សមាគមសម្ព័ន្ធអ្នកសារព័ត៌មានកម្ពុជា

លោក ហ៊ុន សែន៖ កម្ពុជាមិនបានចោទអាមេរិកគាំទ្រលោក កឹម សុខា ដើម្បីផ្ដួលរំលំរដ្ឋាភិបាល

នាយករដ្ឋមន្ត្រី ហ៊ុន សែន និងអតីតមេបក្សប្រឆាំង លោក កឹម សុខា ជួបគ្នាក្នុងពិធីបុណ្យសពលោក ហ៊ុន ណេង នៅខេត្តកំពង់ចាម កាលពីថ្ងៃទី៨ ខែឧសភា ឆ្នាំ២០២២។ រូបថតពីផេកក្រសួងព័ត៌មាន
នាយករដ្ឋមន្ត្រី ហ៊ុន សែន និងអតីតមេបក្សប្រឆាំង លោក កឹម សុខា ជួបគ្នាក្នុងពិធីបុណ្យសពលោក ហ៊ុន ណេង នៅខេត្តកំពង់ចាម កាលពីថ្ងៃទី៨ ខែឧសភា ឆ្នាំ២០២២។ រូបថតពីផេកក្រសួងព័ត៌មាន

លោកនាយករដ្ឋមន្ត្រី ហ៊ុន សែនបានបដិសេធថា រាជរដ្ឋាភិបាលកម្ពុជានិងតុលាការ​មិន​បាន​ចោទសហរដ្ឋអាមេរិកគាំទ្រលោក កឹម សុខា ដើម្បីផ្ទួលរំលំរដ្ឋាភិបាលនោះទេ។ ការថ្លែង​បែប​នេះ​ធ្វើឡើងនៅសហរដ្ឋអាមេរិកក្នុងពេលដែល​លោក ហ៊ុន ​សែន ត្រៀមធ្វើជាសហប្រធាន​កិច្ចប្រជុំកំពូលអាស៊ានសហរដ្ឋអាមេរិក។

នៅចំពោះមុខអ្នកគាំទ្ររបស់ខ្លួនក្នុងពិធីជួបជុំជប់លៀងបាយល្ងាចមួយកាល​ពីយប់ថ្ងៃទី១១ ខែឧសភា លោក ហ៊ុន សែន មានប្រសាសន៍ថា រឿងចោទអាមេរិកពាក់ព័ន្ធសំណុំរឿងលោក កឹម សុខា គួរតែអាមេរិកដោះស្រាយជាមួយលោក កឹម សុខា ផ្ទាល់ព្រោះទាំងតុលាការ ទាំង​រាជរដ្ឋាភិបាលកម្ពុជា មិនបានចោទអាមេរិកនៅពីក្រោយកាប៉ុនប៉ងផ្ដួលរំលំរដ្ឋាភិបាលទេ។

លោក ហ៊ុន សែនមានប្រសាសន៍«ខ្ញុំអត់ចោទអាមេរិកទេគឺឯកឧត្តម កឹម សុខា គាត់និយាយ​ខ្លួនឯង ដូច្នេះត្រូវការដោះស្រាយរវាងអាមេរិក និងកឹម សុខា អ៊ីងចឹងអាមេរិកប្រកាស​បដិសេធ​ថា បានធ្វើអ៊ីងចឹងដូច កឹម សុខា និយាយអត់? ខ្ញុំសូមជម្រាបទាំងតុលាការ ទាំង​រាជរដ្ឋា​ភិបាល​​អត់មានចោទអាមេរិក អ្វីដែលកើតមានគឺ កឹម សុខា និយាយពីអាមេរិកជួយអ៊ីងចឹង​រឿងនេះ​មិនមែនរឿងកម្ពុជាជាមួយអាមេរិកឯណា ជារឿងរបស់ កឹម សុខា»

ទោះបីជាលោក ហ៊ុន សែន មានប្រសាសន៍បែបនេះក្ដីតែមេធាវីការពារក្ដីឱ្យលោក កឹម សុខា បានអះអាងថា កន្លងមកតុលាការនិងសមត្ថកិច្ចសុទ្ធតែបានលើកឡើងថា​អាមេរិក​ជាប់​ពាក់​ព័ន្ធក្នុងសំណុំរឿងលោកកឹមសុខា។

លោកមេធាវី ផែង ហេង បញ្ជាក់ថា នៅក្នុងសំណុំឯកសារទាំងអស់ដែលសមត្ថកិច្ចរដ្ឋាភិបាល យកជាសំអាងដើម្បីដាក់បន្ទុកនៅតុលាការបានបង្ហាញពីស្ថាប័នបរទេសនានាដែលជាប់ពាក់​ព័ន្ធនឹងលោកកឹមសុខារួមទាំងសហរដ្ឋអាមេរិកផង។

លោក ផែង ហេង មានប្រសាសន៍ថា៖«ឯកសារទាំងអស់ដែលសមត្ថកិច្ចដាក់ទៅតុលាការ​បាន​រៀប​រាប់ពីស្ថាប័នបរទេសទាំងអស់ ដែលមានប្រទេសកាណាដា​ សហភាពអ៊ឺរ៉ុប​អង្គការ​អន្តរជាតិ​នានា រួមទាំងអាមេរិកផង។ដូច្នេះតុលាការភ្ជាប់ច្បាស់ណាស់ទៅនឹង​សហរដ្ឋ​អាមេរិកនេះ រាប់តាំងពីឈ្មោះអតីតប្រធាននាធិបតីអាមេរិកដូណាល់ត្រាំផង»។ លោក បន្តថា៖«បើសិនជាគ្មានភស្តុតាងនិងគ្រាន់តែជាសំដីរបស់អ្នកនយោបាយ ឬជា​វោហាសាស្ត្រនោះ មិនគួរណាមានការចោទប្រកាន់លើរូបលោកកឹមសុខាទៀតឡើយ»។

ចៅក្រមសាលាដំបូងរាជធានីភ្នំពេញដែលកាត់ក្ដីលើសំណុំរឿងនេះ លោកចៅក្រម កូយ សៅ បានបដិសេធមិនធ្វើអត្ថាធិប្បាយនោះទេ។

លោកឆ្លើយសំណួរខេមបូចាដោយខ្លីថា៖«ខ្ញុំមិនមានតួនាទីឬផ្លូវច្បាប់ក្នុងការឆ្លងឆ្លើយទេ។ សាលាដំបូងមានអ្នកនាំពាក្យរួចហើយអ៊ីងចឹងសូមទាក់ទងទៅអ្នកនាំពាក្យ»។

អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មិនឆ្លើយសំណួរ​អ្នកសារព័ត៌មាន​នោះទេនៅថ្ងៃទី១២ ខែឧសភា ឆ្នាំ២០២២។

លោក កឹម សុខា អតីតប្រធានគណបក្សប្រឆាំងមកដល់តុលាការក្រុងភ្នំពេញដើម្បីចូលរួមសវនាការរបស់លោក ថ្ងៃទី១៦ ខែមីនា ឆ្នាំ២០២២។ ខេមបូចា/ព្រីង សំរាំង
លោក កឹម សុខា អតីតប្រធានគណបក្សប្រឆាំងមកដល់តុលាការក្រុងភ្នំពេញដើម្បីចូលរួមសវនាការរបស់លោក ថ្ងៃទី១៦ ខែមីនា ឆ្នាំ២០២២។ ខេមបូចា/ព្រីង សំរាំង

ប្រធានសមាគមការពារសិទ្ធិមនុស្សអាដហុក លោក នី សុខា មានប្រសាសន៍ថា សំណុំរឿង​របស់លោក កឹម សុខា ពាក់ព័ន្ធនឹងបញ្ហានយោបាយ។ លោកបន្តថា បក្សកាន់អំណាចគួរ​ណាស់​តែ​បើកចំហសេរីភាពនយោបាយ ឈានទៅបញ្ចប់ការប្រើប្រាស់ប្រព័ន្ធតុលាការ​ដើម្បីធ្វើទុក្ខបុកម្នេញទៅលើគូប្រកួតប្រជែងឬអ្នកមានទស្សនៈផ្ទុយពីក្រុមខ្លួ​ន។

លោក នី សុខា ថ្លែងថា៖«សម្តេច ហ៊ុន សែន លោកថាអាមេរិកមិនជាប់ពាក់ព័ន្ធ​ទេ អ៊ីងចឹងបាន​ន័យថា តើលោក កឹម សុខា ទៅក្បត់ជាតិជាមួយអ្នកណា? ចម្លើយគឺមិនអាចចោទគាត់បានទេ អ៊ីងចឹងគួរតែតុលាការទម្លាក់បទចោទនេះទៅ»។

លោក បន្តថា៖«ខ្ញុំគិតថាអ្នកនយោបាយកម្ពុជាយើងគួរធ្វើការងាររួមដើម្បីប្រយោជន៍ជាតិ លើកស្ទួយសិទ្ធិសេរីភាពជូនពលរដ្ឋ ហើយមិនគួរណាធ្វើទង្វើដែលនាំឱ្យ​ខ្មែរនិងខ្មែរមាន​គំនុំនឹងគ្នាឡើយ»។

អ្នកវិភាគបញ្ហានយោបាយ ដែលកំពុងនិរទេសខ្លួននៅក្រៅប្រទេស លោក គឹម សុខ មានប្រសាសន៍ថា លោកនាយករដ្ឋមន្ត្រីហ៊ុនសែននិយាយដើម្បីដោះសារទាំងបំពាន។

លោក គឹម សុខ មានប្រសាសន៍ថា៖«បើថាលោក កឹម សុខា និយាយខ្លួនឯងភ្ជាប់​សហរដ្ឋអាមេរិក ម្ដេចមិនយកភ័ស្ដុតាង ទាំងឯកសារ ជាវីដេអូ ជាសំណេរ ជាសាក្សី រួមមាន​សហរដ្ឋអាមេរិកជាដើម ទៅពិនិត្យផ្ទៀងផ្ទាត់ឲ្យដឹងការពិត។ ហេតុអ្វីតុលាការ បដិសេធ​សំណើរបស់ក្រុមមេធាវីលោក កឹម សុខា ដែលទាមទារឲ្យអញ្ជើញ​តំណាង​រដ្ឋាភិបាល​អាមេរិកទៅបំភ្លឺ»?

លោក គឹម សុខ បញ្ជាក់ថា រដ្ឋាភិបាលកម្ពុជាត្រូវតែស្តារឡើងវិញនូវលទ្ធិប្រជាធិបតេយ្យ ដើម្បីឱ្យកម្ពុជាមានទំនាក់ទំនងល្អជាមួយសហរដ្ឋអាមេរិក។

លោក គឹម សុខ បន្ថែមថា៖«លោក ហុន សែន ត្រូវចាប់ផ្ដើមពីការទម្លាក់ចោលបទចោទ​ប្រកាន់លើលោក កឹម សុខា»

សំណុំរឿងលោក កឹម សុខា ​ត្រូវបានតុលាការបើកសវនាការចំនួន៣៩​លើករួចមកហើយ​ដោយ​សវនាការលើកចុងក្រោយធ្វើឡើងកាលពីថ្ងៃទី១១ខែឧសភា ដោយតុលាការសួរ​ដេញដោលពីសកម្មភាពរបស់គណបក្សសង្គ្រោះជាតិក្នុងដំណើរការបោះឆ្នោតឆ្នាំ២០១៣ ជាការបោះឆ្នោតដែលបក្សកាន់អំណាចបាត់បង់កៅអីសភា២២អសនៈ។ តុលាការគ្រោង​បើកសវនាសួរដេញដោលបន្តទៀតសប្ដាហ៍ក្រោយ។

សវនាការលើសំណុំរឿងរបស់លោក កឹម សុខា បានអូសបន្លាយជាង២ឆ្នាំមកហើយ។ សវនាការខ្លះត្រូវបានផ្អាកដោយហេតុផលជំងឺកូវីដ១៩និងផ្អាកតាមការស្នើសុំពីដើមបណ្ដឹង​រដ្ឋប្បវេណីពីខាងរដ្ឋាភិបាល។ សព្វថ្ងៃលោក កឹម សុខា នៅជាប់បំរាមមិនអោយ​ធ្វើ​នយោបាយ​និងមិនអោយចាកចេញទៅក្រៅប្រទេស។

ទោះជាយ៉ាងណាកាលពីថ្ងៃទី១១ ខែឧសភានេះ លោក ហ៊ុន សែន បានប្រឡូយពាក្យថា ការចាកចេញទៅ​ក្រៅប្រទេសរបស់លោកកឹម សុខា មិនគួរណាមានការរារាំងនោះទេ។​

លោកមានប្រសាសន៍ថា ៖« ខ្ញុំបង្ហាញអារម្មណ៍របស់ខ្ញុំ ។ ខ្ញុំបង្ហាញជាមួយគាត់ថា ការសុំទៅក្រៅប្រទេសពិនិត្យសុខភាពឬទៅមើលកូនមើលចៅអីនោះមិនគួរណាមានឧប​សគ្គនោះទេ។ប៉ុន្តែត្រង់សម្រេចឱ្យទៅឬមិនអោយទៅនៅលើតុលាការ»៕

312 views

ព័ត៌មានថ្មីៗ

អត្ថបទពេញនិយម