ក្រសួងមហាផ្ទៃលើកទឹកចិត្តដល់អ្នកដែលអះអាងថា រងគ្រោះក្នុងការវិនិយោគជាមួយក្រុមហ៊ុនខេមបូឌាន អ៊ីនវេសស្ទ័រ ខមភើរេសិន ភីអិលស៊ី(CIC) សហការដាក់ពាក្យបណ្តឹងទៅស្ថាប័នពាក់ព័ន្ធដើម្បីមានភស្ភុតាងបន្ថែមសម្រាប់ការស៊ើបអង្កេត។
អ្នកនាំពាក្យរងក្រសួងមហាផ្ទៃលោក ទូច សុឃៈ មានប្រសាសន៍ថា បើអ្នកអះអាងជាជនរងគ្រោះដោយសារក្រុមហ៊ុនCICដាក់ពាក្យបណ្តឹង និងបង្ហាញភស្ភុតាងពាក់ព័ន្ធ គឺមានសារៈសំខាន់ដល់សមត្ថកិច្ចធ្វើការងារ។ លោកបន្តថា ការដាក់ពាក្យបណ្តឹងនេះអាចធ្វើឡើងតាមសមត្ថកិច្ចចំណុះឱ្យក្រសួងមហាផ្ទៃ និងតាមតុលាការបាន។
លោក ទូច សុឃៈមានប្រសាសន៍ថា៖ «ប្តឹងទីមួយ គឺប្តឹងទៅតុលាការក៏បានទី២ ប្តឹងមកសមត្ថកិច្ចចំណុះក្រសួងមហាផ្ទៃក៏បាន។ សមត្ថកិច្ចចំណុះក្រសួងមហាផ្ទៃអាចមានចាប់ពីប៉ុស្តិ៍នគរបាល អធិការដ្ឋាន ស្នងការដ្ឋាន [ចំណែកឯ]នៅក្រសួងមហាផ្ទៃតែម្តងនោះ គឺមាននាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ ហើយក្រៅពីនេះក៏មានសមត្ថកិច្ចផ្សេងៗដទៃទៀត ដូចជាកងរាជអាវុធហត្ថជាដើម»។
ចំពោះការសួរថា តើសមត្ថកិច្ចមានការស្រាវជ្រាវស៊ើបអង្កេតករណីនេះឬនៅ? ស៊ើបដល់ណាហើយ? លោក ទូច សុឃៈ បញ្ជាក់ថា មិនអាចផ្តល់ព័ត៌មានឱ្យបានទេព្រោះជាការងារសម្ងាត់របស់សមត្ថកិច្ច។
លោក ទូច សុឃៈ បញ្ជាក់ថា៖ «នៅសមត្ថកិច្ចក្រសួងមហាផ្ទៃ ឬក៏ក្រសួងផ្សេងក៏ដោយក៏មិនអាចប្រកាសជាសាធារណៈ ឬក៏មិនអាចបង្ហើបប្រាប់សាធារណជន ឬក៏បើកចំហថាយើងចាប់ផ្តើមស៊ើបអង្កេតរឿងនេះ យើងចាប់ផ្តើមស៊ើបអង្កេតរឿងនោះ [វា]ហូរហែណាស់។ ព្រោះពេលខ្លះ គឺវាធ្វើឱ្យប៉ះពាល់ដល់សាច់រឿងទាំងមូលដែលយើងតែងនិយាយភាសាថាបែកសំណុំរឿង ឬក៏បែករឿង បែកមុខសញ្ញា។ បានន័យថាម៉េច? បានន័យថាមុខសញ្ញាដែលយើងត្រូវស៊ើបអង្កេតប្រមូលដឹងខ្លួន។ ដឹងខ្លួនទី១បំផ្លាញភស្តុតាង ទី២បំបាត់ប្រភព ឬក៏តម្រុយផ្សេងៗ [និង]ទី៣គឺអាចរហូតដល់ទៅបំបិទមាត់សាក្សី ឬក៏គេចខ្លួនដោយប្រការណាមួយ»។
លោកវេជ្ជបណ្ឌិតគួច ម៉េងលី បានផ្សព្វផ្សាយសារនៅថ្ងៃទី២៣ ខែមីនា ថា លោករងគ្រោះដោយដាក់ទុនជាមួយក្រុមហ៊ុនCICអស់ជិត៣០ម៉ឺនដុល្លារ។ លោកបានអំពាវនាវដល់រដ្ឋាភិបាលឱ្យមានវិធានការលើថ្នាក់ដឹកនាំក្រុមហ៊ុនCICដើម្បីផ្តល់លុយដល់រូបលោក និងអ្នករងគ្រោះផ្សេងទៀត។
ទោះយ៉ាងណា លោក គួច ម៉េងលី បញ្ជាក់ថា រហូតដល់ថ្ងៃទី១ ខែមេសា នៅមិនទាន់មានដំណោះស្រាយអ្វីនោះទេ។
លោក គួច ម៉េងលី ថ្លែងថា៖ «ដូចជាអត់មានអីថ្មីថ្មោងផងលោកគ្រូ! ដូចជាអត់មានផងបាទ! អត់សោះ! ស្ងាត់ឈឹង»។
ពេលសាកសួរថា តើលោក គួច ម៉េងលី បានដាក់ពាក្យប្តឹងជាផ្លូវការទៅក្រសួងមហាផ្ទៃ ឬដាក់ទៅតុលាការឬនៅ? លោក គួច ម៉េងលី សុំមិនផ្តល់យោបល់បន្ថែមលើករណីនេះទេ។
នៅថ្ងៃទី២៤ ខែមីនា គណៈមេធាវីកម្ពុជាបានប្រកាសជួយផ្តល់មេធាវីដោយឥតគិតថ្លៃដល់អ្នកវិនិយោគនៅក្រុមហ៊ុនCIC ដែលត្រូវការសេវាផ្លូវច្បាប់។
ប្រធាននាយកដ្ឋានការពារក្តីជូនជនក្រីក្រនៃគណៈមេធាវីកម្ពុជាលោក គឹម រ័ត្នណារ៉ុង ឱ្យដឹងថា រហូតដល់ថ្ងៃទី២ ខែមេសា ទទួលបានការពិគ្រោះយោបល់ពីអ្នកវិនិយោគជាមួយក្រុមហ៊ុន CICតែ២ទៅ៣នាក់ប៉ុណ្ណោះ។ លោកបន្តថា អ្នកទាំងនេះមិនទាន់សម្រេចដាក់ពាក្យប្តឹងទេ។
លោក គឹម រ័ត្នណារ៉ុង មានប្រសាសន៍ថា៖ «ខ្ញុំសួរទៅគ្នាខ្ញុំផ្សេងដែរបង ឆាតទៅមេធាវីម្នាក់ទៀតដែរ ព្រោះតាំងពីបងសួរឆ្លើយបងលើកមុនម្តង មកដល់ពេលនេះអត់ទាន់មានអ្នកណាទាក់ទងមកទៀតផងបង។ ខ្ញុំមិនទាន់បានជួបប្រជុំគ្នាបូកសរុប ប៉ុន្តែខ្ញុំមានតែ២[រឺ]៣នាក់ទេ។ សម្រាប់ខ្ញុំគ្រាន់តែសួរព័ត៌មាន មិនមានជាការដាក់ពាក្យបណ្តឹងអីទេ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យង់ គិមអេង កត់សម្គាល់ថា ក្រុមហ៊ុនដែលទទួលលុយពីសាធារណជនក្រោមគម្រោងវិនិយោគតែងតែមានបញ្ហាបន្តបន្ទាប់។ លោកបន្តថា ពលរដ្ឋមានការឈឺចាប់ និងព្រួយបារម្ភដោយសារតែលុយជាច្រើនបាត់ដោយមិនដឹងមូលហេតុចំណែកអ្នកពាក់ព័ន្ធមានការចាប់ខ្លួនតែមួយពេលខ្លីប៉ុណ្ណោះ។
លោក គិមអេង បន្ថែមថា៖ «កន្លងមកគឺបាត់លុយអត់ដែលដឹងថាបាត់ទៅណា ដែលធ្វើឱ្យគ្នាការឈឺចាប់ ហើយតែងតែស្រែករកយុត្តិធម៌បាទ។ ចំពោះបញ្ហាទាំងអស់នេះគឺយើងក៏ឃើញមានចំណាត់ការរបស់អាជ្ញាធរដែលថាកន្លងមកឃើញមានចំណាត់ការអីចាប់ខ្លួនចាប់អីចឹងទៅ នៅពេលដែលមានប្រតិកម្មរបស់ប្រជាពលរដ្ឋ រួចហើយទៅក៏ខ្លះបួនប្រាំខែ ប្រាំប្រាំមួយខែ ឃើញលែងវិញទៅបាទ។ ដល់អ៊ីចឹងធ្វើឱ្យប្រជាពលរដ្ឋគាត់ឆ្ងល់ទៀតហើយថាតើបញ្ហាមកពីអី? »។
ភាពចម្រូងចម្រាស់របស់ក្រុមហ៊ុនCIC កើតឡើងតាំងពីចុងឆ្នាំ២០២៣ ដែលបញ្ហាក្រុមហ៊ុននេះប្រមូលប្រាក់ពីសមាជិកប្រមាណ១០០លានដុល្លារ ប៉ុន្តែមិនបានផ្តល់ការប្រាក់ និងមិនអាចដកប្រាក់ដើមវិញបានតាំងពីខែសីហា ឆ្នាំ២០២៣។
លោក យ៉ង ប៉ាក ជានាយកប្រតិបត្តិនៃក្រុមហ៊ុនAGRIBEE Cambodia ជាអ្នកដាក់លុយវិនិយោគម្នាក់ដែរនៅក្រុមហ៊ុន CICម្នាក់ដែរ។ លោកបានប្រើប្រាស់គណនេយ្យហ្វេសប៊ុកវាយប្រហារលោក ព្រាប កុល ជារដ្ឋមន្ត្រីប្រតិភូអមនាយករដ្ឋមន្ត្រី ជាថ្នាក់ដឹកនាំម្នាក់ក្នុងក្រុមហ៊ុនCICថា ជាអ្នកកិបកេងយកលុយក្រុមហ៊ុនCICប្រមាណ៨០លានដុល្លារ។ ក្រោយមកនៅខែមករា ឆ្នាំ២០២៤ សមត្ថកិច្ចចាប់ខ្លួនលោក យ៉ង ប៉ាក តាមបណ្តឹងរបស់លោកព្រាប កុល។
សាស្ត្រាចារ្យ និងជាអ្នកប្រឹក្សាយោបល់ផ្នែកច្បាប់ លោក ស៊ឹម វិបុល មានប្រសាសន៍ថា បើការស្វែងរកដំណោះស្រាយជាមួយថ្នាក់ដឹកនាំក្រុមហ៊ុនមិនបាន អ្នកវិនិយោគនៅក្រុមហ៊ុនCIC ត្រូវប្រើជម្រើសបន្តប្តឹងទៅស្ថាប័នពាក់ព័ន្ធ។
លោក ស៊ឹម វិបុល បន្តថា ស្ថានភាពបច្ចុប្បន្នរដ្ឋាភិបាលត្រូវយកចិត្តទុកដាក់ដោះស្រាយឱ្យបានលឿនបំផុតដើម្បីស្តារសេចក្តីទុកចិត្តរបស់អ្នកវិនិយោគក្នុង និងក្រៅប្រទេស។
លោក ស៊ឹម វិបុល មានប្រសាសន៍៖ «រដ្ឋាភិបាលត្រូវតែចាត់វិធានការជាបន្ទាន់ ដើម្បីការពារ[ផលប្រយោជន៍ទេសជាតិ]។ វាមិនមែនការពារត្រឹមមុខមាត់ប៉ុណ្ណឹងទេ គឺការពារដល់ផលប្រយោជន៍ខាងសេដ្ឋកិច្ចទៀត។ ផលប្រយោជន៍សេដ្ឋកិច្ច ព្រោះតែបាត់វិនិយោគ គឺវាបាត់លុយហើយ អាហ្នឹងបាត់លុយបាត់សេដ្ឋកិច្ចហើយ។ អ៊ីចឹងវាអត់មានអ្នកណាចង់រកស៊ីជាមួយយើង»។ លោកបន្តថា៖ «ប្រទេសសូម្បីអន្តរជាតិ ខ្ញុំធ្លាប់ទៅប្រទេសវៀតណាម ឥឡូវនៅថៃអី គឺគេគិតផលប្រយោជន៍ពលរដ្ឋគេមុន។ ឥឡូវបើសូម្បីតែពលរដ្ឋខ្លួនឯង ហើយយើងរកយុត្តិធម៌ឱ្យពលរដ្ឋ ខ្លួនឯងអត់បានផង ហើយយើងទៅរកយុត្តិធម៌ទៅជាតិសាសន៍ណាបាន? យើងគិតមើលប៉ុណ្ណឹងបានហើយ»។
ក្រោយពីមានការផ្ទុះឡើងរឿងអាស្រូវរបស់ក្រុមហ៊ុCICនេះ និយ័តករមូលបត្រកម្ពុជា ក៏បានតម្រូវឱ្យក្រុមហ៊ុនមួយនេះ ចាត់វិធានការ កែទម្រង់ ពិនិត្យ រៀបចំគ្រប់គ្រងចំនួនប្រាក់វិនិយោគរបស់វិនិយោគិន និងចាត់ចែងទ្រព្យដែលកាត់កងបានឱ្យបានត្រឹមត្រូវតាមគោលការណ៍ច្បាប់ច្បាស់លាស់ ក្នុងគោលដៅអភិវឌ្ឍន៍ដើម្បីធានាបានជាប្រយោជន៍ដល់វិនិយោគិនដែលបានដាក់ប្រាក់ជាមួយក្រុមហ៊ុន។
តាមរយៈសេចក្តីប្រកាសព័ត៌មានចុះថ្ងៃទី២៥ ខែមីនា និយ័តករមូលបត្រកម្ពុជា បញ្ជាក់ថា ខ្លួនបានប្រមូលបានមកវិញនូវទ្រព្យកម្មសិទ្ធិរបស់ក្រុមហ៊ុនCIC ប្រមាណ៩០% នៃចំនួនទឹកប្រាក់សរុប និងកំពុងជំរុញការរៀបចំវេចខ្ចប់ឱ្យបានត្រឹមត្រូវតាមផ្លូវច្បាប់ ដើម្បីការពារ ផលប្រយោជន៍របស់វិនិយោគិនស្របច្បាប់។
នៅថ្ងៃទី២៥ ខែមីនាដដែល ក្រុមហ៊ុន CIC បានចេញសេចក្តីបំភ្លឺមួយថា ក្រុមហ៊ុនមានបញ្ហាមិនអាចផ្តល់ប្រាក់ដើម និងការប្រាក់ឱ្យ ទៅសមាជិកវិញបានដោយសារតែឥទ្ធិពលនៃវិបត្តិសេដ្ឋកិច្ចសកល។ ក្រុមហ៊ុននេះក៏អំពាវនាវដល់អ្នកដាក់ទុនវិនិយោគទាំងអស់សហការស្វែងរកដំណោះស្រាយជាមួយក្រុមហ៊ុន។
ជុំវិញករណីក្រុមហ៊ុនCIC ខេមបូចាមិនអាចសុំការបកស្រាយពីលោក ជិន ម៉ាលីន អ្នកពាក្យក្រសួងយុត្តិធម៌បានទេគិតត្រឹមថ្ងៃទី៤ ខែមេសានេះ ប៉ុន្តែលោកបានបញ្ជាក់នៅលើទំព័រហ្វេសប៊ុកផ្លូវការរបស់លោកកាលពីថ្ងៃទី២៥ ខែមីនា ថាស្ថាប័នមានសមត្ថកិច្ចមានការយកចិត្តទុកដាក់ខ្ពស់ជាប់ជាប្រចាំចំពោះរឿងនេះ និងបានធ្វើការជំហានៗ និងខិតខំសម្របសម្រួលរកដំណោះស្រាយការពារផលប្រយោជន៍របស់អ្នកវិនិយោគតាមច្បាប់។
លោក ជិន ម៉ាលីនបញ្ជាក់បន្តថា៖ «សូមរង់ចាំមើលអ្វីដែលជាដំណោះស្រាយតាមផ្លូវច្បាប់ក្នុងរឿងនេះ ដោយអាជ្ញាធរ ហើយអ្នកវិនិយោគទាំងឡាយក្នុងក្រុមហ៊ុន CIC គួរខិតខំរកវិធីដោះស្រាយបញ្ហាក្នុងពេលដែលក្រុមហ៊ុនជួបវិបត្តិ ពិសេស ត្រូវបានលើកទឹកចិត្តក្នុងការរកដំណោះស្រាយមួយដែលល្អបំផុត ដើម្បីធានាឱ្យបានជាអតិបរមានូវផលប្រយោជន៍របស់អ្នកវិនិយោគក្នុងគ្រាដែលក្រុមហ៊ុនកំពុងជួបការលំបាក»។
សម្រាប់អ្នកនាំពាក្យរដ្ឋាភិបាលលោក ប៉ែន បូណា បញ្ជាក់បន្ថែមថា កម្ពុជាជាប្រទេសមានច្បាប់ ដូច្នេះភាគីមានបញ្ហាមិនថា ក្រុមហ៊ុនCIC ឬករណីផ្សេងទេគឺមានតែការដាក់ពាក្យប្តឹងតាមផ្លូវច្បាប់។
លោក ប៉ែន បូណា មានប្រសាសន៍ថា៖ «ប្អូនឃើញគេក្រុមហ៊ុនគេពន្យល់ហូរហែតើអូន។ តាមហ្នឹងទៅ ហើយបើភាគីគាត់ពាក់ព័ន្ធ គាត់ប្តឹងផ្តល់។ មេធាវីគេមានទទួល។ មានតែធ្វើតាមច្បាប់អូន។ ដូចអូនរកស៊ីមានរឿងចឹងណាអូន អូនមិនទៅរកច្បាប់? អូនមានកិច្ចសន្យា អូនមានអីៗជាមួយភាគីផ្សេងៗ ហើយធ្វើម៉េចបើអូនឯងអត់ទៅរកច្បាប់ឱ្យដោះស្រាយ?»។
ខេមបូចា បានព្យាយាមទាក់ទងទៅថ្នាក់ដឹកនាំក្រុមហ៊ុន CIC រួមមានលោក គុយ វ៉ាត លោក ឃីម សុខហេង លោក ព្រាប កុល និងលោក សោម សម្បត្តិ ទាំងខលតាមទូរសព្ទ និងផ្ញើសារតាមតេឡេក្រាម តាំងពីថ្ងៃទី២៥ ខែមីនា ប៉ុន្តែមិនមានការឆ្លើយតបទេ។
ករណីក្រុមហ៊ុនCIC នៅស្ថិតនៅក្នុងស្ថានភាពចម្ងល់ច្រើនរបស់មហាជនដែលរហូតដល់ថ្ងៃទី២ខែមេសា នៅមិនទាន់មានព័ត៌មានពីចំនួនអ្នកវិនិយោគជាក់លាក់នៅឡើយ ហើយក៏មិនទាន់មានព័ត៌មានពីស្ថាប័នពាក់ព័ន្ធលើករណីនេះនៅឡើយ។
បើតាមលោក វេជ្ជបណ្ឌិត គួច ម៉េងលី អ្នកដែលវិនិយោគនៅក្នុងក្រុមហ៊ុន CIC ហើយកំពុងរងគ្រោះដោយការបាត់លុយនេះមានជាង១ពាន់នាក់បានដាក់ប្រាក់សរុបប្រមាណ១០០លានដុល្លារ៕
