សមាគមសម្ព័ន្ធអ្នកសារព័ត៌មានកម្ពុជា

កីឡាករកីឡាការិនីខ្មែរប្តេជ្ញាចិត្តប្រជែង​យកមេដាយ ពេលកម្ពុជាធ្វើម្ចាស់ផ្ទះការប្រកួតយុទ្ធគុនចម្រុះជើងឯកអាស៊ី

ក្រុមកីឡាករកីឡាការិនីMMAកម្ពុជា ដែលត្រូវចូលរួមការប្រកួតកីឡាយុទ្ធគុនចម្រុះជើងឯកអាស៊ី ឆ្នាំ២០២៤ នៅខែកក្កដាខាងមុខ។ រូបថតនៅថ្ងៃទី១២ ខែមិថុនា ឆ្នាំ២០២៤។ (ខេមបូចា/ ស៊ា បញ្ញា)
ក្រុមកីឡាករកីឡាការិនីMMAកម្ពុជា ដែលត្រូវចូលរួមការប្រកួតកីឡាយុទ្ធគុនចម្រុះជើងឯកអាស៊ី ឆ្នាំ២០២៤ នៅខែកក្កដាខាងមុខ។ រូបថតនៅថ្ងៃទី១២ ខែមិថុនា ឆ្នាំ២០២៤។ (ខេមបូចា/ ស៊ា បញ្ញា)

ទោះមានសមត្ថភាព អាច​​ដណ្តើម​បាន​មេដាយ​ពីការ​ប្រកួត​ស៊ីហ្គេម លើក​ទី​៣២ ឆ្នាំ​២០២៣ នៅ​លើ​ទឹក​ដី​ខ្លួនឯង ប៉ុន្តែ​កីឡាការិនីគុនខ្មែរ ទួន ស្រីពីន និង​កីឡាការិនី​បញ្ចស៊ីឡាត់ វឿន វ៉ាន់នីតា បានសម្រេច​ចិត្ត​​​ចូលរួម​ការ​ប្រកួត​កីឡាយុទ្ធគុនចម្រុះជ្រើសរើសជើងឯក​អាស៊ី លើក​ទី​២ ឆ្នាំ​២០២៤ (2nd Asian Mixed Martial Arts Championship) ដែលកម្ពុជា​ត្រូវ​ធ្វើ​ម្ចាស់​ផ្ទះជា​លើក​​ដំបូង​ បើទោះបីជាអ្នកទាំង​២ដឹង​ថា ការចូលប្រលោក​ក្នុងជំនាញ​ថ្មី​នេះ អាច​មានគ្រោះ​ថ្នាក់ ឬ​មានរបួស​។

សម្រាប់​ការ​ចូលរួមការ​​ប្រកួត​កីឡាយុទ្ធគុនចម្រុះ (MMA) ជាលើកដំបូងនៅ​ព្រឹត្តិការណ៍ 2nd Asian Mixed Martial Arts Championship ហៅកាត់​ថា 2nd AMMA Championship នេះ ម្ចាស់​មេដាយ​ប្រាក់​ស៊ីហ្គេម ទួន ស្រីពីន បានទទួល​ស្គាល់​ថា វាជាជំនាញ​ថ្មី ដែល​នាង​មិនទាន់​បានចូល​ហ្វឹក​ហាត់​នៅឡើយ​ទេ ព្រោះ ស្រីពីន ទើប​មកពី​ប្រកួត​ប្រដាល់​គុនខ្មែរ នៅប្រទេស​​បារាំង​។

ទួន ស្រីពីន បាននិយាយ​ថា៖ «ការ​ប្រកួត MMA វាជាជំនាញ​ថ្មី​សម្រាប់​ខ្ញុំ ហេតុនេះ​វា​ប្លែក និង​មាន​ការពិបាក​ដែរ។ យើង​ធ្លាប់តែ​ឈរ​វ៉ៃ ប៉ុន្តែ MMA ឈរក៏វ៉ៃ អង្គុយ​ក៏វ៉ៃ ហើយ​ដេក​ក៏វ៉ៃ គឺ​អាច​ប្រើ​បាន​ច្រើន​ជំនាញ ហេតុ​នេះខ្ញុំគិត​ថា គ្រោះ​ថ្នាក់អាចនឹង​កើតមាន​ឡើង នៅ​ក្នុង​កម្រិត​ណា​មួយ ដែល​អាស្រ័យ​ទៅលើ​ការ​​ប្រកួត​ជាក់​ស្តែង តែ​​ខ្ញុំមិន​ខ្លាច​នោះ​ទេ»

ជាមួយគ្នា​នេះ ទួន ស្រីពីន ដែល​ធ្លាប់​ប្រកួត​គុនខ្មែរ​បាន​១៦​ដង ឈ្នះ​១០ដង ស្មើ​៥ និងចាញ់​​ត្រឹម​១ដង បានចាត់​ទុក​ការ​ដណ្តើម​បាន​មេដាយ​ប្រាក់​ ក្នុងការ​ប្រកួតស៊ីហ្គេម ឆ្នាំ​២០២៣ ថា ជា​លទ្ធផល​ដ៏​ល្អ​មួយ ដែល​ធ្វើ​ឱ្យ​នាង​ទទួលបានជោគ​ជ័យ​មួយ​កម្រិត​​ហើយ​សម្រាប់​ការចាប់​អាជីព​ជាអ្នក​ប្រដាល់ ប៉ុន្តែ ​ស្រីពីន ចង់​បង្កើត​ស្នាដៃមួយ​ទៀត សម្រាប់ការ​បង្ហាញ​ខ្លួន ក្នុង​ការ​ប្រកួត AMMA Championship ព្រោះនេះជា​ឱកាស​លើកដំបូងដ៏​មាន​តម្លៃ ហើយវាក៏ជាពេល​កម្ពុជា បាន​ធ្វើ​ម្ចាស់​ផ្ទះ​ជាលើកទី​១ដូចគ្នា។

កីឡាការិនី​វ័យ​២៣រូបនេះបញ្ជាក់​ថា៖ «បើទោះបីជា​ខ្ញុំ​មាន​របួស​ដោយប្រការណាមួយ ក៏​ខ្ញុំ​នឹង​មិនមានវិប្បដិសារី​​ដែរ ព្រោះ​ខ្ញុំ​លះបង់​​ប្រកួត​តំណាងឱ្យ​ជាតិ។ ពាក្យ​ថា កីឡាការិនីជម្រើសជាតិ​នេះ វាជាក្តីសុបិន​របស់​ខ្ញុំតាំងពីនៅតូច ហើយ​ការ​ឈ្នះ​មេដាយ​ប្រាក់​ផ្នែក​កីឡាគុនខ្មែរ វាជាជោគជ័យ​មួយ​​ហើយ ប៉ុន្តែ​ខ្ញុំ​ចង់ស្វែង​រក​អ្វីដែល​ធំជាង​នេះ ហេតុនេះ​ការ​បន្ថែមជំនាញ MMA ​វា​ជារឿង​ដ៏​ល្អ ដើម្បី​បើក​ផ្លូវ​សម្រាប់​​ខ្ញុំអាច​ប្រកួតបាន​ទាំង​គុនខ្មែរ MMA ឃីកបុកស៊ីង និង K1 ជាដើម»

តាម​ខ្លឹមសារ ដែល​ត្រូវ​បានប្រកាស ក្នុងស​ន្និសីទកាសែត នៅ​ទី​ស្នាក់ការ​គណៈកម្មាធិការជាតិ​អូឡាំពិក (NOCC) កាលពី​ថ្ងៃទី​១២ ខែមិថុនា បាន​ឱ្យ​ដឹង​ថា ការ​ប្រកួត​កីឡាយុទ្ធគុនចម្រុះជ្រើសរើសជើងឯក​អាស៊ី ឆ្នាំ​២០២៤​នេះ នឹង​ធ្វើ​នៅក្នុង​វិមានពហុកីឡដ្ឋានជាតិ​អូឡាំពិក ពីថ្ងៃទី​១១ ដល់​ទី​១៣ ខែកក្កដា ដោយ​មាន​ប្រទេស​ចំនួន១៧​ប្រទេស​ចូល​រួម ក្នុងនោះ​ប្រទេសក្នុងតំបន់​អាស៊ាន មាន​កម្ពុជា ថៃ ឥណ្ឌូនេស៊ី សិង្ហបុរី និងម៉ាឡេស៊ី  រីឯ​១២​ប្រទេស​ទៀត ជាប្រទេស​ក្នុងតំបន់​អាស៊ី រួម​មាន​កូរ៉េ ចិន ឥណ្ឌា កៀគីស្ថាន កាហ្សាកើស្ថាន បារ៉ែន តាហ្ស៊ីគីស្ថាន​ និងម៉ុងហ្គោលលី ជាដើម។

ជាមួយគ្នាម្ចាស់​ផ្ទះ​កម្ពុជា ​បានត្រៀម​កីឡាករ កីឡាការិនី​ចំនួន​១៦​នាក់​សម្រាប់​ការ​ប្រជែង​យក​មេដាយពីព្រឹត្តិការណ៍​កម្រិត​​អាស៊ី​មួយនេះ ក្នុង​នោះមាន​អ្នក​លេង​គុនចម្រុះ ចាន់ រតនា កីឡាករ ឡុង ឡា, រិន សារ័ត្ន, ហ៊ុន គឹមហ៊ាន, មាស ម៉ើ, សែន ច័ន្ទឫទ្ធីគុន, ហ៊ុន ចាន់រាជ, ធាន អាន, អេ វីរៈខាំឈិតភូថង, ហាន ហ៊ីម, ផេង សុខបញ្ញា កីឡាការិនី ខៀវ ចិន្តារ័ត្ន, នៅ ស្រីពៅ, វឿន វ៉ាន់នីតា, សំ ថារ័ត្ន និង​កីឡាការិនី ទួន ស្រីពីន ហើយអ្នកទាំងនេះ​ភាគ​ច្រើនជា​អត្តពលិក​ធ្លាប់​មាន​បទពិសោធន៍​ប្រកួត MMA គឺ​លើកលែង​តែ​កីឡាការិនី ទួន ស្រីពីន, វឿន វ៉ាន់នីតា និង​កីឡាករ ផេង សុខបញ្ញា ជាអ្នក​ចំណូល​ថ្មី។

ទន្ទឹម​នឹង​​នេះ នៅ ស្រីពៅ ដែល​​ធ្លាប់សាង​បាន​ស្នាដៃ​ល្អជាង​គេ ​សម្រាប់​ការ​ប្រកួត MMA នៅ​ក្រៅ​ប្រទេស​ផ្នែកនារី​នោះ ក៏​ហាក់មិនទាន់​មាន​ភាព​ប្រកដប្រជា ក្នុងការ​វិល​មក​កាន់​ការ​ប្រកួត​លើក​នេះ ព្រោះ​រយៈពេល​ជាង​១​ឆ្នាំ​មក​នេះ ស្រីពៅ មិន​ធ្លាប់​បាន​ឡើង​ប្រកួត MMA នោះ​ទេ ហើយ​ក៏​មិនបាន​ឡើង​ប្រកួត​គុនខ្មែរ​ដូចគ្នា។

នៅ ស្រីពៅ បាន​ឱ្យដឹង​​ថា៖​ «ខ្ញុំខានឡើង​ប្រកួត​ទាំង​គុនខ្មែរ និង MMA ហេតុ​នេះ​ខ្ញុំមិនទាន់​ប្រាកដ​ថា នឹង​អាច​ធ្វើ​បាន​ល្អ​ដូចពេល​ខ្ញុំ​ប្រកួត MMA នៅ​ក្រៅ​ប្រទេស​កន្លងមក ឬយ៉ាងណា​នោះ​ទេ ប៉ុន្តែ​ខ្ញុំ​នឹងព្យាយាម​ធ្វើ​ឱ្យ​បាន​ល្អ ហើយ​តាមរយៈការ​ហ្វឹក​ហាត់ និង​ប្រកួតសមជាមួយ​មិត្ត​រួម​ក្លិបឃើញ​ថា ការ​ប្រកួត​បែប​ឈរ​វ៉ៃជាលក្ខណៈ​គុនខ្មែរ ខ្ញុំ​អាចធ្វើ​បាន​ល្អច្រើន តែ​ការ​ប្រើ​ក្បាច់ក្លេ ខ្ញុំ​នៅ​ស្ទើរ​ដដែល»

កីឡាការិនី​រូបនេះបានបន្ថែម​ថា៖ ​«​ការ​ដោះក្លេ ខ្ញុំ​កំពុង​ហ្វឹក​ហាត់​ជា​ប្រចាំ ចំណែក​ការ​ប្រើ​ក្បាច់ក្លេ​ទៅលើ​គូ​ប្រកួត​វិញ ខ្ញុំចាប់​អត់ទាន់​បាន​ទេ។ តែទោះបីជា​យ៉ាង​ណា តាមច្បាប់នៃ​ការ​ប្រកួត AMMA Championship នេះ វាមិនគ្រោះ​ថ្នាក់​ដូចការ​ប្រកួត MMA ក្រៅ​ផ្លូវ​ការ​​នៅតាម​សង្វៀនឯកជន​នោះ​ទេ ហេតុ​នេះខ្ញុំយល់​ថា អាច​ទប់ទល់​បាន បើទោះបីជាខ្ញុំ​ត្រូវ​ប៉ះ​ដៃគូ​​មានជំនាញ​ខ្លាំង​ខាងចាប់ក្លេ​ក៏​ដោយ»

លោក វ៉ាត់ ចំរើន អគ្គលេខាធិការ​គណៈកម្មាធិការជាតិ​អូឡាំពិក​កម្ពុជា ថ្លែងក្នុងសន្និសីទកាសែត នៅទីស្នាក់ការ​គណៈកម្មាធិការជាតិ​អូឡាំពិក (NOCC) កាលពីថ្ងៃទី១២ ខែមិថុនា ឆ្នាំ២០២៤។ (ខេមបូចា/ ស៊ា បញ្ញា)

យ៉ាង​ណា​ក៏​ដោយ ចំពោះលក្ខខណ្ឌ និង​ច្បាប់​នៃ​ការ​ប្រកួត​កីឡាយុទ្ធគុនចម្រុះ​ជ្រើសរើសជើង​ឯក​អាស៊ី​នេះ លោក ហ៊ុន ចាន់រាជ អនុប្រធាន​សហព័ន្ធ​កីឡាយុទ្ធគុនចម្រុះ​កម្ពុជា ហើយ​ក៏ជា​គ្រូ​បង្វឹក MMA និងជា​កីឡាករ​ត្រូវ​ប្រកួត​ផង​នោះ បានអះអាង​ថា វាមិន​បង្ក​គ្រោះ​ថ្នាក់​ដល់​កីឡាករ កីឡាការិនី ​នោះ​ទេ ព្រោះវាមិនមែន​ការ​ប្រកួត MMA អាជីព ដែល​មានលក្ខណៈកាច​សាហាវ និង​គ្រោះ​ថ្នាក់​ខ្លាំង។

លោក​បាន​និយាយថា៖ «ច្បាប់ប្រកួត​របស់​កម្មវិធី AMMA នេះ វាមិន​ដូច​ជា MMA អាជីពដែល​ចេញ​ទៅ​វ៉ៃ​កន្លងមក​នោះ​ទេ គឺ​គេ​បានដកក្បាច់​​គ្រោះ​ថ្នាក់ចេញ ហើយ​​ការចាប់​ក្លេទៅលើ​ដៃគូ​ ក៏មានការ​កំណត់ពេលមក​​​ត្រឹម១៥​ទៅ​​២០វិនាទីអី​ទេ ​គេចាប់បំបែក​ហើយ អ៊ីចឹង​វា​អត់សូវ​មាន​គ្រោះ​ថ្នាក់ឡើយ ព្រោះ​គេ​ចង់ជំរុញ​ប្រភេទ​កីឡានេះចូលទៅ​ក្នុងការ​ប្រកួតស៊ីហ្គេម និងឈាន​ទៅ​កីឡាអូឡាំពិក»​។

លោក​ ហ៊ុន ចាន់រាជ បាន​បន្ថែម​ថា៖ «ច្បាប់ MMA ថ្មី​នេះ ​គេ​បាន​កែ​ប្រែ​លក្ខខណ្ឌ​ឱ្យ​ក្លាយជា​ហ្គេម​មួយមាន​សុវត្ថិភាព​ខ្លាំង និង​មានភាពងាយស្រួល​សម្រាប់​គុនខ្មែរ​យើង​​ដែរ​ ហើយ​​តាម​រយៈ​ការ​ហ្វឹក​ហាត់​តាំងពីខែមេសា​មក​នោះ យើង​ឃើញ​ថា ក្រុមជម្រើសជាតិ​របស់​យើង​ មាន​ការរីកចម្រើន​ខ្លាំង​ ហេតុនេះ​​ខ្ញុំសង្ឃឹម​ថា អត្តពលិក​​ទាំង​១៦នាក់​របស់​យើង នឹង​ដណ្តើម​បាន​មេដាយ មិនថាជាមេដាយ​មាស ប្រាក់ និងមេដាយ​សំរឹទ្ធ​»

ជាមួយ​គ្នា លោក វ៉ាត់​ ចំរើន អគ្គលេខាធិការ​គណៈកម្មាធិការជាតិ​អូឡាំពិក​កម្ពុជា បាន​ឱ្យ​ថា កម្ពុជា​យើង​បាន​សម្រេច​ធ្វើ​ជាម្ចាស់​ផ្ទះការ​ប្រកួត AMMA Championship ​នេះ ក្រោមការ​គាំ​ទ្រ​ពេញ​ទំហឹងពី​រាជរដ្ឋាភិបាល​កម្ពុជា និង​មានការជួយ​ឧបត្ថម្ភ​​ពី​សមាគម​កីឡាយុទ្ធគុនចម្រុះ​អាស៊ី ឬ Asian Mixed Martial Arts Association (AMMA) ជាង​៩០ភាគ​រយ​នៃការ​ចំណាយ​សម្រាប់​ការ​រៀបចំ ដែល​មានចំនួន​សរុបជាង​៣០ម៉ឺន​ដុល្លារ។

ចំណែក​ការ​ចំណាយ​ប្រមាណ​១០​ភាគ​រយ​ទៀត គឺ​ម្ចាស់​ផ្ទះ​កម្ពុជា ជាអ្នក​ស្វែង​រក​ការឧបត្ថម្ភ​ពី​ខាង​ក្រៅ ដើម្បី​បន្ថែម​ទៅលើ​ថវិកា ដែល​នឹង​ទទួល​បានពី​​ការ​លក់សំបុត្រ ពី​​ការ​​ប្រកួត AMMA Championship នេះ គឺ​កម្ពុជា​ធ្វើដោយមានគោលការណ៍ច្បាស់លាស់ និងមានការទទួលខុសត្រូវ​ចំពោះអនាគតនៃក្បាច់គុនព្រលឹងជាតិ និង​ក្បាច់គុនអត្តសញ្ញាណ​ជាតិ​របស់​ខ្លួន។

លោក វ៉ាត់ ចំរើន ​បាន​បញ្ជាក់​ថា៖​ «​ការ​ប្រកួត AMMA Championship 2024នេះ ចាត់ទុកថា ជាការប្រកួត ដើម្បី​ធ្វើទំនើបកម្ម​ក្បាច់​គុន គឺ​ធ្វើយ៉ាងណាឱ្យ​ក្បាច់គុនខ្មែររបស់យើង​កាន់តែចូលរួមជាមួយសភាពការ ឬភាពជឿនលឿននៃការប្រកួតក្បាច់គុននៅ​លើពិភពលោក អ៊ីចឹង​គោលដៅគឺ​លើកតម្កើងក្បាច់គុនរបស់យើង»

បន្ថែម​លើ​នេះ លោក វ៉ាត់ ចំរើន បាន​ឱ្យ​ដឹង​ទៀត​ថា តាម​រយៈការ​ប្រកួត AMMA Championship​នេះ ​នឹង​ជួយឱ្យ​កីឡាករកីឡាការិនីមកពី​តាមបណ្តា​ប្រទេស​ផ្សេងៗ​​មានឱកាសចូលរួមប្រកួតកម្រិតខ្ពស់របស់យុទ្ធគុនចម្រុះ ព្រោះនៅអាស៊ី ជាតំបន់​ឬជាប្រទេស​នៃ​ប្រភព​ក្បាច់​​គុន។ លោក​ថា ប្រភព​ក្បាច់​នៅ​លើ​ពិភពលោក​នេះ គឺ​អត់​មាន​ប្រភព​ក្បាច់គុន​ណា មាន​ភាព​ជឿនលឿន​ដូច​ប្រភព​ក្បាច់​គុន​មក​ពី​អាស៊ី​នោះ​ទេ។

ជាមួយ​ហេតុ​ផល​នេះ លោក វ៉ាត់ ចំរើន ដែលជា​រដ្ឋ​លេខាធិការ​ក្រសួង​អប់រំ យុវជន និង​កីឡា​ផង​នោះ បានចាត់​ទុក​ការ​ប្រកួត AMMA នេះ ជាការធ្វើសមាហរណកម្ម ដើម្បី​ឱ្យ​កីឡាករ កីឡាការិនី MMA របស់កម្ពុជា បាន​​ស្គាល់ពី​ការប្រកួត ដែលមានបទបញ្ជា ក្រឹត្យ​ក្រម និងវិន័យច្បាស់លាស់ក្នុងចលនាកីឡាអន្ដរជាតិ មិនមែនប្រកួតប្រជែងគ្នាដណ្ដើម​លាភសក្ការៈទេ គឺប្រកួតប្រជែងគ្នាយកពិន្ទុ និងកិត្តិយសសម្រាប់​ជាតិ។

អ្នកជំនាញ​កីឡា​រូប​នេះ បានសង្កត់​ធ្ងន់​ថា៖​ «គោលការណ៍របស់ AMMA គឺ​ដើម្បីឆ្ពោះទៅរកការដាក់បញ្ចូល MMA ទៅ​ក្នុង​កម្រិតកីឡាអូឡាំពិក អ៊ីចឹង​ឆ្នាំនេះ​យើង​ប្រកួត និង​​ផ្សព្វផ្សាយប្រភេទ​កីឡានេះ​ឱ្យ​បាន​ទូលំទូលាយ ហើយ​​ការ​ប្រកួត Asian Games 2026 នៅ​ប្រទេសជប៉ុន យើងនឹងបញ្ចូល​ឱ្យ​មាន​ MMA។ បន្ទាប់ពីនេះទៅ MMA នឹងឡើងទៅមួយកម្រិតទៀត គឺ​នឹង​មាន​វត្ត​មាននៅ​ក្នុងការ​ប្រកួត LA 2028 Summer Olympics នៅសហរដ្ឋអាមេរិក»

ជាមួយ​ការ​ត្រៀម​បញ្ចូល MMA ទៅ​ក្នុង Olympic Games ​នេះ សហព័ន្ធ​កីឡាយុទ្ធគុនចម្រុះ​កម្ពុជា លោក វ៉ាត់ ចំរើន បានបញ្ជាក់​ថា៖​ «គោលបំណងធំនៃ​ការរៀបចំឱ្យ​មានការប្រកួត AMMA Championship នេះ​គឺដើម្បីសមាហរណកម្មកីឡាករ​កីឡាការិនីគុនចម្រុះនៃក្បាច់គុនបុរាណខ្មែរ ទៅលើឆាកអន្តរជាតិផ្លូវការ។ សហព័ន្ធកីឡាគុនចម្រុះកម្ពុជាបានកើតឡើងជាយូរមកហើយ ហើយយើងកំពុងពង្រឹងសមត្ថភាពនៃការគ្រប់គ្រង ដើម្បីជាប្រទេសមួយនៃម្ចាស់ក្បាច់គុននៅ​លើពិភពលោកនេះដែរ»

487 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម