សមាគមសម្ព័ន្ធអ្នកសារព័ត៌មានកម្ពុជា

តុលាការខេត្តកណ្តាលសម្រេចឲ្យអ្នកតវ៉ាគម្រោងព្រលានយន្តហោះថ្មី៩នាក់រួចផុតពីបទចោទ

អ្នកបើកបរម៉ូតូឆ្លងកាត់មុខសាលាដំបូងខេត្តកណ្តាលកាលពីថ្ងៃទី៦ ខែតុលា ឆ្នាំ២០២២។ ខេមបូចា / ព្រីង សំរាំង
អ្នកបើកបរម៉ូតូឆ្លងកាត់មុខសាលាដំបូងខេត្តកណ្តាលកាលពីថ្ងៃទី៦ ខែតុលា ឆ្នាំ២០២២។ ខេមបូចា / ព្រីង សំរាំង

សាលា​ដំបូង​ខេត្ត​កណ្តាល​កាល​ពី​ថ្ងៃ​អង្គារ​បាន​រកឃើញថា ​អ្នក​ភូមិ​​៩​នាក់​គ្មាន​ពិរុទ្ធទេ ​បន្ទាប់​ពី​ពួក​គេ​ត្រូវ​បាន​ចាប់​ខ្លួន​កាល​ពី​ឆ្នាំ​មុន ​ជុំវិញ​ការ​តវ៉ា​ប្រឆាំង​នឹង​គម្រោងសាងសង់​ព្រលាន​យន្តហោះ​អន្តរជាតិ​ថ្មី​មួយ​ ដែល​នឹង​បង្ខំ​ពួក​គេ​និង​ក្រុម​គ្រួសារ​ឲ្យ​ផ្លាស់​ប្តូរ​ទីលំនៅ។

អ្នកភូមិ៩នាក់មកពីស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ ត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យរារាំងមន្ត្រីសាធារណៈ ហើយត្រូវប្រឈមនឹងការជាប់ពន្ធនាគាររហូតដល់៥ឆ្នាំ ប្រសិនបើរកឃើញពិរុទ្ធភាព។

ពួកគេត្រូវបានដោះលែងឲ្យនៅក្រៅឃុំកាលពីឆ្នាំមុន ក្រោយពីត្រូវ​បាន​ចាប់ខ្លួន នៅពេលដែលពួកគេចូលរួមក្នុងការតវ៉ាប្រឆាំងនឹងការអភិវឌ្ឍព្រលានយន្តហោះដោយក្រុម​ហ៊ុន​សាជីវកម្មវិនិយោគក្រៅប្រទេសកម្ពុជា (OCIC) ដែលជាកម្មសិទ្ធិរបស់ឧកញ៉ា ពុង ឃាវសែ ដែលមានខ្នងក្រាស់។

អ្នកតវ៉ាម្នាក់ក្នុងចំណោមអ្នកតវ៉ាដែលត្រូវបានដោះលែងគឺ ឌុក ស៊ីណាត អាយុ ២៤ ឆ្នាំបាននិយាយថា នាងអរគុណចំពោះសេចក្តីសម្រេចនេះដោយសារនាងគ្រោងនឹងធ្វើដំណើរទៅធ្វើការនៅប្រទេសកូរ៉េខាងត្បូងក្នុងពេលឆាប់ៗនេះ។

ស៊ីណាត បាន​និយាយថា៖ «ខ្ញុំ​ត្រូវ​ទៅ​ធ្វើ​ការ​នៅ​កូរ៉េ។ ប្រសិន​បើ​តុលាការ​មិន​ទម្លាក់​​ការ​ចោទ​ប្រកាន់​ទេ ខ្ញុំ​នឹង​មិន​អាចធ្វើ​អ្វីបាន​ឡើយ»។​ នាង​បាន​បន្ថែម​ថា នាង​មិន​បាន​ប្រព្រឹត្ត​បទ​ល្មើស​ដូច​ការ​ចោទ​ប្រកាន់​នោះ​ទេ។

ស៊ីណាត បាននិយាយថា៖​ «តាម​ពិត អ្នក​ភូមិ​ខ្លះ​គប់​ដុំ​ថ្ម​ដាក់​អាជ្ញាធរ [ពេល​តវ៉ា] ប៉ុន្តែ​ដោយ​សារ​ពួក​គាត់​ខឹង​ ​បន្ទាប់​ពី​ដី​ស្រែ​ចម្ការ​របស់​ពួក​គាត់​ត្រូវ​បាន​បំផ្លាញ»។

ជនជាប់ចោទ៥នាក់រួមទាំង ស៊ីណាត មាន​មេធាវីដែល​ផ្តល់ដោយអង្គការសិទ្ធិមនុស្សលីកាដូ។

មនុស្ស៩នាក់ដែលត្រូវបានចាប់ខ្លួននៅពេលតវ៉ាប្រឆាំងនឹងគម្រោងសាងសង់ព្រលានយន្តហោះថ្មីត្រូវបានដោះលែងឲ្យនៅក្រៅឃុំកាល​ពី​ថ្ងៃទី២០ ខែកញ្ញា ឆ្នាំ២០២១។ រូបភាពផ្តល់ឲ្យ

លោក អំ សំអាត នាយកទទួលបន្ទុកិច្ចការទូទៅ​នៃ​អង្គការ​លីកាដូបាន​ស្វាគមន៍​ការ​សម្រេច​របស់​តុលាការ ដោយបានលើកឡើងថា ​ប្រព័ន្ធ​តុលាការ​មិន​ត្រូវ​បាន​ប្រើ​ដើម្បី​ដាក់​សម្ពាធ​លើ​អ្នក​មាន​ជម្លោះ​ដីធ្លី។

លោកមាន​ប្រសាសន៍ថា៖ «ពួកគាត់ភាគច្រើនបានយល់ព្រមទទួលយកសំណង [សម្រាប់ការផ្លាស់ទីលំនៅ]។ វា​គឺជា​ជម្លោះ​ដីធ្លី ហើយ​ពួកគាត់មិន​បាន​ប្រព្រឹត្ត​ដូច​ការ​ចោទ​ប្រកាន់​នោះ​ទេ»។

លោក សំអាត បានបន្ថែមថា ឥឡូវនេះចាំបាច់ត្រូវតែពន្លឿនដំណោះស្រាយដែលអាចទទួលយកបានរវាងប្រជាពលរដ្ឋនិងក្រុមហ៊ុន OCIC៕

ប្រែសម្រួលពីអត្ថបទភាសាអង់គ្លេស៖ Kandal Court Finds Nine Airport Protesters Not Guilty

147 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម