សមាគមសម្ព័ន្ធអ្នកសារព័ត៌មានកម្ពុជា

កូដករណាហ្គាវើលដ៍នៅតែបន្តធ្វើកូដកម្ម ទោះបីសមត្ថកិច្ចចាប់ពួកគេឱ្យធ្វើចត្តាឡីស័ក

កូដករណាហ្គាវើលដ៍ត្រូវបានសមត្ថកិច្ចចាប់បង្ខំឲ្យពួកគេចូលក្នុងរថយន្តក្រុង ខណៈពេលពួកគេបានត្រឡប់ មកបន្តធ្វើកូដកម្មឡើងវិញក្បែរអគារក្រុមហ៊ុនកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតថ្ងៃទី២៣ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង
កូដករណាហ្គាវើលដ៍ត្រូវបានសមត្ថកិច្ចចាប់បង្ខំឲ្យពួកគេចូលក្នុងរថយន្តក្រុង ខណៈពេលពួកគេបានត្រឡប់ មកបន្តធ្វើកូដកម្មឡើងវិញក្បែរអគារក្រុមហ៊ុនកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតថ្ងៃទី២៣ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង

កូដករណាហ្គាវើលដ៍នៅតែបន្តធ្វើកូដកម្មនៅថ្ងៃអង្គារនេះ ទោះបីសមត្ថកិច្ចរាជធានីភ្នំពេញ​បាន​ចាប់បង្ខំ​ពួកគេរុញចូលរថយន្តក្រុង ដឹកយកទៅ​ធ្វើចត្តាឡីស័កនិងធ្វើតេស្តរកវីរុសកូវីដ-១៩​នៅ​សមាគម​នារី​កម្ពុជា​ដើម្បី​អភិវឌ្ឍន៍​ ក្នុងខណ្ឌ​ព្រែក​​ព្នៅ រាជ​ធានី​ភ្នំ​ពេញ ដោយមិន​បាន​រក​ដំណោះស្រាយជូនពួកគេ។

ក្រុមកូដករ បានប្រាប់ឱ្យដឹងថា សមត្ថកិច្ច​បានបន្តចាប់ខ្លួនកូដករចំនន៥១ នាក់បន្ថែមទៀត​នៅរសៀលថ្ងៃទី២៣ ខែកុម្ភៈនេះ ទៅសមាគម​នារី​កម្ពុជា​ដើម្បី​អភិវឌ្ឍន៍​ ក្នុងខណ្ឌ​ព្រែក​​ព្នៅ។ ដោយឡែក សម្រាប់កូដករដែលបានបញ្ជូនមកមណ្ឌលចត្តាឡីស័ក​កាលពីម្សិលមិញ​ទាំង​៣៩នាក់ ត្រូវបានអាជ្ញាធរបង្ខំឱ្យចុះកិច្ចសន្យា និងសរសេរ​លិខិតផាកពិន័យ តែត្រូវបានកូដករ​បដិសេធមិនព្រមធ្វើតាម។​

យោងតាមសេចក្ដីប្រកាសរបស់រដ្ឋបាលរាជធានីភ្នំពេញដែលចេញថ្ងៃអង្គារ ចាប់តាំង​ពីថ្ងៃ​ទី២១ ខែកុម្ភៈ មក អាជ្ញាធរបានបញ្ជូនកូដករទៅមជ្ឈមណ្ឌលចត្តាឡីស័ក​រាជធានីភ្នំពេញ ដើម្បីបន្តផ្ទៀងផ្ទាត់​ពិនិត្យរកឈ្មោះបាតុករដែលមិនទាន់បានយកសំណាកលើកទី២។ លើកទីមួយ៦៤នាក់ត្រូវបានចាប់ខ្លួន និងលើកទីពីរមាន ៣៩នាក់ ក្នុងនោះមាន​៦នាក់​វិជ្ជមានកូវីដ។

កូដករមួយរូបដែលមិនទាន់កាត់ឈ្មោះ កញ្ញា សៀក កញ្ញា អាយុ ៣៤ឆ្នាំ ជាបុគ្គលិកផ្នែក​គ្រប់គ្រប់ម៉ាស៊ីនហ្គេម បានឱ្យដឹងថា កាលពីថ្ងៃទី២២ ខែកុម្ភៈ​ អាជ្ញាធរបានចាប់ខ្លួននាង​ទាំង​កំរោល ដោយអូសចូលក្នុងឡាន និងបន្លំប៉ះពាល់ខ្លួនប្រាណនាងផងដែរ ខណៈនាង​បាន​ប្រាប់​អាជ្ញាធរឱ្យឈប់ តែអ្នកដែលចាប់នាងនៅតែផ្គើនលើសដើម។

កញ្ញាប្រាប់ថា៖ «គឺគាត់អូសខ្ញុំតែម្ដង អូសហើយដៃរបស់គាត់ទាំងពីរបានប៉ះដើមទ្រូងខ្ញុំទៀត ខ្ញុំបានស្រែកប្រាប់គាត់ថា ប៉ះខ្ញុំហើយតែគាត់អត់ខ្វល់ទេ ចាប់ខ្ញុំអូស ហើយដៃក្ដោប​ដើម​ទ្រូង​ខ្ញុំរហូត»។​

កញ្ញាលើកឡើងថា តើនេះជាវិធានការសុខាភិបាលមែនទេ? ហេតុអ្វីអនុវត្តស្ដង់ដារពីរ តែមកលើកូដករដែលគ្រាន់តែទាមទារសេរីភាពការងារ ចុះចំណែកអ្នកទស្សនាបាល់ទាត់? កញ្ញាចាត់ទុកថា ទង្វើររបស់អាជ្ញាធរ គឺជាការរំលោភសិទ្ធិ និងរើសអើងមកលើកូដករ។

កញ្ញាបន្តថា៖ «ខ្ញុំគោរពតាមវិធានការសុខាភិបាលអស់ហើយ អត់បានពពាក់ពពូន​ដោយ​ខុសច្បាប់អីទេ ចុះអ្នកមើលបាល់? ចំនួនឡើង២ម៉ឹននាក់ជាងអត់មានរក្សាគម្លាតទេ ហេតុអ្វី​អាជ្ញាធរអត់ប្រើវិធានការសុខាភិបាល ដូចប្រើមកលើពួកខ្ញុំ និយាយរួមរើសអើង​មកលើ​កូដករ»។

កញ្ញាបានលើកជាសំណើរដល់ក្រសួងកិច្ចការនារី ឱ្យជួយអន្តរាគមន៍ ចំពោះការរំលោភបំពាន​លើរូបរាងកាយនាង ហើយកញ្ញាថ្កោលទោសចំពោះ​ក្រសួងសុខាភិបាល ដែលប្រើប្រាស់មន្រ្តី​គ្មានវិជ្ជាជីវៈមកធ្វើបាបកូដករស្រីៗ។

កញ្ញាបន្តថា ក្នុងនាមជាកូដករ រូបនាងនៅតែរក្សាជំហរដដែល ក្នុងការធ្វើកូដកម្ម បើគ្មានការ​ដោះលែងថ្នាក់ដឹកនាំ និងដោះស្រាយវិវាទការងារនេះ។

កញ្ញាប្រាប់ឱ្យដឹងថា៖ «ខ្ញុំជាកូដករពិតជាមានការងឿងឆ្ងល់ណាស់ ហេតុអ្វីបាន​ក្រសួងសុខាភិបាលប្រើវិធានការខុសគ្នា និងការផាកពិន័យខុសគ្នារវាងពួកខ្ញុំជាកូដករ និងអ្នកមើលបាល់ទាត់ វាអយុត្តិធម៌ខ្លាំង វាអត់ត្រឹមត្រូវ»។

កញ្ញាបានឱ្យដឹងទៀតថា រូបនាងក៏ដូចជាកូដករផ្សេងទៀតគឺបានគោរព​វិធានការ​សុខាភិបាល​រួចហើយ ដោយធ្វើតេស្តនៅកោះពេជ្រចំនួន២ដងមកហើយ​ និងបាន​ធ្វើចត្តាឡីស័ក​ចំនួន​១០ថ្ងៃ​បន្ថែមទៀត ហើយទម្រាំចេញធ្វើកូដកម្មជាថ្មីក៏បានតេស្តឃើញអវិជ្ជមានហើយដែរ។

ហើយរូបគេពិតជាមានការងឿងឆ្ងល់ចំពោះអាជ្ញាធរ ក្នុងការអនុវត្តវិធានការសុខាភិបាល និងការផាកពិន័យមកលើពួកគេ។

កញ្ញាបន្ថែមថា៖ «ខ្ញុំមិនទាន់ទទួលបានសិទ្ធិសេរីភាពពីថៅកែណាហ្គាវើលដ៍ទេ ហើយនេះជាវិវាទការងារសុទ្ធសាធ មិនមែនបញ្ហាជាមួយរដ្ឋាភិបាល ឬអាជ្ញាធរទេ ក្រសួងពាក់ព័ន្ធទាំងអស់ត្រូវឈរលើច្បាប់ និងចំណុចកណ្ដាល»។

ក្រុមកូដករណាហ្គាវើលដ៍ដែលសមត្ថកិច្ចចាប់បញ្ជូនទៅធ្វើចត្តាឡីស័ក​និងធ្វើតេស្តរកវីរុសកូវីដ-១៩​នៅ​សមាគម​នារី​កម្ពុជា​ដើម្បី​អភិវឌ្ឍន៍​ ក្នុងខណ្ឌ​ព្រែក​​ព្នៅ រាជ​ធានី​ភ្នំ​ពេញ។ រូបថតថ្ងៃទី២២ ខែកុម្ភៈ ឆ្នាំ២០២២។ រូបថតផ្តល់ឱ្យ

ចំណែក កញ្ញា មៀច ស្រីអូន អាយុ២៨ឆ្នាំ ធ្វើការជាអ្នកចែកបៀរយៈពេល៨ឆ្នាំ បានលើក​ឡើងស្រដៀងគ្នាថា ពួកគេមានការអន់ចិត្តជាខ្លាំង ចំពោះទង្វើររបស់អាជ្ញាធរ ក្នុងការ​អនុវត្ត​វិធានការសុខាភិបាល ដែលមានស្ដង់ការផ្ទុយគ្នា ខុសពីអ្នកចូលរួមទស្សនាប្រកួតបាត់ទាត់ ខណៈក្រុមកូដករគោរពតាមវិធានការសព្វបែបយ៉ាង តែអាជ្ញាធរនៅតែបន្តរារាំងកម្មករមិន​ឱ្យធ្វើកូដកម្មទៅវិញ។

ស្រីអូន ថ្លែងយ៉ាងដូច្នេះថា៖ «ខ្ញុំនិងកូដករផ្សេងទៀតអន់ចិត្តខ្លាំង អាជ្ញាធរមានការ​លំអៀង​មកលើកូដករមែនទែន ហើយចំពោះអ្នកចូលរួមមើលបាល់ទាត់U23 ច្រើនម៉ឺននាក់ កាលពី​ថ្ងៃ១៤ ១៧ និង២០ ខែកុម្ភៈ អាជ្ញាធរមិនមានចំណាត់ការផង មករារាំងតែកូដករ»។

កញ្ញាស្រីអូន បន្តទៀថា នៅថ្ងៃទី២១ ខែកុម្ភៈ ឆ្នាំ២០២២ មានការប្រើហិង្សាមក​លើកូដករ​ស្ត្រីដោយធាក់កូដករបញ្ចូលឡានក្រុង ហើយថ្ងៃទី២២ មានការចាប់ដើមទ្រូងស្ត្រីកូដករ ដែលជាចេតនាច្បាស់មកចាប់លើស្ត្រី ដែលចេញទាមទារសិទ្ធិសហជីព។

កូដករវ័យ២៨ឆ្នាំរូបនេះ ឱ្យដឹងទៀតថា នៅពេលដែលអាជ្ញាធរបញ្ជូនពួកគេទៅ​មណ្ឌល​ចត្តាឡីស័ក គឺគ្រូពេទ្យមិនបានយកសំណាកពួកគេភ្លាមទេ ដោយបង្ខំឱ្យបំពេញឯកសារ ទើប​ផ្ដល់បាយឱ្យកូដករហូប និងទុកពួកគេចោលមួយយប់ ដោយគ្មានកន្លែងសម្រាកត្រឹម​ត្រូវរហូត​ដល់ព្រឹកទើបព្រមធ្វើសំណាកពួកគេ។

ស្រីអូនបញ្ជាក់ថា៖ «គេបញ្ជូនពួកខ្ញុំទៅ តែពេលទៅដល់គ្រូពេទ្យមិនព្រមធ្វើសំណាកភ្លាមៗទេ ទុកពួកខ្ញុំចោលមួយយប់ សូម្បីកន្លែងគេងក៏គ្មានត្រឹមត្រូវ សុទ្ធតែដី សំរាមពេញហ្នឹង​បើភួយ​ខ្នើយវិញប្រឡាក់ដីទាំងអស់​ ហើយពួកខ្ញុំសម្រេចចិត្តគេងក្រៅហាលសន្សើម ទម្រាំបាន​តេស្ត​ដល់ម៉ោង៩ព្រឹក»

មកដល់ថ្ងៃទី២២ ស្រីអូនប្រាប់ថា ពួកគេទាំង៣៩នាក់ ដែលអាជ្ញាធរបញ្ជូន​មក​ម្សិលមិញមិនទាន់អនុញ្ញាតឱ្យត្រឡប់ទៅផ្ទះនៅឡើយទេ ​ហើយស្រីអូនចាត់ទុកថា សាលាក្រុងប្រើប្រាស់វិធានការសុខាភិបាល ជាសំអាងក្នុងការបង្ក្រាបកូដករដែល​ធ្វើកូដកម្មដោយសន្តិវិធី។

ឆ្លើយតបនឹងសំនួរថា ហេតុអ្វីអាជ្ញាធរអនុវត្តវិធានសុខាភិបាលទៅលើកូដករ តែមិន​អនុវត្ត​លើអ្នក​គាំទ្របាល់ទាត់ អាជ្ញាធរមិនអើពើរ លោក កើត ឆែ អភិបាលរងរាជធានីភ្នំពេញ បាន​ប្រាប់ឱ្យអ្នកសារព័ត៌មានពិចារណ និងឆ្លើយដោយខ្លួនឯងចុះ ដោយសារតែ​សាលាក្រុង​បានចេញសេចក្ដីប្រកាសរួចហើយ។

អភិបាលរងរូបនេះមានប្រសាសន៍ថា៖ «សួរខ្លួនឯង ហើយពិចារណាទៅ។ យើងបានឆ្លើយទៅរួចហើយ នៅក្នុងសេចក្ដីជូនដំណឹង មានហេតុផលឆ្លើយរួចហើយ យើងអត់ឆ្លងឆ្លើយជាមួយពួកគាត់[កូដករ]ទេ»។

លោកឆែ បានបន្តទៀតថា ការអនុវត្តកន្លងមកចំពោះកូដករ គឺជាវិធានការអប់រំឱ្យ​ពួកគេ​រាងចាល និងគោរពតាមសេចក្ដីណែនាំរបស់អាជ្ញាធរ ដើម្បីទប់ស្កាត់ការរីករាលដាល​ឆ្លង​មេរោគអូមីក្រុងក្នុងសហគមន៍ ប៉ុន្តែក្នុងករណីកូដករនៅតែរឹងរូស អាជ្ញាធរនឹង​ប្រើវិធានការ​ច្បាប់មកអនុវត្ត។

លោកបញ្ជាក់យ៉ាងដូច្នេះថា៖ «បើអប់រំហើយមិនព្រមរាងចាលទៀត មិនព្រមស្ដាប់ការ​អប់រំទៀត នៅតែចចេសទៀតយើងនឹងប្រើវិធានការច្បាប់ពិន័យប្រាក់ពួកគាត់ កាលពី​ម្សិលមិញយើងយកទៅ៣៩នាក់ មានវិជ្ជមានកូវីដ៤នាក់ហើយ»។

លោកបន្ថែមថា ក្នុងករណីថ្ងៃនេះ ក្រុមកូដករនៅតែបន្តសកម្មភាពប្រមូល និងធ្វើ​សកម្មភាពខុសច្បាប់បន្តទៀត អាជ្ញាធរនៅតែបន្តអនុវត្តដូចកូដករមុនៗដែរ។​

លោកអះអាងថា៖ «បើថ្ងៃនេះគាត់អញ្ជើញមកទៀត ធ្វើសកម្មភាពខុសច្បាប់បន្តទៀត អាហ្នឹងយើងនឹងធ្វើសំណាក ហើយបើមានអ្នកវិជ្ជមាន យើងអនុវត្តវិធានការបន្តទៀត គឺការពាររោគឆ្លង»។

យ៉ាងណាមិញ កាលពីថ្ងៃទី២២ កុម្ភៈ សាលាក្រុងបានសម្រេចពិន័យអន្តរការណ៍ ដល់កូដករ ជាប្រាក់ចាប់ពី ១លាន ដល់ ៥លានរៀល ស្តីពីវិធានការចត្តាឡីស័កដើម្បីទប់ស្កាត់​ការឆ្លង​រាលដាលនៃជំងឺកូវីដ-១៩ ដើម្បីឱ្យមានការរាងចាល។

កូដករណាហ្គាវើលដ៍ត្រូវបានសមត្ថកិច្ចចាប់បង្ខំឲ្យពួកគេចូលក្នុងរថយន្តក្រុង ខណៈពេលពួកគេបានត្រឡប់ មកបន្តធ្វើកូដកម្មឡើងវិញក្បែរអគារក្រុមហ៊ុនកាស៊ីណូ​ណាហ្គាវើលដ៍ ក្នុងរាជធានីភ្នំពេញ។ រូបថតថ្ងៃទី២៣ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង
កូដករណាហ្គាវើលដ៍ត្រូវបានសមត្ថកិច្ចចាប់បង្ខំឲ្យពួកគេចូលក្នុងរថយន្តក្រុង ខណៈពេលពួកគេបានត្រឡប់ មកបន្តធ្វើកូដកម្មឡើងវិញក្បែរអគារក្រុមហ៊ុនកាស៊ីណូ​ណាហ្គាវើលដ៍ ក្នុងរាជធានីភ្នំពេញ។ រូបថតថ្ងៃទី២៣ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង

សម្រាប់បញ្ហានេះ លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា មើលឃើញ​ថា ការអនុវត្តវិធានការសុខាភិបាលមកលើក្រុមកូដករ​ គឺមិនស្របគ្នា​និងបរិបទប្រទេសកម្ពុជា ខណៈរដ្ឋាភិបាលមិនបានប្រកាសឱ្យបិទប្រទេស ឬបិទការជួបជុំណាមួយឡើយ ពោលគឺ​រឹតត្បិតតែមកលើកូដករ។

លោកស្រីថ្លែងថា៖ «យើងដឹងហើយថា ប្រទេសកម្ពុជាយើងក៏មិនបានប្រកាសថាបិទទីក្រុង ឬតំបន់ណាមួយជាក់លាក់ ឬក៏ហាមប្រាមការជួបជុំតែម្ដងនោះទេ ចឹងការប្រើប្រាស់​ហេតុផល​នៃស្ថានភាពរីករាលដាលជំងឺកូវីដ មកអនុវត្តតែចំពោះការជួបជុំរបស់កូដករ គឺជាកាដៅមុខសញ្ញា»។

លោកស្រីបន្តថា តាំងតែពីកូដករប្រកាសធ្វើកូដកម្ម គឺមានការទប់ស្កាត់តាំងពីដំបូងមកម៉្លេះ មុនការរីករាលដាលនៃជំងឺកូវីដនេះទៅទៀត ខណៈបច្ចុប្បន្នការជួបជុំផ្សេងៗត្រូវបានអនុញ្ញាត តែការជួបជុំរបស់កូដករត្រូវបានហាមឃាត់ ស្របពេលដែលកូដកររក្សាគម្លាត រក្សាអនាម័យ​បានត្រឹមត្រូវ។  

លោកស្រីបន្តទៀតថា៖ «អាជ្ញាធរបានអះអាងអំពីក្ដីបារម្ភពាក់ព័ន្ធនឹងកូវីដ តម្រូវ​ឱ្យកូដករ​ចត្តាឡីស័ក និងតេស្ត វាផ្ទុយពីអ្វីដែលអាជ្ញាធរខ្លួនឯងបានធ្វើ ព្រោះបើបារម្ភពីការរីករាលដាល ចឹងអាជ្ញាធរមិនគួរទៅប៉ះពាល់រាងកាយ ចាប់សែង អូសទាញ ប្រទាញប្រទង់​កូដករ ខុសពីវិធានដែលត្រូវរក្សាគម្លាត»។

លោកស្រីបន្តថា អាជ្ញាធរត្រូវមានវិជ្ជាជីវៈក្នុងការអនុវត្តការងារ និងធានាដល់សិទ្ធិ​ពលរដ្ឋ​ក្នុងការជួបជុំដោយសន្តិវិធី និងអនុលោមទៅតាមគោលការណ៍សិទ្ធិមនុស្ស មិនអាចទៅ​ប្រើប្រាស់ហិង្សាទៅលើកូដករណាមួយនោះទេ។

បើតាមក្រុមកូដករបានឱ្យដឹងថា គិតត្រឹមរសៀលថ្ងៃទី១៩ ខែកុម្ភៈ នេះ កូដករជានិយោជិត និងសមាជិកសហជីពនៃក្រុមហ៊ុនណាហ្គាវើលដ៍ប្រមាណចំនួន ៤៩២ នាក់ បានមកចូលរួមផ្តល់សំណាកលើក​ទីពីរ​តាមការកំណត់របស់ក្រសួងសុខាភិបាល។

សូមបញ្ជាក់ថាចាប់តាំងពីថ្ងៃទី១៨ ខែធ្នូ ឆ្នាំ២០២១ មក កូដករ​នៃក្រុមហ៊ុន​ណាហ្គាវើលដ៍​បានធ្វើកូដកម្មដោយសន្តិវិធី ដើម្បីទាមទារដំណោះស្រាយដោយយុត្តិធម៌​ក្នុងវិវាទការងារ​ជាមួយក្រុមហ៊ុនណាហ្គាវើលដ៍ និងទាមទារឱ្យមានការដោះលែងសមាជិក និងថ្នាក់ដឹកនាំ​សហជីព ដែលជាប់ឃុំក្នុងពន្ធនាគារដោយសារភាពសកម្ម​របស់ពួកគេ​ក្នុងការទាមទារ​ដំណោះស្រាយក្នុងករណីវិវាទខាងលើចំនួន៩ចំណុច។

តែថ្វីបើយ៉ាងនេះក្ដី ការធ្វើកូដកម្មរបស់ពួកគេត្រូវបានឱ្យផ្អាកនៅថ្ងៃទី៤ ខែកុម្ភៈ ឆ្នាំ២០២២ បន្ទាប់ពីក្រសួងសុខាភិបាល ចេញសេចក្ដីប្រកាសឱ្យកូដករទាំងអស់​ទៅធ្វើតេស្ត​រកមេរោគ​កូវីដ-១៩ ហើយក្នុងករណីមិនគោរពតាមសេចក្ដីណែនាំត្រូវប្រឈមមុខនឹងវិធានការច្បាប់។

គួរជម្រាបជូនថា កាលពី​ថ្ងៃ​ទី​៩​ ​ខែកុម្ភៈ​ កន្លងទៅ ​កូដករ​ចំនួន​ ​៣​នាក់​ត្រូវ​បាន​ចោទប្រកាន់​ក្រោម​ច្បាប់​កូ​វី​ដ​១​៩​ ​ពី​បទ​រារាំង​វិធានការ​អនុវត្ត​ជំងឺ​កូ​វី​ដ​១​៩​ ​ ​និង​ដាក់​ពន្ធ​នាគា​រ​។ ​ក្នុងនោះ ​កូដករ​ ​៨​នាក់​ក្នុងចំណោម​អ្នក​ទាំង​ ​១​១​ ​ត្រូវ​បាន​ចោទប្រកាន់​ពី​បទ​ញ៉ុះ​ញ៉​ង់​។​ ​

ជុំវិញបញ្ហានេះ អ្នករាយ​ការណ៍​ពិសេស​របស់​អង្គការសហប្រជាជាតិ​ចំនួន​៥​នាក់ កាលពី​ថ្ងៃ​ទី​​១៦​ ​ខែកុម្ភៈ​ ​បានលើកឡើងថា ការប្រើប្រាស់វិធានការអនុវត្តជំងឺកូវីដ១៩ មកលើក្រុមកូដករ គឺមិនស្មើភាពគ្នា និងចាត់ទុកថាមិនសមហេតុផល។

អ្នករាយការពិសេសរបស់UN ថ្លែងជាសាធារណៈថា៖ «ភាព​មិន​ស៊ី​សង្វាក់​គ្នា​ទូទៅ​ ​និង​កង្វះ​តម្លា​ភាព​ នៅ​ក្នុង​វិធានការ​អនុវត្ត​ជំងឺ​កូ​វី​ដ​១​៩​ ​របស់​ប្រទេស​កម្ពុជា​ ​ដោយ​ហៅ​ការ​ចាប់ខ្លួន​ទាំង​បី​នេះ​ថា​ មិន​សម​ហេតុផល​ ​មិន​ចាំបាច់​ ​និង​មិន​សមាមាត្រ​»​៕​

365 views

ព័ត៌មានទាក់ទង

ព័ត៌មានថ្មី

អត្ថបទពេញនិយម