សមាគមសម្ព័ន្ធអ្នកសារព័ត៌មានកម្ពុជា

បុគ្គលិកអាកាសយានដ្ឋានអន្តរជាតិសៀមរាប ទាមទារប្រាក់អត្ថប្រយោជន៍១០០ភាគរយ ក្រោយបញ្ឈប់ពីការងារអំឡុងពេលវិបត្តិកូវីដ១៩

អតីតបុគ្គលិកបម្រើការនៅអាកាសយានដ្ឋានអន្តរជាតិសៀមរាបតវ៉ាប្រាក់អត្ថប្រយោជន៍ពេញ១០០ភាគរយនៅខាងក្រៅមន្ទីរការងារខេត្ត កាលពីថ្ងៃសុក្រ។ រូបភាព៖ CTWF
អតីតបុគ្គលិកបម្រើការនៅអាកាសយានដ្ឋានអន្តរជាតិសៀមរាបតវ៉ាប្រាក់អត្ថប្រយោជន៍ពេញ១០០ភាគរយនៅខាងក្រៅមន្ទីរការងារខេត្ត កាលពីថ្ងៃសុក្រ។ រូបភាព៖ CTWF

អតីត​បុគ្គលិក​បម្រើ​ការ​នៅ​អាកាស​យាន​ដ្ឋាន​អន្តរជាតិ​សៀម​រាប កំពុង​ទាម​ទារ​ប្រាក់អត្ថប្រយោជន៍​១០០​ភាគរយ បន្ទាប់​ពី​អ្នក​ទាំង​នោះ​ត្រូវ​បាន​បញ្ឈប់​ពី​​ការងារ​ដោយ​សារ​តែ​វិបត្តិកូវីដ១៩ ប៉ុន្តែ​ខាង​មន្ត្រី​មន្ទីរ​ការងារ​ថា​អ្នក​ទាំង​១៣០​នាក់​បាត់​បង់​សិទ្ធិ​ក្នុងការ​ចរចា​ ពេល​ពួកគេ​បានដើរចេញមក​តវ៉ាជា​សាធារណៈ​កាលពីសប្ដាហ៍​មុន​។​

អតីត​បុគ្គលិក​បុគ្គលិក​ទាំង​នោះ​ត្រូវ​បាន​ព្យួរ​ការងារ​តាំង​ពីខែ​មេសា ហើយ​កាល​ពី​ខែ​ធ្នូ​កន្លង​ទៅ​អ្នក​ទាំង​នោះ​បាន​បដិសេធ​ទទួល​ប្រាក់​អតីតភាពការងារ​៨០​ភាគរយ​ ពេល​ត្រូវ​បញ្ឈប់​ពីការងារ​ ដោយ​អ្នក​ទាំង​នោះ​ទាម​ទារ​​១០០​ភាគ​រយ​​។​​​

​បើតាម​ការ​បញ្ជាក់​របស់​អតីតបុគ្គលិក និង​ថ្នាក់​ដឹកនាំ​សហជីព បានឲ្យដឹងថា ក្រុ​ម​ហ៊ុន​បារាំង VINCI Airports ដែល​គ្រប់​គ្រង​ចំណែក​ហ៊ុន​ក្នុង​អាកាសយានដ្ឋាន​នេះ បាន​និយាយ​ថា​ខ្លួ​​ន​នឹង​បើក​ប្រាក់​​​អត្ថ​ប្រយោជន៍​៥០​ភាគ​រយ​ទៅ​អ្នក​ដែល​មិន​យល់ព្រម​ទាំង​នោះ និង​ថា​ប្រាក់​នោះ​បាន​ចាប់​ផ្ដើម​ផ្ដល់​ទៅ​អតីតបុគ្គលិក​ហើយ​ដែរ។

លោក លី ម៉ូលីន ដែល​បាន​បម្រើ​ការជាអ្នកផ្តល់សញ្ញាដល់អ្នកបើកយន្តហោះ (air marshal) ជាង​១០​ឆ្នាំ​មក​ហើយ​នោះ បាន​និយាយថា៖ «​អ្វី​ដែល​ក្រុម​ហ៊ុន​បានធ្វើគឺ​លម្អៀង និង​បាន​បំពាន​សិទ្ធិ​របស់ពួក​យើង​ដែល​មាន​ចែង​ក្នុង​មាត្រា​៩៥ [​ក្នុង​ច្បាប់​ស្ដី​ពីការងារ​]។ ពួកគេ​ធ្វើ​ជា​អាជ្ញាកណ្ដាល​ខ្លួន​ឯង កាត់​ក្ដី​ខ្លួន​ឯង​»។

បន្ទាប់​ពី​បាន​បដិសេធ​កិច្ច​ព្រមព្រៀង​កាលពីខែ​ធ្នូ លោក លី ម៉ូលីន បាន​ឃើញ​ប្រាក់ចំនួន​ ៥ ០០០ ដុល្លារ​ផ្ទេរ​ចូល​ក្នុង​កុងធនាគារ​របស់​លោក​​ចេញ​​ពី​អតីត​និយោជក។ ប៉ុន្តែ​លោក​ថា​នៅ​ប្រាក់អតីតភាពការងារ និង​ប្រាក់​សំណង​​ពាក់​កណ្ដាលទៀត​នៅ​មិន​ទាន់​បាន ដែល​នេះបំពាន​ទៅ​នឹង​ច្បាប់​ស្ដីពី​ការងារ​។​

លោក​បន្ថែមថា៖ «ពួកគេ​បញ្ឈប់​យើង​ដោយ​គ្មានការ​ជូន​ដំណឹង​ជាមុន​…​យើង​ធ្លាប់​តែ​មាន​ប្រាក់​ហូប​គុយ​ទាវ ផឹក​កាហ្វេ តែ​ឥឡូវ​យើងជួប​ការ​លំបាក និង​មាន​បញ្ហាធំ​ក្នុង​ការ​រក​ប្រាក់​សង​ធនាគារ»។ លោក​ថា​ក្នុង​មួយ​ខែៗ​លោក​ត្រូវ​បង់ធនាគារ​ប្រហែល​៥០០​ដុល្លារ​។​

ក្រុម​អតីត​បុគ្គលិក​ បាន​និយាយ​ថា​ខ្លួន​បាន​ទទួល​ប្រាក់ខែ​៥០​ភាគរយ​តាំង​ពីខែ​មេសា ដល់​ខែធ្នូ ប៉ុន្តែ​ខាង​និយោជក​ថា​បុគ្គលិក​មាន​ប្រាក់ខែ​តិច​ជាង​៥០០​ដុល្លារ​នៅ​បើក​ពេញ​ ហើយ​អ្នក​មាន​ប្រាក់​ខែ​លើស​ពី​៥០០​ដុល្លារ​កាត់​ចំនួន​២០​ភាគ​រយ​។​

អ្នកពាក្យក្រុម​ហ៊ុន​ Cambodia Airport លោក ខែក នរិនដា មាន​ប្រ​សាសន៍​ថា ដោយ​សារ​តែ​ជើង​ហោះ​ហើរ​មាន​ការ​ធ្លាក់​ចុះ​រហូត​ដល់​៩៩​ភាគរយ​តាំង​ពី​ខែ​មេសា ក្រុម​ហ៊ុន​បាន​ព្យា​យាម​ជួយ​បុគ្គលិក​តាម​ច្រើន​វិធី ប៉ុន្តែ​នៅ​ពេលនេះ​ជា​ពេល​ត្រូវ​សម្រេច​ចិត្ត​ជម្រុះ​បុគ្គលិក១៣០​នាក់​។​​

លោក​ឲ្យ​ដឹង​ទៀត​ថា៖ «​ដោយ​សារ​តែ​ស្ថាន​ភាព​បែរទៅ​ជាកាន់តែ​អាក្រក់​​ វា​ជារឿង​ដែល​យើង​មិន​អាច​ជៀស​រួច ហើយ​ត្រូវ​តែ​អនុវត្ត​វិធានការ​ជម្រុះ​នេះ»។ លោក​បន្ថែមថា ការ​ធ្វើ​នេះ​គឺ​ស្រប​ទៅ​តាម​ច្បាប់ និង​ជា​អ្វី​ដែល​ក្រ​សួង​ការងារ​បាន​មើល​ឃើញ​។​​

លោក​បន្ត​ថា៖ «​យើង​បាន​ជួប​ប្រជុំ​ជា​ច្រើន​ដង​ជាមួយ​សហជីព​ប្រចាំ​អាកាស​យាន្ដ​ដ្ឋាន ដើម្បី​ឲ្យ​តំណាង​ពួក​គេ​បាន​ដឹង​ពី​ផែន​ការ​របស់​យើង»។​

លោក​បញ្ជាក់ដែរ​ថា កម្មករ​ដែល​ត្រូវ​បញ្ឈប់​​ពីការងារ​នឹង​អាច​ត្រូវ​ជួល​ឲ្យ​ធ្វើ​ការ​វិញ​បើ​សិន​ជា​មាន​​តំណែង​ណាមួយបើក​ឡើង​វិញ។ លោក​បន្តថា ដូច​គ្នា​ដែរ ក្រុម​ហ៊ុន Cambodia Airports ក៏​នឹង​ជួយ​ដល់​អតីត​បុគ្គលិក​ទាំង​នោះ​ក្នុង​ការ​រក​ការងារ​​ថ្មី ឬក៏​បើក​អាជីវកម្ម​ណា​មួយ​។​​​

លោក​ឲ្យ​ដឹង​ទៀតថា​​បុគ្គលិក​ចំនួន​៣១​នាក់​ដែល​ត្រូវ​បាន​ផ្អាក​ការងារ​បណ្ដោះ​អាសន្ន​​កាលពី​ខែ​មេសា បាន​ត្រឡប់​ចូល​ធ្វើ​ការ​វិញ​ក្នុង​តួនាទី​ផ្សេង។​​

​មាត្រា​៩៥ នៃ​ច្បាប់​ស្ដីពីការងារ​បាន​ចែង​ថា​ការ​បញ្ឈប់​បុគ្គលិក​ពីការងារ និយោជក​ត្រូវ​ពិនិត្យ​លើដំណាក់​កាល​ជាបន្ត​បន្ទាប់ នៅពេល​ដែល​គ្រឹះស្ថាន​បន្ថយ​សម្មភាព​។​​

ខណៈ​ពេល​ដែល​បុគ្គ​លិក​​ត្រូវ​បញ្ឈប់​ការងារ​ទៅ​តាមច្បាប់ អាជ្ញាធរ​ក៏​បាន​ធ្វើ​ទៅ​តាម​ស្ថាន​ការណ៍​ក្នុង​វិបត្តិ​កូវីដ​១៩ ស្រប​ពេល​ដែល​អាជីវកម្ម​​​ក្នុង​វិស័យ​ទេចរ​ណ៍​ប្រហែល​​​ពាក់​កណ្ដាល​ត្រូវ​បាន​ផ្អាក​។​

អ្នកនាំពាក្យរដ្ឋ​លេខាធិការដ្ឋាន​អាកាសចរ​ណ៍​ស៊ីវិល លោក ស៊ិន ចាន់សិរីវុត្ថា មាន​ប្រ​សាសន៍ថា៖ «​លោកអាច​ស្រម៉ៃ​មើល​ថា​ក្រុម​ហ៊ុន​នៅ​លើ​ពិភព​លោកណា​ដែល​មិន​បញ្ឈប់ការងារ​បុគ្គលិក​ពេល​ប៉ះពាល់​ដោយ​វិបត្តិកូវីដ១៩?»។ លោក​បញ្ជាក់​ដែរ​ថា ជើង​ហោះ​ហើរ​បាន​ធ្លាក់ចុះ​៩៩​ភាគ​រយ​។​

លោក​បន្ថែមថា៖ «​ក្រុម​ហ៊ុនមាន​ហេតុ​ផល​សម​រម្យ​ក្នុង​ការ​បញ្ឈប់​បុគ្គលិក ពួកគេ​គោរពទៅ​តាម​កិច្ច​សន្យា និង​តាម​ច្បាប់»។​

កាល​ពី​ថ្ងៃ​សុក្រ​ កន្លង​ទៅ បុគ្គលិក​​ដែល​ត្រូវ​បញ្ឈប់ពី​ការងារ​ប្រ​ហែល​១០០​នាក់ បាន​ប្រមូលផ្តុំគ្នា​លើក​បដា​តវ៉ា​ទាម​ទារ​ប្រាក់​អត្ថប្រយោជន៍​១០០​ភាគ​រយ និង​បាន​អះអាង​ថា​និយោជក​បាន​ព្យាយាម​បំបិទ​ការ​ទាម​ទារ​របស់​ពួកគេ ដោយ​បាន​ងាក​ទៅ​ផ្ដល់​ដំណោះ​ស្រាយ​ជាលក្ខណៈ​បុគ្គល ជាជាងចរចាជា​ក្រុម​។​

លោក ផេង ឆេងលី ប្រធាន​ការិយាល័យ​ដោះ​ស្រាយ​វិវាទការងារ​នៃមន្ទីរ​ការងារ​ខេត្ត​សៀម​រាប​ មានប្រសាសន៍ថា អ្វី​ដែល​ពួក​គេ​ធ្វើ​ បាន​រំខាន​ដល់​ដំណើរ​ការ​ដោះ​ស្រាយ​ជម្លោះ និង​ធ្វើ​ឲ្យ​ពួកគេ​ខាត​បង់​នៅ​លើ​តុ​ចរចា​។ ​

លោក​មាន​ប្រ​សាសន៍ថា៖ «​ពួក​គេ​បាន​រៀប​ចំ​បដា​មុន​នឹង​ចូល​មក​មន្ទីរ​ការងារ ហើយ​ឡាយ​តាម​ហ្វេស​ប៊ុក​ ដូច​នេះ​មានន័យថា​ពួក​គេមិន​ចង់​សហការនោះទេ»។​

លោកបន្ថែមថា៖ «​ដើម​បណ្ដឹង​​មិន​បាន​សហការ​ជាមួយ​មន្ត្រី ដូច​នេះពួកគេ​បាន​បោះ​បង់​សិទ្ធិ​ ដែលពេលនេះ​គឺទុក​ជាមោឃៈ»

លោក​ ឆេងលី​ ឲ្យ​ដឹង​ទៀតថា​កាលពី​ខែ​វិច្ឆិការ​កន្លង​ទៅ​គណៈកម្មការ​ដោះ​ស្រាយ​វិវាទ​​នៃក្រសួង​ការងារ​បាន​ធ្វើបទបង្ហាញអំពីបញ្ហាប្រឈមរបស់ក្រុមហ៊ុនអំឡុងពេលវិបត្តកូវីដ១៩។ ​ក្រុម​ហ៊ុន​មាន​សិទ្ធិបញ្ឈប់​ការងារ​បុគ្គលិក​ខណៈពេល​ដែល​ដំណើរ​ការ​ប្រតិបត្តិ​ការ​របស់​ខ្លួន​មានការ​ធ្លាក់ចុះ​ខ្លាំង​។​

ប៉ុន្តែ សម្រាប់​លោក រ៉ុន រ៉ាវ៉ាន់​ ប្រធាន​សហជីព​កម្មករវិស័យទេចរណ៍កម្ពុជា​​ប្រចាំអាកាសយាន​ដ្ឋាន​សៀម​រាប ថា​ការ​ទាម​ទារ​ប្រាក់​អតីតភាព​ការងារ​ពេញ​១០០​ភាគ​រយនឹង​​នៅ​តែ​បន្ត។ ​

លោក​ថា បណ្ដឹង​ថ្មី​មួយ​ទៀត​នឹង​ត្រូវ​ដាក់​ទៅ​កាន់​ក្រសួង​ការងារ បន្ទាប់​ពីបណ្ដឹង​មួយមុន​​កាល​ពី​ថ្ងៃទី​១៥ ខែ​ធ្នូ ត្រូវ​ក្រសួង​សម្រេច​ថា​វិវាទ​គួរ​តែត្រូវ​ដោះ​ស្រាយ​ជា​លក្ខណៈ​​បុគ្គល​ម្នាក់ៗ​។​

លោក​ថា​៖ «​វាមិន​យុត្តិធម៌​ទេ ដែល​​ក្រុម​ហ៊ុន​​បាន​គិត​​ប្រាក់​អតីត​ភាពការងារ​ឲ្យ​ត្រឹម​៥០​ភាគ​រយ»។​

ប្រែសម្រួលពីអត្ថបទភាសាអង់គ្លេស៖ Fired during Covid, Siem Reap airport staff demand bonuses paid in full

381 views

ព័ត៌មានថ្មីៗ

អត្ថបទពេញនិយម