នៅក្នុងសវនាការលើកទីប្រាំមួយលើបណ្តឹងឧទ្ធរណ៍ កាលពីថ្ងៃព្រហស្បតិ៍ លោក កឹម សុខា អតីតមេដឹកនាំគណបក្សប្រឆាំង បានបដិសេធថា មិនជាប់ពាក់ព័ន្ធនឹងបាតុកម្មទេ អំឡុងពេលមានយុទ្ធនាការមួយដែលគេហៅថា ថ្ងៃចន្ទពណ៌ខ្មៅ ដែលរៀបចំដោយសកម្មជនសិទ្ធិមនុស្ស ដោយលោកបានអះអាងបន្ថែមទៀតថា ការចោទប្រកាន់លោកពីបទក្បត់ជាតិមិនមានពាក់ព័ន្ធនឹងបាតុកម្មនោះទេ។
លោកស្រី ម៉េង សុភារី មេធាវីរបស់លោក កឹម សុខា ប្រាប់អ្នកសារព័ត៌មានក្រោយសវនាការថា សំណួរផ្តោតជុំវិញបដិវត្តន៍ពណ៌ទាក់ទងនឹងបាតុកម្ម អំឡុងពេលនោះគេឃើញប្រជាពលរដ្ឋលើកកណ្តាប់ដៃ និងកាន់ផ្កាឈូក។
លោកស្រី ម៉េង សុភារី បានមានប្រសាសន៍ថា៖ «កូនក្តីខ្ញុំបានបញ្ជាក់ហើយថា វា [បាតុកម្ម] មិនទាក់ទងនឹងគាត់ទេ។ យើងសង្កេតឃើញថា ភស្តុតាងវាមិនគ្រប់គ្រាន់ ដើម្បីបង្ហាញថា កូនក្តីរបស់យើងបានប្រព្រឹត្តបទល្មើសនោះទេ។ ភ័ស្តុតាងនៃបាតុកម្មដែលបានបង្ហាញមនុស្សកាន់ផ្កាឈូកនោះ មិនពាក់ព័ន្ធនឹងគាត់ទេ» ។
លោកស្រីបានបន្ថែមថា លោក កឹម សុខា បានប្រាប់តុលាការថា លោកមិនបានបញ្ជាឲ្យធ្វើបាតុកម្មទាំងនោះទេ ហើយស្នើសុំទុកឲ្យអ្នកដែលរៀបចំបាតុកម្មទាំងនោះឆ្លើយជំនួសវិញ។ យុទ្ធនាការថ្ងៃចន្ទពណ៌ខ្មៅបានចាប់ផ្តើមនៅឆ្នាំ២០១៦ ដើម្បីទាមទារឱ្យរដ្ឋាភិបាលដោះលែងបុគ្គលិកសមាគមការពារសិទ្ធិមនុស្សអាដហុកចំនួន៤នាក់ និងមន្ត្រីគណៈកម្មាធិការជាតិរៀបចំការបោះឆ្នោតម្នាក់ ដែលតាមចោទថា ត្រូវបានចាប់ខ្លួនពីបទសូកប៉ាន់នារីវ័យក្មេងម្នាក់ពាក់ព័ន្ធនឹងរឿងអាស្រូវផ្លូវភេទដែលពាក់ព័ន្ធនឹងលោក កឹម សុខា។
លោក កឹម សុខា ដែលត្រូវបានកាត់ទោសឱ្យជាប់ពន្ធនាគាររយៈពេល២៧ឆ្នាំពីបទក្បត់ជាតិកាលពីខែមីនា ឆ្នាំ២០២៣ ត្រូវបានចាប់ខ្លួនកាលពីឆ្នាំ២០១៧ ដែលតាមចោទពីបទសមគំនិតជាមួយសហរដ្ឋអាមេរិកធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាល។ ពីរខែក្រោយមក តុលាការកំពូលបានរំលាយគណបក្សរបស់លោក គឺគណបក្សសង្គ្រោះជាតិ។
ក្រៅពីការកាត់ទោសឲ្យជាប់ពន្ធនាគារ សាលាដំបូងរាជធានីភ្នំពេញបានហាមឃាត់លោកមិនឲ្យធ្វើសកម្មភាពនយោបាយអស់មួយជីវិត និងបានហាមលោកមិនឲ្យទាក់ទងជាមួយអ្នកផ្សេងក្រៅពីសមាជិកគ្រួសារដោយគ្មានការអនុញ្ញាតពីតុលាការឡើយ។
ក្រុមអង្គការសិទ្ធិមនុស្សនានានិងរដ្ឋាភិបាលសហរដ្ឋអាមេរិកបានរិះគន់យ៉ាងខ្លាំងចំពោះសេចក្តីសម្រេចរបស់តុលាការ។ លោក W. Patrick Murphy ឯកអគ្គរដ្ឋទូតសហរដ្ឋអាមេរិកបានបង្ហោះសារនៅលើបណ្តាញសង្គម X (ពីមុន Twitter) កាលពីខែមីនាឆ្នាំមុនថា៖ «ការកាត់របស់លោក ដែលត្រូវបានធ្វើឡើងតាមការចោទប្រកាន់ពីបទសមគំនិតបែបប្រឌិតនេះ គឺជាការខុសធ្លោយក្នុងការជម្រះក្តី» ។
លោក គី តិច មេធាវីរដ្ឋាភិបាលបដិសេធធ្វើអត្ថាធិប្បាយ។ លោកមានប្រសាសន៍ថា៖ «ខ្ញុំមិនអាចធ្វើបទសម្ភាសជាមួយបណ្តាញព័ត៌មានបានទេ ដោយសារការងារខ្លះរបស់ជាមេធាវីមិនអាចនិយាយជាសាធារណៈបានទេ»។
លោក អំ សំអាត នាយកគ្រប់គ្រងកិច្ចការទូទៅអង្គការការពារសិទ្ធិមនុស្សលីកាដូ ដែលបានចូលរួមសវនាការមានប្រសាសន៍ថា ក្រុមអង្គការសង្គមស៊ីវិលធ្វើការងារលើបញ្ហាសិទ្ធិមនុស្ស លទ្ធិប្រជាធិបតេយ្យ និងការបោះឆ្នោត កត់សំគាល់ឃើញថាសំណុំរឿងដែលពាក់ព័ន្ធអ្នកនយោបាយនឹងបញ្ចប់នៅពេលដែលមានដំណោះស្រាយផ្នែកនយោបាយ។
លោកមានប្រសាសន៍ថា៖ «តាំងពីដំបូងមក មានការចោទប្រកាន់មកលើអ្នកនយោបាយ ក៏ដូចជាគណបក្សនយោបាយ។ នៅពេលដែលមានការសម្រុះសម្រួលនយោបាយ យើងឃើញថា ករណីទាំងនោះអាចត្រូវបានដោះស្រាយ» ។
លោក ឃុន លាងម៉េង អ្នកនាំពាក្យសាលាឧទ្ធរណ៍បដិសេធធ្វើអត្ថាធិប្បាយ។
សវនាការនឹងបន្តនៅថ្ងៃទី២៥ ខែមេសា៕
ប្រែសម្រួលពីអត្ថបទភាសាអង់គ្លេស Ex-Opposition Leader Kem Sokha Denied Color Revolution Involvement
