សមាគមសម្ព័ន្ធអ្នកសារព័ត៌មានកម្ពុជា

មេធាវីរបស់លោក កឹម សុខា បញ្ចូលភស្តុតាងជាវីដេអូ អំឡុងសវនាការលើសំណុំរឿងក្បត់ជាតិ

លោក កឹម សុខា អតីត មេដឹក នាំ បក្ស ប្រឆាំង មក ដល់ សាលា ដំបូង រាជធានី ភ្នំពេញ ដើម្បី ចូល រួម សវនាការ លើ បទ ចោទ ថា ក្បត់ ជាតិ ថ្ងៃទី ២ ខែកុម្ភៈ ឆ្នាំ ២០២២។ ខេមបូចា/ ព្រីង សំរាំង
លោក កឹម សុខា អតីត មេដឹក នាំ បក្ស ប្រឆាំង មក ដល់ សាលា ដំបូង រាជធានី ភ្នំពេញ ដើម្បី ចូល រួម សវនាការ លើ បទ ចោទ ថា ក្បត់ ជាតិ ថ្ងៃទី ២ ខែកុម្ភៈ ឆ្នាំ ២០២២។ ខេមបូចា/ ព្រីង សំរាំង

ខណៈតុលាការបន្តសវនាការលើសំណុំរឿងក្បត់ជាតិរបស់លោក កឹម សុខា ទាំងអយ្យការនិងមេធាវីការពារក្តីបានផ្តល់វីដេអូអំពីជីវិតសាធារណៈរបស់លោកម្តងហើយម្តងទៀត ដើម្បីជំទាស់នឹងការបកស្រាយផ្ទុយពីសារនយោបាយរបស់លោក។

ប្រធានបទបែបនេះបានបន្តលើកយកមកនិយាយកាលពីថ្ងៃពុធ អំឡុងពេលសវនាការរយៈពេល៤ម៉ោង ជាសវនាការថ្មីទៀតដែលធ្វើតាមកាលវិភាគមួយដងក្នុងមួយសប្តាហ៍ ដែលបានកំណត់សម្រាប់ការជំនុំជម្រះដែលត្រូវបានពន្យារពេលជាយូរមក ហើយរបស់អតីតប្រធានគណបក្សសង្រ្គោះជាតិរូបនេះ។

លោក កឹម សុខា ត្រូវបានចោទប្រកាន់ពីបទឃុបឃិតជាមួយបរទេស ដើម្បីផ្តួលរំលំរដ្ឋាភិបាលគណបក្សប្រជាជនកម្ពុជាដែលជាគណបក្សកាន់អំណាចតាមរយៈការប្រ មូលផ្តុំមហាជនធ្វើការតវ៉ា បន្ទាប់ពីការបោះឆ្នោតដ៏ចម្រូងចម្រាសនៅឆ្នាំ២០១៣។

រហូត​មក​ដល់​ពេល​នេះ តំណាង​អយ្យការ​បាន​កសាង​សំណុំ​រឿង​របស់​ខ្លួនផ្អែក​តាម​វីដេអូ​ដែល​លោក កឹម សុខា បានថ្លែងនៅ​ក្នុង​ព្រឹត្តិការណ៍​ផ្សេងៗ។ នៅ​ថ្ងៃ​ពុធនេះ មេធាវី​ការពារ​ក្តី​បាន​បង្ហាញ​វីដេអូ​ចំនួន​ប្រាំមួយ​​ដែលវីដេអូ​នីមួយៗ​មាន​រយៈ​ពេល​ពី​មួយនាទី​ទៅ​ប្រាំ​នាទី ដើម្បី​គាំទ្រហេតុផលរបស់​ខ្លួន​ដែលថា ​លោក កឹម សុខា បាន​ស្វះស្វែងឲ្យមានការ​ផ្លាស់​ប្តូរតាមរយៈ​ការ​បោះ​ឆ្នោតតែប៉ុណ្ណោះ។

ក្នុងវីដេអូឃ្លីបមួយដែលថតកាលពីថ្ងៃទី២៨ ខែសីហា ឆ្នាំ២០១៧ ត្រឹមតែ៥ថ្ងៃមុនពេលលោក កឹម សុខា ត្រូវបានចាប់ខ្លួន លោកបានអំពាវនាវដល់ពលរដ្ឋកម្ពុជាឲ្យទៅចុះឈ្មោះចូលរួមបោះឆ្នោតឆ្នាំ២០១៨ ដោយអះអាងថា ការផ្លាស់ប្តូរជាវិជ្ជមានតាមរយៈការបោះឆ្នោតនឹងនាំមកនូវសន្តិភាពពិតប្រាកដសម្រាប់កម្ពុជា។

ថ្លែង​ក្នុង​សវនាការ​កាលពី​ថ្ងៃ​ពុធនេះ ​លោក កឹម សុខា បាន​មានប្រសាសន៍ថា៖ «ចេតនា​ពិត​របស់​ខ្ញុំ ​គឺ​ផ្លាស់ប្តូរ​តាមរយៈ​ការ​បោះឆ្នោត​នៅ​ឆ្នាំ២០១៨ ហើយ​ខ្ញុំ​មិន​បានពាក់ព័ន្ធ​ជាមួយ​បដិវត្តន៍ពណ៌​ទេ​។ ចេតនាពិតប្រាកដ [គឺដើម្បី] ត្រៀមខ្លួនបោះឆ្នោតនៅឆ្នាំ២០១៨»

លោក កឹម សុខា ក៏បានឆ្លើយតបទៅនឹងវីដេអូឃ្លីបមួយ ដែលព្រះរាជអាជ្ញាបានបង្ហាញថា លោកស្ថិតនៅក្នុងបាតុកម្មមួយនៅខេត្តកំពង់ចាមពាក់ព័ន្ធនឹងការតវ៉ា ប្រាក់ឈ្នួលអប្បបរមារបស់កម្មករកាត់ដេរ។

ព្រះរាជអាជ្ញា​បាន​ចោទ​លោក កឹម សុខា ថា​ បាន​ដឹកនាំ​ការតវ៉ា​នេះ​ បង្ក​ការ​កកស្ទះ​ចរាចរណ៍និង​ប៉ះពាល់​ដល់​សេដ្ឋកិច្ច។ អយ្យការ​មិន​ទាន់​បានបញ្ជាក់​ពី​មូលហេតុ​ដែល​ខ្លួន​លើក​យក​ព្រឹត្តិការណ៍​នេះ​មក​គាំទ្រ​ការ​ចោទ​ប្រកាន់​ពី​បទ​ក្បត់​ជាតិ​នោះ​ទេ។

លោក កឹម សុខា បាន​មានប្រសាសន៍​ថា៖ «ខ្ញុំ​មិន​បានដឹកនាំ​បាតុកម្មនេះ​ទេ ប៉ុន្តែ​ខ្ញុំ​បាន​ចូលរួម​ជាមួយ​សហការី​ក្នុង​នាម​ជា​តំណាងរាស្រ្ត​ដើម្បី​ស្តាប់​កង្វល់​របស់​ពលរដ្ឋ​»ដោយលោកបដិសេធការលើកឡើងថា ការប្រមូលផ្តុំនេះបង្កឲ្យមានបញ្ហាសន្តិសុខសាធារណៈ។

លោក កឹម សុខា ត្រូវបានចាប់ខ្លួនកាលពីថ្ងៃទី០៣ ខែកញ្ញា ឆ្នាំ២០១៧ និងចោទប្រ កាន់ពីបទសមគំនិតជាមួយមហាអំណាចបរទេស។ រដ្ឋាភិបាលបានចោទប្រកាន់លោកថា បានធ្វើការជាមួយសហរដ្ឋអាមេរិក ដើម្បីប៉ុនប៉ងធ្វើបដិវត្តន៍ពណ៌ផ្តួលរំលំរដ្ឋាភិបាលនៃគណបក្សប្រជាជនកម្ពុជាដែលកំពុងកាន់អំណាច។

លោក កឹម សុខា បាន​អះអាង​ថា លោក​គ្រាន់តែ​ធ្វើ​សកម្មភាព​ស្រប​ច្បាប់និង​ប្រកប ដោយតម្លាភាព ដើម្បី​ព្យាយាមយក​ឈ្នះការបោះ​ឆ្នោត។

គណបក្ស​សង្គ្រោះ​ជាតិ​ត្រូវ​បាន​តុលាការ​កំពូល​រំលាយ​កាលពី​ឆ្នាំ២០១៧ ដោយ​មាន​សមាជិក​បក្ស​ជាច្រើន​នាក់​ត្រូវ​បានចាប់ខ្លួន​ជុំវិញអ្វី​ដែល​គេ​ជឿជាទូទៅ​ថា ​ជា​បទ​ចោទ​ពាក់ព័ន្ធរឿង​នយោបាយ។ មេដឹកនាំកំពូលរបស់គណបក្សនេះបាននិរទេសខ្លួន ហើយសមាជិកជាង១០០នាក់ត្រូវបានហាមឃាត់មិនឲ្យធ្វើនយោបាយរយៈពេល៥ឆ្នាំ។

លោកស្រី ម៉េង សុភារី ជាមេធាវីម្នាក់ក្នុងចំណោមមេធាវីការពារក្តីរបស់លោក កឹម សុខា បានប្រាប់តុលាការកាលពីថ្ងៃពុធថា ឃ្លីបនីមួយៗបង្ហាញថា កូនក្តីរបស់លោកស្រីបានធ្វើសកម្មភាពក្នុងតួនាទីរបស់លោកជាអ្នកនយោបាយតែប៉ុណ្ណោះ។

លោក​ស្រី​មានប្រសាសន៍ថា៖ «ប្រសិន​បើ​កូន​ក្តី​មាន​គោល​បំណង​ផ្តួល​រំលំ​រដ្ឋាភិបាល គាត់មិន​ចាំ​បាច់​អំពាវនាវ​ឲ្យ​ប្រជាពលរដ្ឋ​ទៅ​បោះ​ឆ្នោត​ទេ ដូច្នេះ​ការ​ចោទ​ប្រកាន់នេះ ​គឺ​ខុស។ ការប្រកួតប្រជែងនយោបាយគឺតាមរយៈការបោះឆ្នោត មិនមែនដើម្បីផ្តួលរំលំរដ្ឋាភិបាលទេ»

​​

ព្រះរាជអាជ្ញារង ប្លង់ សុផល បានស្នើឲ្យមេធាវីរបស់លោក កឹម សុខា បង្ហាញភស្តុតាងពាក់ព័ន្ធនឹងលោក ប៉ុល ហំម អតីតអនុប្រធានគណបក្សសង្គ្រោះជាតិនៅក្នុងបាតុកម្មមួយ។ បើទោះបីជាលោកមានតួនាទីជាថ្នាក់ដឹកនាំនៅក្នុងគណបក្សសង្គ្រោះជាតិក៏ដោយ ក៏លោក ប៉ុល ហំម បានទទួល «នីតិសម្បទានយោបាយ» កាលពីឆ្នាំ២០២១ តាមរយៈព្រះរាជក្រឹត្យ ហើយចាប់តាំងពីពេលនោះមក លោកបានចូលរួមជាមួយគណបក្សកំណែទម្រង់កម្ពុជា។

លោកស្រី សុភារី បាន​ឆ្លើយ​តបថា វា​ជា​កាតព្វកិច្ច​របស់​អយ្យការ​ក្នុង​ការ​ផ្តល់​ភស្តុតាងដើម្បីបញ្ជាក់លើការអះអាង​របស់​ខ្លួន។

លោក ប្លង់ សុផល ក៏​បាន​រិះគន់​លោក កឹម សុខា ផង​ដែរ ខណៈ​ដែល​លោក​បាន​លើក​ឡើង​ថា តំណាង​អយ្យការ​បាន​ដាក់​ភស្តុតាង​រួច​ហើយ​ដែល​អះអាង​ថា អតីត​មេ​បក្ស​ប្រឆាំងរូបនេះ​ បាន​ដឹកនាំ​បាតុកម្ម​របស់​កម្មករ​នៅ​ខេត្ត​កំពង់ចាម។

លោកបានមានប្រសាសន៍ថា៖ «តើលោក កឹម សុខា ធ្វើជាស្តាប់មិនឮអ្វីដែលខ្ញុំបានដាក់ [ជាភស្តុតាង]មែនទេ?» ​ដែលការនេះបាន​បណ្តាលឲ្យ​លោក កឹម សុខា លើក​ដៃ​កាត់ដោយនិយាយថា ព្រះរាជអាជ្ញា​បាន​ប្រមាថ​លោក។

លោក ប្លង់ សុផល​ បាន​បដិសេធ​ថា លោកមិនបាន​ប្រមាថ​លោក កឹម សុខា ទេ ដោយ​និយាយ​ថា ការ​លើកឡើងរបស់​លោក​មាន​ជាប់​ពាក់ព័ន្ធ​នឹង​ភស្តុតាង។ លោក​បាន​បន្ថែម​ថា លោក កឹម សុខា មានបុព្វសិទ្ធិ​ច្រើន​ជាង​ចុង​ចោទ​ផ្សេង​ទៀត​ដោយលោកអាច​និយាយ​ឬ​សាកសួរដោយផ្ទាល់មក​ព្រះរាជអាជ្ញា។

លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជាបានតាមដានសវនាការនេះ ហើយលោកស្រីមានប្រសាសន៍ថា ការកាត់ក្តីអាចបន្តអូសបន្ថាយកាន់តែយូរ ដោយសារការទទួលយកភស្តុតាងនៅមិនទាន់បញ្ចប់។

លោកស្រី សុភាព មានប្រសាសន៍ថា លោក កឹម សុខា និងអតីតសមាជិកគណបក្សសង្គ្រោះជាតិមិនគួរប្រឈមមុខនឹងការចោទប្រកាន់ពីសកម្មភាពនយោបាយ និងការជាប់ពាក់ព័ន្ធគណបក្សដែលត្រូវបានរំលាយនោះទេ។

លោក​ស្រី​បាន​មានប្រសាសន៍ថា៖ «ការ​បន្ត​ការ​ចោទ​ប្រកាន់​ដ៏​អូស​បន្លាយគឺ​ជា​ការ​រំលោភ​សិទ្ធិ​នយោបាយនិង​សេរីភាព​»

សវនាការនឹងបន្តនៅថ្ងៃទី៩ ខែកុម្ភៈ៕

ប្រែសម្រួលពីអត្ថបទភាសាអង់គ្លេស៖ Kem Sokha defense submits video evidence in latest treason hearing

580 views

ព័ត៌មានថ្មី

អត្ថបទពេញនិយម