកទេសនៅក្នុងខេត្តចំនួន១៩។ សិស្ស៣៥០០នាក់នៅសាលាទាំងនេះសិក្សាផ្នែកអេឡិចត្រូនិច មេកានិច វិទ្យាសាស្ត្រកុំព្យូទ័រ និងការអភិវឌ្ឍកសិកម្មបន្ថែមលើការអប់រំចំណេះទូទៅរបស់ពួកគេ។
ប៉ុន្តែកម្មវិធីទាំងនេះកំពុងប្រឈមមុខនឹងបញ្ហាជាច្រើន រួមទាំងកង្វះគ្រូសម្រាប់វគ្គសិក្សាជំនាញទាំងនេះ និងកង្វះឧបករណ៍ដែលចាំបាច់។ ខេត្តបាត់ដំបង ឧត្តរមានជ័យ កែប រតនគិរី ប៉ៃលិន និងខេត្ត ពោធិ៍សាត់ បច្ចុប្បន្នមិនមានវិទ្យាល័យបច្ចេកទេសនោះទេ។ បច្ចុប្បន្ន ក្រសួងមានគម្រោងបើកវិទ្យាល័យបច្ចេកទេសពីរបន្ថែមទៀតក្នុងខេត្តបាត់ដំបង និងពោធិ៍សាត់ នេះបើតាមលោកស្រី វិច្ឆិកា។
សំអុល សុវណ្ណមនោរក្ស សិស្សថ្នាក់ទី១២ នៅវិទ្យាល័យជម្ពូវ័ន ដែលបានបង្ហាញម៉ាស៊ីនដើរដោយថាមពលខ្យល់ ដែលប្អូនបានរចនានៅក្នុងពិធីកាលពីថ្ងៃអង្គារបានសម្តែងការគាំទ្ររបស់សហភាពអឺរ៉ុបនឹងជួយសិស្សានុសិស្សកសាងជំនាញបច្ចេកទេសរបស់ពួកគេបន្ថែមទៀត។
សុវណ្ណមនោរក្ស បាននិយាយថា៖ «វាជំរុញខ្ញុំខ្លាំងណាស់ ពីព្រោះសព្វថ្ងៃនេះគ្រប់គ្នាប្រើប្រាស់បច្ចេកវិទ្យាគ្រប់ប្រភេទ សូម្បីតែមនុស្សយន្ត និងយន្តហោះគ្មានមនុស្សបើក ដើម្បីថតរូប ដូច្នេះយើងសិក្សាអំពី [បច្ចេកវិទ្យា] ដើម្បីជួយឲ្យវិស័យឌីជីថលនៅកម្ពុជារីកចម្រើន។ ដោយសារខ្ញុំកំពុងសិក្សាជំនាញបច្ចេកទេសច្រើនប្រភេទ ខ្ញុំសង្ឃឹមថា ខ្ញុំអាចទទួលបានការងារជាច្រើននៅក្នុងវិស័យឌីជីថល»។
អ៊ូរ ទេពច័ន្ទសុខខា ជាសិស្សថ្នាក់ទី១២ដែរ បាននិយាយដោយសាទរអំពីបំណងប្រាថ្នារបស់នាងក្នុងការរួមចំណែកដល់ការអភិវឌ្ឍប្រទេសកម្ពុជាតាមរយៈការអភិវឌ្ឍជំនាញបច្ចេកទេសរបស់នាង។ នាងនិយាយថា ការសិក្សាផ្នែកអេឡិចត្រូនិចនឹងជួយឱ្យនាងងាយស្រួលរកការងារធ្វើ ហើយនាងចង់ឃើញសិស្សកាន់តែច្រើនមានឱកាសបែបនេះ។
អ៊ូរ ទេពច័ន្ទសុខខា បាននិយាយថា សាលាបច្ចេកទេសមានសារៈសំខាន់ជាពិសេសសម្រាប់ក្មេងស្រីដូចជានាង ពីព្រោះ «ស្ត្រីកម្រសិក្សា [ផ្នែក] អេឡិចត្រូនិច និងបច្ចេកវិទ្យាណាស់» ហើយកម្មវិធីទាំងនេះនឹងជួយពួកគេ «អភិវឌ្ឍជំនាញទាំងនេះសម្រាប់ខ្លួនយើង និងអភិវឌ្ឍជំនាញទាំងនេះសម្រាប់ប្រទេស»។
លោក ពេជ្រ ម៉េងលី គ្រូបង្រៀនផ្នែកអេឡិចត្រូនិកនៅសាលានេះបានមានប្រសាសន៍ថា ចំនួនសិស្សចុះឈ្មោះចូលរៀនថ្នាក់បច្ចេកទេសមានការកើនឡើងជារៀងរាល់ឆ្នាំ ដោយសារសិស្សចាប់អារម្មណ៍លើបច្ចេកវិទ្យា។
លោកបានមានប្រសាសន៍ថា៖ «សព្វថ្ងៃនេះ អ្វីគ្រប់យ៉ាងគឺជាឌីជីថល ដូច្នេះវិស័យនេះ គឺមិនអាចខ្វះបានទេ។ វាងាយស្រួលក្នុងការស្វែងរកការងារធ្វើនៅក្នុងប្រទេស។ ពួកគេមិនចាំបាច់ធ្វើចំណាកស្រុកទៅធ្វើការនៅក្រៅប្រទេស»។
លោក ប៉ា ចាន់រឿន ប្រធានវិទ្យាស្ថានប្រជាធិបតេយ្យកម្ពុជាបានកត់សម្គាល់ថា ការបណ្តុះបណ្តាលជំនាញ គឺចាំបាច់ ដើម្បីលើកកម្ពស់កម្លាំងពលកម្មជំនាញក្នុងប្រទេស និងដើម្បីឲ្យវិស័យបច្ចេកទេសរីកចម្រើន។ លោកគិតថា កម្មវិធីថ្មីនេះនឹងមានឥទ្ធិពលវិជ្ជមានលើយុវជនកម្ពុជានិងទាក់ទាញការវិនិយោគពីអន្តរជាតិ។
លោកមានប្រសាសន៍បន្ថែមថា៖ «ការបង្កើតថ្នាក់បច្ចេកទេសចាប់ពីវិទ្យាល័យក៏ជារឿងល្អមួយដែរ ដើម្បីជួយសិស្សរបស់យើងមួយចំនួនដែលមិនមានលទ្ធភាពបន្តការសិក្សា [នៅសកលវិទ្យាល័យ] ឱ្យទទួលបានជំនាញបច្ចេកទេស និងទទួលបានចំណេះដឹងដែលអាចប្រើប្រាស់នៅកន្លែងធ្វើការ»៕
ប្រែសម្រួលពីអត្ថបទភាសាអង់គ្លេស៖ European Union and Cambodia Launch $53 Million Technical Education Initiative
