សមាគមសម្ព័ន្ធអ្នកសារព័ត៌មានកម្ពុជា

គណបក្ស៤ស្នើ គជប បង្កើតការិយាល័យបោះឆ្នោតពិសេសនៅព្រំដែនប៉ោយប៉ែតសម្រាប់ពលករខ្មែរ

សន្និសីទកាសែតរួមគ្នារបស់គណបក្សនយោបាយចំនួន៤ នៅភោជនីយដ្ឋានអូក្រា នៅសង្កាត់បឹងកក់២ ខណ្ឌទួលគោក រាជធានីភ្នំពេញ។ រូបថតនៅថ្ងៃទី២ ខែកញ្ញា ឆ្នាំ២០២២។ ខេមបូចា/ វ៉ា សុភានុត
សន្និសីទកាសែតរួមគ្នារបស់គណបក្សនយោបាយចំនួន៤ នៅភោជនីយដ្ឋានអូក្រា នៅសង្កាត់បឹងកក់២ ខណ្ឌទួលគោក រាជធានីភ្នំពេញ។ រូបថតនៅថ្ងៃទី២ ខែកញ្ញា ឆ្នាំ២០២២។ ខេមបូចា/ វ៉ា សុភានុត

គណបក្សនយោបាយចំនួន៤ស្នើសុំគណៈកម្មាធិការជាតិរៀបចំការបោះឆ្នោតបង្កើត ការិយាល័យបោះឆ្នោតពិសេសនៅក្បែរព្រំដែនប៉ោយប៉ែតដើម្បីកាត់បន្ថយការចំណាយនិង​ពេលវេលាសម្រាប់ពលរដ្ឋខ្មែរកំពុងធ្វើការនៅក្នុងប្រទេសថៃដើម្បីពួកគេអាចមកចូលរួមបោះឆ្នោត​ជាតិខាងមុខ។

ការស្នើនេះធ្វើឡើងក្នុងសន្និសីទកាសែតរួមគ្នាមួយនៅព្រឹកថ្ងៃទី២ ខែកញ្ញា ឆ្នាំ២០២២ រវាង​គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ គណបក្សកែទម្រង់កម្ពុជា និង​គណបក្សភ្លៀងទៀន។ 

លោក អ៊ី មុយលី អគ្គលេខាធិការគណបក្សឆន្ទៈខ្មែរ ថ្លែងថា ពលរដ្ឋខ្មែរដែលចំណាក​ស្រុក​ភាគ​ច្រើនជាប់បំណុលនិងមិនសូវមានប្រាក់សម្រាប់ធ្វើដំណើរមកបោះឆ្នោត​ ការណ៍នេះនាំឱ្យ​ចំនួនអ្នកទៅបោះឆ្នោតមានត្រឹមជាង៨០ភាគរយប៉ុណ្ណោះនៃពលរដ្ឋមានឈ្មោះបោះឆ្នោត​សរុប។

លោក មុយលី ថ្លែងថា៖ «បងប្អូនកម្មករគាត់ចំណាកស្រុកទៅប្រទេសថៃ…គាត់ចង់​បោះឆ្នោត​ត្រូវឆ្លងកាត់ព្រំដែនមួយតង់ ត្រូវបន្តមកភ្នំពេញ ដើម្បីរកមធ្យោបាយត្រលប់ទៅស្រុកកំណើត។ សួរថារយៈពេលបីថ្ងៃ[ឈប់បោះឆ្នោត]គាត់អាចមានពេលគ្រប់គ្រាន់ក្នុងការទៅបោះឆ្នោតបានដែរឬទេ ហើយបញ្ហាធំមួយទៀតគឺគាត់ត្រូវចំណាយ[ថវិកា]ច្រើន»។

លោក មុយលី ពន្យល់ថា ការិយាល័យបោះឆ្នោតពិសេសនេះគឺមួយការិយាល័យ​តំណាងឱ្យ​ខេត្តមួយ ហើយរាល់ពលរដ្ឋមកពីខេត្តមួយណាអាចបោះឆ្នោតនៅការិយាល័យតំណាងខេត្ត​ខ្លួនបាន។ ដោយឡែកអំឡុងពេលបោះឆ្នោត មន្រ្តីការិយាល័យអាចគូសឈ្មោះ​អ្នកបោះឆ្នោត​តាមប្រព័ន្ធកុំព្យូទ័រ និងបោះឆ្នោតចប់ មន្រ្តីអាចបញ្ជូនលទ្ធផលបោះឆ្នោតទៅបូកសរុប​នៅតាម​បណ្ដាខេត្តពួកគេរៀងៗខ្លួន។

លោក រឿន វឿត អាយុ៣៨ឆ្នាំ ជាពលករផ្សារដែកដែលធ្វើការនៅប្រទេសថៃជិត១០ឆ្នាំ និយាយ​ថា បើមានការិយាល័យបោះឆ្នោតក្បែរព្រំដែននឹងធ្វើឱ្យលោកសល់ប្រាក់ ដោយ​ពុំចាំបាច់ធ្វើដំណើរដល់ផ្ទះ។

ពលករស្រុកថ្មពួកខេត្តបន្ទាយមានជ័យរូបនេះ និយាយថា៖ «បោះឆ្នោតឆ្នាំ២០២២​ចំណាយ​១៥០០បាត ថ្លៃសោហ៊ុយបានដល់ភូមិស្រុក»។

យោងតាមគណៈកម្មាធិការជាតិរៀបចំការបោះឆ្នោត ឱ្យដឹងថា ប្រជាពលរដ្ឋជាង​៧លាននាក់​ឬស្មើនឹង៨០,១៩ភាគរយនៃអ្នកមានឈ្មោះក្នុងបញ្ជីបោះឆ្នោតជាង៩លាន២សែននាក់ បាន​ទៅ​បោះឆ្នោតជ្រើសរើសក្រុមប្រឹក្សាឃុំ-សង្កាត់កាលពីខែមិថុនា ឆ្នាំ២០២២នេះ។

លោក សោម សូរីដា អ្នកនាំពាក្យគណៈកម្មាធិការជាតិរៀបចំការបោះឆ្នោត លើកឡើងថា មាន​កត្តាពីរនាំឱ្យ គបជ ពុំអាចបើកការិយាល័យបោះឆ្នោតពិសេសតាមការស្នើសុំ​ពី​គណបក្ស​ទាំងនោះ។

លោក សូរីដា គូសបញ្ជាក់ថា ពុំមានច្បាប់អនុញ្ញាតឱ្យ គជប អាចបើកការិយាល័យបោះឆ្នោត​ពិសេសបានឡើយ និងលក្ខណៈបច្ចេកទេសដែលត្រូវប្រមូលឈ្មោះដាក់ក្នុងបញ្ជី​ការិយាល័យ​បោះឆ្នោតពិសេសនោះ ក៏ពុំអាចដឹងដែរថាតើពលរដ្ឋណាខ្លះទៅធ្វើការនៅក្រៅប្រទេស។

លោក សូរីដា មានប្រសាសន៍ថា៖ «ទេគឺអត់អាចទៅរួចទេ លក្ខណៈបច្ចេកទេសក៏ដូចជា​លក្ខណៈ​ច្បាប់​ដែរ​»។  

លោក កន សាវាង្ស អ្នកសម្របសម្រួលផ្នែកតស៊ូមតិនៅគណៈកម្មាធិការដើម្បីការ​បោះឆ្នោត​ដោយសេរី និងយុត្តិធម៌នៅកម្ពុជា (ខុមហ្វ្រែល) យល់ឃើញថា នេះជាចំណុចល្អសម្រាប់លើកទឹកចិត្តពលករខ្មែរនៅក្រៅប្រទេស ឱ្យមកបោះឆ្នោត ហើយ​ក្នុង​ករណីច្បាប់ពុំមានចែងវាតម្រូវឱ្យមានការចូលរួមពីរាជរដ្ឋាភិបាល។

លោក សាវាង្ស និយាយថា៖ «ខ្ញុំគិតថា គជប នឹងមានការបើកផ្លូវជជែក​ឬសាកល្បងនៅក្នុង​ចំណុច​នេះ»។

ក្នុងសន្និសីទកាសែតព្រឹកនេះដែរ លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន ក៏បានស្នើឱ្យគណៈកម្មាធិការជាតិរៀបចំការបោះឆ្នោតផ្លាស់ប្ដូរពីការ​គូសសញ្ញាលើ​សន្លឹក​ឆ្នោត​​ទៅជាការ​ប្រើត្រាបោះលើសន្លឹកឆ្នោត ដើម្បីចៀសវាងករណីខុសឆ្គងណាមួយកើតឡើង​អំឡុងពេលបោះឆ្នោត។

លោក វីរៈ បញ្ជាក់ថា៖ «[ត្រាអុក]ការបោះឆ្នោតវាជួយចៀសវាងឆ្គងទៅបក្សនេះ បក្សនោះ ការគូសខុសអី វាលែងមានការបង្រៀនឱ្យគូស[ធិក]។ ត្រាអុកដាក់ទៅចំកណ្ដាល»

ករណីស្រដៀងគ្នានេះដែរ គជប ធ្លាប់ឆ្លើយតបតាមការស្នើសុំបកស្រាយពីលោក វិទិត មុនតាប៊ន (Mr Vitit Muntarbhorn) អ្នករាយការណ៍ពិសេសរបស់អង្គការសហប្រជាជាតិ​ប្រចាំ​កម្ពុជា ស្ដីពីការបង្កើតការិយាល័យបោះឆ្នោតនៅក្រៅប្រទេសដើម្បីអនុញ្ញាត​ឱ្យប្រជាពលរដ្ឋ​ខ្មែរ​ដែលកំពុងរស់នៅ និងធ្វើការនៅទីនោះបានបោះឆ្នោត ដោយប្រធាន គជប លើកឡើងថា​ ច្បាប់តម្រូវឱ្យ គជប រៀបចំការិយាល័យបោះឆ្នោតនៅតាមឃុំសង្កាត់ ក្នុងប្រទេសម្ពុជា ហើយ​ប្រជាពលរដ្ឋដែលមានឈ្មោះក្នុងបញ្ជីបោះឆ្នោតនៃការិយាល័យបោះឆ្នោតក្នុងឃុំសង្កាត់ណា ត្រូវអញ្ជើញទៅបោះឆ្នោតនៅការិយាល័យបោះឆ្នោតក្នុងឃុំសង្កាត់នោះ។ គជប លើកទឹកចិត្ត​ប្រជាពលរដ្ឋខ្មែរដែលធ្វើការនៅក្រៅប្រទេសឱ្យអញ្ជើញមកបោះឆ្នោតនៅក្នុងប្រទេស ដោយ​ធ្វើ​ការផ្សព្វផ្សាយតាមរយៈស្ថានទូតនៃព្រះរាជាណាចក្រកម្ពុជា៕

581 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម