យុវជនមួយចំនួនត្រូវបានឃាត់ខ្លួន មួយចំនួនត្រូវបានបញ្ជូនទៅពន្ធនាគារ ក្រោមបទ “រួមគំនិតក្បត់” និងបទ “ញុះញង់” ហើយយុវជនខ្លះទៀតត្រូវបានគ្រួសារប្រកាសថាបាត់ខ្លួន ខណៈវិធានការបស់រដ្ឋាភិបាលក្នុងការរឹតបន្តឹង និងទប់ស្កាត់គម្រោងបាតុកម្មប្រឆាំងនឹងកិច្ចព្រមព្រៀងតំបន់ត្រីកោណអភិវឌ្ឍន៍ កម្ពុជា លាវ និងវៀតណាម (CLV-DTA) នៅតែបន្ត ចាប់តាំងពីថ្ងៃទី១៧ ខែសីហា ។
ក្រុមអង្គការសង្គមស៊ីវិល ក៏ដូចជាអ្នកការពារសិទ្ធិមនុស្ស ជាតិ និងអន្តរជាតិ កំពុងតាមដានឃ្លាំមើលករណីនេះយ៉ាងយកចិត្តទុកដាក់ ។
នៅថ្ងៃពុធ ទី២៨ ខែសីហា អង្គការឃ្លាំមើលសិទ្ធិមនុស្ស Human Rights Watch និងអង្គការលើកលែងទោសអន្តរជាតិ Amnesty International បានបញ្ចេញរបាយការណ៍មួយថា អាជ្ញាធរកម្ពុជាបានចាប់ខ្លួនមនុស្សយ៉ាងតិច ៩៤នាក់ ចាប់តាំងពីចុងខែកក្កដា ឆ្នាំ២០២៤ ទាក់ទិននឹងការរិះគន់ជាសាធារណៈ ចំពោះកិច្ចព្រមព្រៀងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV) ។ របាយការណ៍ដដែលអះអាងថា យ៉ាងហោចណាស់ ៥៩នាក់ក្នុង
ចំណោមអ្នកដែលត្រូវបានចាប់ខ្លួន រួមមានសកម្មជនបរិស្ថាន សកម្មជនសិទ្ធិមនុស្ស និងសកម្មជនផ្សេងទៀត ព្រមទាំងយុវជនមួយចំនួនផង ត្រូវបានឃុំខ្លួនដោយខុសច្បាប់ និងរងនូវបទចោទផ្សេងៗ ដោយសារតែការបញ្ចេញមតិដោយសន្តិវិធីរបស់ពួកគេ ។ អង្គការសិទ្ធិមនុស្សទាំងពីរថា អាជ្ញាធរគួរតែទម្លាក់ចោលរាល់បទចោទជាបន្ទាន់ ព្រោះគ្មានអន្តរជាតិណាទទួលស្គាល់ឡើយ ។
ទោះយ៉ាងណាក្ដី អគ្គស្នងការរង និងជាអ្នកនាំពាក្យនៃអគ្គស្នងការដ្ឋាននគរបាលជាតិ លោក ឆាយ គឹមខឿន បានបដិសេធតួលេខ ដែលរកឃើញដោយ អង្គការឃ្លាំមើលសិទ្ធិមនុស្ស (Human Rights Watch) និងអង្គការលើកលែងទោសអន្តរជាតិ (Amnesty International) ៕
