ក្រសួងសុខាភិបាល បានសហការជាមួយអាជ្ញាធររាជធានីខេត្ត ចាប់ផ្ដើមយុទ្ធនាការបាញ់ថ្នាំសម្លាប់មូស ដើម្បីទប់ស្កាត់ ក៏ដូចជាបង្ការនិងកាត់បន្ថយអត្រាមរណៈដោយសារជំងឺគ្រុនឈាម មុនរដូវវស្សាឈានចូលមកដល់ ។
នៅរាជធានីភ្នំពេញ រដ្ឋបាលរាជធានីភ្នំពេញ រួមជាមួយមន្ទីរសុខាភិបាលរាជធានីភ្នំពេញ និងដោយមានកិច្ចសហការពីសំណាក់កងពលតូចលេខ៧០ បានបើកយុទ្ធនាការបាញ់ថ្នាំសម្លាប់មូស កាលពីចុងខែកុម្ភៈ ឆ្នាំ២០២៤ ដោយចាប់ផ្ដើមពីខណ្ឌដង្កោ ខណ្ឌមានជ័យ ខណ្ឌពោធិ៍សែនជ័យ ខណ្ឌកំបូល និងខណ្ឌសែនសុខ ។
យោងតាមរបាយការណ៍របស់កម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ ក្នុងឆ្នាំ២០២៣ ជំងឺគ្រុនឈាមសរុបចំនួន ១៦.១៤០ករណី ត្រូវនឹងអាង់ស៊ីដង់ ៦៣,២/១០០នាក់ គឺកើនឡើងជាងពីរដងបើប្រៀបធៀបទៅនឹងឆ្នាំ២០២២ ដែលមាន ៦.១៤០ករណី ក្នុងរយៈពេលដូចគ្នា ។ ស្លាប់ចំនួន ៣២នាក់ ប្រុស ២៤នាក់ ស្រី ៨នាក់ ។
