កូនស្រីរបស់បុរសដែលមានតួនាទីជាអនុភូមិម្នាក់នៅក្នុងឃុំ ក្រវ៉ា ស្រុកបារាយ៍ ខេត្តកំពង់ធំ ទាមទាររកយុត្តិធម៌ដោយអះអាងថា សមត្ថកិច្ចចាប់ខ្លួនឪពុករបស់គាត់ទាំងមិនមានកំហុស ហើយសង្កត់កទាល់តែដាច់ខ្យល់ស្លាប់។
កញ្ញា ឌីន នារតី អះអាងថា ឪពុករបស់គាត់ឈ្មោះ សួង ឌ័ន អាយុ៤៧ឆ្នាំ មានតួនាទីជាអនុភូមិរូង ក្នុងឃុំក្រវ៉ា ត្រូវបានសមត្ថកិច្ចចាប់ខ្លួនកាលពីល្ងាចថ្ងៃទី៧ខែសីហា ហើយស្លាប់នៅថ្ងៃដដែលនោះ។
កញ្ញា ឌីន នារតី ថ្លែងថា៖«គាត់ទៅប្រជុំហើយមកវិញម៉ោង៥ តែចៃដន្យអីភ្លៀង ភ្លៀងខ្លាំងណាស់។ ហើយគាត់ជ្រកភ្លៀងនៅតូបកាហ្វេ ដែលតូបកាហ្វេហ្នឹងគេបើកឡូតូ អនឡាញ តែគេចុះអាជ្ញាបណ្ណត្រឹមត្រូវបានគេហ៊ានបើកចឹង។ ប៉ុន្តែគាត់ចូលមក គាត់អត់លេងទេ គាត់ចូលទៅផឹកហ្វេចឹងទៅ ព្រោះគាត់អត់ចេះលេងល្បែងទេ។ ហើយឈរអត់បាន៣នាទីផង ស្រាប់មានប៉េអឹម ២ឡាន ចុះបកស្រវ៉ាឪខ្ញុំ គៀកកណាបង»។
ក្រោយពេលលោក សួង ឌ័ន ស្លាប់នៅថ្ងៃដដែលនោះលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ បានរាយការណ៍ទៅកងរាជអាវុធហត្ថលើផ្ទៃប្រទេសថា លោក សួង ឌ័ន មានបញ្ហាមិនស្រួលខ្លួនពេលបញ្ជូនពីកន្លែងចាប់ខ្លួនទៅបញ្ជាការដ្ឋានកងរាជអាវុធហត្ថខេត្ត ដោយ មានទឹកមុខស្លេកស្លាំង ដកដង្ហើមញាប់ ហើយក៏ស្លាប់ពេលបញ្ជូនដល់មន្ទីរពេទ្យ។ លោក ហង្ស ថុល មិនបញ្ជាក់ថា ករណីស្លាប់នេះមានពាក់ព័ន្ធអំពើហិង្សាឬអត់នោះទេ។
កញ្ញា ឌីន នារតី បញ្ជាក់ថា ឪពុកគាត់ពិតជាស្លាប់ដោយអំពើហិង្សា ដោយទាញដៃមកក្រោយ ហើយសង្កត់ក ព្រោះមានស្នាមខ្នោះនៅជាប់ដៃ និង ជាំនៅត្រង់ចំណុចក។ កញ្ញាក៏បញ្ជាក់ថា មុនពេលចាប់ខ្លួននោះឪពុករបស់កញ្ញាមានសុខភាពល្អ មិនមានជំងឺប្រចាំកាយទេ។
កញ្ញា ឌីន នារតី បានបន្តថា៖«ឪពុកខ្ញុំអត់មានជំងឺបេះដូង ជំងឺលើសឈាម និងជំងឺទឹកនោមផ្អែមទេ។ មនុស្សគាំងបេះដូងឯណាដល់ថ្នាក់លេចអាចម៍ បងឯងគិតមើលថា គាត់លំបាកប៉ុណ្ណា? ខ្ញុំមានទាំងរូបភាពទៀតបង មានទាំងរូបភាពស្នាមខ្នោះ ស្នាមក និងលេចអាចម៌បង»។
ខេមបូចា ព្យាយាមទាក់ទង លោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ ដើម្បីសុំការពន្យល់បន្ថែមលើករណីនេះ ប៉ុន្តែលោកថា ជាប់ប្រជុំមិនអាចនិយាយបាន។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ថ្លែងថា ករណីស្លាប់លោក សួង ឌ័ន នៅក្នុងខេត្តកំពង់ធំនេះ សមត្ថកិច្ចថ្នាក់ជាតិបានបង្កើតក្រុមការងារដើម្បីចុះទៅសិក្សាស្រាវជ្រាវហើយ។ លោកបន្តថា ការស្រាវជ្រាវនេះ បើរកឃើញថា កម្លាំងអាវុធហត្ថពាក់ព័ន្ធមានកំហុសព្រហ្មទណ្ឌនឹងបញ្ជូលសំណុំរឿងទៅតុលាការ។
លោក ហេង ហ៊ី បានមានប្រសាសន៍ថា៖ «ករណីបើគាត់ពាក់ព័ន្ធបទល្មើសព្រហ្មទណ្ឌនឹងបញ្ជូនទៅតុលាការ តែបើសិនប្រព្រឹត្តិពាក់ព័ន្ធបទវិន័យទូទៅ ឬមួយក្រមសីលធម៌វិជ្ជាជីវៈ ដែលមិនមែនជារឿងព្រហ្មទណ្ឌ អាហ្នឹងយើងអនុវត្តវិន័យទណ្ឌកម្ម»។
ចំពោះលទ្ធផលបឋមនៃការស៊ើបអង្កេតលោកថា មិនទាន់អាចប្រាប់បានទេ ព្រោះត្រូវការផ្ទៀងផ្ទាត់ជាមួយប្រភពផ្សេងទៀត។
ទាក់ទងករណីស្លាប់អនុភូមិនៅខេត្តកំពង់ធំនេះ កាលពីថ្ងៃអង្គារ៍ លោក សៅ សុខា អគ្គមេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យឃាត់មន្ត្រីកងរាជអាវុធហត្ថ១១នាក់ ដែលពាក់ព័ន្ធក្នុងករណីនេះដើម្បីស៊ើបអង្កេត។
លោក ញ៉ែម សំអឿន មន្ត្រីអាដហុកប្រចាំខេត្តកំពង់ធំ ឱ្យដឹងថា លោកបានទៅដល់ផ្ទះបុណ្យសពលោក សួង ឌ័ន ហើយបានសួរព័ត៌មានមួយចំនួនតែមិនបានស៊ីជម្រៅទេ ដោយសារសាក្សីដឹងរឿងនេះ ត្រូវមន្ត្រីមិនឱ្យនិយាយ។ ចំណែកមន្ត្រីពាក់ព័ន្ធចាប់ពីថ្នាក់ ឃុំ ស្រុក និង ខេត្ត ក៏មិនផ្តល់ព័ត៌មានជុំវិញករណីនេះដែរ។
លោក ញ៉ែម សំអឿន បានមានប្រសាសន៍ថា៖ «ទាំងមេប៉ុស្តិ៍ទាំងអធិការ ទាំងមេបញ្ជាការមេប៉េអឹមនៅស្រុកហ្នឹង គេបដិសេធមិនបំភ្លឺជាមួយយើងទេ។ ដោយសារតែគាត់ថា នេះជាការអនុវត្តរបស់ថ្នាក់ខេត្ត»។
ករណីបង្ក្រាបល្បែងអនឡាញនៅខេត្តកំពុងធំដែលឈានដល់ការស្លាប់អនុភូមិម្នាក់នោះ គឺនៅល្ងាចថ្ងៃទី៧ខែសីហានោះ កម្លាំងកងរាជអាវុធហត្ថ ចាប់ខ្លួនបុរស៤នាក់ ប៉ុន្តែក្រោយពេលលោក សួង ឌ័ន ស្លាប់ បុរស៣នាក់ក៏ត្រូវដោះលែងវិញ។
ខេមបូចា ព្យាយាមសាកសួរបុរស៣នាក់ទៀត ដែលរងការចាប់ខ្លួនជាមួយលោក សួង ឌ័ន ប៉ុន្តែពួកគេបដិសេធ ដោយបញ្ជាក់ថា ស្ថិតនៅក្នុងការសាកសួររបស់ក្រុមមន្ត្រីស៊ើបអង្កេត។
កាលពីដើមឆ្នាំ២០២១ ក៏មានករណីចោទប្រកាន់ថា កម្លាំងកងរាជអាវុធហត្ថខេត្តបន្ទាយមានជ័យប្រើអំពើហិង្សាលើប្រជាការពារភូមិម្នាក់ឈ្មោះ ទុយ ស្រស់ រហូតដល់ស្លាប់ ក្រោយពេលចាប់ខ្លួនរូបលោកជាមួយពលរដ្ឋ៤នាក់ផ្សេងទៀតពាក់ព័ន្ធករណីតវ៉ារឿងដីធ្លី។ ករណីនេះតុលាការបានកាត់ទោស លោក ស ប៊ុនសឿង អតីតមេបញ្ជាការរងនៃកងរាជអាវុធហត្ថខេត្តបន្ទាយមានជ័យ ឲ្យជាប់ពន្ធនាគារ ៤ ឆ្នាំនិងលោក ឆយ រដ្ឋនា ជំនួយការការិយាល័យប្រឆាំងគ្រឿងញៀននៃកងរាជអាវុធហត្ថខេត្តបន្ទាយមានជ័យ ដែលពលរដ្ឋរងគ្រោះហៅថា «សឿង៣៨» ឲ្យជាប់ពន្ធនាគារចំនួន ៧ ឆ្នាំ៕
