ទោះធ្លាប់បានបាត់បង់ឱកាសមាស សម្រាប់ការបង្ហាញខ្លួនជាប្រវត្តិសាស្ត្រលើកដំបូង ក្នុងការប្រកួតស៊ីហ្គេម លើកទី៣២ ឆ្នាំ២០២៣ នៅលើទឹកដីខ្លួនឯង បន្ទាប់ពីប្រភេទកីឡា «តេក្វាន់ដូ ITF» របស់កូរ៉េខាងជើងនេះ ត្រូវបានដកចេញវិញ ដោយសារមានការប្រឆាំងជំទាស់ពីបណ្តាប្រទេសមួយចំនួន ដែលស្ថិតក្រោមឥទ្ធិពលនៃកីឡា «តេក្វាន់ដូ WT» របស់កូរ៉េខាងត្បូង ប៉ុន្តែក្រុមអត្តពលិកតេក្វាន់ដូ ITF កម្ពុជា និងថ្នាកដឹកនាំសហព័ន្ធកីឡាតេក្វាន់ដូ អាយធីអែហ្វកម្ពុជា មិនដែលបោះបង់មហិច្ឆតា និងឆន្ទៈដ៏មោះមុតរបស់ខ្លួន ក្នុងការជ្រោងទង់ជាតិកម្ពុជា នៅលើឆាកអន្តរជាតិនោះទេ។
ជាក់ស្តែង ក្រុមកីឡាករ កីឡាការិនីជម្រើសជាតិតេក្វាន់ដូ ITF កម្ពុជា ទើបតែបានបំបែកកំណត់ត្រាឈ្នះមេដាយច្រើនបំផុត រហូតដល់ ៤១គ្រឿង ពីការប្រកួតតេក្វាន់ដូ ITF ជើងឯកអាស៊ី លើកទី១១ ឆ្នាំ២០២៦ (11th Asian ITF Taekwon-do Championships) នៅប្រទេសម៉ុងហ្គោលី។
នៅក្នុងចំណោមមេដាយទាំង៤១នេះ ក្រុមអត្តពលិកតេក្វាន់ដូ ITF កម្ពុជា បានឈ្នះមេដាយមាស ៨ ប្រាក់ ១២ និងមេដាយសំរឹទ្ធចំនួន ២១ ហើយលទ្ធផលនេះ វាមិនត្រឹមតែបានបំបែកកំណត់ត្រា សម្រាប់ការឈ្នះមេដាយមាស ៣ ប្រាក់ ៧ និងសំរឹទ្ធ ១៤ ពីការប្រកួតតេក្វាន់ដូ ITF ជើងឯកអាស៊ី លើកទី១០ ឆ្នាំ២០២៤ នៅប្រទេសឥណ្ឌាប៉ុណ្ណោះទេ ប៉ុន្តែក៏បានជួយឱ្យក្រុមតេក្វាន់ដូ ITF កម្ពុជា ទទួលបានពានប្រចាំប្រទេស ចំណាត់ថ្នាក់លេខ២ ក្នុងចំណោម ២៥ ប្រទេស ដែលបានចូលរួមការប្រកួតជើងឯកអាស៊ី នៅម៉ុងហ្គោលី លើកនេះដែរ។
លោក កែវ រ៉េមី ប្រធានសហព័ន្ធកីឡាតេក្វាន់-ដូ អាយធីអែហ្វកម្ពុជា បានបញ្ជាក់ថា៖ «យើងមិនដែលបាក់ទឹកចិត្តនោះទេ ហើយខ្ញុំធ្លាប់ជម្រាបជូនហើយថា បើស៊ីហ្គេម គឺយើងនឹងរៀបចំថង់ដាក់មេដាយ ហើយក្រឡុកយកទៅជូនដល់ថ្នាក់ដឹកនាំ។ ឥឡូវយើងបានយកថង់ដាក់មេដាយអ៊ីចឹងមែន ហើយអ្វីដែលជាចំណុចសំខាន់របស់ ITF ពេលចេញទៅណា គឺយើងតែងរួមសាមគ្គីគ្នាជាធ្លុងមួយ ទាំងថ្នាក់ដឹកនាំគ្រប់លំដាប់ថ្នាក់របស់សហព័ន្ធ គ្រូបង្វឹក និងអត្តពលិករបស់យើង»។
លោក កែវ រ៉េមី បានថ្លែងបែបនេះ នៅពេលលោកបានដឹកនាំប្រតិភូកីឡាតេក្វាន់ដូ ITF កម្ពុជា ត្រឡប់មកដល់ព្រលានយន្តហោះអន្តរជាតិតេជោវិញ កាលពីអធ្រាត្រម៉ោង ១ ឈានចូលថ្ងៃពុធនេះ ហើយលោកបានចាត់ទុកការឈ្នះមេដាយសរុប ៤១គ្រឿងនេះថា ជាចំនួនដ៏ច្រើន លុះត្រាតែដាក់ថង់យកមកវិញទើបអស់។
ជាមួយគ្នានេះ លោក កែវ រ៉េមី បានចែករំលែកនូវបទពិសោធន៍ជាគន្លឹះសំខាន់ ជួយឱ្យក្រុមកីឡាករ កីឡាការិនី នៅតែអាចជម្នះឧបសគ្គ និងការលំបាក ឈានទៅរកចំណុចខ្លាំងបាន បើទោះបីជា ពួកគេស្ថិតនៅក្នុងដំណាក់កាលអស់សង្ឃឹម ឬខ្លាចរអារ ទៅនឹងគូប្រកួត នៅលើទីលាន ឬឆាកប្រយុទ្ធ។
លោក កែវ រ៉េមី បានថ្លែងថា៖ «ដើម្បីឱ្យកីឡាករខ្លាំង គឺសំខាន់មិនមែនត្រឹមផ្តល់នូវបច្ចេកទេស ហ្វឹកហាត់ដល់អត្តពលិករបស់យើងប៉ុណ្ណោះទេ តែយើងត្រូវផ្តល់នូវជំនាញទន់មួយទៀត ដល់ពួកគាត់»។ លោកបន្តថា៖ «ជំនាញទន់ សំខាន់ណាស់! ផ្នែកប្រដាល់ បច្ចេកទេសនៃការប្រដាល់ ហាត់ហ្វឹកហ្វឺនរាប់សិបឆ្នាំចេះហើយ ប៉ុន្តែបើក្នុងស្មារតីទន់ខ្សោយ កំសាក គឺយើងមិនអាចបញ្ជាកាយវិការ ចេញក្បាច់បានល្អទេ»។
លោក រ៉េមី បានបន្ថែមថា៖ «អ៊ីចឹងសំខាន់ ខ្ញុំតែងចូលរួមចំណែកក្នុងការផ្តល់ដល់អត្តពលិកនៅជំនាញទន់នេះ គឺផ្នែកស្មារតី បំពាក់បំប៉នឱ្យគាត់យល់ថា មនុស្សយើងម្នាក់ៗមានដៃ២ជើង២ដូចគ្នា នរណាក៏ដោយ គ្មានដៃ២០ជើង១០០អីនោះទេ គឺវ៉ៃទាំងអស់ ព្រោះបើដឹងថា ទៅចាញ់ កុំទៅ បើទៅត្រូវតែឈ្នះ»។
ជាមួយការដណ្តើមបានជោគជ័យយ៉ាងធំធេងនេះ គឺអត្តពលិកមួយចំនួន អាចដណ្តើមបានមេដាយរហូតដល់៥ ទៅ៦គ្រឿងតែម្នាក់ឯង ចំណែកមេដាយមាសទាំង៨ ដែលក្រុមតេក្វាន់ដូ ITF កម្ពុជា ដណ្តើមបាន រួមមានកីឡាករ ស៊ីវ សិរីបុត្រ បានមេដាយមាស១ លើវិញ្ញាសាអាយុ ១០-១៣ឆ្នាំខ្សែក្រវាត់ក្រហម រីឯកីឡាការិនី សិរី រតនាវង្ស ឈ្នះបានមេដាយមាស១ លើវិញ្ញាសាអាយុ ១០-១៣ ឆ្នាំខ្សែក្រវាត់ខៀវ។
ចំណែកវិញ្ញាសាវាយបំបែកក្តាបុរស និងវិញ្ញាសាបច្ចេកទេសពិសេស គឺក្រុមអត្តពលិកកម្ពុជា ដណ្តើមបានមេដាយមាសដូចគ្នា ហើយកីឡាករ សុខ ស៊ូណាម ទទួលបានមេដាយមាស លើវិញ្ញាសាបច្ចេកទេសពិសេស កីឡាការិនី ប៉ាល់ ឆរស្ម៊ី ឈ្នះមេដាយមាស លើវិញ្ញាសាមេគុន ៣ ដាន់ និងកីឡាការិនី លី គីមឆេង ឈ្នះមេដាយមាស លើវិញ្ញាសាមេគុន ខ្សែក្រវាត់ក្រហម រីឯវិញ្ញាសាប្រយុទ្ធទម្ងន់ +៩២គីឡូក្រាម កីឡាករ ង៉ែត រ៉ាវី របស់កម្ពុជា ទទួលបានមេដាយមាស។
នៅក្នុងចំណោមមេដាយមាសទាំង៨នេះ លោក កែវ រ៉េមី បានផ្តោតខ្លាំងទៅលើការបន្តឈ្នះមេដាយមាស៣សម័យកាលជាប់ៗគ្នាលើវិញ្ញាសាបច្ចេកទេសពិសេស រួមទាំងការដណ្តើមបានមេដាយមាសលើវិញ្ញាសាវាយបំបែកក្តា ពីក្រុមកីឡាករកូរ៉េខាងជើង ដែលជាម្ចាស់ក្បាច់គុន ដោយក្រុមនេះតែងឈ្នះមេដាយមាសលើវិញ្ញាសានេះ នៅរាល់ព្រឹត្តិការណ៍ រួមទាំងការប្រកួតជើងឯកពិភពលោកផងដែរ ប៉ុន្តែពេលមកប៉ះក្រុមកម្ពុជា លើកនេះ ពួកគេ បានចាញ់ទាំងមិនអស់ចិត្ត ហើយនេះជាចំណុចលេចធ្លោមួយ ជួយឱ្យក្រុមឈុតធំកម្ពុជា ឈរនៅលេខរៀងទី២ បន្ទាប់ពីកូរ៉េខាងជើង។
ជាងនេះទៅទៀត ប្រធានសហព័ន្ធកីឡាតេក្វាន់-ដូអាយធីអែហ្វកម្ពុជារូបនេះ បានដក់ចិត្តខ្លាំងទៅលើការដណ្តើមបានមេដាយមាស របស់ក្រុមយុវជនថ្នាល ITF កម្ពុជា នៅក្នុងការប្រកួតបើកឆាក ដែលធ្វើឱ្យបណ្តាប្រទេសចូលរួមទាំងអស់ មានការភ្ញាក់ផ្អើលខ្លាំង ព្រោះមិននឹកស្មានដល់ថា ថ្នាលរបស់កម្ពុជា មានសមត្ថភាពល្អបែបនេះ ហើយពួកគេ បានក្លាយជាអ្នកបន្តវេនដ៏អង់អាចរបស់តេក្វាន់ដូ ITF កម្ពុជា។
លោក រ៉េមី បានបញ្ជាក់ដោយមោទនភាពថា៖ «នៅពេលប្រៀបធៀបជាមួយថ្នាលរបស់ប្រទេសផ្សេងៗ ទើបដឹងថា ថ្នាលរបស់យើងល្អមែនទែន ដោយយើងបើកឆាកភ្លាម ដណ្តើមបានមេដាយមាស២ ហើយ២ទៅ៣នាក់ទៀត ក៏ត្រូវមានមេដាយមាសដែរ ព្រោះល្អមែនទែន ហេតុនេះខ្ញុំក្នុងនាមជាថ្នាក់ដឹកនាំសហព័ន្ធ គឺយើងពិតជាមានមោទនភាព ដែលថ្នាលរបស់យើងមានសមត្ថភាព និងទេពកោសសល្យល្អ ជាអ្នកស្នងតេក្វាន់ដូ ITF បានរយៈពេលយូរអង្វែងទៅមុខទៀត»។
ចំណែកលោក បួនហ៊ីង សុធីយ៉ា អគ្គលេខាធិការសហព័ន្ធកីឡាតេក្វាន់-ដូអាយធីអែហ្វកម្ពុជា បានឱ្យដឹងថា ការដណ្តើមបានមេដាយសរុបចំនួន ៤១ និងពានប្រចាំប្រទេស ចំណាត់ថ្នាក់លេខ២ ក្នុងការប្រកួតតេក្វាន់ដូ ITF ជើងឯកអាស៊ី លើកទី១១ ឆ្នាំ២០២៦ នៅម៉ុងហ្គោលី គឺជាសមិទ្ធផលដ៏អស្ចារ្យ និងល្អបំផុត ប៉ុន្តែក្រុមអត្តពលិកកម្ពុជា បានជួបប្រទះការលំបាកច្រើនណាស់ ទម្រាំអាចសម្រេចបាននូវលទ្ធផលដ៏គាប់ប្រសើរនេះ។
លោក សុធីយ៉ា បញ្ជាក់ថា៖ «ការប្រកួតលើកនេះ យើងទទួលបានជោគជ័យធំជាងមុន ជាពិសេសទៅលើចំនួនមេដាយ ចំណែកពានប្រចាំប្រទេសនេះ យើងទទួលបាន៣ដងទាំងលើកនេះហើយ គឺកាលប្រកួតនៅឥណ្ឌា យើងបានលេខ៣ ហើយលើកនេះ យើងបានលេខ២វិញ ប៉ុន្តែការប្រកួតជួបការលំបាក ព្រោះមានប្រទេសខ្លាំងៗចូលរួមច្រើន»។
ក្រៅពីកូរ៉េខាងត្បូង ដែលជាម្ចាស់ក្បាច់គុន ITF នេះ លោក សុធីយ៉ា បានសង្កត់ធ្ងន់ទៅលើប្រទេសរុស្ស៊ី។ លោកបញ្ជាក់ថា៖ «ពីមុនរុស្ស៊ី ដែលជាប្រទេសខ្លាំងខាងតេក្វាន់ដូ ITF គាត់នៅខាងអឺរ៉ុប ឥឡូវគាត់បានសុំចូលមកសហព័ន្ធអាស៊ីវិញ អ៊ីចឹងធ្វើឱ្យការប្រកួតហ្នឹង កាន់តែមានភាពតានតឹងខ្លាំង ទាំងលើវិញ្ញាសាមេគុន បច្ចេកទេសពិសេស វាយបំបែកក្តា និងវិញ្ញាសាប្រយុទ្ធ ព្រោះយើងដឹងស្រាប់ហើយថា អត្តពលិកនៅខាងរុស្ស៊ី មានកាយសម្បទារាងក្រាស់ និងធំជាងយើង»។
កីឡាករ កាង ប៊ុនឡុង ដែលទទួលបានមេដាយសរុបចំនួន៦ មានមេដាយមាស២ ប្រាក់៣ និងសំរឹទ្ធ១ បានអះអាងថា ការប្រកួតជើងឯកអាស៊ី លើកនេះ ពិតជាមានការលំបាកខ្លាំង ប៉ុន្តែការព្យាយាមហ្វឹកហាត់ត្រៀមជាង៤ខែ រួមទាំងការដាក់ចិត្តដាក់កាយ ក្នុងការប្រកួត នៅតែជួយឱ្យរូបគេ និងមិត្តរួមជាតិ ដណ្តើមបានមេដាយមាស ប្រាក់ និងសំរឹទ្ធ ជាច្រើន ដើម្បីលើកមុខមាត់ជាតិ។
កីឡាករវ័យ ២៥ឆ្នាំរូបនេះបានឱ្យដឹងទៀតថា សម្រាប់ការចូលហ្វឹកហាត់តេក្វាន់ដូ ITF រយៈពេល ១០ឆ្នាំមកនេះ រួមគេបានដាក់ចិត្តខ្លាំង ក្នុងការហ្វឹកហាត់ ដោយបានលះបង់គ្រប់បែបយ៉ាង ដោយផ្តោតសំខាន់បំផុត លើការបានចេញទៅប្រកួតនៅក្រៅប្រទេសដណ្តើមយកមេដាយជូនជាតិ ហើយចាប់តាំងពីឆ្នាំ២០១៨ រូបគេបានចេញទៅប្រកួតជាបន្តបន្ទាប់ និងដណ្តើមបានទាំងមេដាយមាស ប្រាក់ និងសំរឹទ្ធ ត្រឡប់មកវិញ។
ប៊ុនឡុង និយាយថា៖ «ខ្ញុំធ្លាប់ដណ្តើមបានមេដាយជាច្រើន សម្រាប់ការចេញប្រកួតនៅលើឆាកអន្តរជាតិកន្លងមក ប៉ុន្តែការឈ្នះបានមេដាយសរុបចំនួន៦លើកនេះ វាជាសមិទ្ធផលធំ និងជាកំណត់ត្រាថ្មីរបស់ខ្ញុំ ដោយសារលើកនេះ ខ្ញុំដណ្តើមបានមេដាយប្រាក់១ទៀត លើវិញ្ញាសាប្រយុទ្ធទម្ងន់ ៥៨គីឡូក្រាម»។
យ៉ាងណាក៏ដោយ កាង ប៊ុនឡុង បានបញ្ជាក់ថា៖ «មេដាយដែលខ្ញុំដណ្តើមបានទាំងអស់នេះ បានឆ្លងកាត់ការប្រកួតយ៉ាងស្វិតស្វាញ និងមានការលំបាក ព្រោះមានប្រទេសខ្លាំងៗចូលរួមច្រើន ប៉ុន្តែអ្វីដែលសំខាន់ យើងបានលះបង់ធំ ដាក់ចិត្តដាក់កាយ និងព្យាយាមយកមេដាយជូនជាតិ និងប្រជាជនកម្ពុជា។ លទ្ធផលនេះ ពិតជាមានន័យបំផុត សម្រាប់ខ្ញុំ តែខ្ញុំត្រូវបោះជំហានទៅមុខទៀត ព្រោះយើងចង់បានលទ្ធផលល្អជាងនេះទៀត»។
ចំណែកលោក ផាន់ វណ្ណរ័ត្ន អនុប្រធានសហព័ន្ធកីឡាតេក្វាន់-ដូ អាយធីអែហ្វកម្ពុជា បានតំណាលពីកូនស្រីសំណព្វរបស់លោកឈ្មោះ សញ្ញា រត្ន័ម៉ានេតា ដែលបានវិវឌ្ឍខ្លួនពីក្មេងស្រីដ៏ទន់ភ្លន់ និងជាសិស្សពូកែ ធ្លាប់ប្រើដៃកាន់សៀវភៅ និងដេញព្យាណូ ទៅកាន់ការប្រកួតសង្វៀនអន្តរជាតិ។ ក្មេងស្រីវ័យ១១ឆ្នាំរូបនេះ បានសម្រេចចិត្តសុំច្បាប់សាលា១សប្តាហ៍ពេញ ដើម្បីឈានជើងមកធ្វើជាតំណាងឱ្យប្រទេសជាតិ និងប្រឈមមុខនឹងការសាកល្បងដ៏ធំបំផុតមួយក្នុងជីវិត ក្នុងព្រឹត្តិការណ៍ Asian ITF Taekwon-do Championships 2026 នេះ។
លោក វណ្ណរ័ត្ន បានបន្តថា នៅវិនាទីដែលកូនស្រីតូចរបស់ខ្លួនដើរឡើងលើសង្វៀនប្រកួត ឈរទល់មុខនឹងគូប្រកួតដែលឌឺដង និងមានមាឌធំជាង បេះដូងរបស់លោកជាឪពុក ស្ទើរតែលោតចេញមកក្រៅ។ លោកឈរឡើងរឹងកំព្រឹស ដៃទាំង២កាន់ថតវីដេអូកូនប្រកួតឡើងញ័រដៃ និងរន្ធត់ជាខ្លាំង។
លោកបញ្ជាក់ថា៖ «អារម្មណ៍ជាឪពុក នៅពេលឃើញកូនស្រីតូចដែលយើងធ្លាប់តែថ្នម និងបីបាច់ថែរក្សា ត្រូវរងការទាត់ វាយ និងតស៊ូយ៉ាងខ្លាំងនៅលើសង្វៀន គឺជាការឈឺចាប់ និងក្តុកក្តួលដែលស្ទើរតែរកពាក្យបកស្រាយមិនបាន។ ទឹកភ្នែកជាឪពុកស្ទើរតែស្រក់ចុះ ដោយអាណិតកូន និងភ័យខ្លាចកូនមានគ្រោះថ្នាក់។ ប៉ុន្តែនៅក្នុងជម្រៅចិត្ត ខ្ញុំដឹងយ៉ាងច្បាស់ថា ជីវិតមនុស្សយើងមិនអាចរស់នៅក្នុងជម្រកសុខសាន្តបានរហូតនោះទេ»។
លោក ផាន់ វណ្ណរ័ត្ន ដែលជាអគ្គព្រះរាជអាជ្ញារងនៃមហាអយ្យការអមតុលាការកំពូល ផងនោះ បានអះអាងថា ការគាំទ្រឱ្យកូនចូលរួមក្នុងកីឡា មិនមែនដើម្បីតែការយកឈ្នះចាញ់ ឬដណ្តើមយកមេដាយមួយមុខនោះទេ ប៉ុន្តែដើម្បីទទួលបានសុខភាព និងកាយសម្បទារឹងមាំចេញពីការហាត់ប្រាណ ព្រមទាំងទទួលបានជំនាញការពារខ្លួនដ៏ពិតប្រាកដមួយ សម្រាប់ឈរជើងដោយសុវត្ថិភាព និងជឿជាក់ក្នុងសង្គមនាថ្ងៃអនាគត។
លោកបានសង្កត់ធ្ងន់ ទៅលើការឈ្នះមេដាយសំរឹទ្ធ វិញ្ញាសាប្រយុទ្ធ អាយុ ១១ ដល់ ១៣ឆ្នាំទម្ងន់ ៣៥ គីឡូក្រាមរបស់ រ័ត្នម៉ានេតា។ «លទ្ធផល មេដាយសំរឹទ្ធ ដែលកូនស្រីដណ្តើមបានមកជូនជាតិ និងគ្រួសារនាពេលនេះ មិនត្រឹមតែជាសមិទ្ធផលលោហធាតុប៉ុណ្ណោះទេ ប៉ុន្តែវាជាតំណក់ញើស ទឹកភ្នែក និងជាសាក្សីនៃភាពក្លាហានដ៏អស្ចារ្យរបស់ក្មេងស្រីវ័យ ១១ ឆ្នាំម្នាក់ ដែលហ៊ានជម្នះភាពភ័យខ្លាច និងភាពឈឺចាប់នៅលើឆាកអន្តរជាតិ»។
ជាមួយគ្នានេះ លោក ផាន់ វណ្ណរ័ត្ន ដែលតែងតែនៅជាប់ជាមួយក្រុមអត្តពលិកជម្រើសជាតិតេក្វាន់ដូ ITF នៅរាល់ការប្រកួតនៅលើឆាកអន្តរជាតិ អស់រយៈពេលជាច្រើនឆ្នាំមកនេះ បានទម្លាយថា អារម្មណ៍ក្តុកក្តួល មិនមែនកើតមានតែចំពោះកូនស្រីរបស់លោកនោះទេ គឺគ្រប់អត្តពលិកទាំងអស់ លោកតែងបានផ្តោតអារម្មណ៍ និងយកចិត្តទុកដាក់ខ្លាំងទៅដល់ការប្រកួតរបស់ពួកគេ ដើម្បីអាចឈានទៅដណ្តើមបានមេដាយជូនជាតិ។
លោកបានបន្ថែមថា៖ «នៅពេលអត្តពលិកយើង បានមេដាយ យើងរំភើបសឹងតែស្រក់ទឹកភ្នែក ព្រោះជាមោទនភាពជាតិមួយ ដែលគេបង្ហូតទង់ជាតិយើង នៅពេលយើងបានមេដាយមាស ហើយទោះបីជាអត់មាស បានត្រឹមមេដាយប្រាក់ និងសំរឹទ្ធក៏ដោយ ក៏ជាមោទនភាព ដែលកម្ពុជាយើងធ្វើបាន គឺកីឡាករ កីឡាការិនីរបស់យើងប្រកួតអត់ខ្លាចនរណានោះទេ»។
ចំណែកអ្នកស្រី ឡុង សុខេន ម្ចាស់ក្លិបតេក្វាន់ដូខេត្តកំពង់ស្ពឺ បានធ្វើដំណើរមកជាមួយបងប្អូនតាំងពីខេត្តកំពង់ស្ពឺ មកកាន់ព្រលានយន្តហោះអន្តរជាតិតេជោ កាលពីយប់មិញ ដើម្បីមកចាំទទួលស្វាគមន៍កូនរបស់អ្នកស្រី និងសិស្ស ចំនួន៥នាក់ ដោយពួកគេសុទ្ធតែដណ្តើមបានមេដាយត្រឡប់មកវិញ។
ស្រ្តីរូបនេះ បានបញ្ជាក់ថា៖ «ខ្ញុំសប្បាយចិត្ត ដែលឃើញកូនៗ និងសិស្ស មានការលូតលាស់ល្អ ព្រោះទម្រាំបណ្តុះបណ្តាលក្លាយជាធនធានមានសមត្ថភាពបែបនេះ គឺមានការពិបាកខ្លាំង។ យើងត្រូវជំរុញទាំងផ្លូវកាយ និងផ្លូវចិត្ត ព្រោះការហាត់កីឡាវាហត់នឿយ ឈឺខ្លួន និងប្រើពេលយូរទៀត ទម្រាំបានផល អ៊ីចឹងពេលខ្លះគាត់បាក់ទឹកចិត្ត និងខ្ជិលចង់ហាត់បន្ត ហេតុនេះយើងបានជំរុញ និងចាប់ទាញឡើងមកវិញ ដោយប្រើវិធីសាស្រ្តផ្សេង»។
បើទោះបីជាការបណ្តុះធានធានកីឡា មានការពិបាក ប៉ុន្តែអ្នកស្រី ឡុង សុខេន មិនបោះបង់ចោលការងារនេះទេ។ «យើងមានគោលដៅ និងចង់ឱ្យពួកគាត់ល្អ មានវិន័យ ហើយលទ្ធផលដែលទទួលបាននៅពេលនេះខ្ញុំមានការពេញចិត្ត ហើយត្រូវខំប្រឹងជំរុញពួកគាត់ថែមទៀត ព្រោះនៅមានហ្គេមច្រើនទៀត ដែលត្រូវដណ្តើមយកមេដាយជូនជាតិ»៕
