ដើម្បីធានាសុវត្ថិភាព និងឯកជនភាពដល់កុមារក្នុងការពិភាក្សារឿងរ៉ាវដែលបានកើតឡើងលើពួកគេ អង្គការ Save the Children ប្រចាំកម្ពុជា និងក្រសួងអប់រំ បានបង្កើតជាបន្ទប់ពិគ្រោះយោបល់កុមារមេត្រីចំនួនប្រាំនៅក្នុងខេត្តកំពង់ចាម។
នាយកកម្មវិធីរបស់ អង្គការ Save the Children ប្រចាំកម្ពុជា លោក ម៉ូត សាណា បានឲ្យដឹងថាបន្ទប់ទាំងនេះអនុញ្ញាតឲ្យកុមារចែករំលែកពីកង្វល់របស់ពួកគេទៅកាន់លោកគ្រូអ្នកគ្រូ ជនបង្គោលកិច្ចគាំពារកុមារ និងមនុស្សពេញវ័យដែលគួរឱ្យទុកចិត្តផ្សេងទៀត។
លោកបន្ថែមថាការរក្សាការសម្ងាត់គឺជារឿងសំខាន់ក្នុងការបង្កើតឲ្យមានបរិយាកាសសុវត្ថិភាពសម្រាប់កុមារក្នុងការចែករំលែកកង្វល់របស់ពួកគេ។
កម្មវិធីនេះបង្កើតឡើងដោយគម្រោងលុបបំបាត់អំពើហិង្សាលើកុមារនៅក្នុងសាលារៀន (EVACiS) ដែលផ្តល់មូលនិធិដោយក្រសួងការបរទេសជប៉ុន។
លោកបន្ថែមថា៖ «យើងសង្ឃឹមថា បន្ទប់នេះ នឹងធ្វើឱ្យកុមារមានអារម្មណ៍សុវត្ថិភាព និងបង្កើនឱកាសសម្រាប់កុមារក្នុងការស្វែងរកការគាំទ្រពីមនុស្សពេញវ័យ ដោយមិនស្ទាក់ស្ទើរនៅពេលចាំបាច់»។
លោកកត់សម្គាល់ថាបន្ទប់ទាំងនេះបង្ហាញពីសារសំខាន់នៃការមានបន្ទប់ពិគ្រោះយោបល់កុមារមេត្រីនៅតាមសាលារៀន។ លោកសង្ឃឹមថាគម្រោងនេះនឹងអាចកើតមានៅតាមសាលាផ្សេងៗទៀត ដែលអាចជួយក្មេងៗកាន់តែច្រើនក្នុងការស្វែងរកការគាំទ្រ។
លោក ស៊ូ សៀ នាយកសាលាបឋមសិក្សាថ្លុកជ្រៅក្នុងស្រុកកងមាសខេត្តកំពង់ចាម ប្រាប់ខេមបូចាថា គម្រោងដែលទើបតែអនុវត្តថ្មីៗនេះ គឺ «ពិតជាមានសារសំខាន់» សម្រាប់សិស្សស្រីចំនួន៣៥០នាក់នៅក្នុងសាលារៀនរបស់លោក ដែលអ្នកខ្លះកំពុងប្រឈមនឹងបញ្ហាផ្សេងៗ រួមទាំងរឿងក្នុងគ្រួរសារ ឬរឿងគេធ្វើបាបនៅសាលា។ គម្រោងនេះនឹងអាចផ្ដល់ឱកាសឲ្យពួកគេ «ចែករំលែក ពិភាក្សាជាមួយជនបង្គោលដើម្បីស្វែងរកដំណោះស្រាយ និងជំរុញទឹកចិត្តពួកគេ»។
លោកបន្ថែមថា៖ «ខ្ញុំគិតថាបន្ទប់ទាំងនោះនឹងផ្ដល់ផលប្រយោជន៍ច្រើនដល់សិស្សស្រីៗ គ្រួសារពួកគាត់ និងសហគមន៍ ជាពិសេសសម្រាប់កេ្មងស្រីដែលបានជួបបញ្ហាអំពើហិង្សានៅឯផ្ទះ ឬការបៀតបៀន។ ពួកគាត់អាចប្រាប់បញ្ហាទាំងនេះដោយមានការរក្សាការសម្ងាត់ និងស្វែងរកដំណោះស្រាយ»។
កញ្ញា ទិត្យ ស្រីលាប់ ជាជនបង្គោលកិច្ចគាំពារកុមារនៅបន្ទប់ពិគ្រោះយោបល់កុមារមេត្រីនៅក្នុងសាលានោះបានឲ្យដឹងថាសិស្សអាចជជែកពីកង្វល់ក្នុងចិត្តរបស់ពួកគេ។ នៅក្នុងបន្ទប់ពិគ្រោះយោបល់កុមារមេត្រីចែកចេញជាពីរផ្នែក។ ផ្នែកទីមួយគឺជាកន្លែងពិគ្រោះអំពីសុខភាពផ្លូវចិត្ត និងផ្នែកទីពីរគឺសម្រាប់ព្យាបាលផ្នែកសុខភាពទូទៅ។
កញ្ញា បន្តថា៖ «សិស្សអាចចែករំលែកពីកង្វល់របស់ពួកគេទៅកាន់ជនបង្គោលកិច្ចគាំពារកុមារ ទាក់ទងនឹងអំពើហិង្សា ការធ្វើបាប និងការបៀតបៀនផ្សេងៗ។ មានបន្ទប់នេះ ដូចជាមានប្រព័ន្ធគាំទ្រពួកគេ»។
កញ្ញាឲ្យដឹងដែរថាគម្រោងនេះក៏បានលើកទឹកចិត្តឲ្យគ្រួសារ និងសហគមន៍គិតអំពីសុខភាពផ្លូវចិត្តរបស់កុមារដែលអាចរងផលប៉ះពាល់ពីបញ្ហាផ្សេងៗក្នុងសង្គម។ បើសិនជាកូនសិស្សក្មេងៗប្រឈមនឹងបញ្ហា វាប៉ះពាល់ដល់សុខភាពផ្លូវចិត្ត និងការសិក្សា ហើយពួកគេក៏អាចនឹងមិនមានភាពក្លាហានចែករំលែក ឬប្រាប់បញ្ហាទៅកាន់អ្នកផ្សេង។
ក្នុងនាមជាជនបង្គោលមួយរូប កញ្ញា ស្រីលាប់ ចង់ឃើញបន្ទប់ពិគ្រោះយោបល់កុមារមេត្រី មានចំនួនច្រើននៅតាមបណ្ដាខេត្តផ្សេងៗទៀត ព្រោះថាវានឹងអាចលុបបំបាត់អត្រាបោះបង់ការសិក្សារបស់សិស្សផងដែរ។ ដូចគ្នាដែរ វាទំនងជាអាចចូលរួមជួយកាត់បន្ថយអំពើហិង្សាក្នុងគ្រួសារ ការបៀតបៀន ឬការធ្វើបាបគ្នានៅសាលា និងអាចនាំឲ្យគ្រប់គ្នាយកចិត្តទុកដាក់ខ្ពស់បន្ថែមទៀតលើសុខភាពផ្លូវចិត្តកុមារ។
កញ្ញា ស្រីលាប់ បន្តថា៖ «ពីមុន យើងមិនដែលយកចិត្តទុកដាក់លើសុខភាពផ្លូវចិត្តកុមារដែលរកផលប៉ះពាល់ពីអំពើហិង្សា ការធ្វើបាប ឬការបៀតបៀនទេ។ ប៉ុន្តែពេលយើងចាប់ផ្ដើមគិតពីបញ្ហានេះ យើងរកឃើញថាសិស្សខ្លះឈប់រៀនក៏ព្រោះតែបញ្ហាទាំងនេះ»។
បើតាមអង្គការ Save the Children ប្រចាំកម្ពុជា មានសាលាបឋមសិក្សាចំនួន៤៣ក្នុងខេត្តកំពង់ចាមបានអនុវត្តគម្រោងលុបបំបាត់អំពើហិង្សាលើកុមារនៅក្នុងសាលារៀន (EVACiS) ក្នុងរយៈពេលបីឆ្នាំចុងក្រោយនេះ។ គម្រោងនេះមានសារសំខាន់ក្នុងការធ្វើឲ្យមានដំណើរការប្រកបដោយប្រសិទ្ធភាពនៃប្រព័ន្ធគាំពារកុមារ រួមទាំងយន្តការនៃការរាយការណ៍នៅក្នុងសាលា និងសហគមន៍។
លោក ចាន់ សុភា ប្រធាននាយកដ្ឋានបឋមសិក្សានៃក្រសួងអប់រំ ទទួលស្គាល់ពីតួនាទីសំខាន់របស់បន្ទប់ពិគ្រោះយោបល់កុមារមេត្រី ដោយថាវាជាផ្នែកមួយនាំការគាំពារកុមារ និងយន្តការនៃការរាយការណ៍របស់កុមារនៅក្នុងសាលារៀន។
លោកមានប្រសាសន៍ថា៖ «ក្រសួងអប់រំសង្ឃឹមថាបន្ទប់ពិគ្រោះយោបល់កុមារមេត្រីនឹងត្រូវប្រើប្រាស់ និងបន្តជាកន្លែងសុវត្ថិភាពសម្រាប់កុមារ ហើយសាលាផ្សេងទៀតនឹងអាចចែករំលែកបទពីសោធន៍របស់ពួកគេពីការអនុវត្តនៅពេលខាងមុខ»។
លោក Kamegai Einosuke លេខាទី២នៃស្ថានទូតជប៉ុនប្រចាំកម្ពុជា ជឿថាបន្ទប់ពិគ្រោះយោបល់កុមារមេត្រីនឹងជួយឲ្យសិស្សហ៊ាននិយាយរឿងទុក្ខព្រួយនៅក្នុងចិត្ត ដូចជាអំពើហិង្សា ជាមួយអ្នកដែលអាចទុកចិត្តបាន និងអាចជួយពួកគេបាន។
លោកមានប្រសាសន៍ថា៖ «ខ្ញុំជឿថាបន្ទប់ទាំងនោះតំណាងឲ្យ «ស្ពាន» មួយទៀតរវាងពួកយើងដែលនឹងបន្តពង្រឹងទំនាក់ទំនងពួកយើងទៅថ្ងៃអនាគត»។
ការស្ទង់មតិមួយធ្វើឡើងដោយអង្គការ Save the Children ប្រចាំកម្ពុជា នៅដើមគម្រោងក្នុងឆ្នាំ២០២២ បានកំណត់គោលដៅលើសាលាបឋមសិក្សាចំនួន៤៣ និងបានរកឃើញថា៣០ភាគរយនៃសិស្សទាំងអស់បានជួបអំពើហិង្សាក្នុងទម្រង់ផ្សេងៗក្នុងខែកន្លងទៅ។
អំពើហិង្សាលើកុមារអាចនាំឲ្យមានផលវិបាកធ្ងន់ធ្ងរដែលអាចប៉ះពាល់ជីវិតរបស់ពួកគេនៅពេលខាងមុខ។ រាល់អំពើហិង្សា បានរួមចំណែកក្នុងការបោះបង់ការសិក្សារបស់កុមារ និងធ្វើឲ្យសិស្សទទួលបានលទ្ធផលសិក្សាមិនល្អផងដែរ។
សិស្សវ័យ១២ឆ្នាំ រៀនថ្នាក់ទី៦ និងជាប្រធានក្រុមប្រឹក្សាសិស្សនៅសាលាបឋមសិក្សាថ្លុកជ្រៅ បាននិយាយថាបន្ទប់ពិគ្រោះយោបល់កុមារមេត្រីរបស់ខ្លួនបានជួយលើកកម្ពស់ចំណេះដឹងសិស្សអំពីសិទ្ធិកុមារ និងរបៀបការពារខ្លួនពីអំពើហិង្សា។
សិស្សស្រីដដែលបន្តថា៖ «ខ្ញុំបានកត់សម្គាល់ថាសិស្សភាគច្រើនបានយល់ដឹងពីសិទ្ធិកុមារ របៀបការពារខ្លួនពីហានិភ័យផ្សេងៗ និងរបៀបរាយការណ៍ [បញ្ហា] នៅក្នុងសាលា» ៕
ប្រែសម្រួលពីអត្ថបទភាសាអង់គ្លេស៖ Five Child-friendly Consultation Rooms in Kampong Cham Offer Children A Safe Space To Open Up
