សមាគមសម្ព័ន្ធអ្នកសារព័ត៌មានកម្ពុជា

សកម្មជនដីធ្លីខេត្តកំពង់ឆ្នាំងត្រូវបានចោទប្រកាន់ បន្ទាប់ពីបានផ្សាយផ្ទាល់បញ្ហាជម្លោះដីធ្លី

សកម្មជនដីធ្លី អ្នកស្រី អ៊ុំ សុភី និងអ្នកភូមិផ្សេងទៀតមកពីសហគមន៍ឡពាង ដាក់ញត្តិនៅក្រសួងមហាផ្ទៃ ដើម្បីស្នើសុំឱ្យក្រសួងយល់ព្រមដាក់បឹងពោធិ៍ជាតំបន់ការពារ។ រូបថតថ្ងៃទី១០ ខែកញ្ញា ឆ្នាំ២០២១។ ខេមបូចា/ ព្រីងសំរាំង
សកម្មជនដីធ្លី អ្នកស្រី អ៊ុំ សុភី និងអ្នកភូមិផ្សេងទៀតមកពីសហគមន៍ឡពាង ដាក់ញត្តិនៅក្រសួងមហាផ្ទៃ ដើម្បីស្នើសុំឱ្យក្រសួងយល់ព្រមដាក់បឹងពោធិ៍ជាតំបន់ការពារ។ រូបថតថ្ងៃទី១០ ខែកញ្ញា ឆ្នាំ២០២១។ ខេមបូចា/ ព្រីងសំរាំង

សកម្មជនដីធ្លីម្នាក់ដែលធ្លាប់ត្រូវបានចាប់ខ្លួនក្នុងជម្លោះដីធ្លីដ៏រ៉ាំរ៉ៃក្នុងខេត្តកំពង់ឆ្នាំង ត្រូវបានចោទប្រកាន់ពីបទគំរាមសម្លាប់ បន្ទាប់ពីផ្សាយផ្ទាល់លើបណ្តាញហ្វេសប៊ុកជុំវិញបញ្ហាជម្លោះដីធ្លីរវាងអ្នកភូមិនិងអ្នកភូមិ។

នគរបាលបានបញ្ជាក់ប្រាប់ខេមបូចាថា កាលពីថ្ងៃសៅរ៍អាជ្ញាធរពិតជាបានចាប់ខ្លួនអ្នកស្រី អ៊ុំ សុភី ក៏ដូចជាស្វាមីអ្នកស្រីគឺ លោក ស្ងួន ញឿន រួមទាំងអ្នកស្រី ទួន សេង ដែលជាអ្នកភូមិម្នាក់ទៀតមែន  ដោយចោទថាបានបំផ្លិចបំផ្លាញទ្រព្យសម្បត្តិអ្នកដទៃ។ មកដល់ល្ងាចថ្ងៃចន្ទ អ្នកនាំពាក្យតុលាការខេត្តកំពង់ឆ្នាំង លោក ហុង គឹមហាក់ បានប្រាប់ថាចៅក្រមស៊ើបសួរ បានសម្រេចចោទប្រកាន់អ្នកភូមិទាំង៣នាក់ករណីផ្សេងៗពីគ្នា។

អ្នក​នាំ​ពាក្យ​រូប​នេះ​បាន​ឱ្យដឹង​ថា អ្នកស្រី សុភី និង​ស្វាមី ​ត្រូវ​បាន​ចោទ​ប្រកាន់​ពី​បទ​គំរាម​សម្លាប់​ដើម​បណ្តឹង។ ដោយឡែក អ្នកស្រី សេង ត្រូវបាន​​ចោទ​ប្រកាន់​ពី​បទ​លួច​ទ្រព្យសម្បត្តិ​ពី​ដើម​បណ្តឹង​ដែល​ជា​អ្នក​ជិត​ខាង។

លោក គឹមហាក់ បាន​បន្ត​ថា អ្នក​ទាំង​៣​ឥឡូវនេះ​កំពុង​ស្ថិត​ក្នុង​ការ​ឃុំ​ខ្លួន​បណ្តោះ​អាសន្ន។ តុលាការ​មិន​បាន​ផ្តល់​ព័ត៌មាន​លម្អិត​ពីមូលហេតុនៃ​ការ​ចោទ​ប្រកាន់​នោះ​ទេ។

ការ​ចាប់​ខ្លួន​នេះ​ធ្វើ​ឡើង ​បន្ទាប់​ពី​អ្នកស្រី សុភី បាន​ផ្សាយ​ផ្ទាល់​ពីជម្លោះដីធ្លីនៅ​ភូមិ​តាមុល​លើ ស្រុក​ជលគិរី។តាមលោក ប្រាក់ សុភុំ រស់នៅភូមិតាមុលលើដែលបានប្រាប់ថាលោកបានឃើញហេតុការណ៍ផ្ទាល់ បានថ្លែងថាការចោទប្រកាន់ប្រឆាំងអ្នកទាំង៣គ្មានមូលដ្ឋាននោះឡើយ។ លោក សុភុំ បន្ត​ថា ជន​ជាប់​ចោទ ឈ្មោះ សុភីបាន​មក​មើល​ដី​ឈ្មោះ សេង ដែល​មាន​ជម្លោះ​ជាមួយ​អ្នក​ភូមិម្នាក់ទៀត និង​មន្ត្រី​មូលដ្ឋាន។ លោក សុភុំ ប្រាប់ខេមបូចាថា ប្រជាពលរដ្ឋ ៥គ្រួសារ រួមទាំងលោកផ្ទាល់ផង កំពុងតវ៉ាជាមួយអាជ្ញាធរមូលដ្ឋាន ដោយចោទប្រកាន់ថាអាជ្ញាធរកាត់ចំណែកដីមួយចំនួនរបស់ពួកគេយកទៅចែកឱ្យគ្រួសារផ្សេង។

លោក សុភុំ បានប្រាប់​ថាអាជ្ញាធរ​កំពុង​បែងចែក​ដី​ឱ្យប្រជាពលរដ្ឋ​ប្រមាណ ៣០០​គ្រួសារ នៅ​ភូមិ​តាមុល​លើ ចាប់​ពី​ដី​ទំហំ ១៥​គុណ ៥០​ម៉ែត្រ ដល់​អ្នក​ដែល​រស់​នៅ​ក្នុង​តំបន់​នោះ​ពី​មុន និង ៧​គុណ ៥០​ម៉ែត្រ ដល់​អ្នក​ចំណូល​ថ្មី។

លោក​បានបន្ថែមថា អ្នកស្រី សេង ជាសមាជិក​សហគមន៍​ឡពាង ហើយ​បាន​សុំ​ឱ្យអ្នកស្រី សុភី ជួយ​ផ្សព្វផ្សាយ​ព័ត៌មាន​អំពី​ជម្លោះ​ដីធ្លី​របស់​ខ្លួន។ លោក សុភុំ បានបន្ត​ថា ការ​ចោទ​ប្រកាន់​ជន​ទាំង​៣​នេះ គឺ​មក​ពី​អ្នកស្រី សេង ដុត​សំរាម​នៅ​ក្បែរ​ទ្រុង​គោ​ក្របីរបស់អ្នកភូមិម្នាក់ទៀត។ បើ​តាម​លោក សុភុំ រោង​នោះ​មិន​ត្រូវ​បានភ្លើង​ឆាបឆេះ​ទេ តែករណីនេះ​ជា​កម្មវត្ថុ​នៃ​ពាក្យ​បណ្តឹង​ផ្លូវ​ច្បាប់។

លោក​បាន​ថ្លែង​ថា​៖ «​ពួក​គាត់​មិនបាន​ធ្វើខូច​ខាត​ទ្រុង​គោ​ក្របី​ទេហ្នឹងទេ។ ខ្ញុំ​គិត​ថា​វា​ជា​ការ​រំលោភ​សិទ្ធិ​ប្រជាពលរដ្ឋ​ ដែលពួកគាត់ត្រូវបានគំរាមកំហែងជុំវិញបញ្ហាដីធ្លី»។លោក ជិន ថាណា មេឃុំកោះថ្កូវ បានបដិសេធការចោទប្រកាន់ដែលថាអាជ្ញាធរយកដីពីពួកគេ ប៉ុន្តែលោកបាននិយាយថា អ្នកស្រី សេង ទៅវិញទេទៅកាន់កាប់ដីអ្នកដទៃដែលរដ្ឋាភិបាលផ្តល់ឱ្យ។

លោក​ បានប្រាប់ថា​៖ «​វា​មិន​ពាក់ព័ន្ធ​នឹង​អាជ្ញាធរ​យក​ដី​គាត់​ទេ ប៉ុន្តែ​តាម​ពិត​គាត់​បាន​ទន្ទ្រាន​យក​ដី​អ្នកផ្សេង»។

មន្ត្រីសម្របសម្រួលអង្គការអាដហុក​ប្រចាំ​ខេត្ត​កំពង់ឆ្នាំង លោក សំ ចាន់គា មានប្រសាសន៍ថាករណីប្រើប្រាស់ផ្លូវច្បាប់បែបនេះហាក់ដូចជារំលោភសិទ្ធជនជាប់ចោទ។ លោក ចាន់គា កត់​សម្គាល់​ថាអ្នកស្រី សុភី និង​ស្វាមី មិន​ពាក់ព័ន្ធ​នឹង​ជម្លោះ​ដែលត្រូវបាន​ចោទ​ប្រកាន់នេះ​ទេ ដោយថាពួកគេគ្រាន់តែផ្សាយផ្ទាល់ពីកន្លែងមានជម្លោះតែប៉ុណ្ណោះ។

លោក​បាន​បន្ត​ថា​៖ «​វា​ជា​ចេតនា​មិនសុច្ចរិត​របស់​អាជ្ញាធរ​ដោយ​យកលេស​ថារឿង​ដី​នោះ​ ហើយ​បង្ក្រាប​សកម្មជន​ដីធ្លី​ដែល​ហ៊ាន​ចេញ​មក​ជួយ​ប្រជាពលរដ្ឋ​ដែល​រងគ្រោះ​​»។ លោកបានបន្ថែមថាអាជ្ញាធររំលោភសិទ្ធបញ្ចេញមតិរបស់ពលរដ្ឋដែលមានចែងក្នុងរដ្ឋធម្មនុញ្ញ។

លោក ចាន់គា បានប្រាប់លោកនឹងស៊ើបអង្កេតបន្ថែមទៀតជុំវិញករណីជម្លោះដីធ្លីដែលលោក សុភុំ បានបរៀបរាប់នេះ។

ក្នុង​នាម​ជា​អ្នកដែលនិយាយមិនសំចៃមាត់​ពី​បញ្ហា​ដីធ្លី អ្នកស្រី សុភី ត្រូវរង​ការ​ស៊ើប​អង្កេត​ផ្លូវ​ច្បាប់​ជា​ច្រើនករណី។ កាលពីចុងខែកញ្ញា សាលាដំបូងខេត្តកំពង់ឆ្នាំង បានសាកសួរសកម្មជនដីធ្លី៤នាក់ រួមទាំង អ្នកស្រី សុភី ជុំវិញបណ្តឹងប៉ុនប៉ងមនុស្សឃាត និងបំផ្លិចបំផ្លាញដោយចេតនា បន្ទាប់ពីពួកគេត្រូវបានចោទថាបានប្រើកាំបិតបំផ្លាញអួនរបស់អ្នកនេសាទនៅក្នុងឃុំតាជេស ស្រុកកំពង់ត្រឡាច។

ដើមបណ្តឹងក្នុងករណីនោះជាអ្នកនេសាទក្នុងផ្នែកមួយនៃបឹងពោធិ៍ដែលសកម្មជនចាត់ទុកថាជាបឹងអភិរក្សប៉ុន្តែមិនត្រូវបានអាជ្ញាធរទទួលស្គាល់នោះទេ។ ទោះបីជាសកម្មជនម្នាក់ បានសារភាពថាខ្លួនពិតជាបានបំផ្លាញអួនពិតមែន ប៉ុន្តែ៤នាក់ទៀតបានបដិសេធពីចេតនាបង្កអំពើហិង្សាណាមួយ។

ជាមួយគ្នានេះ សហគមន៍ឡពាង បាននិងកំពុងមានជម្លោះដីធ្លីរយៈពេលជិតពីរទសវត្សរ៍មកហើយជាមួយក្រុមហ៊ុនKDC ដែលជាកម្មសិទ្ធិរបស់លោកស្រី ជា ខេង ដែលជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។

ក្រុមហ៊ុនKDC ទាមទារកម្មសិទ្ធិលើផ្ទៃដី ៥១២ ហិកតា ស្ថិតក្នុងឃុំតាជេស ស្រុកកំពង់ត្រឡាច។ ប្រជាពលរដ្ឋរាប់សិបគ្រួសារមិនទាន់ដោះស្រាយវិវាទជាមួយក្រុមហ៊ុន KDC បាននៅឡើយទេ ដោយពួកគេនិយាយថាក្រុមហ៊ុនបានរំលោភយកដីរបស់ពួកគេប្រហែល១០០ហិកតាក្នុងឆ្នាំ២០០២។

កាលពីថ្ងៃទី៨ ខែកក្កដា សាលាដំបូងរាជធានីភ្នំពេញបានកាត់ទោសអ្នកភូមិចំនួន៤ នាក់ រួមទាំង អ្នកស្រី សុភី និង លោក រាជ សីម៉ា ឱ្យជាប់ពន្ធនាគាររយៈពេល ១ ឆ្នាំ ពីបទញុះញង់ឱ្យប្រព្រឹត្តបទឧក្រិដ្ឋ បំផ្លិចបំផ្លាញដោយចេតនានិងប្រើប្រាស់អំពើហិង្សាលើទ្រព្យសម្បត្តិដែលកាន់កាប់ដោយបុគ្គលម្នាក់ក្នុងឆ្នាំ ២០១២។នៅក្នុងសំណុំរឿងដាច់ដោយឡែកមួយពាក់ព័ន្ធនឹងក្រុមហ៊ុន KDC តុលាការរាជធានីភ្នំពេញកាលពីថ្ងៃទី ១៤ ខែសីហា ឆ្នាំ ២០២០ បានកាត់ទោសអ្នកស្រី សុភី និងអតីតមេភូមិឡពាង លោក ទូច លី ពីបទញុះញង់ឱ្យប្រព្រឹត្តបទឧក្រិដ្ឋ ហើយបានផ្តន្ទាទោសសកម្មជនរូបនេះឱ្យជាប់ពន្ធនាគាររយៈពេល ១ ឆ្នាំ បន្ទាប់ពីរកឃើញថាមានទោសពីបទញុះញង់អ្នកភូមិឱ្យធ្វើស្រែចម្ការលើដីដែលជាកម្មសិទ្ធរបស់ក្រុមហ៊ុន KDC៕

ប្រែសម្រួលពីអត្ថបទភាសាអង់គ្លេស៖ Kampong Chhnang land activists charged after livestreaming dispute

784 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម