សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋជាច្រើនគ្រួសារនៅខេត្តកណ្ដាល ដែលប្រឈមនឹងការបណ្ដេញចេញពីតំបន់ព្រលានយន្តហោះថ្មី ស្នើសុំបណ្ណកម្មសិទ្ធិដីធ្លី

ប្រជាពលរដ្ឋរស់នៅតាមបណ្ដោយប្រឡាយលេខ៩៤ក្នុងឃុំកណ្ដោកខេត្តកណ្ដាលប្រមូលផ្ដុំគ្នានៅវេទិកា ក្នុងសហគមន៍របស់ពួកគេ ដើម្បីបង្ហាញពីភាពភ័យខ្លាចទៅនឹងការបណ្ដេញចេញទាក់ទងនិងគម្រោងព្រលានយន្តហោះថ្មី កាលពីថ្ងៃទី៧ ខែកុម្ភៈ ឆ្នាំ២០២៣។ ខេមបូចា/ព្រីង សំរាំង
ប្រជាពលរដ្ឋរស់នៅតាមបណ្ដោយប្រឡាយលេខ៩៤ក្នុងឃុំកណ្ដោកខេត្តកណ្ដាលប្រមូលផ្ដុំគ្នានៅវេទិកា ក្នុងសហគមន៍របស់ពួកគេ ដើម្បីបង្ហាញពីភាពភ័យខ្លាចទៅនឹងការបណ្ដេញចេញទាក់ទងនិងគម្រោងព្រលានយន្តហោះថ្មី កាលពីថ្ងៃទី៧ ខែកុម្ភៈ ឆ្នាំ២០២៣។ ខេមបូចា/ព្រីង សំរាំង

ប្រជា​ពល​រដ្ឋ​រាប់​រយ​គ្រួសារ​​រស់នៅ​លើ​ទំនប់​៩៤ ដែល​កំពុង​ប្រឈមនឹង​ការ​បណ្ដេញ​ចេញ​ពី​តំបន់​​អភិវឌ្ឍន៍ហេដ្ឋារចនាសម្ព័ន្ធ​​​ព្រលាន​យន្ត​ហោះ​ថ្មី​ ក្នុង​ខេត្ត​កណ្ដាល បាន​អំពាវ​នាវ​ឲ្យ​អាជ្ញាធរ​ផ្ដល់​​ប្លង់​កម្មសិទ្ធិ​ដីធ្លី​ស្របច្បាប់​ឲ្យ​ពួកគេ  ដើម្បីអាចអភិវឌ្ឍន៍​នៅ​នឹង​កន្លែង និង​បញ្ឈប់​ការ​បំភិត​បំភ័យ។

ការ​លើក​ឡើង​បែប​នេះ គឺ​នៅក្នុងវេទិកា​មួយ​ក្នុង​ភូមិ​អំពៅព្រៃ ឃុំកណ្ដោក ស្រុក​កណ្ដាលស្ទឹង កាលពី​ថ្ងៃ​អង្គារ។ ការ​ជួបជុំ​នេះ​ក៏​មាន​ការ​ឃ្លាំ​មើល​​ពី​អាជ្ញាធរ​មូល​ដ្ឋាន​ផង​ដែរ​។​

អ្នក​ស្រី​ កន រ៉ុន ​ដែល​អះអាង​ថា ​បាន​រស់​នៅ​ទី​តាំង​នេះរយៈពេល​​២៥​ឆ្នាំ និង​ប្រកប​របរ​ចិញ្ចឹម​ជីវិត​ដោយ​ការ​រក​ត្រី បាន​លើក​ឡើង​ថា៖ «​វា​នឹង​ប៉ះពាល់​ដល់​ជីវភាពពួកយើង បើ​សិន​បើ​​យើង​ត្រូវ​គេ​បណ្ដេញ​ចេញ ពីព្រោះ​យើង​មិន​ដឹង​ថា​ទៅ​រស់​នៅ​កន្លែង​ណា»។​

ប្រ​ជា​ពល​រដ្ឋ​ជាង​៣០០​គ្រួសារ​ផ្សេងទៀត​ក្នុង​ស្រុក​កណ្ដា​ល​ស្ទឹង ខេត្ត​កណ្ដាល និង​ស្រុក​បាទី ​ខេត្ត​តាកែវ បាន​រង​ផល​ប៉ះពាល់រួចហើយ​​ពីគម្រោង​​ព្រលាន​យន្តហោះ​ថ្មី​ដែលមាន​តម្លៃ​​១,៥​ពាន់​លាន​ដុល្លារ ដែលវិនិយោគ​ដោយ ​ក្រុម​ហ៊ុន​ OCIC របស់​លោក​ឧកញ៉ា ពុង ឃាវសែ។​

ពួកគេភាគច្រើន​បាន​បដិសេធមិនទទួល​សំណង​ពីផល​ប៉ះពាល់​មកលើ​​ដី​ស្រែ និង​ដី​ផ្ទះ​ ដែលផ្តល់​ឲ្យ​ក្រុមហ៊ុន​ក្នុង​តម្លៃ ៨​ដុល្លារ​ក្នុង​មួយ​ម៉ែត្រ​ការ៉េ បើ​ទោះ​បី​ជា​ដី​ប៉ះពាល់​ទាំង​នោះ​ត្រូវ​បាន​ឈូស​ឆាយ​ហើយ​ក៏​ដោយ​។​ គម្រោង​ព្រលាន​យន្ត​ហោះ​នេះ​អភិវឌ្ឍន៍​លើ​ផ្ទៃដី​​ទំហំ​២​ ៦០០ហិកតា។​

ដោយ​ឡែក​គ្រួសារ​ជា​ច្រើន ​រស់នៅ​ទំនប់​៩៦ ដែល​មាន​ចម្ងាយ​៥គីឡូម៉ែត្រពីទីតាំងព្រលាន បាន​អះ​អាង​​​ថា​ ផ្ទះ​របស់​ពួក​គាត់​ត្រូវ​បាន​អាជ្ញាធរបាញ់​ថ្នាំ​​លើ​ជញ្ជាំង​កាលពីខែវិច្ឆិកា ប៉ុន្តែ​ពួកគេ​​មិន​ត្រូវ​បាន​ជូនដំណឹង​ថា​រងផល​ប៉ះពាល់ពី​គម្រោង​ព្រលាន​យន្ត​ហោះ​នេះ​ទេ​។​

អ្នកស្រី រ៉ុន ជឿថា​ការ​បោះ​ឆ្នោត​ជាតិ​ខែ​កក្កដា ខាង​មុខ​នឹង​អាច​នាំ​ឲ្យ​លោក​នាយក​រដ្ឋ​មន្ត្រី​ ហ៊ុន សែន ពិចារណា​លើ​ការ​ទាម​ទារ​របស់​ប្រ​ជា​ពល​រដ្ឋ​នេះ។​

អ្នកស្រី​បាននិយាយថា៖ «មុន​ពេល​បោះ​ឆ្នោត ខ្ញុំ​សង្ឃឹម​ថាសម្តេច [ហ៊ុន សែន] នឹង​គិត​គូ​រ​ដល់​ពួក​យើង​ទាំងអស់​គ្នា​…​គាត់​នឹង​ដោះ​ស្រាយ​វា​ឲ្យ​ពួកយើង»។ អ្នកស្រី​បន្ថែម​ថា៖ «ក្រោយ​ការ​បោះឆ្នោត​ វា​នឹង​មានការ​ពិបាក​ក្នុង​ការ​ទាម​ទារ​ពីព្រោះ​អាជ្ញាធរ​តែងតែកុហក់​ប្រជា​ពល​រដ្ឋ ដូច​នេះ​យើង​មិន​ទុក​ចិត្ត​ទេ»។​

ប្រជាពល​រដ្ឋ​រស់​នៅ​តាម​បណ្ដោយ​ប្រឡាយលេខ៩៤​ក្នុង​ឃុំកណ្ដោកខេត្តកណ្ដាល​ប្រមូល​ផ្ដុំ​គ្នាក្នុង​វេទិកា ​ក្នុង​សហគមន៍​របស់​ពួកគេ ​ដើម្បី​បង្ហាញ​ពី​ភាព​ភ័យខ្លាច​ទៅ​នឹង​ការបណ្ដេញ​ចេញទាក់ទង​និង​គម្រោង​ព្រលាន​យន្តហោះថ្មី កាលពី​ថ្ងៃទី៧ ខែកុម្ភៈ ឆ្នាំ​២០២៣។ ខេមបូចា/ព្រីង សំរាំង

អ្នក​ភូមិ​និយាយ​ថា​បុគ្គលិក​ព្រលាន​យន្ត​ហោះ និង​អាជ្ញាធរ​មូល​ដ្ឋាន​នៅតែ​បន្តដើរ​​ល្បាត​ក្នុង​​ភូមិ​ទាំង​យប់ ទាំង​ថ្ងៃ និង​បាន​ហាម​ប្រ​ជា​ពល​រដ្ឋ​សាងសង់​សំណង់​ថ្មី​។​

ខណៈ​​អាជ្ញាធរ​អះអាង​ថា​គ្រួសារ​ទាំង​នេះ​រស់​នៅ​លើ​ដី​រដ្ឋ​ដោយ​ខុស​ច្បាប់។ លោក វ៉ន ឆោម វ័យ​៦១​ឆ្នាំ ថា​ខ្លួន​បាន​រស់​នៅ​លើ​ទីតាំង​នេះ​​៣០​ឆ្នាំ​មក​ហើយ និង​មាន​ឯកសារ​ស្រប​ច្បាប់​ដូ​ច​ជា​សៀវភៅគ្រួសារ និង​អត្តសញ្ញាណបណ្ណ មាន​បណ្ណ​បោះឆ្នោត ដែល​ទទួល​ស្គាល់​ឲ្យ​អាជ្ញធរ​ស្រុក និង​ខេត្ត​ផង​ដែរ​។​

លោក​បន្ថែម​ថា៖ «​ខ្ញុំ​បាន​ទៅ​បោះ​ឆ្នោត ​[ទីនេះ] ជា​ច្រើន​ដង​មក​ហើយ ដូចនេះ​ហេតុ​អ្វី​អាជ្ញាធរ​ចាត់ទុក​ថា​ពួកយើង​រស់​នៅ​ដោយ​ខុសច្បាប់ និង​ចង់​បណ្ដេញ​ពួក​យើង​ចេញ»។​

ប៉ុន្តែ​អភិបាល​ខេត្ត​កណ្ដាល លោក គង់ សោភ័ណ្ឌ បាន​បដិសេធថា​គ្រួសារ​ទាំងនោះ​មិន​បាន​រស់​នៅ​ លើ​ទីតាំងនេះ​តាំងពីយូរ​មក​ហើយ​នោះ​ទេ និង​ថាអាជ្ញាធរ​ក៏​មិន​អាច​ផ្ដល់​ប្លង់​កម្មសិទ្ធិ​បាន​ដែរ​។​

លោក​ឲ្យ​ដឹង​ថា៖ «​យើង​មិន​ទាន់​បាន​ឲ្យ​ពួកគាត់​ចេញ​នៅ​ឡើយ​ទេ ប៉ុន្តែ​យើង​ក៏​មិន​អនុញ្ញាត​ឲ្យ​សង់​សំណង់​ថ្មី​ដែរ»។ លោក​បន្ត​ថា៖ «ពួកគាត់​ត្រូវ​តែចាកចេញ​នៅពេល​ដែល​ចាំ​បាច់ ហើយ​យើង​នឹង​​ផ្ដល់​សំណង​សមរម្យ​ដល់ពួកគាត់ ប៉ុន្តែ​យើង​មិន​សន្យាទេ​នៅពេល​នេះ​ទេ»។​

លោក ជីវ កុក​សាយ អ្នក​ទទួល​ខុស​ត្រូវសម្របសម្រួល​​ទិញ​ដី​សម្រាប់​ព្រលាន​យន្ត​ហោះ​ថ្មី​ មិន​បាន​និយាយ​ដោយ​ចំ​ថា​តើ​ដី​តាមបណ្ដោយ​ប្រឡាយ​​៩៤​នឹងប្រើ​សម្រាប់​ព្រលាន​យន្ត​ហោះ​នោះទេ ប៉ុន្តែ​លោ​ក​ថា​ការ​អភិវឌ្ឍហេដ្ឋារចនាសម្ព័ន្ធ​នៅ​តំបន់​ជិតៗព្រលាន​យន្ត​ហោះ​ត្រូវ​ធ្វើ ដើម្បី​ការពារ​ទឹក​លិច​ក្នុង​តំបន់​នេះ​នៅ​រដូវ​វស្សារ​។​

លោក​ថ្លែង​ថា៖ «​បើ​សិន​ជា​យើង​គិតពី​ហេដ្ឋារចនាសម្ព័ន្ធ​ព្រលាន​យន្ត​ហោះ យើង​ត្រូវ​ធ្វើ​តំបន់​នេះ​ឲ្យ​ស្អាត ហើយ​យើង​ត្រូវ​តែ​អភិវឌ្ឍន៍​ប្រព័ន្ធ​ទឹក​ដើម្បី​ជៀស​វាង​ទឹក​ជំនន់»។ លោក​បន្ថែម​ថា៖ «យើង​មិន​ចង់​ឃើញ​ព្រលាន​យន្ត​ហោះ​ថ្មីមាន​ទឹក​លិច​នោះ​ទេ ដូច​នេះ​យើង​ត្រូវ​សិក្សា​ពីផល​ប៉ះពាល់ជាមុន​​ ហើយ​​បញ្ហា​ចម្បង​គឺ​កសាង​ប្រឡាយធំៗ​ដើម្បី​រំដោះ​ទឹក»។​

ផ្ទះ​ប្រជា​ពល​រដ្ឋ​នៅ​តាម​ប្រឡាយ​៩៤ ក្នុង​ឃុំ​កណ្ដោក ខេត្ត​កណ្ដាល ដែល​ជា​កន្លែង​ប្រជា​ពល​រដ្ឋ​ប្រឈម​នឹង​ការ​បណ្ដេញ​ចេញ ថ្ងៃទី​៧ ខែកុម្ភៈ ឆ្នាំ​២០២៣។ ខេមបូចា/ព្រីង​ សំរាំង

លោក សឹង សែន​ករុណា អ្នក​នាំ​ពាក្យ​របស់​សមាគម​សិទ្ធិមនុស្ស​អាដហុក ប្រាប់​ខេមបូចា​ថា អាជ្ញាធរ​គួរ​តែ​ផ្ដល់​ព័ត៌មាន​ច្បាស់​លាស់​ដល់​ប្រជា​ពល​រដ្ឋ​នៅ​ជុំវិញ​ប្រឡាយ​៩៤​។ លោក​បន្ថែម​ថាអាជ្ញាធរ​មិន​អាច​បង្ខំ​ពួកគាត់​ឲ្យ​ចាក​ចេញ​ដោយ​គ្មាន​ផ្ដល់​ទៅ​តាំង​ថ្មី និង​សមរម្យ​សម្រាប់​រស់​នៅ​នោះ​ទេ។​

លោក​មានប្រសាសន៍ថា៖ «ពួកគេគួរតែ​រក​ទីតាំងដែល[អ្នកភូមិ​]អាច​ទទួលយក​បាន និង​ជៀសវាង​ប្រើ​អំពើហិង្សា ដូចជា​ការ​បណ្ដេញ​ដោយ​បង្ខំ»។ លោក​បន្ត​ថា៖ «​រដ្ឋ​គួរតែមាន​តួលេខ​ប្រជា​ពល​រដ្ឋ​ដែល​រង​ផល​ប៉ះពាល់​ជាក់​លាក់»។​

​លោក​បានបន្ថែម​ថា បើ​សិនជា​ទីតាំង​ព្រលាន​យន្ត​ហោះ​នៅ​ឆ្ងាយ​ពីលំនៅ​ដ្ឋាន​ប្រជា​ពល​រដ្ឋ ពួកគេ​នឹង​មិន​រង​ផល​ប៉ះពាល់​ទេ ដូច​នេះ​អាជ្ញាធរ​គួរ​ពិនិត្យ​លទ្ធភាពក្នុង​ការ​អនុញ្ញាត​ឲ្យ​គ្រួសារ​ទាំង​នោះ​អាច​បន្ត​រស់​នៅ​តទៅទៀត​បាន​។​

លោក កុកសាយ មិន​បាន​បញ្ជាក់ទេ​ថា​ក្រុម​ហ៊ុន​នឹង​បន្ត​ផ្ដល់​សំណងដល់​ពលរដ្ឋទាំងនោះ ប៉ុន្តែ​អះអាងថា ​អាជ្ញាធរ​នឹង​ទទួល​ខុស​ត្រូវ​សម្រាប់​ការ​ដោះ​ស្រាយ​ជាមួយគ្រួសារ​ដែល​កំពុង​រស់​នៅ​តាម​បណ្ដោយ​ប្រឡាយ​នេះ​។​

លោក​បាននិយាយថា៖ ​«​យើង [ក្រុម​ហ៊ុន] ​ជួយ​ស្រង់​ស្ថិតិ​​ប្រ​ជា​ពល​រដ្ឋ​នៅ​ទីនេះឲ្យ​អាជ្ញាធររួចរាល់ហើយ​ ហើយ​អាជ្ញាធរ​មាន​កាតព្វកិច្ច​​ដោះស្រាយ​បញ្ហា​នេះ»

ប្រែសម្រួលពីអត្ថបទភាសាអង់គ្លេស៖ Kandal Families Slated for Eviction from Airport Site Renew Requests for Land Titles

695 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម