សមាគមសម្ព័ន្ធអ្នកសារព័ត៌មានកម្ពុជា

ក្រុមគ្រួសារជនរងគ្រោះដោយសារបាក់រលំអគារនៅព្រះសីហនុ ស្នើកិច្ចអន្តរាគមន៍ពីនាយករដ្ឋមន្រ្តី ខណៈមិនទាន់ទទួលបានសំណងពីជនល្មើស

ស្ត្រីជាគ្រួសារជនរងគ្រោះដែលស្លាប់ដោយសារបាក់អគារសង្កត់នៅខេត្តព្រះសីហនុ ប្រមូលផ្ដុំគ្នានៅមុខអគ្គបញ្ជាការដ្ឋានអង្គរក្ស ដើម្បីដាក់ញត្តិទៅនាយករដ្ឋមន្ត្រីស្វែងរកដំណោះស្រាយ នៅខេត្តកណ្ដាល។ រូបថតថ្ងៃទី១៣ ខែតុលា ឆ្នាំ២០២២។ ខេមបូចា/ ព្រីង សំរាំង
ស្ត្រីជាគ្រួសារជនរងគ្រោះដែលស្លាប់ដោយសារបាក់អគារសង្កត់នៅខេត្តព្រះសីហនុ ប្រមូលផ្ដុំគ្នានៅមុខអគ្គបញ្ជាការដ្ឋានអង្គរក្ស ដើម្បីដាក់ញត្តិទៅនាយករដ្ឋមន្ត្រីស្វែងរកដំណោះស្រាយ នៅខេត្តកណ្ដាល។ រូបថតថ្ងៃទី១៣ ខែតុលា ឆ្នាំ២០២២។ ខេមបូចា/ ព្រីង សំរាំង

ក្រុមគ្រួសារជនរងគ្រោះដែលស្លាប់ដោយសារការបាក់រលំអគារកម្ពស់៧ជាន់នៅ​ខេត្ត​ព្រះសីហនុកាលពីជាង៣ឆ្នាំមុន នៅមិនទាន់ទទួលបានសំណងពីជនជាតិចិនដែលជា​អ្នកទទួល​ខុសត្រូវចំពោះសោកនាដកម្មនេះនៅឡើយទេ។ ពួកគេស្នើកិច្ចអន្តរាគមន៍ពីលោក​នាយករដ្ឋមន្រ្តី ហ៊ុន​ សែន ដើម្បីជួយដោះស្រាយឱ្យពួកគេទទួលបានសំណង។

ក្រុមគ្រួសារសាច់ញាតិរបស់ជនរងគ្រោះដែលជាកម្មករសំណង់ស្លាប់ដោយសារតែ​ការបាក់​រលំអគារមួយកាលពីឆ្នាំ២០១៩ នៅខេត្តព្រះសីហនុ ប្រមាណ១០នាក់ បានធ្វើដំណើរ​ពី​ខេត្ត​កំពត មកដាក់ញត្តិស្នើសុំកិច្ចអន្តរាគមន៍ពីលោកនាយករដ្ឋមន្រ្តី នាព្រឹកថ្ងៃទី១៣ ខែតុលា ឆ្នាំ២០២២នេះ តែមិនមានមន្រ្តីណាចេញមកទទួលញត្តិនោះទេ។

អ្នកស្រីប៉ែន សារុន មានស្រុកកំណើតនៅខេត្តកំពត បានប្រាប់ឱ្យដឹងថា តុលាការបាន​សម្រេច​ឱ្យក្រុមគ្រួសារជនរងគ្រោះ ទទួលបានសំណង និងឈ្នះក្ដីនេះហើយ។ ប៉ុន្តែអ្នកស្រី​មិនទាន់ទទួលបានសំណងសូម្បីលុយមួយរយរៀល ពីជនបង្កទាំងនោះនៅឡើយទេ ដូច្នេះ​អ្នកស្រីមកសុំការអន្តរាគមន៍ពីនាយករដ្ឋមន្រ្តី។

អ្នកស្រីថា៖ «ខ្ញុំមកនេះ សុំឱ្យសម្ដេចជួយរឿងបាក់រលំអគារនៅកំពង់សោមតាំងពី២០១៩ ឡើង​តុលាការកំពូលហើយស្ងាត់ជ្រាបដល់ឥឡូវអត់ឃើញសង ចឹងសុំឱ្យសម្ដេចជួយប្រជាជន ម្ដេចកាត់ហើយអត់ឃើញសំណងចឹង»។

អ្នកស្រីបន្ថែមថា តាមរយៈការសម្រេចរបស់តុលាការ ជនបង្ក ត្រូវសងជំងឺចិត្តដល់ក្រុមគ្រួសារ​ជនរងគ្រោះ ដែលមានសមាជិកស្លាប់ក្នុងម្នាក់ចំនួន១០០លានរៀល ខណៈអ្នករងរបួសបាន​២០​លាន​រៀល។

អ្នកស្រី សារុន ក្លាយជាស្រ្តីមេម៉ាយក្រោយប្ដីអ្នកស្រីស្លាប់ ដោយសារតែការបាក់រលំអគារ ប្រាប់ទៀតថា ជីវភាពក្រុមគ្រួសារអ្នកស្រីកាន់តែមានភាពលំបាកមួយកម្រិតទៀត ត្បិត​បាត់​បង់បង្គោលគ្រួសារ និងកំពុងជាប់បំណុលធនាគារជាង៣ម៉ឺនដុល្លារ។

អ្នកស្រីថា៖ «ពិបាក ខ្ញុំពិបាកមាំណាស់ចិញ្ចឹមកូន៣រៀនទាំង៣ទៀត ហើយជំពាក់ធនាគារ​ច្រើនណាស់៣ម៉ឺនជាង»។

មិនខុសគ្នាប៉ុន្មានពីអ្នកស្រី សារុន អ្នកស្រី បេន ស្រីកា អះអាងថា អ្នកស្រីក៏មិនទាន់ទទួលបាន​សំណង​ដូចក្រុមគ្រួសារឯទៀត ថ្វីបើតុលាការបានសម្រេចឱ្យជនបង្កផ្ដល់សំណង​មកក្រុមជន​រង​គ្រោះរួចហើយក៏ដោយ កាលពីថ្ងៃទី១៥ ខែមិថុនា ឆ្នាំ២០២២។

អ្នកស្រីថា៖ «ប្អូនប្រុសខ្ញុំស្លាប់អាយុ១៨ឆ្នាំ តាំងពី២០១៩ មិនទាន់ទទួលបានសំណងទេពីចិន​ទេ»។

អ្នកស្រីបន្តថា ក្រុមគ្រួសារជនរងគ្រោះខ្លះបានប្តឹងទាមទារសំណងខុសៗគ្នា ដោយគ្រួសារខ្លះ​ទាមទារ៦ម៉ឺនដុល្លារ ខ្លះទៀត៥ម៉ឺនដុល្លារ តែមកទល់ពេលនេះ មិនដឹងដំណឹងអ្វីទាល់តែសោះ​ពីលុយសំណងទាំងនោះ។

អ្នកស្រីថា៖ «តុលាការកំពូលដោះស្រាយសម្រេច ដល់តែសម្រេចអត់ឃើញមាន​លទ្ធផល​ថាត្រូវសងយើង ឬមិនសងក៏អត់ប្រាប់»។

អ្នកស្រីរំពឹងសុំត្រឹមតែមានការអន្តរាគមន៍ពីរដ្ឋាភិបាល ដើម្បីជំរុញឱ្យដោះស្រាយបញ្ហា​សំណង ត្បិតក្រុមគ្រួសារជនរងគ្រោះមានជីវភាពលំបាកកំពុងត្រូវការថវិកា។

អ្នកស្រីបន្ថែមថា៖«យើងចង់បានឱ្យសម្ដេចជួយ សំណងចិនហ្នឹងបានឬក៏អត់ បើអត់ប្រាប់​កូនចៅឱ្យ​អស់ចំងល់»។

ស្ត្រីជាគ្រួសារជនរងគ្រោះដែលស្លាប់ដោយសារបាក់អគារសង្កត់នៅខេត្តព្រះសីហនុ ប្រមូលផ្ដុំគ្នានៅមុខអគ្គបញ្ជាការដ្ឋានអង្គរក្ស ដើម្បីដាក់ញត្តិទៅនាយករដ្ឋមន្ត្រីស្វែងរក​ដំណោះស្រាយ នៅខេត្តកណ្ដាល។ រូបថតថ្ងៃទី១៣ ខែតុលា ឆ្នាំ២០២២។ ខេមបូចា/ ព្រីង សំរាំង

យ៉ាងណាមិញ នៅពេលដែលពលរដ្ឋទាំងនោះបានធ្វើដំណើរមកដាក់ញត្តិ​សុំការអន្តរាគមន៍​ពីលោកនាយករដ្ឋមន្រ្តី គេមិនឃើញមានមន្រ្តី ឬអ្នកតំណាងណាចេញមកទទួលញត្តិឡើយ តែគេឃើញមានមន្រ្តីនៅក្បែរផ្ទះសម្ដេចនៅទួលក្រសាំង បានប្រាប់ឱ្យពលរដ្ឋត្រឡប់ទៅ​ផ្ទះ​វិញ ហើយដាក់សំណើរទាំងនោះទៅថ្នាក់ខេត្តជាមុនសិន។

​បើតាមអ្នកស្រីសារុន ប្រាប់ថា មូលហេតុដែលអ្នកស្រីមកភ្នំពេញ ដើម្បីដាក់ញត្តិទៅ​នាយករដ្ឋមន្រ្តី ព្រោះក្រុមអ្នកស្រីយល់ថា មានតែលោកនាយករដ្ឋមន្រ្តីប៉ុណ្ណោះ ដែលអាច​ដោះស្រាយ​បញ្ហានេះបាន។

អ្នកស្រី សារុន បញ្ជាក់បន្ថែមថា៖ «មេធាវីកាន់ក្ដីខ្ញុំហ្នឹងគាត់ថា បើបងឯងចង់លឿន បងឯង​ទៅជួបខាងសម្ដេចទៅពន្លឿនឱ្យហើយ»។

លោក គង់ ចំរើន មន្រ្តីខុន្ទកាល័យនាយករដ្ឋមន្រ្តី ថ្លែងតាមទូរសព្ទថា ពលរដ្ឋទាំងនោះ​ធ្លាប់​មក​ដាក់ញត្តិនៅខុទ្ទការល័យម្ដងកាលពីខែសីហាកន្លងទៅ ប៉ុន្តែពួកគេមិនមានលិខិត​ត្រឹម​ត្រូវ​ឡើយ ដូច្នេះលោកមិនបានដឹងទេ ថាពួកគេទៅដាក់ញត្តិដល់ផ្ទះនាយករដ្ឋមន្រ្តីកាល​ពីថ្ងៃ​ម្សិលមិញ​នេះ។

លោកបន្ថែមថា៖ «ពួកគាត់ធ្លាប់មកកាលពីចុងខែ៨ ហើយមកអត់មានឯកសារ បានខ្ញុំចាត់ចែង​ជួយ​រៀបចំឯកសារឱ្យគាត់ដើម្បីទៅសុំអនុវត្តនៅកំពង់សោម តែគាត់នេះមក​ពីណា?​ ហើយ​គាត់​ផ្ដេសផ្ដាស់អ៊ីចឹង គាត់អត់ឃើញ គាត់ចេះតែនិយាយតាមទូរសព្ទដូចអ្នកសារព័ត៌មានអ៊ីចឹង អាហ្នឹងសរសេរខ្យល់ហើយ»។

ជុំវិញករណីនេះ លោកស្រីទន់ គីមហួយ មេធាវីការពារក្ដី របស់បុរសជនជាតិចិនឈ្មោះ Cheng Kun មិនអាចទាក់ទងសុំការបកស្រាយបានទេ។ខណៈលោក ជីវ កេង អនុប្រធាន​តុលាការកំពូល និងជាប្រធានចៅក្រមជនុំជម្រះនៃសំណុំរឿងនេះ បានអះអាងថា ថ្វីបើ​តុលាការកំពូលបានកាត់ក្ដីនេះរួចហើយក៏ដោយ តែចំពោះនីតិវិធីអនុត្ត​គឺនៅស្ថិត​នៅ​សាលាដំបូងខេត្តព្រះសីហនុ។

លោក ជីវ កេង ថ្លែងថា៖ «សួរខ្ញុំ ខ្ញុំអត់ដឹងផង នីតិវិធីនេះនៅសាលាដំបូងទេ»

ទន្ទឹមនឹងនេះ លោក ម៉ម ចាន់ណេត ជាមេធាវីមួយរូបក្នុងចំណោមមេធារវីស្ម័គ្រ៣រូប​របស់ជនរងគ្រោះ បានបដិសេធសុំមិនអត្ថធិប្បាយ ដោយលោករង់ចាំការឆ្លងយោបល់​ពីក្រុមការងាររួម។

លោកបញ្ជាក់ថា៖ «សុំអាធ្យាស្រ័យ ឥឡូវខ្ញុំកំពុងជាប់ប្រជុំ។ ក្នុងនាមខ្ញុំជាសមាជិកមួយរូប ក្នុង ចំណោមមេធាវីបីរូប ដែលត្រូវបានចាត់តាំងដោយឯកឧត្តមប្រធានក្រុមមេធាវីស្ម័គ្រចិត្ត ដើម្បី​ជួយការពារសិទ្ធិជូនជនរងគ្រោះ ការណ៍នេះ ខ្ញុំសុំការឆ្លងយោបល់ពីក្រុមការងារ​រួមសិន»។

ចំណែកលោក សួរ ឆ្លូញ អនុប្រធានសហព័ន្ធសហជីពកម្មករសំណង់ និងព្រៃឈើកម្ពុជា (BWTUC) យល់ឃើញថា ជារឿងចម្លែកមួយ ដែលមកទល់ពេលនេះហើយ ក្រុមគ្រួសារ​ជនរង​គ្រោះមិនទាន់ទទួលបានប្រាក់សំណង ក្រោយតុលាការប្រកាសសាលក្រម ហើយ​មេធាវី​ការពារ​ក្ដី​ឱ្យក្រុមគ្រួសារជនរងគ្រោះមានចំណាត់ការលើរឿងនេះបន្ត។

លោកថ្លែងថា៖ «ជារឿងចំណែកដែរ ដែលចូលជាង៤ខែហើយដែលសាលក្រមប្រកាសហើយ បែជាមិនបានធ្វើការទូទាត់សំណងទៅដល់ពួកគាត់»

គួររំលឹកថាជនជាប់ចោទម្នាក់ដែលប្តឹងសារទុក្ខឈ្មោះ CHENG KUN ជនជាតិចិន មុខរបរ​ពាណិជ្ជករ ទីកន្លែង​កំណើត​នៅខេត្តហ៊ូប៉ី ប្រទេសចិន ត្រូវបានឃុំខ្លួនតាមដីកាបង្គាប់ឱ្យ​ឃុំខ្លួនចុះថ្ងៃទី២៦ ខែធ្នូ ឆ្នាំ២០១៩ របស់ចៅក្រមស៊ើបសួរសាលាដំបូងខេត្តព្រះសីហនុ នៅពន្ធនាគារខេត្ត​ព្រះសីហនុ។

ជនជាតិចិនរូបនេះ ជាប់ចោទពីបទ «មនុស្សឃាតដោយអចេតនា, បង្កឲ្យមាន​របួសស្នាម​ដោយអចេតនា និងបទធ្វើឱ្យ ទូចខាតមានស្ថានទម្ងន់ទោសដោយសារ​ការបង្ក​របួស​ដល់​អ្នកដទៃ» ប្រព្រឹត្តទៅក្រុមទី១៥ ភូមិ៣ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី២២ ខែមិថុនា ឆ្នាំ២០១៩ បទល្មើសដែលមានចែង និងឲ្យផ្តន្ទាទោសតាមបញ្ញត្តិ​មាត្រា ២០៧ មាត្រា ២៣៦ និង មាត្រា ៤១៨ នៃក្រមព្រហ្មទណ្ឌ។

ក្រុម​ជួយសង្គ្រោះ​ស្វែង​រក​ជន​រង​គ្រោះ​នៅ​កន្លែង​បាក់​អគារ​ដែល​បាន​សម្លាប់​មនុស្ស​២៨​នាក់​នៅ​ក្រុង​ព្រះសីហនុ​ក្នុង​ខែ​មិថុនា ​ឆ្នាំ​២០១៩។ រូបភាពពី សង់ត្រាល់

បើតាមប្រភពពីប្រជាពលរដ្ឋ បានឱ្យដឹងថា ក្រុមគ្រួសាររបស់ជនរងគ្រោះ បានទទួលសំណង​ពី​រដ្ឋាភិបាល ដោយអ្នកស្លាប់​ម្នាក់ៗ​ទទួលបាន​​ប្រាក់ឧបត្ថម្ភ​៨ម៉ឺនដុល្លារអាមេរិក និងអ្នក​របួស​ ម្នាក់ៗ​​ទទួលបាន ១ម៉ឺនដុល្លារ ប៉ុន្ដែសម្រាប់អ្នក​របួស​២នាក់ ដែលស្ថិត​នៅក្រោម​គំនរបាក់បែក​ប្រមាណ​ជិត ៦០​ម៉ោង​ ត្រូវបាន​ជួយសង្គ្រោះ​នោះ ទទួលបាន​ការឧបត្ថម្ភ​៣ម៉ឺន​ដុល្លារអាមេរិក​ក្នុងម្នាក់។

តុលាការ​កំពូល​នៅ​ថ្ងៃ​ទី​១៥ ខែ​មិថុនា ឆ្នាំ២០២២ ក៍បាន​តម្កល់​ទោស​ជាប់​ពន្ធនាគារ​រយៈពេល ៣​ឆ្នាំ លើ​បុរស​ជនជាតិ​ចិន​ម្នាក់​ដែល​ត្រូវ​បាន​កាត់ទោស​ក្រោយ​ការ​បាក់​អគារ​មិន​ទាន់​សាង​សង់​​នៅ​ខេត្ត​ព្រះសីហនុ ឆ្នាំ២០១៩ បន្ទាប់​ពី​សវនាការ​នៅ​ថ្ងៃ​ទី៨ ខែ​មិថុនា។

សាលា​ឧទ្ធរណ៍​ក្នុងខែសីហា ឆ្នាំ២០២១ ​បាន​តម្កល់​សាលក្រម​របស់​សាលា​ដំបូង​ខេត្ត​ព្រះសីហនុ​ដែល​កាលពី​ឆ្នាំ​មុន​បាន​កាត់ទោស​ជនជាតិ​ចិន​បួន​នាក់​ឱ្យ​ជាប់​ពន្ធនាគារ​ពី ២,៥ ឆ្នាំ​ទៅ ៣ ឆ្នាំ​ពី​បទ​ប្រព្រឹត្ត​ករណី​បាក់​អគារ​នៅ​ខេត្ត​ព្រះសីហនុ​ឆ្នាំ ២០១៩ ដែល​បាន​សម្លាប់​មនុស្ស ២៨ នាក់ និង​របួស ២៦ នាក់។

សាលាដំបូងខេត្តព្រះសីហនុនៅថ្ងៃទី៣០ ខែកក្កដា​ ឆ្នាំ២០២០ បានកាត់ទោសជនជាតិចិន​៤នាក់ និងជនជាតិវៀតណាមម្នាក់ ដាក់ពន្ធនាគារតិចជាង៣ឆ្នាំ ពីបទពាក់ព័ន្ធការដួលរលំ​អគារនៅក្រុងព្រះសីហនុ ដែលបានសម្លាប់មនុស្ស២៨នាក់ និងរបួស២៦នាក់ កាលពីថ្ងៃទី២២ ខែមិថុនា ឆ្នាំមុន។

ពេលនោះ អ្នកនាំពាក្យសាលាដំបូងខេត្តព្រះសីហនុ លោក លឹម ប៊ុនហេង មានប្រសាសន៍ថា តុលាការបានសម្រេចផ្ដន្ទាទោសអ្នកទាំង៥នាក់ ឱ្យជាប់ពន្ធនាគារពី ២,៥ ទៅ ៣ឆ្នាំ ក្នុងម្នាក់ៗ និងបង្គាប់ឱ្យបង់ប្រាក់សរុបពី ៦០ ទៅ ១០០លានរៀល ដល់គ្រួសារនៃជនរងគ្រោះដែល​ស្លាប់​ក្នុងម្នាក់ៗ។ ព្រមទាំងឱ្យសងប្រាក់​២០​លាន​រៀល​ដល់​កម្មករ​រង​របួស​ម្នាក់ៗ។ តុលាការ​ក៏​បាន​បញ្ជា​ឱ្យ​ពួក​គេ​ចេញ​ថ្លៃ​ខូចខាត​ផ្ទះ​នៅ​ក្បែរ​កន្លែង​បាក់​ស្រុត​នោះ​ផង​ដែរ។

ជនជាតិ៤នាក់ដែលត្រូវបានផ្តន្ទាទោសរួមមាន Cheng Kun, 39; Deng Xing Gui, 48; Xie Ya Ping, 43; and Gao You, 29, ពួកគេទាំង៤នាក់បានជាប់ពន្ធនាគារ និងជនជាតិវៀតណាម​ម្នាក់ទៀតឈ្មោះ Nguyen Thi Thuy Hao ដែលបានរត់គេចខ្លួន។

សូមជម្រាបជូនថា កាលពីថ្ងៃទី២២ ខែមិថុនា ឆ្នាំ២០១៩ មានការបាក់រលំអគារ​កម្ពស់៧ជាន់​នៅក្នុងខេត្តព្រះសីហនុ បណ្ដាលឱ្យមនុស្ស២៨នាក់បានស្លាប់ និងរបួស២៦នាក់ នាវេលា​ម៉ោង​៤ទៀបភ្លឺនៅពេលដែលពួកគេកំពុងដេកលង់លក់ ខណៈកម្មករ២នាក់ត្រូវបាន​គេរកឃើញថា​រស់រានមានជីវិតបន្ទាប់ពីគាបនៅក្រោមគំនរអគាបាក់បែករយៈពេល៣ថ្ងៃ៕

253 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម