សមាគមសម្ព័ន្ធអ្នកសារព័ត៌មានកម្ពុជា

អាជីវករ និងអ្នកនេសាទខេត្តកែបបារម្ភពីផលប៉ះពាល់របររកស៊ី ព្រមទាំងធនធានធម្មជាតិដោយសារការចាក់ដីចូលសមុទ្រ

ដីថ្មីដែលបានចាក់នៅឆ្នេរសមុទ្រស្ថិតនៅក្បែរផ្សារក្ដាមក្រុងកែប។ រូបភាពថតថ្ងៃទី២៦ ខែកុម្ភៈ ឆ្នាំ២០២២។ ខេមបូចា/សុវណ្ណ ស្រីពេជ្រ
ដីថ្មីដែលបានចាក់នៅឆ្នេរសមុទ្រស្ថិតនៅក្បែរផ្សារក្ដាមក្រុងកែប។ រូបភាពថតថ្ងៃទី២៦ ខែកុម្ភៈ ឆ្នាំ២០២២។ ខេមបូចា/សុវណ្ណ ស្រីពេជ្រ

ប្រជាពលរដ្ឋដែលជាអាជីវករលក់ដូរ​ និងប្រជានេសាទនៅខេត្តកែបបានសម្ដែងក្ដីបារម្ភរបស់​ពួកគេចំពោះការអភិវឌ្ឍឆ្នេរខ្សាច់ថ្មីក្រោមគម្រោងរបស់រដ្ឋ ដោយការចាក់ដីចូលសមុទ្រ​ប្រមាណជិត៣គីឡូម៉ែត្រ នឹងបង្កជាផលប៉ះពាល់ដល់របររកស៊ីរបស់ពួកគេ និងធ្វើឱ្យប៉ះពាល់​ធនធានធម្មជាតិ ដែលបណ្តលាឱ្យពួកគេប្រឈមនឹងបាត់បង់ប្រភពចំណូលសម្រាប់ចិញ្ចឹម​គ្រួសារ។

បើតាមអ្នកស្រី ឈីន ចិន្តា អាយុ៣៤ ឆ្នាំ ជាពលរដ្ឋមួយរូបរស់នៅខេត្តកែប បានឱ្យដឹងថា អ្នកស្រីនិងប្ដីបានបន្ដមុខរបរនេសាទរយៈពេល៦ឆ្នាំ ហើយអ្នកស្រីមានការបារម្ភចំពោះ​សកម្មភាពចាក់ដីយ៉ាងសម្បើមរបស់អាជ្ញាធរចូលឆ្នេរសមុទ្រ ខ្លាចក្រែងទៅថ្ងៃខាងមុន​ អាជ្ញាធរនឹងមិនអនុញ្ញាត ឬរៀបចំកន្លែងឱ្យពលរដ្ឋប្រកបរបររកស៊ីបានដូចមុន។ ម្យ៉ាងអ្នកស្រី នៅមានមន្ទិលថានៅពេលនេះអាជ្ញាធប្រាប់ថា ចាក់ដីដើម្បីអភិវឌ្ឍន៍បែបនេះ ប៉ុន្តែដល់​តែមែន​ទែនទៅ បែរជាធ្វើខុសពីគម្រោងដែលប្រាប់ប្រជាជនទៅវិញ។

អ្នកស្រី ចិន្តា រៀបរាប់ថា៖ «យើងជួបគ្នាប្រជាជនយើងដែលរកស៊ីដូចគ្នាបានពិភាក្សាគ្នា តែយើងមិនដឹងគេ[អាជ្ញាធរ]ធ្វើអ្វីបន្ត ជួនកាលគេប្រាប់ថាកន្លែងនេះ​គេអភិវឌ្ឍអ្វីមួយ​ឱ្យស្អាតដើម្បីយើងលក់ ប៉ុន្តែដល់ពេលធ្វើហើយគេធ្វើអីផ្សេង វាមិនដូចអ្វី​ដែលគេប្រាប់​ពួកយើង»។

អ្នកស្រីបន្តថា៖«ព្រោះអីវាច្រើនដែរចា៎ សូម្បីកន្លែងខាងជើងនោះ ពីមុនគេប្រាប់ថា​ចាក់​ដីហើយគេធ្វើកន្លែងចម្រោះទឹកកខ្វក់អ៊ីងចឹងទៅ ដល់ចាក់ដីរួចហើយចេញ​ជា​ហាងកាហ្វេ​ប្រេនស្អីណាទៅវិញ»។

អ្នកស្រីលើកឡើងទៀតថា ប្រជាជននៅទីនេះ អ្នកណាក៏ចង់ឱ្យមានការអភិវឌ្ឍដែរ ហើយ​ពួកគេ​រីករាយនិងការអភិវឌ្ឍទាំងនោះ ប្រសិនបើមិនបង្កផលអាក្រក់ទៅដល់ពួកគេ មិន​ប៉ះ​ពាល់ទៅដល់ធនធានធម្មជាតិ និងបំផ្លាញបរិស្ថាន។ ពិសេសអាជ្ញាធរគួរគោរពទៅតាមការ​សន្យា  ត្បិតថាពួកគេសុទ្ធតែជាអ្នកដែលមានជីវភាពខ្វះខាត និងរំពឹងតែមុខរបរដែល​មាន​សព្វថ្ងៃប៉ុណ្ណោះ ហើយពួកគេមិនឃើញការអភិវឌ្ឍដែលបំផ្លាញបរិស្ថាននោះទេ។

អ្នកស្រី​ ចិន្តា ថ្លែងយ៉ាងដូច្នេះថា៖ «ប្រជាជននៅហ្នឹងដូចតែគ្នាហ្នឹង អ្នកណាក៏គេចង់អ៊ីងចឹង​ដែរ ការអភិវឌ្ឍគឺមុខមាត់ខេត្តយើង តែសូមអាជ្ញាធរធ្វើអីឱ្យច្បាស់ថាធ្វើហ្នឹងពិតប្រាកដ ព្រោះ​អី​ប្រជាជនគ្នាលំបាកណាស់ សូមអាណិតអាសូរប្រជាជនផង និងកុំឱ្យបាត់បង់​ធនធាន​ធម្ម​ជាតិរបស់យើង កាលណាតែបាត់បង់ហើយមិនងាយកើតវិញទេ អភិវឌ្ឍន៍ប៉ុណ្ណា ក៏សូមទុក​ធនធានធម្មជាតិជាចំបងដើម្បីក្មេងជំនាន់ក្រោយបានឃើញ»។

អ្នកនេសាទរៀបចំទូករបស់ពួកគេនៅជិតផ្សារក្ដាម ឆ្នេរក្រុងកែប​។ រូបថតថ្ងៃទី២៦ ខែកុម្ភៈ ឆ្នាំ២០២២។ ខេមបូចា/ សុវណ្ណ ស្រីពេជ្រ

អង្គុយកាន់ខ្សែទូកដែលរៀបនឹងចេញ អ្នកស្រីប្រាប់ឱ្យដឹងថា មានការភ្ញាក់ផ្អើល​ជាខ្លាំង​នៅ​ពេល​ឃើញមានការចាក់ដីចូលសមុទ្រយ៉ាងសន្ធឹកសន្ធាប់បែបនេះ ហើយអ្នកស្រីក៏​មានកូន​ចិត្តបារម្ភថា ការចាក់ដីចូលឆ្នេរសមុទ្រជិត៣គីឡូនេះ គឺមានផលជះអវិជ្ជមានចំពោះការ​រកស៊ី​របស់អ្នកនេសាទតែម្ដង រីឯចំណុចទីពីរ គឺការចាក់ដីដូច្នេះនឹងធ្វើឱ្យបាត់បង់ទីជម្រកត្រី និង​ក្ដាម​តូចៗ នៅពេលដែលសត្វទាំងនោះត្រូវការទីកន្លែងសុវត្ថិភាព និងទឹករាក់ៗដើម្បី​បណ្ដើរ​កូន ឬញាស់កូន។ ចំណុចទីបី គឺការបង្ហូរទឹកកខ្វក់ចូលសមុទ្រ ប្រសិនបើសាងសង់សណ្ឋាគារ ភោជនីយដ្ឋាន ឬកន្លែងកម្សាន្តផ្សេងៗ ដោយមិនមានប្រព័ន្ធចម្រុះទឹកកខ្វក់ឱ្យបានត្រឹមត្រូវ។

ស្រ្តីវ័យកណ្ដាល សម្បុរស្រអែមរូបនេះពន្យល់ថា៖​ «នៅពេលចាក់ដីលុបចឹងមក ត្រីនិងក្ដាម​វាអត់មានទីកន្លែងសុវត្ថិភាពនៅខាងៗដើម្បីញាស់កូនទេ វាអាចឈាននឹងការដាច់ពូជ ជា​ពិសេសយើងអត់មានព្រៃកោងកាងឬព្រៃលិចទឹកអីទុកជាទីជម្រកឱ្យវាញាស់កូន ដល់​តែ​កន្លែងកៀនៗគេ[អាជ្ញាធរ]ចាក់ដីអស់អត់មានដើមកោងកាងទៀតវា[ត្រី ក្ដាម] នឹងផុតពូជ។ ម្យ៉ាងខ្ញុំបារម្ភថានឹងមានការបង្ហូរទឹកកខ្វក់ចូលសមុទ្រដែរ តែមិនដឹងថ្នាក់លើគេគិតយ៉ាងម៉េច»។

អង្គុយលើដុំថ្មធំៗ ពាក់អាវផ្កា នាម៉ោង៥ល្ងាច អ្នកស្រី ចិន្តា បានលើកឡើងជាកង្វល់ថា​ ប្រសិនបើគ្រួសារអ្នកស្រីបាត់បង់មុខរបរ ដោយសារតែការអភិវឌ្ឍនេះ ពួកគេមិនអាច​ទៅ​ធ្វើអ្វី​ផ្សេងបានឡើយ ត្បិតអ្នកស្រីនិងប្ដីរកស៊ីនេសាទរាប់ឆ្នាំហើយមិនទម្លាប់នឹងការងារផ្សេង​ឡើយ​ ហើយវានឹងប៉ះពាល់ដល់ជីវភាពរបស់គ្រួសារអ្នកស្រី និងកម្មករផ្សេងទៀតមិនខាន ខណៈ​អ្នកស្រីនៅជាប់បំណុល និងមានកូនៗ ព្រមទាំងឪពុកម្ដាយក្នុងបន្ទុក។

អ្នកស្រី ចិន្តា អះអាងថា៖ «ជីវភាពយើងកាន់តែយ៉ាប់ថែមមួយកម្រិតធំទៀត មិនតូចតាចទេ យើងមានតែរបរមួយនេះជាចំបង ព្រោះពួកខ្ញុំរកស៊ីប្រចាំថ្ងៃមុខរបរយើងមានតែប៉ុណ្ណឹងទេ បើអត់ទីផ្សារនៅកន្លែងហ្នឹងមួយគឺបាត់បង់ច្រើនណាស់មិនថាខ្ញុំមិនថាគេ»។

ចំណែកប្រជានេសាទម្នាក់ទៀត គឺលោក ថៃ គិន អាយុ២៧ឆ្នាំ​ ជាពលរដ្ឋរស់នៅខេត្តកែប បានលើកឡើងស្រដៀងគ្នាថា រូបលោកមានការបារម្ភចំពោះថ្ងៃមុខថានឹងប៉ះពាល់​ដល់ការ​នេសាទ និងរបររកស៊ីរបស់លោក ត្បិតថាអាជ្ញាធរបានចាក់ដីចូលសមុទ្រវា​នឹងប៉ះពាល់ដល់​កូនត្រីតូចៗ និងសម្រស់ធម្មជាតិ ហើយលោកមិនអាចចតទូកនៅក្បែរទីតាំងចាស់បាន។

អង្គុយលើទូក ដៃរៀបចំឧបករណ៍ដើម្បីត្រៀមទូកចេញនេសាទ លោក គិន ប្រាប់ថា៖ «ខ្ញុំនេសាទបាន២ឆ្នាំជាងហើយ​ ឃើញគេចាក់អ៊ីងចឹងបារម្ភដែរ តែមិនដឹងធ្វើម៉េច បើគេ​ចាក់​បាត់ទៅហើយ ខ្លាចតែថ្ងៃមុខគេលែងឱ្យចតទូកនៅទីតាំងនេះ​ និងរកស៊ីលែងបាន»។

លោកបន្តថា ប្រសិនបើថ្ងៃមុខ ខាងអាជ្ញាធរមិនអនុញ្ញាតឱ្យទូកអ្នកនេសាទចតនៅទីតាំងចាស់​ ឬបង្កើតទីតាំងថ្មីឱ្យចតដោយគិតប្រាក់ក្នុងតម្លៃខ្ពស់ លោកមិនមានលទ្ធភាពឡើយ ខណៈ​ចំណូលពីការនេសាទមិនទៀងទាត់ និងរកបានតិចតួច។

អ្នកនេសាទវ័យ២៧ឆ្នាំរូបនេះប្រាប់ថា៖ «បើគេឱ្យដូរទីតាំង ហើយបិទកន្លែងចាស់នេះ និងឱ្យ​បង់លុយតិចតូចមានអី តិចចេះតែបង់បានហើយ បើច្រើនបង់មិនកើតទេ យើងរក​មួយថ្ងៃ​មិន​ដល់២០ម៉ឺនផងហ្នឹងបាទ»។

ដីថ្មីដែលបានចាក់នៅឆ្នេរសមុទ្រស្ថិតនៅក្បែរផ្សារក្ដាមក្រុងកែប​។ រូបភាពថតថ្ងៃទី២៦ ខែកុម្ភៈ ឆ្នាំ២០២២។ ខេមបូចា/ សុវណ្ណ ស្រីពេជ្រ

ដោយឡែក អាជីវករលក់គ្រឿងសមុទ្រក្នុងផ្សារក្ដាមមួយរូប គឺលោក មាស រស្មី រស់នៅ ភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប បានលើកឡើងថា លោកបារម្ភចំពោះ​ការអភិវឌ្ឍនេះនឹងធ្វើឱ្យពួកគេបាត់បង់របរលក់ដូរ ខណៈអាជីវករប្រមាណ​៩០ភាគរយ​នៅផ្សារក្ដាមរំពឹងលើមុខរបរនេះ។

អាជីវករលក់ដូររូបនេះ និយាយថា៖ «ខ្ញុំគិតអំពីហានិភ័យដល់ការលក់ដូររបស់ខ្ញុំដែរ បារម្ភខ្លាច​តែគេអភិវឌ្ឍហើយ គេដេញយើងចេញលែងឱ្យលក់នៅហ្នឹង បើអត់មានផ្សារក្ដាមហ្នឹងទេ​ប៉ះ៩០ភាគរយ ហើយតាមខ្ញុំឮគេនិយាយតគ្នាថា ផ្សារក្ដាមហ្នឹងជាកន្លែងចតឡាន»។

ថ្វីបើយ៉ាងនេះក្ដី​លោក រស្មី ប្រាប់ឱ្យដឹងថា កាលពីមានការចាក់ដីភ្លាមៗ ប្រជាពលរដ្ឋ​ដែលជា​អាជីវករនៅផ្សារក្ដាមបានធ្វើការតវ៉ាផងដែរ តែមិនបានផលអ្វីឡើយ ទន្ទឹមនឹងនោះ ពលរដ្ឋ​ដូចជាលោកក៏មិនបានទទួលព័ត៌មានអំពីការសាងសង់ឆ្នេរស្អាតនេះដែរ។ លោករំលឹកថា ផ្សារក្ដាមនេះ អាជ្ញាធរមានគម្រោងចង់អភិវឌ្ឍយូរហើយ តែធ្វើមិនទាន់បាន។

លោករៀបរាប់តាមទូរសព្ទថា៖ «ពេលភ្លាមៗប្រជាពលរដ្ឋប្រជុំតាស គេតវ៉ា ហើយផ្សារក្ដាម​ហ្នឹងគេចង់ធ្វើយូរហើយតាំងពី២ ៣ឆ្នាំមុន តែធ្វើអត់ចេញ តែទើបតែក្រោយហ្នឹង​គេចាក់ដីចាក់​អីទៅ។ ម្យ៉ាងរឿងចាក់ដីហ្នឹងឮតែគេថាធ្វើឆ្នេរស្អាតៗ តែគេអត់មានសួរពីប្រជាពលរដ្ឋផង»។

តបទៅនឹងកង្វល់ និងការបារម្ភរបស់ប្រជាពលរដ្ឋ លោក សោម ពិសិដ្ឋ អភិបាលខេត្តកែប បានបកស្រាយយ៉ាងច្បាស់ថា  គ្រប់គម្រោងអភិវឌ្ឍន៍ តែងតែមានផលប៉ះពាលអំពីសេដ្ឋកិច្ច សង្គមកិច្ច បរិស្ថាន ប៉ុន្តែខាងអាជ្ញាធរបានសិក្សាពីផលប៉ះពាល់នានា និងថ្លឹងថ្លែងពីផល​អវិជ្ជមានរួចហើយ មុននឹងសម្រេចចិត្តធ្វើការសាងសង់គម្រោងនីមូយៗ ថាតើនឹងមាន​ផល​ចំណេញសម្រាប់ប្រទេសជាតិកម្រិតណា និងប៉ះពាល់កម្រិតណា។

អភិបាលខេត្តរូបនេះមានប្រសាសន៍យ៉ាងដូច្នេះថា៖«ជាធម្មតាកាលណាអភិវឌ្ឍគម្រោងតែង​តែមានផលប៉ះពាល់អំពី សេដ្ឋកិច្ច សង្គមកិច្ច បរិស្ថាន។ គម្រោងទាំងអស់​សុទ្ធតែ​បាន​សិក្សា​ពីផលប៉ះពាល់ ទាំងសេដ្ឋកិច្ច និង សង្គមកិច្ច ថាតើមានចំណុចអ្វី ចំណេញ​ដល់ប្រទេសជាតិ និងមានការបាត់បង់អ្វីដែលយើងត្រូវគិតថាអភិរក្ស ឬគាំទ្រដល់ការអភិវឌ្ឍ ហើយអភិវឌ្ឍ​ត្រូវគិតអំពីការអភិរក្ស ចឹងយើងមានការថ្លឹងថ្លែង»។

លោក ពិសិដ្ឋ បន្តថា ប្រសិនបើគម្រោងនេះកើតឡើង លោករំពឹងថានឹងមានភ្ញៀវទេសចរជាតិ និងអន្តរជាតិមកលេងកម្សាន្តកាន់តែច្រើន ដែលជាសក្តានុពលទេសចរណ៍ខេត្តកែប ត្បិតថា​ទីតាំងដែលកំពុងចាក់ដីសាងសង់គម្រោងនេះ ពីមុនជាកន្លែងទុកចោលមិនបាន​ជាប្រយោជន៍​អ្វីឡើយ។

លោក ពិសិដ្ឋ បន្ថែមថា៖«កន្លែងនេះកន្លងមក ក៏មិនបានប្រើប្រាស់អ្វីដែរ ជាកន្លែងតំបន់​ភក់​ជ្រាំ  និយាយទៅជាតំបន់ទុកចោល ចឹងក្រោយពីគម្រោងហ្នឹងហើយ យើងសង្ឃឹមថា​ភ្ញៀវ​ទេសចរជាតិ និងអន្តរជាតិនឹងមកសម្រាកសម្រាន្ត ហើយយើងមានឆ្នេរកាន់តែច្រើនដែល​ជាសក្ដានុពលទេសចរណ៍របស់ខេត្ត»។

យ៉ាងណាមិញ អភិបាលខេត្តជាប់មាត់សមុទ្រមួយនេះ អះអាងថា គម្រោងខ្សាច់កម្សាន្តនេះ ជាគម្រោងរបស់រដ្ឋ ដែលមានការអនុញ្ញាតដោយរាជរដ្ឋាភិបាល និងអនុវត្តដោយ​គណៈកម្មាការជាតិអភិវឌ្ឍន៍ឆ្នេរសមុទ្រកម្ពុជា ហើយគម្រោងនេះគឺបម្រើដល់ផល​ប្រយោជន៍​សាធារណៈ និងជាគម្រោងមួយពង្រឹងសក្ដានុពលទេសចរណ៍របស់តំបន់​តារារះ​នាទិសនិរតី​នៃឆ្នេរសមុទ្រកម្ពុជា។

លោក ពិសិដ្ឋ បញ្ជាក់ថា៖‍«ចឹងត្រឡប់មកវិញ វាជាគម្រោងមួយបម្រើឱ្យផលប្រយោជន៍​សាធារណៈសុទ្ធសាធ ដោយសារថាគម្រោងហ្នឹងគឺយើងអភិវឌ្ឍដោយការចាក់បំពេញដីបន្ថែម ប្រវែង ២៧០០ម៉ែត្រ មានការដាំដើមឈើរ ៥០ម៉ែត្រទទឹង និងមានការចាក់ខ្សាច់កម្សាន្ត​ចូល​ឆ្នេរ​សមុទ្រចូល៣០ម៉ែត្រ»។

ដីថ្មីដែលបានចាក់នៅឆ្នេរសមុទ្រស្ថិតនៅក្បែរផ្សារក្ដាមក្រុងកែប​។ រូបភាពថតថ្ងៃទី២៦ ខែកុម្ភៈ ឆ្នាំ២០២២។ ខេមបូចា/​ សុវណ្ណ ស្រីពេជ្រ

ទាក់ទិននឹងបញ្ហានេះ លោក អូត ឡាទីន  មន្ត្រីសម្របសម្រួល​គម្រោង​នៃ​​សមាគម​បណ្តាញ​យុវជន​កម្ពុជា​(CYN) បានប្រាប់ខេមបូចាថាពលរដ្ឋមានការបារម្ភចំពោះការបាត់បង់ចំណូល និងមុខរបរគឺជារឿងត្រឹមត្រូវ ព្រោះថានៅពេលមានការអភិវឌ្ឍមួយចំនួន ដូចជានៅខេត្តកំពត ឬខេត្តកណ្ដាល ទាក់ទងនឹងការចាក់ខ្សាច់ចូលសមុទ្រ និងចាក់ខ្សាច់លុបទន្លេមួយចំនួន​ផលប្រយោជន៍ទាំងអស់ វាមិនបានបម្រើផលប្រយោន៍ជូនប្រជាជនទេ គឺភាគច្រើនផល​ប្រយោជន៍ដល់អ្នកវិនិយោគ។

លោក ឡាទីន បន្តយ៉ាងដូច្នេះថា៖«នៅពេលដែលមានការអភិវឌ្ឍ វាមិនបានផល​ប្រយោជន៍​ជាដុំកំភួនដល់ប្រជាពលរដ្ឋទេ ព្រោះរដ្ឋាភិបាលភាគច្រើនចូលចិត្ត​ផ្ដល់ការវិនិយោគ​ឱ្យ​ក្រុមហ៊ុន ឬអ្នកដែលមានលុយច្រើនក្នុងការរៀបចំក្នុងតំបន់ដែលអភិវឌ្ឍន៍ ហើយវាមិនបាន​បម្រើផលប្រយោជន៍សាធារណជនទេ គឺក្រុមអ្នកដែលមានលុយហ្នឹងជាអ្នកប្រមូល​យកលុយ​ពីតំបន់ហ្នុងតែម្ដង»។

យ៉ាងណាមិញ លោក ឡាទីន យល់ឃើញថា ប្រសិនជាត្រូវការតំបន់នឹងក្នុងការអភិវឌ្ឍ ដើម្បី​បម្រើផលប្រយោជន៍សាធារណៈពិតមែន ​ទី១រដ្ឋាភិបាលគួរតែធ្វើការផ្សព្វផ្សាយឱ្យបាន​ទូលំ​ទូលាយ​អំពីគម្រោងរបស់ខ្លួន ដើម្បីឱ្យពលរដ្ឋបានយល់ ហើយពួកគាត់អាចទទួលយក​បាន។ ចំណុចទី២ រដ្ឋាភិបាលគួរត្រៀមទីកន្លែងផ្សេងទៀត សម្រាប់ឱ្យពលរដ្ឋអាជីវករ​អាចប្រកប​អាជីវកម្មបាន ដើម្បីកុំឱ្យបាត់បង់ចំណូល។

ជាការកត់សម្គាល់ លោក ឡាទីន មើលឃើញថា ការអភិវឌ្ឍដោយការលុបឆ្នេរផ្សេងៗ គឺភាគ​ច្រើនហាក់មិនមានការចូលរួមពីសាធារណជន និងអង្គការសង្គមស៊ីវិល ដើម្បី​វាយតម្លៃពី​ផល​ប៉ះពាល់បរិស្ថាននៅក្នុងគម្រោងអភិវឌ្ឍន៍ទេ អ៊ីងចឹងពលរដ្ឋមិនបានចូលរួមពេញលេញ ដល់​ពេល​ធ្វើការចាប់ផ្ដើមអភិវឌ្ឍ គឺចាប់ផ្ដើមមានរឿងចម្រូងចម្រាសរវាងភាគីអ្នកអភិវឌ្ឍ និងភាគីពលរដ្ឋ។

យ៉ាងណាក៏ដោយលោកនៅតែរំពឹងថា៖«រដ្ឋាភិបាលនឹងផ្ដល់ឱកាសបានទូលំទូលាយ និងមានការចូលរួមពីគ្រប់ភាគីពាក់ព័ន្ធក្នុងដំណើរការអភិវឌ្ឍន៍នានា ហើយសង្ឃឹមថា​ការអភិវឌ្ឍទាំងនោះ នឹងដោះស្រាយបញ្ហាឱ្យបានតាមសម្រួល ដើម្បីពលរដ្ឋ​អាចទទួល​យកបានជាជាងដែលធ្វើការអភិវឌ្ឍមួយដែលផ្ដល់ភាពសំខាន់ដល់តែអ្នកមានលុយទេ ដូចនេះធ្វើយ៉ាងម៉េច ដើម្បីកុំឱ្យពលរដ្ឋរងអយុត្តិធម៌»។

ចំណែកសកម្មជនបរិស្ថាន  គឺ​ លោក លី ចាន់ដារ៉ាវុធ ក៏បានលើកឡើងស្រដៀងគ្នាដែរថា ការ​ចាក់ដីចូលទៅក្នុងសមុទ្រគួរតែមានការសិក្សាឱ្យបានច្បាស់លាស់ និងគួរមានការ​ចូល​រួមពី​ប្រជាពលរដ្ឋនៅក្នុងតំបន់ ដោយគិតគូរពីប្រយោជន៍ពលរដ្ឋ​ជាជាងប្រយោជន៍​អ្នកវិនិយោគ ទើបមិនបង្កើតទៅជាវិសមភាពសង្គម ត្បិតថាការចាក់ដី កន្លងមក លោកសង្កេត​ឃើញការ​ប៉ះពាល់ទៅលើផលនេសាទ និងប៉ះពាល់ការរកស៊ីរបស់ពលរដ្ឋពិតមែន។

យុវជនវ័យក្មេងដែលសកម្មនឹងបរិស្ថានរូបនេះ បានបន្ថែមថា៖«នៅពេលដែលមានការចាក់ដី​ចូលក្នុងសមុទ្រ​ វាធ្វើឱ្យកករទឹក  ក្ដាម ត្រី នឹងរត់ចេញពីកន្លែងហ្នឹង ទៅនៅកន្លែងផ្សេង ដូច្នេះ​គួរតែអនុញ្ញាតឱ្យអ្នកដែលជាអាជីវករនៅផ្សារក្ដាម ចូលរួមក្នុងការសម្រេចក្នុងការអភិវឌ្ឍ»

598 views

ព័ត៌មានថ្មី

អត្ថបទពេញនិយម