សមាគមសម្ព័ន្ធអ្នកសារព័ត៌មានកម្ពុជា

តម្លៃប្រេងឥន្ធនៈខ្ពស់ជះឥទ្ធិពលលើវិស័យទេសចរណ៍ដែលកំពុងរងគ្រោះដោយសារវិបត្តិជំងឺកូវីដ១៩

អ្នកដំណើរបរទេសមកដល់ព្រលានយន្តហោះអន្តរជាតិភ្នំពេញ កាលពីថ្ងៃទី២៩ ខែមីនា ឆ្នាំ២០២២។ ខេមបូចា/ ព្រីង សំរាំង
អ្នកដំណើរបរទេសមកដល់ព្រលានយន្តហោះអន្តរជាតិភ្នំពេញ កាលពីថ្ងៃទី២៩ ខែមីនា ឆ្នាំ២០២២។ ខេមបូចា/ ព្រីង សំរាំង

រដ្ឋាភិបាល​កម្ពុជា​បាន​លុបចោល​គ្រប់​បម្រាម​លើ​ការ​ធ្វើ​ដំណើរ​ដោយសារ​ជំងឺ​កូវីដ១៩ ក្នុង​ក្តីសង្ឃឹម​ថា នឹង​អាច​ជំរុញ​ដល់​វិស័យ​ទេសចរណ៍ ដែល​បាន​រង​ការ​ប៉ះពាល់​ខ្លាំង​ដោយសារ​វិបត្តិ​ជំងឺ​នេះ។​ ប៉ុន្តែ​ឥឡូវ​នេះ ទណ្ឌកម្ម​លើ​រុស្ស៊ី និង​តម្លៃ​ប្រេងឥន្ធនៈ​ឡើង​ខ្ពស់​ជា​លទ្ធផល កំពុង​តែ​បង្ក​ជា​បញ្ហា​ចោទ​មក​លើ​ការ​ងើបរើ​នៃ​វិស័យ​ទេសចរណ៍។

​កាល​ពី​ពាក់កណ្តាល​ខែ​មីនា  ក្រសួង​សុខាភិបាល​បាន​ប្រកាស​ថា អ្នក​ដំណើរ​ចូល​មក​កម្ពុជា​មិន​តម្រូវ​ឲ្យ​បង្ហាញ​លទ្ធផល​​តេស្ត​កូវីដ​ដោយម៉ាស៊ីន PCR នោះ​ទេ ក្នុង​ករណី​ដែល​ពួកគេ​មាន​លិខិត​បញ្ជាក់​ពី​ការ​ចាក់វ៉ាក់សាំងពេញលេញ​។ ហើយ​ករណី​ចំនួន​ឆ្លង​ជំងឺ​កូវីដ១៩ កំពុង​ធ្លាក់​ចុះ​ជា​បន្តបន្ទាប់ ដោយ​ក្រសួង​បាន​ប្រកាស​ថា មាន​ករណី​ឆ្លង​ចំនួន​ ៣៩​ប៉ុណ្ណោះ កាល​ពី​ថ្ងៃ​អង្គារ​ និង​មិនមាន​ការ​ស្លាប់​នោះ​ទេ។

ទោះបីជា​មាន​ការ​បន្ធូរបន្ធយ​គោលការណ៍​តម្រូវ​ផ្សេងៗ និង​ចំនួន​ករណី​ឆ្លង​ទាប​ក៏​ដោយ អាជ្ញាធរ​នៅ​ខេត្ត​សៀមរាប ដែល​ជា​គោលដៅ​ទេសចរណ៍​ដ៏​មាន​ប្រជាប្រិយភាព​ជាង​គេ​នៅ​ក្នុង​ប្រទេស និយាយ​ថា សណ្ឋាគារ​ភាគច្រើន​នៅ​តែ​បន្ត​បិទទ្វារ។

អភិបាល​ខេត្ត​សៀមរាប​ លោក ទៀ សីហា ថ្លែង​ថា៖ «[មាន​តែ] ៤០​ភាគរយ​នៃ​សណ្ឋាគារ​ផ្កាយ​ប្រាំ​ប៉ុណ្ណោះ​បាន​បើកទ្វារ​ឡើង​វិញ ហើយ​ភាគច្រើន​កំពុង​ប្រឈម​នឹង​កង្វះខាត​បុគ្គលិក។ បុគ្គលិក​ភាគច្រើន​មក​ពី​ខេត្ត​ផ្សេង​ ហើយ​ពួកគេ​បាន​ចាកចេញ​ពី​សៀមរាប​អំឡុងពេល​ការ​រាតត្បាត​ជំងឺ​កូវីដ១៩ ដូច្នេះ​ហើយ​មាន​ការ​លំបាក​ក្នុង​ការ​ហៅ​ពួកគេ​ត្រឡប់​មក​វិញ»

ប៉ុន្តែ​លោក​សីហា​​បាន​លើកឡើង​ថា អាជីវកម្ម​ធុន​តូច​ជាង​នេះ​ដូចជា ផ្ទះ​សំណាក់​បាន​បើកទ្វារ​ឡើង​វិញ​ទាំងស្រុង ដោយសារ​ការ​ចំណាយ​ទាប និង​ងាយស្រួល​ចាប់ផ្តើម​ដំណើរការ​ឡើង​វិញ។

លោក​បាន​បន្ត​ថា ភោជនីយដ្ឋាន​និង​បៀរហ្គាឌេន​កំពុង​បើក​ដំណើរការ​ឡើង​វិញ​ជា​បន្តបន្ទាប់ ហើយ​រដ្ឋបាល​ខេត្ត​កំពុង​រៀបចំ​ទទួល​អ្នកទេសចរ​អំឡុងពេល​ពិធី​បុណ្យ​ចូលឆ្នាំ​ខ្មែរ​នៅ​ពាក់កណ្តាល​ខែ​មេសា។

បើ​តាម​លោក​សីហា ជើង​ហោះហើរ​ក្នុង​ស្រុក​និង​ពី​ក្រៅ​ប្រទេស​ចូល​មក​ខេត្ត​​សៀមរាប​ក៏​កំពុង​ងើបរើ​ឡើង​វិញ​សន្សឹមៗ​ផង​ដែរ ស្របពេល​អ្វីៗ​កំពុង​ចាប់​ផ្តើម​ដំណើរការ​ឡើង​វិញ។

អ្នកស្រី​ ក្លេស ចិន្តា (Clais Chenda) អនុប្រធាន​សមាគម​សណ្ឋាគារ​នៅ​កម្ពុជា និង​ម្ចាស់​សណ្ឋាគារ​នៅ​ខេត្ត​កែប និង​ខេត្ត​ក្រចេះ​ និយាយ​ថា វិបត្តិ​ជំងឺ​កូវីដ១៩ រយៈពេល​ពីរ​ឆ្នាំ​មក​នេះ​បាន​ធ្វើ​ឲ្យ​វិស័យ​សណ្ឋាគារ​ប្រឈម​នឹង​កង្វះខាត​បុគ្គលិក។

​អ្នកស្រី​បាន​ថ្លែង​ថា៖ «ដំបូង​ យើង​រំពឹង​ថា ជំងឺ​នេះ​វា​អូសបន្លាយ​ពេល​ត្រឹម​ប្រាំ​មួយ​ខែ ឬ​មួយ​ឆ្នាំ​ប៉ុណ្ណោះ។ ប៉ុន្តែ​អ្វីៗ​គឺ​មិន​ដូច​ការ​រំពឹង​ទុក​នោះ​ទេ​ ហើយ​ឥឡូវ​នេះ​ បុគ្គលិក​ភាគច្រើន​រក​បាន​ការងារ​ថ្មី​រួច​ទៅ​ហើយ»

អ្នកស្រី​បាន​លើកឡើង​ថា សណ្ឋាគារ​ទាំង​ពីរ​របស់​អ្នកស្រី​កំពុង​ប្រឈម​នឹង​កង្វះខាត​បុគ្គលិក​ចំនួន ៦០​ភាគរយ ប៉ុន្តែ​ដោយសារ​ចំនួន​ភ្ញៀវ​ទាប សណ្ឋាគារ​នៅ​មាន​លទ្ធភាព​ដំណើរការ។ ប៉ុន្តែ​អ្នកស្រី​ព្រួយបារម្ភ​ថា នៅ​ពេល​​ចំនួន​ការ​កក់បន្ទប់​វិល​មក​រក​ស្ថានភាព​ធម្មតា​ឡើង​វិញ អ្នកស្រី​នឹង​មិនមាន​បុគ្គលិក​គ្រប់គ្រាន់។

​អ្នកស្រី​ព្យាករណ៍​ថា ​ឧបសគ្គ​មួយ​ទៀត​ចំពោះ​ការ​ងើបរើ​ឡើង​វិញ​នូវ​វិស័យ​ទេសចរណ៍​គឺ តម្លៃ​ប្រេង​ឥន្ធនៈ​ឡើង​ខ្ពស់។ លោក​នាយករដ្ឋមន្រ្តី​ហ៊ុន​ សែន ​បាន​ថ្លែង​នៅ​អំឡុងពេល​ពិធី​សម្ពោធអគារ​មន្ទីរពេទ្យ​មិត្តភាព​កម្ពុជា-កូរ៉េ​កាល​ពី​ថ្ងៃ​ចន្ទ​ថា តម្លៃ​ប្រេងឥន្ធនៈ​ខ្ពស់​អាច​ប៉ះពាល់​ដល់​ការ​ចំណាយ​ធ្វើ​ដំណើរ​របស់​ពលរដ្ឋ​អំឡុងពេល​ពិធីបុណ្យ​ចូលឆ្នាំ​ខ្មែរ។

អ្នកស្រី​ចិន្តា ដែល​សណ្ឋាគារ​របស់​អ្នកស្រី​ផ្តល់​ការ​បញ្ចុះ​តម្លៃ​ពិសេស​ដើម្បី​ទាក់ទាញ​ភ្ញៀវទេសចរ​បរទេស យល់ស្រប​ថា ​ដោយ​សារ​តម្លៃ​ប្រេងឥន្ធនៈ​ខ្ពស់​ អ្នកដំណើរ​ទំនង​នឹង​ត្រូវ​ចំណាយ​រហូត​ដល់ ៤០​ភាគរយ​​នៃ​​ការ​ចំណាយសរុប​អំឡុងពេលធ្វើ​ដំណើរកម្សាន្ត។

អ្នក​ដំណើរ​បរទេស​មក​ដល់​ព្រលានយន្តហោះ​អន្តរជាតិ​ភ្នំពេញ​ កាល​ពី​ថ្ងៃ​ទី២៩ ខែ​មីនា ឆ្នាំ​២០២២។ ខេមបូចា/ ព្រីង សំរាំង

យោង​តាម​ទិន្នន័យ​ពី​ក្រសួង​ទេសចរណ៍ កម្ពុជា​ទទួល​ភ្ញៀវទេសចរ​បរទេស​ចំនួន ៤៤.៧៣៤ នាក់​ កាល​ពី​ខែ​មករា ឆ្នាំ​២០២២ បើប្រៀប​ជាមួយ ២០.៥៦៧​នាក់ កាល​ពី​ខែ​មករា ឆ្នាំ​២០២១។ ប៉ុន្តែ​តួលេខ​អំឡុងពេល​វិបត្តិ​ជំងឺ​កូវីដ១៩ ​នេះ​នៅ​មាន​ទាប​ខ្លាំង​ បើប្រៀប​ជាមួយ​នឹង​ភ្ញៀវទេសចរ​បរទេស​ចំនួន ៦.៦​លាន​នាក់ ដែល​បាន​មក​កម្ពុជា កាល​ពី​ឆ្នាំ ២០១៩។

នៅ​ខេត្ត​មួយ​ទៀត​ ដែល​ពឹង​​ផ្អែក​យ៉ាង​ខ្លាំង​លើ​វិស័យ​ទេសចរណ៍ គឺ​ខេត្ត​ព្រះសីហនុ ​ប្រធាន​មន្ទីរ​ទេសចរណ៍​ខេត្ត​លោក តាំង សុជាតិ​គ្រឹស្នា​ បាន​និយាយ​ថា សណ្ឋាគារ​និង​ផ្ទះ​សំណាក់​ប្រមាណ ៧០​ភាគរយ​បាន​បើកទ្វារ​ឡើង​វិញ។

លោក​បាន​ថ្លែង​ថា៖ «យើង​រំពឹង​ថា នឹង​ទទួល​បាន​អ្នក​ទេសចរ​ច្រើន​ជាង​នេះ​អំឡុងពេល​ពិធី​បុណ្យ​ចូល​ឆ្នាំ​ខ្មែរ ប្រសិន​បើ​ស្ថានភាព​ជំងឺ​កូវីដ១៩ នៅ​បន្ត​មាន​ស្ថិរភាព។ ចាប់តាំង​ពី​រដ្ឋាភិបាល​បាន​លុបចោល​តម្រូវ​ការ​ធ្វើ​តេស្ត PCR យើង​បាន​ទទួល​ភ្ញៀវទេសចរ​កាន់​តែ​ច្រើន​ជាង​មុន​ពី​បស្ចឹម​ប្រទេស»

​នៅ​ពេល​មុន​ការ​រាតត្បាត​ជំងឺ​កូវីដ១៩ ខេត្ត​ព្រះសីហនុ​មាន​ជើងហោះហើរ​ចេញចូល​ជា​ប្រចាំ​ ២៩ ក្នុង​មួយ​ថ្ងៃ ដំណើរការ​ដោយ​ក្រុមហ៊ុន​អាកាសចរណ៍​ចំនួន ៣៣។ នា​ពេល​ឥឡូវ​នេះ មាន​តែ​ក្រុមហ៊ុន​អាកាសចរណ៍​តែ​ពីរ​ប៉ុណ្ណោះ​កំពុង​ដំណើរការ និង​មាន​ជើងហោះហើរ​​ចំនួន​បី​ទៅ​ប្រាំ​ក្នុង​មួយ​សប្តាហ៍។

លោក​បាន​ថ្លែង​ថា៖ «ឥឡូវ​នេះ​ យើង​មាន​តែ​ក្រុមហ៊ុន​អាកាសចរណ៍​ចំនួន​ពីរ​ប៉ុណ្ណោះ​ ដែល​គ្រប់គ្រង​លើ​ជើងហោះហើរ​ បី ​ទៅ​ប្រាំ​ជើង ក្នុង​មួយ​សប្តាហ៍ ដែល​ជើង​ហោះហើរ​មួយ​ក្នុង​ចំណោម​នោះ​ភ្ជាប់​ជាមួយ​ខេត្ត ក្វាងចូវ ប្រទេស​ចិន»

លោក ខែក នរិន្ទដា​ មន្ត្រីទំនាក់ទំនង និង​កិច្ច​ការ​​សាធារណៈនៃ​​ក្រុមហ៊ុន​ព្រលានយន្តហោះ​កម្ពុជា និយាយ​ថា លោក​រំពឹង​ក្រុមហ៊ុន​អាកាសចរណ៍​ច្រើន​ជាង​នេះ​នឹង​ចាប់ផ្តើម​ធ្វើការ​ហោះហើរ​ឡើង​វិញ​មក​កាន់​ព្រលាន​យន្តហោះ​អន្តរជាតិ​ទាំង​បី​នៅ​ក្នុង​ប្រទេស បន្ទាប់​ពី​រដ្ឋាភិបាល​បាន​បន្ធូរបន្ធយ​គោលការណ៍​តម្រូវ​ផ្សេងៗ​ពេល​ចូល​មក​កម្ពុជា។

លោក​បាន​ថ្លែង​ថា៖ «ស្រប​ពេល​ប្រទេស​កាន់​តែ​ច្រើន​នៅ​ក្នុង​តំបន់​ក៏​បាន​បន្ធូរបន្ធយ​លើ​ការ​រឹតត្បិត​លើ​ការ​ធ្វើ​ដំណើរ យើង​មាន​ជំនឿ​ថា​ តួលេខ​នឹង​កើន​ឡើង»

លោក​បាន​បន្ត​ថា កាល​ពី​ខែ​កុម្ភៈ មាន​ជើងហោះហើរ​ក្នុង​ស្រុក​និង​អន្តរជាតិ​ជា​មធ្យម​ចំនួន​ ៣៨ ដែល​ភាគច្រើន​គឺ​ ចេញ​ពី​ព្រលានយន្តហោះ​អន្តរជាតិ​ភ្នំពេញ។ ព្រលានយន្តហោះ​ខេត្ត​សៀមរាប​មាន​ក្រុមហ៊ុន​អាកាសចរណ៍​ពីរ​កំពុង​ដំណើរការ​រួម​មាន​ ក្រុមហ៊ុន Singapore Airlines និង​ក្រុមហ៊ុន Thai Smile។ ប៉ុន្តែ​ជើងហោះហើរ​ចេញ​ចូល​ខេត្ត​ព្រះសីហនុ​នៅ​មាន​ទាប​ខ្លាំង​នៅ​ឡើយ ហើយ​ពឹង​ផ្អែក​លើ​ទីផ្សារ​ចិន។

ដំណាល​គ្នា​នេះ​ដែរ វិស័យ​ដឹកជញ្ជូន​និង​អាកាសចរណ៍​កំពុង​តែ​ប្រឈម​នឹង​បញ្ហា​ថ្មី​ផ្សេង​ទៀត​ ក្រោយ​ពី​វិបត្តិ​ជំងឺ​កូវីដ១៩ ដែល​នោះ​គឺ ចំណាយ​ខ្ពស់​ជាងមុន ដោយសារ​តែ​ការ​ដាក់​ទណ្ឌកម្ម​លើ​រុស្ស៊ី បន្ទាប់​ពី​ការ​ចូលលុកលុយ​ប្រទេស​អ៊ុយក្រែន។

លោក​បាន​ថ្លែង​ថា៖ «យើង​ត្រូវ​ការ​ពេលវេលា​ដើម្បី​វាស់វែង​ពី​ផលប៉ះពាល់ និង​ឥទ្ធិពល​នៃ​ជម្លោះ​នោះ​មក​លើ​វិស័យ​ទាំងនោះ​នៅ​លើ​ពិភពលោក ហើយ​ជា​ពិសេស​នៅ​កម្ពុជា»

អ្នកស្រី​ ឆាយ ស៊ីវលីន ប្រធាន​សមាគម​ទីភ្នាក់ងារ​ទេសចរណ៍​កម្ពុជា​ និយាយ​ថា ការ​ឡើង​ថ្លៃ​ប្រេង​ឥន្ធនៈ​នឹង​បង្ក​ជា​ការ​ប៉ះពាល់​លើ​វិស័យ​ទេសចរណ៍។​

​អ្នកស្រី​បាន​ថ្លែង​ថា៖ «ទីភ្នាក់ងារ​ទេសចរណ៍​ខ្លះ​បាន​ផ្តល់​ជា​កញ្ចប់​ដំណើរ​ទេសចរណ៍​បី​ខែ​មុន ឥឡូវ​នេះ​ពួកគេ​កំពុង​ប្រឈម​នឹង​ការ​ខាត​បង់​បន្ថែម ដោយសារ​តម្លៃ​ខ្ពស់​នៃ​ប្រេងឥន្ធនៈ។ អ្នកខ្លះ​ប្រហែល​លុប​ចោល​ផែនការ​ធ្វើ​ដំណើរ​ផង​ដែរ»

ប្រែសម្រួលពីអត្ថបទភាសាអង់គ្លេស៖ High Fuel Prices a Blow to Cambodia’s Covid-hit Tourism Sector

500 views

ព័ត៌មានថ្មីៗ

អត្ថបទពេញនិយម