សមាគមសម្ព័ន្ធអ្នកសារព័ត៌មានកម្ពុជា

ដំណើរការចេញប្លង់ដីមិនប្រក្រតី នាំឱ្យពលរដ្ឋក្នុងភូមិមួយនាខេត្តកណ្ដាលងើបតវ៉ា

លោក សេង សឿន ឡើងតវ៉ាចំពោះមុខក្រុមការងារដោះស្រាយបណ្ដឹងពលរដ្ឋនាបរិវេណវត្តស្ដៅកន្លែង ក្នុងឃុំដីឥដ្ឋ ស្រុកគៀនស្វាយ ខេត្តកណ្តាល។ រូបថតកាលពីថ្ងៃទី១១ ខែមករា ឆ្នាំ២០២២។ ខេមបូចា/ វណ្ណ វិចារ
លោក សេង សឿន ឡើងតវ៉ាចំពោះមុខក្រុមការងារដោះស្រាយបណ្ដឹងពលរដ្ឋនាបរិវេណវត្តស្ដៅកន្លែង ក្នុងឃុំដីឥដ្ឋ ស្រុកគៀនស្វាយ ខេត្តកណ្តាល។ រូបថតកាលពីថ្ងៃទី១១ ខែមករា ឆ្នាំ២០២២។ ខេមបូចា/ វណ្ណ វិចារ

ដំណើរការចុះបញ្ជីប្លង់ដីជាប្រព័ន្ធនាភូមិដីឥដ្ឋកោះផុស២ ឃុំដីឥដ្ឋ ស្រុកគៀនស្វាយ ខេត្តកណ្ដាល លេចចេញភាពមិនប្រក្រតីធ្ងន់ធ្ងរបណ្ដាលឱ្យពលរដ្ឋជាច្រើននាក់ប្ដឹងតវ៉ា បន្ទាប់ពីមន្ត្រីជំនាញ​សុរិយាដី បិទ​ផ្សាយ​ជា​សាធារណៈ​នូវ​ឯកសារ​សុរិយោដី​ រួម​មាន​ប្លង់​សុរិយោដី​ និង​បញ្ជី​ឈ្មោះ​អ្នកកាន់កាប់​ដីធ្លី។

ពលរដ្ឋជិត២០០គ្រួសារដាក់ពាក្យបណ្ដឹងប្ដឹងទៅកាន់អាជ្ញាធរមូលដ្ឋាន ដោយហេតុផលថា ទំហំដីលើប្លង់របស់ពួកគាត់តូចជាងទំហំដីធ្លីដែលកាន់កាប់ជាក់ស្ដែង។ ក្រុមប្រជាពលរដ្ឋកំពុងរង់ចាំលទ្ធផលដោះស្រាយពីសំណាក់អាជ្ញាធរស្រុកគៀនស្វាយ ខេត្តកណ្ដាល។

លោក  សេង សឿន អាយុ៥៨ឆ្នាំ ជាម្ចាស់ដីម្នាក់ក្នុងចំណោមម្ចាស់ដីចំនួន៥គ្រួសារដែលមាន​ដីសូន្យម៉ែត្រការ៉េនៅក្នុងប្លង់បណ្ដោះអាសន្នចេញដោយសុរិយោដីស្រុកគៀនស្វាយ ខេត្តកណ្ដាល។ មានទីលំនៅសង្កាត់គោកឃ្លាង ខណ្ឌសែនសុខ រាជធានីភ្នំពេញ។ លោក សេង សឿន​ បានទទួលចំណែកដីមួយប្លង់ទំហំជាង៥០០ម៉ែត្រការ៉េពីម្ដាយដែលមានទីតាំង នៅភូមិកំណើតនាភូមិកោះដីឥដ្ឋកោះផុស២ ឃុំដីឥដ្ឋ ស្រុកគៀនស្វាយ ខេត្តកណ្ដាល។

ពាក់អាវដៃខ្លីខោជើងវែងពាក់ស្បែកជើងផ្ទាត់ លោក សេង សឿន ប្រាប់ថា លោកជិះម៉ូតូតាំង​ពី​ព្រលឹមស្រាងៗដើម្បីមកដាក់ពាក្យបណ្ដឹងតវ៉ាពីភាពមិនប្រក្រតីនៃការធ្វើប្លង់កម្មសិទ្ធិនេះ។​ក្នុងពិធីជួបជុំមួយនាបរិវេណវត្តស្ដៅកន្លែង កាលពីសប្ដាហ៍មុន លោក សេង សឿន និយាយ​ទាំង​អួលដើមក ដោយលើកឯកសារថតចម្លងប្លង់ដីចាស់ដែលចេញដោយ​អាជ្ញាធរសម័យ​រដ្ឋកម្ពុជា​ និងបង្កាន់ដៃវាស់ដីដើម្បីបង្ហាញទៅកាន់ក្រុមការងាររបស់សាលាស្រុកគៀនស្វាយ។ លោក​បានឡើងកាន់ក្បាលមេក្រូស្នើទៅកាន់អាជ្ញាធរស្រុកគៀនស្វាយឱ្យដោះស្រាយ​បញ្ហា​ជូនគាត់។

លោក សេង សឿន និយាយថា៖ «ខ្ញុំឡើងមកនេះកើតទុក្ខមិនសុខចិត្តជាខ្លាំង។ ខ្ញុំរស់នៅលើដី​នេះធ្វើដីនេះតាំងពីកើតមក។ ដីខ្ញុំក្បាល៧ម៉ែត្របណ្ដោយជាង៧០ម៉ែត្រ។ មន្ត្រីសុរិយោដីវាស់​វែងច្បាស់លាស់ម៉េចបានជាចេញមកប្លង់ដីមានសូន្យម៉ែត្រការ៉េទៅវិញ! »។

លោកបន្តថា៖ «អាជ្ញាធរជំនាញត្រូវតែដោះស្រាយបញ្ហាឱ្យខ្ញុំ ខ្ញុំជូនពួកគាត់វាស់ដី​ច្បាស់លាស់​ស្រាប់តែចេញប្លង់មករបៀបខ្ជីខ្ជាបែបនេះទៅកើត»។

លោក សេង សឿន កាន់បង្កាន់ដៃវាស់ដីលើក្បាលដីលេខ ២២៦ ដោយមានព្រំដីខាងជើង​ជាប់ផ្លូវរទេះ ខាងត្បូងជាប់ក្បាលដីលេខ២២៤ ខាងកើតជាប់ផ្លូវរទេះ និងខាងលិចជាប់ក្បាល​ដីលេខ២២៥។

លោក សេង សឿន ចង្អុលបង្ហាញពីព្រំដីរបស់គាត់នៅក្នុងភូមិដីឥដ្ឋកោះផុស២ ឃុំដីឥដ្ឋ ស្រុកគៀនស្វាយ ខេត្តកណ្ដាល។ រូបថតកាលពីថ្ងៃទី១១ ខែមករា ឆ្នាំ២០២២។ ខេមបូចា/ វណ្ណ វិចារ

ស្ត្រីវ័យ៣៩ ឆ្នាំ ឈ្មោះគឹម សារ៉ា បានលើកឡើងថា ប្លង់ដីរបស់អ្នកស្រីក៏មានផ្ទៃសូន្យ​ម៉ែត្រ​ការ៉េដែរ។ អ្នកស្រីបញ្ជាក់ថា អ្នកស្រីមិនសុខចិត្តចំពោះរឿងនេះទេ។

អ្នកស្រី គឹម សារ៉ា៖ «ដីខ្ញុំម៉ែខ្ញុំចែកឱ្យក្បាល៧ម៉ែត្រជាង បណ្ដោយ៣០ម៉ែត្រ។ ខាងសុរិយាដី​គេវាស់ ផ្តិតមេដៃព្រំត្រឹមត្រូវស្រាប់តែចេញប្លង់មកសូន្យការ៉េ ពិតជាមិនអាចទទួលយក​បាន​ទេ»

អាចារ្យកាន់ពេលាមង្គលការប្រចាំឃុំដីឥដ្ឋ បុរសអាយុ៧៤ឆ្នាំ លោក មាស យ៉ាន មាន​ប្រសាសន៍ថា ទំហំប្លង់ដីរបស់លោកដែលអាជ្ញាធរសុរិយោដីបានបិទផ្សាយ តូចជាងទំហំ​ដីដែលលោកកាន់កាប់ចំនួនជាង៣ពាន់ម៉ែត្រការ៉េ។​ លោកបន្តថា លោកមិនសុខចិត្តចំពោះ​ការចេញប្លង់ដីដែលខុសពីទំហំជាក់ស្ដែងបែបនេះទេ។

លោក មាស យ៉ាន៖ «អ៊ំមិនសុខចិត្តទើបអ៊ំប្ដឹង។ បាត់ដីជាងបីពាន់ការ៉េមិនមែនតិច​ឯណា​កូនអើយ ! អ៊ំកើតនៅហ្នឹងរស់នៅហ្នឹងតាំងពីតូចក្រូចឆ្មារមក ដីនេះរបស់អ្នកណា ដីណាជា​ដីបឹង ដីអូរ អ៊ំច្បាស់ដូចបាតដៃ ។ ដូច្នេះបើកាត់ឱ្យរដ្ឋឱ្យដឹងកាត់កុំបន្លំ ម្យ៉ាងមុនកាត់ដីយក​ទៅធ្វើអីមួយអាជ្ញាធរត្រូវប្រជុំប្រាប់ពលរដ្ឋផងមិនមែនចេះតែធ្វើស្រេចចិត្តទេ»

តំណាងប្រជាពលរដ្ឋភូមិដីឥដ្ឋកោះផុស២ លោក សួ ឆ្លូញ មានប្រសាសន៍ថា អ្នកភូមិកំពុង​រង់ចាំមើលចំណាត់ការពីអាជ្ញាធរស្រុក។

លោក សួ ឆ្លូញ៖«ប្រជាពលរដ្ឋភាគច្រើនមានដីធ្លីតិចតួចបើសិនជាអស់ទៀតយើង​បានដី​ឯណារស់នៅ។ យើងខ្ញុំសុំឱ្យអាជ្ញាធរដោះស្រាយបញ្ហាទាំងនេះ​ឱ្យបានឆាប់តាមដែល​អាច​ធ្វើទៅបាននិងដោយស្មោះត្រង់»

មេភូមិដីឥដ្ឋកោះផុស២ លោក កែវ បុល មានប្រសាសន៍ថា ការចេញប្លង់ដីបណ្ដោះអាសន្ន​ខុសពីការពិតដូច្នេះអាចជាកំហុសបច្ចេកទេសពីមន្ត្រីសុរិយោដី។ លោកថា ស្នាក់ការភូមិ​បាន​ទទួលពាក្យបណ្ដឹងជាច្រើនពីសំណាក់ប្រជាពលរដ្ឋ ដែលប្ដឹងថា ដីក្នុងប្លង់តូចជាងដី​ជាក់​ស្ដែង។

មេភូមិដីឥដ្ឋកោះផុស២ លោក កែវ បុល៖ «ខ្ញុំទទួលបានបណ្ដឹងចំនួន១៨៥គ្រួសារ តែមិនទាន់​អស់ទេ។ ពលរដ្ឋសង្ស័យថា អាជ្ញាធរភូមិឃុំនេះលួចលក់ដីលួចកាត់ដីលក់  តាមពិតអាជ្ញាធរ​ភូមិឃុំអត់ដឹងអីផង»។

លោកបន្តថា៖ «ពួកយើងខ្ញុំជាអាជ្ញាធរបានជូនខាងជំនាញវាស់វែងដីទាំងនេះ​រួចរាល់​ និងថែម​ទាំងសង្ឃឹមថានឹងបានប្លង់ដីជាប្រព័ន្ធឆាប់ៗមិនគួរណាមានភាពមិនប្រក្រតីកើតឡើងទេ ដូច្នេះភាពមិនប្រក្រតីទាំងនេះស្ថិតនៅលើអាជ្ញាធរជំនាញសុរិយោដីមិនមែនមកពីអាជ្ញាធរមូលដ្ឋានឡើយ»

តាមរបាយការណ៍បឋមដែលអាជ្ញាធរភូមិដីឥដ្ឋកោះផុស២ទទួល ឱ្យដឹងថា ទំហំដីក្នុងប្លង់​សរុប របស់ប្រជាពលរដ្ឋមានទំហំតូចជាងដីពិតជាក់ស្ដែងប្រមាណជាង៣ម៉ឺនម៉ែត្រការ៉េ។ បើ​និយាយឱ្យស្រួលស្ដាប់បានន័យថា ដីពលរដ្ឋទាំងជិត២រយគ្រួសារប្រឈមនឹងការបាត់បង់ដី ធ្លីសរុបជាង៣ម៉ឺនម៉ែត្រការ៉េប្រសិនណាប្លង់ដីបណ្ដោះអាសន្ននេះចូលជាធរមាន។

ឯកសារចុះបញ្ជីប្លង់ដីជាប្រព័ន្ធ នាភូមិដីឥដ្ឋកោះផុស២ ឃុំដីឥដ្ឋ បង្ហាញថា ទំហំដីជាង៣ម៉ឺន​ម៉ែត្រ​ការ៉េដែលពលរដ្ឋប្រឈមនឹងការបាត់បង់នោះ ជាប្លង់ដីកម្មសិទ្ធិរបស់ពលរដ្ឋម្នាក់ឈ្មោះ បាន ប្រាក់។

អភិបាលរងស្រុកគៀនស្វាយ លោក ពៅ គឹមលី ថ្លែងសន្យាជាមួយ​ប្រជាពលរដ្ឋដើម្បី​ដោះស្រាយ​ភាពមិនប្រក្រតីលើការចុះបញ្ជីដីធ្លី នាវត្តស្ដៅកន្លែង ​ក្នុងឃុំដីឥដ្ឋ ស្រុកគៀនស្វាយ ខេត្តកណ្តាល។ រូបថតកាលពីថ្ងៃទី១១ ខែមករា ឆ្នាំ២០២២។ ខេមបូចា/ វណ្ណវិចារ

យ៉ាងណាក្ដីអភិបាលរងស្រុកគៀនស្វាយ និងជាប្រធានក្រុមការងារទទួលពាក្យបណ្ដឹង​របស់​ប្រជាពលរដ្ឋភូមិដីឥដ្ឋកោះផុស២ លោក ពៅ គឹមលី បញ្ជាក់ថា សាម៉ីខ្លួនដែលមាន​ឈ្មោះលើ​ប្លង់កាន់កាប់ដីធ្លីទំហំជាង៣ម៉ឺនម៉ែត្រការ៉េនោះ បានធ្វើលិខិតផ្លូវការបដិសេធ ថាខ្លួនមិន​មាន​កម្មសិទ្ធិលើដីធ្លីឡើយ។

អភិបាលរងស្រុកគៀនស្វាយ លោក ពៅ គឹមលី៖ «ឈ្មោះ បាន ប្រាក់ នេះគាត់បានធ្វើ​លិខិត​បំភ្លឺរួចហើយថា គាត់គ្មានដីធ្លីនៅភូមិដីឥដ្ឋកោះផុស២ទេ។ សូមបងប្អូនប្រជាពលរដ្ឋមេត្តា​ស្ងប់ចិត្ត យើងនឹងស្រាវជ្រាវពីភាពមិនប្រក្រតីដែលបានកើតឡើង។

លោក ពៅ គឹមលី បន្តថា អាជ្ញាធរស្រុកសុំពេលប្រមូលពាក្យបណ្ដឹងពី​សំណាក់​ប្រជាពលរដ្ឋ​ជាមុនសិន មុននឹងសម្រេចថានឹងចាត់វិធានការដោះស្រាយយ៉ាងណានោះ។

លោក ពៅ គឹមលី៖ «ខ្ញុំទទួលយកសំណើររបស់បងប្អូន។ ប៉ុន្តែមិនមានន័យថា បងប្អូនចង្អុល​ថាដីបងប្អូននៅត្រឹមណាត្រឹមហ្នឹងទេ។ខ្ញុំនឹងយករឿងនេះទៅសិក្សាឡើងវិញរួចដាក់សំណើរទៅកាន់ថ្នាក់ដឹកនាំពិភាក្សាសម្រេច។ ការបិទផ្សាយនេះ(ការបិទផ្សាយប្លង់បណ្ដោះអាសន្ន) គឺដើម្បីឱ្យបងប្អូនតវ៉ា បើមិនមានការតវ៉ាយើងរកត្រូវខុសមិនឃើញទេ ខ្ញុំសូមគាំទ្រការ​តវ៉ា​របស់បងប្អូនតែយើងសុំពេលពិនិត្យសិន»

នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា អាជ្ញាធរចាំបាច់​ត្រូវដោះស្រាយលើភាពមិនប្រក្រតីនេះដោយតម្លាភាពនិងបើកចំហរមិនត្រូវមានអំពើកេង​ចំណេញ​ ឬមិនស្មោះត្រង់ណាមួយទេ។

លោក ប៉ិច ពិសី៖ «ខ្ញុំគិតថា បញ្ហាហ្នឹងគឺឆ្លុះបញ្ចាំងពីកម្សោយភាពនៃគណនេយ្យភាព​ និង​ការទទួលខុសត្រូវរបស់មន្ត្រីដែលធ្វើការងារផ្ទាល់ជាមួយពលរដ្ឋ។អាជ្ញាធរត្រូវដោះស្រាយ និងស្តាប់ពលរដ្ឋ។ ខ្ញុំគិតថារឿងប៉ុណ្ណេះមិនពិបាកដោះស្រាយទេ បើសិនជាការធ្វើការងារ​នោះប្រកបដោយតម្លាភាពត្រឹមត្រូវ»។

ក្រុមការងារវាស់វែងដីធ្លីនៃរដ្ឋបាលស្រុកគៀនស្វាយ​ ខេត្តកណ្ដាលបានវាស់វែងដីធ្លីក្នុង​ភូមិដីឥដ្ឋកោះផុស២ ឃុំដីឥដ្ឋ ស្រុកគៀនស្វាយ ខេត្តកណ្ដាល កាលដើមឆ្នាំ២០២០។ ក្រុមការងារវាស់វែងដីធ្លី បានបិទផ្សាយជាសាធារណៈនូវឯកសារចុះបញ្ជីប្លង់ដីជាប្រព័ន្ធ កាលពីចុងខែធ្នូឆ្នាំ២០២១ ដោយទុកពេលតវ៉ាត្រឹម១៥ថ្ងៃ។

ប្រជាពលរដ្ឋ លោក សេង សឿន រំលឹកថា លោកស្ទើតែមិនជឿថា ប្លង់ដីរបស់លោកមាន​ផ្ទៃក្រឡាសូន្យម៉ែត្រការ៉េសោះឡើយ។

លោក សេង សឿន៖ «ពេលគេបិទផ្សាយហ្នឹងខ្ញុំមិនទាន់មកមើលទេ ព្រោះកាលវាស់យើង​ចុះមកចង្អុលផ្តិតមេដៃព្រំត្រឹមត្រូវ។ ដល់ពេលគេផ្អើលបាត់ដីទើបមកមើលឃើញថា ខ្លួនឯង​បាត់ដីអស់រលីងគ្មានសល់មួយចំអាមសោះ។ ខ្ញុំសួរមើលថាតើអ្នកណាមិនឈឺចាប់?»៕

246 views

ព័ត៌មានថ្មី

អត្ថបទពេញនិយម