សមាគមសម្ព័ន្ធអ្នកសារព័ត៌មានកម្ពុជា

លោកហ៊ុន សែន សរសើរការបោះឆ្នោតឃុំសង្កាត់ថា «ត្រឹមត្រូវ និងយុត្តិធម៌» ហើយបដិសេធការចោទប្រកាន់ថាមានការលួចសន្លឹកឆ្នោត

មន្ត្រីរៀបចំការបោះឆ្នោតកំពុងរាប់សន្លឹកឆ្នោតនៅមណ្ឌលបោះឆ្នោតវត្តចាក់អង្រែលើ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ រូបភាពថតកាលពីថ្ងៃទី៥ ខែមិថុនា ឆ្នាំ២០២២។ ខេមបូចា/ព្រីង សំរាំង
មន្ត្រីរៀបចំការបោះឆ្នោតកំពុងរាប់សន្លឹកឆ្នោតនៅមណ្ឌលបោះឆ្នោតវត្តចាក់អង្រែលើ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ រូបភាពថតកាលពីថ្ងៃទី៥ ខែមិថុនា ឆ្នាំ២០២២។ ខេមបូចា/ព្រីង សំរាំង

លោក​នាយក​​រដ្ឋមន្ត្រី​ ហ៊ុន សែន បាន​កោត​សរសើរ​ចំពោះ​ដំណើរ​ការ​បោះ​ឆ្នោត​ឃុំ​សង្កាត់​កាលពី​ថ្ងៃ​ទី​៥ ខែ​មិថុនា កន្លង​ទៅ ដោយ​បាន​ហៅ​ការ​បោះ​ឆ្នោត​នេះ​ថា «​ត្រឹម​ត្រូវ និង​យុត្តិធម៌» ហើយ​លោក​ក៏​បាន​ច្រាន​ចោល​ការ​ចោទប្រកាន់​របស់​គណបក្ស​ប្រឆាំង​ថា​ការ​បោះ​ឆ្នោត​មិន​ត្រឹម​ត្រូវ និង​មាន​ភាព​មិន​ប្រក្រតី​ច្រើន​ផង​ដែរ​។

លោកមាន​ប្រ​សាសន៍​ថា៖ «ខ្ញុំ​សូម​អរគុណ​ចំពោះប្រជាជន​ទាំងអស់​ដែល​បាន​អនុវត្ត​សិទ្ធិ​របស់​ខ្លួន​​ដើម្បី​ជ្រើស​រើស​ថ្នាក់​ដឹក​នាំ​ដែល​ខ្លួន​ពេញ​ចិត្ត​នេះ​ជា​ការ​បង្ហាញ​ពី​ភាព​ចាស់​ទុំ​ផ្នែក​នយោបាយ​​នៃ​ដំណើរ​ការ​ប្រជាធិបតេយ្យ​នៅ​កម្ពុជា»

ថ្លែង​​ក្នុង​ពិធី​ប្រគល់​សញ្ញាបត្រ​ដល់សិស្ស​នៅ​សាលា​ភូមិន្ទ​រដ្ឋបាល​ក្នុង​រាជធានី​ភ្នំពេញ​កាល​ពី​ថ្ងៃ​ចន្ទ លោក ហ៊ុន សែន ថា​គណៈកម្មាធិការ​ជាតិ​រៀប​ចំការ​បោះ​ឆ្នោត​រៀបចំ​ដំណើរ​ការ​បាន​ល្អ និង​បាន​ច្រាន​ចោល​ការ​រិះគន់​នានា​ថា​ជា​ការ​បំភ្លៃ​ការ​ពិត។​

លោក​ថ្លែង​ថា៖ «អ៊ី​ចឹង​តើ​ពួក​អ្នក​ឯង[ក្រុម​ប្រឆាំង​]​ដែល​ចោទ​ថា គេ​លួច​សន្លឹក​ឆ្នោត​នេះ ហ៊ាន​ស្បថ​ឱ្យ​រន្ទះបាញ់​ងាប់​ឬ​អត់

ដូច​គ្នា​ដែរ លោក​ក៏​បាន​ច្រាន​ចោល​សំណើ​របស់​គណបក្ស​ភ្លើង​ទៀន​ដែល​ចង់​ពិភាក្សា​ពី​កំណែ​ទម្រង់​ការ​បោះ​ឆ្នោត សម្រាប់​ការ​បោះ​ឆ្នោត​សកល​នា​ឆ្នាំ​ខាង​មុខ​ផង​ដែរ។

កាល​ពី​សប្ដាហ៍​មុន​គណបក្ស​ភ្លើង​ទៀន​បាន​និយាយ​ថា​ខ្លួន​ចង់​ជជែក​ជាមួយ​គណបក្ស​កាន់​អំណាច​ដើម្បី​ពិភាក្សា​លើ​កំណែ​ទម្រង់​គ.ជ.ប ដើម្បី​ឲ្យ​ប្រាកដ​ថា​ការ​បោះ​ឆ្នោត​សកល​ឆ្នាំ​ក្រោយ​ប្រព្រឹត្ត​ទៅ​ដោយសេរី និង​យុត្តិ​ធម៌​។

លោក​នាយក​រដ្ឋ​មន្ត្រី​មាន​ប្រសាសន៍​ទៀត​ថា៖ «អ្នក​ខ្លះ​និយាយ​ថា​ពួកគេចង់​ជជែក និង​ចរចា​ជាមួយ​បក្ស​កាន់​អំណាច​[ប៉ុន្តែ​] គ្មាន​ស្អី​ត្រូវ​ចរចា​ទេ​។ បើ​សិន​ជា​អ្នក​ឯង​ចង់​ជជែក ទៅ​ជជែក​ជាមួយ​គ..ប ទៅ គណបក្ស​ប្រជា​ជន​កម្ពុជា​មិន​ត្រូវ​ការ​ជជែក​អី​ទេ ពី​ព្រោះ​គណបក្សប្រជាជន​ក៏ជា​គូ​ប្រកួត​ប្រជែងដែរ​»

ការ​លើក​ឡើង​របស់​លោក​នាយក​រដ្ឋ​មន្ត្រី​ គឺ​ចំថ្ងៃ​ជាមួយ​គ្នា​ដែល​ គ.ជ.ប ប្រកាស​ថា​ខ្លួននឹង​ចាត់​វិធានការ​ច្បាប់​ប្រឆាំង​នឹង​អនុប្រធាន​គណបក្ស​ភ្លើង​ទៀន លោក សុន ឆ័យ​ ដែល​បាន​អះអាងថា​ការ​បោះ​ឆ្នោត​មិន​ធ្វើ​ឡើង​ដោយ​សេរី និង​យុត្តិ​ធម៌ និង​បាន​ចោទ​ គ.ជ.ប ថា​លម្អៀង​ទៅ​រក​បក្ស​កាន់​អំណាច​។

​ គ.ជ.ប សរសេរ​ក្នុង​សេចក្ដី​ថ្លែង​ការណ៍​ខ្លួន​ថា៖ «​ការ​ថ្លែង​នេះ​មិន​អាច​ទទួល​យក​បាន ហើយ​ជា​ការ​មាក់ងាយ​ និង​ប៉ះពាល់​ដល់​តម្លៃ​នៃ​ម្ចាស់​ឆ្នោត​ដែល​បាន​ចេញ​ទៅបោះ​ឆ្នោត»

សេចក្ដី​ថ្លែង​ការណ៍​បន្តថា៖ «​វា​ក៏​នឹង​ប៉ះពាល់​ដល់​កិត្តិយស និង​​សេចក្ដី​ថ្លៃ​ថ្នូរ​របស់​ គ..» សេចក្ដី​ថ្លែង​ការណ៍​បន្ថែម​ថា​លោក​ សុន ឆ័យ កំពុង​ប្រឈម​នឹង​ការ​ផាក​ពិន័យ​រហូត​ដល់​ ៥ ០០០​​ដុល្លារ​។

ទាក់​ទង​ទៅ​នឹង​ការ​ចោទប្រកាន់​របស់​លោក សុន ឆ័យ អំពីភាពមិនប្រក្រីនៃការបោះឆ្នោតជ្រើសរើសឃុំសង្កាត់នេះ តំណាងមេធាវីរបស់គណបក្សប្រជាជនកម្ពុជា នៅព្រឹកថ្ងៃទី១៤ ខែមិថុនា បានដាក់ពាក្យបណ្តឹងទៅសាលាដំបូងរាជធានីភ្នំពេញ ដោយស្នើដាក់ទោសទណ្ឌលើ លោក សុន ឆ័យ និងទាមទារប្រាក់សំណងចំនួន ៤ពាន់លានរៀល ឬប្រមាណ១លានដុល្លារ។

ដូច​គ្នា​ដែរ លោក ហ៊ុន​ សែន ថ្លែង​ថា គ្មាន​អ្នក​ណា​អាច​ចោទ​ប្រកាន់​កម្ពុជា​ថា​មានការ​ដឹក​នាំ​ដោយ​ឯក​បក្ស​ទៀត​ទេ ពី​ព្រោះ​ថា​ការ​បោះ​ឆ្នោត​សកល​ឆ្នាំ​ក្រោយ​នឹង​​​មាន​គណបក្ស​ផ្សេង​ទៀត​បាន​អាសនៈ​នៅ​រដ្ឋសភា​។

លោក​បន្ថែម​ថា៖ «​បើ​តាម​ការ​ព្យាករក្នុង​ឆ្នាំ​២០២៣ នឹង​មាន​គណបក្សចម្រុះ​នៅ​រដ្ឋសភា​»

ការ​លើក​ឡើង​របស់​លោក​នាយក​រដ្ឋ​មន្ត្រី​នេះ កើត​មាន​ក្រោយ​ពី​គណបក្ស​ភ្លើង​ទៀន​បាន​រិះគន់​ចំពោះ​ការ​បោះ​ឆ្នោត​ឃុំ​សង្កាត់ និង​បាន​ចោទ​ថា​មានការ​ដាក់​សម្ពាធ និង​គំរាម​កំហែង​មក​លើ​ក្រុម​ខ្លួន ហើយ​បាន​ហៅ​ការ​បោះ​ឆ្នោត​នេះ​ថា «​អាក្រក់​​មិន​ធ្លាប់​មាន»។

លោក ថាច់ សេដ្ឋា អនុប្រធាន​គណបក្ស​ភ្លើង​ទៀន មាន​ប្រសាសន៍​ថា អ្នក​នយោបាយ​គួរ​តែ​មាន​ឆន្ទៈ​ចូល​តុ​ចរចា​។

លោក​បន្ត​ថា​៖ «​ពួកគេ​គួរ​តែ​គោរព​ឆន្ទៈ​ប្រជា​ពល​រដ្ឋ ពីព្រោះ​គណបក្ស​ភ្លើង​ទៀន​ក៏​មាន​អ្នក​គាំទ្រ​ជាង​មួយ​លាន​នាក់​ដែរ​។ ប្រសិន​បើ​ពួក​គេ​មិន​អើពើ វា​បង្ក​ជា​ការ​ចែក​បក្ស​ពួក។ ក្នុង​ប្រទេស​ប្រជា​ធិបតេយ្យ​​យើង​ត្រូវ​តែ​ជជែក​គ្នា​ពី​ការ​ធ្វើ​កំណែ​ទម្រង់​​ គ..»

លោក ថាច់​ សេដ្ឋា ឲ្យ​ដឹង​ថា​គណបក្ស​លោក​បាន​ដាក់​ពាក្យ​បណ្ដឹង​ជាង​ ១០០​បណ្ដឹង​ទាក់​ទង​នឹង​ភាព​មិន​ប្រក្រតី​អំឡុង​ពេល​បោះ​ឆ្នោត​​។ លោក​ថា មាន​បណ្ដឹង​ខ្លះ​បាន​ដោះ​ស្រាយ​នៅ​ថ្នាក់​ក្រោម និង​បណ្ដឹង​ខ្លះ​ត្រូវ​បាន​ទម្លាក់​ចោល​។

អ្នកនាំ​ពាក្យ​ គ.ជ.ប លោក ហង្ស ពុទ្ធា មាន​ប្រសាសន៍​ថា​ ក្នុង​ដំណើរ​ការ​បោះ​ឆ្នោត​កន្លង​មក​ គ.ជ.ប បាន​ទទួល​បណ្ដឹង​ចំនួន​ ១៩២​បណ្ដឹង​ពី​គណបក្ស​នយោបាយ​នានា​ ប្ដឹង​ពី​ភាព​មិន​ប្រក្រតី​ពេល​បោះ​ឆ្នោត​។

លោក​ក៏​បាន​ច្រាន​ចោល​ការ​អះអាង​ថា​ គ.ជ.ប លម្អៀង​ទៅ​រក​គណបក្ស​កាន់​អំណាច។ លោក​ថា៖ «​ទោះបី​ជា​[មន្ត្រី​ គ..ប​] គឺ​មក​ពី​គណបក្ស​នយោបាយ​ ពួកគេ​ក៏​ត្រូវ​ប្រកាន់​អព្យាក្រឹត្យ​ភាព​ ដែល​មាន​ន័យ​ថា​ពួក​គេ​ត្រូវ​តែ​គោរព​តាម​គោលការណ៍​​ផ្ទៃ​ក្នុង​របស់​ គ..»

លោក​ឲ្យ​ដឹង​ដែរ​ថា គ.ជ.ប នឹង​អញ្ជើញ​គណបក្ស​នយោបាយ និង​ភាគី​ពាក់ព័ន្ធ​ផ្សេង​ទៀត​ចូល​រួម​សមាជ​មួយ​នៅ​ដើម​ខែ​កក្កដា ដើម្បី​ជជែក​កែ​លម្អ​ការ​បោះឆ្នោត​ដើម្បី​ឲ្យ​ការ​បោះ​ឆ្នោត​ខាង​មុខ​កាន់​តែ​ប្រសើរ​។

យ៉ាងណា អ្នក​វិភាគ​នយោបាយ​លោក ឯម សុវណ្ណារ៉ា មាន​ប្រសាសន៍​ថា លោក​ជឿ​ថា​ការ​បោះ​ឆ្នោត​សកល​ឆ្នាំ​ក្រោយ​នឹង​មិន​ខុស​ការ​បោះ​ឆ្នោត​ឆ្នាំ​នេះ​នោះ​ទេ​។

លោក​ឲ្យ​ដឹង​ថា៖ «​យន្ដ​ការ​របស់​ គ..ប នៅ​ពេល​នេះ​នឹង​នៅ​តែ​បន្ត​ប្រើ ហើយ​អ្វី​ដែល​គេ​ហៅ​ថា​ការ​បោះ​ឆ្នោត​ដោយ​សេរី និង​យុត្តិធម៌​មិន​អាច​ទៅ​រួច​ទេ​ ដូច​ដែល​បាន​ឃើញ​ហើយ​ថា​ការ​បោះ​ឆ្នោត​ឃុំ សង្កាត់​នេះ មាន​លេច​ចេញ​ភាព​មិន​ប្រក្រតី​ច្រើន​មក​ហើយ​»

លោក​បន្ថែម​ថា​​ការណ៍​នេះ​អាច​ធ្វើ​ឲ្យ​មាន​ការ​ព្រួយ​បារម្ភ​ច្រើន​ពី​សហគមន៍​អន្តរ​ជាតិ ដែល​ជា​អ្វី​ដែល​រដ្ឋាភិបាល​យើង​ត្រូវ​ឆ្លើយ​តប​។ លោក​ថា កម្ពុជា​បាន​ទទួល​ប្រយោជន៍​ពាណិជ្ជកម្ម​ច្រើន​ពី​សហគមន៍​អ៊ឺរ៉ុប និង​អាមេរិក ដែល​លោក​ថា អ្នក​ទាំង​នេះ​មាន​ទម្ងន់​ក្នុង​ការ​ទាមទារ​ឲ្យ​មាន​កំណែ​ទម្រង់​ច្រើន​ជាង​ក្រុម​ប្រឆាំង​។

លោក​បន្ត​ថា​៖ «ការ​ចរចា​ត្រូវ​ធ្វើ​តាម​រយៈ​សហគមន៍​អន្តរជាតិ ពី​ព្រោះ​ថា​គណបក្ស​ប្រ​ឆាំង​នៅ​តូច មិន​មាន​អំណាច​ក្នុង​ការ​ចរចា​ជាមួយ​បក្ស​កាន់​អំណាច​ទេ​…​យ៉ាងណា សម្ពាធ​ពី​សហគមន៍​អន្តរ​ជាតិ​អាច​រុញ​ឲ្យ​រដ្ឋាភិបាល​ចរចា​ និង​ផ្ដល់​សេរីភាព​ច្រើន​ជាង​មុន​»

កាល​ពី​សប្ដាហ៍​មុន​ អង្គការ​សង្កេត​ការ​ចំនួន​ប្រាំ​បាន​ចេញ​របាយការណ៍​បឋម​របស់​ខ្លួន​និយាយ​ពី​ភាព​មិន​ប្រក្រ​តី ដោយ​មាន​ទាំង​កង​កម្លាំង​ប្រដាប់​អាវុធ​នៅ​តាម​មណ្ឌល​បោះ​ឆ្នោត និង​​មានអាជ្ញាធរកត់ត្រាឈ្មោះអ្នកទៅបោះឆ្នោត។

បន្ថែម​ពី​នេះ ពេល​រាប់​សន្លឹក​ឆ្នោត​ មាន​មណ្ឌល​ខ្លះ​បាន​ហាម​អ្នក​សង្កេត​ការ​មិន​ឲ្យ​ចូល​ទៅ​ជិត​។ មួយ​វិញ​ទៀត​ បង្អួច​នៅ​តាម​ការិយាល័យ​បោះ​ឆ្នោត​ខ្លះ​បាន​បិទ​ពេល​កំពុង​រាប់​សន្លឹក​ឆ្នោត និង​មាន​ការ​ហាម​មិន​ឲ្យ​ប្រជា​ពល​រដ្ឋ​ចូល​មើល​។

បើ​តាម​លទ្ធ​ផល​បោះ​ឆ្នោត​បឋម​ចេញ​ដោយ​ គ.ជ.ប គណបក្ស​ចំនួន​ ១៧​ដែល​បាន​ចូល​រួម​ការ​បោះ​ឆ្នោត​កាលពី​ថ្ងៃទី​៥ ខែមិថុនា មាន​តែ​គណបក្ស​ប្រជា​ជន​កម្ពុជា និង​គណបក្ស​ភ្លើង​ទៀន​ប៉ុណ្ណោះ​ដែល​ទទួល​បាន​កៅ​អី​ជាមេឃុំនិងចៅសង្កាត់ ហើយ​គណបក្ស​ប្រជា​ជន​កម្ពុជា​ទទួល​បាន​ច្រើន​បំផុត​។​ លទ្ធ​ផល​ផ្លូវ​ការ​រំពឹង​ថា​នឹង​បង្ហាញ​ជា​ផ្លូវ​ការ​នៅ​ថ្ងៃ​ទី​២៦ ខែ​មិថុនា ខាង​មុខ​ ៕ (រាយការណ៍​បន្ថែម​ដោយ ទ្រី ថានី​)

ប្រែសម្រួលពីអត្ថបទភាសាអង់គ្លេស៖ Hun Sen Praises ‘free and fair’ commune election, denies vote rigging

192 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម