សមាគមសម្ព័ន្ធអ្នកសារព័ត៌មានកម្ពុជា

រដ្ឋាភិបាលអនុម័តដីសម្បទានសេដ្ឋកិច្ចថ្មី បើទោះ​ជា​មានការផ្អាកបណ្តោះអាសន្ន

រូបភាពពីផ្កាយរណបពីស្ថានីយ៍អវកាស Sentinel-2/European Space នៅថ្ងៃទី១៥ ខែមករា ឆ្នាំ២០២៣ បង្ហាញពីការកាប់បំផ្លាញព្រៃឈើក្នុងតំបន់ក្នុងឃុំអូរស្វាយ ខេត្តស្ទឹងត្រែង ដែលត្រូវបានផ្តល់ជាដីសម្បទានសេដ្ឋកិច្ច។ រូបភាពផ្តល់ឱ្យ
រូបភាពពីផ្កាយរណបពីស្ថានីយ៍អវកាស Sentinel-2/European Space នៅថ្ងៃទី១៥ ខែមករា ឆ្នាំ២០២៣ បង្ហាញពីការកាប់បំផ្លាញព្រៃឈើក្នុងតំបន់ក្នុងឃុំអូរស្វាយ ខេត្តស្ទឹងត្រែង ដែលត្រូវបានផ្តល់ជាដីសម្បទានសេដ្ឋកិច្ច។ រូបភាពផ្តល់ឱ្យ

រដ្ឋាភិបាលបានផ្តល់ដីសម្បទានសេដ្ឋកិច្ចថ្មី (ELC) កាល​ពី​ខែមីនា ឆ្នាំ២០២២ ជាលើកដំបូងក្នុងរយៈពេលជិតមួយទសវត្សរ៍ បើ​ទោះបីជាមាន​ការផ្អាក​នៅឡើយ​​ក្នុង​ការ​ផ្តល់​ដីសម្បទានសេដ្ឋកិច្ចក៏ដោយ​ យោងតាមសេចក្តីថ្លែងការណ៍របស់​អង្គការ លីកាដូ។

ដីសម្បទានសេដ្ឋកិច្ចថ្មីនេះ មានផ្ទៃដីព្រៃជាង៥ពាន់ហិកតា ក្នុងខេត្តស្ទឹងត្រែង នេះ​បើយោង​តាមឯកសារដែលខេមបូចា​ទទួលបាន។ ប្រជាពលរដ្ឋជាច្រើននាក់ បានប្រាប់ខេមបូចា​ថា ប្រជាពលរដ្ឋជាង៦០គ្រួសារ ដែលរស់នៅក្នុងតំបន់ដីសម្បទានសេដ្ឋកិច្ចបានរងផលប៉ះពាល់ ខណៈដែលក្រុមហ៊ុនចាប់ផ្តើមកាប់ព្រៃឈើនៅទីនោះ។

មន្ត្រីរដ្ឋាភិបាលគេចវេសមិនចង់​និយាយ​អំពីដីសម្បទានសេដ្ឋកិច្ចថ្មីនេះទេ​ ហើយគេ​នៅ​មិនទាន់ច្បាស់ថាតើការផ្អាកដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីឆ្នាំ២០១២នោះ​ ឥឡូវនេះត្រូវបានដក​ចេញ​ជាផ្លូវការឬយ៉ាងណា។

ដីសម្បទានសេដ្ឋកិច្ចផ្តល់កិច្ច​សន្យា​ជួលរយៈពេលវែងសម្រាប់វិស័យកសិឧស្សាហកម្ម ហើយ​តម្រូវឱ្យមានការវាយតម្លៃផលប៉ះពាល់បរិស្ថាន និងសង្គមដោយ​ស្របច្បាប់​ មុនពេល​ការ​អភិវឌ្ឍន៍​ណាមួយអាចចាប់ផ្តើមបាន។

ដីសម្បទានសេដ្ឋកិច្ចដែលគេបាន​ដឹង​ចុងក្រោយត្រូវបានផ្តល់នៅក្នុងឆ្នាំ២០១៤ ហើយតាម​សេចក្តី​រាយការណ៍ថា ត្រូវ​បានចេញដោយសារតែពាក្យសុំធ្វើ​ឡើង​មុន​ពេល​មាន​ការ​សម្រេច​ផ្អាក​ នេះ​បើយោងតាមអង្គការសិទ្ធិមនុស្ស លីកាដូ ដែលបានចេញផ្សាយ​ព័ត៌មានជាលើក​ដំបូងអំពី ELC ថ្មីនៅក្នុងសេចក្តីថ្លែងការណ៍មួយកាលពីថ្ងៃចន្ទ។

ដីសម្បទានសេដ្ឋកិច្ចថ្មីត្រូវបានអនុម័តដោយលិខិតរបស់ទីស្តីការគណៈរដ្ឋមន្ត្រីចុះថ្ងៃទី១១ ខែមីនា ឆ្នាំ២០២២ ដោយផ្ទេរដីចំនួន ៩ ៧៨៨ហិកតាក្នុងខេត្តស្ទឹងត្រែងទៅឱ្យក្រុមហ៊ុនកូរ៉េ Horizon Agriculture Development Co., Ltd។

ទីស្តីការបានបញ្ជាឱ្យក្រសួងកសិកម្ម រុក្ខាប្រមាញ់ និងនេសាទ (MAFF) បំប្លែងដីទៅជា ELC ជាមួយនឹងកិច្ចសន្យាជួលរយៈពេល៥០ឆ្នាំ ដែលចុះហត្ថលេខាដោយរដ្ឋលេខាធិការ ប៊ិន ប៊ុនឆាត ។ លោក​ ប៊ិន ប៊ុនឆាត មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ។

ទីស្តីការ​បានបញ្ជាក់ថា ក្នុងការផ្តល់ដីសម្បទានសេដ្ឋកិច្ចដល់ក្រុមហ៊ុន Horizon ទីស្តីការ​ «លើកលែងពន្ធ និងកាតព្វកិច្ចទាំងអស់ ដើម្បីបញ្ចប់វិវាទ និងបញ្ហាកន្លងមក»ដោយ​មិន​បានបញ្ជាក់បន្ថែម នេះបើយោងតាមការបកប្រែក្រៅផ្លូវការនៃលិខិតនេះ​ដោយខេមបូចា។

ប៉ុន្តែ​លិខិត​នោះ​ក៏​អនុញ្ញាត​ឱ្យ​ក្រុមហ៊ុន Horizon ផ្ទេរ​ដី​ទៅ​ឱ្យក្រុមហ៊ុន​ខ្មែរ​មួយ​ឈ្មោះ T.S.M.W. Co., Ltd ដែលឯកសាររដ្ឋាភិបាលជាបន្តបន្ទាប់បង្ហាញថា ទំនង​ជា​ក្រុមហ៊ុន​កំពុងអភិវឌ្ឍជាក់ស្តែង​លើ​ដីសម្បទាន​សេដ្ឋកិច្ច​នោះ​។

ក្នុងរយៈពេលមួយសប្តាហ៍បន្ទាប់​ពី​មាន​លិខិតរបស់ទីស្តីការគណៈរដ្ឋមន្ត្រី លោក វេង សាខុន ដែល​កាល​នោះ ​គឺជា​រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបាន​ចុះហត្ថលេខា​លើ​ឯកសារដោយ​យល់​ព្រម​នឹង​គម្រោងរបស់​ក្រុម​ហ៊ុន​ T.S.M.W. ​ឈូស​ឆាយ​ដី សាងសង់​កំពង់​ផែ​សាឡាង​តាម​ដង​ទន្លេ និង​សាងសង់​ផ្លូវ​ចូល​ដី​សម្បទាន​សេដ្ឋកិច្ច​របស់​ខ្លួន។

ឯកសារ​នេះ​បញ្ជាក់​ថា ក្រុមហ៊ុន​នឹង​ធ្វើ​ប្រតិបត្តិការ​នៅ​ទូទាំង​ឃុំ​ចំនួន៥ ក្នុង​ស្រុក​ចំនួន៣ គឺ​ស្រុក​បូរីអូរស្វាយ​សែន​ជ័យ ស្រុក​សៀម​ប៉ាង និង​ស្រុក​សេសាន។ រដ្ឋបាលព្រៃឈើក៏​បាន​លើក​ឡើងអំពី ELC ដែលមាន​ទំនាក់ទំនង​ជាមួយ T.S.M.W. នៅក្នុងឯកសារដែល​បានចេញ​ផ្សាយកាលពីខែកក្កដា។

លោកស្រី ណាលី ពីឡូក​ នាយិកាទទួលកិច្ចការក្រៅតំបន់នៃ​អង្គការ លីកាដូ មាន​ប្រសាសន៍​ថា៖ «រដ្ឋាភិបាលគួរតែផ្តល់ព័ត៌មានបន្ថែមអំពីអ្វីដែលហាក់ដូចជាការកែប្រែ​នូវ​សេចក្តី​សម្រេច​ផ្អាកផ្តល់​ដីសម្បទានសេដ្ឋកិច្ចថ្មី។ ការផ្អាកនេះធ្វើឡើងបន្ទាប់ពីអស់រយៈ​ពេល​ជាច្រើន​ឆ្នាំ​នៃ​វិវាទ​ដីធ្លី និងការដកហូតកម្មសិទ្ធិដែលកើតចេញពីកិច្ច​សន្យា​ជួលទ្រង់​ទ្រាយធំទាំងនេះ ហើយ​ជម្លោះថ្មីនេះបង្ហាញថា បញ្ហាដដែលជាមួយ ELC នៅតែមាន»

ដីសម្បទានសេដ្ឋកិច្ចជាង២២០​កន្លែង​គ្រប​ដណ្តប់​លើផ្ទៃដីជាង២លានហិកតាត្រូវបានផ្តល់​តាំងពីទសវត្សរ៍ឆ្នាំ១៩៩០ ហើយដីសម្បទានរងការរិះគន់យ៉ាងខ្លាំងពីអង្គការ​សិទ្ធិមនុស្ស​ចំពោះការបណ្តេញចេញទ្រង់ទ្រាយ​ធំ​ ការកាប់បំផ្លាញព្រៃឈើ និងការរំលោភសិទ្ធិ។

លោក ទិត្យ សុធា អ្នកនាំពាក្យទីស្តីការគណៈរដ្ឋមន្ត្រីមានប្រសាសន៍ថា លោកមិន​អាចធ្វើ​អត្ថាធិប្បាយលើការសម្រេច​លើ ELC បានទេ ដោយសារលោកមិនមានឯកសារពាក់​ព័ន្ធ។ នៅ​ពេល​អ្នក​យក​ព័ត៌មានខេមបូចា​សុំ​ចែក​រំលែក​ឯកសារ​ដូច​ជា​ លិខិត​របស់​​ទីស្តីការ​គណៈរដ្ឋមន្ត្រី​ដែល​យល់​ព្រម​ផ្តល់​​ដីសម្បទាន​​សេដ្ឋកិច្ច​ជូន​​ លោក សុធា ថ្លែង​ថា ​លោក​មិន​ចង់មើល​ឯកសារ​ណា​មួយ​នោះ​ទេ។

លោក សុធា បាន​មាន​ប្រសាសន៍​ថា៖ «ឯកសារ​ទាំង​នេះ ត្រូវ​បាន​ថ្នាក់​​ដឹក​នាំ​សម្រេចហើយ ​ហើយ ដូច្នេះ​ខ្ញុំ​មិន​អាច​ធ្វើ​អត្ថាធិប្បាយ​បន្ថែមលើ​ឯកសារនេះទេ ។ ប្អូន​មានឯកសារ ដូច្នេះប្អូន​អាចយកតាមឯកសារហ្នឹងទៅបានហើយ​ វា​គ្រប់គ្រាន់ហើយ»

បន្ទាប់មកលោក​បានទទួល និងអាន ប៉ុន្តែមិនឆ្លើយតប។ សំណួរបន្ថែមដែលបានផ្ញើទៅកាន់ Telegram របស់គាត់ ដូចជាថា ហេតុអ្វីបានជាទីស្តីការគណៈរដ្ឋមន្ត្រីមិនផ្សព្វផ្សាយជា សាធារណៈ​អំពី ELC មុនពេលសេចក្តីប្រកាសព័ត៌មានរបស់អង្គការ លីកាដូ។

នៅ​ពេល​សួរនាំ​​អំពី​សម្បទាន​ដីសម្បទាន​សេដ្ឋកិច្ច​ថ្មី រដ្ឋលេខាធិការនៃ​ទីស្តីការ​គណៈរដ្ឋមន្ត្រី​ម្នាក់​ទៀតគឺ​លោក សយ សុខា​ មាន​ប្រសាសន៍​ថា៖ «ខ្ញុំ​មិន​ដឹង​អំពី​រឿង​នេះ​ទេ។ សូម​សួរ​អ្នក​ទទួល​ខុស​ត្រូវ»

នៅក្នុងឯកសារចុះខែកញ្ញា ឆ្នាំ២០២២ ក្រសួងបរិស្ថានបានបញ្ជាក់ថា ខ្លួននឹងធ្វើការវាស់​វែង​ផ្ទៃដីចំនួន ៥ ៦០២​ហិកតា សម្រាប់ក្រុមហ៊ុន​ Horizon​ Agriculture Development នៅខាង ក្នុងច្រករបៀងជីវចម្រុះចម្រោះឦសាន ដែលជាតំបន់ការពារ​ដែលគ្រប់គ្រង​ដោយ​ក្រសួង​បរិស្ថាន​ក្នុងខេត្តស្ទឹងត្រែង។

លោក សាយ សំអាល់ រដ្ឋមន្ត្រីក្រសួងបរិស្ថាន​ បានបដិសេធមិនធ្វើអត្ថាធិប្បាយទេ ដោយលោកបានបង្វែរ​សំណួរ​ទៅកាន់លោក នេត្រ ភក្ត្រា អ្នកនាំពាក្យក្រសួងបរិស្ថាន​ ដែលបានទទួលស្គាល់ថា ក្រសួងបានបញ្ចប់​ការវាស់វែងដីរួចរាល់ហើយ ប៉ុន្តែមិនបាន​ឆ្លើយតបទៅនឹងសំណួរបន្ទាប់​នោះទេ។

លោក ភក្ត្រា បានមានប្រសាសន៍ថា៖ «ផ្ទៃដីនេះគឺជាផ្ទៃដីស្ថិតក្រោមការគ្រប់គ្រង​របស់​ក្រសួងកសិកម្ម រុក្ខប្រមាញ់ និងនេសាទ ហើយ​ក្រសួងបរិស្ថានបានប្រគល់​ជូន​ក្រសួង​កសិកម្មគ្រប់គ្រងវិញក្រោយពីបានពិនិត្យ និងផ្ទៀងផ្ទាត់ព្រំដីរួចរាល់»

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបង្វែរសំ​ណួរ​ទៅកាន់អ្នកនាំពាក្យរបស់លោកគឺ​កញ្ញា​ អ៊ឹម រចនា ដែលទទួលស្គាល់ថា បានទទួល​សំណួររបស់អ្នកសារព័ត៌មាន ប៉ុន្តែមិនបានផ្តល់ការឆ្លើយតបមុនការចុះផ្សាយនោះទេ។

ប៉ុន្តែកញ្ញា អ៊ឹម រចនា បានឆ្លើយតបជាមួយខេមបូចា កាលពីថ្ងៃអង្គារ ថា មែនទែនទៅ ករណី ដែលអង្គការ លីកាដូ បានលើក​ឡើង​តាមរយៈសេចក្ដីថ្លែងការណ៍ចុះថ្ងៃទី១៦ ខែមករានេះ ពុំមែនជាការ​ផ្ដល់ដី​សម្បទាន​សេដ្ឋកិច្ច​ថ្មីនោះទេ។ វាគឺជាការសងត្រឡប់ទៅឱ្យក្រុមហ៊ុន ហឺរ៉ាយហ្សិន ដែលធ្លាប់​បាន​ទទួល​ការផ្ដល់​ដីសម្បទានសេដ្ឋកិច្ចក្នុងខេត្តក្រចេះ តាំងពីឆ្នាំ ២០១០ តែត្រូវបានកាត់ជូន​ប្រជាពលរដ្ឋ​វិញ​ក្នុងឆ្នាំ២០១៤។​ រដ្ឋាភិបាលសម្រេចសងត្រឡប់​ទៅ​ឱ្យក្រុមហ៊ុន ហឺរ៉ាយហ្សិន បន្ទាប់ពី​វាយ​តម្លៃនិងរកឃើញអំពីផល​ប៉ះពាល់ចំពោះ​ក្រុមហ៊ុន។

កញ្ញា អ៊ឹម រចនា បញ្ជាក់ថា៖ «ក្រុមហ៊ុនហឺរ៉ាយហ្សិន បានផ្ទេរដីសម្បទាន​ដែលខ្លួនទទួល​បានទៅឱ្យក្រុមហ៊ុន ធី.អេស.អិម។ ការសម្រេចផ្អាកការផ្ដល់ដីសម្បទានសេដ្ឋកិច្ច​ពី​សំណាក់រាជរដ្ឋាភិបាលកម្ពុជាកាលពីឆ្នាំ២០១២ នៅជាធរមាន ពុំមានការផ្លាស់ប្ដូរទេ»។ កញ្ញាបន្តថា៖ «បច្ចុប្បន្ន មានក្រុមហ៊ុនចំនួន២២៩ក្រុមហ៊ុន ដែលកំពុងធ្វើអភិវឌ្ឍ​សម្បទាន​សេដ្ឋកិច្ចដែលទទួលបានពីរាជរដ្ឋាភិបាលកម្ពុជា»

លោក វេង សាខុន ដែលកាលនោះជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាន​ចុះហត្ថលេខាលើការបំប្លែងដីទំហំ ៥ ៦០២ហិកតា ទៅជាដីសម្បទានសេដ្ឋកិច្ច កាល​ពីថ្ងៃ​ទី​១៧ ខែមីនានោះ​ បានដាក់​ទូរសព្ទ​ភ្លាមៗ នៅពេលអ្នកសារ​ព័ត៌មានទូរសព្ទទៅលោក។ លោក​មិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​បន្ថែម​ទៀត​ទេ។

កង្វះ​ការ​ផ្តល់​ព័ត៌មាពី​ក្រសួងពាក់ព័ន្ធដែលទទួល​ខុសត្រូវ​លើ​ ELC ថ្មី កើតឡើងបន្ទាប់​ពី​លោកនាយករដ្ឋមន្ត្រី ហ៊ុន សែន ថ្មីៗនេះបានណែនាំដល់មន្ត្រីរដ្ឋាភិបាល «កុំចាត់ទុក​អ្នកសារព័ត៌មានជាសត្រូវ»

ប្រជាពលរដ្ឋ​នៅ​ភូមិ​អ៊ី​ប៊ូ ឃុំ​អូរ​ស្វាយ និយាយថា ពួកគេ​កំពុង​រង​ផលប៉ះពាល់​ពី​ដី​សម្បទាន​សេដ្ឋកិច្ចនេះ​ ហើយ​បាន​ព្យាយាម​បញ្ឈប់​ក្រុមហ៊ុន​មិន​ឱ្យ​បំផ្លាញ​ព្រៃ​សហគមន៍ និង​ដីស្រែ​ចម្ការ​។

អង្គការលីកាដូ បានរាយការណ៍ថា ប្រជាពលរដ្ឋមិនត្រូវបានជូនដំណឹងអំពីប្រតិបត្តិការ​របស់​ក្រុមហ៊ុន T.S.M.W. ជាក្រុមហ៊ុនសាងសង់ផ្លូវទទឹង​ទំហំ៥០ម៉ែត្រចូល​​ទៅដីសម្បទាននោះទេ។ ក្រុមហ៊ុន​ត្រូវ​បាន​តម្រូវ​ឱ្យ​ធ្វើ​ការ​វាយ​តម្លៃ​ផល​ប៉ះពាល់​សង្គម​បរិស្ថាន​ក្នុង​រយៈពេល​ប្រាំមួយ​ខែ​ នេះ​បើ​យោង​តាម​លិខិត​របស់​ទីស្តីការ​គណៈរដ្ឋមន្ត្រី។

ក្រុមហ៊ុន Horizon ហាក់ដូចជាមិនដំណើរការយ៉ាងសកម្មនោះ​ទេ ទោះបីជាទទួលបានដី​សម្បទាន​សេដ្ឋកិច្ច​ពីដំបូងក៏ដោយ។

លោក គង់ វុទ្ធី ប្រធាន​សមាគម​ការពារ​ព្រៃឈើ​សហគមន៍អូរស្វាយ​បាន​ថ្លែង​ថា ក្រុមហ៊ុន​មួយ​ដែល​លោក​មិន​ស្គាល់​ឈ្មោះ​​បាន​ចាប់​ផ្តើម​ឈូស​ឆាយ​ដី​ព្រៃ​នៅ​ចុង​ឆ្នាំ​២០២២។

លោក វុទ្ធី បន្ត​ថា បច្ចុប្បន្ន​ក្រុមហ៊ុន​បាន​ឈួសឆាយដីព្រៃជាង ១ ៧០០ហិកតា ដែល​ប៉ះពាល់​ដល់​ប្រជាពលរដ្ឋ​ជាង៦០គ្រួសារ។ រូបភាពពីផ្កាយរណបបង្ហាញព្រៃឈើមួយ​ផ្នែកធំៗ​នៅក្នុង​សម្បទានដីសេដ្ឋកិច្ច​ត្រូវបានគេឈូសឆាយ។

លោក វុទ្ធី បាននិយាយ​ថា៖ «យើង​គ្រាន់តែឃើញមាន​កូន ឈើ​​នៅ​កសិដ្ឋាន​ក្រុមហ៊ុន ដូចជា​ដើមព្រីង ប៉ុន្តែ​យើង​មិន​ដឹង​ថា ​ក្រុមហ៊ុន​ធ្វើ​អ្វី​នៅ​លើ​ដី​នោះ​ទេ»

លោក​បាន​បន្ថែមថា៖ «ប្រជាជន​គ្រោង​​ដាក់​ញត្តិ​ទៅ​សម្តេច​ [ហ៊ុន សែន] ប៉ុន្តែ​រហូត​មក​ដល់​ពេល​នេះ​មិន​ទាន់​បាន​ដាក់​​ទេ។ ប្រជាពលរដ្ឋ​បាន​ប្តឹង​ទៅ​អាជ្ញាធរ​ឃុំ​ឱ្យ​ជួយ​ដោះស្រាយបញ្ហា​ ប៉ុន្តែ​ឃុំ​បាន​បញ្ជូន [​បណ្ដឹង​] ទៅ​ស្រុក ហើយ​បន្ត​ទៅ​អាជ្ញាធរ​ខេត្ត ប៉ុន្តែ​រហូត​មក​ដល់​ពេល​នេះ​នៅ​មិន​ទាន់​មាន​ដំណោះស្រាយ​នៅឡើយ​»

លោក ស្វាយ សំអ៊ាង អភិបាល​ខេត្ត​ស្ទឹងត្រែងមិន​អាច​ទាក់​ទង​សុំ​ការ​អត្ថាធិប្បាយ​បាន​ទេ ហើយ​លោក ប៉ែន លីណាត អភិបាល​រង​ខេត្ត​ស្ទឹងត្រែង បាន​មាន​ប្រសាសន៍​ថា៖ «ខ្ញុំ​មិន​ដឹង​អំពី​ករណី​នេះ​ទេ ព្រោះ​ខ្ញុំ​ទើប​តែ​​​ផ្លាស់​មកពី​ខេត្ត​ក្រចេះ»

លោក ព្រំ លេខ អាយុ៦០ឆ្នាំ ជា​ប្រជាពលរដ្ឋ​នៅភូមិអ៊ីប៊ូ បានឱ្យដឹងថា ក្រុមហ៊ុនមួយ​បាន​ចាប់​ផ្តើមរាន​ដីនៅទីនោះកាលពី​ខែវិច្ឆិកា ដែលនាំឱ្យប្រជាពលរដ្ឋព្យាយាមបញ្ឈប់​សកម្មភាព​របស់ក្រុមហ៊ុន។

លោក​បាន​បញ្ជាក់ថា៖ «យើង​មិន​ស្គាល់​ឈ្មោះ​ក្រុមហ៊ុន​ទេ ក្រុមហ៊ុន​បាន​ឈូស​ឆាយ​ដី​ព្រៃ ហើយ​យើង​បាន​បញ្ឈប់​ពួក​គេ​នៅ​ពេល​ដែលពួក​គេ​រំកិល​មក​រក​​ដី​សហគមន៍។ ពេល​យើង​រារាំង​មិន​ឱ្យ​ពួក​គេ​កាប់​រាន​ព្រៃ ក្រុមហ៊ុន​បាន​បង្វែរ​​ទៅ​កន្លែង​ផ្សេង ធ្វើ​ឱ្យប៉ះពាល់​ដល់​ដី​ស្រែ​ចម្ការ​របស់​ពលរដ្ឋ​កាន់​តែ​ច្រើន»

ក្រសួងពាណិជ្ជកម្មបានចុះបញ្ជី​ក្រុមហ៊ុន T.S.M.W. ដោយ​ដាក់​​ស្ត្រី​វ័យក្មេងម្នាក់ឈ្មោះ តាង សៀកមុំ ជាអតីតប្រធាន T.S.M.W. ប៉ុន្តែនាងបានចាកចេញពីតំ​ណែង​នេះ កាលពីខែវិច្ឆិកា ឆ្នាំ២០១៩។ នាងបានបដិសេធមិនធ្វើអត្ថាធិប្បាយ ចំណែក​​លោក សូ សារ៉ន ជា​ប្រធាន​បច្ចុប្បន្នរបស់​ T.S.M.W. មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ។

ក្រុមហ៊ុន Horizon Agriculture Development បានចុះបញ្ជីលោក Lim Joo Heon ជាប្រធាន និងលោក Wang Pan Sheng ជានាយក នេះបើយោងតាមព័ត៌មាន​របស់​ក្រសួងពាណិជ្ជកម្ម។ ក្រុមហ៊ុនដែលមានមូលដ្ឋាននៅទីក្រុងហុងកុងឈ្មោះ​ GBI International Limited ត្រូវបានចុះ​បញ្ជីជា​ម្ចាស់​ភាគហ៊ុន​មួយ។ ក្រុមហ៊ុន​ទាំង​ពីរ​​មិន​អាច​ទាក់​ទង​សុំ​​ការ​ធ្វើ​អត្ថាធិប្បាយ​បាន​ទេ ហើយ​អ៊ីមែល​ដែល​បាន​ផ្ញើ​ទៅ​អាសយដ្ឋាន​អ៊ីមែល​ដែល​បាន​ចុះបញ្ជី​របស់​ក្រុមហ៊ុន​ក៏មិន​មាន​ការ​ឆ្លើយ​តបដែរ​។

ក្រុមហ៊ុន Horizon បានទទួលដីសម្បទាន​​សេដ្ឋកិច្ច​នៅខេត្តក្រចេះក្នុងឆ្នាំ២០១០ ដែលបង្កឱ្យមានជម្លោះជាមួយប្រជាពលរដ្ឋរាប់រយគ្រួសារ។ យោង​តាម​អង្គការ​លីកាដូ​បាន​ឱ្យ​ដឹង​ថា ដី​សម្បទាន​សេដ្ឋកិច្ច​របស់​ក្រុមហ៊ុន​នេះ ត្រូវ​បាន​លុបចោល​​វិញ​​កាល​ពី​ឆ្នាំ២០១៤ ដោយសារ​មិន​បាន​អភិវឌ្ឍ​ដី។

លោក ព្រំ លេខ ជា​កសិករនៅ​​ភូមិអ៊ីប៊ូ បាន​បន្ត​ថា ក្រុមហ៊ុន​បាន​និង​កំពុង​បង្ក​ផល​ប៉ះ​ពាល់​ដល់​ដីស្រែ និង​ចម្ការ​របស់​អ្នក​ភូមិ។ ក្រុមហ៊ុន​ក៏​បាន​យក​កូន​ភ្នំ​មួយ​ដែល​អ្នក​ភូមិ​ប្រើប្រាស់ ​ដើម្បី​គេច​ពី​ទឹក​ជំនន់​អំឡុង​​រដូវ​វស្សាផងដែរ។

លោក ព្រំ លេខ បារម្ភ​ថា កសិដ្ឋាន​របស់​លោក​​នឹង​ត្រូវ​បាត់បង់​ឆាប់ៗ​នេះ «ប្រសិន​បើ​ក្រុមហ៊ុន​នៅ​តែ​បន្ត​ឈូស​ឆាយ។ ចម្ការ​របស់​ខ្ញុំ​ជាង៥០ភាគរយ​នឹង​ត្រូវ​គេកាត់​យក​»

រាយការណ៍បន្ថែម​ដោយ​ សុវណ្ណ ស្រីពេជ្រ

ប្រែសម្រួលពីអត្ថបទភាសាអង់គ្លេស៖ Government Approves New Economic Land Concession Despite Moratorium, Conflict Ensues

944 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម