អតីតមន្ត្រីមូលដ្ឋាននៅតាមបណ្ដាស្រុកនានារបស់គណបក្សសង្គ្រោះជាតិប្រចាំខេត្តកំពង់ឆ្នាំងត្រូវបានកម្លាំងនគរបាលក្នុងខេត្តនេះហៅសាកសួរ និងធ្វើកិច្ចសន្យា ឲ្យបញ្ឈប់សកម្មភាពនយោបាយ និងគាំទ្រការវិលត្រឡប់របស់ លោកស្រី មូរ សុខហួរ អតីតអនុប្រធានគណបក្សប្រឆាំង កាលពីចុងខែធ្នូកន្លងទៅ។
អតីតមន្ត្រីCNRPចំនួនប្រាំបីនាក់ ត្រូវបាននគរបាលព្រមានថា ពួកគេប្រឈមនឹងការឃាត់ខ្លួន ប្រសិនបើពួកគេធ្វើសកម្មភាពគាំទ្រអតីមេដឹកនាំបក្សប្រឆាំង និងគាំទ្រគម្រោងដំណើរត្រឡប់មកវិញ លោកស្រី មូរ សុខហួរ។ ពួកគេមួយចំនួនត្រូវបានលួងលោមឲ្យចុះចូលគណបក្សប្រជាជនកម្ពុជាផងដែរ ប៉ុន្តែពួកគេបដិសេធ។
អតីតក្រុមប្រឹក្សា និងជាអតីតសមាជិកប្រតិបត្តិCNRP ស្រុកបរិបូរណ៍ វ័យ៧២ឆ្នាំ លោក ហេង ប៊ុនហៀង មានប្រាប់ថា លោកត្រូវបានសាកសួរដោយអធិការគរបាលស្រុក កាលពីថ្ងៃទី២៣ខែធ្នូ តាមការកោះហៅ។ លោកបន្តថា ក្រុមនគរបាល បានគំរាមថានឹងចាប់ខ្លួនលោកបើសិនជា គាំទ្រលោកសម រង្ស៊ី ឬសកម្មភាពវិលចូលស្រុកវិញរបស់ លោកស្រី មូរ សុខហួរ។
លោក ប៊ុនហៀង មានប្រសាសន៍ថា៖ «ខាងប៉ូលីសពីខេត្តតំណាងស្នងការហ្នឹង គាត់ជាអ្នកដឹកនាំសួរចម្លើយខ្ញុំ។ ពួកគេហាមខ្ញុំមិនឱ្យប្រមូលគ្នាបាតុកម្មឬគាំទ្រសកម្មភាពរបស់អ្នកស្រីមួរសុខហួរទេ បើហានធ្វើអីមិនត្រូវគេនឹងចាប់ដាក់គុក»។
លោកបញ្ជាក់ថា លោកមិនបានធ្វើសកម្មភាពនយោបាយណាមួយឡើយ ចាប់តាំងពីការរំលាយគណបក្សសង្គ្រោះជាតិកាលពីឆ្នាំ២០១៧មកនោះ។
លោកបន្ថែម៖«ខ្ញុំគិតថា ការកោះហៅព្រមាននេះ ជាការគំរាមកំហែងខ្ញុំ ធ្វើបាបផ្លូវចិត្ត និងរំលោភបំពានសិទ្ធិរបស់ខ្ញុំ ក្នុងនាមជាពលរដ្ឋសាមញ្ញម្នាក់ »។
អតីតសមាជិកក្រុមប្រឹក្សាស្រុកនិងជាអតីតសមាជិកប្រតិបត្តិ CNRP ស្រុករលា
ប្អៀរ វ័យ៦៣ឆ្នាំ លោក មាស ស្រូយ រៀបរាប់ថា លោកបានទៅជួបអធិការ នគរបាលស្រុករលារប្អៀរ កាលពីថ្ងៃទី២១ខែធ្នូ។ លោកថា ក្រុមមន្ត្រីនគរបាលទាំងនោះលួងលោមឱ្យរូបលោក ចុះចូលជាមួយគណបក្សកាន់អំណាច ប៉ុន្តែលោកបដិសេធ។
លោក ស្រូយ មានប្រសាសន៍ថា៖«ដំបូងហ្នឹងគេសុំឱ្យខ្ញុំចូលធ្វើនយោបាយជាមួយគណបក្សប្រជាជន ! ខ្ញុំតបថាអត់ចង់ធ្វើអីទេចង់រកស៊ីធម្មតារកលុយសងម្ចាស់បំណុល។ បន្ទាប់មកប៉ូលីស ឱ្យធ្វើកិច្ចសន្យាមួយ គេប្រាប់ថា បើខ្ញុំហ៊ានរំលោភកិច្ចសន្យានោះគេនឹងចាប់ខ្ញុំ។»
លោក មាស ស្រូយ បន្ថែមថា ទង្វើរបស់សមត្ថកិច្ចមកលើរូបលោកគឺជាគំនាបមួយទៀតលើសតិអារម្មណ៍និងសិទ្ធិរបស់លោក ក្នុងនាមជាពលរដ្ឋរស់ក្នុងសង្គមប្រជាធិបតេយ្យ។
ខ្លឹមសារកិច្ចសន្យាដែលអតីតមន្ត្រីCNRPផ្ដិតមេដៃចំពោះមុខនគរបាលខេត្តកំពង់ឆ្នាំងរួមមាន មិនឲ្យចូលរួមបានកម្មខុសច្បាប់ មិនឲ្យកៀងគរកម្លាំងធ្វើបាតុកម្ម មិនប្រមាថព្រះមហាក្សត្រ និងត្រូវគោរច្បាប់រដ្ឋធម្មនុញ្ញ។ល។
អតីតអនុប្រធានCNPR ប្រចាំខេត្តកំពង់ឆ្នាំង ដែលកំពុងនិរទេសខ្លួននៅក្រៅប្រទេស លោក ដួង ចន្ត្រា មានប្រសាសន៍ថា លោកបានទទួលព័ត៌មានមកថានគរបាលតាមស្រុកនានាក្នុងខេត្តកំពង់ឆ្នាំងបានកោះហៅអតីតមន្ត្រីបក្សប្រឆាំងជាង១០នាក់ ដើម្បីព្រមាននៅមុនដំណើរត្រឡប់មកប្រទេសវិញរបស់ លោកស្រី មូរ សុខហួរ។
លោក ដួង ចន្ត្រា ៖«ខ្ញុំបានឃើញលិខិតកោះហៅហ្នឹងចំនួន៨ច្បាប់ប៉ុណ្ណោះ តែធាតុពិតមានរហូតដល់ជាង១០នាក់គ្រាន់តែអតីតកូនចៅខ្ញុំមួយចំនួន គាត់អត់ហ៊ានប្រាប់ គេខ្លាចខ្ញុំបញ្ចេញព័ត៌មានអីទេពួកគេមានបញ្ហា។ខ្ញុំយល់ថា ទង្វើនេះជាការគំរាមកំហែងថ្មីមួយទៀត មកលើអ្នកដែលមានជំហរជំទាស់ នឹងCPP»។
លិខិតចេញពីអធិការស្រុកចំនួន៤បានកោះហៅអតីតមន្ត្រីមូលដ្ឋានCNRPចំនួន៨នាក់។ ក្នុងនោះអធិការនគរបាលស្រុកបរិបូរណ៍ កោះហៅមនុស្ស៣នាក់ អធិការនគរបាលស្រុកទឹកផុសកោះហៅមនុស្សម្នាក់ អធិការនគរបាលស្រុកកំពង់លែងកោះហៅមនុស្សម្នាក់ និងអធិការនគរបាលស្រុករលាប្អៀរកោះហៅមនុស្ស៣នាក់។ ក្នុងលិខិតបញ្ជាក់ថា ការកោះហៅនេះគឺយោងតាមមតិនិងបទបញ្ជារបស់លោកស្នងការនគរបាលខេត្តកំពង់ឆ្នាំង។
អ្នកនាំពាក្យស្នងការនគរបាលខេត្តកំពង់ឆ្នាំង លោក អៀរ ប៊ុនធឿន មានប្រសាសន៍ថា ការកោះហៅប្រជាពលរដ្ឋមកសួរនាំនាពេលកន្លងទៅនេះ ជាការពង្រឹងសន្តិសុខធម្មតាប៉ុណ្ណោះ មិនមែនជាការដាក់គំនាបឬគំរាមកំហែងលើអ្នកទាំងអស់នោះឡើយ។
លោក អៀរ ប៊ុនធឿន មានប្រសាសន៍ថា៖ «ករណីនេះជាករណីដែលអធិការដ្ឋាននគរបាលតាមស្រុកនានា អធិការនគរបាលគាត់បំពេញតួនាទី សួរនាំស្រាវជ្រាវមុខសញ្ញានានាដើម្បីពង្រឹងសន្តិសុខសុវត្ថិភាពមូលដ្ឋានប៉ុណ្ណោះមិនមែនពាក់ព័ន្ធរឿងនយោបាយឬការរំលោភសិទ្ធិអីនោះទេ»។
លោក ប៊ុនធឿន អះអាងថាលោកមិនបានដឹងពីកិច្ចសន្យាជាប្រព័ន្ធ ដែលអធិការនគរបាលតាមស្រុកនានា តម្រូវឱ្យអ្នកដែលត្រូវចូលខ្លួនទៅបំភ្លឺផ្ដិតមេដៃចំពោះមុខសមត្ថកិច្ចនោះឡើយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត អះអាងថា គណបក្សប្រជាជនកម្ពុជា គ្មានគោលការណ៍បង្ខិតបង្ខំឬអូសទាញអតីតអ្នកគាំទ្របក្សប្រឆាំងឱ្យចុះចូលនោះទេ។
លោក សុខ ឥសាន្ត៖ «CPPជាបក្សធំជាងគេដែលមានសមាជិកចំនួនជាង៦លាននាក់ ដូច្នេះយើងមិនត្រូវការបង្ខំឱ្យអ្នកណាចូលបក្សយើងទេ តែទ្វារយើងបើកចំហរទទួលអ្នកភ្ញាក់រលឹកនិងស្ម័គ្រចិត្តចូលរួមនយោបាយ»។
លោក បន្ថែមថា៖ «ការណ៍ដែលចោទថាប៉ូលីសហៅពលរដ្ឋទាំងនោះចូលបក្សCPPនោះជាការមិនពិតឡើយ ខ្ញុំយល់ថាប៉ូលីសនៅកំពង់ឆ្នាំងនោះគាត់ធ្វើការងាររដ្ឋបាលរបស់គាត់ប៉ុណ្ណោះ »។
អ្នកនាំពាក្យក្រសួងយុត្តិធម៌ លោក ជិន ម៉ាលីន លើកឡើងថា សមត្ថកិច្ចអាចមានសិទ្ធិសាកសួរព័ត៌មានជាមួយប្រជាពលរដ្ឋបាន បើសិនណាឃើញតម្រុយនៃការប្រព្រឹត្តិបទល្មើស។ប៉ុន្តែលោកមិនអត្ថាធិប្បាយចំពោះករណីកោះហៅអតីតសមាជិកCNRPនៅកំពង់ឆ្នាំងនេះទេ។
នាយករងអង្គការលីកាដូ លោក អំ សំអាត មានប្រសាសន៍ថា ការធ្វើទុក្ខបុកម្នេញទៅលើសមាជិកអ្នកគាំទ្រអតីតគណបក្សសង្គ្រោះជាតិ ហាក់មិនឃើញសញ្ញាថយចុះនោះទេ ពីមួយថ្ងៃទៅមួយថ្ងៃ។ លោកបញ្ជាក់ថា ការប្រើតួនាទី អំណាចក្នុងជួររាជការដើម្បីគំរាមកំហែងអ្នកមានជំហរនយោបាយផ្ទុយពីក្រុមខ្លួននោះគឺជាការរំលោភសិទ្ធិមនុស្សធ្ងន់ធ្ងរ។
លោក អំ សំអាត មានប្រសាសន៍ ៖ «បើប្រជាពលរដ្ឋគាត់អត់ធ្វើអី អត់ពាក់ព័ន្ធបទល្មើសជាក់ស្ដែងអីសោះ គាត់គ្រាន់តែធ្លាប់គាំទ្របក្សជំទាស់ឬអតីត មន្ត្រីបក្សជំទាស់ បែរជាត្រូវហៅសួរនាំចុះឡើងគឺជាការរំខាននិងបង្ករការភ័យខ្លាច មួយផ្នែកដែរ ហើយនេះចាត់ទុកជាការបំពានសិទ្ធិសេរីភាពរបស់ពលរដ្ឋដែរ»។
អតីតអនុប្រធានគណបក្សសង្គ្រោះជាតិ លោកស្រី មូរ សុខហួរ និងក្រុមមន្ត្រីជាន់ខ្ពស់បក្សប្រឆាំងមួយចំនួន គ្រោងត្រឡប់មកប្រទេសកម្ពុជាវិញកាលពីថ្ងៃទី០៤ខែមករាកន្លងទៅ ប៉ុន្តែលោកស្រីបានលើកពេលទៅថ្ងៃទី១៧មករាវិញ ក្រោមហេតុផលជើងហោះហើរប្រែប្រួលទាក់ទងនឹងវិធានការ ការពារជំងឺកូវីដ១៩។
លោកស្រី ជាជនជាប់ចោទម្នាក់ក្នុងចំណោមជនជាប់ចោទជាង១៣០នាក់ផ្សេងទៀត ក្នុងបទចោទញុះញង់ ដែលតុលាការសាលាដំបូងរាជធានីភ្នំពេញនឹងបើកសវនាការទ្រង់ទ្រាយធំមិនធ្លាប់មាន នៅថ្ងៃទី១៤ ខែមករា ឆ្នាំ២០២១នេះ។
អតីតសមាជិក សកម្មជននិងអ្នកគាំទ្រ គណបក្សប្រឆាំងយ៉ាងតិចណាស់ចំនួន២០នាក់ត្រូវបានប៉ូលីសឃាត់ខ្លួន កាលពីចុងខែធ្នូ នៅរាជធានីភ្នំពេញ ខេត្តបាត់ដំបង ខេត្តត្បូងឃ្មុំ និងខេត្តកណ្ដាល ទាក់ទងនឹងបទចោទថា បានគាំទ្រដំណើរវិលត្រឡប់មកកាន់មាតុប្រទេសវិញរបស់អតីតអនុប្រធានគណបក្សសង្គ្រោះជាតិ លោកស្រី មូរ សុខហួរ និងមន្ត្រីជាន់ខ្ពស់មួយចំនួនទៀត។ ក្នុងនោះមនុ ស្សចំនួន១០នាក់ត្រូវបានចោទប្រកាន់ និងឃុំខ្លួននៅពន្ធនាគារ និងមនុស្ស១០ផ្សេងទៀតបានធ្វើកិច្ចសន្យា និងដោះលែងវិញ៕
