សមាគមសម្ព័ន្ធអ្នកសារព័ត៌មានកម្ពុជា

សហជីពថាកូនប្រុសប្រធាននាយកប្រតិបត្តិណាហ្គាខប បោកកម្ទេចទូរសព្ទកូដករម្នាក់

រូបថតពីវីដេអូដែលបង្ហាញពីបុរសម្នាក់ដែលសហជីពកំណត់អត្តសញ្ញាណថាឈ្មោះ Chen Yiy Hwuan កូនប្រុសរបស់នាយកប្រតិបត្តិជាន់ខ្ពស់ណាហ្គាខបលោក Chen Lip Keong បានដណ្តើមទូរសព្ទរបស់បុគ្គលិកដែលធ្វើកូដកម្មនៅខាងក្រៅកាស៊ីណូណាហ្គាវើលដ៍យកបោកកម្ទេចនឹងដីកាលពីថ្ងៃទី ៣០ ខែកញ្ញា ឆ្នាំ ២០២២។ (LRSU/ម៉ម សុវឌ្ឍិន)
រូបថតពីវីដេអូដែលបង្ហាញពីបុរសម្នាក់ដែលសហជីពកំណត់អត្តសញ្ញាណថាឈ្មោះ Chen Yiy Hwuan កូនប្រុសរបស់នាយកប្រតិបត្តិជាន់ខ្ពស់ណាហ្គាខបលោក Chen Lip Keong បានដណ្តើមទូរសព្ទរបស់បុគ្គលិកដែលធ្វើកូដកម្មនៅខាងក្រៅកាស៊ីណូណាហ្គាវើលដ៍យកបោកកម្ទេចនឹងដីកាលពីថ្ងៃទី ៣០ ខែកញ្ញា ឆ្នាំ ២០២២។ (LRSU/ម៉ម សុវឌ្ឍិន)

កូនប្រុសរបស់ប្រធាននាយកប្រតិបត្តិ ដែលជាមហាសេដ្ឋីណាហ្គាខប (NagaCorp’s ) ត្រូវបានសហជីពចោទប្រកាន់ថា បានធ្វើសកម្មភាពដ៏គួរឱ្យភ្ញាក់ផ្អើលមួយដោយបានឆក់យកទូរសព្ទរបស់បុគ្គលិកកាស៊ីណូណាហ្គាវើលដ៍ម្នាក់ដែលជាកូដករគប់ទៅនឹងដី ដែលក្នុងវីដេអូនោះក៏បង្ហាញថាបុរសនោះបានគប់កោណចរាចរណ៍លើអ្នកតវ៉ាដែលជាសមាជិកសហជីពផងដែរ។

លោក​​​​​​​​​​​​​​​​ Chen Yiy Hwuan ដែលជាកូនប្រុសរបស់ស្ថាបនិកណាហ្គាខបនិងជានាយកប្រតិបត្តិជាន់ខ្ពស់លោក Chen Lip Keong បានចាប់និងឆក់ទូរសព្ទរបស់កម្មករដែលធ្វើកូដកម្មនៅណាហ្គាវើលដ៍ឈ្មោះ ឡិច ជូឡាយ កាលពីថ្ងៃសុក្រសប្តាហ៍មុន នៅខាងក្រៅច្រកចូលកាស៊ីណូនារាជធានីភ្នំពេញ។ នេះបើយោងតាមវីដេអូដែលបង្ហោះ និងការអះអាងពីអតីតបុគ្គលិកនិងបុគ្គលរបស់ណាហ្គាវើលដ៍ រួមទាំងកញ្ញា ឈឹម ស៊ីថរ ដែលប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) ផងដែរ។

លោក ជូឡាយ កំពុងប្រើទូរសព្ទរបស់គាត់ដើម្បីថតវីដេអូសមាជិកសហជីពដែលកំពុងអង្គុយនៅតាមផ្លូវដោយរារាំងឡានពណ៌ខ្មៅមិនឱ្យចេញពីកាស៊ីណូនៅពេលនោះបុរសម្នាក់ដើរមករកលោកហើយបានឆក់យកទូរសព្ទរបស់លោក។​ នេះបើយោងតាមវីដេអូដែលបង្ហោះនៅលើហ្វេសប៊ុក ដោយសមាជិក LRSU ម្នាក់ទៀត។ ក្នុង​វីដេអូ​ទី​ពីរ​ដែល​បង្ហោះលើហ្វេសប៊ុកដដែលនោះ បុរស​ដែល​ត្រូវ​បាន​កំណត់​អត្តសញ្ញាណ​ដោយ​ក្រុម​សហជីព​ថា​ជាលោក Yiy Hwuan បាន​គប់​ទូរសព្ទរបស់កូដករ​ទៅ​ចិញ្ចើម​ផ្លូវ។

លោក ជូឡាយ​ ដែល​បម្រើ​ការ​ជា​អ្នក​គិតលុយ​នៅ​ណាហ្គាវើលដ៍ជា​កាស៊ីណូ​ដែល​មាន​អាជ្ញាបណ្ណ​តែ​មួយ​គត់​នៅ​ភ្នំពេញ​រយៈពេល ៥ បាននិយាយថា៖ «អេក្រង់ខាងមុខរងការខូចខាត។ គាត់[កូនថៅកែ]​គ្មាន​សិទ្ធិ​បោក​ទូរសព្ទ​ខ្ញុំ​ទេ»​ លោកបានប្រាប់ថាលោកបានទិញទូរសព្ទ Samsung Galaxy S10​ នោះ ក្នុងតម្លៃ៦០០ដុល្លារ។

ក្រោយ​ពី​ឆក់​ទូរសព្ទយកទៅបោក បុរស​​ត្រូវ​បាន​គេ​ស្គាល់​ថា​ឈ្មោះ Yiy Hwuan​ នោះ ក៏​ត្រូវ​បាន​គេ​ឃើញ​នៅ​ក្នុង​វីដេអូ​គប់​កោណចរាចរណ៍​ពណ៌​ទឹក​ក្រូច​ដាក់​កូដករផងដែរ មុន​ពេល​សន្តិសុខ​នាំ​គាត់​ចេញ​ទៅ។

តាមរយៈវីដេអូដដែល លោក ជូឡាយ រើសទូរសព្ទមកវិញ ហើយបន្តថតវីដេអូទៀត ហើយថែមទាំងយកទូរស័ព្ទនោះទៅថតបុរសដែលបោកទូរសព្ទរបស់លោកនោះថែមទៀត។ បន្ទាប់​មក បុរស​នោះ​បាន​ចូល​ទៅ​ក្នុង​រថយន្ត ហើយ​ចាក​ចេញ​ពី​កន្លែង​កើត​ហេតុ បន្ទាប់​ពី​សន្តិសុខ​បាន​បង្ខំ​លើក​និង​សែង​បាតុករ​ជា​ច្រើន​នាក់ចេញពីនោះ។

លោក Yiy Hwuan ត្រូវបានតែងតាំងជានាយកប្រតិបត្តិនៃសណ្ឋាគារណាហ្គាខបកាលពីថ្ងៃទី៥ខែមេសា នេះបើយោងតាមឯកសាររបស់ផ្សារហ៊ុនហុងកុង។ បងប្អូនប្រុសពីរនាក់ទៀតរបស់ Yiy Hwuan គឺ Chen Yiy Fon និង Chen Cherchi ក៏ត្រូវបានតែងតាំងជានាយកប្រតិបត្តិណាហ្គាខបផងដែរ ពោលគឺនាយកប្រតិបត្តិ និងនាយកប្រតិបត្តិហិរញ្ញវត្ថុ និងរតនាគារ។​ ខណៈលោក Lip Keong ផ្លាស់​ទៅ​កាន់​តួនាទី​ជាប្រធាននាយកប្រតិបត្តិ។

ឯកសារដដែលឱ្យដឹងទៀតថា៖ «ពួកគេទាំងបួននាក់នឹងធ្វើការរួមគ្នាជាក្រុមដើម្បីដឹកនាំ និងគ្រប់គ្រងក្រុមហ៊ុន ដើម្បីនាំក្រុមហ៊ុនទៅកាន់ភាពជោគជ័យមួយកម្រិតទៀត» ។

កូនប្រុសទីបួនរបស់ Lip Keong ឈ្មោះ Chen Yepern មានតួនាទីជានាយកគ្រប់គ្រងក្នុងជួរនាយកប្រតិបត្តិនិងជានាយកផ្នែកសកម្មភាពបរិស្ថាន សង្គម និងអភិបាលកិច្ចរបស់ណាហ្គាខប។

លោក Yiy Hwuan អាយុ ៤២ ឆ្នាំក៏ត្រូវបានបម្រើការងារជានាយកប្រតិបត្តិនៃក្រុមហ៊ុនបុត្រសម្ព័ន្ធណាហ្គាខបគឺ NagaFarm Limited ដែលជាក្រុមហ៊ុនកសិកម្ម។ ឯកសារនោះបាននិយាយថាលោក Yiy Hwuan បានទទួលប្រាក់ខែគោលចំនួន១៧៦​​ ០០០ដុល្លារនៅក្នុងឆ្នាំ២០២១។

លោក Lip Keong វ័យ៧៤ឆ្នាំបានបង្កើតមូលនិធិគ្រួសារមួយសម្រាប់កូនប្រុសទាំងប្រាំនាក់របស់ខ្លួនសម្រាប់ «គោលបំណងផែនការស្នងតំណែង» នេះបើយោងតាមឯកសារផ្សារហ៊ុនហុងកុងមួយផ្សេងទៀតដែលចេញកាលពីខែកក្កដា។ ប្រធានណាហ្គាខបបានផ្ទេរភាគហ៊ុនជិត៧០ភាគរយនៃភាគហ៊ុនណាហ្គាខបទៅឱ្យមូលនិធិ ដែលការណ៍នេះធ្វើឱ្យ Lip Keong និងកូនប្រុសរបស់គាត់ក្លាយជាអ្នកគ្រប់គ្រងម្ចាស់ភាគហ៊ុនរបស់ក្រុមហ៊ុន។

កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) បានលើកឡើងស្រដៀងនឹងលោក ជូឡាយដែរថា៖ «កូនប្រុសរបស់ថៅកែខ្ញុំគឺជាអ្នកបំផ្លាញទូរសព្ទរបស់កូដករ»។ កញ្ញាថាខ្លួនបានស្គាល់ Yiy Hwuan ពីការធ្វើការនៅកាស៊ីណូអស់ជាច្រើនឆ្នាំ។

ស៊ីថរ ​បាន​និយាយ​ថា​៖ «​យើង​ក៏​បាន​ចូលរួម​ក្នុង​ពិធី​ខួបកំណើត​របស់​ថៅកែ​យើង ដែល​កាលហ្នឹងគាត់​បានណែនាំ​កូនៗ​របស់​គាត់​ឱ្យបុគ្គលិកស្គាល់ដែរ​»​

រូបថតពីវីដេអូបង្ហាញពីបុរសម្នាក់ដែលសហជីពកំណត់អត្តសញ្ញាណថាជា Chen Yiy Hwuan កូនប្រុសរបស់នាយកប្រតិបត្តិជាន់ខ្ពស់ណាហ្គាខបលោក Chen Lip Keong កំពុងគប់កោណចរាចរណ៍លើក្រុមអ្នកតវ៉ាដែលជាសហជីពកាលពីថ្ងៃទី៣០ខែកញ្ញា ឆ្នាំ២០២២។ (LRSU/ម៉ម សុវឌ្ឍិន)

សមាជិកសហជីព LRSU ពីរនាក់ទៀតបាននិយាយថា Yiy Hwuan គឺជាបុរសដែលត្រូវបានគេឃើញគប់ទូរសព្ទ និងកោណចរាចរណ៍នៅក្នុងវីដេអូ។ ពួកគេបានរំឮកថាធ្លាប់បានឃើញ និងទាក់ទងជាមួយ Yiy Hwuan ក្នុងរយៈពេលជាច្រើនឆ្នាំដែលពួកគេធ្វើការនៅក្នុងកាស៊ីណូណាហ្គាវើលដ៍។

 អ្នកស្រី ម៉ម សុវឌ្ឍិន បានប្រាប់ថា៖ «ភាគច្រើន ខ្ញុំឃើញគាត់មកផឹកកាហ្វេ និងមើលបុគ្គលិកដែលកំពុងធ្វើការ។ ខ្ញុំ​ប្រាកដ​ថា​គាត់​ជា​កូន​ប្រុស​ច្បង​របស់​ថៅកែ​យើង»។

ក្រោយមកសុវឌ្ឍិន  បានបង្ហោះវីដេអូនៃឧបទ្ទវហេតុនេះនៅលើគណនីហ្វេសប៊ុកផ្ទាល់ខ្លួនរបស់នាង ដែលវីដេអូមួយទទួលបានការចូលមើលជាង ២១៨,០០០ គិតត្រឹមព្រឹកថ្ងៃព្រហស្បតិ៍។

NagaCorp មិន​បាន​ឆ្លើយតប​នឹង​សំណើ​សុំ​ការ​អត្ថាធិប្បាយ​តាម​អ៊ីមែល​ទេ។ បុគ្គល​ម្នាក់​ដែល​បាន​លើក​ទូរសព្ទ​សម្រាប់​លេខទំនាក់ទំនង​មួយ​ដែល​ដាក់ថាជា​អ្នក​នាំពាក្យ​ណាហ្គាខប បាន​បដិសេធ​មិន​ធ្វើ​អត្ថាធិប្បាយ​ទេ​កាលពី​ថ្ងៃ​ពុធ។ នៅពេលសួរអំពី Yiy Hwuan អ្នកលើកទូរសព្ទបាននិយាយថា៖ «គាត់នៅក្រៅទីក្រុង»។

នៅពេលដែលអ្នកយកព័ត៌មានបានទាក់ទងទៅលេខទូរស័ព្ទដែលមានឈ្មោះ Chen Yiy Hwuan ប្រធានក្រុមហ៊ុន Tikto Asia Co. Ltd. នៅក្នុងការចុះបញ្ជីពាណិជ្ជកម្មរបស់ក្រសួងពាណិជ្ជកម្ម បុរសម្នាក់បានឆ្លើយ និងទទួលស្គាល់ថាលេខនេះជារបស់ក្រុមហ៊ុនTikto ប៉ុន្តែបដិសេធមិនបង្ហាញអត្តសញ្ញាណខ្លួនឯងទេ។

 នៅពេលសួរថាតើបុរសនៅក្នុងវីដេអូដែលគប់ទូរសព្ទនោះគឺជា Yiy Hwuan ដែរឬទេ គាត់បាននិយាយថា ៖«យើងមិនអាចបញ្ជាក់ ឬបដិសេធបានទេ» ហើយក៏បានបដិសេធមិនធ្វើអត្ថាធិប្បាយបន្ថែម។

យោងតាមក្រមសីលធម៌របស់ណាហ្គាខបនិយាយថា៖ «ការគ្រប់គ្រងត្រូវតែធ្វើជាគំរូមួយទាក់ទងនឹងទំនួលខុសត្រូវ និងភាពស្មោះត្រង់របស់បុគ្គលម្នាក់ៗ ពីព្រោះថាទីបំផុតសកម្មភាពរបស់យើងគឺសំខាន់ជាងពាក្យសម្ដី» នេះបើតាមអ្វីដែលបង្ហោះលើគេហទំព័ររបស់ក្រុមហ៊ុន។

 អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍ថា បុគ្គលិកកាស៊ីណូដែលពាក់ព័ន្ធនឹងឧប្បត្តិហេតុអាចដាក់ពាក្យបណ្តឹងទៅនគរបាលបាន។

លោក​បាន​ថ្លែង​ថា​៖ «​ប្រសិន​បើ​ទូរសព្ទ​ខូច ហើយ​ពួក​គាត់​មាន​ភស្តុតាង​គួរ​ឱ្យ​ជឿ​នោះ​ពួក​គាត់​អាច​ប្តឹង​បាន​ វា​ជា​សិទ្ធិ​របស់​ពួក​គាត់»

វីដេអូដែល​បុរស​ម្នាក់​ត្រូវ​បាន​ក្រុម​សហជីព​កំណត់​អត្តសញ្ញាណ​ថា​ឈ្មោះ Chen Yiy Hwuan ជា​កូន​របស់​នាយក​ប្រតិបត្តិ​ជាន់​ខ្ពស់​ណាហ្គាខប លោក Chen Lip Keong បាន​គប់​ទូរសព្ទ​របស់កូដករនិង​កោណ​ចរាចរណ៍​នៅ​ខាង​ក្រៅ​កាស៊ីណូណាហ្គាវើលដ៍ នៅ​ថ្ងៃ​ទី​៣០ ខែ​កញ្ញា ឆ្នាំ​២០២២។ (LRSU/ម៉ម សុវឌ្ឍិន)

លោក ជូឡាយ បុគ្គលិកកាស៊ីណូដែលទូរសព្ទរបស់លោករងការខូចខាតបាននិយាយថាលោកកំពុងពិចារណាលើប្តឹងចោទប្រកាន់លើ Yiy Hwuan ប៉ុន្តែលោកបានលើកឡើងថា៖ «យើងនឹងពិភាក្សាជាមួយសហជីពរបស់យើងជាមុនសិន»។

 ប្រធាន LRSU កញ្ញា ស៊ីថរ បាននិយាយថា សហជីពកំពុងពិចារណា ថាតើត្រូវចាត់វិធានការផ្លូវច្បាប់លើលោក ជូឡាយ ដែរឬទេ។

 កញ្ញាបាន​បន្ត​ថា​៖ «​អ្វី​ដែល​យើង​ឃើញ​ នេះ​ជា​អំពើ​ស្អប់​ខ្ពើម​ចំពោះ​កម្មករ​ក្នុង​ស្រុក ជា​ពិសេស​នៅ​ពេល​ដែល​កូដករ​កំពុង​ធ្វើ​កូដកម្ម​ដើម្បី​ការពារ​សិទ្ធិ​ការងារ​របស់​ពួកគេ​នៅ​កន្លែង​ធ្វើការ»។

LRSU បានដឹកនាំបុគ្គលិកកាស៊ីណូណាហ្គាវើលដ៏ធ្វើកូដកម្មចាប់តាំងពីខែធ្នូ ឆ្នាំ២០២១ បន្ទាប់ពីមានការបញ្ឈប់បុគ្គលិកយ៉ាងច្រើន ដែលពួកគេនិយាយថាភាគច្រើនជាមេដឹកនាំសហជីព និងមិនបានផ្តល់សំណងដល់កម្មករឱ្យបានត្រឹមត្រូវ។

កាល​ពី​សប្តាហ៍​មុន សហជីព និង​អង្គការ​សង្គម​ស៊ីវិល​ចំនួន ១៧ បាន​អំពាវនាវ​ឲ្យ​ក្រុមហ៊ុន​ទទួល​កម្មករ​ដែល​ត្រូវ​បាន​គេ​បញ្ឈប់​ពី​ការងារ​ឡើង​វិញ ប្រាក់​បំណាច់​អតីតភាព​ការងារ និង​អនុវត្ត​ទៅ​តាម​ច្បាប់​ការងារ។

សមាជិក​សហជីព សុវឌ្ឍិន បាន​និយាយ​ថាអ្នកស្រី​សង្ឃឹម​ថា​វីដេអូ​ទាំង​នោះ​នឹង​ជួយជំរុញឱ្យមាន​​ចំណាត់ការ។

អ្នកស្រីបានមានប្រសាសន៍ថា៖ «ខ្ញុំសង្ឃឹមថា ប្រមុខរដ្ឋាភិបាល ជាពិសេសសម្តេចតេជោ [លោកនាយករដ្ឋមន្ត្រី ហ៊ុន សែន] នឹងមិនអនុញ្ញាតឱ្យណាហ្គាវើលដ៍ បំពានច្បាប់ប្រទេសយើងឡើយ ព្រោះយើងឃើញចរិតកូនប្រុសថៅកែរបស់យើង ដែលមើលងាយកម្មករខ្មែរ។ ប្រសិន​បើ​ [លោកនាយករដ្ឋមន្រ្តី ហ៊ុន សែន] មិន​ធ្វើ​អន្តរាគមន៍​ទេ វា​ជា​រឿង​ដ៏​សោកសៅ​បំផុត»

 អ្នក​ស្រី​បាន​បន្ថែម​ថា៖ «យើង​គ្រាន់​តែ​ស្វែង​រក​យុត្តិធម៌ និង​ចង់ចូល​ទៅ​ធ្វើ​ការ​វិញប៉ុណ្ណោះ»៕​

ប្រែសម្រួលពីអត្ថបទភាសាអង់គ្លេស៖ NagaCorp Chief CEO’s Son Smashes Casino Striker’s Phone, Union Says

693 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម