សមាគមសម្ព័ន្ធអ្នកសារព័ត៌មានកម្ពុជា

ច្បាប់ស្ដីពីសុវត្ថិភាពម្ហូបអាហារត្រូវបានអនុម័ត ហើយរំពឹងថានឹងជួយឱ្យអាហារតាមដងផ្លូវមានគុណភាពប្រសើរ

ស្ត្រីម្នាក់កំពុងលក់ម្ហូបនៅតាមផ្លូវក្នុងរាជធានីភ្នំពេញ នាថ្ងៃទី២៣ ខែឧសភា ឆ្នាំ២០២២។ ខេមបូចា/ព្រីង សំរាំង
ស្ត្រីម្នាក់កំពុងលក់ម្ហូបនៅតាមផ្លូវក្នុងរាជធានីភ្នំពេញ នាថ្ងៃទី២៣ ខែឧសភា ឆ្នាំ២០២២។ ខេមបូចា/ព្រីង សំរាំង

សេចក្តីព្រាងច្បាប់ស្តីពីសុវត្ថិភាពម្ហូបអាហារដែលរង់ចាំអស់រយៈពេលជាច្រើនឆ្នាំមកហើយនោះ ពេលនេះកំពុងតែដាក់ថ្វាយព្រះមហាក្សត្រឡាយព្រហស្ថលេខា ក្រោយពីរដ្ឋសភា និងព្រឹទ្ធសភា បានអនុម័តក្នុងខែឧសភានេះ។ អ្នកតស៊ូមតិដែលជំរុញឱ្យមានច្បាប់នេះ ថាជាសញ្ញាល្អមួយដែលអាចឱ្យម្ហូបអាហារលក់ដូរនៅតាមដងផ្លូវក្នុងប្រទេសកម្ពុជា អាចប្រកួតប្រជែងជាមួយប្រទេសជិតខាងបាន។

ក្រសួងពាណិជ្ជកម្មបានរៀបចំសេចក្តីព្រាងច្បាប់នេះនៅក្នុងឆ្នាំ ២០១៥ ប៉ុន្តែសេចក្តីព្រាងនេះទើបតែទទួលបានការអនុម័តនៅក្នុងរដ្ឋសភាកាលពីថ្ងៃទី ១១ ខែឧសភា ហើយត្រូវបានព្រឹទ្ធសភាអនុម័តនៅរយៈពេលមួយសប្តាហ៍ក្រោយមកទៀត។ ច្បាប់នេះដាក់ចេញនូវការផាកពិន័យយ៉ាងធ្ងន់ធ្ងរសម្រាប់អ្នកលក់ និងអាជីវកម្មអាហារផ្សេងទៀតដែលដំណើរការដោយគ្មានលិខិតអនុញ្ញាត ឬលក់អាហារគ្មានអនាម័យ ក៏ដូចជាអ្នកដែលលក់ផលិតផលម្ហូបអាហារដោយគ្មានស្លាកកាលបរិច្ឆេទផុតកំណត់ជាដើម។

ដូចដែលបានចែង ច្បាប់នេះក៏មានវិសាលភាពគ្របដណ្តប់លើដំណើរការនានាក្នុងប្រតិបត្តិការអាជីវកម្មអាហារ ដែលក្នុងនោះរួមមានការវេចខ្ចប់  ការចែកចាយ ក៏ដូចជា ការលក់ដុំនិងលក់រាយ។

អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ប្រាប់ ខេមបូចាថា អាជីវករតាមដងផ្លូវនឹងរាប់ថាជាអ្នកលក់រាយ។ ក្រោមច្បាប់នេះ អាជីវកម្មក្រៅផ្លូវការទាំងនេះអាចស្ថិតនៅក្រោមការត្រួតពិនិត្យជាផ្លូវការ។

លោក សុវិជាតិ ​បាន​ថ្លែង​ថា​៖ «​មិន​មាន​ករណី​លើកលែង​ទេ ហើយកុំថា​ខ្ញុំ​ជា​អាជីវករ​លក់​ដូរ​តាម​ចិញ្ចើម​ផ្លូវ​ មិន​ត្រូវ​បាន​ត្រួតពិនិត្យ ឬ​មិន​គោរព​តាម​ស្តង់ដារ​អាហារ​នោះទេ»

លោក សុវិជាតិ  បានថ្លែង​ថា ជំហាន​ដំបូង​នៃ​ច្បាប់​គឺ​ធានា​សុវត្ថិភាព ហើយបន្ទាប់មកគឺ​ការ​លើក​កម្ពស់​គុណភាព​ដើម្បី​ទាក់ទាញ​ភ្ញៀវ​ទេសចរ។ លោកបានលើកឡើងពីភាពពេញនិយមនៃការលក់ដូរអាហារតាមដងផ្លូវក្នុងប្រទេសផ្សេងទៀត ដូចជាសិង្ហបុរី និងថៃ ដែលលោកថានេះជាអ្វីដែលកម្ពុជាកំពុងតែឈាននឹងសម្រេចបានដែរ។

លោក សុវិជាតិ បានបន្តទៀតថា អាជីវករលក់ដូរតាមផ្សារ និងតាមដងផ្លូវត្រូវប្រកាន់ខ្ជាប់នូវស្តង់ដារអនាម័យ រួមមានការលក់ដូរស្អាត ផលិតស្អាត ទីតាំងលក់ដូរថ្លៃថ្នូរ ស្អាត និងទាក់ទាញ។ លោកបន្ថែមថា ការរក្សាស្តង់ដារបែបនេះ នឹងធានាមិនត្រឹមតែសុវត្ថិភាពចំណីអាហារប៉ុណ្ណោះទេ ថែមទាំងអាចធ្វើភ្ញៀវមកទិញម្ហូបអាហារពួកគេម្តងទៀតផងដែរ។

យោងតាមច្បាប់ អ្នកលក់អាហារមានកាតព្វកិច្ចចម្បងក្នុងការធានាថាអាហារមានសុវត្ថិភាព គុណភាព និងសមស្របសម្រាប់មនុស្សទទួលទាន ក៏ដូចជាដោះស្រាយបញ្ហាសុវត្ថិភាពនៅពេលដែលវាកើតឡើង។

កាតព្វកិច្ចបែបនេះអាចត្រូវបានអនុវត្តជាមួយនឹងការផាកពិន័យយ៉ាងធ្ងន់ធ្ងរសម្រាប់អាជីវកម្មដែលបានរកឃើញថាបានរំលោភលើលក្ខខណ្ឌដែលមានចែងក្នុងច្បាប់នេះ។ ការពិន័យ គឺចាប់ពី ៥០០,០០០ ដល់ ៨,០០០,០០០ រៀល ឬប្រហែល ១២៣ ដុល្លារ ទៅ ១៩៧០ ដុល្លារ ហើយនឹងត្រូវដាក់លើអាជីវកម្មដែលដំណើរការដោយគ្មានអាជ្ញាបណ្ណត្រឹមត្រូវ ឬមិនអនុវត្តតាមវិធានអនាម័យដែលកំណត់ដោយមន្ត្រីសាធារណៈ។

លោក សុវិជាតិ បាននិយាយថា ក្រសួងពាណិជ្ជកម្ម និងអន្តរក្រសួង មានបទដ្ឋានគតិយុត្តិផ្សេងច្រើនរួចទៅហើយទាក់ទងនឹងរឿងសុវត្តិភាពម្ហូបអាហារនេះ ប៉ុន្តែមិនមានវិធានណាមួយដែលមានលក្ខណៈគ្រប់ដណ្តប់គ្រប់គ្រាន់ ដូចជាច្បាប់ដែលកំពុងរង់ចាំការឡាយព្រះហស្ថលេខាពីព្រះមហាក្សត្រនេះទេ។

បុរស​ម្នាក់​លក់​នំ​ខ្មែរ​ឱ្យអតិថិជន​នៅរាជធានី​ភ្នំពេញ នាថ្ងៃទី ១៩ ខែ ឧសភា ឆ្នាំ ២០២២។ ខេមបូចា/ ទ្រី ថានី

អ្នកស្រី អែឡ យ៉ារី អាជីវករលក់អាហារតាមដងផ្លូវដែលកំពុងមមាញឹកលក់ដូរជាមួយគ្រួសារនៅសង្កាត់ទួលស្វាយព្រៃ១ ខណ្ឌបឹងកេងកង បានប្រាប់ ខេមបូចា ថា សេចក្តីព្រាងច្បាប់នេះអាចជាមធ្យោបាយដ៏ល្អមួយដើម្បីការពារអ្នកទិញ ដោយត្រូវប្រាកដថាអាជីវករទាំងអស់ប្រុងប្រយ័ត្នក្នុងការថែរក្សាអនាម័យល្អ។ ទោះជាយ៉ាងណាក៏ដោយ អ្នកស្រីក៏មានការព្រួយបារម្ភពីវិធីដែលមន្រ្តីវាស់វែងពីស្តង់ដាអនាម័យ ដែលនឹងត្រូវបានអនុវត្តចំពោះអាជីវកម្មក្រៅផ្លូវការដូចជារបស់អ្នកស្រី។

អ្នកស្រី យ៉ារី អាយុ ៣៤ ឆ្នាំ ជា​ជនជាតិ​ខ្មែរ​ឥស្លាម​បាន​និយាយ​ថា អ្នកស្រី​បាន​លក់​អាហារ​តាម​ផ្លូវ​អស់​រយៈពេល ៥ ឆ្នាំ​មក​ហើយ។ អ្នកស្រី ងឿងឆ្ងល់ថា តើអាចមានអ្វីកើតឡើង ប្រសិនបើអ្នកត្រួតពិនិត្យអាហាររកឃើញភាពមិនប្រក្រតីណាមួយនៅតូបអ្នកស្រីនោះ។

អ្នកស្រី យ៉ារី បាននិយាយថា៖ «ខ្ញុំបារម្ភដែរ តែគ្រាន់ថា វាទាល់ហើយ និងធ្វើម៉េចបើយើងអត់មានកន្លែង (កន្លែងសមរម្យ)»។

តូបរបស់អ្នកស្រីស្ថិតនៅមុខ​វិហារ​ឥស្លាម​ដែល​កំពុង​ស្ថិត​ក្នុង​ដំណើរការ​សាងសង់។ នៅពេលដែលការសាងសង់ត្រូវបានបញ្ចប់នៅឆ្នាំក្រោយ យ៉ារី និយាយថាខ្លួននឹងសាងសង់តូបផ្លូវការបន្ថែមទៀត ដើម្បីងាយស្រួលលក់ឱ្យបានត្រឹមត្រូវ និងកាន់តែមានអនាម័យ។

អ្នកស្រី​បាន​បន្ថែម​ថា អ្នកស្រីបាន​លាង​សម្អាត និង​រក្សាទុក​បន្លែ និង​ត្រី​យ៉ាង​ត្រឹមត្រូវ​ ដោយ​​​ថាអ្នកស្រីតែងតែ​ទិញ​គ្រឿង​ផ្សំ​ថ្លៃៗ​ដែលមានអនាម័យសម្រាប់​អតិថិជន​របស់​គាត់។

អាជីវករ​ផ្សេង​ទៀត​ក្នុង​រាជធានី​ភ្នំពេញ​ក៏​បានលើកឡើងស្រដៀងអ្នកស្រីយ៉ារីដែរ ដោយថា ពួក​គេ​ស្វាគមន៍​ចំពោះ​ច្បាប់​ក្នុង​ការ​បង្កើត​ស្តង់ដារ​អនាម័យនេះ។

លោក សាញ់ ញឹម អាយុ៦៦ឆ្នាំ លក់នំខ្មែរធ្វើដោយដៃ តាមរយៈជិះកង់ដោយធ្វើដំណើរពីផ្សារកាប់គោ ដល់មុខសាលាឧទ្ធរណ៍។ បន្ទាប់ពីលក់​នំជូន​​អតិថិជន​មួយ​ចំនួន​នៅ​តាម​ផ្លូវហើយ លោក ញឹម ប្រាប់ ខេមបូចា ថា ច្បាប់​នេះ​អាច​ជួយ​ការពារ​សុខភាព​ពលរដ្ឋ​ខ្មែរ​។

លោក ​បាន​និយាយ​យ៉ាងខ្លីថា​៖ «ខ្ញុំ​ត្រូវ​តែ​អនុវត្ត​តាម​ច្បាប់ហ្នឹង»

លោក ញឹម បាននិយាយថា លោករីករាយក្នុងការអនុញ្ញាតឱ្យមន្ត្រីត្រួតពិនិត្យមើលនំរបស់លោក ដោយបន្ថែមថា លោកក៏ដឹងហើយដែរថាប្រសិនបើលោកលក់នំផ្អូមឱ្យអតិថិជន នោះអថិជននឹងមិនមកទិញរបស់លោកទៀតទេ។

អ្នកស្រី រស់ ផល្លី អាយុ ៣០ឆ្នាំ មានទីលំនៅខណ្ឌច្បារអំពៅ មានមុខរបរលក់ម្ជូរនៅមាត់ទន្លេក្បែរព្រះបរមរាជវាំងជាង១០ឆ្នាំមកហើយ។ អ្នកស្រី បានប្រាប់ ខេមបូចា ថាអ្នកស្រីសាទរចំពោះការអនុម័តសេចក្តីព្រាងច្បាប់នេះ។

អ្នកស្រីផល្លី​បាន​និយាយ​ថា​៖ «​ខ្ញុំ​ហ៊ាន​ឱ្យគេ​ត្រួតពិនិត្យ ​គឺ​គ្រាន់តែ​ថា​ខ្ញុំ​មិន​លក់​ [​អាហារ​] ដែល​មិនល្អ​ទេ​។ អាហារ​ដែល​ខ្ញុំ​លក់​មាន​អនាម័យ និង​ខ្ចប់​ត្រឹមត្រូវ​»​

លោក ម៉ម រិទ្ធី ប្រធាន​សហព័ន្ធ​សហជីពវិស័យ​ទេសចរណ៍ និង​សេវាកម្ម​កម្ពុជា ប្រាប់ ខេមបូចា ថា លោក​មើល​ឃើញថា​ច្បាប់​នេះ​​ល្អ។

លោក រិទ្ធី បាន​និយាយ​ថា​៖ «ខ្ញុំយល់ថាវាយឺតពេល​» ដោយ​លើកឡើងពី​ការ​រង់ចាំ​យ៉ាង​យូរ​ពី​ការ​រៀបចំ​ច្បាប់នេះដោយ​ក្រសួង​ពាណិជ្ជកម្ម​រហូតមកដល់ដំណាក់កាលនេះ។ ទោះយ៉ាងណាលោកបន្ថែមថា៖ «ប៉ុន្តែ​ឥឡូវ​នេះ​វា​បាន​ចាប់​ផ្តើម​ហើយ ខ្ញុំ​សូម​អបអរ​សាទរ​ចំពោះ​ការ​អនុម័ត​ច្បាប់​នេះ ហើយ​ខ្ញុំ​សង្ឃឹម​ថា​យើង​នឹង​ចាប់​ផ្តើម​អនុវត្ត​វា»

លោក រិទ្ធី បញ្ជាក់​ថា ការ​អនុម័ត​ច្បាប់​នេះ​យឺត​ពេល​ បើ​ធៀប​នឹង​ច្បាប់​ស្រដៀង​គ្នា​ក្នុងបណ្តា​ប្រទេស​នៅតំបន់អាស៊ាន​ផ្សេង​ទៀត។ ទន្ទឹម​នឹងនេះ លោក ក៏ជឿថាអ្នកលក់ដូរតាមដងផ្លូវជាច្រើននៅក្នុងប្រទេសកម្ពុជានៅតែបន្តលក់ដូរម្ហូបអាហារដែលមានស្តង់ដានិងអនាម័យទាប។

លោក​បន្ថែម​ថា ការ​នាំ​ចូល​ម្ហូប​អាហារ ជា​ពិសេស​ពី​ប្រទេស​វៀតណាម ក៏​ត្រូវតែត្រួត​ពិនិត្យ​មើល​ផង​ដែរ ដើម្បី​ធានាសុវត្ថិភាព។ ចំពោះ​បញ្ហា​នោះ លោក​ជំរុញ​ឲ្យ​ថ្នាក់​ដឹកនាំ​អនុវត្ត​ច្បាប់​ឱ្យ​បាន​ម៉ឺងម៉ាត់ ដោយ​លោក​ថា​មិន​ត្រូវ​មាន​អំពើ​ពុករលួយ ឬ​ស៊ីសំណូក​នៅ​តាម​ព្រំដែន​ឡើយ។

លោក បានលើកឡើងថា៖ «ដូច្នេះ ទាំងការអនុវត្តក្នុងស្រុក និងនាំចូលត្រូវតែអនុវត្តយ៉ាងតឹងរ៉ឹង និងមិនពុករលួយ។ កុំ​អនុវត្ត​ច្បាប់​ចំពោះ​តែ​អ្នកក្រ អ្នកតូច​ទាប ឬ​អ្នក​ទន់ខ្សោយ ហើយ​មិន​អនុវត្ត​ចំពោះ​អ្នក​មាន​អំណាច ឬ​អ្នក​មាន»

លោកបានបន្ថែមថា រដ្ឋគួរតែ «ព្យាយាមធ្វើវាឱ្យដូចភ្លៀងរលឹម»  ដោយការអនុវត្តជាប់លាប់ និងយូរអង្វែង ផ្ទុយពី «ភ្លើងចំបើង» ដែលឆេះយ៉ាងឆាប់រហ័ស និងគ្មានដានអ្វីឡើយ។

ស្ត្រីម្នាក់ទិញបន្លែនៅផ្សារមួយក្នុងរាជធានីភ្នំពេញ នាថ្ងៃទី២៣ ខែឧសភា ឆ្នាំ២០២២។ ខេមបូចា/ ព្រីង សំរាំង

លោក រិទ្ធី មានប្រសាសន៍ថា ជារួមលោកបានឃើញវិស័យជាច្រើនដែលការអនុវត្តច្បាប់មានបញ្ហា ដោយផ្តល់នូវឧទាហរណ៍មួយជុំវិញការត្រួតពិនិត្យគ្មានប្រសិទ្ធភាពរបស់និយោជកដែលបំពានច្បាប់ការងារ។

អ្នកនាំពាក្យក្រសួងពាណិជ្ជកម្ម លោក សុវិជាតិ មានប្រសាសន៍ថា ទោះបីជារដ្ឋាភិបាលមិនអាចធានាប្រសិទ្ធភាព បាន១០០ ភាគរយក្នុងការអនុវត្តច្បាប់ក្នុងពេលដំបូងៗក៏ដោយ ក៏មន្ត្រីសង្ឃឹមថា វានឹងក្លាយជាឧបករណ៍ដ៏សំខាន់មួយដែលសង្គមកម្ពុជាអាចវិនិច្ឆ័យសុវត្ថិភាពចំណីអាហារ និងស្តង់ដារអាជីវកម្មម្ហូបអាហារបាន។

លោកបន្ថែមថា អាជីវករ ក៏ដូចជាសាធារណជនទូទៅ និងមន្ត្រីអនុវត្តច្បាប់ អាចធ្វើការរួមគ្នាដើម្បីធានាថា ច្បាប់នេះត្រូវបានអនុវត្តយ៉ាងត្រឹមត្រូវ។

លោក រិទ្ធី នៅ​តែ​មាន​ការ​រំពឹង​ទុក​ទាប​ចំពោះ​ការ​អនុវត្ត​ច្បាប់​នេះ​ឱ្យ​បាន​ល្អ ដោយ​លោក​ថាបញ្ហា គឺ​មន្ត្រី​ពុករលួយ និង​បក្សពួកនឹងនៅតែបន្តមានដូចពីមុន។

លោក​បានបន្ថែម​ថា​៖ «​ប្រសិន​បើ​យើង​ចង់​ឱ្យមាន​ភ្ញៀវ​ទេសចរ​កាន់​តែ​ច្រើន និង​ដើម្បី​ឱ្យអាហារ​របស់​យើង​ទទួល​ស្គាល់ពីថ្នាក់​ជាតិ និង​អន្តរជាតិ ច្បាប់​ត្រូវ​តែ​អនុវត្ត​ឱ្យបាន​ត្រឹម​ត្រូវ»

ប្រែសម្រួលពីអត្ថបទភាសាអង់គ្លេស៖ Legislature passes long-awaited food safety bill hoped to improve street vending

294 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម