ក្រសួងព័ត៌មានព្រមានអ្នកកាសែត លើករណីដេញតាមរថយន្តសាមុយ និងផ្សាយផ្ទាល់ពីការព្យាបាលអ្នកជំងឺកូវីដ១៩

អាជ្ញាធរបិទផ្លូវឆ្ពោះទៅកាន់តំបន់ក្រហមក្នុងសង្កាត់ស្ទឹងមានជ័យ១ កាលពីថ្ងៃទី២៩ ខែមេសា ឆ្នាំ២០២១។ ខេមបូចា/ ព្រីង សំរាំង
អាជ្ញាធរបិទផ្លូវឆ្ពោះទៅកាន់តំបន់ក្រហមក្នុងសង្កាត់ស្ទឹងមានជ័យ១ កាលពីថ្ងៃទី២៩ ខែមេសា ឆ្នាំ២០២១។ ខេមបូចា/ ព្រីង សំរាំង
Share on facebook
Share on twitter
Share on linkedin
Share on telegram
Share on whatsapp

មួយ​ថ្ងៃ​បន្ទាប់​ពី​ទិវាសេរីភាព​សារព័ត៌មាន ក្រសួង​ព័ត៌មាន​កាល​ពី​ថ្ងៃ​អង្គារ​បាន​ចេញ​សេចក្តីជូន​ដំណឹង​មួយ​ទៅ​កាន់​ក្រុម​អ្នក​សារព័ត៌មាន​ ដោយ​ព្រមាន​ថា ការ​រំលោភបំពាន​វិធានការ​បង្ការ​ជំងឺ​កូវីដ១៩ អាច​នាំ​ឲ្យ​មាន​ចំណាត់ការ​ផ្លូវច្បាប់។ ទោះបីជា​​មិន​បាន​បញ្ជាក់​ពី​ករណីជាក់លាក់​ណា​មួយ​ក៏ដោយ សេចក្តីជូនដំណឹង​នេះ​ត្រូវ​បានធ្វើឡើង បន្ទាប់​ពី​មាន​ការ​ផ្សាយផ្ទាល់​តាម​បណ្តាញ​សង្គម​ហ្វេសប៊ុក​​ ដោយ​បង្ហាញ​ពី​អ្នក​ជំងឺ​កូវីដ១៩ និង​រថយន្ត​សាមុយ​ រង់ចាំ​អស់​ជា​ច្រើន​ម៉ោង​ដើម្បី​ចូលក្នុង​មណ្ឌល​ព្យាបាល​រៀប​ចំ​ឡើង​ដោយ​រដ្ឋាភិបាលនៅក្នុងពហុដ្ឋានកីឡាអូឡាំពិក។

​​សេចក្តីជូន​ដំណឹង​បាន​សរសេរ​ថា៖ «ដើម្បី​រក្សា​សុវត្ថិភាព​សង្គម និង​ទប់ស្កាត់​ការ​ឆ្លងរាលដាល​ជំងឺ​កូវីដ១៩ ទៅ​ក្នុង​សហគមន៍ ក្រសួង​ព័ត៌មាន​សូមធ្វើការ​ណែនាំ​ដល់​អ្នកសារព័ត៌មាន​ទាំងអស់​បញ្ឈប់​រាល់​សកម្មភាព​ខាង​លើ​ជា​បន្ទាន់។ ករណី​នៅ​តែ​បំពាន​ល្មើស​សេចក្តី​ជូន​ដំណឹង​នេះ នឹង​ត្រូវ​ទទួល​ខុសត្រូវ​ចំពោះ​ច្បាប់​ជា​ធរមាន»

​កាល​ពីយប់​ថ្ងៃ​ចន្ទ បណ្តាញ​សារព័ត៌មាន​មួយ​ចំនួន​បាន​បង្ហោះ​ការ​ផ្សាយផ្ទាល់​​អ្នក​ជំងឺ​កូវីដ១៩ និង​រថយន្ត​សាមុយ​ រង់ចាំ​អស់​ជា​ច្រើន​ម៉ោងនៅ​ខាង​ក្រៅ​ពហុកីឡាដ្ឋាន​អូឡាំពិក។ នៅ​ក្នុង​វីដេអូ​នោះ អ្នក​បង្ហោះ​ការ​ផ្សាយផ្ទាល់​បាន​និយាយ​ទៅ​កាន់​អ្នក​ជំងឺ​កូវីដ១៩ និង​អ្នក​បើកបរ​រថយន្ត​សាមុយ​ ដែល​បាន​ប្រាប់​ថា ពួកគេ​បាន​រង់ចាំ​អស់រយៈពេល​រាប់​ម៉ោង​ដើម្បី​ចូល​ទៅ​ក្នុង​មណ្ឌល​ព្យាបាល។ វីដេអូ​នេះ​មានអ្នកចូលមើល​រាប់​ពាន់​នាក់​ភ្លាមៗ។ ​

​អ្នកនាំពាក្យ​ក្រសួង​ព័ត៌មាន​ លោក មាស សុភ័ណ្ឌ បាន​មានប្រសាសន៍​ថា ក្រសួង​នឹង​ចាត់​វិធានការ​ផ្លូវ​ច្បាប់​ប្រឆាំង​នឹង​អ្នកសារព័ត៌មាន​ណា​​ ដែល​បំពាន​វិធានការ​បង្ការ​ជំងឺកូវីដ១៩។

​លោក​បាន​ថ្លែង​ថា៖ «បានឃើញមានអ្នកសារព័ត៌មានមួយចំនួនចែកចាយព័ត៌មាននៅតំបន់ហាមឃាត់  ដូចជាតំបន់ក្រហម ឬ កន្លែងព្យាបាលជំងឺកូវីដ១៩  រួមមានការដេញតាមរថយន្តសាមុយផង ដែរ» ដោយបន្ថែមថា៖ «ភាពទាំងនោះ… បង្កជាចលាចលនៅក្នុងសង្គម»

លោក​បាន​បន្ត​ថា៖ «ក្រសួងព័ត៌មាន​ចាត់ទុក​សកម្មភាព​ទាំង​នោះ​ថា ត្រូវ​បាន​ធ្វើ​ឡើង​ផ្ទុយ​ពី​ច្បាប់ ហើយ​ប្រឆាំង​​នឹង​វិធានការ​ [របស់​ក្រសួង​សុខាភិបាល] ហើយ​សកម្មភាព​ទាំង​នោះ​មិន​ស្រប​តាម​ក្រមសីលធម៌សារព័ត៌មាន»

លោក​បាន​មាន​ប្រសាសន៍​ទៀត​ថា៖ «នេះ​មិនមែន​ជា​ការ​រំលោភបំពាន​សិទ្ធិសេរីភាព​សារព័ត៌មាន​នោះ​ទេ ប្រសិន​បើ​ពួកគាត់​គោរព​ច្បាប់» ដោយ​បន្ថែម​ថា ការ​ដាក់​កំហិត​បន្ថែម​លើ​បណ្តាញ​ផ្សព្វផ្សាយ​គឺ​មាន​គោលដៅ​ដើម្បី​ការពារ​ប្រឆាំង​ការ​រាតត្បាត​ជំងឺ​កូវីដ១៩ ប៉ុណ្ណោះ។

ក្រុង​ភ្នំពេញ និង​ក្រុង​តាខ្មៅ​ បាន​ស្ថិត​ក្រោម​ការ​បិទខ្ទប់​ចាប់​តាំង​ពី​ថ្ងៃ​ទី១៥ ខែ​មេសា​មក ដោយ​មាន​ការ​ដាក់​កំហិត​ផ្សេងៗ​លើ​ការ​ធ្វើ​ដំណើរ ​រួម​ទាំង​លើ​​អ្នកសារព័ត៌មាន​ផង​ដែរ។ អ្នកសារព័ត៌មាន​ត្រូវ​បាន​អនុញ្ញាត​ឲ្យ​ធ្វើ​ដំណើរ​បាន ប្រសិន​បើ​មាន​លិខិត​អនុញ្ញាត​ពិសេស​ពី​ក្រសួង​ព័ត៌មាន។ ប៉ុន្តែ​ទោះ​បី​ជា​មាន​លិខិត​នេះ​ក៏​ដោយ អ្នកសារព័ត៌មាន​ត្រូវ​បាន​ហាមឃាត់​មិន​ឲ្យ​ចូល​តំបន់ក្រហម បើ​មិនមាន​ការ​អនុញ្ញាត​បន្ថែម​ពី​អាជ្ញាធរ​មូលដ្ឋាន។ នៅ​ពេល​ច្បាប់​ថ្មី​ស្តី​ពី​ការ​បង្ការ​ជំងឺ​កូវីដ១៩ ត្រូវ​បាន​អនុម័ត​កាល​ពី​ខែ​មីនា អង្គការ​ការពារ​សិទ្ធិ​មនុស្ស​ព្រមាន​ថា ភាសា​ចែង​មិន​ច្បាស់លាស់​នៅ​ក្នុង​ច្បាប់​នេះ​អាច​ត្រូវ​បាន​យក​ទៅ​ប្រើប្រាស់​ប្រឆាំង​នឹង​បុគ្គល​ណា​ម្នាក់ ដែល​រដ្ឋាភិបាល​ទុក​ថា ជា​អ្នករិះគន់។ កាល​ពី​ឆ្នាំ​មុន អ្នកសារព័ត៌មាន​ម្នាក់​ត្រូវ​ជាប់​ពន្ធនាគារ​រយៈពេល​ ៦​ខែ​ បន្ទាប់​ពី​បាន​បង្ហោះ​សម្តី​នៅ​ក្នុង​សុន្ទរកថា​មួយ​របស់​លោក​នាយករដ្ឋមន្រ្តី​ហ៊ុន សែន​ពាក់ព័ន្ធ​នឹង​ជំងឺ​កូវីដ១៩ ដែល​តុលាការ​បាន​លើកឡើង​ថា ត្រូវ​បាន​ប្រើប្រាស់​ក្នុង​បរិបទ​ញុះញង់។

នៅ​ថ្ងៃ​ទិវា​សេរីភាព​សារព័ត៌មាន អង្គការ​សង្គម​ស៊ីវិល និង​ស្ថាប័ន​ផ្សព្វផ្សាយ​​មួយ​ចំនួន​បាន​និយាយ​ថា កម្ពុជា​កំពុង​ប្រឈម​មុខ​នឹង​ស្ថានភាព​ដុនដាប​ក្នុង​វិស័យ​ផ្សព្វផ្សាយ​ ជា​លទ្ធផល​នៃ​ការ​បន្ត​បង្រ្កាប​ពី​សំណាក់​រដ្ឋាភិបាលមក​លើ​បណ្តាញ​ផ្សព្វផ្សាយ​ឯករាជ្យ រួម​មាន​ ការ​គំរាមកំហែង អំពើហិង្សា និង​ការ​ចាប់​អ្នក​សារព័ត៌មាន​ដាក់​ពន្ធនាគារ។ អ្នក​នាំពាក្យ​ក្រសួង​ព័ត៌មាន​បាន​ច្រានចោល​ការ​ចោទប្រកាន់​នេះ ដោយ​ទទួច​ថា វិស័យ​សារព័ត៌មាន​ក្នុង​ប្រទេស​នៅ​បន្ត​មាន​ដំណើរការ​ដោយសេរី និង​ដោយ​រលូន។

អង្គការ​អ្នកសារព័ត៌មាន​គ្មាន​ព្រំដែន​បាន​ចាត់​ចំណាត់ថ្នាក់​កម្ពុជា​ក្នុង​លេខរៀង​ទី១៤៤ ក្នុង​ចំណោម​ ១៨០​ប្រទេស នៃ​សន្ទស្សន៍​សេរីភាព​សារព័ត៌មាន​ពិភពលោក ឆ្នាំ២០២១ ហើយ​ចំណាត់ថ្នាក់​នេះ​គឺ​ជា ចំណាត់ថ្នាក់​ធ្លាក់ចុះ​បន្តបន្ទាប់​ចាប់​តាំង​ពី​ឆ្នាំ២០១៧មក។ ​

​លោក ណុប វី នាយកប្រតិបត្តិ​សមាគម​សម្ព័ន្ធ​អ្នកសារព័ត៌មាន​កម្ពុជា (CamboJA) បាន​បង្ហាញ​ការ​ព្រួយបារម្ភ​ថា សេរីភាព​សារព័ត៌មាន​នៅ​បន្ត​ស្ថិត​នៅ​ក្រោម​ការ​គំរាមកំហែង​ ជាពិសេស​អំឡុងពេល​ការ​រាតត្បាត​ជំងឺកូវីដ១៩។

​​លោក​បាន​ថ្លែង​ថា៖ «ខ្ញុំ​គិត​ថា [ក្រសួង​ព័ត៌មាន] ហាក់​ដូចជា គំរាម​ចាត់វិធានការ​ប្រឆាំង​នឹង​អ្នកសារព័ត៌មាន» ដោយ​បន្ថែម​ថា អ្នកសារព័ត៌មាន​មិន​គួរ​ត្រូវ​បាន​គំរាមកំហែង ឬ​ប្រឈម​មុខ​នឹង​ចំណាត់ការ​ផ្លូវច្បាប់​នោះ​ទេ ប៉ុន្តែ​ពួកគេ​ត្រូវ​ប្រកាន់​ខ្ជាប់​នូវ​ក្រមសីលធម៌​វិជ្ជាជីវៈ។

​​លោក​បាន​បន្ត​​ថា៖ «នេះ​ជា​សារ​ព្រមាន​មួយ​ទៅ​កាន់​អ្នកសារព័ត៌មាន»

លោក​បាន​បន្ត​ថា រដ្ឋាភិបាល​ទំនង​មិន​សប្បាយ​ចិត្ត​នឹង​ការ​ផ្សាយផ្ទាល់ ដែល​​​ខ្សែវីដេអូ​នេះជាភស្តុតាង មិនអាចកែសម្រួល​​បាន​ ស្តីពី​ស្ថានភាព​លំបាក​ដែល​រដ្ឋាភិបាល​មិន​ចង់​ឲ្យ​សាធារណជន​ឃើញ។

លោក អ៊ិត សូធឿត នាយក​ផ្នែក​ផ្សព្វផ្សាយ​នៃ​មជ្ឈមណ្ឌលកម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) បាន​យល់ស្រប​ជាមួយ​លោក​ ណុប វី ដោយ​និយាយ​ថា អ្នកសារព័ត៌មាន​ឯករាជ្យ​ដើរ​តួ​សំខាន់​នៅ​ក្នុង​សង្គម​ប្រជាធិបតេយ្យ។

លោក​បាន​ថ្លែង​ថា៖ «បាទ នេះ​ជា​ការ​រឹតត្បិត [សេរីភាព​សារព័ត៌មាន] ដោយសារ​តែ​ពួកគេ​មិន​ត្រូវ​​ផ្តល់​សិទ្ធិ​ធ្វើ​ព័ត៌មាន​តាម​វិជ្ជាជីវៈ និង​ពួកគេ​ត្រូវ​បាន​ហាមឃាត់​ពី​ការ​រាយការណ៍​ពី​ហេតុការណ៍​ដូចនោះ។ ដូច្នេះ​ នេះ​គឺ​ប៉ះពាល់​លើ​សិទ្ធិ​ទទួល​បាន​ព័ត៌មាន»

លោក​បាន​បន្ថែម​ថា ការ​រាយការណ៍​ពី​ស្ថានភាព​អវិជ្ជមាន​អាច​ជួយ​ឲ្យ​រដ្ឋាភិបាល​ដឹង​ពី​បញ្ហា និង​លើកកម្ពស់​អភិបាលកិច្ច។

​​កាល​ពី​ថ្ងៃ​អង្គារ ក្រសួង​សុខាភិបាល​បាន​ប្រកាស​នូវ​ករណីឆ្លង​ជំងឺ​កូវីដ១៩​ថ្មី​ចំនួ ៩៣៨ករណី រួម​មាន ៦០៨ករណី​នៅ​ក្រុង​ភ្នំពេញ ១៧៥​ករណី​ក្នុង​ខេត្ត​កណ្តាល ៧៧​ករណី​ក្នុង​ខេត្ត​ព្រះសីហនុ ៥១​ករណី​ក្នុង​ខេត្ត​បន្ទាយមានជ័យ និង​ករណី​ផ្សេងទៀតមាន​នៅ​ខេត្ត​កំពង់ស្ពឺ ព្រៃវែង ត្បូងឃ្មុំ ស្វាយរៀង បាត់ដំបង និង​ពោធិ៍សាត់។

គិត​មក​ត្រឹម​ថ្ងៃ​អង្គារ​ មានមនុស្ស​១០៧​នាក់​បាន​ស្លាប់​ដោយសារ​ជំងឺ​កូវីដ១៩ ដែល​ការ​ស្លាប់​ទាំងអស់​គឺ​ដោយសារ​ការ​រាតត្បាត​ជំងឺកូវីដ១៩ នៅ​ពេល​ចុង​ក្រោយ​បង្អស់​នេះ។ មន្រ្តី​សុខាភិបាល​បាន​កត់ត្រា​ករណីឆ្លង​សរុប​ចំនួន ១៧.៧៤៤​ករណី​ ចាប់​តាំង​ពី​ការ​ឆ្លង​ក្នុង​សហគមន៍​កាល​ពី​ថ្ងៃ​ទី២០ ខែ​កុម្ភៈ ដោយ​ធ្វើ​ឲ្យ​ចំនួន​ករណី​ឆ្លង​សរុប​កើន​ដល់ ១៦.២៩៩ ចាប់តាំង​ពី​ការ​រាតត្បាត​ជំងឺ​កូវីដ១៩ កាល​ពី​ដើម​ឆ្នាំ​ ២០២០៕

ប្រែសម្រួលពីអត្ថបទភាសាអង់គ្លេស៖ Information Ministry warns journalists against ‘ambulance chasing’ after video of long waits for COVID-19 patients goes viral

313 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »