សមាគមសម្ព័ន្ធអ្នកសារព័ត៌មានកម្ពុជា

តំណាងអយ្យការចោទថាការប្រមូលផ្តុំតវ៉ារបស់បុគ្គលិកណាហ្គាវើលដ៍ ជាការញុះញង់ ប៉ុន្តែមេដឹកនាំសហជីពអះអាងថា ជាកូដកម្មស្របច្បាប់

ឈឹម ស៊ីថរ មេដឹកនាំសហជីពណាហ្គាវើលដ៍ ចេញពីសាលាដំបូងរាជធានីភ្នំពេញ បន្ទាប់ពីតំណាងអយ្យការនិងជនជាប់ចោទធ្វើសេចក្តីសន្និដ្ឋានចុងក្រោយកាលពីថ្ងៃទី៣ ខែឧសភា ឆ្នាំ២០២៣។ ( ខេមបូចា/ ព្រីងសំរាំង)
ឈឹម ស៊ីថរ មេដឹកនាំសហជីពណាហ្គាវើលដ៍ ចេញពីសាលាដំបូងរាជធានីភ្នំពេញ បន្ទាប់ពីតំណាងអយ្យការនិងជនជាប់ចោទធ្វើសេចក្តីសន្និដ្ឋានចុងក្រោយកាលពីថ្ងៃទី៣ ខែឧសភា ឆ្នាំ២០២៣។ ( ខេមបូចា/ ព្រីងសំរាំង)

ឈឹម​ ស៊ីថរ​ មេដឹកនាំសហជីព​ណាហ្គាវើលដ៍និង​សហចុងចោទ​៨នាក់ផ្សេងទៀតបាន​ស្នើ​ឲ្យ​តុលាការទម្លាក់បទចោទ​ជុំវិញ​កូដកម្ម​ស្របច្បាប់​របស់​ពួកគេ​ អំឡុង​ពេល​ធ្វើ​សេចក្តី​សន្និដ្ឋាន​បញ្ចប់សវនាការ​កាល​ពីថ្ងៃពុធ​ ខណៈដែល​តំណាងអយ្យកា​រ​ប្រមូលភស្តុតាងជា​ច្រើន ដើម្បី​បង្ហាញថា ការ​តស៊ូមតិទាក់ទង​នឹងការងារ​គឺជា​អំពើ​ញុះញង់​។​​

សាលាដំបូងរាជធានីភ្នំពេញ​គ្រោងនឹង​ប្រកាស​សាលក្រម​នៅ​ថ្ងៃទី​២៥ ខែឧសភា​។ ជនជាប់ចោទ​ទាំង​៩នាក់​នេះ​ប្រឈម​នឹងបទចោទ​ញុះញង់​ បន្ទាប់ពី​ពួកគេ​ផ្តួច​ផ្តើម​ឲ្យ​មាន​កូដកម្ម​ ដែល​បាន​បន្ត​ចាប់តាំងពី​ថ្ងៃទី​១៨ ខែ​ធ្នូ​ ឆ្នាំ​២០២១ ជា​ការ​តវ៉ា​ចំពោះ​ការ​បញ្ឈប់បុគ្គលិកទ្រង់ទ្រាយធំ​និង​ការចោទប្រកាន់ថា ព្យាយាមធ្វើ​ឲ្យ​​សហជីពចុះខ្សោយ​។

អាជ្ញាធរ​ប្រកាសថា កូដកម្ម​របស់​បុគ្គលិក​ណាហ្គាវើលដ៍ខុសច្បាប់​ នៅពេល​ពួកគេប្រកាសធ្វើ​កូដកម្ម​នេះ​ ប៉ុន្តែ​​ក្រុម​សមាជិករាប់សិបនាក់ទៀត​​ដែល​ប្តូរផ្តាច់​​ជាមួយ​​សហជីព​នៅ​បន្តប្រមូល​ផ្តុំ​ធ្វើ​ការ​តវ៉ា​ពីរ​ដងក្នុងមួយសប្តាហ៍។

ស៊ីថរ​ បាន​និយាយថា៖ «ខ្ញុំ​ស្នើ​សុំ​ឲ្យលោកចៅក្រម​ទម្លាក់​បទចោទ​ទាំង​អស់​។ យើង​ត្រូវ​តែ​គោរព​ច្បាប់​» ។

ស៊ីថរ ជា​ប្រធានសហជីពបានអះអាងថា កូដកម្មនេះ ជាមធ្យោបាយស្របច្បាប់ សម្រាប់វិវាទការងារ បន្ទាប់ពីគណៈកម្មាធិការគ្រប់គ្រងរបស់ក្រុមហ៊ុនណាហ្គាវើលដ៍ខកខានមិនបានដោះស្រាយបណ្ដឹងរបស់កម្មករដោយស្មោះត្រង់​ អំឡុង ពេលចរចាជាច្រើនខែ។ កាលពីខែកុម្ភៈ ក្រសួងការបរទេសសហរដ្ឋអាមេរិកបាន​ផ្តល់​ពាន​មួយដល់​​ ស៊ីថរ ដែលទទួលស្គាល់នាងថា ជា “អ្នកការពារសិទ្ធិមនុស្ស “។

លោក សេង ហៀង ព្រះរាជអាជ្ញារងសាលាដំបូងរាជធានីភ្នំពេញ​បានអះអាងជាថ្មី​នៅ​ក្នុងសេចក្តី​សន្និដ្ឋាន​របស់​លោក​ថា  កូដកម្ម​របស់សហជីពនេះ​មិនដែល ទទួលបានការអនុញ្ញាតពីអាជ្ញាធរទេ។

លោក សេង ហៀង បានមាន​ប្រសាសន៍៖ «តំណាងអយ្យការ​មានភស្តុតាងគ្រប់គ្រាន់ដែលថា មានសកម្មភាពស៊ីសង្វាក់​នឹងបទ​ចោទញុះញង់ ដូច្នេះតំណាងអយ្យការ​ស្នើឲ្យលោក​ចៅក្រមផ្តន្ទាទោស​ទៅ​តាម​ច្បាប់» ។

មាត្រា៤៩៥នៃ​ក្រមព្រហ្មទណ្ឌកម្ពុជាចែងថា បទ​ញុះញង់អាចមាន​ទោស​ជាប់ពន្ធ​នា​គារពី៦ ខែទៅ២ឆ្នាំនិង​ពិន័យពី​១លានរៀល​ (២៥០ដុល្លារ) ទៅ៤លានរៀល ( ១.០០០ដុល្លារ)។

លោក សេង ហៀង បានលើកឡើងថា សហជីពបានទទួលមូលនិធិអន្តរជាតិពី អង្គការអន្តរជាតិជាច្រើនដូចជា​ការ អង្គការ East West Management Institution (EWMI) ដែលមានមូលដ្ឋាននៅសហរដ្ឋអាមេរិក អង្គការសិទ្ធិស្ត្រី NGO JASS និងអង្គការ​ការពារសិទ្ធិកម្មករ North America Unite Here។ ខណៈ​ដែល អង្គការកម្ពុជាជាច្រើនទទួលមូលនិធិពីក្រុមអង្គការ​នៅ​ក្រៅប្រទេសផងដែរនោះ​ លោក សេង ហៀង បានអះអាងថា មូលនិធិសម្រាប់​​សហជីពណាហ្គាវើលដ៍ ត្រូវបានប្រើប្រាស់ ដើម្បីធ្វើ​បាតុកម្មដែលត្រូវ​ហាមឃាត់។

លោក សេង ហៀង បានមាន​ប្រសាសន៍ថា៖ «[ជនជាប់ចោទ] ទទួលបានមូលនិធិ ខុសច្បាប់ពីខាងក្រៅ​ ដែលត្រូវបានប្រើប្រាស់ក្រោមលេសសិទ្ធិការងារនិងសិទ្ធិមនុស្ស ប៉ុន្តែពួកគេមាន​ចេតនាទុច្ចរិត​ឧបាយកល់ក្នុងការ​បង្ក​ភាពវឹកវរក្នុងសង្គម»។

តំណាងអយ្យការធ្លាប់បានចាក់ផ្សាយសំឡេងប្រហែល៣០នាទី ដែល​ដកស្រង់​ពី កិច្ច​ប្រជុំតាម​ Zoom ជាង៥០​លើ​ក ដែលមានរយៈ​ពេល​ប្រហែល៣ម៉ោង ជាភស្តុតាងដែលបញ្ជាក់ថា សហជីពណាហ្គាវើលដ៍មានចេតនាអាក្រក់។

ខ្សែអាត់សំឡេងមួយ​របស់​ ឈឹម ស៊ីថរ ដែ​លមិន​បញ្ជាក់កាលបរិច្ឆេទ​បាន​និយាយថា៖ «ក្នុងករណីដែលអាជ្ញាធរចាប់ខ្លួនខ្ញុំ យើងនឹងតបត​ទៅជា​អំពើ ហិង្សា» ។ តំណាងអយ្យការ​ក៏បានចែករំលែកខ្សែអាត់សំឡេងមួយទៀត ដែលក្នុង​នោះ​ មេដឹកនាំសហជីពរូបនេះ​បាន​និយាយថា៖ «មុននឹង​ចាកចេញ​ យើង​នឹង​បំបែក​ឆ្នាំងបាយ​» ដែលតំណាយ​អយ្យ​ការ​បកស្រាយ​ថា ជាចេតនាចង់បំផ្លាញក្រុម​ហ៊ុនណាហ្កាវើលដ៍ ។ នៅក្នុងភាសាខ្មែរពាក្យ «ឆ្នាំង​បាយ» អាចសំដៅទៅលើប្រភពនៃចំណូលហិរញ្ញវត្ថុ។

ប៉ុន្តែ ស៊ីថរបាននិយាយថា តំណាងអយ្យការ​បានមួលបង្កាច់​ពាក្យសម្តីរបស់ នាងហើយ​បានអះអាងថា ការលើកឡើង​របស់នាងអំពី «ឆ្នាំងបាយ​» គឺ​សំដៅដល់​​ករណី ដែលមេដឹកនាំមុនៗរបស់សហជីពទទួលយក​សំណងនិងបោះបង់ ចោល​កម្មករ អំឡុងពេលតស៊ូ​មតិទាក់ទិន​ការងារកន្លង​មក។

លោកស្រី សាម សុគន្ធា មេធាវីការពារបានឲ្យដឹងថា តំណាងអយ្យការ​បានដក ស្រង់ខុស​ពី​ខ្លឹមសារដើមរបស់​សារនេះ ដើម្បីទម្លាក់កំហុស​លើ​ ស៊ីថរ។ នៅក្នុង សវនាការកាលពីសប្តាហ៍មុន ចៅក្រមបានច្រានចោលសំណើ​របស់​ ស៊ីថរ និង​សហចុងចោទរបស់នាងដែល​ស្នើ​សុំ​ឲ្យ​ចាក់​ខ្សែអាត់​សំឡេងទាំងស្រុងរបស់ពួក គេ ដែលតំណាងអយ្យការ​បានប្រើប្រាស់ជាភស្តុតាង។  លោកស្រី សុគន្ធា បាន និយាយថា ការជ្រើសរើសយកខ្សែអាត់សំឡេងមួយចំនួនមិនបានឆ្លុះបញ្ចាំងពី សារទាំងមូលរបស់ ស៊ីថរ ឬសកម្មភាពរបស់សហជីពនៅក្នុងការធ្វើកូដកម្មពេញ មួយឆ្នាំនោះទេ។

លោក​ស្រី​មាន​ប្រសាសន៍ថា៖ «ខ្លឹម​សារទាំងស្រុងមិនបានអំពាវនាវឲ្យប្រើ​អំពើ ហិង្សានោះទេ»។

កូដករ​ណាហ្គាវើលដ៍ ដែលផ្សព្វផ្សាយសារអហិង្សា​ក្នុងការបញ្ចេញមតិជាសាធារណៈនោះ​ បានប្រឈមមុខនឹងអំពើហិង្សាពីសំណាក់​អាជ្ញាធរ ហើយ​សូម្បី​ថៅ​កែ​របស់ពួកគេ គឺ​កូនប្រុសរបស់​នាយកប្រតិបត្តិក្រុមហ៊ុន​ NagaCorp តាម​ចោទថា បានគ្រវែង​បង្គោលជ័រចរាចរណ៍ទៅ​លើ​បាតុករ​ បន្ទាប់ពីកញ្ឆក់យកទូរសព្ទដៃរបស់កូដករ​ម្នាក់ រួច​គប់​ទៅ​លើ​ចិញ្ចើម​ផ្លូវកាលពីឆ្នាំមុន ។

លោក សេង ហៀង ជា​តំណាងអយ្យការ​បានអះអាងផងដែរថា សមាជិកសហជីពមិន​បាន​ធ្វើ​ការងារនៅ​ក្រុមហ៊ុនទៀតឡើយ​ ដូច្នេះមិនអាចធ្វើកូដកម្ម បានដោយស្របច្បាប់នោះទេ។ លោកបានស្នើ​ឲ្យ​ចាប់​អារម្មណ៍​ទៅលើយុទ្ធសាស្ត្ររបស់សហជីពក្នុងការដាក់ស្ត្រីមានផ្ទៃពោះនៅជួរមុខ ជាការញុះញង់ ដោយអះអាងថា ល្បិចកលនេះត្រូវបានបង្កើតឡើងសម្រាប់សហជីព ដើម្បីបង្កើតស្ថានការណ៍ ដើម្បី​ចោទប្រកាន់អាជ្ញាធរពីបទរំលោភសិទ្ធិមនុស្ស។

តំណាងអយ្យ​ការ​បានលើកឡើងបន្ថែមទៀតអំពីមូលនិធិអន្តរជាតិ ដែលបាន ផ្ទេរទៅគណនីធនាគារផ្ទាល់​ខ្លួ​នរបស់មេដឹកនាំសហជីពជាជាងទៅកាន់គណនី អង្គភាព​សហជីពនេះ។

អ្នកគាំទ្ររបស់​ ឈឹម ស៊ី​ថរ មេដឹកនាំសហជីពណាហ្គាវើល​ដ៍បានប្រមូលផ្តុំគ្នានៅមុខសាលាដំបូង​រាជធានីភ្នំពេញកាល​ពី​ថ្ងៃទី៣ ខែឧសភា ឆ្នាំ២០២៣។ (ខេមបូចា/ ព្រីង សំរាំង)

លោកស្រី​ សុគន្ធា បាន​មាន​ប្រសាសន៍​ថា មូលនិធិអន្តរជាតិគឺ​ជា ប្រភេទ​នៃ«​ជំនួយមនុស្សធម៌» អំឡុងពេលមាន​ការបិទខ្ទប់​ដោយសារការរីករាល​ដាលជំងឺ​កូវីដ-១៩ ក្នុង​ខែមេសា និងដើមខែឧសភា ឆ្នាំ២០២១ ដោយសារកម្មករមួយចំនួន មិនមានចំណូលគ្រប់គ្រាន់ទេ។ សូម្បី​កូដកម្មមិនទាន់ចាប់ផ្តើមក៏ដោយ ក៏ បុគ្គលិកណាហ្គាវើលដ៍​ប្រឈមនឹងការកាត់បន្ថយប្រាក់ឈ្នូល​រួចទៅ​ហើយ។ លោក​ស្រីបានមាន​ប្រសាសន៍ថា មូលនិធិនេះ​ត្រូវបានផ្ទេរចូល​គណនីផ្ទាល់ខ្លួន​  ពីព្រោះវាងាយស្រួលក្នុងការជួយសមាជិកដោយផ្ទាល់ ហើយគណនីរួមរបស់​សហជីពពិបាកក្នុង​ការ​អនុម័ត អំឡុងពេលមាន​ការ​បិទខ្ទប់។

លោកស្រីបានបន្ថែមថា គ្មានអ្វីខុសច្បាប់ទេ ការ​ដែល​សហជីពមួយទទួលមូលនិធិពីអង្គការ​អន្តរជាតិនោះ។

លោកស្រីមាន​ប្រសាសន៍ថា៖ «ច្បាប់ស្តីពីសហជីពពាណិជ្ជកម្មបានអនុញ្ញាតឲ្យ សហជីពក្នុងស្រុកធ្វើសម្ព័ន្ធភាពជាមួយសហជីពអន្តរជាតិ។ វាមិនខុសទេ​ ការ ទទួលមូលនិធិទាំងនោះ​»។

ទាក់ទងនឹងការដាក់ស្ត្រីមានផ្ទៃពោះនៅជួរមុខ លោកស្រី សុគន្ធា បានពន្យល់ ថា វាជាយុទ្ធសាស្ត្រមួយ ដើម្បីកាត់បន្ថយអំពើហិង្សា ក្នុងករណីដែលកូដករ​ប៉ះ ទង្គិចមួយអាជ្ញាធរ។

លោកស្រី សុគន្ធា បានមាន​ប្រសាសន៍ថា៖ «[សារ] ទាំងស្រុង​ គាត់​បានលើក ឡើង គឺ [សម្រាប់កូដករ​ ] មិនឲ្យ​ឆ្លើយតបដោយប្រើអំពើហិង្សាទេ»។

ទាក់ទង​នឹង​ការលើក​ឡើង​របស់តំណាងអយ្យ​ការ​ដែល​ថា ការធ្វើកូដកម្មនេះ គឺ ខុសច្បាប់ ដោយសារអាជ្ញាធរមិនអនុញ្ញាតឲ្យមានការប្រមូលផ្តុំពី​បូង លោកស្រី​ សុគន្ធា បានមាន​ប្រសាសន៍ថា ការធ្វើកូដកម្មមិនតម្រូវឲ្យមានការយល់ព្រម​ពី អា​ជ្ញាធរនោះទេ​ តាមច្បាប់កម្ពុជា។

លោកស្រី​ សុគន្ធា បានមាន​ប្រសាសន៍ថា៖ «ពួកគាត់មិនចាំបាច់​មាន​ការ​អនុញ្ញាត [ពីអាជ្ញាធរ] ទេ គ្រាន់តែជូន​ដំណឹងទៅអាជ្ញាធរ​ គឺវាគ្រប់គ្រាន់ហើយ»។

មាត្រា៣២៤ នៃច្បាប់ការងាររបស់កម្ពុជាចែងថា ការធ្វើកូដកម្មត្រូវជូន​ «ដំណឹង ជាមុនយ៉ាងហោចណាស់៧ថ្ងៃនៃថ្ងៃធ្វើការ» ដល់និយោជកនិងក្រសួងការងារ និង «បញ្ជាក់ឲ្យបាន​ច្បាស់ពីការទាមទារ ដែលជាហេតុផលនៃការធ្វើកូដកម្ម នេះ»។ មាត្រា៧នៃច្បាប់បាតុកម្មកម្ពុជាក៏តម្រូវឲ្យមានការជូនដំណឹងពីមុនចំនួន ៥ថ្ងៃផងដែរ។ គ្មាន​ច្បាប់​ណាមួយ​​តម្រូវឲ្យ​សុំការអនុញ្ញាតពីអាជ្ញាធរនោះទេ។

លោក ហុង សម្បត្តិ ជា​សហមេធាវីការពារបានមាន​ប្រសាសន៍ថា លោកមាន ការខកចិត្ត ដែលតំណាងអយ្យការព្យាយាម​បង្ហាញថា “វិវាទការងារ” គឺជាសកម្មភាពឧក្រិដ្ឋ ដោយអះអាងថា កម្មករបានអនុវត្តមធ្យោបាយ​ផ្លូវច្បាប់ ដែលមាន​ ដើម្បីស្វែងរកសំណង​​ស្របតាមច្បាប់ បន្ទាប់ពីបរាជ័យក្នុងការចរចា ជាមួយក្រុមហ៊ុន។

លោក សម្បត្តិ​ បានអះអាងថា មូលហេតុចម្បងនៃកូដកម្មនេះ គឺការខ្វះដំណោះ ស្រាយពីក្រុមហ៊ុនណាហ្កាវើលដ៍ ក្រសួងការងារនិងក្រុមប្រឹក្សាអាជ្ញាកណ្តាល កម្ពុជា​។ កាលពី​ខែកញ្ញា ឆ្នាំ២០២១ ក្រុមប្រឹក្សាអាជ្ញាកណ្តាល​បានចេញសេចក្តី សម្រេចមួយ​ដែល​មិន​ចាប់បង្ខំឲ្យអនុវត្ត​ ដោយ​ស្នើ​សុំឲ្យក្រុមហ៊ុននេះគណនា ប្រាក់បំណាច់​ឡើងវិញ ប៉ុន្តែបានបដិសេធមិន​សម្រេចលើភាពស្របច្បាប់នៃការ បញ្ឈប់​បុគ្គលិក​ទ្រង់ទ្រាយ​ធំ​ ដែលប៉ះពាល់ដល់កម្មករជាង៣០០នាក់និង​ថ្នាក់ ដឹកនាំសហជីពទាំងអស់ទេ។

លោកមាន​ប្រសាសន៍ថា៖ «យើងបានឃើញថា កូដកម្មនេះនៅតែបន្តដល់​ពេល នេះ ដោយសារវិវាទការ​ងារ» ។

លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ​បានអំពាវនាវឲ្យ តុ​លា​ការទម្លាក់ចោលការ​ចោទប្រកាន់​លើជនជាប់ចោទ​។

លោក​មាន​ប្រសាសន៍ថា៖ «ខ្ញុំមើល​ឃើញថា គ្មាន​ភស្តុតាងណាមួយ ដែលបង្ហាញ​ថា ជនជាប់ចោទទាំងប្រាំបួននាក់ជាប់ពាក់ព័ន្ធក្នុងបទចោទ​ញុះ​ញង់នោះទេ ពីព្រោះវាគឺជាវិវាទ​ការងារ​ទាំងស្រុង»។  លោកបានបន្ថែមថា៖ «ដើម្បីចៀសវាងការចោទប្រកាន់ពីការរឹត​ត្បិតសិទ្ធិសេរីភាពសហជីព កម្មករនិងពលរដ្ឋនោះ​ សិទ្ធិជាមូលដ្ឋាន​ក្នុងការធ្វើកូដកម្ម ត្រូវបានធានាដោយច្បាប់។ គាត់​ [តំណាងអយ្យការ​] បាន​និងកំពុង​ប្រើប្រាស់​ក្រមព្រហ្មទណ្ឌ ដើម្បីរឹតត្បិត​សិទ្ធិទាំងអស់នោះ»

ប្រែសម្រួលពីអត្ថបទភាសាអង់គ្លេស៖​ In Closing Arguments, Prosecution Frames NagaWorld Gatherings as Incitement, Union Leaders Claim Lawful Strike

288 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម