ភាគីនិយោជក និងតំណាងរដ្ឋាភិបាល បានជំទាស់ទៅនឹងសំណើរបស់សហជីពសុំឲ្យដំឡើងប្រាក់ឈ្នួលគោលសម្រាប់កម្មកររោងចក្រ ហើយថែមទាំងមានជំហរចង់ឲ្យកាត់បន្ថយប្រាក់ឈ្នួលគោលផងដែរ ក្នុងកិច្ចប្រជុំចរចាប្រាក់ឈ្នួលលើកទីពីរសម្រាប់ឆ្នាំ២០២២ កាលពីថ្ងៃអង្គារ។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជាហៅកាត់ថា GMAC មានប្រសាសន៍ថា ភាគីនិយោជកដែលចូលរួមក្នុងការចរចានេះបានធ្វើការគណនាផ្ទាល់ខ្លួន និងបានសម្រេចថាប្រាក់ខែកម្មករគួរតែកាត់បន្ថយចំនួន៤,៥ភាគរយ។ លោក ខេន លូ បានលើកហេតុផលពីផលប៉ះពាល់លើវិស័យសេដ្ឋកិច្ចដោយសារវិបត្តិកូវីដ-១៩ និងថានិយោជកមិនអាចទ្រាំទ្រលើការចំណាយថ្លៃពលកម្មបានទេ។
លោក លូ ឲ្យដឹងថា៖ «យើងកំពុងចរចានៅឡើយ។ ផលិតផលនាំចេញរបស់យើងថយចុះ១០ភាគរយក្នុងឆ្នាំ២០២០ បើប្រៀបធៀបទៅនឹងឆ្នាំ២០១៩ ហើយនៅឆ្នាំក្រោយនិយោជកត្រូវចំណាយបន្ថែមលើ ប.ស.ស និងប្រាក់សោធននិវត្តន៍របស់កម្មករ»។ លោកបន្ថែមថា៖ «សហជីពនៅតែគិតថាប្រាក់ចំណូលយើងនៅតែកើនឡើង កើនឡើងយ៉ាងម៉េចបើអ្នកបញ្ជាទិញយើងថយចុះ?»។
លោកបានបន្តថា និយោជកក៏ចំណាយច្រើនលើថ្លៃផលិតកម្ម ដើម្បីការពារការឆ្លងរាលដាលជំងឺកូវីដ-១៩ ដែលការចំណាយនោះរួមមានការចំណាយលើការទិញម៉ាស សម្ភាររក្សាអនាម័យ និងឧបករណ៍តេស្តរហ័សសម្រាប់កម្មករជាដើម។
លោក លូ បញ្ជាក់ថា៖ «ចំណាយរបស់ពួកយើងកើនឡើង តែប្រាក់ចំណេញរបស់ពួកយើងថយចុះ»។
ប្រាក់ខែគោលអប្បបរមារបស់កម្មករបច្ចុប្បន្នមានចំនូន១៩២ដុល្លារ។ លោក អាត់ ធន់ ប្រធានសហភាពការងារកម្ពុជា ដែលជាសហជីពធំមួយបានចូលរួមក្នុងការចរចាត្រីភាគីដែលរៀបចំដោយក្រសួងការងារ មានប្រសាសន៍ថា ខាងភាគីនិយោជកបានបង្ហាញជំហរថា ប្រាក់ឈ្នួលគោលកម្មករមិនអាចឡើងបានទេ មានតែថយគឺថយនៅត្រឹម១៨៣,៤០ដុល្លារ។ ជាមួយគ្នានេះដែរ ភាគីរដ្ឋាភិបាលក៏មានជំហរកាត់បន្ថយប្រាក់ឈ្នួលគោលបន្តិចបន្តួចដែរ ដែលភាគីរដ្ឋាភិបាលបានប្រើបច្ចេកទេសគណនាមួយបង្ហាញពីប្រាក់ឈ្នួលគោលត្រឹមតែ១៩១,៩០ដុល្លារ។
លោក អាត់ ធន់ បានមានប្រសាសន៍ទៀតថា ភាគីសហជីពនៅរក្សាជំហរសំណើដំឡើងប្រាក់ឈ្នួលគោលឲ្យដល់២១៤,២០ដុល្លារ។ លោកឲ្យដឹងថាការគណនានេះធ្វើឡើងដោយប្រើស្ដង់ដារគណនាលើប្រាំពីរចំណុច ដែលកន្លងមកភាគីចូលរួមចរចាផ្សេងទៀតក៏ធ្លាប់បានប្រើផងដែរ។
ទឹកប្រាក់ចំនួន២២,២០ដុល្លារ ត្រូវបានស្នើឡើងដើម្បីបន្ថែមលើប្រាក់ឈ្នួលគោលក្នុងឆ្នាំ២០២០ ដែលកាលនោះបានឡើងត្រឹម២ដុល្លារ។
លោក ប៉ាវ ស៊ីណា ប្រធានសហភាពចលនាកម្មករកម្ពុជា មានប្រសាសន៍ក្រោយចប់កិច្ចប្រជុំចរចាថ្ងៃទី១៤ ខែកញ្ញា នេះថាភាគីទាំងអស់បានជជែកពីវិធីគណនាប្រាក់ឈ្នួលគោលអប្បបរមា ដោយប្រើការវិភាគលើចំណុចចំនួនប្រាំពីរ។ ចំណុចត្រូវគណនានេះមានរួមទាំងកត្តាសង្គម និងសេដ្ឋកិច្ច មានដូចជាអតិផរណា ថ្លៃចំណាយលើការរស់នៅប្រចាំថ្ងៃ ការប្រកួតប្រជែងផ្នែកឧស្សាហកម្ម ផលិតភាពការងារ លក្ខខណ្ឌទីផ្សារការងារ និងផ្នែកអាចបានប្រាក់ចំណេញ។
លោក បន្ថែមថា៖ «គ្រប់ភាគីទាំងអស់មិនទាន់ផ្លាស់ប្ដូរជំហររបស់ខ្លួននៅឡើយក្នុងកិច្ចប្រជុំ ចរចាប្រាក់ឈ្នួលគោលនៅថ្ងៃនេះ ដូចនេះយើងសង្ឃឹមថាក្នុងកិច្ចប្រជុំបន្ទាប់យើងនឹងបានលទ្ធផលវិជ្ជមាន»។ លោកបន្តថា៖ «អ្វីដែលសំខាន់នៅក្នុងស្ថានភាពនេះ ខ្ញុំគិតថាទោះបីជាប្រាក់ខែកម្មកររបស់យើងអាចកើនឡើងដល់កម្រិតណាមួយក៏ដោយ ប៉ុន្តែវានៅតែមិនអាចឆ្លើយតបនឹងតម្រូវការចំណាយនៅឡើយ»។
អ្នកនាំពាក្យក្រសួងការងារ លោក ហេង សួរ បានប្រាប់ ខេមបូចា យ៉ាងខ្លីថា ភាគីទាំងសងខាងនៅបន្តការពារនៅគោលជំហររៀងៗខ្លួននៅឡើយ។
លោក សួរ មានប្រសាសន៍ថា៖ «ខ្ញុំមិនអាចនិយាយជំនួសភាគីទាំងពីរបាននោះទេ»។
អ្នកស្រី កឹង ចាន់ផល្លី វ័យ៣១ឆ្នាំ ជាកម្មករនៅរោងចក្រ Laurelton Diamonds បានឲ្យដឹងថា ការកាត់បន្ថយប្រាក់ឈ្នួលអប្បបរមានឹងធ្វើឲ្យខ្វះខាតប្រាក់សម្រាប់ទ្រទ្រង់គ្រួសារ និងការចំណាយប្រចាំថ្ងៃ។
អ្នកស្រី និយាយថា៖«ប្តីរបស់ខ្ញុំ និងខ្ញុំចំណាយជាធម្មតាប្រាំដុល្លារក្នុងមួយថ្ងៃ ហើយនៅមានកូនប្រុសអាយុបីឆ្នាំ ថ្លៃជួលបន្ទប់ ថ្លៃទឹក និងភ្លើង និងការចំណាយផ្សេងៗទៀត ដែលយើងត្រូវរ៉ាប់រង»។ អ្នកស្រីបន្តថា៖ «គ្រាន់តែប្រាក់ឈ្នួលគោលដូចសព្វថ្ងៃពិបាកនឹងទ្រទ្រង់ជីវភាពគ្រួសារទៅហើយ ចុះបើកាត់ទៀតវានឹងកាន់តែពិបាក»។
អ្នកស្រីសង្ឃឹមថា កិច្ចពិភាក្សាបន្តទៀតនឹងនាំមកនូវលទ្ធផលជាផ្លែផ្កាសម្រាប់កម្មករ ប៉ុន្តែអ្នកស្រីសំណូមពរកុំឲ្យអ្នកចរចាកាត់ប្រាក់ខែបើអាចធ្វើទៅរួច ដោយថាវានឹងធ្វើឲ្យកម្មករដូចជាអ្នកស្រីកាន់តែពិបាក ពិសេសក្នុងវិបត្តិកូវីដ-១៩។ ក្រៅតែពីការចំណាយប្រចាំថ្ងៃ អ្នកស្រី ចាន់ផល្លី ក៏ដូចជាកម្មករផ្សេងទៀតក៏ត្រូវចាត់ចែងប្រាក់ខ្លះទុកសងបំណុលផងដែរ។ អ្នកស្រី ឲ្យដឹងថា ខ្លួនបានខ្ចីប្រាក់ពីធនាគារចំនួន៥ ០០០ដុល្លារដើម្បីទិញដី និងបានសងរំលស់ទៅធនាគារវិញមួយខែ២០០ដុល្លារ។
អ្នកស្រី លើកឡើងថា៖ «អ្នកនៅម្នាក់ឯងនៅតែមិនអាចចិញ្ចឹមខ្លួនបាន ចុះទម្រាំអ្នកមានគ្រួសារ?»។
អ្នកស្រី គឹម សុភី វ័យ២៨ឆ្នាំ ជាកម្មករម្នាក់ទៀតនៅរាជធានីភ្នំពេញ បានឲ្យដឹងដែរថា ប្រាក់ខែបច្ចុប្បន្នត្រូវបែងចែករវាងការចំណាយលើកូនៗ ថ្លៃផ្ទះ និងសងបំណុល ដែលបានខ្ចីដើម្បីទិញដី។
អ្នកស្រីលើកឡើងថា៖ «វាមិនត្រឹមត្រូវទេដែលកាត់ប្រាក់ខែ វាអាចស្លាប់ បើសិនជាគេកាត់ប្រាក់ខែ»។ អ្នកស្រីក៏បានរៀបរាប់ពីការចំណាយក្នុងគ្រួសារ និងបានពន្យល់ថាប្ដីអ្នកស្រីនៅផ្ទះមើលថែកូនចំនួនបីនាក់។
អ្នកស្រីបន្ថែមថា៖ «បើសិនជាគេអាចដំឡើងប្រាក់ខែ វាជាការល្អណាស់សម្រាប់ពួកយើង ដើម្បីផ្គត់ផ្គង់ការចំណាយ និងអាចសន្សំប្រាក់ខ្លះដើម្បីធ្វើអ្វីផ្សេង»។ អ្នកស្រីបន្ថែមថា៖ «យើងនៅមិនទាន់ដឹងនៅឡើយថាឆ្នាំក្រោយអ្វីៗនឹងឡើងថ្លៃឬអត់ ដូចជាម្ហូបអាហារជាដើម»។
កិច្ចប្រជុំត្រីភាគីនឹងធ្វើឡើងជាថ្មីទៀតនៅថ្ងៃទី២១ និង២៨ ខែកញ្ញា ឆ្នាំ២០២១ ខាងមុខ។
ប្រែសម្រួលពីអត្ថបទភាសាអង់គ្លេស៖ Industry, government representatives propose minimum wage decrease for garment workers
