ប្រជាពលរដ្ឋជិត៥០នាក់មកពីភូមិប៉ប្រកខាងជើងបានប្រមូលផ្តុំគ្នាកាលពីថ្ងៃអង្គារនៅរដ្ឋាករទឹកស្វយ័តក្រុងភ្នំពេញ (PPWSA) បន្ទាប់ពីរង់ចាំរយៈពេលបួនខែ នៃការយល់ព្រមពីរដ្ឋាករទឹកថានឹងផ្គត់ផ្គង់ទឹកទៅតំបន់នោះ។ ខណៈប្រជាពលរដ្ឋដែលរស់នៅក្បែរផ្លូវរថភ្លើងភ្នំពេញ នៅតែបន្តរង់ចាំរដ្ឋាករទឹកតភ្ជាប់បណ្តាញផ្គត់ផ្គង់ទឹកស្អាតនោះ ពួកគាត់និយាយថា ពួកគាត់កំពុងដោះស្រាយបញ្ហាអនាម័យនិងបញ្ហាសុខភាព ហើយកំពុងជួបការលំបាកក្នុងការចំណាយទិញទឹកពីអ្នកផ្គត់ផ្គង់ឯកជន។
ពលរដ្ឋរស់នៅក្បែរផ្លូវរថភ្លើងម្នាក់ដែលប្រាប់ត្រឹមតែនាមខ្លួនថា ឈ្មោះ សុវណ្ណ អាយុ៥៤ឆ្នាំបាននិយាយថា៖«[រដ្ឋាករទឹកស្វយ័តក្រុងភ្នំពេញ] បានសន្យាថា នឹងតភ្ជាប់បណ្តាញផ្គត់ផ្គង់ទឹកសម្រាប់យើង ប៉ុន្តែឥឡូវនេះ យើងមិនបានឮអ្វីទាំងអស់។ នោះហើយជាមូលហេតុដែលយើងមកទីនេះ។ តើយើងអាចរស់នៅដោយគ្មានទឹកយ៉ាងម៉េច?»។
នៅខែតុលា ឆ្នាំ២០២៣ អ្នកភូមិបានដាក់ញត្តិទៅ រដ្ឋាករទឹកស្វយ័តក្រុងភ្នំពេញ ដែលនាំឱ្យមានកិច្ចប្រជុំពីរសប្តាហ៍បន្ទាប់ ជាមួយចៅសង្កាត់និងតំណាងរដ្ឋាករទឹក។ រដ្ឋាករទឹកបានយល់ព្រមផ្តល់ទឹកទៅតំបន់នោះ។ ក្រុមមន្ត្រីបាននិយាយថា អាជ្ញាធរបានសិក្សារួចហើយនូវអ្វីដែលចាំបាច់សម្រាប់តភ្ជាប់បណ្តាញផ្គត់ផ្គង់ទឹកទៅកាន់តំបន់នោះ ហើយតំណាងសហគមន៍ចំនួនបីនាក់ត្រូវបានជ្រើសរើសឱ្យសហការជាមួយ រដ្ឋាករទឹកស្វយ័តក្រុងភ្នំពេញ ក្នុងការចែកចាយទឹកស្អាតដល់សហគមន៍នេះ។
សហគមន៍ទាំងនេះដែលរស់នៅតាមបណ្ដោយផ្លូវរថភ្លើងមិនមានប័ណ្ណកម្មសិទ្ធិដីធ្លីនៅក្នុងតំបន់ដែលពួកគាត់រស់នៅ ដែអាចប្រឈមនឹងការបណ្តេញចេញនៅក្នុងតំបន់នៅពេលមានការអភិវឌ្ឍ។ ប្រជាពលរដ្ឋនៅភូមិប៉ប្រកខាងជើងបានប្រាប់ខេមបូចាថា ភូមិនេះមិនមានការផ្គត់ផ្គង់ទឹកស្អាតដោយផ្ទាល់ទេ ក្រៅពីអ្នកផ្គត់ផ្គង់ពីឯកជនអស់រយៈពេលជាច្រើនទសវត្សរ៍មកហើយ។
នៅឯកិច្ចប្រជុំកាលពីថ្ងៃអង្គារ តំណាងរដ្ឋាករទឹកស្វយ័តក្រុងភ្នំពេញម្នាក់ ដែលមិនបានឆ្លើយតបនៅពេលអ្នកយកព័ត៌មានខេមបូចាសុំឈ្មោះរបស់ខ្លួនបាននិយាយថា អ្នកភូមិនឹងមានទឹកស្អាតប្រើប្រាស់មុនខែមេសា។
លោកនិយាយថា រដ្ឋាករទឹកត្រូវធ្វើតាមនីតិវិធី ដើម្បីឲ្យស្របទៅតាមច្បាប់ រួមទាំងការរៀបចំឯកសារនិងលក្ខខណ្ឌចាំបាច់មុននឹងអាចផ្គត់ផ្គង់ទឹកទៅតំបន់នោះបាន។
ជំហានបន្ទាប់ក្នុងដំណើរការនេះ គឺការរៀបចំកិច្ចសន្យាឲ្យបានរួចរាល់រវាងតំណាងសហគមន៍ និងរដ្ឋាករទឹក ដែលលោកនិយាយថា ជិតរួចរាល់ហើយ។ លោកពន្យល់ថា គម្រោងនេះទាមទារឲ្យមានការសិក្សាជាក់លាក់ និងកិច្ចសហប្រតិបត្តិការជាមួយអាជ្ញាធរ ដោយសារមានការរឹតត្បិតខាងផ្លូវច្បាប់លើការជីកដីសម្រាប់ដាក់បំពង់ទឹកនៅជិតផ្លូវរថភ្លើង។
តំណាងរដ្ឋាករទឹកស្វយ័តក្រុងភ្នំពេញបាននិយាយថា ប្រជាពលរដ្ឋ«នៅតែមិនជឿយើង» ទាក់ទងនឹងការងាររបស់រដ្ឋាករទឹក ដើម្បីផ្គត់ផ្គង់ទឹកដល់ភូមិ ទោះបីជាបានជួបជាមួយអ្នកភូមិ និងធ្វើការសិក្សាអំពីតំបន់នោះហើយក៏ដោយ។
អ្នកស្រី ជ័យ គន្ធី អ្នកភូមិប៉ប្រកបានឆ្លើយតបថា៖«យើងទាំងអស់គ្នានៅទីនេះជឿលោក ប៉ុន្តែវាយូរពេក ហើយមិនយូរប៉ុន្មាន យើងនឹងខ្វះទឹក [នៅរដូវប្រាំង]។ ការរង់ចាំរបស់យើង គឺយូរពេក»។
តំណាងរដ្ឋាករទឹកស្វយ័តក្រុងភ្នំពេញបានបន្ថែមថា អ្នកភូមិគួរតែជឿជាក់លើព័ត៌មានពីតំណាងសហគមន៍ដែលត្រូវបានជ្រើសរើស ជាជាងអ្នកសារព័ត៌មានទាក់ទងនឹងបច្ចុប្បន្នភាពនៃការផ្គត់ផ្គង់ទឹក។
លោកនិយាយថា៖ «នៅពេលសម្ពាធទឹកខ្សោយ បងប្អូនប្រាប់អ្នកកាសែតពេលយើងជួយអ្នករួចហើយ។ ប្រសិនបើបងប្អូនមិនជឿពួកគាត់ [តំណាងសហគមន៍] ខ្ញុំមិនដឹងថា បងប្អូនជឿអ្នកណាទេ។ ជឿអ្នកកាសែត ប៉ុន្តែអ្នកកាសែតគ្មានទឹកឲ្យបងប្អូនទេ»។
លោក សោម សុវណ្ណ ប្រធាននាយកដ្ឋានអាជីវកម្មនៅរដ្ឋាករទឹកស្វយ័តភ្នំពេញ បញ្ជាក់ថា អ្នកភូមិនឹងទទួលបានទឹកស្អាតមុនខែមេសា ព្រោះត្រូវការពេលវេលាដើម្បីធ្វើកិច្ចសន្យាស្របច្បាប់។
លោក សោម សុវណ្ណ មានប្រសាសន៍ថា៖«យើងចង់តភ្ជាប់ទឹកនៅពេលណាក៏បាន។ រឿងសំខាន់គឺយើងត្រូវយល់ព្រមលើកិច្ចសន្យានេះ ដូចដែលបុគ្គលិករបស់យើងបានត្រៀមរួចរាល់»។
ជារៀងរាល់ឆ្នាំ អំឡុងរដូវប្រាំង ប្រជាពលរដ្ឋដែលរស់នៅជាយក្រុងភ្នំពេញ និងតំបន់មួយចំនួនក្នុងទីក្រុងតែងតែខ្វះទឹកប្រើប្រាស់ក្នុងរយៈពេលខ្លី។ រដ្ឋាករទឹកបានអះអាងថា បញ្ហាទាំងនេះ គឺដោយសារកំណើនប្រជាជន និងការអភិវឌ្ឍ។
រដ្ឋាភិបាលបានសន្យាម្តងហើយម្តងទៀតក្នុងការផ្តល់ទឹកស្អាតដល់ប្រជាជនកម្ពុជាទាំងអស់នៅត្រឹមឆ្នាំ២០២៥។ សេចក្តីប្រកាសព័ត៌មានរបស់រដ្ឋាករទឹកស្វយ័តក្រុងភ្នំពេញកាលពីខែមីនា ឆ្នាំ២០២៣ អះអាងថា នៅឆ្នាំ២០២៤ ប្រជាពលរដ្ឋរាជធានីភ្នំពេញ និងក្រុងតាខ្មៅទាំងអស់នឹងមានទឹកប្រើប្រាស់គ្រប់គ្រាន់។
លោកស្រី ទៀប វណ្ណរឿង ចៅសង្កាត់កាកាប១ ដែលក្នុងនោះមានទាំងភូមិប៉ប្រកផងដែរមានប្រសាសន៍ថា លោកស្រីមិនបានទទួលព័ត៌មានថ្មីបន្ថែមអំពីការផ្គត់ផ្គង់ទឹកស្អាតទេ ចាប់តាំងពីអ្នកភូមិបានជួបជាមួយរដ្ឋាករទឹកកាលពីខែតុលា។ លោកស្រីបានបន្ថែមថា ប្រជាពលរដ្ឋចំនួន៨៨គ្រួសារដែលមានតំណាងចូលរួមកាលពីថ្ងៃអង្គារ កំពុងរស់នៅក្នុងតំបន់មិនទាន់រៀបរយ ដែលរដ្ឋាបាលរាជធានីភ្នំពេញគ្រោងនឹងអភិវឌ្ឍ។
លោក កើត ឆែ អភិបាលរងរាជធានីភ្នំពេញបានប្រាប់ខេមបូចាថា ការអភិវឌ្ឍគម្រោងផ្លូវដែក គឺស្ថិតក្រោមការគ្រប់គ្រងរបស់ក្រសួងសាធារណការនិងដឹកជញ្ជូន ហើយក្រសួងនេះនឹងអញ្ជើញរដ្ឋបាលរាជធានីភ្នំពេញ«ចូលរួមកិច្ចប្រជុំ» ប្រសិនបើគម្រោងនេះប៉ះពាល់ដល់ប្រជាពលរដ្ឋក្នុងមូលដ្ឋាន។
អ្នកភូមិឈ្មោះ សុវណ្ណ បានជួបបញ្ហាខ្វះខាតទឹកប្រើប្រាស់ជាច្រើនឆ្នាំមកហើយ ដោយនិយាយថា ដោយសារតែបែបនេះ ធ្វើឲ្យសុខភាពប្តីរបស់អ្នកស្រីមានបញ្ហា មុនពេលគាត់ស្លាប់នៅក្នុងឆ្នាំ២០២១។ អ្នកស្រីបន្ថែមថា អាកាសធាតុនៅឆ្នាំនេះក្តៅ ហើយតម្លៃទឹកឯកជនថ្លៃ។ អ្នកស្រីចំណាយ១០ម៉ឺនរៀលក្នុងមួយខែប្រហែល២៤ដុល្លារ ដើម្បីទិញទឹកប្រើប្រាស់ពីអ្នកផ្គត់ផ្គង់ទឹកឯកជន។អ្នកស្រី សុវណ្ណ ដែលរស់នៅតំបន់នោះតាំងពីឆ្នាំ២០០៣មកបាននិយាយថា៖«ខ្ញុំមានចៅៗ។ ទឹកមានសារៈសំខាន់ណាស់ អត់មានភ្លើងអគ្គិសនីពីរបីថ្ងៃមិនអីទេ ប៉ុន្តែស្រមៃមើល បើយើងអត់មានទឹកមួយថ្ងៃ»។
អ្នកភូមិម្នាក់ទៀតឈ្មោះ សែម រដ្ឋា អាយុ៥៨ឆ្នាំបានប្រាប់ខេមបូចាថា អ្នកស្រី សប្បាយចិត្តដែលបានឮ អំឡុងកិច្ចប្រជុំកាលពីថ្ងៃអង្គារថា គ្រួសាររបស់អ្នកស្រីនឹងមានទឹកស្អាតប្រើប្រាស់ក្នុងពេលឆាប់ៗនេះ។
អ្នកស្រីនិយាយថា៖«ពេលខ្ញុំឮថា យើងនឹងមានទឹកមុនខែមេសា ខ្ញុំរំភើបចិត្តខ្លាំងណាស់ ព្រោះខ្ញុំបានប្រើទឹកពីអ្នកផ្គត់ផ្គង់ឯកជនជិត៣០ឆ្នាំមកហើយ។ វាពិបាកណាស់នៅពេលយើងជាគ្រួសារធំមានកូនតូចៗដែលត្រូវការទឹក»។
អ្នកស្រី សែម រដ្ឋា បានបន្ថែមថា ការទិញទឹកពីអ្នកផ្គត់ផ្គង់ឯកជនមានតម្លៃថ្លៃ ហើយគ្រួសាររបស់អ្នកស្រីជារឿយៗមិនមានលទ្ធភាពទិញទឹកបានគ្រប់គ្រាន់សម្រាប់តម្រូវការទេ។ ដើម្បីប្រើប្រាស់ទឹកឲ្យបានយូរ គ្រួសាររបស់អ្នកស្រីបានរក្សាទុកទឹកដែលសល់ពីការបោកគក់ និងលាងបន្លែយកទៅប្រើប្រាស់ម្តងទៀតនៅក្នុងបន្ទប់ទឹក។ អ្នកស្រីនិយាយថា សម្ពាធទឹកដែលទិញពីអ្នកផ្គត់ផ្គង់ឯកជនក៏ចេញខ្សោយដែរ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពជាអង្គការក្រៅរដ្ឋាភិបាលមានប្រសាសន៍ថា រដ្ឋាភិបាលមានកាតព្វកិច្ចផ្តល់សេវាសាធារណៈដល់ប្រជាពលរដ្ឋ មិនថាពួកគាត់រស់នៅទីណានោះទេ។ ប្រសិនបើរដ្ឋាភិបាលខកខានក្នុងការផ្តល់សេវាមូលដ្ឋានដូចជាទឹកស្អាត វានឹងប៉ះពាល់ដល់ជីវភាព និងសុខភាពរបស់ប្រជាពលរដ្ឋ។
លោកបានមានប្រសាសន៍ថា៖«ទោះបីជាពួកគាត់កំពុងរស់នៅក្នុងតំបន់អនាធិបតេយ្យក៏ដោយ ពួកគាត់សមនឹងទទួលបានសេវាទាំងនោះដោយស្វ័យប្រវត្តិ។ នៅពេលណាដែលពួកគេមិនបានទទួលសេវាទាំងនោះ ពួកគាត់ក្លាយជាជនរងគ្រោះ ហើយរដ្ឋាភិបាលគួរឆ្លើយតបចំពោះបញ្ហានេះ»៕
ប្រែសម្រួលពីអត្ថបទភាសាអង់គ្លេស៖ Four Months After Petitioning Water Authority, Railway Villagers Again Call for Clean Water
