នៅតំបន់សងខាងទន្លេស្រែពក នាខេត្តមណ្ឌលគិរី និងរតនគិរី ប្រជាពលរដ្ឋជនជាតិដើមភាគតិចជាង ៤.០០០ គ្រួសារ កំពុងប្រឈមមុខនឹងការបង្ខំឱ្យផ្លាស់ទីលំនៅ ដើម្បីបើកផ្លូវសម្រាប់គម្រោងសាងសង់ទំនប់វារីអគ្គិសនីស្រែពកក្រោម ៣ ដែលមានផ្ទៃអាងស្តុកទឹកទំហំជិត ៧ម៉ឺនហិកតារ ។ ផលប៉ះពាល់ផ្ទាល់ រួមមានការបាត់បង់ផ្ទះសម្បែង ដីស្រែចម្ការ សាលារៀន វត្តវ៉ា និងផ្នូរដូនតា ជាដើម ។
ពលរដ្ឋភាគច្រើនមានជីវភាពពឹងផ្អែកលើការប្រកបរបរកសិកម្ម និងការនេសាទតាមដងទន្លេស្រែពក ។ ការបោត់បង់ទីលំនៅដើមនឹងបំផ្លាញភាពសុខសាន្តននៃការរស់នៅ និងវប្បធម៌របស់ពួកគាត់ ។ ក្រុមប្រជាពលរដ្ឋជនជាតិដើមភាគតិច បង្ហាញជំហរឥតងាករេថា នឹងបន្តការរស់នៅក្នុងភូមិឋានបច្ចុប្បន្នរបស់ពួកគាត់តទៅទៀត ។ ពលរដ្ឋជាច្រើនបានរាយការណ៍អំពីការបំពានសិទ្ធិ ដូចជាការបំភិតបំភ័យ និងការបង្ខំឱ្យទទួលយកកិច្ចព្រមព្រៀងមិនសមស្រប ជាថ្នូរនឹងការចាកចេញ ។
គម្រោងវារីអគ្គិសនីស្រែពកក្រោម ៣ ជាទំនប់ទី២១ នាអាងទន្លេ ៣ ( 3S ) ដែលមានទន្លេសេសាន ទន្លេស្រែពក និងទន្លេសេកុង ។ ទន្លេទាំងនេះបានផ្គត់ផ្គង់ ២០% នៃលំហូរប្រចាំឆ្នាំរបស់ទន្លេមេគង្គ ដែលជំរុញឱ្យមានចរន្តទឹកជំនន់ ជាជម្រកសំខាន់នៃពពួកមច្ឆាជាតិ និងផ្ដល់ល្បាប់មានជីជាតិដល់ដីស្រែចម្ការ ដែលប្រជាពលរដ្ឋរាប់លាននាក់ផ្ញើខ្សែជីវិត ។ ក្រុមអ្នកស្រាវជ្រាវផ្នែកជលសាស្ត្រអះអាងថា ការសាងសង់ទំនប់កាត់ដងទន្លេទាំងនេះ បានបំផ្លាញចង្វាក់ធម្មជាតិនៃប្រព័ន្ធទន្លេមេគង្គ ។
