ខណៈយុទ្ធនាការចាក់វ៉ាក់សាំងកូវីដ១៩ ទូទាំងប្រទេសពឹងផ្អែកលើវ៉ាក់សាំងផលិតនៅប្រទេសចិនស្ទើរទាំងស្រុង ជំនួយវ៉ាក់សាំងថ្មីរបស់ជប៉ុន អាចចាប់ផ្ដើមធ្វើឲ្យមានភាពចម្រុះក្នុងការប្រើប្រាស់វ៉ាក់សាំង។
រដ្ឋាភិបាលជប៉ុនកាលពីថ្ងៃអង្គារ បានប្រកាសពីការផ្ដល់វ៉ាក់សាំងកូវីដ១៩ AstraZeneca ចំនួន១លានដូស ដល់កម្ពុជា ដែលជប៉ុនបានហៅការផ្ដល់ជំនួយនេះថា ជាការធ្វើការរួមគ្នាជាមួយ «មិត្តដ៏សំខាន់» រវាងប្រទេសទាំងពីរ និងផ្អែកលើចំនួនករណីឆ្លងកំពុងកើនឡើងនៅកម្ពុជា។
ឯកអគ្គរាជទូតជប៉ុនប្រចាំកម្ពុជាលោក មិកាមិ ម៉ាសាហ៊ីរ៉ូ (Mikami Masahiro) លើកឡើងនៅក្នុងសេចក្ដីប្រកាសព័ត៌មានថាវ៉ាក់សាំងដែលបានផ្ដល់អាជ្ញាបណ្ណផលិតក្នុងប្រទេសជប៉ុននេះ នឹងដឹកមកដល់ប្រទេសកម្ពុជានៅពេលឆាប់ៗនេះ បន្ទាប់ពីការរៀបចំភស្តុភាដោយ COVAX បានបញ្ចប់។
លោកមានប្រសាសន៍ថា៖ «ខ្ញុំសង្ឃឹមថាជំនួយនេះនឹងជួយគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងកូវីដ១៩ ក៏ដូចជាកាត់បន្ថយការព្រួយបារម្ភមួយចំនួនរបស់ប្រជាជនកម្ពុជា»។
បើតាមសេចក្ដីប្រកាសព័ត៌មាននេះ រដ្ឋាភិបាលជប៉ុន គិតមកដល់ពេលនេះបានផ្ដល់ជំនួយសរុបគិតជាទឹកប្រាក់ជាង៥០លានដុល្លារសម្រាប់វិបត្តិកូវីដ១៩ រួមមានបរិក្ខាពេទ្យ ការកែលម្អមន្ទីរពេទ្យ និងបរិក្ខាសម្រាប់រក្សាទុកវ៉ាក់សាំងឲ្យបានត្រឹមត្រូវ។ ភាគីជប៉ុនក៏បានផ្ដល់ការគាំទ្រដល់អង្គការអន្តរជាតិនានា សម្រាប់វិធានការទប់ស្កាត់ការចម្លងជំងឺនៅតាមព្រំដែន ក៏ដូចជាការផ្ដល់កម្ចីប្រមាណជា២២៧លានដុល្លារ សម្រាប់ប្រើប្រាស់ក្នុងកម្មវិធីឧបត្ថម្ភជាសាច់ប្រាក់ដល់ប្រជាពលរដ្ឋរងផលប៉ះពាល់ដោយសារកូវីដ១៩ និងពង្រឹងប្រព័ន្ធសុខាភិបាល។
លោក មិកាមិ បានបន្តថា៖ «ក្នុងការប្រយុទ្ធប្រឆាំងនឹងកូវីដ១៩ដែលជាបញ្ហាពិភពលោកនេះ ជប៉ុននឹងបន្តសហការ និងធ្វើការរួមគ្នាជាមួយកម្ពុជាដែលជាមិត្តដ៏សំខាន់របស់យើង»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល មានប្រសាសន៍ថា ជំនួយនេះបង្ហាញពីការគាំទ្ររបស់ជប៉ុន និង «កិច្ចសហការល្អ» ជាមួយរដ្ឋាភិបាលកម្ពុជាប្រឆាំងនឹងការឆ្លងរាលដាលជំងឺកូវីដ១៩។
លោកស្រី បន្តទៀតថា៖ «វ៉ាក់សាំងនេះមិនត្រឹមតែជាប្រយោជន៍សម្រាប់ប្រជាជនកម្ពុជាទេ ប៉ុន្តែសម្រាប់ជនបរទេសផងដែរ ដែលបានរស់នៅប្រទេសកម្ពុជា និងបានទទួលបានវ៉ាក់សាំងបង្ការដោយមិនគិតថ្លៃផងដែរ»។
ជំនួយនេះ បានជួយឲ្យ កម្ពុជាឈរនៅជាប្រទេសមួយមានអត្រាចាក់វ៉ាក់សាំងបង្ការកូវីដ១៩ បានខ្ពស់បំផុតមួយនៅក្នុងតំបន់អាស៊ាន។
មកដល់ពេលនេះ កម្ពុជា បានប្រើប្រាស់វ៉ាក់សាំងផលិតនៅប្រទេសចិន ស៊ីណូវ៉ាក់ និងស៊ីណូហ្វាម។ ជាមួយគ្នានេះដែរ យន្តការ COVAX បានសន្យាថានឹងផ្ដល់វ៉ាក់សាំង២០ភាគរយនៃចំនួនប្រជាជនសរុបដែលត្រូវចាក់ ឬជិត៧លានដូសមកកម្ពុជា តែមកដល់ពេលនេះកម្ពុជាបានទទួលត្រឹម ៣២៤ ០០០ដូស ប៉ុណ្ណោះ។
លោកនាយករដ្ឋមន្ត្រី ហ៊ុន សែន កាលពីថ្ងៃទី១ ខែកក្កដា មានប្រសាសន៍ថាកម្ពុជាកំពុងពឹងពាក់លើវ៉ាក់សាំងរបស់ចិន ខណៈប្រភពផ្សេងទៀតមិនទាន់បានបញ្ជូនមកកម្ពុជានៅឡើយ។ លោកបានបញ្ជាក់ថា វ៉ាក់សាំងជិត១១លានដូស បានបញ្ជូនពីប្រទេសចិនដល់កម្ពុជារួចរាល់ហើយដែរ។
លោកមានប្រសាសន៍ថា៖ «យើងពឹងលើចិនសម្រាប់យុទ្ធសាស្រ្តវ៉ាក់សាំងរបស់យើង»។ ដោយលោកបន្ថែមថា៖ «ប្រសិនបើខ្ញុំ[រង់ចាំវ៉ាក់សាំងពីប្រភពផ្សេង] យើងនឹងមិនមានវ៉ាក់សាំងសម្រាប់ប្រជាពលរដ្ឋទេ។ ប្រសិនបើយើងមិនមានមិត្តចិន យើងអាចនឹងមិនមានវ៉ាក់សាំងចាក់ជូនប្រជាពលរដ្ឋបួនលាននាក់នោះទេ ហើយការសម្រេចចិត្តរបស់ខ្ញុំ គឺត្រឹមត្រូវ [យើងមិនខ្វល់] អ្នកណាចង់ថាអីថាទៅ»។
ទន្ទឹមនឹងមានវ៉ាក់សាំងសរុប១១លានដូស លោកនាយករដ្ឋមន្ត្រី ហ៊ុន សែន ថាកម្ពុជានឹងទទួលបានវ៉ាក់សាំង២០លានដូសពីប្រទេសចិនពីរវាងខែកក្កដា និងសីហា ដោយ៥លានដូសនឹងមកដល់នៅខែកក្កដា និង៤លានដូសទៀតនឹងមកដល់នៅខែសីហា។ ដោយគិតចាក់វ៉ាក់សាំងពីរដូសសម្រាប់ប្រជាពលរដ្ឋម្នាក់ កម្ពុជានឹងអាចចាក់វ៉ាក់សាំងឲ្យប្រជាពលរដ្ឋចំនួន១០លាននាក់។
លោកស្រី ឱ វណ្ណឌីន ឲ្យដឹងថាគិតមកដល់ពេលនេះ ចិនបានផ្ដល់ជំនួយវ៉ាក់សាំងស៊ីណូហ្វាមចំនួន២.២លានដូស ហើយចំនួនផ្សេងទៀត រួមទាំងស៊ីណូវ៉ាក់ផង គឺរដ្ឋាភិបាលបានបញ្ជាទិញពីប្រទេសចិន។
នៅពេលដែលវិបត្តិកូវីដ១៩ កាន់តែរាលដាលខ្លាំង ការផ្ដល់វ៉ាក់សាំងក្លាយជាឧបករណ៍ការទូត។
អ្នកវិភាគនយោបាយ លោក មាស នី បានប្រាប់ខេមបូចា ថាស្របពេលដែលលោកបានមើលឃើញពីសារសំខាន់របស់វ៉ាក់សាំងបង្ការកូវីដ១៩របស់ចិន លោកក៏ជឿដែរថាកម្ពុជាគួរតែអាចធ្វើទំនាក់ទំនងជាមួយបរទេសផ្សេងទៀត។
លោក មានប្រសាសន៍ថា៖ «ខ្ញុំមិនគិតថាកម្ពុជាគួរតែពឹងពាក់ចិនតែមួយនោះទេ ពីព្រោះកម្ពុជាអាចមានលទ្ធភាពសុំជំនួយពីដៃគូអន្តរជាតិផ្សេងទៀត»។
លោក មាស នី បានកត់សម្គាល់ថា រដ្ឋាភិបាលងាកទៅរកចិនកាន់តែខ្លាំង ខណៈប្រជាប្រិយភាពក្នុងប្រទេសរបស់ខ្លួនបានធ្លាក់ចុះ។
លោកលើកឡើងថា៖ «ប្រជាប្រិយភាពគណបក្សកាន់អំណាចបានធ្លាក់ចុះបន្ទាប់ពីការបោះឆ្នោតឆ្នាំ២០១៣ និង២០១៧ ពេលដែលរដ្ឋាភិបាលចាប់ផ្ដើមប្ដូរជំហរក្នុងការមានទំនាក់ទំនងជាមួយលោកខាងលិច និងកាន់តែជិតស្និទ្ធជាមួយចិន និងនាំប្រទេសងាកចេញពីផ្លូវប្រជាធិបតេយ្យកាន់តែខ្លាំង»។
ទោះយ៉ាងណា ជំនួយវ៉ាក់សាំងពីដៃគូផ្សេងទៀតមិនទាន់កើតមាន ដូចអ្វីដែលចិនបានធ្វើនោះទេ។
កន្លងមកប្រទេសអូស្រ្តាលី ក៏បានសន្យាផ្ដល់វ៉ាក់សាំងបីលានដូសឲ្យកម្ពុជា ។ លោកនាយករដ្ឋមន្ត្រី ក៏បានស្នើសុំវ៉ាក់សាំងចំនួនបួនលានដូសពីសហរដ្ឋអាមេរិក ហើយអ្វីទាំងអស់នេះស្ថិតនៅក្នុងសភាពមិនច្បាស់លាស់នៅឡើយ និងមិនដឹងថានឹងមកដល់នៅពេលណាដែរ។
លោកស្រី ឱ វណ្ណឌីន មានប្រសាសន៍ថាគិតមកដល់ពេលនេះ កម្ពុជាមិនទាន់បានទទួលព័ត៌មានពីភាគីអូស្រ្តាលីទាក់ទងនឹងវ៉ាក់សាំងនេះនៅឡើយ។ ចំណែកអ្នកនាំពាក្យស្ថានទូតអូស្រ្តាលីប្រចាំកម្ពុជាបានប្រាប់ខេមបូចាតាមរយៈអ៊ីម៉ែលថា អូស្រ្តាលីនឹងផ្ដល់ជំនួយ២៨លានដុល្លារ គាំទ្រដល់យុទ្ធនាការសុវត្ថិភាព និងប្រសិទ្ធភាពនៃការចាក់វ៉ាក់សាំងនៅកម្ពុជា។
អ្នកនាំពាក្យស្ថានទូតអូស្ត្រាលីបានឲ្យដឹងថា៖ «កញ្ចប់ជំនួយនេះនឹងគាំទ្រដល់រាជរដ្ឋាភិបាលកម្ពុជាក្នុងការចែកចាយ និងចាក់វ៉ាក់សាំង តាមដានសុវត្ថិភាព និងប្រសិទ្ធភាពវ៉ាក់សាំង និងធ្វើឲ្យប្រាកដថាប្រជាពលរដ្ឋកម្ពុជាបានទទួលព័ត៌មានពីដំណើរការចាក់វ៉ាក់សាំង»។ យ៉ាងណា អ្នកនាំពាក្យមិនបាននិយាយលម្អិតថាជំនួយនេះផ្ដល់នៅពេលណា និងធ្វើឡើងតាមរបៀបណាទេនោះទេ។
អ្នកនាំពាក្យបានបន្ថែមថា អូស្រ្តាលីនឹងផ្ដល់ជំនួយបន្ថែម៥០លានដុល្លារទៀត ក្នុងគម្រោងជំនួយអភិវឌ្ឍន៍នៅឆ្នាំនេះ ដែលជាផ្នែកមួយនៃផែនការឆ្លើយតបកូវីដដ១៩ កម្ពុជា–អូស្រ្តាលី ដែលបានដាក់ចេញកាលពីខែធ្នូ ឆ្នាំ២០២០។
ខណៈដែលទំនាក់ទំនងអន្តរជាតិកំពុងតែបន្តកើតមានឡើង មន្ត្រីសុខាភិបាលកម្ពុជាបានបន្តកិច្ចខិតខំប្រឹងប្រែងយុទ្ធនាការចាក់វ៉ាក់សាំងទូទាំងប្រទេស។
ក្រសួងសុខាភិបាល បានបញ្ចប់យុទ្ធនាការចាក់វ៉ាក់សាំងនៅរាជធានីភ្នំពេញកាលពីសប្ដាហ៍មុន ស្របពេលដែលមន្ត្រីសុខាភិបាលបានចាប់ផ្ដើមពង្រាយការចាក់វ៉ាក់សាំងទៅតាមបណ្ដាខេត្ត។ មន្ត្រីសុខាភិបាល ប្ដេជ្ញាចាក់វ៉ាក់សាំងដល់ប្រជាពលរដ្ឋចំនួន១០លាននាក់នៅត្រឹមចុងឆ្នាំនេះ។
លោក វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង មានប្រសាសន៍ថា មន្ត្រីសុខាភិបាល បានចាប់ផ្ដើមចាក់វ៉ាក់សាំងដល់ប្រជាពលរដ្ឋកាលពីថ្ងៃចន្ទបានចំនួន ៩០០នាក់។ លោកថា យុទ្ធនាការនេះនឹងធ្វើឡើងរយៈពេលមួយខែ ដើម្បីចាក់ជូនប្រជាពលរដ្ឋចំនួន ១០០ ០០០នាក់នៅក្នុងខេត្ត។
លោក ប៊ុនរ៉េត ឲ្យដឹងដែរថា គិតមកដល់ត្រឹមថ្ងៃចន្ទ ខេត្តបាត់ដំបងមានអ្នកឆ្លងកូវីដ១៩ ជាង១០០០ករណី និងមានអ្នកស្លាប់ចំនួន១១នាក់។
លោក វ៉ី សំណាង អភិបាលខេត្តកំពង់ស្ពឺ មានប្រសានស៍ឲ្យដឹងដែរថា មន្ត្រីសុខាភិបាលក្នុងខេត្តមួយនេះបានចាក់វ៉ាក់សាំងជូនប្រជាពលរដ្ឋបានចំនួន២៩០ ០០០នាក់ហើយ។ លោកប្រាប់ខេមបូចា ថាខេត្តកំពង់ស្ពឺមានអ្នកឆ្លងកូវីដ១៩ ចំនួន៣ ២៣២ករណី និងស្លាប់ចំនួន៧២នាក់។
លោក មានប្រសាសន៍ថា៖ «ឥឡូវនេះ យើងកំពុងតែចាក់វ៉ាក់សាំងដូសទី២ដល់ក្រុមងាយរងគ្រោះ ដូចជាកម្មកររោងចក្រ និងអ្នកលក់ដូរនៅតាមផ្សារ»។
នៅថ្ងៃអង្គារនេះ ក្រសួងសុខាភិបាល បានរកឃើញអ្នកឆ្លងកូវីដ១៩ ចំនួន៨៣៣ករណីថ្មីបន្ថែមទៀត និងមានអ្នកស្លាប់ចំនួន២៨នាក់ នាំឲ្យចំនួនអ្នកឆ្លងសរុបនៅកម្ពុជាឡើងដល់ ៦២ ៧០០ករណី និងស្លាប់ចំនួន៩៥៣នាក់ គិតតាំងពីវិបត្តិកូវីដ១៩ផ្ទុះឡើងនៅដើមឆ្នាំ២០២០។ (រាយការណ៍បន្ថែមដោយ សំ សុពេជ្រ)
ប្រែសម្រួលពីអត្ថបទភាសាអង់គ្លេស៖ Japan donates 1 million COVID-19 vaccines to Cambodia, easing reliance on China
