សមាគមសម្ព័ន្ធអ្នកសារព័ត៌មានកម្ពុជា

មេដឹកនាំសហជីព ឈឹម ស៊ីថរ ទទួលពានរង្វាន់ Per Anger​ Prize សម្រាប់ការតស៊ូដើម្បីសិទ្ធិ​កម្មករ

កញ្ញា ឈឹម ស៊ីថរ ចាកចេញពីសាលាដំបូងរាជធានីភ្នំពេញក្រោយពីបានស្ដាប់សាលក្រមរួចកាលពីថ្ងៃទី២៥ ខែឧសភា ឆ្នាំ២០២៣។ (ខេមបូចា/ ព្រីង សំរាំង)
កញ្ញា ឈឹម ស៊ីថរ ចាកចេញពីសាលាដំបូងរាជធានីភ្នំពេញក្រោយពីបានស្ដាប់សាលក្រមរួចកាលពីថ្ងៃទី២៥ ខែឧសភា ឆ្នាំ២០២៣។ (ខេមបូចា/ ព្រីង សំរាំង)

ទោះបីកំពុងជាប់​ឃុំក្នុងពន្ធនាគារក្ដី ប្រធាន​សហជីព​ទ្រទ្រង់​សិទ្ធិ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គាវើលដ៍ (LRSU) កញ្ញា ឈឹម ស៊ីថរ ត្រូវបានផ្ដល់​ជូន​នូវ​ពានរង្វាន់​ Per Anger Prize ប្រចាំឆ្នាំ២០២៤ កាលពីថ្ងៃទី១៩ ខែមេសា សម្រាប់​ការប្ដេជ្ញាចិត្តរបស់កញ្ញាក្នុងការតស៊ូមតិ​ដើម្បី​លទ្ធិប្រជាធិបតេយ្យ​និង​ការលើកកម្ពស់​សិទ្ធិ​មនុស្ស​នៅកម្ពុជា ។

យោងតាម​វេទិកាប្រវត្តិសាស្ត្ររស់ ឬ Forum för levande historia ពានរង្វាន់ Per Anger Prize ប្រចាំ​ឆ្នាំ​២០២៤ គឺជាការទទួលស្គាល់​នូវ​តម្លៃ​ដ៏ធំធេងដែល​កញ្ញា ស៊ីថរ បាន​លះបង់​ដើម្បីការពារសិទ្ធិសហជីព ព្រមទាំង​ការ​បៀតបៀន​និង​ការគំរាមកំហែង​ដែល​អ្នកនាង​បានទទួលរង​អស់រយៈពេល​ជាច្រើន​ឆ្នាំ​ដោយសារតែការងារ​ជាសកម្មជនរបស់​អ្នកនាង ។

ប៉ុន្តែ ជាអកុសល ដោយសារអ្នកនាងកំពុងជាប់ឃុំឃាំងក្នុងពន្ធនាគារ កញ្ញាមិន​អាចធ្វើដំណើរទៅកាន់ប្រទេស​ស៊ុយអែត​ដើម្បី​ទទួល​ពានរង្វាន់នេះ​ដោយ​ផ្ទាល់បានឡើយ ។

Forum för levande historia ឬ​វេទិកា​ប្រវត្តិសាស្ត្ររស់ គឺជា​ទីភ្នាក់ងារ​រដ្ឋ​មួយ​ដែល​ស្ថិតនៅក្រោម​ក្រសួង​វប្បធម៌របស់​ប្រទេសស៊ុយអែត ដែលជំរុញ​និង​លើកកម្ពស់​សិទ្ធិ​មនុស្ស​និង​លទ្ធិ​ប្រជាធិបតេយ្យ ។

ពានរង្វាន់ Per Anger Prize ត្រូវបាន​ផ្ដល់​ឱ្យ​ជារៀងរាល់ឆ្នាំ ទៅឱ្យ​បុគ្គល ឬ​ស្ថាប័ន​ណាមួយ​​សម្រាប់​បុព្វហេតុ​មនុស្សធម៌​និង​កិច្ច​ប្រឹងប្រែងធំៗ​ក្នុងការ​លើកកម្ពស់​លទ្ធិប្រជាធិបតេយ្យ​នៅក្នុង​ប្រទេស​កំណើតរបស់ពួកគេ ។

ក្នុងរយៈពេល​ប៉ុន្មានឆ្នាំចុងក្រោយនេះ កញ្ញា ស៊ីថរ បានតស៊ូជំរុញឱ្យមាន​លក្ខខណ្ឌការងារ​ល្អ​ប្រសើរ​និង​ប្រាក់ឈ្នួលសមរម្យ​សម្រាប់​បុគ្គលិក​កម្មករ​នៅណាហ្គាវើល ដែល​ជា​កាស៊ីណូ​និង​សណ្ឋាគារ​ដ៏ធំបំផុត​មួយ​នៅកម្ពុជា ។ កញ្ញា​គឺជា​អ្នកតស៊ូមតិ​ដ៏សំខាន់មួយរូប ដែល​តស៊ូ​មតិ​ឱ្យមានសិទ្ធិសេរីភាពក្នុងការបង្កើត​សមាគម​និង​ការគោរព​ច្បាប់ការងារ និង​បន្ត​តស៊ូ​ដើម្បី​យុត្តិធម៌ បើទោះបី​ខ្លួន​ទទួលរងការរំលោភបំពាន​ ការគំរាមកំហែង និងអំពើហិង្សា​ជាហូរហែ​មក​ក្ដី ។

សេចក្ដីថ្លែងការណ៍មួយដែលចេញដោយគណៈកម្មការ​ពានរង្វាន់បាន​សរសេរ​ថា៖ «ស៊ីថរ ត្រូវបាន​ផ្ដល់​ជូន​នូវ​ពានរង្វាន់ Per Anger Prize ប្រចាំឆ្នាំនេះ ដោយសារ[ការងារ]និងការប្ដេជ្ញាចិត្ត​ឥតខ្លាច​នឿយហត់​របស់កញ្ញានៅក្នុង​ការលើកកម្ពស់​លទ្ធិ​ប្រជាធិបតេយ្យ​និង​ការគោរព​សិទ្ធិ​មនុស្ស​នៅកម្ពុជា» ។

សេចក្ដីថ្លែងការណ៍ដដែល​បាន​បន្ថែមថា កញ្ញា ស៊ីថរ គឺជាប្រភព​នៃការគាំទ្រ​ដ៏សំខាន់​បំផុត​សម្រាប់​ស្ត្រី​កម្ពុជា​ដែល​ត្រូវគេបង្ខំ​ឱ្យធ្វើការងារ​នៅក្នុង​លក្ខខណ្ឌ​មិនល្អ ។ «នៅថ្ងៃនេះ កញ្ញា​កំពុង​ជាប់នៅក្នុងពន្ធនាគារ ប៉ុន្តែ កញ្ញា​មិនព្រម​បោះបង់​ចោលទេ ។ ទោះបីស្ថិតក្នុង​ពន្ធនាគារក្ដី កញ្ញា​លើកទឹកចិត្ត​និងគាំទ្រ​អ្នកជាប់ឃុំ​ដូចគ្នា ។ សេចក្ដីក្លាហាននិងការលះបង់​ដ៏ធំធេងរបស់កញ្ញា គឺជា​គំរូនៃការជំរុញទឹកចិត្ត​ដ៏អស្ចារ្យ ។ ជាមេដឹកនាំស្ត្រីវ័យក្មេងម្នាក់ កញ្ញា​គឺជា​ជនគំរូ​សម្រាប់​យើង​ទាំងអស់គ្នា» ។

កាលពីឆ្នាំ២០២៣ កញ្ញា ស៊ីថរ ត្រូវបាន​តុលាការកាត់​ទោស​ឱ្យជាប់ពន្ធនាគារពីរឆ្នាំ ពីបទ​ចោទប្រកាន់ញុះញង់​និង​បង្ក​ភាពចលាចល​សង្គម ដោយ​ការធ្វើកូដកម្ម​កាលពីថ្ងៃទី១៨ ខែ​ធ្នូ ឆ្នាំ២០២១ ដែលបាន​បន្ត​ចាប់ពីពេលនោះរហូតមកដល់សព្វថ្ងៃ

អនុប្រធានសហជីព LRSU អ្នកស្រី ឈឹម សុខន បាន​ប្រាប់ ខេមបូចា ថា កញ្ញា ស៊ីថរ ស័ក្ដិសមនឹង​ទទួល​បានពានរង្វាន់នេះ ដោយសារតែការតស៊ូអត់ធ្មត់​និង​ការមិនបោះបង់របស់​កញ្ញា និងការតស៊ូគ្មានទីបញ្ចប់របស់កញ្ញាដើម្បី​សិទ្ធិ​និង​ផលប្រយោជន៍របស់​កម្មករ ។

អ្នកស្រីបាននិយាយថា ពានរង្វាន់នេះគឺជាការលើកទឹកចិត្ត​មួយ​សម្រាប់​សហជីព​នានា​ដើម្បី​បន្ត​ការតវ៉ា​របស់ខ្លួន ប៉ុន្តែ បើទោះបីគ្មានពានរង្វាន់នេះក៏ដោយ ក៏ពួកគេនៅតែបន្ត​ទាមទាររក​ដំណោះស្រាយ​ ។

អ្នកស្រី សុខន បាននិយាយថា៖ «យើងសប្បាយចិត្តដែលទទួលបានពានរង្វាន់នេះ ប៉ុន្តែ អ្វីដែល​យើង​ចង់​ឃើញ ហើយ​នឹងកាន់តែសប្បាយរីករាយជាងនេះ​នោះ គឺចង់​ឃើញ​នូវដំណោះស្រាយ ។ យើង​មិនមែនកំពុង​តវ៉ា​ដើម្បី​ចង់​បានពានរង្វាន់នោះ​ទេ» ។

ប៉ុន្តែ ទោះជាយ៉ាងនេះក្ដី អ្នកស្រី សុខន មានអារម្មណ៍ថា រដ្ឋាភិបាល​អាចនឹងមិនសប្បាយចិត្ត​ជាមួយនឹង​ពានរង្វាន់របស់កញ្ញា ស៊ីថរ ទេ ។ ពានរង្វាន់នេះអាច​ជាការឆ្លុះបញ្ចាំងមួយ​ឱ្យ​ឃើញពី​ចំណុចខ្សោយរបស់​រដ្ឋាភិបាល​ក្នុងការដោះស្រាយ​បញ្ហារបស់​កម្មករ​និយោជិត នៅក្នុង​សណ្ឋាគារ​និងកាស៊ីណូ ណាហ្គាវើល និងអាច​ជាការជំរុញទឹកចិត្ត​ឱ្យ​កម្មករនិយោជិត​បន្ត​ការតវ៉ា​ដើម្បីស្វែងរកដំណោះស្រាយ​ដោយខ្លួន​ឯង ជាបន្តទៀត ។

អ្នកស្រីបាននិយាយថា៖ «ប្រសិនបើរដ្ឋាភិបាលមានឆន្ទៈក្នុងការដោះស្រាយ​វា ពានរង្វាន់នេះ​មិនជាបញ្ហានោះទេ» ។ ប៉ុន្តែ អ្នកស្រីបានបន្ថែមថា រដ្ឋាភិបាល​ហាក់ធ្វើដូចជា​ខ្លួន​មិនបានដឹង​ពីបញ្ហាដែលបានកើតឡើង​ ដូច្នេះ ពានរង្វាន់​ដែល​ផ្ដល់​ឱ្យកញ្ញា ស៊ីថរ អាចនឹងធ្វើ​ឱ្យ​រដ្ឋាភិបាល​មិន​សប្បាយចិត្ត​ទេ ។ «វាបង្ហាញថា រដ្ឋាភិបាលអសមត្ថភាពក្នុងការដោះស្រាយបញ្ហា» ។

អ្នកស្រី​លើកឡើងថា កញ្ញា​ ស៊ីថរ នឹងមិនអាច​ធ្វើដំណើរទៅកាន់ប្រទេសស៊ុយអែតដើម្បី​ទទួលពានរង្វាន់​នេះ​បានទេ ប៉ុន្តែ អ្នកស្រី​ក៏មិនប្រាកដដែរថាតើអ្នកណា​នឹង​ទៅទទួលជំនួស​ ។

អ្នកនាំពាក្យរដ្ឋាភិបាល លោក ប៉ែន បូណា បាន​បដិសេធ​ផ្ដល់​អត្ថាធិប្បាយ។

ចំណែក​ឯ​អ្នកនាំពាក្យ​ក្រសួងការងារ លោក កត្តា អ៊ន បានលើកឡើងថា កញ្ញាស៊ីថរ ជាអ្នកជាប់ឃុំតាមអំណាចសាលក្រមតុលាការចំពោះបទល្មើសដែលគាត់បានប្រព្រឹត្ត ប៉ុន្តែបែរជា ប្រទេសស៊ុយអែតផ្ដល់ពាន់រង្វាន់ទៅអ្នកជាប់ទោសទៅវិញ។ លោកបានបន្ថែមថា ខណៈពេលមានសហជីពរាប់ពាន់ទៀតដែលបម្រើប្រយោជន៍កម្មករ ហេតុអ្វីបានជាមិនផ្ដល់ពានជូនពួកគេផង។

លោកមានប្រសាសន៍ថា៖ «វាអត់មានអ្វីពិបាលយល់ទេករណីនេះ គឺពានរង្វាន់ផ្ដល់ដល់ជនល្មើសច្បាប់។ ពាន់រង្វាន់នេះមិនមានអ្វីសំខាន់សម្រាប់ប្រជាជនកម្ពុជាទេ»។

លោក អំ សំអាត នាយកទទួលបន្ទុកកិច្ចការទូទៅរបស់​អង្គការសិទ្ធិមនុស្ស លីកាដូ បានប្រាប់ ខេមបូចា ថា ពានរង្វាន់​របស់​កញ្ញា ស៊ីថរ ដែលទទួលបានពី​អង្គការ​របស់​ប្រទេសស៊ុយអែត គឺជា​ពានរង្វាន់​អន្តរជាតិ​ទីពីរ​ហើយរបស់កញ្ញា ។ ពានរង្វាន់ទីមួយរបស់កញ្ញា គឺបានមកពីសហរដ្ឋ​អាមេរិក ដែល​កញ្ញា​ទទួលបានពានរង្វាន់​អ្នកការពារសិទ្ធិមនុស្ស​សាកល នៅឆ្នាំ២០២៣ ។

ពានរង្វាន់ Per Anger Prize ជានិមិត្តរូបតំណាង​ឱ្យ​ការប្ដេជ្ញាចិត្តនិងការខំប្រឹងប្រែងរបស់កញ្ញាដើម្បី​លើកកម្ពស់​សិទ្ធិ​ការងារ ព្រមទាំង​ការលះបង់​របស់​កញ្ញា​ក្នុងការការពារសិទ្ធិ​របស់​កម្មករ​និយោជិត​នៅណាហ្គាវើលដ៍ ។ លោក សំអាត និយាយយ៉ាងដូច្នេះថា៖ «យើង​ចាត់ទុក​ពានរង្វាន់នេះ​ជាការលើកទឹកចិត្ត​ដល់​យុវជន​ សហជីព កម្មករ និង​អ្នកការពារសិទ្ធិមនុស្ស [] វាជា​សញ្ញាមួយ​នៃការគាំទ្រ​ចំពោះ​អ្នកការពារសិទ្ធិមនុស្ស​នៅកម្ពុជា» ។

លោកបានបន្ថែមថា ពានរង្វាន់នេះ​គឺចំពេលវេលាមួយ​ដែល​ករណី​របស់​កញ្ញា ស៊ីថរ នឹងត្រូវ​ពិនិត្យ​ឡើងវិញដោយ​តុលាការកំពូល ។ លោកសង្ឃឹមថា អ្នកនាង​នឹងត្រូវបានដោះលែង​ក្នុងពេលឆាប់ៗ ។

មេធាវីរបស់កញ្ញា ស៊ីថរ លោក ហុង សម្បត្តិ បានបញ្ជាក់ថា សវនាការ​នឹងធ្វើឡើង​នៅ​ថ្ងៃទី២៦ ខែមេសា ប៉ុន្តែ លោក​ពុំអាច​ផ្ដល់​ព័ត៌មាន​បន្ថែមទៀត​បានទេ ៕

ប្រែសម្រួលពីអត្ថបទភាសាអង់គ្លេស៖​​ From Harassment to Imprisonment – Union Leader Chhim Sithar Awarded Per Anger Prize For Workers Rights’ Fight

169 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម