ប្រាក់ឈ្នួលគោលអប្បបរមាឡើងពីរដុល្លារសម្រាប់ឆ្នាំ២០២២ ខណៈកម្មករ និងសហជីពរិះគន់លើការដំឡើងនេះ

កម្មករនៅរោងចក្រកាត់ដេរមួយកន្លែងនៅជាយរាជធានីភ្នំពេញសម្រាកម៉ោងបាយថ្ងៃត្រង់ ថ្ងៃទី២៨ ខែកញ្ញា ឆ្នាំ២០២១។ ខេមបូចា/ ព្រីង សំរាំង
កម្មករនៅរោងចក្រកាត់ដេរមួយកន្លែងនៅជាយរាជធានីភ្នំពេញសម្រាកម៉ោងបាយថ្ងៃត្រង់ ថ្ងៃទី២៨ ខែកញ្ញា ឆ្នាំ២០២១។ ខេមបូចា/ ព្រីង សំរាំង

រដ្ឋា​ភិបាល​នៅ​ថ្ងៃ​អង្គារ បានសម្រេច​ដំឡើង​ប្រាក់​ឈ្នួល​គោល​អប្បបរមា​សម្រាប់​កម្មករ​ក្នុង​វិស័យ​កាត់ដេរ​សម្លៀក​បំពាក់ និង​ដេរ​ស្បែក​ជើង​ចំនួន​ពីរ​ដុល្លារ​បន្ថែម​ទៀត ដែល​ជា​សរុប​ប្រាក់​ខែគោលប្រចាំ​ខែ​ឡើង​ដល់​១៩៤​ដុល្លារ​ ។ ​ការសម្រេច​នេះ​មិន​ទាន់​ធ្វើឲ្យ​​សហជីព និង​កម្មករ ពេញ​ចិត្ត​នៅឡើយ ដោយ​ពួកគេ​ចង់​បាន​តួ​លេខ​ខ្ពស់​ជាង​នេះ​។​

យោងតាម​​សេចក្ដី​ប្រកាស​ព័ត៌មាន​របស់​ក្រ​សួង​ការ​ងារ លោក​នាយ​ក​រដ្ឋ​មន្ត្រី ហ៊ុន សែន ​បាន​អន្តរាគមន៍​លើ​ការ​ចរចា​នេះ ដោយ​បាន​ជំរុញ​ឲ្យ​​ក្រ​សួង​ដំឡើង​តួលេខ​ប្រាក់​ឈ្នួលគោល​បន្ថែម​បន្តិច​ នៅ​ក្នុង​កិច្ច​ប្រជុំ​ចរចារ​ប្រាក់​ឈ្នួល​គោល​របស់​ក្រុម​ប្រឹក្សា​ជាតិ​ប្រាក់​ឈ្នួល​គោល​អប្បបរមា។​ តាម​រយៈ​ការ​ប្រជុំចរចា​ជា​បន្ត​បន្ទាប់​ ក្រុម​សហជីព​​នៅ​ក្នុង​ក្រុម​ប្រឹក្សា​ជាតិ​ប្រាក់​ឈ្នួល​គោល​អប្បបរមា​បាន​ស្នើ​ឲ្យ​ដំឡើង​ប្រាក់​ឈ្នួល​គោល​១២​ដុល្លារ​បន្ថែម​លើ​ប្រាក់​ឈ្នួល​គោល​ឆ្នាំ​២០២១ ខណៈ​ខាង​និយោជក​បាន​ស្នើ​ឲ្យ​បន្ថយ​ចំនួន​១៦​ដុល្លារ​។​

ប្រាក់​ឈ្នួល​គោល​អប្បបរមា​នឹង​ត្រូវ​ចាប់​អនុវត្ត​ពី​ថ្ងៃទី១ ខែ​មករា ឆ្នាំ​២០២២។

​ក្រុម​ប្រឹក្សា​ជាតិ​ប្រាក់​ឈ្នួល​គោល​អប្បបរមា មាន​បី​ភាគី​ចូល​រួម សហជីព រដ្ឋាភិបាល និង​និយោជក ក្នុង​នោះភាគី​នីមួយៗ​មាន​សមាជិក​ស្នើ​គ្នា ដែល​ធ្វើ​ឲ្យ​ចំនួន​សមាជិក​សរុប​មាន​​៥១​រូប។​​

ក្នុង​ចំណោម​សមាជិក​៥១​រូប មាន​៤៥​រូប​បាន​បោះ​ឆ្នោត​គាំទ្រតួលេខប្រាក់ឈ្នួល​គោល​អប្បបរមា​ចំនួន​១៩២​ដុល្លារ និង​មាន​ប្រាំមួយ​សំឡេង​គាំ​ទ្រ​តួលេខ​របស់​សហជីព ២០៤​ដុល្លារ។ ចំណែក​តួ​លេខ​របស់​តំណាង​ភាគី​និយោជក​ចំនួន​១៨៨​ដុល្លារ​មិន​មាន​សំឡេង​គាំទ្រ​នោះទេ​។​

​ទោះ​បី​ជា​ប្រាក់​ខែ​បាន​ឡើង​បន្តិច​ក្ដី កម្មករ និង​តំណាង​សហជីព បាន​ប្រាប់​ខេមបូចាថា ប្រាក់​ឈ្នួល​គោល​ថ្មី​នេះ​នឹង​មិន​គ្រប់​គ្រាន់​សម្រាប់​ការ​ចំណាយ​លើ​ជីវភាព​ប្រចាំ​ថ្ងៃ​នោះ​ទេ ស្រប​ពេល​ដែល​បញ្ហា​ប្រឈម​ជា​ច្រើន​កើត​មាន​ឡើង​នៅ​ក្នុង​វិបត្តិកូវីដ-១៩ នេះ​។​

លោក ប៉ាវ ស៊ីណា ប្រធានសហភាពចលនាកម្មករកម្ពុជា មាន​ប្រសាសន៍​ថា ការ​ស្រាវ​ជ្រាវ​បាន​រក​ឃើញ​ថា​ប្រាក់​ចំណូលសរុប​​របស់​គ្រួសារ​កម្មករ​បាន​ធ្លាក់​ចុះ​អំឡុង​ពេល​កូវីដ​-១៩ និង​ក្នុង​វិបត្តិ​សេដ្ឋកិច្ច​ដែល​កើត​មាន​ជាបន្ត​បន្ទាប់​នេះ។​​

លោក​បានឲ្យដឹង​ថា៖ «​[រដ្ឋាភិបាល​]ផ្ដល់​ប្រាក់​ឈ្នួល​គោល​អប្បបរមា​ចំនួន​១៩៤​ដុល្លារ​ដល់​កម្មករ មិន​ទាន់​អាច​ឆ្លើយតបនឹង​ការ​រស់នៅប្រចាំ​ថ្ងៃ​របស់​ពួកគេ​បានទេ»។ លោក​បន្ថែម​ថា ទោះ​បីជា​មិន​អាច​បាន​ដូច​បំណង តែ​ខាង​សហជីព​មិន​អាច​បដិសេធ​សំឡេង​ភាគ​ច្រើន​ដែល​ព្រម​ទទួល​យក​តួលេខ​នេះទេ។ លោក​បន្ត​ថា៖ «យើង​ឃើញ​ហើយ​ថា កម្មករ​យើង​ជួប​ការ​លំបាក​ច្រើន ពី​ព្រោះ​ប្រាក់​ខែ​តិច ហើយ​ពួកគេ​ញ៉ាំតែអាហារ​មាន​តម្លៃ​ថោក និង​មិន​មាន​អនាម័យ​»។​

លោកឲ្យ​ដឹង​ទៀត​ថា​ កម្មករ​សព្វ​ថ្ងៃ​រស់​នៅ​ក្នុង​បន្ទប់​ជួល​តូច​ចង្អៀត​មាន​គ្នា​ច្រើន ដោយ​សារ​តែ​តម្រូវ​ការ​ចំណាយ​មាន​ច្រើន​។ លោក​ថា ទាំង​និយោជក និង​រដ្ឋាភិបាល គួរ​តែ​ពិនិត្យ​ឡើង​វិញ​នូវ​លទ្ធភាព​ដែលអាច​ផ្ដល់​នូវ​អត្ថ​ប្រយោជន៍​ផ្សេងៗ​បន្ថែម​លើ​ប្រាក់​ឈ្នួល​គោលអប្បបរមា ដូច​ជា​បន្ថែម​លើ​ប្រាក់​ថ្លៃ​អាហារ ធ្វើ​ដំណើរ និង​ថ្លៃជួល​ផ្ទះ​ជា​ដើម​។​

លោក អាត់​ ធន់ ប្រធាន​សហភាព​ការ​ងារ​កម្ពុជា បាន​ឲ្យ​ដឹង​ដែរ​ថា​ការ​ដំឡើង​ពីរ​ដុល្លារ​នេះ​មិន​គ្រប់គ្រាន់​សម្រាប់​កម្មករ​នោះទេ​។​

លោកមាន​ប្រ​សាសន៍​ថា៖ «​ខ្ញុំ​គិត​ថាចំនួន​នេះ​មិន​អាច​ដោះ​ស្រាយ​ការ​លំបាក​របស់​កម្មករ​បាន​ទេ»។​

លោក បន្ថែម​ទៀត​ថា ក្នុង​ចំណោម​ភាគី​សហជីព​មាន​គ្នា​១៧​រូប នៅ​ក្នុង​ក្រុម​ប្រឹក្សា​ជាតិ​ប្រាក់​ឈ្នួល​គោល​អប្បបរមា ប៉ុន្តែមាន​តែប្រាំមួយ​រូប​ប៉ុណ្ណោះ​បាន​គាំទ្រការ​ដំឡើង​ប្រាក់​ឈ្នួល​១២​ដុល្លារ។ ចំណែក​១១សំឡេង ផ្សេងទៀត បាន​គាំទ្រ​តួលេខ​ដែល​ដាក់​ចេញ​ដោយ​រដ្ឋាភិបាល។ ត្រង់ចំណុច​នេះ លោក​ អាត់ ធន់ ថា វា​ជា​ភស្តុតាង​មួយ​បញ្ជាក់ថា​តំណាង​សហជីព​ខ្លះ​មិន​បាន​ការ​ពារ​ផល​ប្រយោជន៍​កម្មករ​នោះទេ​។​​

ទោះ​ជា​លោក​ថា តួលេខ​ដែល​លើក​ឡើង​ដោយ​សហជីព​អាច​ជួយ​ឲ្យ​ជីវភាព​កម្មករ​មាន​ការ​ប្រសើរ​ឡើង តែថា​បើ​តាម​​ការ​រាយការណ៍​ការ​ចំណាយក្នុង​ជីវភាព​​ប្រចាំ​ថ្ងៃ​​របស់​កម្មករមាន​ចន្លោះពី​២៥០​ដុល្លារ ទៅ​៣០០​ដុល្លារ​ ដែល​លោក​ហៅ​ថា ទោះបី​ជាបាន​តួលេខ​ដែល​ខាង​សហជីព​ដាក់​ ក៏​មិន​ទាន់​គ្រប់​គ្រាន់​ដែរ។ លោក អាត់ ធន់ នៅ​តែ​បន្ត​ទាម​ទារ​ឲ្យ​​មាន​ការ​ដំឡើង​ប្រាក់​ឈ្នួល​គោល​បន្ថែ​ម​ទៀត បូក​រួម​នឹង​ផល​ប្រយោជន៍​ផ្សេងៗ​សម្រាប់​កម្មករ និង​ថា​រដ្ឋាភិបាល​ក៏​គួ​រព្យាយាម​ទប់​តម្លៃ​ទំនិញ​ចាំ​បាច់​មួយ​ចំនួន​ផង​ដែរ។​ ​

លោក វ៉ាន់ សូអៀង ប្រធាន​សមាគម​រោង​ចក្រ​ដាក់​ដេរ​នៅ​កម្ពុជា ហៅ​កាត់​ថា GMAC មាន​ប្រសាសន៍​ថា ការ​ចរចា​លើ​ប្រាក់​ឈ្នួល​គោល​អប្បបរ​មា​របស់​កម្មករ ជាទូទៅ​ត្រូវ​ផ្អែក​​លើ​លក្ខណៈវិនិច្ឆ័យស្តង់ដារបច្ចេកទេសទាំងប្រាំពីរ ដើម្បី​ធានាថា​មាន​ភាព​ត្រឹម​ត្រូវ​។​

លោកបន្ថែម​ថា៖ «សម្រាប់​ពីរ​ដុល្លារ​នេះ សម្តេច [ហ៊ុន សែន] មាន​ចិត្ត​ល្អ ហើយ​លោក​ចង់​ជួយ​ដល់​កម្មករ»។ លោក​បាន​លើក​ទឹក​ចិត្ត​ដល់​កម្មករថា គួរ​ដឹង​គុណ​លោកនាយក​រដ្ឋ​មន្ត្រី​ដែល​បាន​បន្ថែម​ប្រាក់​ឈ្នួល​គោល​នេះ។​​

លោក វ៉ាន់​ សូអៀង ឲ្យ​ដឹង​ទៀត​ថា និយោជក​នឹង​ខាត​បង់​ថវិកា​របស់​ខ្លួនចំពោះ​ការ​ដំឡើង​ប្រាក់​ឈ្នួល​គោល​នេះ​ ប៉ុន្តែ​ពួកគេត្រូវ​តែ​ធ្វើ​ដូច​នេះ​ដើម្បី​ជួយ​ដល់​កម្មករ​ កុំឲ្យពួកគាត់លំបាក​ពេក​ក្នុង​ពេល​មាន​វិបត្តិ​សេដ្ឋកិច្ច​នេះ។​ ប៉ុន្តែ លោក ក៏​បាន​មានប្រសាសន៍ទៀតថា​ ទៅអនាគត ការ​ដំឡើង​ប្រាក់​ឈ្នួល​ដែល​ធ្វើ​ឡើង​ខុស​ពី​លក្ខណៈវិនិច្ឆ័យស្តង់ដារទាំងប្រាំពីរ នឹង​អាច​ធ្វើ​ឲ្យ​បាត់​បង់​អ្នក​វិនិយោគ​ ដែល​កំពុង​ធ្វើ​ការ​រកស៊ី​នៅ​ក្នុ​ង​ប្រទេស​កម្ពុជា​

លោក​បន្ថែម​ថា៖ «បើ​សិនមិនមានភាពយុត្តិធម៌ និង​មាន​ភស្តុតាងជាក់​លាក់ អ្នកទិញនិងអ្នកផ្គត់ផ្គង់​នឹង​មិនពេញ​ចិត្ត ហើយ​ពួកគេ​នឹង​ទៅ​[វិនិយោគ​]​ប្រទេស​ផ្សេង»។​

លោក សូអៀង បន្ត​ទៀត​ថា ប្រទេស​មួយ​ចំនួន​ផ្សេង​ទៀត​មិន​បាន​ដំឡើង​ប្រាក់​ឈ្នួល​គោល​អប្បបរមា​នៅ​អំឡុង​កូវីដ-១៩ នេះទេ នឹង​ថា​មាន​តែ​កម្ពុជា​បាន​ធ្វើ​រឿងនេះ​។

លោក​បញ្ជាក់​ថា៖ «​ជាការពិត យើង​គិត​ថា​ប្រាក់​ឈ្នួល​គោល​គួរតែត្រូវ​កាត់…​ពីព្រោះ​​ពិភព​លោក​គិត​ថា​ កូវីដ-១៩ គឺ​ជា​វិបត្តិ ដូច​នេះ​វា​ត្រូវ​តែ​កាត់​បន្ថយ​»។​

ការ​ដំឡើង​ប្រាក់​ឈ្នួល​គោល​នេះ​មិន​ធ្វើ​ឲ្យ​កម្មករ​សប្បាយចិត្ត​ប៉ុន្មាន​នោះទេ ដោយ​កម្មករ​មួយ​ចំនួន​ប្រាប់​ខេមបូចា ថាការ​ដំឡើង​នេះ​មិន​ទាន់​គ្រប់​គ្រាន់​សម្រាប់​ថ្លៃ​ចំណាយ​ប្រចាំ​ថ្ងៃ​នៅឡើយ។​

កម្មករធ្វើយុទ្ធនាការនៅក្នុងរោងចក្ររបស់ពួកគេដើម្បីទាមទារឡើងប្រាក់ឈ្នួល២១៤ដុល្លារក្នុង១ខែ មុនពេលការសម្រេចរបស់រដ្ឋាភិបាលដែលដំឡើងត្រឹមតែពីរដុល្លារ។ រូបភាពបង្ហោះនៅលើទំព័រហ្វេសប៊ុករបស់ CATU

អ្នកនាង យ៉ុង ស្រីលីន វ័យ​២២​ឆ្នាំ កម្មករ​នៅ​រោង​ចក្រ​កាត់ដេរ​ Horizon Outdoor ក្នុង​ខេត្ត​កំពង់​ឆ្នាំ​ង​ បាន​លើក​ឡើង​ថា ការ​ឡើង​ថ្លៃ​ទំនិញ​ចាំ​បាច់​មួយ​ចំនួន​ធ្វើ​ឲ្យ​ចំណូល​ដែល​រក​បាន​មិន​អាច​បំពេញ​តម្រូវ​ការ​គ្រប់​គ្រាន់​។​

អ្នកនាង​ ​បន្ថែម​ថា៖ «​ខ្ញុំ​គិត​ថា ទាំង​ខ្ញុំ និង​កម្មករ​ផ្សេង​ទៀត​នៅ​តែ​ជួបការ​លំបាក​ក្នុង​ជីវភាព ពីព្រោះ​តម្លៃទំនិញ និង​ម្ហូប​អាហារកើន​ឡើងខ្ពស់​ទៅៗ ប៉ុន្តែ​ប្រាក់ខែ​កើន​ឡើង​តែ​ពីរ​ដុល្លារ»។ អ្នកនាង ​បន្ត​ថាគ្រួសារ​របស់​ខ្លួន​ក៏​ត្រូវ​សង​បំណុល​ប្រចាំ​ខែ​ចំនួនជាង​១០០​ដុល្លារ លើ​កម្ចី​ធ្វើ​ផ្ទះ​ចំនួន​៣​ ០០០​ដុល្លារ​។​

លោក ម៉ៃ សាមិត្ត វ័យ​៣៥ឆ្នាំ ជាកម្មករ​នៅ​រោង​ចក្រ​កាត់ដេរ​ YTC Corporation ក្នុង​ខេត្ត​កំពង់​ស្ពឺ​ បាន​លើក​ឡើង​ដែរថា លោក​បាន​ធ្វើ​ការ​ជាង​១០​ឆ្នាំ​មក​ហើយ​នៅ​ក្នុង​រោងចក្រ​នេះ និង​ថា​ការ​ដំឡើង​ប្រាក់​ឈ្នួល​ថ្មី​បន្ថែម​នេះ​មិន​គ្រប់​គ្រាន់​សម្រាប់​ការ​ទិញ​គុយទាវ​មួយ​ចាន​ផង​។​

លោក​បន្ថែមថា៖ «ខ្ញុំ​គិត​ថា ​កម្មករ​យើង​មិន​ពេញ​ចិត្ត​ទេ​នឹង​ចំនួន​នេះទេ ប៉ុន្តែ​យើង​គ្មាន​ជម្រើស»។ លោកបន្តទៀតថា៖ «​ខ្ញុំ​គិត​ថា ​គ្រប់ភាគី​ទាំងអស់ គួរ​តែទៅ​ជួប​កម្មករ​ផ្ទាល់​ ដើម្បីពិនិត្យ​ពី​ជីវភាព​កម្មករ​ មុន​ពេល​ប្រជុំ​ចរចា​រឿង​ប្រាក់​ឈ្នួល​គោល»។​​

កញ្ញា សួន រិទ្ធី វ័យ​២៧ឆ្នាំ ធ្វើ​ការ​នៅ​រោង​ចក្រ​​ អ៊ិចអូ នៅ​ផ្លូវ​វេងស្រេង​ ក្នុង​រាជ​ធានីភ្នំពេញ បាន​ប្រាប់ខេមបូចា ដែរថាកញ្ញា​ចំណាយ​ច្រើនជាង​១៦០​ដុល្លារ​ក្នុង​មួយ​ខែៗ គ្រាន់​តែ​លើ​ថ្លៃ​ឈ្នួល​បន្ទប់ និង​អាហារ​ ដោយ​មិន​ទាន់​គិត​ពីការ​សង​ធនាគារជាង ១០០ដុល្លារទៀត​ផង។​

កញ្ញា​បន្ថែម​ថា៖ «ខ្ញុំ​គិត​ថា​រដ្ឋាភិបាល​គួរ​តែ​ផ្ដល់​ប្រាក់​ឈ្នួល​គោល​ដល់​២១៤​ដុល្លារ ពីព្រោះ​តម្លៃទំនិញ និង​ម្ហូបអាហារ​បានឡើង​ថ្លៃ​ច្រើន»។​

អ្នក​នាំ​ពាក្យក្រ​សួង​ការងារ​ លោក ហេង សួរ បានទទួលស្គាល់ថា សំនួរនៅតែមានដែលចោទសួរថាដំឡើងប្រាក់ឈ្នួលប៉ុន្មានទើបអាចជួយកម្មករបាន ប៉ុន្តែលោកបានលើកឡើថា​កម្ពុជា​បាន​ដំឡើង​ប្រាក់​ឈ្នួល​គោល​ទាំង​នៅ​ឆ្នាំ​២០២១ និង​ឆ្នាំ២០២២ ខណៈដែលប្រទេស​ផ្សេង​​ទៀត​ក្នុង​តំបន់​មិន​បាន​ធ្វើ​ដូច​នេះទេ​។​​

លោក​បន្ត​ថា៖ «​អ៊ីចឹងតួ​លេខ​ពី​មួយ​ឆ្នាំ​ទៅ​មួយ​ឆ្នាំ​ វាធំជាងមុនបន្តិច អ៊ីចឹងត្រង់ថាប្រសើរ វាប្រាកដជាប្រសើរហើយ ​ប៉ុន្តែ​ត្រង់ថាប្រសើរកំរិតណា? វា​ជា​រឿង​មួយ​ដោយឡែក»។​

លោក ឃុន ថារ៉ូ អ្នក​គ្រប់​គ្រង​កម្ម​វិធី​ របស់​អង្គការ​សង់ត្រាល់ មិន​បាន​ចាត់​ទុក​ថា​ការ​ដំឡើង​ប្រាក់​ឈ្នួល​នេះ​ជារឿង​ឈ្នះ​នោះទេ​។ លោក​កត់​សម្គាល់​ថា ​តំណាង​កម្មករមួយចំនួន​មិន​បាន​គាំទ្រ​តួលេខ​ដែល​បានស្នើដំឡើងដោយភាគីសហជីពខ្លួនឯង​ចំនួន​១២​ដុល្លារនោះទេ ហើយលោកបន្ត​ថា ​តំណាង​សហជីព​ខ្លះ​មិន​បាន​ដើរតួជា​អ្នក​ការពារ​កម្មករ​ឡើយ។​ លោក លើក​ឡើង​ថា៖ «​វា​ជារឿង​គួរ​ឲ្យ​សោក​ស្ដាយ​សម្រាប់​កម្មករ​យើង»

ប្រែសម្រួលពីអត្ថបទភាសាអង់គ្លេស៖ Garment industry minimum wage raised $2 for 2022 amidst criticism from unions and workers

101 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »