រដ្ឋាភិបាលចាប់ផ្ដើមចែកស្បៀង ប៉ុន្តែកន្លែងលក់ម្ហូបត្រូវបិទ ដែលធ្វើឲ្យពលរដ្ឋក្នុង«តំបន់ក្រហម» បារម្ភកង្វះអាហារ

រថយន្តយោធាដឹកជញ្ជូនស្បៀងអាហារទៅកាន់តំបន់ក្រហមនៅស្ទឹងមានជ័យ ថ្ងៃទី២០ ខែមេសា ឆ្នាំ២០២១។ខេមបូចា/ បញ្ញា ឆព័ណ្ណ
រថយន្តយោធាដឹកជញ្ជូនស្បៀងអាហារទៅកាន់តំបន់ក្រហមនៅស្ទឹងមានជ័យ ថ្ងៃទី២០ ខែមេសា ឆ្នាំ២០២១។ខេមបូចា/បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

កាលពី​ពីរ​សប្ដាហ៍​មុន​កម្មករ​កាត់​ដេរ​ក្នុង​រោងចក្រ ឌីន ហាន ត្រូវបាន​ដាក់​ឲ្យ​ធ្វើ​ចត្តាឡីស័ក បន្ទាប់​ពី​កម្មករ​ជាច្រើន​រយ​នាក់​មាន​វិជ្ជមាន​កូវីដ១៩។ អ្នក​ស្រី​ ឡុង​ សារេម វ័យ​៤២​ឆ្នាំ បាន​ដាក់​ខ្លួន​នៅ​ដោយឡែក ជាមួយ​កូន​ប្រុស​នៅ​ក្នុង​បន្ទប់​ជួល​តូច​មួយ​ក្នុងសង្កាត់​ស្ទឹង​មានជ័យ​៣ ខណ្ឌមានជ័យ និង​បាន​រស់​នៅ​ដោយ​ពឹង​ផ្អែក​លើ​ការ​ទិញ​ម្ហូបអាហារ​លក់​ធូរៗថ្លៃដោយ​អ្នក​លក់​ដូរ​នៅ​ក្បែរ​នោះ។ ប៉ុន្តែ​នៅ​ពេល​ធ្វើចត្តាឡីស័ក​ជិត​បាន​បញ្ចប់ ក្នុងសង្កាត់​ទាំង​មូល​ដែល​អ្នក​ស្រី​រស់​នៅ​ត្រូវ​បាន​ដាក់ជា «តំបន់ក្រហម» ក្នុង​ចំណោម​សង្កាត់ និង​ភូមិ​មួយ​ចំនួន​ទៀត​ក្នុង​រាជធានីភ្នំពេញ។ ការណ៍​នេះ បាន​ធ្វើឲ្យ​វិធានការ​បិទខ្ទប់​ទីក្រុង​កាន់តែ​តឹងរឹង​ជាងមុន​ សូម្បី​កន្លែង​លក់​ម្ហូបអាហារ​ក៏​ត្រូវ​បញ្ជា​ឲ្យ​បិទ ហើយ​អ្នក​ស្រី សារេម និង​អ្នក​ផ្សេង​ទៀត​កំពុង​បារម្ភ​ពី​ការ​ខ្វះ​អាហារ​ហូប​ចុក​។​

អ្នក​ស្រី​បានឲ្យ​ដឹងថា៖ «រាល់ថ្ងៃ ខ្ញុំ​ហូប​បាយកក​សម្រាប់​អាហារ​ពេល​ព្រឹក..ហើយចាប់តាំងពីថ្ងៃទី​១៦ ខែមេសា មក ខ្ញុំ និង​កូន​ប្រុស​ហូប​តែមី ពងទា និង​ត្រីខកំប៉ុង ព្រោះ​ខ្ញុំ​មិន​​អាច​ចេញ​ក្រៅទៅ​ទិញ​អ្វី​ហូប​បាន ពិសេស​ ព្រោះ​យើង​មិ​ន​មាន​ប្រាក់​ទិញ​អាហារល្អៗ»។​

ខណៈពេល​ដែល​កម្ពុជា​កំពុង​ខិត​ខំ​ទប់​ស្កាត់​ការ​ឆ្លង​រាល​ដាលយ៉ាង​លឿន​នៃវីរុសកូវីដ១៩ ក្នុងរាជធានីភ្នំពេញ និង​ក្រុង​តាខ្មៅ ក្នុង​ខេត្ត​កណ្ដាល​ត្រូវ​បាន​បិទខ្ទប់​តាំងពីថ្ងៃទី​១៥ ខែមេសា ហើយ​ការ​រឹតបន្តឹង​មាន​កាន់តែ​ខ្លាំង​គិត​ចាប់​ពី​ចុងសប្ដាហ៍​កន្លង​មក​នេះ។ ប្រជា​ពល​រដ្ឋស្ទើរទាំងអស់​​ក្នុង​ទី​ក្រុង​នៅពេល​នេះ​ត្រូវ​ហាម​ឃាត់ចេញទៅ​ធ្វើ​ការ ឬហាត់ប្រាណក្រៅផ្ទះ ហើយ​មាន​ការ​អនុញ្ញាត​ឲ្យ​ចេញ​តែទៅ​ទិញ​ម្ហូបអាហារចាំបាច់​មួយ​ចំនួន​ប៉ុណ្ណោះ​។​ កាលពី​ថ្ងៃចន្ទ រដ្ឋបាលរាជធានី​ភ្នំពេញ បាន​កំណត់​តំបន់​ចំនួន​ប្រាំពីរ រួម​មាន​សង្កាត់ស្ទឹង​មានជ័យ​១ ស្ទឹង​មានជ័យ​២ និង​ស្ទឹងមានជ័យ​៣ ក្នុង​ខណ្ឌមានជ័យ សង្កាត់ចោម​ចៅ១ ក្នុងខណ្ឌពោធិ៍សែនជ័យ និង​ភូមិ​១៤ ភូមិ១៦  និង​ភូមិ​១៧ ក្នុង​សង្កាត់​បឹង​សាឡាង ខណ្ឌទួល​គោក​ ត្រូវ​បាន​ដាក់ជា​តំបន់​ក្រហម​។ ក្នុង​តំបន់​ទាំង​នេះ កន្លែង​លក់​ម្ហូបអាហារទាំងអស់​ត្រូវ​បាន​បិទ ហើយ​ប្រជា​ពល​រដ្ឋទាំងអស់​មិន​អនុញ្ញាត​ឲ្យ​ចេញ​ក្រៅ​ផ្ទះ​នោះទេ លើ​កលែង​តែ​ករណី​បន្ទាន់​ត្រូវ​ទៅ​មន្ទីរ​ពេទ្យ​។

នៅថ្ងៃអង្គារនេះ អ្នក​លក់ដូរគ្រឿងទេស បន្លែ ត្រីសាច់​នៅ​តាម​ដង​ផ្លូវបាន​ប្រាប់អ្នកស្រី សារេម​ ថា គាត់​ត្រូវផ្អាកលក់​ហើយ ព្រោះ​តែ​អាជ្ញាធរ​មូល​ដ្ឋាន​ប្រាប់​ថាមិន​អាច​លក់ដូរ​នៅ​ក្នុង​តំបន់​ក្រហម​បានទេ​។​

អ្នស្រី សារេម និយាយថា៖ «​ខ្ញុំ ក៏ដូច​ជា​អ្នក​ផ្សេង​ទៀត​ដែល​បាន​ស្នាក់​នៅ​បន្ទប់​ជួលទីនេះ នឹង​ប្រ​ឈម​ការ​ខ្វះខាត​ម្ហូបអាហារ​សម្រាប់​ហូប ពេល​ដែល​គ្មាន​អ្នក​លក់​ម្ហូប ពីព្រោះ​យើង​មិន​អាច​ចេញ​ក្រៅ​ទៅ​ទិញ​បាន​ទេ»។ ដូចទៅ​នឹង​កម្មករ​ផ្សេង​ទៀតដែល​កំពុង​រស់​នៅ​ក្នុងបន្ទប់​ជួល​​​ដែរ អ្នកស្រី សារេម មិន​មាន​ទូទឹក​កក​ផ្ទាល់​ខ្លួន​នោះទេ ដូច្នេះ​អ្នក​ស្រី​បារម្ភ​ពី​ការ​ខ្វះខាតម្ហូបអាហារ​។​

យ៉ាងណា អ្នកស្រី សារេម អាច​ជា​មនុស្ស​មាន​សំណាង​ម្នាក់​ក្នុង​ចំណោម​អ្នក​ផ្សេង​ទៀត​ដែរ។ នៅ​រសៀ​ថ្ងៃអង្គារ អ្នកស្រី​បាន​ទទួល​អំណោយ​ជា​អង្ករ​ចំនួន​២៥គីឡូក្រាម មីមួយកេស និង​ទឹកស៊ីអ៊ីវមួយយួរ និងទឹកត្រី ជា​កញ្ចប់​ជំនួយ​របស់​រដ្ឋាភិបាល ហើយរដ្ឋាភិបាលបានចាត់ឲ្យ​ក្រសួង​ពាណិជ្ជកម្ម​ជា​អ្នក​ផ្គត់​ផ្គង់​ម្ហូបអាហារ​នៅ​តំបន់​ក្រហម​។​

អ្នកខ្លះ​បាន​ឲ្យ​ដឹងដែរថា​ខ្លួន​នៅ​មិន​ទាន់​បាន​ទទួល​អំណោយ​ជា​ម្ហូប​អាហារ​នេះ​នៅ​ឡើយ ហើយ​ក្រុម​សិទ្ធិមនុស្សរិះគន់​លើ​ផែនការ​បន្ទាន់របស់​រដ្ឋាភិបាល​ក្នុង​ការបិទខ្ទប់នេះ ដោយ​ថា​បាន​ធ្វើ​ឲ្យ​ប្រ​ជា​ពល​រដ្ឋ​ជា​ច្រើននៅ​ភ្នំពេញប្រឈម​នឹង​បញ្ហា​ខ្វះស្បៀង​អាហារ​។

អាជ្ញាធរបិទផ្លូវក្នុងសង្កាត់ស្ទឹងមានជ័យ២ ជាទីតាំងកំណត់ថាជាតំបន់ក្រហម ថ្ងៃទី១០ ខែមេសា ឆ្នាំ២០២១។ខេមបូចា/ព្រីង សំរាំង
អាជ្ញាធរបិទផ្លូវក្នុងសង្កាត់ស្ទឹងមានជ័យ២ ជាទីតាំងកំណត់ថាជាតំបន់ក្រហម ថ្ងៃទី១០ ខែមេសា ឆ្នាំ២០២១។ខេមបូចា/ ព្រីង សំរាំង

លោក លី ធា វ័យ​៤២ឆ្នាំ ជាអ្នក​រត់​ម៉ូតូកង់បី និង​រស់​នៅ​បន្ទប់​ជួល​ក្នុង​សង្កាត់​ស្ទឹង​មានជ័យ​៣ ខណ្ឌមានជ័យ លើក​ឡើង​ថា​ តាំង​ពី​មិន​​ទាន់​កំណត់​ជា​តំបន់​ក្រហម លោក​បាន​ជួប​ការ​លំបាក​ក្នុង​ការ​ទិញ​អាហារ​ហូប​ចុក​រួច​ទៅ​ហើយ​។ លោក​ថា ក្នុង​អំឡុង​ពេល​បិទខ្ទប់​ពីរ​បី​ថ្ងៃ​ដំបូង លោក​បានមិត្ត​ភក្តិ​រស់​នៅ​សង្កាត់​ចោម​ចៅ​១ ជា​អ្នក​ទិញ​អាហារ​ហូបចុក​សម្រាប់​លោក ប្រពន្ធ​របស់​លោក និង​កូន​ប្រុស​ពីរ​នាក់​ ប៉ុន្តែ​ឥលូវ​នេះ តំបន់​ដែល​មិត្ត​ភក្តិ​លោក​កំពុង​រស់​នៅ​ក៏​ស្ថិត​ក្នុង​តំបន់​ក្រហម​ដូច​គ្នា​។

លោក​បន្ថែមថា៖ «​ខ្ញុំ​ស្នើ​ទៅ​អាជ្ញាធរ​ សូមមេត្តា​​អនុញ្ញាត​​ឲ្យ​មាន​ការ​លក់​ដូរ​ម្ហូប​អាហារ​ និង​បន្លែ ក្នុង​តំបន់​ក្រហម»

លោក ធា បន្តថា លោក និង​គ្រួសារមិន​មាន​ប្រាក់​គ្រប់​គ្រាន់​ដើម្បី​ទិញ​ម្ហូបអាហារ​ឲ្យ​បាន​គ្រប់​គ្រាន់​សម្រាប់​ពេលបិទខ្ទប់​នោះទេ​ ដោយ​ថា​ជីវភាព​របស់​លោក​សព្វ​ថ្ងៃ​ពឹង​លើ​ការ​រត់​កង់​បី​។​

លោក​បន្តថា៖ «​ខ្ញុំ​គិត​ថា​បើ​អាជ្ញាធរ​មិន​ផ្ដល់ជាអំណោយ ឬ​ម្ហូបអាហារទេ​ គ្រួសារ​របស់​ខ្ញុំ​នឹង​ប្រឈម​នឹង​ការខ្វះខាត​អាហារ ព្រោះថា​អាហារ​របស់​យើង​អាច​មាន​ត្រឹម​តែមួយ​សប្ដាហ៍​ទៀតប៉ុណ្ណោះ»។​

តាម​រយៈវីដេអូផ្សាយ​ផ្ទាល់​​លើសារព័ត៌មាន​ Fresh News ​កាលពី​រសៀល​ថ្ងៃអង្គារ​ នគរបាល​រាជធានី​ភ្នំពេញ​មាន​ស្ពាយ​កាំភ្លើង និង​កាន់​រំពាត់​ផង ដើរ​ពី​ផ្ទះ​មួយ​ទៅ​ផ្ទះ​មួយ​ក្នុង​តំបន់​ក្រហម និង​ស្រែក​ប្រាប់​ពល​រដ្ឋ​ឲ្យ​នៅ​ក្នុង​ផ្ទះ​។​

លោក ឌី រ័ត្នខេមរុណ អភិបាល​រង​ខណ្ឌមានជ័យ មាន​ប្រសាសន៍ថា​ កន្លែង​លក់​ម្ហូប​អាហារ​ក៏​ត្រូវ​បិទ​ដូច​នឹង​មុខរបរ​ផ្សេង​ទៀត​ដែរ ដើម្បី​ទប់​ស្កាត់​ការ​រាល​ដាល​វីរុសកូវីដ១៩ និង​​ថា​រដ្ឋាភិបាល​​នឹ​ង​ចែក​ម្ហូប​អាហារ​ដល់​ប្រ​ជា​ពល​រដ្ឋ​ដែល​ត្រូវ​ការ​ចាំបាច់​។​​

លោក​បន្ថែមថា៖ «ថ្ងៃនេះ អាជ្ញាធរ​បាន​ចុះទៅចែក​អំណោច​ដល់​ប្រ​ជាពល​រដ្ឋ​ចំនួន​ ២ ០០០​គ្រួសារ ក្នុង​សង្កាត់​ស្ទឹង​មានជ័យ​៣»។ ប៉ុន្តែ​លោក​បាន​បដិសេធពន្យល់​លម្អិត​ពី​ការ​ចែក​អំណោយ​នៅ​ថ្ងៃខាងមុខ ឬសប្ដាហ៍​ខាង​មុខ​ទៀត​។​

ទាំងអភិបាក​រាជធានីភ្នំពេញ លោក ឃួង ស្រេង និង​អ្នក​នាំពាក្យ​សាលារាជធានី លោក ម៉េត មាសភក្ដី មិន​អាចទាក់ទង​សុំ​ការ​អត្ថាធិប្បាយ​បាន​ទេ​កាលពី​ថ្ងៃអង្គារ​។​

ទីភ្នាក់​ងារសារព័ត៌មានជាតិ​កម្ពុជា ហៅកាត់​ថា​AKP​ បាន​ផ្សាយ​រូប​ថត​ជា​ច្រើន​សន្លឹក​បង្ហាញពី​រថយន្ត​យោធា​ជា​ច្រើន​គ្រឿង​ត្រូវ​បាន​រៀប​ចំ​ដឹក​ជញ្ជូន​ស្បៀងអាហារ​សម្រាប់​ចែក​ចាយ​ដល់​ជនរងគ្រោះ​ដោយ​សារ​ការ​បិទខ្ទប់នេះ​។​​

នៅ​លើ​ទំព័រហ្វេស​ប៊ុក​របស់​ខ្លួន សាលារាជធានីភ្នំពេញ បាន​ប្រកាស​ថា​អភិបាល​រាជធានី​បាន​ចុះ​ទៅ​ចែកអំណោយ​ អង្ករ​២៥គីឡូក្រាម មីមួយកេស ទឹកត្រីមួយយួរ និង​ទឹក​ស៊ីអ៊ីវមួយយួរ ទៅ​ដល់​ប្រ​ជាពល​រដ្ឋ​ ១ ០០០គ្រួសារ​ក្នុង​ភូមិ​ដំណាក់ធំ២ និង​ភូមិ​ដំណាក់ធំ៣ ក្នុង​សង្កាត់ស្ទឹងមានជ័យ​៣ ខណ្ឌមានជ័យ​។​

ប្រភព​ដដែល ក៏​បាន​ផ្សាយ​ថា​ លោកស្រីឧបនាយករដ្ឋមន្ត្រី ម៉ែន សំអន ក៏​បាន​ដឹក​នាំ​មន្ត្រី​រដ្ឋាភិបាល​ចុះ​ចែក​ស្បៀងអាហារ​ដល់​ប្រ​ជា​ពល​រដ្ឋ​​៦០០គ្រួសារ​ក្នុង​ភូមិ១៤ ភូមិ​១៦ និង​ភូមិ​១៧ ក្នុង​សង្កាត់​បឹង​សាឡាង ខណ្ឌ​ទួល​គោក​ផង​ដែរ​ កាលពី​ព្រឹក​ថ្ងៃអង្គារ​។​

ប្រជាពលរដ្ឋនៅសង្កាត់បឹងសាឡាង ក្នុងតំបន់ក្រហម បានមកទទួលអំណោយពីរាជរដ្ឋាភិបាល ថ្ងៃទី២០ ខែមេសា ឆ្នាំ២០២១។ រូបភាព៖ ទូរទ្សន៍ជាតិកម្ពុជា

ក្នុង​អំឡុង​ពេល​ផ្ទុះ​រាល​ដាល​កូវីដ​លើក​មុន រដ្ឋាភិបាល​បាន​ប្រកាសផ្ដល់​ជា​ថវិកា​ចំនួន​៣០​ម៉ឺន​រៀល​ដល់​ប្រជាពល​រដ្ឋ​ក្រី​ក្រ​ដែល​ត្រូវ​ធ្វើ​ចត្តាឡីស័ក​ចំនួន​១៤​ថ្ងៃ​។ នៅថ្ងៃទី​៩ ខែមេសា លោក​នាយក​រដ្ឋមន្ត្រី ហ៊ុន សែន បាន​ប្រកាសជាថ្មីអំពីជំនួយ​នេះ ដោយ​ថា​រដ្ឋាភិបាល​ក៏នឹង​អាច​ជួយ​ចេញថ្ងៃ​ទឹក ភ្លើង​​ ក្នុង​កម្រិត​អប្បបរមាចំនួន​ពីរ​ខែ​ទៀត​ផង​។​ ប៉ុន្តែ​ក្នុង​សារ​ជា​សំឡេង​របស់​លោក​នាយក​រដ្ឋមន្ត្រី និង​បាន​ផ្សាយ​លើ​ទំព័រហ្វេសប៊ុក​របស់​លោក​នៅយប់​ថ្ងៃអង្គារ លោក​នាយក​រដ្ឋមន្ត្រី ហ៊ុន សែន ថា​ការ​ផ្ដល់ជា​ថវិកានេះ​មិន​អាច​ធ្វើបាន​ទៀត​ទេ ដោយសារតែ​ចំនួន​មនុស្ស​ក្នុងពេលត្រូវ​បិទខ្ទប់​នេះមាន​ច្រើន​។​

លោក​មាន​ប្រសាសន៍ថា៖ «ថ្ងៃនេះ​មានបង​ប្អូន​មួយ​ចំនួន​បាន​​បង្ហោះតាម​ហ្វេសប៊ុក​ក៏ដូចជា​តវ៉ាជា​មួយ​ក្រុម​អ្នក​ចែកជំនួយ។ ខ្ញុំ​សូម​បងប្អូន​មេត្តាយោគយល់អធ្យាស្រ័យ​ចំពោះការ​លំបាក​របស់​រដ្ឋាភិបាល​ ដែល​មិន​អាច​ផ្ដល់​ប្រាក់​​៣០ម៉ឺនរៀល​ក្នុង​មួយ​គ្រួសារ​ ឬមួយ​នាក់​»។​

លោក​បន្ថែមថា៖ «យើង​ខិត​ខំជំនួយ​វិញ​ដោយ​ផ្គត់​ផ្គង់​ជា​អង្ករ មី ត្រីខ ទឹកត្រី និង​ទឹកស៊ីអ៊ីវជំនួស​វិញ។សូម​បងប្អូន​​យោគយល់ ៣០ម៉ឺន​មិន​ច្រើន​ទេសម្រាប់បងប្អូន​ តែវាធំ​​សម្រាប់​រដ្ឋាភិបាល ដើម្បី​ផ្គត់​ផ្គង់​ទូទាំងរាជធានី​​ភ្នំពេញ»។​

លោក​នាយក​រដ្ឋ​មន្ត្រី​កត់​សម្គាល់ដែរ​ថា​ មន្ត្រី​រដ្ឋាភិបាលជា​ច្រើន​បាន​ជាប់​នៅ​តំបន់បិទខ្ទប់ និង​ធ្វើចត្តាឡីស័ក ដែល​នាំឲ្យ​ការ​ចែក​អំណោយ​មាន​ការពិបាក​។ ប៉ុន្តែ​លោក​ក៏​បាន​ព្រមានដែរ​ថា​ប្រសិនជា​អ្នក​ភូមិ​ទាមទារ​ច្រើន​ពេក ហើយ​ «មិនអាច​សម្របសម្រួល» ជាមួយអាជ្ញាធរ​លើការ​ចែក​អំណោយនេះ លោក​នឹង​ស្នើ​ឲ្យ​អាជ្ញាធរ​បង្វែរ​អំណោយទាំង​នោះទៅ​កន្លែង​ផ្សេង​វិញ។​

លោក​បញ្ជាក់ថា៖ «បើ​សិនជា​បង​ប្អូន​ប្រ​កែ​ប្រកាន់​ដូច្នេះ យើង​ក៏​គ្មានជម្រើស​ណា ក្រៅតែ​ពីចែក​ជូន​អ្នក​ព្រម​ទទួល​យក​តែប៉ុណ្ណោះ»។​

លោក​បន្ថែមទៀតថា៖ «ខ្ញុំ​បាន​ទទួលព័ត៌មាន​ ដោយ​មានការ​ក្ដុក​ក្ដួល​ក្នុង​ចិត្ត​ថា​​បងប្អូន​មួយ​ចំនួន​បដិសេធមិនទទួលយកជំនួយ​ ប្រសិន​បើ​បងប្អូនបដិសេធ​ ខ្ញុំ​ក៏​សូម​ស្នើ​ឲ្យ​អ្នក​ផ្ដល់ជំនួយ​ទាំង​នោះ ដកថយពី​តំបន់នោះ​ទៅ​ចែក​ជូនអ្នក​នៅ​តំបន់​ផ្សេង​ដែល​គេ​ត្រូវការ»។​

លោក​បានលើកឡើង​ថា៖ «​ខ្ញុំសូម​បញ្ជាក់ជូន​បងប្អូនប្រជា​ពល​រដ្ឋ​​​ថា​ បើសិនជា​ត្រឹម​១ម៉ឺន ទៅ​២ម៉ឺន​គ្រួសារ វាមិនលំបាក​​ទេ ប៉ុន្តែឥលូវនេះយើង​មាន​រាប់សិបម៉ឺន​​គ្រួសារ​»។​​

លោកបន្តថា៖ «​យើង​បាន​ចែក​​ជាង​ប្រមាណ​​១ម៉ឺនគ្រួសារ ហើយស្អែក ខាន​ស្អែក​នេះ​ ស្អែក​ប្រហែលជា​ជិត​១ម៉ឺន​គ្រយសារ​ទៀត​ និង​ខាន​ស្អែក​ប្រមានជា​ជាង​២ម៉ឺន​គ្រួសារ​»។​

ជាមួយ​គ្នា​នោះដែរ លោក​ក៏​បាន​ស្នើ​ឲ្យ​អាជ្ញាធរ​​កុំ​ភ្លេច​គិត​ដល់ព្រះ​សង្ឃ​ក្នុង​អំឡុងពេល​បិទខ្ទប់​នេះ​ដែរ ដោយ​ថា​អាច​ខ្វះខាត​ចង្ហាន់​ដោយ​គ្មាន​អ្នក​យក​ទៅ​ប្រគេន​។​

លោក ​អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ មាន​ប្រ​សាសន៍​ថា វាជា​ការ​ចាំ​បាច់​ណាស់​ដែល​រដ្ឋាភិបាល​ត្រូវ​ពន្លឿន​ការ​ចែក​ស្បៀងអាហារ​ដល់ប្រជា​ពល​រដ្ឋ។

លោក​បន្ថែមថា៖ «វាជារឿងសំខាន់​ណាស់​ដែលទាក់ទង​នឹង​ដំណើរ​ការ​ចែក​ម្ហូបអាហារ​ឲ្យ​បាន​លឿន​តាម​តែអាចធ្វើទៅ​បាន​សម្រាប់​ប្រ​ជា​ពល​រដ្ឋ​កំពុង​ខ្វះស្បៀង​ក្នុង​តំបន់​ក្រហម​»

ចំណែក​លោក មឿន តុលា នាយក​ប្រតិបត្តិអង្គការ​សិទ្ធិការងារ​សង់ត្រាល់​ លើក​ឡើង​ថា​វា​ដូចជាមិន​សូវ​​ទំនង​ទេ​ដែល​ឲ្យ​ក្រសួង​ពាណិជ្ជកម្ម​ជា​អ្នក​សម្របសម្រួល​ក្នុង​ការ​ផ្គត់​ផ្គង់​ស្បៀងអាហារ ហើយ​ថាវាគួរ​តែមានវិធី​ល្អ​ជាង​នេះ ដោយ​រក​វិធី​សុវត្ថិភាព​ដើម្បី​ឲ្យ​អ្នក​លក់​ដូរ​នៅ​បន្ត​ដំណើរ​ការបាន​។​

លោក​បន្ថែមថា៖ «វាជាការ​ល្អ បើ​សិនជា​អាជ្ញាធរ​អាច​កំណត់​ម៉ោង​ឲ្យ​ប្រ​ជាពល​រដ្ឋ​លក់​ម្ហូបអាហារ និង​បន្លែ…​ហើយ​អាជ្ញាធរ​អាច​កំណត់​ចំនួន​មនុស្ស​ចូល​ទិញ ដើម្បី​រក្សាកម្លាត»។​

គិត​ត្រឹ​ម​ថ្ងៃអង្គារ​ចំនួន​អ្នក​ស្លាប់​ដោយ​សារ​កូវីដ១៩ មាន​ចំនួន​៤៩​នាក់ ដែល​អ្នក​ទាំង​នោះ​ជា​អ្នក​ឆ្លង​ក្នុង​ពេល​ការ​ផ្ទុះ​រាលដាល​ថ្មី។ ក្រសួង​សុខាភិបាល​ប្រកាស​ឲ្យ​ដឹង​ដែរថា​ចំនួន​អ្នក​ឆ្លង​ថ្មី​ទាក់ទងនឹង​ព្រឹត្តិការ​ណ៍ ២០កុម្ភៈ មាន​ចំនួន​៦៨៩៩​ករណី នាំ​ឲ្យ​ចំនួន​ឆ្លង​សរុប​មាន​ចំនួន​ ៧​ ៤៤៤​ករណី គិត​តាំងពី​មាន​ការ​ផ្ទុះ​វិបត្តិកូវីដ១៩​ កាលពី​ដើម​ឆ្នាំ​២០២០​មក​។

ប្រែសម្រួលពីអត្ថបទភាសាអង់គ្លេស៖ Gov’t food distribution begins but with food stores closed, ‘red zone’ residents worry about feeding their families

Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »