កម្មករជាង១៦០០នាក់ មកពីរោងចក្រកាត់ដេរចំនួន២០៦ ឆ្លងជំងឺកូវីដ១៩

មន្ត្រីសុខាភិបាលកំពុងយកសំណាកកម្មករនៅសហគ្រាស ឌីន ហាន សម្រាប់ធ្វើតេស្តកូវីដ១៩ បន្ទាប់ពីកម្មករជាច្រើនមានវិជ្ជមានកូវីដ១៩ ថ្ងៃទី៨ ខែមសា ឆ្នាំ២០២១។ បញ្ញា ឆព័ណ្ណ
មន្ត្រីសុខាភិបាលកំពុងយកសំណាកកម្មករនៅសហគ្រាស ឌីន ហាន សម្រាប់ធ្វើតេស្តកូវីដ១៩ បន្ទាប់ពីកម្មករជាច្រើនមានវិជ្ជមានកូវីដ១៩ ថ្ងៃទី៨ ខែមសា ឆ្នាំ២០២១។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

យោងតាម​មន្ត្រីជាន់ខ្ពស់ក្រ​សួង​ការងារ​បានឲ្យដឹងថា កម្មករ​រោងចក្រ​កាត់​ដេរ​ឆ្លងជំងឺ​កូវីដ១៩​​ មានចំនួន​ច្រើន​​ក្នុង​ចំណោម​ករណី​ឆ្លងសរុប​​នៅ​កម្ពុជា ដោយ​គិត​មក​ដល់ពេល​នេះ​មានកម្មករឆ្លងចំនួន ​១ ៦៧៣​នាក់ មក​ពី​រោង​ចក្រ​ចំនួន២០៦ ​ចាប់តាំង​ពី​ការ​ផ្ទុះ​រាល​ដាល​ក្នុង​ព្រឹត្តិ​ការណ៍សហគមន៍​​២០ កុម្ភៈ។ បន្ថែម​ពី​នេះ​កម្មករ​ជាង​១៧ ០០០​នាក់​ផ្សេង​ទៀត​កំពុង​ជាប់​ធ្វើ​ចត្តាឡីស័ក និង​តាម​ដាន​សុខភាព​បន្ទាប់ពី​បាន​ប៉ះពាល់​ផ្ទាល់ជា​មួយ​អ្នកវិជ្ជមាន​កូវីដ១៩​។​

អ្នកនាំពាក្យ​ក្រ​សួង​ការ​ងារ ​លោក ហេង សួរ មាន​ប្រ​សាសន៍ថា៖ «យ៉ាងណា ចំនួន​នេះ​អាច​កើន​ឡើង ឬ​ប្រែប្រួល ព្រោះ​ពេលនេះ​នៅ​ស្រុក​អង្គស្នួល​ ខេត្ត​កណ្ដាល យើង​កំពុង​ធ្វើ​តេស្ត និង​កំពុង​ស្វែង​រក​​អ្នក​ប៉ះពាល់​ផ្ទាល់[​ជាមួយ​កម្មករវិជ្ជមានកូវីដ១៩] មក​ធ្វើ​តេសត្ត​បន្ត»។  លោក ហេង សួរ បាន​ផ្ដល់ទិន្ន័យ​នេះក្នុង​សន្និ​សីទ​សារព័ត៌មាន​អន្តរក្រសួង​មួយ​ ធ្វើ​ឡើង​កាលពីថ្ងៃពុធ​។​

ទោះ​បីជា​កាលពី​ឆ្នាំ​ទៅ រោងចក្រទាំង​អស់​ត្រូវ​បាន​ណែ​នាំ​ឲ្យ​ដាក់ចេញ​នូវ​វិធានការ​មួយ​ចំនួន​ដើម្បី​ការ​ពារ​ការ​រាល​ដាល​វីរុស​កូវីដ១៩ រួម​ទាំងការ​កំណត់ឲ្យកម្មករ​ពាក់​ម៉ាស តែ​កម្មករ​ភាគ​ច្រើនបាន​ធ្វើ​ដំណើរ​តាម​រថយន្ត​រួម​គ្នា​មាន​មនុស្ស​ច្រើន រស់​នៅ​បន្ទប់​ជួល​តួច​រួម​គ្នា ដែល​នេះ​ធ្វើ​ឲ្យ​ការ​រក្សា​គម្លាត​សុវត្ថិភាព​មិន​អាច​ធ្វើ​ទៅ​បាន​។​​

​នៅក្នុង​សន្និសីទសារព័ត៌មាន លោក ហេង សួរ មាន​ប្រ​សាសន៍​ទៀត​ថា បន្ថែម​លើ​ការ​កំពុង​ធ្វើការ​ងារ​ជាមួយ​រោងចក្រ​ផ្សេងៗ​ស្វែង​រក​អ្នក​ប៉ះពាល់​ផ្ទាល់ ក្រសួង​ការងារ​ក៏​កំពុង​ធ្វើការ​ជាមួយ​ក្រ​សួង​សុខាភិបាល​ដើម្បី​ចាក់​វ៉ាក់សាំង​​ឲ្យ​កម្មករ​ផង​ដែរ​។ លោក​បញ្ជាក់ថា មក​ដល់ពេល​នេះ​មាន​កម្មករ​ ១១០ ០០០​នាក់​បាន​ចាក់​វ៉ាក់សាំង​ដូស​ទី​​១ និង​ជាង​១០ ០០០​នាក់​បាន​ចាក់​វ៉ាក់សាំង​ដូស​ទី​២​រួច​រាល់។​​ ប៉ុន្តែ​ថា យុទ្ធនាការ​ចាក់វ៉ាក់សាំង​ដូស​ទី​១ ត្រូវ​បាន​ផ្អាក​បន្ទាប់ពី​មាន​ការវិធានការ​បិទខ្ទប់រាជធានីភ្នំពេញ និង​ក្រុង​តាខ្មៅ នៃខេត្ត​កណ្ដាល កាល​ពី​ថ្ងៃទី​១៥ ខែមេសា ហើយ​បើ​តាម​ការ​ប៉ាន់​ស្មាន​ចំនួន​កម្មករ​ប្រហែល​៨៥០ ០០០​នាក់​ទៀត​មិន​ទាន់​បាន​ទទួល​វ៉ាក់សាំង​។​

​លោក ហេង សួរ បានបន្តថា ក្រ​សួង​ការ​ងារ​កំពុងរៀប​ចំចាប់​ផ្ដើម​ចាក់​វ៉ាក់សាំង​ដល់​កម្មករ​នៅ​តំបន់​ក្រ​សហម ដែល​ជា​តំបន់​មាន​វិធានការ​បិទខ្ទប់​តឹងរឹង និង​ជាតំបន់​សម្បូរ​រោងចក្រ​ច្រើន​នៅ​ក្នុង​រាជធានីភ្នំពេញ​ផង​ដែរ​។​ រដ្ឋាភិបាលនឹងបញ្ជូនទាហានទៅតំបន់ក្រហមដើម្បីជួយចាក់វ៉ាក់សាំងដល់ប្រជាជន និងកម្មករ។

​លោក បន្ថែម​ថា៖ «ក្រសួង​ការ​ងារ​បាន​រៀប​ចំខ្លួន​រួច​រាល់​ហើយ​ដើម្បី​ធ្វើ​ការ​ជាមួយ​ភាគីពាក់ព័ន្ធ ពិសេស​ជាមួយ​ក្រ​សួង​ការពារជាតិ ដើម្បី​រៀបចំ​ការ​ចាក់​វ៉ាក់សាំង​ក្នុង​ទ្រង់ទ្រាយ​ធំ​ក្នុង​តំបន់​ក្រហម សម្រាប់​កម្មករ និង​ប្រ​ជា​ពល​រដ្ឋ»។​

​ក្នុង​ចំណោម​រោងចក្រដែល​មាន​កម្មករ​ឆ្លង​កូវីដ​ទាំង​២០៦ ក្នុងនោះមា​ន​១៣៤​នៅ​រាជធានីភ្នំពេញ ២៣​នៅ​ខេត្ត​កណ្ដាល ២៦​នៅ​ខេត្ត​តាកែវ ១៦​នៅ​ខេត្តព្រះសីហនុ បួន​នៅ​ខេត្ត​ស្វាយ​រៀង មួយ​នៅខេត្តកំពង់ឆ្នាំង និង​មួយទៀត​នៅ​ខេត្ត​កំពង់​ចាម​។ លោក​ថា​ រោង​ចក្រ​ប្រហែល​៦៩០​បាន​រង​ផល​ប៉ះពាល់​ដោយ​សារ​វិធានការ​បិទខ្ទប់​រាជធានីភ្នំពេញ និង​ក្រុង​តាខ្មៅ ក្នុង​ចំណោម​រោង​ចក្រ​ សហគ្រាស ជាង​៧ ០០០​នៅទូទាំង​ប្រទេស ដែល​មាន​កម្មករ​ប្រហែល​១,២លាន​នាក់​។

​រោងចក្រ​​ប្រហែល​៦០​នៅ​រាជធានីភ្នំពេញ​ស្ថិត​ក្នុង​តំបន់​លឿង ដែលមាន​កម្រិត​ឆ្លង​ក្នុង​សហគមន៍​ទាប អាចនឹង​ត្រូវ​អនុញ្ញាត​ឲ្យ​បើក​ដំណើរ​ការ​ឡើង​វិញ​ ប៉ុន្តែវាអាស្រ័យលើអាជ្ញាធរមូលដ្ឋានជាអ្នកសម្រេច។

​លោក ហេង សួរ បានបន្ថែមថា៖ ​«ខ្ញុំ​ប៉ាន់​ស្មាន​ថាកម្មករ​ប្រហែលជិត ២០០ ០០០​នាក់​អាច​ត្រឡប់ទៅធ្វើ​ការ​វិញ»។  ប៉ុន្តែ​លោកក​បន្ថែម​ថា​ អ្នក​រស់​នៅ​តបន់​ក្រហម និង​លឿង​ទុំ គឺ​មិន​ទាន់​អនុញ្ញាតឲ្យ​ត្រឡប់​ទៅ​ធ្វើ​ការ​វិញ​ទេ ទោះ​បីជា​រោងចក្រ​បើក​ដំណើរ​ការ​វិញ​ក៏​ដោយ​។​​

លោក នួន ផារ័ត្ន អភិបាល​រង​រាជធានីភ្នំពេញ មាន​ប្រ​សាសន៍​ក្នុង​សន្និសីទសារព័ត៌មាន​នោះដែរថា ពេល​នេះ​មាន​អ្នកវិជ្ជមាន​កូវីដ១៩ នៅ​ភ្នំពេញ​ចំនួន​៧ ៩៤៣​ករណី​ រួម​មាន​ជនបរទេស​ចំនួន​៤៤២​នាក់​ផង​ដែរ​។ ក្នុងចំណោន​នោះ លោក​ថា​មាន​មនុស្ស​៧ ៧៣២នាក់​ កំពុងសម្រាក​​ព្យាបាល​។ ជាមួយ​គ្នា​នោះដែរ គិត​តាំងពី​មានការ​រាល​ដាល​វីរុស​កូវីដ១៩​ មក​មាន​មនុស្ស​ចំនួន​៧៨​នាក់​បាន​ស្លាប់​ក្នុង​រាជធានីភ្នំពេញ ប៉ុន្តែ​ថា​ករណី​ស្លាប់​នេះ​ទើប​កើត​មាន​នៅពេល​មាន​ការ​ផ្ទុះ​ការ​ឆ្លង​ក្នុង​សហគមន៍​២០ កុម្ភៈ នេះ​។​​

លោក​បន្ថែមថា សាលារាជធានី​ភ្នំពេញ កំពុង​ខិត​ខំធ្វើការ​ជា​ខ្លាំង​ដើម្បី​ផ្សព្វ​ផ្សាយ​ព័ត៌មាន​អំពីវិធី​ការពារ​ខ្លួន​ពី​ការ​ឆ្លង​កូវីដ១៩ និង​បាន​លើក​ទឹក​ចិត្ត​ដល់​ម្ចាស់​ផ្ទះ​ជួល និង​បន្ទប់​ជួល​ក្នុង​រាជធានីភ្នំពេញ ឲ្យ​បញ្ចុះ​ថ្លៃឈ្នួល ពិសេស​សម្រាប់​អ្នក​រស់​នៅ​ក្នុង​តំបន់ក្រហម​។​

លោក​បន្ត​ថា៖ «​នៅ​តំបន់​ក្រហម យើង​នឹង​បន្ត​ចាក់​វ៉ាក់សាំង​ជូន​ប្រ​ជា​ពល​រដ្ឋ ប៉ុន្តែ​យើង​ត្រូវ​មាន​ការ​ប្រុង​ប្រយ័ត្ន​ខ្ពស់»​

បើ​តាម​លោក ផារ័ត្ន អាជ្ញាធរ​បានផ្ដល់​ជំនួយ​ជា​ស្បៀង​អាហារ​ដល់​ប្រ​ជា​ពល​រដ្ឋ​កំពុង​ខ្វះ​ខាត ប៉ុន្តែ​លោក​ថា​ក៏​មានការ​លំបាក​ក្នុង​ការ​ផ្ដល់​ឲ្យ​បាន​គ្រប់គ្នា​ចំពោះ​អ្នក​ដែល​ត្រូវ​ការ​។​ លោក លើក​ជា​ឧទាហរណ៍​ថា ប្រសិន​បើ​កម្មករបួន​នាក់​រស់​នៅជាមួយ​គ្នា​ក្នុង​បន្ទប់​ជួល​តែ​មួយ អ្នក​ទាំង​នោះ​បាន​ទទួលកញ្ចប់​​ជំនួយ​តែ​មួយ​​សម្រាប់​គ្នា​បួន​នាក់ ដែល​ចំណុច​នេះ​ហើយ​លោក​ថា​កម្មករ​ខ្លះ​មាន​ការ​ត្អូញ​ត្អែរ។​ ​

លោក​បន្ថែមថា៖ «​ក្នុង​រយៈពេល​ខ្លី យើយ​មិន​អាច​រៀបចំអំណោយ​ឲ្យ​បាន​គ្រប់​គ្នានោះទេ[អ្នក​កំពុង​ខ្វះខាត​ស្បៀង]។ លោក​ថា គិតត្រឹមថ្ងៃអង្គារ អាជ្ញាធរ​បាន​ចែក​ជំនួយ​ចំនួន​១០០ ០០០​កញ្ចាប់ ភាគ​ច្រើន​នៅ​តំបន់​ក្រហម ក្នុង​ខណ្ឌ​ពោធិ៍សែនជ័យ និង​ខណ្ឌ​មានជ័យ​។

លោក​បញ្ជាក់ថា៖​«​ថ្ងៃនេះ [ពុធ] យើង​បាន​រៀបចំចែកកញ្ចប់​​អំណោយ​១៧ ៧០០​បន្ថែម​ទៀត​សម្រាប់​ខណ្ឌ​ពោធិ៍សែន​ជ័យ និង​ខណ្ឌមានជ័យ»

វ័យ​៣៧​ឆ្នាំ អ៊ូ រ៉ាវី ជាកម្មករ​ម្នាក់​រស់​នៅ​ក្នុង​បន្ទប់​ជួល​ជាមួយ​មិត្ត​ភក្តិ​បី​នាក់​ផ្សេង​ទៀត ក្នុង​សង្កាត់​កំបូល ខណ្ឌកំបូល បានលើក​ឡើង​ថា អ្នក​ស្រី និង​កម្មករ​ផ្សេង​ទៀត​មិន​បាន​ទៅ​ធ្វើ​ការ​នៅ​រោងចក្រ​តាំងពី​ថ្ងៃទី​១០ ខែមេសា ព្រោះរោងចក្រ​ផ្អាកដំណើរ​ការ​។ អ្នក​ទាំង​បួន​ពេល​នេះ​កំពុង​បារម្ភ​រឿង​ដាច់​ស្បៀង បន្ទាប់ពីអស់​​អង្ករផ្ញើ​មកពី​ស្រុក​ក្នុង​សប្ដាហ៍​មុន​។ អ្នក​ទាំង​បួន​បាន​ប្រមូល​ប្រាក់​ដែល​នៅ​សេសសល់​ដើម្បី​ទិញ​អង្ករ​បន្ថែម ប៉ុន្តែ​មិន​អាច​មាន​លទ្ធភាព​ទិញត្រី សាច់ និង​បន្លែ​នោះទេ​។​

អ្នក​ស្រី​បន្ថែមថា៖ «​ឥឡូវនេះ យើង​កំពុង​ជួប​បញ្ហា​ខ្វះខាតអាហារ និងបាន​ខ្ចីអង្ករ​ពី​កម្មករ​ផ្សេង​ទៀត​ដែល​រស់នៅ​បន្ទប់ជិត​គ្នា​ដើម្បី​ដាំបាយហូប»

អ្នក​ស្រីថា ទាំងអ្នកស្រី និង​កម្មករ​ផ្សេង​ទៀត​ដែល​កំពុង​ស្នាក់នៅ​ក្នុង​តំបន់​នេះ​មិន​ដឹង​ថាមាន​មូលហេតុអ្វីទេ បាន​ជា​មិន​ទាន់បាន​ទទួលអំណោយ ដោយ​ថាអាជ្ញាធរ​បាន​ចុះ​ស្រង់​ឈ្មោះគ្រប់​គ្នា​ចំនួន​បី​ថ្ងៃ​កន្លង​មក​ហើយ​។  ដោយ​សារ​ការ​បិទខ្ទប់​នឹង​បន្ត​មួយ​សប្ដាហ៍​ទៀត រហូត​ដល់ថ្ងៃទី៥ ខែឧសភាព អ្នកស្រី រ៉ាវី ថា​ពួកគាត់​មិន​ដឹងថា​នឹង​បានអ្វី​ហូប​នោះទេ​។​

អ្នក​ស្រី​បន្ថែមថា៖ «ពួក​យើង​នឹង​ប្រឈម​ការ​ខ្វះខាត​ស្បៀងកាន់តែខ្លាំង​សម្រាប់​មួយ​សប្ដាហ៍ទៀត បើសិនជា​អាជ្ញាធរ​មិនចែក​ស្បៀង​ឲ្យ​ពួក​យើង…សូមអាជ្ញាធរ​ជួយ​ពួកយើងខ្ញុំ​​ផង»។

អ្នកនាំពាក្យក្រសួងការងារ លោក ហេង សួរ មានប្រសាសន៍ក្នុងសន្និសីទសារព័ត៌មានអន្តរក្រសួងនៅភ្នំពេញ ថ្ងៃទី២៨ ខែមេសា ឆ្នាំ២០២១។ ខេមបូចា/ បញ្ញា ឆព័ណ្ណ
អ្នកនាំពាក្យក្រសួងការងារ លោក ហេង សួរ មានប្រសាសន៍ក្នុងសន្និសីទសារព័ត៌មានអន្តរក្រសួងនៅភ្នំពេញ ថ្ងៃទី២៨ ខែមេសា ឆ្នាំ២០២១។ ខេមបូចា/ បញ្ញា ឆព័ណ្ណ

ក្នុង​សេចក្ដី​ថ្លែង​ការណ៍​រួម​ចេញនៅថ្ងៃពុធ ​ដោយក្រុម​សហជីព ​អង្គការ​ធ្វើការ​ផ្នែក​សិទ្ធមនុស្ស និង​ការងារ និង​ក្រុម​អ្នក​តស៊ូមតិ សរុប​ចំនួន​៣៦ស្ថាប័ន​ បាន​លើក​ឡើងថា​ការ​ផ្ទុះ​រាលដាល​វីរុស​កូវីដ១៩​ នាពេល​ថ្មីៗ​នេះ​បាន​ប៉ះពាល់​យ៉ាង​ធ្ងន់​ធ្ងរ​ដល់​ជីវភាព​ប្រចាំ​ថ្ងៃ​ និង​សុវត្ថិភាព​​របស់​អ្នក​បម្រើ​ការ​ក្នុង​វិស័យ​សំណង់ សេវាកម្មសណ្ឋាគារ និង​កម្មករ​ក្នុង​វិស័យ​សេដ្ឋកិច្ច​ក្រៅប្រព័ន្ធ​។​ ស្រប​ពេល​ដែល​បញ្ហា​ប្រឈម​មួយ​ចំនួន​កើត​ឡើងពាក់ព័ន្ធ​នឹង​​វិធានការ​បិទខ្ទប់ ពួកគេបានលើកឡើងថា​ ការ​គិតគូ​បាន​វែង​ឆ្ងាយ​ក៏​កាន់​តែ​ចាំ​បាច់ ដើម្បី​ធានាថា​កម្មករ​រោងចក្រ​អាច​ការ​ពារ​ខ្លួន​បាន​ត្រឹម​ត្រូវ នៅពេល​រោង​ចក្រ​បើក​ដំណើរ​កា​រវិញ​។​

សេចក្ដី​ថ្លែង​ការណ៍​រួម​​ដដែល​សរសេរថា៖ «កង្វល់ធំបំផុត​សម្រាប់​សុខភាព និង​សុវត្ថិភាព​កម្មរ និង​ហានិភ័យ គឺ​នៅ​ពេល​ដែល​រោងចក្រ​ផ្សេងៗ​មិន​ទាន់​បាន​រកឃើញ​ករណី​ឆ្លងកូវីដ១៩ ហើយ​កម្មក​រ​នឹង​ប្រឈម​ហានិភ័យ​ពេល​ត្រឡប់ចូលធ្វើការ​វិញ​ ក្នុង​ស្ថានភាព​ដែល​មិន​មានការ​ធានា​​លើ​សុខភាព និង​សុវត្ថិភាពការងារ​»

លោក វ៉ាន់ ស៊ូអៀង​​ ប្រធានសមាគមរោងចក្រកាត់ដេរនៅកម្ពុជា ហៅ​កាត់ថា GMAC បាន​បដិសេធ​ធ្វើ​អត្ថាធិប្បាយ​លើ​រឿងនេះ ដោយថា​លោក​កំពុង​ជាប់​រវល់​។​

លោក ងួន ចាន់ណារ៉ា អគ្គលេខាធិការរង​សមាគម​រោងចក្រ​ដេរ​ស្បែកជើង​នៅកម្ពុជា(CFA)​មាន​ប្រ​សាសន៍ថា៖ «​យើង​តែងតែណែនាំ​រោងចក្រ​ជា​សមាជិក​ឲ្យ​គោរពតាម​គោលការណ៍​របស់​ក្រ​សួង​ការងារ និង​ក្រសួង​ពាក់ព័ន្ធ​ផ្សេងៗទៀត»។​

លោក ម៉ាន់ សេងហាក់ អនុប្រធាន​សហជីពសេរីនៃព្រះរាជាណាចក្រ​កម្ពុជា បាន​និយាយថា​សហជីព​របស់​លោក​បាន​ជំរុញ​ទៅ​​រដ្ឋាភិបាល​​តាំងពី​ចាប់​មាន​វិបត្តិកូវីដ១៩ សកលដំបូងៗ​ ឲ្យ​ផ្ដល់​អាទិភាព​​លើ​សុវត្ថិភាព​កម្មករ​រោងចក្រ ប៉ុន្តែ​រដ្ឋាភិបាលធ្វើ​ព្រងើយកន្តើយ រហូត​ដល់​មាន​ការ​ផ្ទុះ​ខ្លាំង នាំឲ្យ​មាន​ការ​ឆ្លង​រាលដាល​ជំងឺកូវីដ១៩ ក្នុង​សហគមន៍​ក្នុង​ចំណោម​កម្មករ​រោងចក្រ​។​

លោកបន្ថែមថា៖ «ថ្ងៃនេះ ក្រសួង​ការងារ​បានអនុញ្ញាត​ឲ្យ​រោងចក្រ​មួយ​ចំនួន​នៅ​តំបន់​លឿង​បើក​ដំណើរការវិញ ដូច​នេះ យើង​បារម្ភត្រង់ចំណុចនេះ ព្រោះថា​ចំនួន​អ្នក​ឆ្លង​កូវីដ១៩​ រាល់ថ្ងៃ​នៅមិន​ទាន់ថមថយនៅឡើយ​»។ លោក​បន្ត​ទៀតថា បើ​សិនជា​រដ្ឋាភិបាល​មិន​ដាក់វិធានការ​ការពារ​ឲ្យ​បាន​ម៉ឺងម៉ាត់ទេ ​​កម្មករ​​នឹង​បណ្តាលឲ្យឆ្លង​ច្រើន​ទៀត។​​

លោក​ឲ្យ​ដឹង​ទៀតថា៖ «ខ្ញុំ​គិត​ថា​ រដ្ឋាភិបាល​គួរ​មាន​ថវិកា​ជួយ​ដល់​កម្មករ ក្នុង​ពេល​ដែលពួកគាត់​មិន​មាន​ការងារធ្វើ​អំឡុង​កូវីដ១៩ ផ្ទុះរាលដាល»។ លោកកត់សម្គាល់ថា​កម្មករ​ជា​ច្រើន​កំពុង​ប្រឈម​បញ្ហា​ខ្វះ​ស្បៀង​​។

ក្រសួង​សុខាភិបាល​នៅ​យប់ថ្ងៃពុធ បាន​បង្ហាញ​តួលេខ​អ្នក​ឆ្លង​ថ្មី​មានចំនួន​៦៩៧​ករណី ក្នុង​នោះ​ចំនួន​អ្នក​ឆ្លង​កូវីដ១៩ នៅ​ភ្នំពេញមាន​៥៥៨ ករណី ខេត្ត​កណ្ដាលមាន​៧២ករណី ខេត្ត​បន្ទាយ​មានជ័យ​៤៣​ករណី និង​អ្នក​ឆ្លង​ផ្សេង​ទៀត​មាន​នៅ​ខេត្ត​កំពង់ស្ពឺ ខេត្តព្រះសីហនុ តាកែវ និង​ពោធិ៍សាត់។​

គិត​ត្រឹម​យប់ថ្ងៃពុធ អ្នក​ស្លាប់​ដោយ​សារកូវីដ​១៩ សរុប​៨៨​នាក់ អ្នក​ស្លាប់​ទាំង​អស់​គឺ​ស្ថិត​ក្នុង​ពេល​ផ្ទុះ​រាល​ដាល​វីរុស​នាពេល​ថ្មីៗនេះ។ ក្រសួង​សុខាភិបាល​បាន​កត់ត្រា​ចំនួន​អ្នក​ឆ្លង​ក្នុង​សហគមន៍​២០ កុម្ភៈ​ មាន​ចំនួន​១១ ២១០​ករណី នាំឲ្យ​ករណី​ឆ្លង​សរុប​មានចំនួន​១១ ៧៦១​ករណី គិត​តាំងពី​មាន​ការ​ឆ្លង​រាល​ដាល​វីរុស​ដើម​ឆ្នាំ​២០២០ មក​។ ជា​សរុប​មនុស្ស​ចំនួន​៤ ៦៩៨​នាក់​បាន​ជាសះស្បើយ ខណៈ​នៅ​មាន​ ៦ ៩៦៨​ករណី​ទៀត​កំពុង​សម្រាក​ព្យាបាល​។ នៅ​ថ្ងៃពុធ ដដែល ក្រ​សួង​ក៏​បាន​ប្រកាស​ដែរថាអ្នក​ជំងឺកូវីដ៩៩៤​នាក់ បានជា​សះស្បើយ មាន​ន័យថា​អ្នកទាំងនោះ​តេស្ត​អវិជ្ជមាន​កូវីដ១៩​។

ប្រែសម្រួលពីអត្ថបទភាសាអង់គ្លេស៖ More than 1,600 workers from 206 factories have been infected with COVID-19

Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »