កម្ពុជា-បារាំងចង់ពង្រឹងទំនាក់ទំនងពានិជ្ជកម្ម និងវិនិយោគបន្ថែមក្រោយមើលឃើញពីកំណើនពាណិជ្ជកម្មរវាងប្រទេសទាំងពីរ។ ជាមួយគ្នានេះ រដ្ឋមន្ត្រីប្រតិភូបារាំង លោក Nicolas Forissier បានថ្លែងនៅថ្ងៃសុក្រ ទី១០ ខែកក្កដា ថា ប្រទេសទាំងពីរកំពុងរៀបចំកិច្ចសហការលើវិស័យសេដ្ឋកិច្ចក្នុងជំហានថ្មីមួយទៀត មុនការអញ្ជើញមកដល់របស់ប្រធានាធិបតីបារាំងលោក Emmanuel Macron ដែលនឹងមកធ្វើទស្សនកិច្ចនៅកម្ពុជាក្នុងខែវិច្ឆិកា ខាងមុខ។
លោក Forissier ថែ្លងប្រាប់អ្នកសារព័ត៌មានក្នុងសន្និសីទសារព័ត៌មាននៅស្ថានទូតបារាំងក្នុងក្រុងភ្នំពេញថា វត្តមានរបស់លោកមកកម្ពុជានាពេលនេះ គឺចំពេលដែលមានជំនួបជាន់ខ្ពស់ជាបន្តបន្ទាប់ដើម្បីពង្រឹងទំនាក់ទំនងកាន់តែស៊ីជម្រៅជាមួយកម្ពុជា និងបន្តពង្រីកកិច្ចសហការ និងវិនិយោគក្នុងវិស័យជាច្រើនផ្សេងទៀត។
លោកបញ្ជាក់ថា ក្រុមហ៊ុនបារាំងបានកំពុងដើរតួយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា ជាពិសេសលើវិស័យដឹកជញ្ជូន ថាមពល ហិរញ្ញវត្ថុ សុខាភិបាល ទេសចរណ៍ និងសំណង់។ លោកបន្តថា៖ «ខ្ញុំជឿថាកិច្ចហសការនេះគឺជាយុទ្ធសាស្រ្តឈ្នះៗ និងឆ្លុះបញ្ចាំងពីការប្ដេជ្ញាចិត្តខ្ពស់របស់បារាំងលើការពង្រឹងភាពជាដៃគូសេដ្ឋកិច្ចរបស់ប្រទេសទាំងពីរ»។
ទំហំពាណិជ្ជកម្មរវាងកម្ពុជា-បារាំងបានឡើងដល់ប្រហែល២,០៥ពាន់លានដុល្លារក្នុងឆ្នាំ២០២៥ កើតឡើង១៧,៥ភាគរយ ធៀបនឹងឆ្នាំ២០២៤ ខណៈការវិនិយោគផ្ទាល់ពីបរទេសក្នុងប្រទេសកម្ពុជាកើនឡើង២៥ភាគរយដែលមានទំហំទឹកប្រាក់ប្រហែល៨១០លានដុល្លារ គិតត្រឹមថ្ងៃទី៣១ ខែធ្នូ ឆ្នាំ២០២៤។
លោកបានលើកឡើងថា៖ «យើងត្រូវតែបន្តធ្វើឲ្យកាន់តែប្រសើរព្រោះថាទំនាក់ទំនងនេះមានសារសំខាន់ណាស់រវាងប្រទេសទាំងពីរកម្ពុជា-បារាំង»។ លោកបន្តថា៖ «បារាំងបន្តគាំទ្រការនាំចូលអង្ករ និងកង់ពីកម្ពុជា ខណៈបារាំងមានការនាំចេញផលិតផលអាកាសចរណ៍ ទំនិញប្រភេទកសិឧស្សាហកម្ម និងឱសថ»។
កាលពីថ្ងៃពុធ លោក Forissier បានជួបជាមួយរដ្ឋមន្ត្រីក្រសួងរ៉ែ និងថាមពល របស់កម្ពុជា លោក កែវ រតនៈ ដោយបានពិភាក្សាអំពីគម្រោងវារីអគ្គិសនី៨០០មេហ្គាវ៉ាត់ ដែលមានតម្លៃ១,២ពាន់លានដុល្លារ និងគម្រោងបំប្លែងកាកសំណល់ទៅជាថាមពលក្នុងក្រុងភ្នំពេញផងដែរ។
ទាក់ទងនឹងគម្រោងថាមពលនេះដែរ លោក Forisier បន្តទៀតថា បារាំងគ្រោងនឹងសិក្សាលម្អិត មុននឹងសម្រេចចិត្តវិនិយោគ។ លោកបន្ថែមថា ប្រទេសរបស់លោកនឹងផ្តល់នូវបច្ចេកវិទ្យា និងអ្នកជំនាញបច្ចេកទេសសម្រាប់គម្រោងទាំងនេះ ហើយអ្វីទាំងនេះអាចនឹងមានការវិវត្តច្រើនក្នុងអំឡុងទស្សនកិច្ចរបស់លោក ម៉ាក្រុង នាពេលខាងមុខ។
បច្ចុប្បន្នបារាំងបានគាំទ្រគម្រោងថាមពលកកើតឡើងវិញប្រហែល៧ភាគរយនៃគម្រោងថាមពលកកើតឡើងវិញរបស់កម្ពុជាសរុប និងរួមទាំងគម្រោងធំៗជាច្រើនផ្សេងទៀត។
លោក Forisier និងលោក កែវ រតនៈ ក៏បានពិភាក្សាលើកិច្ចសហការក្នុងវិស័យប្រេង និងឧស្ម័ន និងបានធានាពីការគាំទ្រដល់កម្ពុជាក្នុងការដោះស្រាយបញ្ហាជម្លោះជាមួយថៃលើតំបន់ត្រួតស៊ីគ្នាតាមរយៈយន្តការសន្តិវិធី និងច្បាប់អន្តរជាតិ។
បន្ថែមពីនេះ លោក Forisier ក៏បានលើកឡើងថា បារាំងគាំទ្រការដាក់បញ្ចូលសិទ្ធិមនុស្សទៅក្នុងពាណិជ្ជកម្មអន្តរជាតិ និងថាក្រុមហ៊ុនបារាំងក៏ប្តេជ្ញាអនុវត្តច្បាប់ទៅតាមស្ដង់ដារអន្តរជាតិលើផ្នែកសិទ្ធិមនុស្ស ការគាំពារបរិស្ថាន និងការទទួលខុសត្រូវសង្គម។
លោកបន្ថែមថា៖ «បារាំងបានប្ដេជ្ញាក្នុងការគាំទ្រគម្រោងដែលជួយលើកកម្ពស់ការគោរពសិទ្ធិមនុស្សនៅក្នុងវិស័យពាណិជ្ជកម្ម ដែលនេះក៏ជាគោលការណ៍គ្រឹះសំខាន់មួយរបស់អង្គការសហប្រជាជាតិ»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច បានឲ្យដឹងថា ដំណើរទស្សនកិច្ចរបស់លោក Forissier គឺដើម្បីពង្រឹងកិច្ចសហការរវាងប្រទេសទាំងពីរលើវិស័យពាណិជ្ជកម្ម និងវិនិយោគ។
លោកបន្តថា ដំណើរទស្សនកិច្ចនេះបង្កើតនូវឱកាសថ្មីៗជាច្រើនសម្រាប់កិច្ចសហការរវាងទីភ្នាក់ងាររដ្ឋាភិបាលទាំងពីរ និងវិស័យឯកជន ក្នុងការកំណត់ការវិនិយោគថ្មីៗ ពង្រីកវត្តមានក្រុមហ៊ុនបារាំងនៅកម្ពុជា និងជួយកសាងភាពជាដៃគូយូរអង្វែងក្នុងវិស័យអាទិភាពខ្ពស់ផ្សេងៗទៀត។
លោក សុខសេនសាន បានថ្លែងថា រដ្ឋាភិបាលកម្ពុជាកំពុងបន្តធ្វើឲ្យកាន់តែប្រសើរនូវបរិយាកាសធុរកិច្ច និងវិនិយោគ ដោយបានសម្រួលនីតិវិធី ពង្រឹងក្រមខណ្ឌច្បាប់ និងបទដ្ឋានគតិយុត្តិនានា និងលើកកម្ពស់តម្លាភាពដើម្បីធានាឲ្យមានភាពងាយស្រួលសម្រាប់អ្នកវិនិយោគក្នុងការធ្វើធុរកិច្ច។
លោកឲ្យដឹងទៀតថា៖ «យុទ្ធសាស្រ្តរបស់រដ្ឋាភិបាលគឺមិនត្រឹមតែបង្កើនទំហំពាណិជ្ជកម្មនោះទេ ប៉ុន្តែក៏បង្កើនភាពទាក់ទាញការវិនិយោគក្នុងវិស័យឧស្សាហកម្ម បច្ចេកវិទ្យា ឧស្សាហកម្មមានកម្លៃខ្ពស់ ការកែច្នៃផលិតផលកសិកម្ម អភិវឌ្ឍធនធានមនុស្ស និងការផ្ទរនូវបច្ចេកវិទ្យា»។
លោក គី សិរីវឌ្ឍន៍ អ្នកវិភាគសេដ្ឋកិច្ចនៅរាជបណ្ឌិត្យសភាកម្ពុជា មានប្រសាសន៍ថា ដំណើរទស្សនកិច្ចនេះគឺជាឱកាសក្នុងការស្វែងរកកិច្ចហសការក្នុងវិស័យប្រេង និងពង្រឹងវិស័យសេដ្ឋកិច្ចជាមួយបារាំង និងជំរុញឲ្យមានក្រុមហ៊ុនបារាំងកាន់តែច្រើនមកវិនិយោគនៅកម្ពុជា។
លោកបន្ថែមថា ដំណើរទស្សនកិច្ចនេះក៏ជាការបើកផ្លូវសម្រាប់ឱកាសវិនិយោគ និងបើកទីផ្សារនៅអ៊ឺរ៉ុបឲ្យកាន់តែទូលាយ។
ទំហំពាណិជ្ជកម្មរវាងកម្ពុជា-បារាំង មានទឹកប្រាក់៣២២លានដុល្លារនៅឆមាសទី១ ឆ្នាំ២០២៦ ដែលចំនួននេះបានកើនឡើង១៣ភាគរយធៀបនឹងរយៈពេលដូចគ្នាក្នុងឆ្នាំ២០២៥។ កម្ពុជានាំទំនិញទៅបារាំងកើនឡើង១៣,៥ភាគរយ ដែលមានទំហំទឹកប្រាក់ជិតដល់២៦០លានដុល្លារ ខណៈដែលបារាំងនាំទំនិញមកកម្ពុជាមានទំហំទឹកប្រាក់៦៣,៧លានដុល្លារអាមេរិក កើនឡើង១០,៥ភាគរយ៕
ប្រែសម្រួលពីអត្ថបទភាសាអង់គ្លេស៖ France, Cambodia To Strengthen Trade, Economic Ties Ahead of Macron’s Visit
