ការឈ្នះមេដាយមាស និងពានលេខ១ ពីការប្រកួតកីឡាបាល់ទះជើងឯកអាស៊ីអាគ្នេយ៍ SEA V-Cup 2026 នៅប្រទេសហ្វីលីពីន កាលពីពេលថ្មីៗនេះ វានៅតែដិតជាប់ក្នុងក្រអៅបេះដូងអ្នកគាំទ្រ និងប្រជាពលរដ្ឋកម្ពុជា ព្រោះនេះជាជោគជ័យធំបំផុត ដែលក្រុមជម្រើសជាតិបាល់ទះកម្ពុជាដណ្តើមបាន។
ថ្នាក់ដឹកនាំសហព័ន្ធកីឡាបាល់ទះកម្ពុជា និងអ្នកពាក់ព័ន្ធនៅក្នុងវិស័យបាល់ទះកម្ពុជា បានចាត់ទុកការឈ្នះមេដាយមាស និងពានពីការប្រកួតកីឡាបាល់ទះជើងឯកអាស៊ីអាគ្នេយ៍ SEA V-Cup 2026 នេះ ថាជាពាន «ប្រវត្តិសាស្រ្ត» លើកដំបូង របស់ក្រុមជម្រើសជាតិបាល់ទះកម្ពុជា ក្នុងរយៈពេលជាង៦០ឆ្នាំ ហើយ៥ឆ្នាំចុងក្រោយនេះ ក្រុមបាល់ទះកម្ពុជា ក៏បានបង្កើតប្រវត្តិសាស្រ្ត ឈ្នះមេដាយប្រាក់ និងមេដាយសំរឹទ្ធ នៅស៊ីហ្គេម ជាលើកដំបូង និងពានមួយចំនួនទៀតផងដែរ។
យ៉ាងណាក៏ដោយ នៅពីក្រោយនៃភាពជោគជ័យនេះ បាល់ទះកម្ពុជា បានហែលឆ្លងព្យុះភ្លៀង និងការលំបាករាប់មិនអស់ ដែលផ្តើមចេញពីក្រុមដែលមានកម្រិតលេងទាបជាងគេ នៅក្នុងតំបន់អាស៊ាន ទៅជាក្រុមដែលគេផ្តល់រហស្សនាមថ្មីថា «ជាស្តេចបាល់ទះ ដែលទើបបានរះថ្មី នៅតំបន់វិញ»។
លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានបញ្ជាក់ថា៖ «យើងទាំងអស់គ្នា បានធ្វើរឿងដ៏អស្ចារ្យដើម្បីជាតិ ហើយនៅទីបំផុតសារព័ត៌មានរបស់ហ្វីលីពីន និងឥណ្ឌូនេស៊ី បានសរសេរថា ស្តេចបាល់ទះថ្មី បានរះឡើងហើយ។ ខ្ញុំបានឆ្លើយតបទៅវិញថា នេះគ្រាន់តែជាការខិតខំប្រឹងប្រែង ហើយការខិតខំប្រឹងប្រែងនេះ វាមិនដែលក្បត់អ្នកដែលខំធ្វើទេ!»។
ផ្តើមចេញពីការប្រកួតនៅក្រៅប្រទេស ដោយយកត្រឹម «បទពិសោធន៍» ត្រឡប់មកវិញជាមួយការចាញ់គ្រប់ការប្រកួតនោះ ក្រុមបាល់ទះកម្ពុជា ត្រូវបានប្រទេសក្នុងតំបន់ចាត់ទុក ដូចជា «សត្វចៀម» ដែលគ្រប់គ្នាសំលៀងមាត់ចាំតែលេបត្របាក់ ព្រោះពួកគេដឹងថា ឱ្យតែជួបកម្ពុជា ប្រាកដជាឈ្នះ ៣-០ មិនពិបាកទេ ហើយអ្នកគាំទ្រកម្ពុជា ក៏អស់ជំនឿលើក្រុមនេះដូចគ្នា។
ប៉ុន្តែសម្រាប់ការបង្ហាញខ្លួន ក្នុងការប្រកួតស៊ីហ្គេម ឆ្នាំ២០២២ នៅវៀតណាម ក្រុមជម្រើសជាតិបាល់ទះកម្ពុជា បានធ្វើឱ្យគ្រប់គ្នាភ្ញាក់ផ្អើលខ្លាំង ដោយពួកគេដណ្តើមបានមេដាយសំរឹទ្ធ ជាប្រវត្តិសាស្រ្តលើកដំបូង បន្ទាប់ពីបានយកឈ្នះក្រុមជម្រើសជាតិថៃ ៣-២ ក្នុងការប្រកួតដណ្តើមយកមេដាយសំរឹទ្ធនេះ ក្រោយចាញ់ក្រុមឥណ្ឌូនេស៊ី ៣-១ នៅវគ្គ១/២ផ្តាច់ព្រ័ត្រ។
បន្ថែមលើនេះ សម្រាប់ការធ្វើម្ចាស់ផ្ទះស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្រ្ត ក្រុមបាល់ទះកម្ពុជា បានទម្លាក់ក្រុមជម្រើសជាតិថៃ នៅវគ្គ១/២ផ្តាច់ព្រ័ត្រ ដោយយកឈ្នះ ៣-២ ម្តងទៀត តែពួកគេ បានបន្តចាញ់ក្រុមឥណ្ឌូនេស៊ី ៣-០ នៅវគ្គផ្តាច់ព្រ័ត្រ ហើយបានមេដាយប្រាក់ ដែលជាកំណត់ត្រាថ្មីមួយទៀត ធ្វើឱ្យគ្រប់គ្នាមានការភ្ញាក់ផ្អើលកាន់តែខ្លាំង។
ជាមួយការបង្កើតបានកំណត់ត្រាឈ្នះមេដាយនៅស៊ីហ្គេមនេះ លោក អាំង សិរីពិសិដ្ឋ អះអាងថា បានកើតឡើង ដោយសារលោកឧបនាយករដ្ឋមន្រ្តី ស សុខា និងភរិយា កែ សួនសុភី ដែលបានលះបង់គ្រប់យ៉ាង តាំងពីវិស័យបាល់ទះគ្មានអ្នកជួយឧបត្ថម្ភ រហូតក្លាយជាប្រភេទកីឡា ដែលទទួលបានការគាំទ្រខ្លាំងបំផុតនាពេលបច្ចុប្បន្ន។
ប្តីប្រពន្ធមួយគូនេះ បានសម្រេចបង្កើតក្លិបបាល់ទះសហភាពសហព័ន្ធយុវជនខេត្តព្រៃវែង នៅឆ្នាំ២០១២ តាំងពីលោក ស សុខា នៅជាតំណាងរាស្រ្តខេត្តព្រៃវែង ដើម្បីជ្រើសរើសកីឡាករ មានកាយសម្បទាល្អ និងខ្ពស់ៗ យកមកប្រមូលផ្តុំហ្វឹកហាត់ សម្រាប់ជាធនធានជួយដល់ក្រុមជម្រើសជាតិ។ ក្រោយមកក្លិបនេះ បានប្តូរឈ្មោះមកជាក្លិបកីឡាបាល់ទះវិសាខា ដោយយកកីឡដ្ឋានវិសាខា ធ្វើជាមជ្ឈមណ្ឌលហ្វឹកហាត់។
ហេតុនេះធនធានកីឡាករទាំងអស់ ដែលបានប្រមូលផ្តុំជាមួយជម្រើសជាតិ ត្រូវមកហាត់នៅទីនេះ បន្ទាប់ពីលោក ស សុខា បានក្លាយជាប្រធានសហព័ន្ធកីឡាបាល់ទះកម្ពុជា ដោយប្តីប្រពន្ធមួយគូនេះ បានពង្រីកខ្ទង់ចំណាយកាន់តែធំ បន្ថែមទៅលើកញ្ចប់ថវិកាចំណាយប្រចាំឆ្នាំរបស់ក្រសួងអប់រំ ជាពិសេសការផ្តល់ប្រាក់ខែឱ្យកីឡាករជម្រើសជាតិ ជាសមាជិកក្លិបវិសាខា ដើម្បីឱ្យពួកគេមានទាំងលទ្ធភាពចិញ្ចឹមគ្រួសារបានល្អប្រសើរ និងមានពេលហ្វឹកហាត់គ្រប់គ្រាន់ ។
យ៉ាងណាក៏ដោយ ការចំណាយទ្រព្យធនយ៉ាងច្រើននេះ មិនទទួលបានផលក្នុងរយៈពេលខ្លីឡើយព្រោះក្រុមជម្រើសជាតិកម្ពុជា នៅតែប្រកួតចាញ់ ហេតុនេះបន្ទាប់ពីបន្តចាញ់នៅស៊ីហ្គេម ឆ្នាំ២០១៥ លោក ស សុខា បានសម្រេចទិញក្លិបបាល់ទះមួយនៅប្រទេសថៃ ហើយប្រើឈ្មោះក្លិបនោះ ដើម្បីឱ្យកីឡាករកម្ពុជា មានឱកាសប្រកួតពង្រឹងសមត្ថភាពជាមួយក្លិបអាជីព ដែលកន្លងមកក្រុមទាំងអស់នេះ គេមិនប្រកួតជាមួយក្រុមកម្ពុជាទេ។
នៅត្រង់ចំណុចនេះ លោក សិរីពិសិដ្ឋ បញ្ជាក់ថា៖ «លោកទាំង២ ចាប់ផ្តើមឈ្មុសឈ្មុលបញ្ជូនកីឡាករយើងទៅប្រកួត នៅតាមបណ្តាប្រទេសជិតខាង ជាពិសេសថៃ ហើយខ្ញុំនៅចាំបានថា កីឡាករនៅក្នុងក្លិបអាជីព គេមិនទទួលប្រកួតជាមួយកីឡាករទៅពីកម្ពុជាយើងទេ។ គេយកតែកីឡាករកម្រិតមហាវិទ្យាល័យមកលេងជាមួយយើង គឺប្រទេសជិតខាងយើង មើលស្រាលយើងខ្លាំងមែនទែន»។
តាមរយៈការបញ្ជូលក្រុមអត្តពលិកបានទៅហ្វឹកហាត់ និងប្រកួតនៅក្រៅប្រទេសនេះ បានធ្វើឱ្យក្រុមកម្ពុជា មានពន្លឺនៃក្តីសង្ឃឹមបន្តិច ពេលពួកគេបានរកឃើញការឈ្នះជាលើកដំបូងក្នុងស៊ីហ្គេម ឆ្នាំ២០១៩ នៅហ្វីលីពីន ដោយកាលនោះពួកគេ បានឈ្នះក្រុមវៀតណាម ៣-២ នៅក្នុងជម្រុះក្នុងពូល តែបានចាញ់ក្រុមវៀតណាម ៣-០ វិញក្នុងការប្រកួតដណ្តើមយកលេខ៥ និងលេខ៦។
ជាមួយលទ្ធផលនេះ សហព័ន្ធកីឡាបាល់ទះកម្ពុជា បានផ្លាស់ប្តូរយុទ្ធសាស្រ្តថ្មី គឺការបិទទ្វារពង្រឹងការហ្វឹកហាត់នៅក្នុងជំរំជម្រើសជាតិទ្វេដង ដោយលោក ស សុខា សុខចិត្តបន្ថែមខ្ទង់ចំណាយមួយផ្នែកទៀត ទៅលើការជួលគ្រូបរទេសមកបង្វឹក ហើយកីឡាករទាំងអស់ ត្រូវហាត់៦ម៉ោងកន្លះក្នុង១ថ្ងៃ និងត្រូវបានអនុញ្ញាតឱ្យទៅលេងផ្ទះតែល្ងាចថ្ងៃសៅរ៍ទេ និងវិលមកវិញនៅល្ងាចថ្ងៃអាទិត្យ។
ការពង្រឹងវិន័យលើការហ្វឹកហាត់នេះធ្វើឱ្យកីឡាករមួយចំនួន បានបង្ខំចិត្ត មិនចូលរួមជាមួយក្រុមជម្រើសជាតិទេ ហេតុនេះកីឡាករនៅក្លិបវិសាខា ភាគច្រើនត្រូវបានជ្រើសរើសប្រកួតតំណែងឱ្យជាតិ នៅក្នុងព្រឹត្តិការណ៍ធំៗ ជាពិសេស៊ីហ្គេម ហើយបញ្ហានេះ ក៏មានការរិះគន់មួយចំនួនផងដែរ។
លោក អាំង សិរីពិសិដ្ឋ បញ្ជាក់ថា៖ «មានការចោទសួរជាច្រើនថា ហេតុអ្វីកីឡាករផ្សេងទៀត មិនចូលមកហ្វឹកហាត់ក្នុងក្រុមជម្រើសជាតិ មានបក្សពួកនិយមមែនអត់? ចម្លើយ គឺមិនទេ ហើយខ្ញុំបានបញ្ជូនសារត្រឡប់ទៅវិញថា សហព័ន្ធ ចាំទទួលស្វាគមន៍គ្រប់អត្តពលិកទាំងអស់ ឱ្យតែអ្នកនោះមានបេះដូងស្នេហាជាតិពិតប្រាកដ គឺមានលទ្ធភាពចូលមកជំរំហ្វឹកហាត់ហើយ។អ៊ីចឹងខ្ញុំលើកអត្តពលិកយើង ជាវីរបុរសបាល់ទះ ព្រោះការលះបង់របស់គាត់ធំធេងណាស់ សុខចិត្តលះបង់ប្រពន្ធកូន លះបង់គ្រួសារ ដើម្បីចូលមកក្នុងជំរំហ្វឹកហាត់»។
លោក សិរីពិសិដ្ឋ បានចាត់ទុកការចូលកាន់តួនាទីជាអគ្គលេខាធិការសហព័ន្ធកីឡាបាល់ទះកម្ពុជា នៅថ្ងៃទី១៩ ខែកុម្ភៈ ឆ្នាំ២០២២ ថា ជា «អំរែកមួយ» ព្រោះពេលនោះកីឡាករភាគច្រើនមានសតិអារម្មណ៍ អត់ចង់ប្រកួតតំណាងឱ្យជាតិទេ ព្រោះទៅប្រកួតចាញ់គេរហូត ធ្វើឱ្យមានការរិះគន់ខ្លាំង រហូតដល់មានការជេរប្រទេចទៀត។
លោក បានបើកឡានទាំងយប់ ទៅក្លិបវិសាខា ហើយបានជួបជាមួយកីឡាករ៤នាក់។ «ខ្ញុំធ្វើការបញ្ចុះបញ្ជូលពួកគាត់ចូល២ម៉ោង ហើយ ម៉ី រស្មី សម្រេចចិត្តដើរចេញពីក្លិប និងជម្រើសជាតិ គាត់មិនទៅលេងស៊ីហ្គេម នៅវៀតណាមទេ ចំណែក សួន ចាន់ណារ៉ូ, គួន មុំ និង ពិន សារិន ជឿជាក់លើខ្ញុំ ហេតុនេះបើសិនជាមិនមានកីឡាករប៉ុន្មាននាក់នេះ យើងមិនអាចទៅធ្វើអី ស៊ីហ្គេម នៅវៀតណាម បានទេ»។
លោកបន្ថែមថា៖ «កាលនោះកីឡាករមួយចំនួន មិនទាន់ស្គាល់មុខខ្ញុំទេ តែដោយសារការដាក់ចិត្តដាក់កាយ ជឿជាក់លើការដឹកនាំនេះហើយ ធ្វើឱ្យយើងសម្រចបានលទ្ធផលជោគជ័យ ដោយយើងឈ្នះមេដាយសំរឹទ្ធ ជាលើកដំបូង ក្នុងស៊ីហ្គេម ឆ្នាំ២០២២ នៅវៀតណាម និងបន្តឈ្នះមេដាយប្រាក់ ក្នុងស៊ីហ្គេម ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ»។
បើទោះបីជាដណ្តើមបានមេដាយប្រាក់ និងសំរឹទ្ធ នៅស៊ីហ្គេម ក៏ពិតមែន ប៉ុន្តែក្រុមកម្ពុជា មិនត្រូវបានសហព័ន្ធកីឡាបាល់ទះអាស៊ីអាគ្នេយ៍ ដឹកនាំដោយជនជាតិថៃ អនុញ្ញាតឱ្យចូលរួមប្រកួតពានជើងឯកអាស៊ីអាគ្នេយ៍ SEA V-League ជាមួយក្រុមថៃ ឥណ្ឌូនេស៊ី វៀតណាម និងហ្វីលីពីននោះទេ ដោយគេតម្រូវឱ្យកម្ពុជា ឈ្នះកៅអីពីការប្រកួតពានរង្វាន់បាល់ទះកម្រិតទី២ ប្រចាំតំបន់អាស៊ាន ជាមុនសិន។
ជាមួយការដាក់សម្ពាធនេះ កម្ពុជា បានសម្រេចរៀបចំការប្រកួតបាល់ទះកម្រិតទី២ប្រចាំតំបន់អាស៊ាន ជាលើកដំបូង ដោយប្រសិទ្ធនាមថា SEA V.League Challenge នៅឆ្នាំ២០២៤ ដោយអញ្ជើញម៉ាឡេស៊ី សិង្ហបុរី និងឡាវ មកចូលរួម ហើយបានចំណាយថវិការៀបចំអស់រាប់ម៉ឺនដុល្លារ តែតាមរយៈការប្រកួតនៅក្នុងវិមានពហុកីឡដ្ឋានជាតិអូឡាំពិក ពីថ្ងៃទី៣០ ខែសីហា ដល់ថ្ងៃទី២ ខែកញ្ញានោះ គឺក្រុមជម្រើសជាតិកម្ពុជា ក្លាយជាម្ចាស់ជើងឯក ដើម្បីបានទៅលេងនៅ SEA V-League ឆ្នាំ២០២៥។
យ៉ាងណាក៏ដោយ សម្រាប់ការបង្ហាញខ្លួនជាលើកដំបូង ក្នុងពានរង្វាន់ SEA V-League នេះ ក្រុមជម្រើសជាតិកម្ពុជា បានចាញ់ទាំង៨ប្រកួត ប៉ុន្តែការប្រកួត SEA V-League ដែលបានប្តូរឈ្មោះមកជា SEA V-Cup នៅឆ្នាំ២០២៦នេះ កម្ពុជា បានទទួលចំណាត់ថ្នាក់លេខ១ គួរឱ្យភ្ញាក់ផ្អើលបំផុត នៅជើងទី១ ក្នុងប្រទេសហ្វីលីពីន ដោយពួកគេបានយកឈ្នះក្រុមថៃ ៣-១ នៅ១/២ផ្តាច់ព្រ័ត្រ និងបន្តឈ្នះឥណ្ឌូនេស៊ី ៣-២ ក្នុងវគ្គផ្តាច់ព្រ័ត្រ កាលពីថ្ងៃទី១៩ ខែកក្កដា។
ចំណែកការប្រកួតជើងទី២ នៅឥណ្ឌូនេស៊ី ក្រុមកម្ពុជា បានត្រឹមលេខ៤ទេ ព្រោះសមាជិកភាគច្រើន មានរបួស ហើយអ្វីដែលសោកស្តាយបំផុតនោះ កីឡាករ មួន និមល ដែលខំលេងទាំងមានរបួសនោះ ត្រូវបាននាំយកទៅថតពិនិត្យមើល ពេលវិលត្រឡប់មកដល់ប្រទេសវិញ ហើយឃើញថា ជង្គង់របស់គេមានរបួស និងមានឆ្អឹងដុះ ដែលទើបវះកាត់បានជោគជ័យ កាលពីថ្ងៃទី ២០ ខែសីហានេះ ចំណែកលោក អាំង សិរីពិសិដ្ឋ ក៏បានដួលប្រេះឆ្អឹងសន្លាក់ដៃឆ្វេង ក្នុងវគ្គផ្តាច់ព្រ័ត្រ នៅហ្វីលីពីន។
ការលះបង់គ្រប់បែបយ៉ាង រហូតដណ្តើមបានពាន SEA V-Cup 2026 ជាប្រវត្តិសាស្រ្តនេះ បានធ្វើឱ្យប្រជាជនកម្ពុជា ជាពិសេសអ្នកគាំទ្រ បានប្តូរទម្លាប់ពីការធ្លាប់ជេរប្រមាថដល់ក្រុមជម្រើសជាតិ មកជាការនាំគ្នាសាទរវិញពេញប្រទេស ហើយរូបភាពនៃការដង្ហែពាន SEA V-Cup នៅរាជធានីភ្នំពេញ កាលពីព្រលប់ថ្ងៃទី២៧ ខែកក្កដា បានក្លាយជាការចងចាំរបស់ពួកគេមិនអាចបំភ្លេចបានទេ។
លោក សិរីពិសិដ្ឋ បញ្ជាក់ថា៖ «នៅបំផុតយើងបានធ្វើឱ្យមានស្នាមញញឹមដល់ប្រជាពលរដ្ឋ១៨លាននាក់។ ទោះបីជាយើងបានបរាជ័យនៅជើងទី២ មានចាញ់មានឈ្នះ ប៉ុន្តែវាធ្វើឱ្យបងប្អូនប្រជាពលរដ្ឋយើងលួសអារម្មណ៍ពីការជេរប្រទេចបណ្តាសា មកជាការសាទរ គាំទ្រ និងលើកទឹកចិត្តដល់អត្តពលិករបស់យើង។ នេះជាភាពអស្ចារ្យមួយ ដែលយើងបានកែប្រែផ្នត់គំនិតប្រជាពលរដ្ឋរបស់យើង»។
យ៉ាងណាក៏ដោយ លោក សិរីពិសិដ្ឋ បានអះអាងថា សហព័ន្ធ បានធ្វើរឿងច្រើនរាប់មិនអស់ ដើម្បីជួយជំរុញឱ្យក្រុមបាល់ទះកម្ពុជា ឈ្នះបានមេដាយប្រាក់ សំរឹទ្ធ នៅស៊ីហ្គេម ឈ្នះជើងឯកពានរង្វាន់នៅតៃវ៉ាន់ ឈ្នះជើងឯក SEA V.League Challenge 2024 និងការមាន World Ranking ធ្វើឱ្យមានរូបទង់ជាតិកម្ពុជា នៅលើវេបសាយ FIVB ជាលើកដំបូង។
លោកសង្កត់ធ្ងន់ថា៖ «នេះសុទ្ធតែស្នាដៃធំៗ ហើយស្នាដៃចុងក្រោយដ៏អស្ចារ្យរបស់យើង គឺឈ្នះមេដាយមាស ជាប្រវត្តិសាស្រ្តនៅ SEA V-Cup 2026 ប៉ុន្តែខ្ញុំបានប្រាប់ទៅក្រុមអត្តពលិកយើងថា នេះគ្រាន់តែជាសុបិនមួយយប់ចុះ ដែលយើងទទួលបាន ហើយសុបិនដ៏វែងឆ្ងាយ គឺចាប់តាំងពីឆ្នាំ២០១២ ដែលយើងបានចិញ្ចឹមទ័ព អាចប្រើប្រាស់បានជោគជ័យក្នុងរយៈពេល១០ឆ្នាំក្រោយ ហេតុនេះការវិនិយោគរបស់ឯកឧត្តមអភិសន្តិបណ្ឌិត និងលោកជំទាវ មិនមែនជារឿងធម្មតានោះទេ»។
ចំណែកស្មាត់ធំ គួន មុំ ដែលបានចូលរួមជាមួយក្រុមជម្រើសជាតិតាំងពីឆ្នាំ២០១៧ បានទម្លាយថា ការប្រមូលផ្តុំ កាលពីមុន មិនទាន់បានច្បាស់លាស់ដូចបច្ចុប្បន្នទេ ហើយក៏នៅមានការប្រកាន់បក្សពួកនិយម ប៉ុន្តែរយៈពេល៥ឆ្នាំចុងក្រោយនេះ ឃើញថា ពួកយើងមកដើម្បីជាតិរៀងៗខ្លួន។
កីឡាករវ័យ ២៧រូបនេះ បន្ថែមថា៖ «ពួកយើងតាំងចិត្តថា ដើម្បីជាតិ អត់មានដើម្បីក្លិប ដើម្បីថ្នាក់ដឹកនាំមួយណានោះទេ គឺយើងមកលះបង់ប្តូរ ធ្វើការអីជាក្រុម សូម្បីលោកគ្រូ គាត់មិនលាក់តែម្តង គឺមានលំហាត់អី គាត់ផ្តល់ឱ្យទាំងអស់ដល់កីឡាករមកពីគ្រប់ក្លិប។ យើងមានបេះដូងវិញចូលគ្នាជាធ្លុងមួយ ដល់អ៊ីចឹងធ្វើឱ្យមានការសហការល្អ សម្រាប់ការដណ្តើមបានភាពជោគជ័យនេះ»។
ជាមួយគ្នានេះ គួន មុំ បានទម្លាយថា ក្រុមជម្រើសជាតិជំនាន់មុន ខ្វះបទពិសោធន៍ប្រកួតជាមួយបណ្តាប្រទេសផ្សេងៗ ហើយការប្រកួតក្នុងស្រុក ក៏អត់មានពានអ្វីកក្រើកដូចបច្ចុប្បន្នដែរ គឺ
៥ឆ្នាំមកនេះ មានការប្រកួតក្នុងស្រុកច្រើនមែនទែន ដោយយើងបានអញ្ជើញក្រុមបរទេសមកប្រកួតក្នុងស្រុកផង និងចេញទៅប្រកួតក្រៅស្រុកផង ធ្វើឱ្យកីឡាករមានស្មារតីប្រយុទ្ធច្បាស់ លែងខ្លាចគេដូចមុន។
កីឡាករកូន១រូបនេះ បញ្ជាក់ថា៖ «កាលពីមុនឱ្យតែឮថា ជួបប្រទេសនេះប្រទេសនោះ យើងចាប់ផ្តើមភ័យញ័រ ដោយសារកីឡាករមួយៗអត់ដែលជួបគេ យើងលេងតែក្នុងស្រុក ខុសពីពេលនេះ យើងមានមិត្តភាពជាមួយបារាំង ចិន ប្រេស៊ីល ដល់អ៊ីចឹងយើងមានការរឹងមាំ ក្នុងការប្រកួតពានរង្វាន់ផ្លូវការផ្សេងៗ ពិសេសយើងមានប្រាក់ប្រចាំខែច្បាស់លាស់ ហើយមានការស្នាក់នៅរួមល្អ ការគោរពវិន័យ និងមានបទបញ្ជាផ្ទៃក្នុងច្បាស់លាស់ ទើបធ្វើឱ្យយើងជោគជ័យដល់ពេលនេះ»។
យ៉ាងណាក៏ដោយ គួន មុំ បានសារភាពថា មុនឈានទៅដល់ការដណ្តើមបានជ័យលាភីជូនជាតិជាបន្តបន្ទាប់ ក្នុងរយៈពេល៥ឆ្នាំចុងក្រោយនេះ ក្រុមកីឡាករ បានលះបង់ខ្លាំងមែនទែន។ «ពួកខ្ញុំជាកីឡាករ មានការលះបង់អស់រលីងតែម្តង ហើយធំបំផុតគឺយើងលះបង់ប្រពន្ធកូន! នៅពេលមានព្រឹត្តិការណ៍ធំ យើងត្រូវបិទខ្ទប់ហាត់២ទៅ៣ខែ អត់បានជួបពួកគាត់តែម្តង ហើយយើងក៏អត់ទៅស្រុកដែរ»។
ប៉ុន្តែ គួន មុំ បន្ថែមថា៖ «បើគ្មានការលះបង់ និងរៀបចំវិន័យបែបហ្នឹង គឺមិនបានជោគជ័យទេ។ ទោះជាមានការឧបត្ថម្ភគាំទ្រខ្លាំងប៉ុណ្ណាក៏ដោយ ក៏យើងអត់ជោគជ័យដែរ ដោយសារយើងមិនមានវិន័យ ហើយកីឡាករ និងក្រុមជម្រើសជាតិទាំងអស់ បើគ្មានវិន័យយើងមិនអាចទៅមុខបានទេ»។
ចំណែកអ្នកលើកបាល់ដៃទី១ សួន ចាន់ណារ៉ូ ដែលបានជាប់ជម្រើសជាតិ តាំងពីឆ្នាំ២០១៤ នោះ បានអះអាងថា ទម្រាំក្រុមជម្រើសជាតិបាល់ទះកម្ពុជា ទទួលបានលទ្ធផលល្អដូចសព្វថ្ងៃនេះ យើងបានឆ្លងកាត់ការលំបាកច្រើនណាស់ ព្រោះប្រទេសនៅក្នុងតំបន់ជាមួយយើងដូចជាឥណ្ឌូនេស៊ី វៀតណាម ថៃ និងហ្វីលីពីន សុទ្ធតែកម្រិតល្អៗ។
រំឭកដល់ភាពឈឺចាប់នេះ កីឡាករវ័យ៣២ឆ្នាំ ចាន់ណារ៉ូ បញ្ជាក់ថា៖ «ប្រទេសទាំងនោះ តែងយកយើងដាក់ក្នុងពូលជាមួយ ដើម្បីវាយកម្ពុជាយើង បានឡើងទៅវគ្គបន្ត ប៉ុន្តែថ្នាក់ដឹកនាំរបស់យើង មិនដែលបោះបង់នោះទេ ហើយនៅពេលនេះ មិនមានក្រុមប្រទេសណា ហ៊ានមើលស្រាលលើក្រុមកម្ពុជាដូចមុនទៀតនោះទេ»។
សួន ចាន់ណារ៉ូ បានលើកពីការប្រកួត SEA V-Cup 2026 ដែលក្រុមកម្ពុជា អាចឈ្នះចាញ់ជាមួយឥណ្ឌូនេស៊ី និងថៃ និងបានឈ្នះហ្វីលីពីន ទាំង២ជើង ព្រោះក្រុមទាំងមូល បានប្រើបេះដូងលេងដើម្បីជាតិ និងប្រជាជន រហូតបានឈ្នះជើងឯក ក្នុងជើងទី១ នៅហ្វីលីពីន ប៉ុន្ត ចាន់ណារ៉ូ បានបង្ហាញការសោកស្តាយ ដែលការប្រកួតជើងទី២ នៅឥណ្ឌូនេស៊ី ក្រុមកម្ពុជា បានត្រឹមលេខ៤។
អ្នកលើកបាល់កូន២ សួន ចាន់ណារ៉ូ បញ្ជាក់ថា៖ «យើងប្រឹងខ្លាំងពេក រហូតភ្លាត់ខ្លួនឯង។ ជាក់ស្តែងពេលនោះ ពួកខ្ញុំឈឺ និងអស់ថាមពលរលីងទៅហើយ ប៉ុន្តែពួកខ្ញុំនៅតែខាំមាត់ខំប្រឹងលេងទៅតាមកាលវិភាគដែលគេដាក់មក»។
លោក នៅ សាម៉េត គ្រូបង្វឹកស្តីទី ដែលបានដឹកនាំក្រុមកម្ពុជា ឱ្យឈ្នះពាន SEA V-Cup 2026 ជាប្រវត្តិសាស្រ្ត នៅហ្វីលីពីននេះ អះអាងថា ការទទួលបានជោគជ័យរបស់ក្រុមកម្ពុជា កើតចេញពីការការប្រមូលផ្តុំ ដោយមានការផ្គត់ផ្គង់បានយ៉ាងល្អរបស់ថ្នាក់ដឹកនាំ ពិសេសការចងនូវបទបញ្ជាផ្ទៃក្នុង ដែលគ្រប់គ្នាត្រូវគោរពឱ្យបានដាច់ខាតនូវវិន័យ និងសាមគ្គីភាពផ្ទៃក្នុង។
លោកបញ្ជាក់ថា៖ «ការទៅដណ្តើមបានមេដាយមាស និងពាននៅហ្វីលីពីននេះ គឺយើងបានដាក់គោលដៅច្បាស់លាស់ ដោយផ្តោតសំខាន់ទៅលើការយកស្នាដៃជូនជាតិ មិនមែនទៅយកបទពិសោធន៍ទៀតនោះទេ។ ទាំងថ្នាក់ដឹកនាំ គ្រូបង្វឹក និងកីឡាកររបស់យើង តែងផ្លាស់ប្តូរយោបល់គ្នា សម្រួចយុទ្ធសាស្រ្តក្នុងការលេងឱ្យបានល្អ ស្របទៅតាមផែនការ និងលេងដោយមានទំនុកចិត្ត»។
គ្រូបង្វឹកវ័យ៣១ឆ្នាំរូបនេះ បានបន្ថែមថា កីឡាករមកពីក្លិបណាក៏យើងទទួលយកដែរ ប៉ុន្តែសំខាន់ចូលមកត្រូវមានវិន័យ ព្រោះកាលណាយើងចូលជំរំជម្រើសជាតិហើយ ចិត្តកាយរបស់យើង ប្រៀបដូចជាកងកម្លាំងអ៊ីចឹង មិនអាចរត់ចោលជួរទេ គឺយើងមានចិត្តថា ត្រូវធ្វើយ៉ាងណាឱ្យមានលទ្ធផលល្អជូនជាតិ ហេតុនេះអ្នកដែលគ្មានវិន័យ និងគ្មានការលះបង់ មិនអាចនៅបានឡើយ។
លោកបញ្ជាក់ថា៖ «ជាក់ស្តែងការប្រកួត SEA V-Cup 2026 នេះ កីឡាកររបស់យើងលេងទាំងឈឺ! ទឹកចិត្ត និងបេះដូងរបស់គាត់ គឺដើម្បីជាតិ ខំលេងទាំងខ្លួនឯងឈឺអត់ទៅណាចោលក្រុមទេ។ ថ្នាក់ដឹកនាំរបស់យើង ហ៊ានលះបង់គ្រប់យ៉ាងដើម្បីជាតិមួយនេះ ហើយខ្ញុំពិតជាមានមោទនភាពណាស់ នៅពេលឃើញការលះបង់ដ៏ធំធេងទាំងអស់នេះ»។
យ៉ាងណាក៏ដោយ នៅក្នុងពិធីសំណេះសំណាល និងពិសារអាហារសាមគ្គីជាមួយក្រុមជម្រើសជាតិកម្ពុជា កាលពីយប់ថ្ងៃទី៤ ខែសីហា លោក ស សុខា បានប្រាប់ដល់ក្រុមជម្រើសជាតិកម្ពុជា ឱ្យចាត់ទុកសមិទ្ធផលជោគជ័យ ដែលពួកគេដណ្តើមបានកន្លងមក ជាអតីតកាល ហើយត្រូវខំប្រឹងកែប្រែចំណុខ្វះខាត និងពង្រឹងសមត្ថភាពឱ្យបានកាន់តែខ្លាំង ដើម្បីបង្កើតបាននូវសមិទ្ធផលជោគជ័យថ្មីៗបន្ថែមទៀតជូនជាតិ។
លោកថ្លែងថា៖ «សមិទ្ធផល ដែលយើងបានបង្កើតឱ្យមានឡើង ក្នុងរយៈពេលប្រមាណ៥ឆ្នាំចុងក្រោយនេះ ជាសមិទ្ធផលហួសពីការរំពឹងទុក ហើយក្នុងន័យនេះខ្ញុំសូមឱ្យចាត់ទុកថា នេះជាអតីតកាលរបស់យើង។ ត្រូវហើយ យើងត្រូវស៊ីកេរអតីតកាលរបស់យើង ប៉ុន្តែបើយើងអង្គុយដេកស៊ីកេររហូត ថ្ងៃក្រោយ គឺយើងអង្គុយអេះពោះខ្លួនឯងតែម្តង»។
សួន ចាន់ណារ៉ូ បានគាំទ្រការលើកឡើងនេះពេញទំហឹង។ «ពិតណាស់ យើងមិនអាចដេកដួល នៅស៊ីប្រាក់រង្វាន់ហ្នឹងបានទេ យើងត្រូវតែបន្តទៅមុខទៀត ព្រោះប្រាក់រង្វាន់នេះ គ្រាន់តែជាស្ពានមួយជួយត្រួសត្រាយផ្លូវឱ្យយើងបន្តដំណើរទៅមុខ អ៊ីចឹងយើងត្រូវបន្តហ្វឹកហាត់ថែមឱ្យខ្លាំងជាងហ្នឹងទៀត ហើយខ្ញុំជឿថា យើងនឹងមានអ្វីៗប្លែកជាងហ្នឹងទៀត មិនមែននៅត្រឹមប៉ុណ្ណឹងទេ»។
ជាមួយគ្នានេះ លោក ស សុខា បានអំពាវនាវឱ្យកីឡាករ ដែលមានជំនឿលើសហព័ន្ធ និងជឿថា ខ្លួនឯងធ្វើបាន សូមកុំលះបង់នូវសុបិន្ត ព្រោះអាជីពកីឡាករនៅស្រុកខ្មែរ មិនលើសពី១០ឆ្នាំទេ ឬអាចតិចជាងនេះ ហេតុនេះអត្តពលិកបន្តវេនទាំងអស់ ត្រូវប្រើឱកាសនេះ ដើម្បីរកលុយ និងសាងកេរ្តិ៍ឈ្មោះសម្រាប់ខ្លួនឯង និងប្រទេសជាតិ។
លោកសង្កត់ធ្ងន់ថា៖ «នេះជាឱកាសដែលក្រុមអត្តពលិករបស់យើងរកលុយ អ៊ីចឹងសូមឱ្យប្រើប្រាស់ឱកាសនេះ ជាឱកាសមាសឱកាសពេជ្រ ដើម្បីជាការពង្រឹងគុណផល និងពង្រីកកិត្តិយសជាតិ ជាពិសេសក្រុមគ្រួសាររបស់យើង។ ពាក្យថា សហព័ន្ធ គឺដើម្បីជាតិ មិនមែនដើម្បីខ្ញុំម្នាក់ ឬក្រុមបាល់ទះណាមួយនោះទេ អ៊ីចឹងកីឡាករ ដែលមានឆន្ទៈ ការលះបង់ យើងនឹងជ្រើសរើសចូលរួមជាមួយក្រុមជម្រើសជាតិ នៅពេលខាងមុខ»។
ជុំវិញកីឡាករថ្នាលរបស់ក្រុមបាល់ទះកម្ពុជានេះ គួន មុំ បានអះអាងថា ៣ឆ្នាំទៀត នឹងអាចជំនួសពួកយើងបាន និងអាចអភិវឌ្ឍខ្លួនរឹតតែល្អ ព្រោះពួកគាត់មានកាយសម្បទាធំ និងខ្ពស់ សុទ្ធតែជិត២ម៉ែត្រ និងជាង២ម៉ែត្រ ចំណែកការផ្គត់ផ្គង់ទៅលើការស្នាក់នៅ ហូបចុក និងការផ្តល់ជាប្រាក់ខែ ដែលវិសាខា ផ្តល់ឱ្យគឺល្អបំផុតហើយ ល្អជាងក្លិបនៅបរទេសមួយចំនួនទៅទៀត។
គួន មុំ បញ្ជាក់ថា៖ «យើងនៅតែចាំមើលការហ្វឹកហាត់ និងការតាំងចិត្តរបស់ពួកគាត់ទេ។ បើពួកគាត់មានការតាំងចិត្តដូចពួកខ្ញុំថា មានការប្តូរផ្តាច់ដូចគ្នា ខ្ញុំជឿជាក់ថា ពួកគាត់ នឹងអាចល្បីខ្លាំងជាងពួកខ្ញុំ ហើយលេងឈ្នះជាមួយក្រុមខ្លាំងៗជាងពួកខ្ញុំទៅទៀត»៕
