អ្នកកាសែតចុះយកព័ត៌មានទាក់ទងនឹងគម្រោងព្រលានយន្តហោះថ្មីនៅខេត្តកណ្ដាលរងការគំរាមកំហែង

អ្នកភូមិប្រមូលគ្នាធ្វើសន្និសីទសារព័ត៌មានអំពីដីជម្លោះរបស់ពួកគាត់ជាប់ពាក់ព័ន្ធគម្រោងអាកាសយានដ្ឋានអន្តរជាតិនៅស្រុកកណ្ដាលស្ទឹង ខេត្តកណ្ដាល ថ្ងៃទី៤ ខែកញ្ញា ឆ្នាំ២០២១។ រូបភាព ផ្ដល់ឲ្យ
អ្នកភូមិប្រមូលគ្នាធ្វើសន្និសីទសារព័ត៌មានអំពីដីជម្លោះរបស់ពួកគាត់ជាប់ពាក់ព័ន្ធគម្រោងអាកាសយានដ្ឋានអន្តរជាតិនៅស្រុកកណ្ដាលស្ទឹង ខេត្តកណ្ដាល ថ្ងៃទី៤ ខែកញ្ញា ឆ្នាំ២០២១។ រូបភាព ផ្ដល់ឲ្យ

អ្នកសារព័ត៌មាន​របស់​​វីអូឌី(VOD)ម្នាក់​បាន​និយាយ​ថា ​ខ្លួន​បាន​រង​ការ​គំរាមកំហែង​ពី​សំណាក់​អាជ្ញាធរ​កាល​ពី​ថ្ងៃ​សៅរ៍កន្លង​ទៅ ខណៈ​​កំពុង​ចុះ​យក​ព័ត៌មាន​រឿង​ជម្លោះ​ដីធ្លី​រវាង​គម្រោងអភិវឌ្ឍន៍​​អាកាសយានដ្ឋាន​អន្តរជាតិភ្នំពេញ​ថ្មី និង​អ្នក​ភូមិ​រង​ផល​ប៉ះពាល់​ក្នុង​ស្រុក​កណ្ដាល​ស្ទឹង​។​

ក្នុង​សេចក្ដី​ថ្លែង​ការណ៍​របស់​ខ្លួន​ចេញ​ផ្សាយ​នៅ​ថ្ងៃ​ចន្ទនេះ សមាគម​សម្ព័ន្ធ​អ្នក​សារព័ត៌មាន​​កម្ពុជា ហៅ​កាត់​ថា​ខេមបូចា បានឲ្យ​ដឹង​ថា​អ្នក​កាសែត​ម្នាក់​ទៀត​ ក៏​បាន​ប្រជា​ពល​រដ្ឋ​ជូន​ដំណឹង​ជាមុន​មិន​ឲ្យ​ទៅ​ចូល​រួម​សន្និសីទសារព័ត៌មាន​នោះ​ដែរ ដោយ​ថានគរបាលបាន​គំរាម​ចាប់​រូប​លោក​។​

លោក ពក ខឺយ ជាអ្នក​ហាត់ការ​នៅ​ស្ថាប័នព័ត៌មា​​ន​វីអូឌី បាន​ប្រាប់​ខេមបូចា ថាលោក​បាន​ចុះ​ទៅ​យក​ព័ត៌​មាន​នៅ​សន្និសីទ​មួយ​រៀបចំ​ដោយ​អ្នក​ភូមិ​មាន​ជម្លោះ​ជាមួយ​នឹង​គម្រោង​អាកាសយានដ្ឋាន​អន្តរជាតិ​ភ្នំពេញ​ថ្មី ក្នុង​ស្រុក​កណ្ដាល​ស្ទឹង ខេត្ត​កណ្ដាល កាលពី​ថ្ងៃ​សៅរ៍​។

លោកបានឲ្យ​ដឹងថា៖ «ពេល​ខ្ញុំ​សម្ភាស​ប្រ​ជា​ពល​រដ្ឋ អាជ្ញាធរ​ស្លៀក​ពាក់​ស៊ីវិល​បាន​ថត​រូបខ្ញុំ និង​ម៉ូតូ​របស់​ខ្ញុំ»។ លោក​បន្ថែម​ថា៖ «​ក្រោយ​ចប់​សម្ភាស ខ្ញុំ​បាន​បើក​ម៉ូតូ​ត្រឡប់​មក​ភ្នំពេញ​វិញ​បាន​ប្រហែលជា​៥នាទី ប្រជាពលរដ្ឋ​បាន​ទូរសព្ទប្រាប់ខ្ញុំថាមាន​អាជ្ញាធរតាម​ពីក្រោយ ខ្ញុំបាន​ងាកក្រោយ​ ហើយ​បាន​ចាប់​អារម្មណ៍​ថាមាន​មនុស្ស​ពីរ​នាក់​ជិះ​តាមពីក្រោយ​ខ្ញុំ​មែន​»។

លោកបន្ត​ថា ពេល​កំពុង​បើក​បរ​ម៉ូតូ មាន​នរគបាល​ស្លៀក​ពាក់​ឯកសណ្ឋាន​ចំនួន​ប្រាំ​នាក់ បាន​ព្យាយាម​ស្ទាក់​រូប​លោក តែ​លោក​បាន​បន្ត​បើក​ទៅមុខក្នុង​ល្បឿន​លឿន។​

លោក​បាននិយាយ​ទៀតថា៖ «ពួកគេ​នៅតែ​តាម​ខ្ញុំ និង​ស្រែកថា​គេ​ជា​ប៉ូលិស និង​បាន​ហៅ​ឲ្យ​ខ្ញុំ​ឈប់ ដើម្បីនិយាយគ្នា ប៉ុន្តែ​ខ្ញុំ​មិនបាន​ឈប់ទេ ហើយ​ពេល​ខ្ញុំ​អត់ឈប់ ពួកគេ​បាន​ស្រែក​ដាក់​ខ្ញុំ​ថា​ចោរៗ»។​

លោក ខឺយ ថា​លោក​មាន​ការ​ភ័យ​ខ្លាច​ពី​សុវត្ថិ​ភាព និង​ចាត់ទុក​ថា​នេះជាការ​គំរាម​កំហែង​ប្រឆាំង​នឹង​សេរីភាព​សារព័ត៌មាន​។​

លោក​បានបន្ត​ថា៖ «​ខ្ញុំ​សូម​សម្ដែង​ការ​សោកស្ដាយ​ដែល​អាជ្ញាធរ​បាន​បំពាន​ទៅ​នឹង​ច្បាប់ស្ដី​ពីរបប​សារព័ត៌មាន ដែល​បាន​ធានា​ពី​សុវត្ថិភាព​សម្រាប់​អ្នក​កាសែត ហើយ​ថា​អ្នក​កាសែត​មាន​សិទ្ធិ​រាយការណ៍ និង​យក​ព័ត៌មាន​គ្រប់​កន្លែង​ដែល​មិន​មែន​ជា​កន្លែង​ហាមឃាត់»។ លោក​បានបន្ថែម​ទៀត​ថា៖ «​ប៉ុន្តែ​អាជ្ញាធរ​បែ​រជា​បន្ត​រឹត​បន្តឹង ហើយ​ខ្ញុំ​គិត​ថា​វាជារឿង​មិន​ល្អទេ ហើយ​នេះជា​ការ​ដាក់​សម្ពាធ​លើ​ការ​ងារ​របស់​អ្នក​សារព័ត៌មាន»។

អភិបាល​ស្រុក កណ្ដាល​ស្ទឹង លោក អ៊ូច សៅវឿន និយាយ​ថា​លោក​មិន​បាន​ដឹង​ពី​រឿង​នេះទេ។ យ៉ាងណា លោក​ថា​អាជ្ញាធរ​​នៅ​តំបន់​របស់​លោក​មិន​ដែល​រារាំង​អ្នក​កាសែត​ចុះ​យកព័ត៌មាន​នោះទេ​។​

លោក​បញ្ជាក់ថា៖ «​ខ្ញុំ​មិន​ដឹង​អំពី​រឿង​នេះទេ ប៉ុន្តែបើសិន​ជា​ពួកគេ​គ្រាន់​តែចុះ​យកព័ត៌មាន គ្មាន​អ្នកណា​ហាម​ឃាត់ទេ ពួកគេ​អាច​ចុះ​យក​បាន​គ្រប់កន្លែង​ដែល​មិន​មានការ​ហាម​ឃាត់»។​

ស្នងការ​នរគបាលខេត្ត​កណ្ដាល លោក ឈឿន សុចិត្រ បាន​ចុចបិទ​ទូរសព្ទ​ នៅពេល​អ្នក​សារព័ត៌​មាន​សួរ​នាំពី​ករណីនេះ។​

លោក មាស សោភ័ណ្ឌ អ្នក​នាំពាក្យ​ក្រសួង​ព័ត៌មាន បានមានប្រសាសន៍​ថា​លោក​មិន​បាន​ដឹង​ពី​បញ្ហា​នេះទេ និង​ថា​លោក​ត្រូវសួរ​នាំ​ទៅ​កាន់​មន្ទីរ​ព័ត៌មាន​ខេត្ត​កណ្ដាល​ជាមុន​សិន​។

យ៉ាងណា លោកថា ជា​ទូទៅអ្នក​កាសែត មិន​អនុញ្ញាត​ឲ្យ​ចូល​ទៅ​កន្លែង​ដែលអាជ្ញាធរ​កំពុង​ធ្វើ​ប្រតិបត្តិការ​នោះទេ​។​

លោកថ្លែង​​ថា​៖ «​អ្នកគ្មានភារៈកិច្ច​[នៅទី​នោះ​] រួម​ទាំង​អ្ន​ក​កាសែត​ផង គឺមិន​អនុញ្ញាត​ឲ្យ​ចូល​ទេ ពីព្រោះ​វា​អាច​បង្ក​ការ​រំខាន និង​បង្ក​ជាឧបសគ្គ​ដល់​ប្រតិបត្តិការ​របស់អាជ្ញាធរ និង​អាច​បង្ក​ជាគ្រោះ​ថ្នាក់​ដល់អាជ្ញាធរ​ដូច​គ្នា»។ លោក​បន្ថែមថា៖​«អាជ្ញាធរមាន​សិទ្ធិហាមឃាត់​អ្នក​កាសែត​មិន​ឲ្យ​ចូល»។​

កាល​ពីខែ​កក្កដា កន្លងទៅ ក្រ​សួង​ព័ត៌មាន​បាន​​បើក​ភ្លើង​ខៀវ​ឲ្យ​អាជ្ញាធរ​ចាត់វិធានការ​ច្បាប់​ប្រឆាំង​នឹង​អ្នក​កាសែត​ណា​ដែល​មិន​ធ្វើ​តាម​វិជ្ជាជីវៈ និង​ផ្សព្វ​ផ្សាយព័ត៌មាន​មិន​ពិត បង្កការ​រំខាន​ដល់​ការ​អនុវត្ត​ច្បាប់​។​

ក្រ​សួង ធ្វើ​ការ​សម្រេច​បែបនេះ បន្ទាប់​ពី​អាជ្ញាធរ​ខេត្ត​កណ្ដាល​បាន​សរសេរ​លិខិត​មួយ​ច្បាប់​ទៅក្រ​សួង​កាល​ពីខែ​មិថុនា ដោយ​បាន​ស្នើ​ឲ្យ​មាន​វិធានការ​ច្បាប់​លើ​អ្នក​កាសែត​មួយ​ចំនួន​បាន​ផ្សាយ​ផ្ទាល់​ពីការ​តវ៉ារបស់​ប្រជាពលរដ្ឋ​ប្រឆាំង​គម្រោង​អភិវឌ្ឍន៍​អាកាសយាន​ដ្ឋាន​ថ្មី​។​

លោក លួស សេង ចាងហ្វាងការផ្សាយ​ទូរទស្សន៍អនឡាញ ​LSN និង​ជា​អ្នក​សារព័ត៌មាន​ម្នាក់​ដែល​ជា​មុខ​សញ្ញា​របស់​អាជ្ញាធរ​ខេត្ត​ដែរ​នោះ បាន​ទទួល​ការ​ការព្រមានពី​អាជ្ញាធរ​បន្ទាប់​ពី​បាន​ផ្សាយ​ផ្ទាល់​ការ​តវ៉ា​របស់​អ្នក​ភូមិ​។​

លោក បាន​ប្រាប់ខេមបូចា នៅ​ថ្ងៃចន្ទថា លោក​មិន​បានទៅ​ចូល​រួម​ក្នុងសន្និសីទ​សារព័ត៌មាន​កាលពីថ្ងៃសៅរ៍​នោះទេ ពីព្រោះថា​ ប្រជា​ពល​រដ្ឋ​បាន​ទូរសព្ទ​ប្រាប់​លោក​មិន​ឲ្យ​ទៅ ខ្លាច​មានការ​ចាប់​ខ្លួន​។​

អ្នកភូមិបានប្រាប់ខេមបូចា ថាអាជ្ញាធរ​បាន​រាយ​កម្លាំងតាំងពីច្រក​ចូល​ត្រង់ចំណុច​ផ្លូវជាតិ​លេខ២ រហូតដល់បរិវេណ​សន្និសីទ​សារព័ត៌មាន​របស់​អ្នក​ភូមិ​។ លោក​ថា អាជ្ញាធរ​បាន​ដេញ​តាម​ពីក្រោយ​លោក ខឺយ បន្ទាប់ពី​អ្នក​កាសែតរូបនោះ​បាន​ចាក​ចេញ​ពីកន្លែងប្រមូលផ្តុំ ហើយ​ថា​អ្នក​ភូមិ​ប្រមាណ​​​១០​នាក់​ផ្សេង​ទៀត ក៏​បាន​ជិះ​ម៉ូតូ​តាមពីក្រោយ​ដែរ ក្នុង​គោល​បំណង​ជួយ​គាត់ ក្នុង​ករណី​មាន​ការ​ចាប់ខ្លួន​។ ​

លោក ណុប វី នាយកប្រតិបត្តិ​សមាគម​សម្ព័ន្ធអ្នក​សារព័ត៌មាន​កម្ពុជា​ មាន​ប្រសាសន៍​ក្នុង​សេចក្ដី​ថ្លែងការណ៍ចេញ​ផ្សាយ​កាលពី​​ថ្ងៃចន្ទ​ ថា​សកម្មភាព​នេះបាន​ធ្វើ​ឲ្យ​ប៉ះពាល់​យ៉ាង​ធ្ងន់​ធ្ងរ​លើ​សិទ្ធិអ្នក​សារព័ត៌មាន​។​

លោក​បន្ថែមថា៖ «ការរារាំង ការគំរាមកំហែង​តាម​រយៈរូបភាព​ផ្សេងៗមក​លើ​អ្នក​សារព័ត៌មាន​ ធ្វើ​ឲ្យ​ប៉ះពាល់​យ៉ាង​ធ្ងន់​ធ្ងរ​មក​លើ​សេរី​ភាព​របស់​អ្នក​សារព័ត៌មាន​ ស្ថា​ន​ភាព​សេរីភាព​បញ្ចេញ​មតិរបស់​កម្ពុជា និង​ប៉ះពាល់​ធ្ងន់​ធ្ងរ​ដល់​សិទ្ធិ​ទទួល​បាន​ព័ត៌មាន​របស់​អ្នក​សារព័ត៌មាន និង​របស់​ប្រជា​ពល​រដ្ឋទូទៅ»។​

សមាគម​សម្ព័ន្ធអ្នក​សារព័ត៌មាន​កម្ពុជា​ បាន​កត់ត្រាករណី​បំពារបំពាន​លើ​អ្នកសារព័ត៌មាន​ចំនួន​៣៨​ករណី ដែល​មាន​អ្នក​សារព័ត៌មាន​សរុប​ចំនួន​៥៦នាក់ គិត​តាំង​ពី​ដើម​ឆ្នាំនេះ​មក​។​​

ដោយ​អះអាង​ថា​សំណង​ដែល​ផ្ដល់​ឲ្យ​មាន​តម្លៃ​ទាបពេក​ អ្នក​ភូមិ​រាប់​រយ​គ្រួសារ​កំពុង​ជាប់​គាំង​នៅ​ក្នុង​ជម្លោះដីធ្លី​ជាង​បី​ឆ្នាំ​ហើយ មក​ដល់ពេល​នេះ ដែល​ជម្លោះនេះ​កើត​មានជាមួយ​នឹង​ក្រុម​ហ៊ុន​អភិវឌ្ឍអាកាសយានដ្ឋាន​អន្តរជាតិភ្នំពេញ​ថ្មី វិនិយោគដោយ​ក្រុមហុន OCIC  ដែល​តម្លៃ​ជាង​១,៥​ពាន់​លាន​ដុល្លារ​ ​ ​របស់​លោក​ ពុង ឃាវសែ ដែលស្និទ្ធនឹងគណបក្សប្រជាជន។

កាលពី​ថ្ងៃទី​១ ខែកញ្ញា ក្រុម​ហ៊ុន​បាន​កាត់​ផ្ដាច់​ផ្លូវ​ក្នុង​ភូមិ ធ្វើ​ឲ្យ​មានការ​លំបាក​ដល់ប្រជា​ពល​រដ្ឋ​ចេញ​ចូ​ល​ដី​ស្រែ​របស់​ពួកគាត់​។ រដ្ឋបាល​ខេត្ត​កណ្ដាល បាន​ចេញ​សេចក្ដីជូន​ដំណឹង​មួយ​កាលពី​ថ្ងៃទី​៣ ខែកញ្ញា ដោយ​ថា​កាត់​ផ្ដាច់​ផ្លូវ និង​បិទ​ផ្លូវ​នេះ គឺដើម្បីបង្ហូរទឹក​កុំឲ្យ​លិច​ការដ្ឋាន​គម្រោង​សាងសង់​ផ្លូវ​យន្តហោះ​រត់​។​

យ៉ាងណា​ អ្នក​ភូមិ​ម្នាក់​ឈ្មោះ ទួន​ វណ្ណៈ ម្ចាស់​ដី​០,៤០​ហិកតា ដែល​ប៉ះពាល់​ដោយ​ផ្ទាល់​ជាមួយ​ការដ្ឋានសាង​សង់​ផ្លូវរត់​របស់​យន្ត​ហោះ​នេះ បាននិយាយថា៖ «ខ្ញុំ​​យល់​ថា អាជ្ញាធរ​កាត់​ផ្លូវ​នេះ​ដើម្បី​ទន្រ្ទាន​យក​ដី​របស់​ប្រជា​ពល​រដ្ឋ ពីព្រោះ​ប្រជា​ពល​រដ្ឋ​មិន​អាច​ចូល​ទៅ​ក្នុង​ដី​របស់​ខ្លួន​បាន»។

សមាគមសម្ព័ន្ធ​អ្នក​សារព័ត៌មាន​កម្ពុជា​ ​បាន​អំពាវ​នាវ​ឲ្យ​អាជ្ញាធរ​មាន​វិធានការ​ជាក់​លាក់​ដាក់​ទោស​ទណ្ឌ​លើ​មន្ត្រី​​បាន​បំពារបំពាន និង​រំខាន​​អ្នក​សារព័ត៌​មាន​។

ប្រែសម្រួលពីអត្ថបទភាសាអង់គ្លេស៖ Journalists covering mega airport project face threat and harassment

403 views
ព័ត៌មានថ្មីៗ »
អត្ថបទពេញនិយម »