សមាគមសម្ព័ន្ធអ្នកសារព័ត៌មានកម្ពុជា

ជនជាតិដើមភាគតិចពូនងខេត្ដមណ្ឌលគិរីជាង៥០គ្រួសារប្រឈមការបណ្តេញចេញ

ដីជនជាតិដើមភាគតិចពូនងដែលរដ្ឋាភិបាលបានកាត់ទៅឱ្យក្រុមហ៊ុនឯកជនដើម្បីវិនិយោគលើផ្ទៃដី២៥៥ហិកតារហូតមានការតវ៉ា ស្ថិតនៅភូមិពូរាំង ឃុំសែនមនោរម្យ ស្រុកអូររាំង ខេត្ដមណ្ឌលគិរី។ (រូបភាពផ្ដល់ឱ្យ)
ដីជនជាតិដើមភាគតិចពូនងដែលរដ្ឋាភិបាលបានកាត់ទៅឱ្យក្រុមហ៊ុនឯកជនដើម្បីវិនិយោគលើផ្ទៃដី២៥៥ហិកតារហូតមានការតវ៉ា ស្ថិតនៅភូមិពូរាំង ឃុំសែនមនោរម្យ ស្រុកអូររាំង ខេត្ដមណ្ឌលគិរី។ (រូបភាពផ្ដល់ឱ្យ)

ជនជាតិដើមភាគតិចពូនងខេត្ដមណ្ឌលគិរីជាង៥០គ្រួសារប្រឈមការបណ្ដេញទាំងបង្ខំ និង​ពលរដ្ឋច្រើនគ្រួសារទៀតប្រឈមបាត់​បង់​ដីសហគមន៍ដែលដូនតាបន្សល់ទុកច្រើនជំនាន់ ក្រោយ​​​អាជ្ញាធរអនុវត្ដ​តាម​អនុក្រឹត្យ​របស់​រដ្ឋាភិបាលលើផ្ទៃដី២៥៥ហិកតាដោយធ្វើ​អនុប្បយោគ​ឱ្យក្រុមហ៊ុន​ឯកជន​មួយ។

រដ្ឋបាលខេត្ដមណ្ឌលគិរីបានចេញសេចក្ដីប្រកាសមួយនៅថ្ងៃទី២០ ខែមីនា ឆ្នាំ២០២៤នេះ ដោយ​​តម្រូវឱ្យជនជាតិភាគតិចពូនងនៅភូមិពូរាំង ឃុំសែនមនោរម្យ ស្រុកអូររាំង ធ្វើការរុះរើផ្ទះ បង្គោលរបង និងសំណង់ផ្សេងៗរបស់ខ្លួនឱ្យអស់ពីដីចំនួន២៥៥ហិកតា​តាមអនុក្រឹត្យ​ដែល​ចេញ​ដោយអតីតលោកនាយករដ្ឋមន្រ្ដី ហ៊ុន សែន កាលពីថ្ងៃទី២៤ ខែមីនា ឆ្នាំ២០២២។

ជុំវិញរឿងនេះ លោក ស្រេវ ផេត  ប្រធានសហគមន៍ជនជាតិដើមភាគតិចពូនងពូរាំង បាន​រៀប​រាប់ពីការបាត់ដីដូនតាថា ការចេញអនុក្រឹត្យ​របស់អតីតលោកនាយករដ្ឋមន្រ្ដី ហ៊ុន សែន ដោយ​មិន​ចុះសិក្សាស្រាវជ្រាវគឺចេញដោយរំលោភសិទ្ធិរបស់ពួកគាត់។ លោក​បន្ដថា តំបន់​នេះ គឺជាតំបន់ដែលជនជាតិលោកគោរពបូជា និងជាកន្លែងបន្ដពីដូនតា។ លោកហាក់​សម្ដែង​ការខកចិត្ដ និងស្នើឱ្យរដ្ឋាភិបាល​ដកអនុក្រឹត និងប្រគល់ឱ្យជនជាតិដើមភាគតិចពូនងវិញ​ដើម្បី​ទុកជាសម្បត្ដិរួម។ លោកបន្ដលើកឡើងថា ការបាត់បង់ដីដូនតាគឺស្មើនឹង​បាត់​អត្ដសញ្ញាណ ខណៈលោកជំរុញឱ្យនាយករដ្ឋមន្រ្ដី ហ៊ុន ម៉ាណែត គិតគូរពីបញ្ហាប្រឈម​របស់​ពួកគាត់។

លោកលើកឡើងថា៖ «ខ្ញុំមិនយល់ទេ ពេលគាត់[អាជ្ញាធរ]ធ្វើចឹង។ ដីនេះវាជាដីដូនតារបស់​ជនជាតិ​​ពួកខ្ញុំ បើបាត់វាដូចបាត់អត្ដសញ្ញាណ​ចឹង។ ពួកខ្ញុំមិនចាកចេញ ពួកខ្ញុំនឹងបន្ដតវ៉ា។ ខ្ញុំស្នើឱ្យនាយករដ្ឋមន្រ្ដីប្រគល់ដីមកឱ្យពួកខ្ញុំវិញមក»

កាល​ពីថ្ងៃទី២៤​ ខែ​មីនា​ ឆ្នាំ​២០២២ ​រដ្ឋាភិបាល​បាន​សម្រេច​ផ្តល់​ដី​ទៅ​ឱ្យឧកញ៉ា​ ជឹង ធាន​សេង ​តាម​សំណើ​សុំ​ទិញ​ផ្តាច់​ដី​ចំនួន​២​ទីតាំងទំហំ​សរុប​ចំនួន​៣៣៤​ហិកតា​៥អា។​ ទីតាំង​ទីមួយ​​ស្ថិត​ក្នុង​ភូមិ​ពូតាំង ​សង្កាត់​រមនា ​ក្រុង​សែន​មនោរម្យ ​និង​ទីតាំង​មួយទៀត​ស្ថិត​ក្នុង​ភូមិ​ពូរ៉ាង ​ឃុំ​សែន​មនោរម្យ ​ស្រុក​អូររាំង​ ខេត្ត​មណ្ឌល​គិរី ​ដែល​រដ្ឋាភិបាល​បញ្ជាក់​ថា​ សម្រាប់​ធ្វើ​ការ​វិនិយោគ​អភិវឌ្ឍ​ជា​តំបន់​ទេសចរណ៍​ធម្មជាតិ។​ ប៉ុន្តែ​ការ​ផ្តល់​ដី​នេះ​ប៉ះពាល់​ដី​របស់​សហគមន៍​​ជនជាតិ​ដើម​ភាគ​តិចរហូតពួកគេតវ៉ា និងប្រឈមការបណ្ដេញចេញទាំងបង្ខំ។

ប្រជាសហគមន៍ជនជាតិដើមភាគតិចពូនងម្នាក់ទៀត គឺលោក ជើស​ ម្លើង​ អាយុ៦១ឆ្នាំ រស់​នៅ​ភូមិពូរាំងដែលកំពុងរងការបណ្ដេញចេញ​ទាំងបង្ខំ បានលើកឡើងថា ការចេញអនុក្រឹត្យ​នេះ​បាន​​បង្ក​ការប្រឈមជាច្រើនដល់ជនជាតិដើមពូនងដោយថា ការចេញនេះមិនអនុលោម​ទៅ​តាម​​ច្បាប់​ស្ដីពីសិទ្ធិមនុស្ស។ លោកបានចាត់ទុកថា ទង្វើនេះគឺជារឿង​អសីលធម៌ និង​រំលោភ​សិទ្ធិមនុស្សសម្រាប់ជនជាតិដើមភាគតិចពូនងពួកលោក។

លោកបន្ថែមថា៖ «វាបាត់បង់ដីដូនតាដែលតរាប់ជំនាន់មកហើយ។ ផ្ទះជាង៥០គ្រួសារដែលប៉ះ តែពលរដ្ឋច្រើនទៀតរស់ពឹងកន្លែងហ្នឹង ឥឡូវគេមកបណ្ដេញពួកខ្ញុំចេញ ខ្ញុំឈឺចាប់ណាស»

ច្បាប់ស្ដីពីសិទ្ធិជនជាតិដើមភាគតិចមាត្រា១១ចែងថា ជនជាតិដើមមានសិទ្ធិប្រតិបត្ដិ និងធ្វើ​ឱ្យ​រស់ឡើងវិញនូវប្រពៃណី ទំនៀមទម្លាប់ ជាវប្បធម៌របស់ខ្លួន។ សិទ្ធិនេះរួមមាន​ទាំងសិទ្ធិក្នុងការ​ថែរក្សាការពារ និងអភិវឌ្ឍន៍អ្វីដែលបង្ហាញអំពីអត្ដសញ្ញាណវប្បធម៌របស់ខ្លួនដែល​មាន​ពី​អតីតកាល បច្ចុប្បន្ន អនាគត ដូចជាតំបន់បុរាណវិទ្យា និងកន្លែងប្រវតិ្ដសាស្រ្ដ បុរាណវត្ថុ ពិធី​បុណ្យ បច្ចេកវិទ្យា និងសិល្បៈ ទស្សនីយភាព និងការសំដែងសិល្បៈ និងអក្សរសាស្រ្ដ។

បើតាមអ្នកស្រី ភ្លឹក ភីរម្យ ជនជាតិដើមភាគតិចពូនង និងជាអ្នកតវ៉ាដើម្បីរក្សាអត្ដសញ្ញាណ​ជនជាតិដើមភាគតិចបានសង្កត់ធ្ងន់ថា ទង្វើនេះបានបំផ្លាញជនជាតិដើមភាគតិច និង​អត្ដសញ្ញាណ​តរាប់ពាន់ឆ្នាំដោយបារម្ភថា អាចនឹងបាត់បង់​ជនជាតិដើមភាគតិចពូនង​ ក្រោយ​ពីរដ្ឋាភិបាលបណ្ដេញចេញទាំងបង្ខំតាមរយៈការអនុវត្ដរបស់អាជ្ញាធរខេត្ដ។ អ្នកស្រីបន្ដថា រដ្ឋាភិបាល​គួរតែពិចារណាជាថ្មីសម្រាប់ជនជាតិភាគតិច ជាជាងប្រគល់ឱ្យក្រុមហ៊ុនឯកជន​វិនិយោគ​ទាំងដឹងថាជាដីដូនតា ទីបូជា និងកប់សព។

អ្នកស្រីលើកឡើងថា៖ «វាជាការរើសអើងលើជនជាតិដើមភាគតិចពូនងពួកខ្ញុំ។ បើដីហ្នឹង​បាត់​បង់ ពួកខ្ញុំ​មិន​ទៅរស់​នៅណាទេ ព្រោះវាជាដីដែលពួកខ្ញុំទុកជាកន្លែងប្រារព្ធពិធី កប់សព និង​អាស្រ័យ​ផល។ ឥឡូវគេមកបណ្ដេញពួកខ្ញុំចេញ ខ្ញុំឈឺចាប់ណាស់»

ពលរដ្ឋជនជាតិដើមភាគតិចពូនងប្រារព្ធពិធីនៅលើដីដែល​រដ្ឋាភិបាលបានកាត់​ទៅឱ្យ​ក្រុមហ៊ុនឯកជនកាលពីឆ្នាំ២០២៣ ស្ថិតនៅភូមិពូរាំង ឃុំសែនមនោរម្យ ស្រុកអូររាំង ខេត្ដមណ្ឌលគិរី។ (រូបភាពផ្តល់ឱ្យ)​

គោ​លន​យោ​បាល​ជាតិ​ស្តី​ពី​ការ​អភិវឌ្ឍ​ជនជាតិ​ដើម​ភាគតិច​ បានឱ្យ​និយម​ន័យថា​ ជនជាតិ​ដើម​ភាគតិច​ គឺជា​ជនជាតិ​ដែល​រស់នៅ​លើ​ដែនដី​នៃ​ព្រះរាជាណាចក្រ​កម្ពុជា​ ហើយ​ជនជាតិ​ទាំងនោះ​បង្ហាញ​នូវ​ឯកភាព​ជាតិពន្ធុ​ សង្គម​ វប្បធម៌​ និង​សេដ្ឋកិច្ច​ ប្រតិបត្តិ​របៀប​រស់​នៅ​តាម​ប្រពៃណី​ និង​ការ​ដាំ​ដុះ​លើ​ដី​ដែល​ខ្លួន​កាន់កាប់​ទៅ​តាម​ក្បួន​ខ្នាត​ ទំនៀមទម្លាប់​នៃ​ការ​ប្រើ​ប្រាស់​​ដី​ជា​សមូហភាព​។

ជុំវិញរឿងនេះលោក ជាក់ ម៉េងហ៊ាង​ អភិបាលរង និងជាអ្នកនាំពាក្យខេត្ដមណ្ឌលគិរី បានថ្លែង​ប្រាប់​ខេមបូចានៅរសៀលថ្ងៃ​ទី២២​នេះ​ថា លិខិតរបស់រដ្ឋបាលខេត្ដ គឺអនុវត្ដទៅតាម​អនុក្រឹត្យ​ប៉ុណ្ណោះ រឿងពលរដ្ឋមិនព្រមចាកចេញលោកថាមិនពាក់ព័ន្ធរដ្ឋបាលនោះទេ។ តែយ៉ាងណា​លោក​មិនបានឆ្លើយនឹងសំណួរខេមបូចារឿងសំណង និងវិធានបន្ដក្រោយពី​ពលរដ្ឋ​មិន​ព្រម​ចាក​​​ចេញដោយរុញទៅឱ្យអភិបាលរងផ្សេងជំនួស។

លោកថ្លែងថា៖ «រដ្ឋបាលអនុវត្ដតាមអនុក្រឹត្យ រឿងគាត់មិនចេញខ្ញុំអត់ដឹងទេ។ បងអាចទៅសួរ​អ្នក​ទទួល​បន្ទុកចុះព្រោះគាត់អ្នកកាន់រឿង​ហ្នឹងទើបឆ្លើយបាន អរគុណ»

យោងតាមសេចក្ដីប្រកាសរបស់អង្គការសហប្រជាជាតិស្ដីពីសិទ្ធិជនជាតិដើមតាមមាត្រា១០​ចែងថា ជនជាតិដើមភាគតិចមិនត្រូវបានគេបណ្ដេញដោយបង្ខំចេញពីដី ឬដែនដីរបស់ខ្លួន​ឡើយ។ ការតាំងលំនៅឋានថ្មី មិនត្រូវធ្វើដោយគ្មានការយល់ព្រមដោយសេរី និងដោយមិន​បាន​ប្រាប់ឱ្យដឹង​ជាមុនដល់ជនជាតិដើមដែលពាក់ព័ន្ធ និងបន្ទាប់ពីមានការព្រមព្រៀង​លើ​សំណង​​ត្រឹមត្រូវ និងយុត្ដិធម៌នោះឡើយ ហើយបើធ្វើទៅបានត្រូវដាក់ឱ្យមាននូវជម្រើស​នៃ​ការ​វិលត្រឡប់មកកាន់ដីធ្លី ឬដែនដីរបស់ខ្លួនវិញ។

អ្នកស្រី យុន ម៉ាណេ នាយិកាប្រតិបត្តិនៃអង្គការជនជាតិដើមភាគតិចកម្ពុជា បានថ្លែងថា តំបន់​កាត់​នេះ គឺជាកន្លែងបូជារបស់ជនជាតិភាគតិចដោយអ្នកស្រីថា ការបណ្ដេញចេញដោយ​បង្ខំ​នេះ គឺរំលោភសិទ្ធិមនុស្ស និងសិទ្ធិរបស់ជនជាតិដើមដែលមានចែងក្នុងច្បាប់។ អ្នកស្រីជំរុញ​ឱ្យ​រដ្ឋាភិបាលដកអនុក្រឹត្យនឹងប្រគល់ដីចំនួន២៥៥ហិកតាឱ្យពលរដ្ឋវិញ។

អ្នកស្រីបញ្ជាក់ថា៖ «វារំលោភសិទ្ធិជនជាតិដើម ហើយតំបន់ហ្នឹង គឺកន្លែងពួកគាត់គោរព​ណាស់ មិនគួរទៅកាត់ដីពួកគាត់ចឹងទេ។ ខ្ញុំសង្ឃឹមថា រដ្ឋាភិបាលនឹងដកអនុក្រឹត្យវិញ​ដើម្បី​ជនជាតិដើមអាចរស់នៅដូចជនជាតិផ្សេងដែរ»

ស្រដៀងគ្នានេះដែរ លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍​ និង​សន្ដិភាព បានបញ្ជាក់ថា មុននឹងចេញអនុក្រឹត្យរដ្ឋាភិបាលគួរតែពិនិត្យមើលថា​វាពិត​ជា​មាន​​ការ​​ប៉ះពាល់ដល់ពលរដ្ឋទេ ហើយដីហ្នឹងពួកគាត់បានកាន់កាប់តាំងពេលណាដើម្បីធានា​ថា ការកាត់ដីនេះមិនបង្កដល់ការរស់នៅ និងអាស្រ័យផល។ លោកជំរុញឱ្យរដ្ឋាភិបាល​ពិនិត្យ​ឡើង​វិញ​ដោយលោកថាការផ្ដល់នេះបង្កបញ្ហាប្រឈមជាច្រើនដល់ជនជាតិដើមភាគតិច។

លោកថ្លែងថា៖ «ខ្ញុំចង់ឱ្យរដ្ឋាភិបាលពិនិត្យឡើងវិញ ព្រោះវាប៉ះពាល់បងប្អូនជនជាតិភាគតិច​ហើយជាដីដូនតារបស់ពួកគាត់ទៀត។ ខ្ញុំសង្ឃឹមថារដ្ឋាភិបាលអាចដកអនុក្រឹត្យដើម្បីឱ្យបង​ប្អូនជនជាតិដើមភាគតិចអាចរស់បានដូចពលរដ្ឋខ្មែរទូទៅដែរ»

លោក អំ សំអាត នាយកចាត់ការទូទៅនៃអង្គការលីកាដូ បានចាត់ទុកថា គឺជាការរំលោភសិទ្ធិ​មនុស្ស ព្រោះការកាត់ដីមិនអនុលោមតាមច្បាប់​ស្ដី​ពី​សិទ្ធិជនជាតិដើមភាគតិចនោះទេ។ លោក​បានគូសបញ្ជាក់ថា ការកាត់ដីទាំងអស់នេះ​នឹងធ្វើ​ឱ្យ​ជនជាតិដើម​ភាគតិចទាំងនោះ​ប្រឈម​បញ្ហាខ្លាំង​ និងជាតំបន់គួរចៀងវាង។

លោកថ្លែងថា៖ «មិនគួរទៅកាត់ដីរបស់ពួកគាត់ទេ ព្រោះវាជាតំបន់គោរពបូជា​របស់​ជនជាតិ​គាត់។ ខ្ញុំយល់ថារដ្ឋាភិបាលគួរបង្កើតក្រុមការងារទៅចុះពិនិត្យ​ឱ្យបានច្បាស់​លាស់​ដើម្បី​អាច​ប្រគល់ដីហ្នឹងឱ្យពួកគាត់វិញ»

គួររម្លឹក​ថា លោកឧកញ៉ា ជឹង ធានសេង អគ្គនាយក​ក្រុមហ៊ុន ភ្នំពេញ ព្រីខាស ផ្លេន ត្រូវ​បាន​គេ​ស្គាល់​ថា ជា​កូនប្រុស​របស់​អ្នកឧកញ៉ា ឡៅ ម៉េងឃីន និង​អ្នកឧកញ៉ា ជឹង សុភាព ហៅ «យាយភូ» ខណៈ​ដែល​ភរិយា​របស់​លោក គឺលោកជំទាវ ​តាន់ សឺយមួយ ក៏​ជា​អ្នកជំនួញ​មួយ​រូប​ផង​ដែរ។​

កាលពីឆ្នាំ២០២២ប្រជាសហគមន៍ជនជាតិដើមភាគតិចពូនងចំនួន១០នាក់ត្រូវបានសាលា​ដំបូង និងកងរាជអាវុធហត្ថខេត្តមណ្ឌលគិរី​​ចេញដីកាកោះហៅចំនួន២ក្នុងចន្លោះពេលតែ​២​សប្ដាហ៍​ឲ្យចូលបំភ្លឺ​ពាក់​ព័ន្ធ​​នឹង​ជម្លោះដីធ្លីជាមួយក្រុមហ៊ុន វីឡា ឌីវេឡុបមេន។ ប្រជាសហគមន៍​​​បាន​លើក​ឡើងថា​ វាជា​រឿង​អយុត្តិធម៌ណាស់សម្រាប់​ពួកគាត់​ដោយគ្រាន់​តែចង់ថែរក្សាដី​នោះ​ជាដី​របស់​សហគមន៍​ប៉ុណ្ណោះ៕

818 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម