រាជរដ្ឋាភិបាលកម្ពុជានៅថ្ងៃព្រហស្បតិ៍បានសម្រេចដំឡើងប្រាក់ឈ្នួលអប្បបរមាកម្មករកាត់ដេរចំនួន៤ដុល្លារបន្ថែម ដែលសរុបប្រាក់ឈ្នូលអប្បបរមាប្រចាំខែទ្បើងដល់២០៤ដុល្លាសម្រាប់ឆ្នាំ២០២៤ ខណៈកម្មករ និងសហជីពឯករាជ្យមិនទាន់ពេញចិត្តតួលេខនេះនៅឡើយ។
តាមរយៈកិច្ចប្រជុំចុងក្រោយរបស់ក្រុមប្រឹក្សាជាតិប្រាក់ឈ្នួលអប្បបរមាដែលមានសមាសភាពត្រីភាគី នៅថ្ងៃទី២៨ ខែកញ្ញា សំឡេងភាគច្រើនក្នុងចំណោម៥១សំឡេងគាំទ្រតួលេខ២០២ដុល្លារ ដែលរដ្ឋាភិបាលបានស្នើបន្ថែមលើប្រាក់ឈ្នូលអប្បបរមាបច្ចុប្បន្ន ខាងនិយោជកក៍បានបោះឆ្នោតគាំទ្រតួលេខនេះដែរ។
ក្នុងចំណោមសមាជិក៥១រូប រួមមានសមាជិក៤៦រូបបានបោះឆ្នោតគាំទ្រតួលេខប្រាក់ឈ្នួលអប្បបរមាចំនួន២០២ដុល្លារ និង៥សំឡេងគាំទ្រតួលេខរបស់សហជីពចំនួន២១៣ដុល្លារ ហើយតួលេខចំនួន២០៤ដុល្លាររបស់សហជីពផ្សេងទៀត មិនមានសំឡេងបោះឆ្នោតគាំទ្រទេ។ បន្ទាប់ពីបោះឆ្នោតរួច លោកនាយករដ្ឋមន្ត្រី ហ៊ុន ម៉ាណែត បានសម្រេចផ្តល់ឱ្យចំនួន២ដុលារបន្ថែមលើតួលេខ២០២ដុល្លារ ដូច្នេះសរុបប្រាក់ឈ្នួលអប្បបរមារបស់កម្មករកាត់ដេរសម្រាប់ឆ្នាំ២០២៤ មានចំនួន២០៤ដុល្លារ។
រដ្ឋមន្ត្រីក្រសួងការងារ លោក ហេង សួរ ថ្លែងប្រាប់អ្នកសារព័ត៌មានក្រោយកិច្ចប្រជុំថា លោកនាយករដ្ឋមន្ត្រី ហ៊ុន ម៉ាណែត បានអន្តរាគមន៍លើការចរចានេះ ដោយបានន្ថែម២ដុល្លាបន្ថែមលើតួលេខដែលក្រុមប្រឹក្សាជាតិប្រាក់ឈ្នួលអប្បបរមាបានសម្រេចបោះឆ្នោតគាំទ្រ២០២ដុល្លា។
លោកបន្តថា៖ «ចឹងប្រាក់ឈ្នួលអប្បបរមាសម្រាប់ឆ្នាំ២០២៤នេះគឺមានចំនួន២០៤ដុល្លារអាមេរិកក្នុងមួយខែ»។
ប្រាក់ឈ្នួលអប្បបរមារបស់កម្មករកាត់ដេរនឹងត្រូវចាប់អនុវត្តពីថ្ងៃទី១ ខែមករា ឆ្នាំ២០២៤។
លោក ទូច គឹមថត អាយុ៣០ឆ្នាំ កម្មកររោងចក្រមួយកន្លែង ស្ថិតក្នុងសង្កាត់កាកាប ខណ្ឌពោធិ៍សែនជ័យ យល់ឃើញថា ប្រាក់ឈ្នួលអប្បបរមាត្រឹមតែ២០៤ដុល្លារនេះ វាមិនទាន់អាចជួយសម្រាលជីវិតកម្មករបាននៅឡើយទេ ព្រោះកម្មកររាល់ថ្ងៃ ពួកគាត់ត្រូវការចំណាយច្រើន ដូចជាលើបន្ទប់ជួលផង លើម្ហូបអាហារហូបចុកផង លើថ្លៃកូនរៀនសូត្រផង និងត្រូវសងបំណុលធនាគារ ដែលជំពាក់គេផង។
លោក គឹមថត បន្តថា លោកចង់បានប្រាក់ឈ្នួលអប្បបរមា២១៥ដុល្លារ ទើបសមរម្យ ប៉ុន្តែលោកថា នេះគឺជាការសម្រេចចិត្តរបស់រដ្ឋាភិបាលទៅហើយ ដែលលោកមិនអាចបដិសេធបាន។ កម្មកររូបនេះ បានឱ្យដឹងថា គាត់មានកូនពីរនាក់នៅក្នុងបន្ទុក ហើយមួយផ្នែកធំ ត្រូវចំណាយ និងផ្គត់ផ្គង់កូនៗឱ្យទៅរៀនសូត្រ និងមួយផ្នែកធំទៀត គឺត្រូវសងបំណុលធនាគារ ដែលលោកចាត់ទុកថានេះគឺជាការប្រឈម និងទុក្ខកង្វល់របស់លោកជារៀងរាល់ថ្ងៃ
លោកបញ្ជាក់ថា៖ «បើតាមខ្ញុំមិនទាន់បានសមរម្យទេប៉ុណ្នឹង(២០៤$) ដោយសារយើងឥឡូវ វាស្អីក៏ថ្លៃទាំងអស់ បន្ទប់ជួលក៏ឡើងថ្លៃ ការចំណាយក៏ច្រើន»។
អ្នកស្រី យឿន ចាន់ធឿន អាយុ៣២ឆ្នាំ ជាកម្មការិនី ក្នុងរោងចក្រតំបន់សេដ្ឋកិច្ចពិសេសនៃក្រុងប៉ោយប៉ែត លើកឡើងប្រាក់ឈ្នួលអប្បបរមាដែលសម្រេចយក២០៤ដុល្លារនេះ តិចតួចមែនទែន ស្របពេលទំនិញក្នុងទីផ្សារឡើងថ្លៃគ្រប់មុខ ទាំងថ្លៃសាំង ថ្លៃធ្វើដំណើរ និងថ្លៃអគ្គិសនីជាដើម។ ជាមួយគ្នានេះ រោងចក្រលែងមានការងារឱ្យកម្មករធ្វើការងារថែមម៉ោងដូចមុន ដូច្នេះប្រាក់ឈ្នួលអប្បបរមាក៏តិច ហើយប្រាក់ថែមម៉ោងក៏គ្មាន ជាហេតុឱ្យកម្មករកាន់តែលំបាក ហើយជីវិតកាន់តែធ្ងន់ធ្ងរថែមទៀត។ អ្នកស្រីបន្តថា អ្នកស្រីមានកូនពីរនាក់នៅក្នុងបន្ទុកដែលម្នាក់នៅតូចកំពុងបំបៅទឹកដោះគោ និងម្នាក់បានទៅសាលារៀន ដែលមានតម្រូវការជាច្រើនក្នុងការចំណាយប្រចាំថ្ងៃ។
លោកស្រីអះអាងថា៖ «និយាយរួមទៅ រាល់ថ្ងៃមានន័យថា ចាយអត់គ្រប់ទេ ខ្ចីគេថែម បើកមកសងគេៗ ហើយខ្ចីគេទៀត»។
ដោយឡែកលោក ផាន បូរី ប្រធានសហជីពការពារសិទ្ធិកម្មកររបស់រោងចក្រមួយ ក្នុងរាជធានីភ្នំពេញ យល់ឃើញថា ប្រាក់ឈ្នួលប៉ុណ្នឹង មិនទាន់អាចជួយសម្រួលជីវភាព និងទុក្ខលំបាករបស់កម្មករបាននៅឡើយទេ ដោយរាល់ថ្ងៃនេះទំនិញក្នុងទីផ្សារឡើងថ្លៃហួសពេក ជាមួយនេះកម្មករភាគច្រើនណាស់ មិនហ៊ានទិញ ឬហូបម្ហូបអាហារដែលមានតម្លៃថ្លៃ និងឆ្ងាញ់ទេ។
លោកបន្តថា៖ «ប្រាក់ឈ្នួល២០៤ដុល្លារនេះ យើងមើលឃើញថាវានៅតែមិនទាន់ផ្គត់ផ្គង់ ក៏ដូចជាធ្វើឱ្យកម្មករនិយោជិកយើងដែលនៅប្រទេសកម្ពុជាយើង ទទួលបាននៅការប្រើប្រាស់ ឬក៏ប្រាក់ចំណូលមួយដែលសមរម្យ វាមិនទាន់អាចធានាបាននៅក្នុងការរស់នៅ ដោយសមរម្យ»។
រដ្ឋមន្ត្រីការងារ លោក ហេង សួរ ក៍បានបញ្ជាក់មន្ថែមថា ការដំឡើងប្រាក់ឈ្នួលអប្បបរមាមិនមែនជាដំណោះស្រាយតែមួយទេ ក៍ប៉ុន្តែការខិតខំកាត់បន្ថយបន្ទុកចំណាយរបស់បងប្អូនកម្មករនិយោជិតដែលក្រសួងនឹងយកចិត្តទុកដាក់ធ្វើបន្ថែមទៀត។
លោករដ្ឋមន្ត្រីបន្ថែមថា៖ «ប្រាក់ឈ្នួលកំណើននេះទៀតសោត ក៏យើងបានយកទៅប្រៀធៀបជាមួយនឹងបណ្តាប្រទេសផ្សេងៗទៀតដែលផលិតនូវផលិតផលសំលៀកបំបាក់ ស្បែកជើង ក៏ដូចជាផលិតផលធ្វើដំណើរ ជារួមកដល់ម៉ោងនេះកម្ពុជាយើងនៅតែជាប្រទេសតែមួយគត់ដែលដំទ្បើងប្រាក់ឈ្នួលអប្បបរមាក្នុងចំណោមប្រទេសដែលផលិតនូវសំលៀកបំពាក់ ស្បែកជើង និងកាបូបនៅអាស៊ីរបស់យើង»។
នាយករដ្ឋមន្ត្រី លោក ហ៊ុន ម៉ាណែត បានមានប្រសាសន៍នៅក្នុងហ្វេសប៊ុកផ្លូវការរបស់លោកថា លោកបានតាមដានយ៉ាងយកចិត្តទុកដាក់លើការពិភាក្សាប្រាក់ឈ្នួលអប្បបរមានេះតាំងពីពេលចាប់ផ្តើម។ ការជួយលើកកម្ពស់ជីវភាពរស់នៅរបស់ប្រជាពលរដ្ឋ រួមទាំងបងប្អូនកម្មករនិយោជិតគឺជាអាទិភាពខ្ពស់បំផុតរបស់រាជរដ្ឋាភិបាល។ ឈរលើមូលដ្ឋាននៃលទ្ធភាពជាក់ស្តែង ដែលរាជរដ្ឋាភិបាលអាចសម្រួលជូនទៅភាគីនិយោជក។
លោកនាយករដ្ឋមន្ត្រីថ្លែងថា៖ «ខ្ញុំបានសម្រេចបន្ថែម២ដុល្លារក្នុង១ខែទៅលើតួលេខ២០២ដុល្លារ ដែលជាលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមាខាងលើ។ ដូច្នេះ ប្រាក់ឈ្នួលអប្បបរមាថ្មីសម្រាប់ឆ្នាំ២០២៤ គឺ២០៤ដុល្លារក្នុង១ខែ (កើន៤ដុល្លារប្រៀបធៀបជាមួយឆ្នាំ ២០២៣ ដែលមានត្រឹម២០០ដុល្លា)»។
លោក ប៉ាវ ស៊ីណា ប្រធានសហភាពចលនាកម្មករកម្ពុជា មានប្រសាសន៍ថា លោកពិបាកទទួលយកដែរតួលេខនេះ ខណៈអតិផរណាទីផ្សារមានការកើនទ្បើង២,៥ភាគរយ ដូច្នេះការដំឡើងនេះវាអត់ស្មើនឹងតម្លៃអតិផរណាផង ហើយវានឹងធ្វើឱ្យការចំណាយបងប្អូនកម្មករជួបនូវការខ្វះខាតមន្ថែមទៀត។
លោកបញ្ជាក់ថា៖ «ការផ្តល់ជូនវាហាក់ដូចជាអត់ទាន់បានឆ្លើយតបនឹងជីវភាពរស់នៅនៅទ្បើយទេ»។
លោកបន្ថែមថា បើនោះបីវិបត្តិសេដ្ឋកិច្ចពិភពលោកទាក់ទងសង្គ្រាមរុស្សី និងអ៊ុយក្រែន ក៏ប៉ុន្តែភាគីនិយោជកបានទទួលការអនុគ្រោះច្រើនពីរាជរដ្ឋាភិបាលទៅលើដំណើរសង្វាក់ផលិតកម្មការងាររបស់គាត់ផងដែល។
លោក ណាង សុធី អនុប្រធានសហព័ន្ធនិយោជក និងសមាគមពាណិជ្ជកម្ពុជា ដែលតំណាងឱ្យនិយោជកថ្លែងថា ខាងនិយោជកយល់ស្របតាមរដ្ឋាភិបាលដែលបានកំណត់និងដំឡើងតួលេខ។
លោក សុធី បន្តថា៖ «ខាងនិយោជកយើងអាចទទួលយកបាន បាទ ស័ក្តិសមដែលអាចទទួលយកបាន»។
លោកបានបន្ថែមថា មានការដោះដូរពីរាជរដ្ឋាភិបាលក្នុងការសម្រួលតម្លៃភស្តុភាកម្មដែលកន្លងមករដ្ឋាភិបាលមិនបានយកចិត្តទុកដាក់ ហើយសង្ឃឹមថា អាណត្តិទី៧នេះ លោកនាយករដ្ឋមន្ត្រីនឹងពិចារណាកាត់បន្ថយភស្តុភារកម្មដែលជាបន្ទុកបន្ថែមលើថ្លៃដឹកជញ្ជូនរបស់វាយនភណ្ឌនោះ អាចថយដែលនយោជកស្នើសុំ៣០ភាគរយ។
គូសបញ្ជាក់ផងដែរថា តាមរយៈកិច្ចពិភាក្សាត្រីភាគី កាលពីព្រឹកថ្ងៃទី១៨នេះ ខាងភាគីនិយោជកដំឡើងប្រាក់ឈ្នូលបន្ថែមចំនួន១,៥០ដុល្លារ (២០១,៥០ដុល្លារ) ចំណែកឯខាងភាគីរាជរដ្ឋាភិបាលដំឡើងឱ្យត្រឹម២ដុល្លារ (២០២ដុល្លារ) ខណៈពេលខាងភាគីសហជីពឯករាជ្យស្នើ១៣ដុល្លារ (២១៣ដុល្លារ) និងសហជីពផ្សេងទៀតស្នើដំឡើងត្រឹម៤ដុល្លារ (២០៤ដុល្លារ)៕
