លោកនាកយរដ្ឋមន្ត្រី ហ៊ុន ម៉ាណែត បានជួបជាមួយលោក Kash Patel នាយកទីភ្នាក់ងារស៊ើបអង្កេតសហព័ន្ធ (FBI) នៃសហរដ្ឋអាមេរិក នៅថ្ងៃពុធនេះដើម្បីពិភាក្សាអំពីការរួមគ្នាធ្វើប្រតិបត្តិការប្រឆាំងបទល្មើសឆបោកតាមប្រព័ន្ធបច្ចេកវិទ្យា ដែលនៅបន្តយកប្រជាពលរដ្ឋអាមេរិកធ្វើជាក្រុមគោលដៅ។ នេះបើតាមការបញ្ជាក់របស់ស្ថានទូតអាមេរិកប្រចាំកម្ពុជា។
ក្នុងដំណើរទស្សនកិច្ចមកកម្ពុជានេះ លោក Kash Patel ក៏បានជួបអគ្គស្នងការនគរបាលជាតិ លោក ស ថេត ផងដែរ។ លោក Kash Patel ក៏បានជួបនាយករដ្ឋមន្ត្រីថៃ លោក Anutin Charnvirakul មួយថ្ងៃមុនមកកម្ពុជាដូចគ្នា ដោយទាំងថៃ និងកម្ពុជា បានព្រមព្រៀងពង្រីកកិច្ចសហការប្រឆាំងនឹងឧក្រិដ្ឋកម្មឆ្លងដែន ជាពិសេសបណ្ដាញឆបោកតាមអនឡាញ។
ស្ថានទូតអាមេរិកប្រចាំរាជធានីភ្នំពេញបានឲ្យដឹងថា ដំណើរទស្សនកិច្ចនេះគូសបញ្ជាក់ពីតម្រូវការចាំបាច់ក្នុងការរួមគ្នាប្រយុទ្ធប្រឆាំងឧក្រិដ្ឋកម្មឆ្លងដែនអនឡាញ រួមទាំងការបង្កើនកិច្ចខិតខំប្រឹងប្រែងក្នុងការផ្ដន្ទាទោស ដើម្បីចាប់ខ្លួន «ក្រុមមេខ្លោងបោកប្រាស់កម្រិតខ្ពស់» និងការលើកកម្ពស់ការចែកចាយព័ត៌មានគ្នា«ពាក់ព័ន្ធមន្ត្រីដែលរួមគំនិត និងម្ចាស់ទីតាំងប្រតិបត្តិការបោកប្រាស់ទាំងនោះ»។
បើតាមស្ថានទូតដដែល សហរដ្ឋអាមេរិកបាន«សម្ដែងការព្រួយបារម្ភយ៉ាងខ្លាំង» ចំពោះការកើនឡើងនៃប្រតិបត្តិការបោកប្រាស់តាមអនឡាញនៅកម្ពុជា ដែលបានបណ្ដាលឲ្យមានការខាតបង់ថវិកាអស់រាប់ពាន់លានដុល្លារពីជនរងគ្រោះជាជនជាតិអាមេរិក ដោយថាបញ្ហានេះនៅតែជាអាទិភាពកំពូលមួយនៃរដ្ឋាភិបាលសហរដ្ឋអាមេរិក។
នៅលើទំព័រហ្វេប៊ុករបស់ខ្លូន លោកនាយករដ្ឋមន្ត្រី ហ៊ុន ម៉ាណែត បានលើកឡើងថា រូបលោក និងលោក Patel បានបញ្ជាក់ជាថ្មីនូវការប្តេជ្ញាចិត្តរបស់កម្ពុជា ក្នុងការបន្តកិច្ចសហប្រតិបត្តិការយ៉ាងជិតស្និទ្ធជាមួយសហរដ្ឋអាមេរិក ដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែន ការជួញដូរគ្រឿងញៀន និងការឆបោកតាមប្រព័ន្ធបច្ចេកវិទ្យា។ លោកបន្តថា កម្ពុជានឹងធ្វើជាម្ចាស់ផ្ទះរៀបចំសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា នៅខែកញ្ញា ឆ្នាំ២០២៦ ដើម្បីរួមចំណែកពង្រឹងកិច្ចសហប្រតិបត្តិការអន្តរជាតិ ក្នុងការដោះស្រាយបញ្ហាប្រឈមតំបន់ និងសកលលោកនេះ។
បើតាមស្ថានទូតអាមេរិក រដ្ឋាភិបាលរបស់ខ្លួនបានវាយតម្លៃខ្ពស់លើការប្ដេជ្ញាចិត្តរបស់លោកនាយករដ្ឋមន្ត្រី ហ៊ុន ម៉ាណែត ក្នុងការប្រយុទ្ធប្រឆាំងនឹងបញ្ហាទាំងនេះ និងថាសហរដ្ឋអាមេរិកកំពុងសម្របសម្រួលយ៉ាងជិតស្និទ្ធជាមួយរដ្ឋាភិបាលកម្ពុជា។
ជំនួបនេះកើតឡើងក្រោយ FBI បានសហការជាមួយទីភ្នាក់ងារជាច្រើនទៀតរបស់អាមេរិកក្នុងការស៊ើបអង្កេត រហូតដល់ឆ្នាំមុនអាជ្ញាធរបានរឹបអូសកាក់ Bitcoin ក្នុងទំហំទឹកប្រាក់ប្រហែល១៥ពាន់លានដុល្លារ ដោយចោទថាទ្រព្យសម្បត្តិទាំងនេះមានជាប់ពាន់ព័ន្ធនឹងអំពើឆបោក និងមានលោក ចេន ហ្ស៊ី ពាក់ព័ន្ធនៅក្នុងនោះដែរ។ លោក ចេន ហ្ស៊ី ជាស្ថាបនិកក្រុមហ៊ុន Prince Group និងក៏ជាអតីតទីប្រឹក្សាលោកនាយករដ្ឋមន្ត្រី ហ៊ុន ម៉ាណែត ផងដែរ។
លោក ចេន ហ្ស៊ី ត្រូវបានអាជ្ញាធរកម្ពុជាចាប់បញ្ចូនទៅប្រទេសចិនវិញកាលដើមឆ្នាំនេះ ក្រោយរដ្ឋាភិបាលអាមេរិកដាក់ទណ្ឌកម្មលើក្រុមហ៊ុន Prince Group ហើយលោក ហ៊ុន ម៉ាណែត ក្រោយមកលើកឡើងថាលោកមិនបានដឹងថាលោក ចេន ហ្ស៊ី គឺជា«មេខ្លោង»នោះទេ។
អ្នកនាំពាក្យលោកនាយរដ្ឋមន្ត្រី គឺលោក មាស សុភ័ណ្ឌ មិនអាចទាក់ទងបានភ្លាមៗក្នុងការធ្វើអត្ថាធិប្បាយលើរឿងនេះទេ។
កម្ពុជាបានចាប់ផ្ដើមបើកយុទ្ធនាការប្រឆាំងនឹងបទល្មើសឆបោកតាមអនឡាញកាលពីមួយឆ្នាំមុន ចំពេលដែលកម្ពុជារងសម្ពាធទាំងពីសហរដ្ឋអាមេរិក និងស្ថាប័នអន្តរជាតិផ្សេងទៀត ដោយទាមទារឲ្យកម្ពុជាបង្ក្រាបឧស្សាហកម្មឆបោកមួយនេះ ដែលនាំឲ្យទីតាំងដែលសង្ស័យថាបានប្រើប្រាស់ជាកន្លែងឆបោកតាមអនឡាញជាច្រើនត្រូវបិទទ្វារ និងមានជនបរទេសរាប់ពាន់នាក់ដែលធ្វើការនៅទីនោះត្រូវបញ្ជូនចេញទៅប្រទេសកំណើតវិញ។ នេះបើតាមព័ត៌មានរបស់រដ្ឋាភិបាល។
ក្រុមអង្គការការពារសិទ្ធិមនុស្សបានរិះគន់លើវិធានការបង្ក្រាបថាមានចំណុចខ្សោយច្រើន ដោយថាអាជ្ញាធរបរាជ័យក្នុងការការពារជនរងគ្រោះដែលត្រូវគេជួញដូរ និងបានរកឃើញនៅក្នុងមជ្ឈមណ្ឌលឆបោកទាំងនោះ ហើយក៏មិនបានស្វែងរក និងដាក់ទោសទណ្ឌលើបុគ្គលគ្រាក់ៗដែលជាប់ពាក់ព័ន្ធនឹងឧស្សាហកម្មនេះដែរ៕
ប្រែសម្រួលពីអត្ថបទភាសាអង់គ្លេស៖ FBI Chief Meets Hun Manet to Discuss Scam Crackdown
