ការតវ៉ារបស់កម្មករនិយោជិតជាង៧០នាក់នៃក្រុមហ៊ុន HCC Group Co., Ltd ដែលធ្វើការសម្អាតព្រលានយន្តហោះអន្តរជាតិភ្នំពេញមុនពេលបិទដំណើរការ ខណៈនោះពួកគេត្រូវបានបញ្ឈប់ពីការងារដោយមិនបានទូទាត់ប្រាក់សំណងគ្រប់ចំនួន ដូច្នេះបណ្តាឱ្យពួកគេទាមទារសំណងចំនួន៥ចំណុច និងការដែលមិនយកពួកគេទៅធ្វើការនៅព្រលានយន្តហោះថ្មី មកដល់ពេលនេះនៅមិនទាន់អាចដោះស្រាយបាននៅឡើយទេ។
មន្ត្រីក្រសួងការងារ តំណាងក្រុមហ៊ុន និងមេដឹកនាំសហជីពដែលជាតំណាងបុគ្គលិក កម្មករ បានព្រមព្រៀងគ្នាកំណត់យកថ្ងៃទី១៧ ខែវិច្ឆិកា ឆ្នាំ២០២៥ ដើម្បីជួបពិភាក្សាគ្នារកដំណោះស្រាយជាថ្មីទៀត ខណៈក្នុងជំនួបពិភាក្សាកាលពីថ្ងៃទី១២ ខែវិច្ឆិកា នៅអគ្គនាយកដ្ឋានដោះស្រាយវិវាទការងារនៃក្រសួងការងារ តំណាងក្រុមហ៊ុន HCC Group បានទាត់ចោលការទាមទារប្រាក់២ចំណុចទៀត ក្នុងចំណោម៥ចំណុច។
អ្នកនាំពាក្យក្រសួងការងារបានប្រាប់ សារព័ត៌មានខេមបូចា នៅថ្ងៃទី១៤ ខែវិច្ឆិកាថា ក្រសួងបានត្រៀមដំណោះស្រាយរួចហើយសម្រាប់ជំនួបដោះស្រាយវិវាទនៅថ្ងៃទី១៧ ខែវិច្ឆិកា។
HCC Group ជាក្រុមហ៊ុនដែលម៉ៅការសម្អាតព្រលានយន្តហោះអន្តរជាតិភ្នំពេញ ដែលមានបុគ្គលិកកម្មករបោសសម្អាតចំនួន៧២នាក់។ ពួកគាត់ធ្វើការសម្អាតនៅតាមបន្ទប់ទឹក និងនៅទីធ្លាក្នុងព្រលានយន្តហោះ។ កាលពីថ្ងៃទី៩ ខែវិច្ឆិកា ឆ្នាំ២០២៥ ព្រលានយន្តហោះភ្នំពេញ ត្រូវបានរដ្ឋលេខាធិការនៃអាកាសចរណ៍ប្រកាសបិទ និងបានប្រកាសបើកដំណើរការព្រលានយន្តហោះអន្តរជាតិភ្នំពេញតេជោ នៅក្នុងខេត្តកណ្តាល។
ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា(CTWUF) លោក ទូច កុសលបានប្រាប់ សារព័ត៌មានខេមបូចា ថា នៅពេលបិទទ្វារក្រុមហ៊ុន HCC Group បានទូទាត់ឱ្យកម្មករ៣ចំណុចទី១ ទាក់ទងប្រាក់អតីតភាពការងារ ទី២ប្រាក់អតីតភាពប្រចាំឆ្នាំ និងទី៣ គឺប្រាក់ខែចុងក្រោយ។ នៅសល់២ចំណុចទៀត ដូចជាប្រាក់សំណងជំងឺចិត្តនិងប្រាក់ជួសឱ្យការជូនដំណឹងក្រុមហ៊ុនមិនទាន់បានទូទាត់ឱ្យទេ។ នេះបើយោងតាមកម្មករ។
នៅពេលជួបចរចាកាលពីថ្ងៃទី១២ ខែវិច្ឆិកា នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ ក្រុមហ៊ុនក៏នៅតែបដិសេធមិនព្រមបង់សងឱ្យកម្មករដែរ ខណៈប្រាក់សំណងជំងឺចិត្តត្រូវបានចែងនៅក្នុងមាត្រា៩១ ហើយប្រាក់ជួសឱ្យការជូនដំណឹងមាននៅក្នុងមាត្រា៧៧នៃច្បាប់ស្តីពីការងារ។ នេះបើតាមលោក ទូច កុសល។
លោក ម៉ៅ ពុទ្ធា ដែលបានធ្វើការនៅព្រលានយន្តហោះអន្តរជាតិភ្នំពេញ អស់រយៈពេលប្រមាណជា១៨ឆ្នាំមកហើយ ហើយក៏ត្រូវបានក្រុមហ៊ុនបញ្ឈប់ពីការងារផងដែរនោះបានប្រាប់ សារព័ត៌មានខេមបូចា នៅថ្ងៃទី១៤ ខែវិច្ឆិកា ឆ្នាំ២០២៥នេះថា ការដែលបុគ្គលិក កម្មករទៅប្រមូលផ្តុំតវ៉ានៅមុខក្រសួងការងារ គឺដើម្បីស្នើសុំឱ្យក្រសួងការងារជួយអន្តរាគមន៍ទៅក្រុមហ៊ុន HCC Group ឱ្យទូទាត់សំណងឱ្យបានពេញលេញទៅតាមផ្លូវច្បាប់ចំនួន៥ចំណុចដល់បុគ្គលិក កម្មករដែលក្រុមហ៊ុនបានបញ្ឈប់ពីការងារ។
លោក ពុទ្ធា និយាយថា៖ «ហើយអ្វីដែលយើងបានជជែកជាមួយក្រុមហ៊ុន ក្រុមហ៊ុនគាត់បានទូទាត់ឱ្យ៣ចំណុច ហើយចំណុចដែលធ្វើឱ្យយើងមិនសះជាគ្នាធ្វើឱ្យកើតមានការតវ៉ាការប្រមូលផ្តុំនៅមុខក្រសួងការងារនោះ ដោយសារតែចំណុចដែលក្រុមហ៊ុនគាត់មិនឱ្យ គឺលុយជូនដំណឹង និងលុយសោហ៊ុយជំងឺចិត្ត។ អ៊ីចឹងហើយបងប្អូនកម្មករនិយោជិតយើងគាត់ស្នើសុំឱ្យក្រុមហ៊ុនទូទាត់លុយជូនដំណឹង និងលុយជំងឺចិត្តហើយក្រុមហ៊ុនគាត់មិនទាន់បានទូទាត់ឱ្យ អ៊ីចឹងហើយទើបធ្វើឱ្យមានការតវ៉ា»។
ជាមួយគ្នានេះ អ្នកស្រី មិន កញ្ញា ជាកម្មករបោសសម្អាតនៅព្រលានយន្តហោះអន្តរជាតិភ្នំពេញ ដែលបានទៅប្រមូលផ្តុំគ្នាតវ៉ានៅមុខក្រសួងការងារជាមួយកម្មករជាង៧០នាក់ផ្សេងទៀតបាននិយាយថា កម្មករទាំងអស់សូមឱ្យក្រសួងការងារជួយអន្តរាគមន៍ករណីក្រុមហ៊ុន HCC Group បានបញ្ឈប់កម្មករភ្លាមៗ នៅពេលដែលព្រលានយន្តហោះអន្តរជាតិពោចិនតុងបានបិទដំណើរការ ដោយមិនបានជូនដំណឹងជាមុន និងទូទាត់ប្រាក់អត្ថប្រយោជន៍ទៅតាមច្បាប់ការងារ។
បើតាមស្ត្រីរូបនេះ បុគ្គលិក កម្មករជាង៧០នាក់ ដែលត្រូវបានបញ្ឈប់ពីការងារទាមទារឱ្យក្រុមហ៊ុនដោះស្រាយសំណងបញ្ចប់កិច្ចសន្យាការងារទៅតាមច្បាប់ដែលមានចំនួន៥ចំណុច ខណៈកន្លងមកខាងក្រុមហ៊ុនបានទូទាត់ឱ្យតែ៣ចំណុចប៉ុណ្ណោះ។
អ្នកស្រី កញ្ញា និយាយថា៖ «ពួកយើងខ្ញុំចង់ឱ្យក្រសួងការងារ និងរដ្ឋាភិបាលលោកជួយដោះស្រាយ ពីព្រោះការបិទព្រលានយន្តហោះបញ្ឈប់ការងារពួកខ្ញុំកន្លងមក ខាងក្រុមហ៊ុនអត់មានផ្តល់សំណងឱ្យបានពេញលេញទៅតាមច្បាប់ការងារនោះទេ លុយផ្តល់ដំណឹងមុន៣ខែក៏អត់ លុយសងជំងឺចិត្តក៏អត់។ លើសពីនេះលុយដែលពួកខ្ញុំខំប្រឹងធ្វើការកាលពីឆ្នាំ២០២១ក៏ក្រុមហ៊ុនអត់គិតឱ្យដែរ គឺក្រុមហ៊ុនអត់មានទំនួលខុសត្រូវតាមផ្លូវច្បាប់ជាមួយបុគ្គលិក និងកម្មករទេ»។
កម្មករបានបញ្ជាក់ថា ព្រលានយន្តហោះអន្តរជាតិពោចិនតុងស្ថិតក្នុងសង្កាត់កាកាប និងសង្កាត់ចោមចៅខណ្ឌពោធិ៍សែនជ័យ រាជធានីភ្នំពេញ ត្រូវបានបិទដំណើរការទាំងស្រុងកាលពីថ្ងៃទី៩ ខែកញ្ញា ឆ្នាំ២០២៥ បន្ទាប់ពីបានដំណើរការអស់រយៈពេលជិត៧០ឆ្នាំ។
បច្ចុប្បន្នព្រលានយន្តហោះអន្តរជាតិថ្មីមានឈ្មោះថា អាកាសយានដ្ឋានអន្តរជាតិតេជោ បាននិងកំពុងបើកដំណើរការហើយក្រុមហ៊ុន HCC Groupនេះ ក៏បានដេញថ្លៃជាប់ក្នុងការសម្អាតព្រលានយន្តហោះនេះផងដែរ ប៉ុន្តែខាងក្រុមហ៊ុនបែជាជ្រើសរើសកម្មករថ្មីចូលធ្វើការដោយមិនយកកម្មករដែលធ្លាប់សម្អាតនៅព្រលានយន្តហោះចាស់ទៅធ្វើការឡើយ។
មន្ត្រីផ្នែករដ្ឋបាលនៃក្រុមហ៊ុន HCC Group មិនទាន់បានឆ្លើយតបទៅនឹងសាររបស់ខេមបូចាដែលស្នើសុំធ្វើការបញ្ជាក់លើបញ្ហានេះទេ គិតមកដល់ត្រឹមម៉ោងផ្សាយនៅថ្ងៃទី១៤ ខែវិច្ឆិកា។
ប៉ុន្តែយ៉ាងណាក្តីបើតាមលោក ទូច កុសល នៅក្នុងជំនួបដោះស្រាយវិវាទកាលពីថ្ងៃទី១១ ខែវិច្ឆិកា ខាងតំណាងក្រុមហ៊ុន HCC Group បានលើកហេតុផលថា គេបានជូនដំណឹងដល់បុគ្គលិក កម្មករស្របទៅតាមនីតិវិធីរួចហើយ ដោយគេបានប្រជុំប្រាប់បុគ្គលិក កម្មករហើយបានបិទសេចក្តីប្រកាសព័ត៌មាននៅលើក្តារខៀនរបស់ក្រុមហ៊ុនទៀតផង។ ចំណែកភាគីកម្មករថា ពួកគាត់អត់បានដឹងទេ ហើយពេលប្រជុំក៏គ្មានកំណត់ហេតុអ្វីដែរពីព្រោះពួកគាត់គ្រាន់តែឃើញថ្នាក់ដឹកនាំក្រុមហ៊ុនទៅសំណេះសំណាលជាមួយបុគ្គលិកកម្មករធម្មតាប៉ុណ្ណោះ។ បន្ថែមពីនេះបុគ្គលិក កម្មករនិយាយថា កិច្ចសន្យាការងាររបស់ពួកគាត់ ត្រូវបានធ្វើឡើងជាលាយលក្ខណ៍អក្សរសម្រាប់ម្នាក់ៗគ្រប់គ្នា ប៉ុន្តែដល់ពេលបញ្ចប់កិច្ចសន្យាការងារក្រុមហ៊ុនមិនបានជូនដំណឹងជាលាយលក្ខណ៍អក្សរមកពួកគាត់តាមច្បាប់កំណត់ឡើយ។
ទាក់ទងនឹងប្រាក់សំណងជំងឺចិត្តក្រុមហ៊ុនបានលើកឡើងថា ក្រុមហ៊ុនបានជូនដំណឹងត្រឹមត្រូវហើយ មិនអាចផ្តល់ប្រាក់សំណងជំងឺចិត្តបានទេ ហើយក្រុមហ៊ុន HCC Group ក៏ត្រូវបានក្រុមហ៊ុនព្រលានយន្តហោះផ្តាច់កិច្ចសន្យាពួកគាត់ដែរ។ នេះបើតាម CTWUF ។
លោក ទូច កុសល បញ្ជាក់ថា៖ «អ៊ីចឹងខ្ញុំជាសហព័ន្ធជាអ្នកសម្របសម្រួលរឿងហ្នឹង ខ្ញុំស្តាប់ទៅអាការជូនដំណឹងរបស់ក្រុមហ៊ុននឹង ដូចអត់ទាន់មានភាពប្រាកដប្រជា ពីព្រោះនៅពេលជួបជជែកគ្នាក្រុមហ៊ុននិយាយផ្សេងកម្មករនិយាយផ្សេង ដូច្នេះអត់ទាន់មានលទ្ធផលជាដុំកំភួនទេ ហើយក្រុមហ៊ុនក៏មិនបានយកពួកគាត់ទៅធ្វើការនៅព្រលានយន្តហោះអន្តរជាតិតេជោដែរ ខណៈដែលកម្មករបានទទួលព័ត៌មានថា ក្រុមហ៊ុនដេញថ្លៃបាននៅព្រលានថ្មីនោះតែអត់យកពួកគាត់ធ្វើការដូច្នេះហើយពួកគាត់ត្រូវតែទាមទារ»។
លោក ស៊ុន មេសា អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈបានប្រាប់ សារព័ត៌មានខេមបូចា នៅថ្ងៃទី១៤ ខែវិច្ឆិកានេះថា ក្រសួងការងារតែងតែយកចិត្តទុកដាក់ក្នុងការដោះស្រាយនូវគ្រប់បញ្ហាវិវាទការងារ ហើយករណីការតវ៉ារបស់បុគ្គលិកកម្មករនៅព្រលានយន្តហោះអន្តរជាតិភ្នំពេញនេះ ក្រសួងបានធ្វើការដោះស្រាយជាច្រើនលើកមកហើយ។ ក្រសួងនឹងជួបប្រជុំជាមួយភាគីពាក់ព័ន្ធដើម្បីធ្វើការដោះស្រាយវិវាទនេះជាបន្តទៀតនៅថ្ងៃទី១៧ ខែវិច្ឆិកាខាងមុខនេះដោយមន្ត្រីក្រសួងបានត្រៀមនូវដំណោះស្រាយដើម្បីពន្យល់ទៅដល់បងប្អូនដែលជានិយោជិតនៃក្រុមហ៊ុន HCC Group ផងដែរ។ យ៉ាងណាក្តីអ្នកនាំពាក្យរូបនេះមិនបានប្រាប់ឱ្យដឹងថា តើក្រសួងនឹងធ្វើការដោះស្រាយដើម្បីបញ្ចប់វិវាទបែបណានោះទេ។
ប៉ុន្តែលោកបញ្ជាក់ថា៖ «ដើម្បីឱ្យកម្ពុជាក្លាយទៅជានីតិរដ្ឋ ក្រសួងការងារស្នើសូមឱ្យគ្រប់ភាគីទាំងអស់ទាំងនិយោជក ទាំងនិយោជិក និងអ្នកពាក់ព័ន្ធទាំងអស់ សូមអនុវត្តទៅតាមច្បាប់ជាធរមាន ដើម្បីឱ្យសង្គមកម្ពុជាជាសង្គមមួយដែលគោរពច្បាប់ទាំងអស់គ្នា»។
យោងតាមច្បាប់ការងារនៃព្រះរាជាណាចក្រកម្ពុជា មាត្រា៧៧ ចែងថា ការរំលាយកិច្ចសន្យាការងារតាមឆន្ទៈនៃនិយោជកតែឯកឯងគ្មានឱ្យដំណឹងមុន ឬមិនគោរពតាមរយៈពេលនៃការឱ្យដំណឹងមុន តម្រូវឱ្យនិយោជកចេញប្រាក់ទូទាត់ដល់កម្មករនិយោជិតមានចំនួនស្មើនឹងប្រាក់ឈ្នួលនិងអត្ថប្រយោជន៍គ្រប់ប្រភេទដែលកម្មករនិយោជិតត្រូវបានក្នុងរយៈពេលឱ្យដំណឹងមុន ដែលគេមិនបានគោរពត្រឹមត្រូវ។
ចំណែកមាត្រា៩១នៃច្បាប់ស្តីពីការងារចែងថា ការរំលាយកិច្ចសន្យាការងារតាមឆន្ទៈផ្ទាល់នៃភាគីណាមួយ ដោយគ្មានហេតុផលត្រឹមត្រូវនោះ អាចបើកសិទ្ធិឱ្យភាគីម្ខាងទៀតទារសងសោហ៊ុយជំងឺចិត្តបាន។ សោហ៊ុយជំងឺចិត្តនេះ មិនត្រូវច្រឡំគ្នាជាមួយនឹងប្រាក់បំណាច់ទូទាត់ជួសការឱ្យដំណឹងមុន ឬជាមួយនឹងប្រាក់បំណាច់បណ្តេញចេញទេ។ កម្មករនិយោជិតអាចទាមទារប្រាក់បំណាច់បើកផ្តាច់មួយ ដែលមានចំនួនស្មើនឹងប្រាក់បំណាច់បណ្តេញចេញ។ ក្នុងករណីនេះ កម្មករនិយោជិតត្រូវបានរួចពីកាតព្វកិច្ច ដែលត្រូវផ្តល់ភស្តុតាងបញ្ជាក់ពីការខូចខាតរបស់ខ្លួន។
បើតាមនីតិវិធី បើសិនជាវិវាទនេះមិនអាចដោះស្រាយនៅនាយកដ្ឋានវិវាទការងារមិនសះជាគ្នាទេ គឺនឹងត្រូវបញ្ជូនទៅក្រុមប្រឹក្សាអាជ្ញាកណ្តាលដើម្បីបើកសវនាការបន្តទៀតហើយបើនៅតែមិនសះជាគ្នាទៀត នោះនឹងអាចបញ្ជូនទៅតុលាការ។ ប៉ុន្តែសម្រាប់លោកទូច កុសល ចង់ឃើញទាំងភាគីក្រុមហ៊ុន និងភាគីបុគ្គលិកកម្មករនិយោជិតធ្វើការដោះស្រាយជាមួយគ្នាធ្វើយ៉ាងណាឱ្យលទ្ធផលអាចទទួលយកបានទាំងអស់គ្នា ដោយភាគីក្រុមហ៊ុនគួរតែពិចារណាទៅលើចំណុចដែលកម្មករស្នើសុំ។
គួររំឭកថា ក្រុមហ៊ុន HCC Group Co., Ltd ក៏ធ្លាប់មានវិវាទការងារជាមួយបុគ្គលិកកម្មកររបស់ខ្លួនជាង១០០នាក់ នៅសាខាព្រលានយន្តហោះខេត្តសៀមរាបកាលពីឆ្នាំ២០២០ក្នុងកំឡុងពេលមានការរីករាលដាលជំងឺកូវីដ១៩ផងដែរ ហើយវិវាទនោះទើបតែត្រូវបានដោះស្រាយបញ្ចប់នៅថ្ងៃទី២២ ខែមីនា ឆ្នាំ២០២៥ ដោយនៅទីបំផុតភាគីក្រុមហ៊ុនបានយល់ព្រមផ្តល់ជូនកម្មករនិយោជិតនូវទឹកប្រាក់សរុបជាង៨ម៉ឺនដុល្លារ ដើម្បីទូទាត់សម្រាប់អត្ថប្រយោជន៍ផ្សេងៗដល់បុគ្គលិកកម្មករ៕
