អាជ្ញាធរភ្នំពេញផ្តល់ពេលមួយសប្តាហ៍ឲ្យពលរដ្ឋរស់នៅលើផ្ទះបណ្តែតទឹក ដើម្បីរុះរើចេញពីផ្ទៃទន្លេ

ក្មេងៗលេងទឹកក្នុងទន្លេសាបជិតផ្ទះទូក ក្នុងក្រុងភ្នំពេញ កាលពីថ្ងៃទី០២ ខែមិថុនា ឆ្នាំ២០២១។ ខេមបូចា/ ព្រីង សំរាំង
ក្មេងៗលេងទឹកក្នុងទន្លេសាបជិតផ្ទះទូក ក្នុងក្រុងភ្នំពេញ កាលពីថ្ងៃទី០២ ខែមិថុនា ឆ្នាំ២០២១។ ខេមបូចា/ ព្រីង សំរាំង

សាលារាជធានី​ភ្នំពេញ​បាន​បញ្ជា ​ឲ្យ​ពលរដ្ឋ​រស់នៅ​តាម​ផ្ទះ​បណ្តែត​ទឹក​ នៅលើ​ផ្ទៃទន្លេ និង​សំណង់​មិនរៀបរយទាំងអស់​តាម​បណ្តាយ​ទន្លេ​នៅ​រាជធានី​ភ្នំពេញ រុះរើ​ចេញដោយ​​លើកឡើង​ពី​បញ្ហា​បរិស្ថាន។ ​​​

​សេចក្តីជូន​ដំណឹង​ចុះ​កាល​ពី​ថ្ងៃ​ទី០២ ខែ​មិថុនា​ បាន​អះអាង​ថា បែចិញ្ចឹមត្រី ផ្ទះ​បណ្តែត​ទឹក ផ្ទះ​ទូកតូចៗ និង​សំណង់មិនរៀបរយ​លើ​ផ្ទៃ​ទន្លេ កំពុង​បង្ក​ការ​បំពុល​ទឹក និង​ប៉ះពាល់​ដល់​ប្រព័ន្ធ​អេកូឡូហ្ស៊ី។

​សេចក្តីជូន​ដំណឹង​​បាន​សរសេរ​​ថា៖ «ដើម្បី​រក្សា​បរិស្ថាន ជីវៈចម្រុះ គុណភាព​ទឹក  រដ្ឋបាល​រាជធានី​ភ្នំពេញ​តម្រូវ​ម្ចាស់​បែចិញ្ចឹមត្រី ផ្ទះ​បណ្តែត​ទឹក​ ម្ចាស់ផ្ទះ​តូចៗ និង​ម្ចាស់​សំណង់​មិន​រៀបរយ​នៅ​លើ​ផ្ទៃ​ទន្លេ​ទាំងអស់​ ត្រូវ​រុះរើ ឬ​ចល័ត​ចេញ​ជា​បន្ទាន់ ដោយ​ទុករយៈ​ពេល​មួយ​​សប្តាហ៍​គិត​ចាប់​ពី​កាលបរិច្ឆេទ​ចេញ​សេចក្តីជូនដំណឹង​នេះ​ត​ទៅ»។

សេចក្តីជូនដំណឹង​បាន​បន្ថែម​ថា៖ «ផុត​រយៈពេល​នេះ រដ្ឋបាល​រាជធានី​ភ្នំពេញ​នឹង​​ ចាត់​វិធានការ​ រដ្ឋបាល ​ដោយ​ពុំ​ទទួលខុសត្រូវ​រាល់ការ​ខូចខាត ឬ​ការ​បាត់បង់​ណា​មួយ​ឡើយ ហើយ​ក្នុង​ករណី​រឹងរូស​អាជ្ញាធរ​មូល ដ្ឋាន​ និង​មន្រ្តី​ជំនាញ​នឹង​កសាង​សំណុំ​រឿង​បញ្ជូន​ទៅ​តុលាការ​តាម​ផ្លូវ​ច្បាប់»។

​លោក ម៉េត មាសភក្តី អ្នកនាំពាក្យ​សាលារាជធានី​ភ្នំពេញ មិន​អាច​ទាក់ទង​សុំអត្ថាធិប្បាយបាន​ទេ។

​អភិបាល​ខណ្ឌ​ជ្រោយចង្វារ ​លោក ឃ្លាំង ហួត បាន​និយាយ​ថា អាជ្ញាធរ​មិន​ទាន់​ជូន​ដំណឹង​ដល់​ពលរដ្ឋ​រស់​តាម​ផ្ទះ​ បណ្តែត​ទឹក​ក្នុង​ខណ្ឌ​របស់​លោក​នៅ​ឡើយ​ទេ ប៉ុន្តែ​ឥឡូវ​នេះ កំពុង​ពិចារណា​កន្លែង​​ស្នាក់​នៅ​លើ​ដី​ថ្មី​សម្រាប់ពលរដ្ឋ​ទាំងនោះ។

​លោក​បាន​ថ្លែង​ថា៖ «ខ្ញុំ​គិត​ថា សាលាក្រុង​នឹង​រៀបចំ​កន្លែង​លើ​ដី​មួយ​សម្រាប់​ពួកគាត់ ប៉ុន្តែ​ខ្ញុំ​ មិនអាច​ជូន​សេចក្តីលម្អិត​បាន​នោះ​ទេ ពីព្រោះ​អាជ្ញាធរ​ខណ្ឌ​កំពុង​រង់ចាំ​សេចក្តីណែនាំ​ពី​សាលាក្រុង»។

​លោក​ ឃ្លាំង ហួត បាន​និយាយ​ថា ដំណើរការ​នៃ​ការ​ផ្លាស់ប្តូរ​ទីលំនៅ​គឺ​ ស្រដៀង​នឹង​នៅ​ខេត្ត​កំពង់ឆ្នាំង ជា​ទី​ដែល​អាជ្ញាធរ​បាន​រៀបចំ​ផ្លាស់ទី​លំនៅ​ដល់​ពលរដ្ឋ​រស់​នៅ​លើ​ផ្ទៃ​ទន្លេសាប ក្នុង​កិច្ចប្រឹងប្រែង​ដើម្បី​កាត់បន្ថយ​ការ​បំពុល​ទឹក។ លោក​ បាន​និយាយ​ថា នៅ​ខណ្ឌ​ជ្រោយ​ចង្វារ អាជ្ញាធរ​ស្រង់​ស្ថិតិ​ចំនួន​អ្នកដែល​រស់​នៅ​លើ​ផ្ទៃ​ទឹក​ដើម្បី​កំណត់​​ចំនួន​ពិតប្រាកដ។

​​ក្នុង​ចំណោម​នោះ​ក៏មាន​​អ្នកស្រី ង្វៀន ធីវ៉ា​ ផង​ដែរ។ ស្រ្តី​វ័យ​ ៦៨​ឆ្នាំ​រូប​នេះ​កំពុង​អង្គុយ​នៅ ​ជ្រុង​មួយ​នៃ​ផ្ទះ​បណ្តែត​របស់​អ្នកស្រី​នៅ​លើ​ដង​ទន្លេសាប​នៅ​ក្នុង​ខណ្ឌ​ជ្រោយ​ចង្វារ ហើយ​បាន​ប្រាប់ ខេមបូចា ថាអ្នកស្រី​បាន​រស់​នៅ​ផ្ទះ​បណ្តែត​នេះ​អស់​រយៈពេល ៣០​ឆ្នាំ​មក​ហើយ។ ប៉ុន្តែ​អ្នកស្រី​មិន​ទាន់​ទទួល​បាន​សេចក្តីជូន​ដំណឹង​ណា​មួយ​ដើម្បី​ឲ្យ​ចាកចេញ​នៅ​ឡើយ​ទេ។

​អ្នកស្រី​បាន​និយាយ​ថា៖ «ខ្ញុំ​មិនដឹង​ថា នឹង​ទៅ​កន្លែង​ណា ប្រសិន​បើ​គេតម្រូវ​ឲ្យ​ចាកចេញ​ពី​នេះ​។ ខ្ញុំ​ក៏​មិន​ដឹង​ថា តើ​គេ​មាន​កន្លែង​សម្រាប់​យើង​ឬ​ទេ ហើយ​ឥឡូវ​នេះ ខ្ញុំ​មិន​ដឹង​ ហើយ​កំពុង​រង់ចាំ​មើល​ថា ស្ថានភាព​​នឹង​ទៅ​ជា​យ៉ាងណា​»។

​ទោះបីយ៉ាងណា​ក៏ដោយ អ្នកស្រី​ ធីវ៉ា ដែល​មាន​សមាជិក​គ្រួសារ​ចំនួន​ប្រាំបី​នាក់ បាន​និយាយ​ថា អ្នកស្រី​នឹង​មិន​ជំទាស់​នឹង​អាជ្ញាធរ​នោះ​ទេ។

​អ្នកស្រី​បាន​និយាយ​ថា៖ «យើង​រស់​នៅ​នេះ​ ដោយ​ពឹង​លើ​ការ​រក​ត្រី ប៉ុន្តែ​យើង​បាន​ឈប់​អស់​ជិត​ប្រាំ​ឆ្នាំ​មក​ហើយ ដោយសារ​មិន​មាន​ត្រី​ទៀត។ ឥឡូវ​នេះ កូនៗ​របស់​ខ្ញុំ​ទៅ​ធ្វើការ​ជា​កម្មករ​បូម​ខ្សាច់»។ ដោយបន្ថែមថា៖ «ខ្ញុំ​មិន​ចង់​រស់​នៅ​លើ​ទឹក​នោះ​ទេ ដោយសារ​តែ​វា​លំបាក​ ព្រោះ​មិន​អាច​នេសាទ​បាន។ យើង​ខ្លាច​ នៅ​ពេល​មាន​ព្យុះ ឬ​ភ្លៀង​ធ្លាក់​ខ្លាំង ជាពិសេស​នៅ​ពេល​យប់»។

ទន្លេសាប​ និង​ទន្លេ​មេគង្គ​នៅ​ក្រុង​ភ្នំពេញ បាន​ក្លាយ​ជា​កន្លែង​ទីសំចត​នៃ​ទូកនេសាទ និង​ផ្ទះ​បណ្តែង​ទឹក​ ចំនួន​រាប់រយ អស់​រយៈពេល​ជាច្រើន​ឆ្នាំ​មក​ហើយ ដោយ​បង្ក​ឲ្យ​មាន​ការ​ព្រួយបារម្ភ​ពី​ការ​បំពុល​ទឹក។ ទោះបីយ៉ាងណា​ក៏​ដោយ ផ្ទះ​បណ្តែត​ទឹក​មិនមែន​​ជា​កត្តា​ប៉ះពាល់​តែ​មួយ​នោះ​ទេ​នៅ​លើ​ប្រព័ន្ធ​ទន្លេ ខណៈផ្នែក​មួយ​ចំនួន​នៃទន្លេមេគង្គ​នៅ​​តំបន់​កោះ​នរា​ និង​ភូមិ​អរិយក្សត្រ​ នៅ​ជ្រោយ​ម្ខាង​ទៀត​ ក្នុង​ខេត្ត​កណ្តាល កំពុង​ត្រូវ​បាន​ចាក់​ខ្សាច់​បំពេញ​ក្នុង​ទ្រង់ទ្រាយ​ធំ​ ដើម្បី​ត្រួសត្រាយ​ផ្លូវ​សម្រាប់​​គម្រោង ​ទីក្រុង​រណប​ ដែល​មាន​តម្លៃ​រាប់រយ​លានដុល្លារ ហើយអ្នក​ជំនាញ​ផ្នែក​បរិស្ថាន​បាន​និយាយ​ថា ការ​ចាក់បំពេញ​នឹង​ទំនង​បង្ក​ផល​ប៉ះពាល់​មក​លើ​លំហូរ​របស់​ទន្លេ និង​ប្រព័ន្ធ​អេកូឡូហ្ស៊ី។

ផ្ទះ​បណ្តែត​ទឹក​នៅ​លើ​ដង​ទន្លេសាប​ក្នុង​ក្រុង​ភ្នំពេញ​កាល​ពី​ថ្ងៃ​ទី០២ ខែ​មិថុនា ឆ្នាំ​២០២១។ ខេមបូចា/ ព្រីង សំរាំង
ផ្ទះ​បណ្តែត​ទឹក​នៅ​លើ​ដង​ទន្លេសាប​ក្នុង​ក្រុង​ភ្នំពេញ​កាល​ពី​ថ្ងៃ​ទី០២ ខែ​មិថុនា ឆ្នាំ​២០២១។ ខេមបូចា/ ព្រីង សំរាំង

​លោក អូត ឡាទីន អ្នកសម្របសម្រួល​គម្រោង​ប្រចាំ​អង្គការ​បណ្តាញ​យុវជន​កម្ពុជា ដែល​ធ្វើការ​លើ​ការ​ការពារ​បរិស្ថាន​ និង​សិទ្ធិ​មនុស្ស បាន​ស្វាគមន៍​វិធានការ​របស់​មន្រ្តី​ពាក់ព័ន្ធ​នៅ​ក្នុង​ការ​រុះរើ​ផ្ទះ​បណ្តែត​ទឹក។

​លោក​បាន​និយាយ​ថា៖ «ការ​កាពារ​បរិស្ថាន​គឺ​ជា​រឿង​​ចាំបាច់ ដោយ​សារតែ​​ពលរដ្ឋ​ទាំងអស់​ នៅ​ទីក្រុង​ពឹង ផ្អែក​លើ​ទន្លេ​សម្រាប់​ការ​ប្រើប្រាស់​ប្រចាំ​ថ្ងៃ និង​ការ​នេសាទ។ ប៉ុន្តែ​អាជ្ញាធរគួរ​តែ​អប់រំ​អ្នក​​នៅ​រស់​លើ​ដី​ តាម​បណ្តោយ​ទន្លេ កុំ​ឲ្យ​ចាក់សំរាម​ចូល​ក្នុង​ទន្លេ​ផងដែរ»។

​ខណៈ​លោក​គាំទ្រ​ចំពោះ​ការ​លើកឡើង​ពី​ការ​ការពារ​បរិស្ថាន លោក​ឡាទីន បាន​និយាយ​ថា អាជ្ញាធរ​ត្រូវ​ធានា​ថា អ្នក​ដែល​​រស់​នៅ​ផ្ទះ​បណ្តែត​ទឹក​មិន​គួរ​ត្រូវ​មើល​រំលង​នោះ​ទេ ពីព្រោះ​ការ​រុះរើ​កន្លែង​ស្នាក់ ​អាស្រ័យ​នឹង​បង្ក​ជា​បញ្ហា​ចោទ​ទៅ​លើ​ជីវភាព​របស់​ពួកគេ។ ​

លោក​បាន​និយាយ​ថា៖ «ដើម្បី​ធានា​សិទ្ធិ​រស់​នៅ​ អាជ្ញាធរ​ត្រូវ​យកចិត្ត​ទុកដាក់​លើ​ពួកគាត់ ក៏ដូចជា ជួយ​ពួកគាត់​ក្នុង​ការ​ផ្លាស់​ទីលំនៅ»។

សម្រាប់​អ្នក​រស់នៅលើផ្ទះបណ្តែត​ទឹក​មួយ​ចំនួន​រស់​នៅ​ក្នុង​សហគមន៍​បណ្តែត​ទឹក ពួកគេ​បាន​ប្រកបរបរ​នៅ ​លើ​ដី​គោក​រួច​ស្រាប់​ទៅ​ហើយ។

​អ្នកស្រី សូ សុខហឿន អ្នក​រស់នៅលើផ្ទះបណ្តែតទឹក​ម្នាក់ទៀត ​​ក្នុង​ខណ្ឌ​ជ្រោយចង្វារ បាន​ប្រាប់ ខេមបូចា ថាសមាជិក​គ្រួសារ​ ០៥​នាក់​របស់​អ្នកស្រី​បាន​រស់​នៅ​ផ្ទះ​បណ្តែត​ទឹក​ ចាប់​តាំង​ពី​ឆ្នាំ ២០០០​មក។ ប៉ុន្តែ​ទោះបីជា ពួកគេ​រស់នៅ​លើ​ទឹក គ្រួសារ​របស់​អ្នកស្រី​មិនបាន​ពឹងផ្អែក​លើ​ការ​នេសាទ​សម្រាប់​ជីវភាព​ប្រចាំ​ថ្ងៃ​នោះ​ទេ។

អ្នកស្រី ​សុខហឿន វ័យ៥០​ឆ្នាំ បាន​និយាយ​ថា គ្រួសារ​របស់​អ្នកស្រី និង​គ្រួសារ​ដទៃ​ទៀត​ ពី​មុន​មក​ធ្លាប់​ទទួល​បាន​ការ​ជូន​ដំណឹង​ពី​គម្រោង​អភិវឌ្ឍន៍ OCIC ដែល​កំពុង​អភិវឌ្ឍ​អចលនទ្រព្យ ​នៅ​តាម​បណ្តោយ​ច្រាំង​ទន្លេ ជា​ទី​ដែល​ផ្ទះ​បណ្តែត​ទឹក​របស់​អ្នកស្រី​តាំងនៅ។

​អ្នកស្រី​បាន​និយាយ​ថា៖ «ខ្ញុំ​បាន​រស់​នៅ​ទី​នេះ​ជា​យូរ​មក​ហើយ​ ប្រហែល២០​ឆ្នាំ​ហើយ ហើយ​យើង​មិនដឹង​ថា ត្រូវ​ទៅ​ណា​ទេ។ ប្រសិន​បើ​គេ​ចង់​ឲ្យ​យើង​ចាកចេញ យើង​នឹង​ស្នើ​ឲ្យ​អាជ្ញាធរ​ស្វែងរក​កន្លែង ​លើ​ដី​គោក​មួយ ​សម្រាប់​ពួកយើង»។

អ្នកស្រី​ សុខហឿន ក៏​ដូចជា អ្នករស់​នៅ​លើ​ផ្ទះ​បណ្តែត​ទឹក​ដទៃ​ទៀត មិន​ចង់​រស់​នៅ​លើ​ទឹក​នោះ​ទេ ដោយលើកឡើង​ពី​ការ​ព្រួយបារម្ភ​ពី​សុវត្ថិភាព​បង្កឡើង​ដោយ​អាកាសធាតុ។

​អ្នកស្រី​បាន​ថ្លែង​ថា៖ «វា​គ្រោះថ្នាក់​ណាស់​នៅ​ពេល​មាន​ភ្លៀង និង​ខ្យល់​ខ្លាំង ពេលខ្លះ​ដាច់ខ្សែ ហើយ​ អូស​ផ្ទះ​ចេញ​ឆ្ងាយ​ពី​កន្លែង​ដើម។ ប៉ុន្តែ​យើង​មិនមាន​ជម្រើស ដោយសារ​យើង​ មិនមាន​កន្លែង​មួយ​ទៀត​នៅ​លើ​ដី»

ប្រែសម្រួលពីអត្ថបទភាសាអង់គ្លេស៖ Floating home residents get one-week notice to leave river dwellings in Phnom Penh

234 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »